رواية زواج مثالي - بقلم الكاتبة منى محمود - الفصل الثالث والعشرون
روايه زواج مثالي
بقلم الكاتبة منى محمود
الفصل الثالث والعشرون
رواية
زواج مثالي
ترجمة مشاعرنا غلط مش بس ديما بتأذينا لا دي ممكن تأذي غيرنا بدون اي ذنب له كل غلطة أنه بيكون في حياتنا في وقت احنا مش فاهمين فيه نفسنا ف بنجرحة ونأذية بدون قصد منا
بعد يوم كامل من وقت اغماء صابرين ولهفه وخوف اخوها وابوها وامها عليها ... يوم فضلت صابرين فيه ساكتة تماما ... قرر انس أن يرجع وصابرين معاه وابوة وافق وطلب كمان من احلام تنزل معاهم عشان تعمل الواجب وتسأل علي لمار ويقضو يومين تلاته هناك ويرجعو تاني تكون صابرين اتحسنت شوية انس كلم مكة في التلفون وفهمها الوضع
في الطريق كانت صابرين شاردة في الكلام اللي قالو لها انس بعد ما فاقت واللي حصل بعده
انس ...
ممكن اتكلم معاكي شوية اوعدك مش هتعبك
صابرين بصوت ضعيف ....
اتكلم يا انس عايز تقولي ايه ؟
انس ...
عايز اسالك سؤال واحد بس
صابرين بعدم فهم ...
سؤال ايه يا انس ؟
انس ....
انتي كنتي بتحبي عبد الله اصلا ؟
صابرين ...
ودا هيفرق اوي في اللي حصل ؟
انس ...
طبعا هيفرق يا صابرين ولو سمحتي ردي عليا
صابرين ...
ما انت عارف يا انس ان انا وهو واخدين بعض صالونات و كنا محكمين عقلنا في ال موضوع هو من الاول قالي انا اخترتك لعدة أسباب وكلها عقلانيه وانا كمان انا مش بتاعه حب والكلام دا
انس ...
سبحان الله اومال اضايقتي ودخلتي في الحاله دي ليه ؟ اللي يشوف هروبك من الواقع و دخولك عالم الروايات اللي مش بتدخليه غير وانتي مكتئبه أو تحت ضغط جامد يقول إنه جرح قلبك و كان في قصه حب كبيرة ومكملتش
صابرين مردتش وهو كمل
انس بقوة. ...
ردي عليا يا صابرين لما هو مفيش حب الحاله دي كانت ليه ؟ من حقي افهم
صابرين بانفعال ...
الحاله دي يا انس كانت عشان الكلام اللي قالهولي كانت عشان ثقتي في نفس اللي هزها كانت عشان الطريقه اللي اتعامل معايا بيها وهو ماشي قد ايه يحسسني ان انا ولا حاجه وان هو حاجه كبيره قوي قوي وانا ما استاهلوش ودي مش الحقيقه مش الحقيقه يا انس
انس ...
ولما انتي عارفه ان دي مش الحقيقه عملتي في نفسك كده ليه بتهربي في الروايات ثاني ليه مش كنا بطلنا الهروب ده
صابرين بصوت مخنوق ....
عشان مهما اكون عارفه نفسي بس برده كلامه جرحي جرحني قوي يا انس واللي جرحني اكثر ووجعني ان وقتها ما عرفتش ارد عليه ولما جيت ارد عليه بعد ما مشي لقيته عملي بلوك من كل حاجه حسيت ان انا مخنوقه كان حد اداني بعصايه على راسي وعلى ما فوقت كان هو جري ومشي ما عرفتش اخذ حقي عشان كده ما لقيتش حاجه اعملها غير اني اهرب ثاني امسك تليفوني واطلع روايتي واقعد اقري فيهم وأهرب من الواقع اللي مش عاجبني واعيش في عالم ثاني عالم انا باحلم بيه على طول وعارفه ان مستحيل يحصلي يمكن دي الحاجه اللي بتهديني زي المسكن كدة .... اه هربت يا انس بس انا كنت هاعمل ايه اطلع اجري على القهوه واوقفه واشتمه ولا اروح له البيت واقول له عايزه اتكلم معاك وقتها بقا اللي هيتشاف ان انا بجري وراه وبتحايل عليه يرجعلي عشان كده ما عرفتش اعمل حاجه غير اني اهرب بروايتي ثاني انا تعبانه بجد انا عمري ما اذيته كان عايز يمشي يمشي من غير ما يعمل فيا كده انا كده كده ما حبيتوش وكده كده مش عايزه احب الا اللي احس ان هو دا اللي هيبقى جوزي فعلا انا محافظه على قلبي لواحد بس والواحد ده مش عبد الله
انس وهو بيحضنها ....
ممكن تهدي لازم تعرفي ان هو اللي خسران خسران جوهره خسران ست ب 100 راجل خسران حاجات كثير قوي قوي يا صابرين وانتي قلتي كلمه دلوقتي صح ميه في الميه انتي محافظه على قلبك لراجل بجد والراجل ده مش هو عبد الله حبيبتي الهروب عمره ما كان حل عمره ما هيحل اي مشكله انتي عارفه كويس قوي أن كل مرة بتهربي فيها بتتعبي اكثر بعدها مافيش اي حاجه هتخليكي مرتاحه غير انك تحسي انك اخذتي حقك ويا ستي لو على حقك ما تقلقيش حقك هيجيلك ولغايه عندك وهاسمعك النهارده انا هاعمل فيه ايه وهاسمعه ايه وهاعرفه هو مين وانتي مين
صابرين بسرعه ...
لا عشان خاطري ما تروحش خلاص انا مش زعلانه مش عايزه اعمل لك مشاكل يا حبيبي
انس بضحك ....
لا اوعي يكون قصدك انتي كمان ان انا ضعيف وهتعب وهدخل المستشفى زي ما امك عملت فيلم حمضان وما رضيتش تقولي على ان انتي فسختي خطوبتك اوعي تكونوا شايفني فستك قوي كده لا لا لا اخوكي جامد يا بنت انتي
ضحكت صابرين ...
لا طبعا عارفه انك اقوي راجل في الدنيا انا بس مش عايزه مشاكل صدقني ما لوش لازمه خلاص الموضوع بقى له كام يوم هيحصل شوشره وكلام كثير انا في غني عنه خليني اروح معاك بس اغير جو ممكن ؟
انس ....
من غير ما تقولي حضرتك امك بره بتقول لابوكي وهتحضر شنطتها وشنطتك وهتيجوا معايا تقعدوا كام يوم هناك اهو تسالوا على لمار وتبقوا جنبي شويه انا ومكه الايام دي وبعدين تبقوا ترجعوا ثاني وقت ما تحبي سيادتك المهم التلفون دا يتساب من اديكي يا صابرين عشان متغباش عليكي
ضحكت صابرين وحضنت اخوها اوي
رجعت افتكرت لما قال إنه هيخرج يجيب عشا من برة وبعد ما خرج ب عشر دقائق اتصل عليها ولما فتحت سمعت صوته وهو بيتكلم مع عبد الله علي القهوة
انس ...
السلام عليكم ازيكم يا رجاله عاملين ايه
ردو عليه كلهم السلام وعبد الله اتوتر وحس أن انس جيلة مخصوص
انس ...
معلش يا عبد الله ممكن نقعد بس بعيد شويه عايزك في كلمتين
عبد الله بتوتر وارتباك ...
ا اه طبعا اتفضل اتفضل
بعدو شوية وقعدو علي ترابيزة بعيدة عن الناس كل دا وصابرين علي التلفون مع اخوها وسمعه كلمة كلمة بتتقال
انس ...
بص يا عبد الله انا مش هاطول معاك في الكلام انت اكيد عارف انا جاي هنا ليه
عبد الله لسه هيتكلم قاطعه انس بهدوء شديد
انس ...
استنى بس استنى انا اللي عايز اتكلم وانت تسمعني انت اظن اتكلمت واخذت فرصتك كويس قوي وقلت كل اللي في قلبك لاختي جوه بيتها وما احترمتش حتى الرجاله اللي انت قعدت معاهم مش كده انا بقى هسمعك ردي على الكلام اللي انت قولته لها انت بتقول لها انها مش مميزه وانها عاديه ومفهاش اي حاجة تتحب عليها مش كدة معلش بس يا عبده انا عايز اعرف بس انت تتحب على ايه على جسمك اللي مش منسق على بعضه ولا على شهادتك الجامعيه اللي اقل من شهادتها ولا على شغلك اللي برده لو هي اشتغلت هيبقى شغلها اعلى من شغلك ولا على عيلتها واصلها وفصلها مش عايز اقول وعائلتك واصلك عشان مش حلوه ... هل انت تتحب على ادبك اخلاقك رجولتك انت شايف ان هما موجودين اصلا لما تبقى تشوف نفسك راجل بجد ابقي روح واتكلم بعد كده مع بنات الناس ونصيحه من راجل بجد لما تيجي تنهي موضوع زي ما قعدت مع رجاله انهي مع رجاله بردو عشان تتحسب من صنف الرجاله هه يلا السلام عليكم
قام انس ومشي ومستناش يسمع كلمه واحدة من عبد الله اللي كان الغضب مسيطر عليه وصابرين الضحكة اترسمت علي وشها وسمعت صوت انس
انس ...
قلب اخوكي ياريت تكوني ارتاحتي دلوقتي بعد ما جبتلك حقك ومش بس كدة قبل ما اخرج ابوكي قالي أنه اتقابل امبارح مع ابو عبد الله وكام حد من كبار البلد و حكي اللي عبد الله عمله وكلهم غلطوة مرضيه يا حبيبتي
صابرين ببتسامة ...
مرضيه يا قلب اختك ربنا يخليك ليا ويديمك في حياتي سند وضهر العمر كله يارب
فاقت من شرودها علي صوت انس أنهم وصلو البيت و طلعت احلام و صابرين علي طول علي شقة ابتسام يعملو الواجب الاول
❈-❈-❈
ابتسام ببتسامة ....
يا الف اهلا وسهلا نورتونا والله اتفضلو اتفضلو
احلام ...
حمدالله على سلامه لمار يا حبيبتي سامحيني جت متأخرة شوية معلش
ابتسام ...
الله يسلمك حبيبتي تسلمي وبعدين احنا اهل يا احلام مفيش بينا الكلام دا
احلام ...
ونعم الأهل والله
خرجت زهرة في الوقت دا ورحبت بيهم هي كمان و بعد حوالي ساعه كانو متجمعين كلهم علي الغدا عند ابتسام
عمار بفرحة ...
والله لمتنا دي وحشتني اوي ... منورين يا جماعه
احلام ...
دا نورك يا حبيبي ... بس مكنش له لزوم لكل دا يا ابتسام احنا مش غرب يعني
ابتسام ...
شوفي الست الواد يقول فرحان وهي تقول مكنش له لزوم ما تشوفي اختك يا ايمان
ايمان وهي بتاكل ...
ولا اعرفها انا جعانه دلوقتي
انس بمرح ....
انا من زمان شاكك ودلوقتي اتاكدت
عدي ...
دا ال هو ايه ما توضح
انس ...
البت صابرين بردو الاكل يتحط خلاص كدة ولا ليها دعوة باي حاجة بتحصل حواليها كنت شاكك أنها طالعه ل خالتو ودلوقتي اتاكدت خلاص
ايمان برفعه حاجب ...
ودا مش عجبك مثلا يعني ولا ايه ؟ الاكل له احترامة علي فكرة
انس بخوف مصطنع ....
انا اتكلمت يا خالتو انا بس بقول أنها شبهك مش اكتر
صابرين ببتسامة ....
هو انا اطول ابقي شبه القمر دا في اي حاجة
مكة ...
امي دي اللي الحفلة عليها هه
محسن وهو بيخبطها علي رأسها ...
حفله ايه يا آخرة صبري نقي كلامك بقا
عدي ...
استنو بصو تالا نامت علي حجر خالتو ازاي يا حرام قوم يا بني ادم انت شيلها نيمها جوة
احلام ...
لا سيبها نائمه حرام لو حركتها دلوقت هتصحى خليها وانا لما نخلص غدا هاشيلها و هانيمها بنفسي
عمار بضحك ...
فاكر ياض يا عدي لما انس اتقلب من علي ترابيزة السفرة وهو نايم هههههههههههههههه
عدي وهو بيضحك ....
يالهوي ع دا يوم هههههههههههههههه كان شكله مسخرة
زهرة ...
لا معلش انا عايزة اعرف حصل ايه
هايدي ...
أيوة وانا كمان عايزة اعرف
مكة ...
الله الحفلة انتقلت من امي ل دوزي
انس بسخريه ...
منه له دوزك دي ال هي علي وزن جوزك صح كدة
مكة ...
اه صح كدة
عمار ...
خدت بالك بيتوه في الكلام
عدي ...
اه خدت بالي بس علي مين انا مراتي عايزة تعرف مينفعش اسيبها بفضولها كدة دي هايدي في الفضول مبتهرزش
هايدي برفعه حاجب ...
نعم يا عدي !
عدي بسرعه ...
حبيبه قلبي انا هحكيلك
انس ...
ما خلاص يا عم انت وهو في ايه
عمار ...
ابدا لازم نحكي (بص ل زهرة ) بصي يا حبيبتي الواد دا واحنا صغيرين كان بينام كتير اوي وفي اي حتة تلاقيه نام علي السلم في العربيه في الحمام حتي مش مهم
عدي كمل ...
كان يقولك طالما النوم حضر إذا انا له منصاع
هايدي. ..
ايه الجمله دي ؟ فيها حاجة غلط
مكة ...
يختي متركزيش خليهم يكلمو انا بحب الحكايه دي اوي
انس ...
منكم لله كلكم و أولكم مراتي
عمار كمل ....
المهم كنا مرة بنتغدي كدة كلنا و مكنش في كراسي علي عددنا ف انس كان قاعد علي ايد الكرسي جمب طنط احلام وكلنا بقي بناكل ونتكلم وهوووووب نلاقي انس دا ضرب شقلباز في الجو نزل علي رأسه وقبل ما نستوعب ال حصل لاقيناه قام وبيتلفت حواليه بسرعه بيقول (غير نبرة صوتة ) ايه دا ايه دا ايه دا هههههههههههههههه كلنا بقا فضلنا نضحك وهو عمال يلف حوالين نفسه ومفيش ع بؤة غير ايه دا ايه دا هههههههههههههههه
الكل بدء يضحك حتي انس ضحك معاهم
محسن ...
طول عمرة اهبل ميتخيرش عنكم ابدا الله يرحمو اخويا كان ديما يقولي في أواخر ايامة معلش يا محسن سيبلك تلت رجاله اهبل من بعض
البنات هنا ضحكو بصوووت عالي جدا حتي راويه ضحكت من قلبها معاهم والشباب كشرت
عدي ....
انا نفسي تحترمنا شويه حتي قدام مراتتنا
محسن ...
لا انا براحتي وبعدين انت بالذات اهبل ومراتك عارفه انك اهبل
عمار ...
اسكت يا عدي لحسن عمي كل ما تزود معاه كلمة بيغمق معاك اكتر
هايدي بضحك ...
والله عمي دا عسل وبيقول كلام زي الفل
عدي برفعه حاجب....
نعم يا قمر ؟ كلام اي اللي زي الفل
هايدي بنعومة ...
اللي عمي محسن بيقولو يا حبيبي
مكة بضحك ...
اهي حبيبي دي مفروض تخليك تسكت بقا تدري ليش ؟
عدي ...
ليش ؟
مكة ....
لأنها بتثبتك تثبيت صريح و واضح ف انت مفروض تقدر دا
عدي ....
لا اقنعتيني بصراحة
فضلو يهزرو ويضحكو ومش حاسين بالوقت لدرجة أنهم خلصو اكل من بدري ولسه قاعدين علي السفرة زي ما هما كأنهم ما صدقوا أنهم اتجمعو تاني وخايفين يقومو لاي حاجة تحصل و تفرق شملهم من تاني
❈-❈-❈
وبعد وقت جميييييل خلص بسرعه قرب منتصف الليل دخل كل واحد علي بيته عمار لسه هيدخل ينام تلفونه رن برقم يوسف خرج البلكونة ورد
عمار ...
الو يا يوسف ازيك يا حبيبي ؟
يوسف ...
باشاتنا عامل ايه يارب تكون بخير ؟
عمار ...
تمام يا حبيبي تسلم
يوسف ...
بقولك يا باشا فاكر الواد اللي اسمه حسن اللي من كام يوم سالتني عليه ؟
عمار بلهفه مداريه ...
اه اه فاكره ماله ظهر ؟؟
يوسف ....
لا ظهر ايه دا احنا جالنا اخباريه من العصر كدة أنهم لاقو جثته مرمية في المقطم و طلعت مع القوة اللي راحت وطلع هو فعلا واخد حوالي ١٥ ل ٢٠ طعنه في مناطق متفرقة في جسمة
عمار ...
لا حول ولاقوة الا بالله ومعرفتوش مين عمل كدة ؟
يوسف ...
لا لسه ملحقناش انا بعد ما رجعت القسم وبدأت اشتغل افتكرت انك سالتني عليه قبل كدة ف قلت اقولك وأشوف لو عندك اي معلومة تفيدني في التحقيقات
عمار اتوتر بس حاول يداري توتره دا هو مش عايز اسم اختة يتعرف في الحوار و مش عارف يرد علي يوسف يقوله ايه
يوسف بشك ...
عمار في حاجة انت مخبيها عليا ؟ قول يا صاحبي ومتقلقش
عمار بقلة حيلة ....
طيب يا يوسف الكلام مش هينفع في التلفون تقدر تعدي عليا بكرة بعد ما تخلص شغلك ؟
يوسف بجديه ....
تمام يا عمار بكرة بعد العصر كدة هكون عندك يلا اسيبك تنام بقا يا حبيبي تصبح علي خير
عمار ...
وانت من أهله الخير ... سلام
قفل عمار وفضل قلقان ومتوتر حاول ينام طبيعي اكتر من مرة فشل وفي الاخر اخد حبيتين منوم لانه كان محتاج للراحة باي شكل
❈-❈-❈
في شقه انس دخلت احلام و صابرين ينامو و مكة خدت تالا معاهم في اوضتها هي وانس وكانت قاعدة مع انس بتفهم منه اللي حصل ل صابرين وبعد ما خلص
مكة بضيق ...
دا انسان متخلف ومش متربي والحمد لله انها خلصت منه دلوقتي قبل ما كانت تدبس معاه
انس ...
المهم يا مكة اليومين ال هتقعدهم هنا مش عايزاها تمسك التلفون خالص عشان خاطري ساعدني أبطلها العادة دي ممكن
مكة ...
انت بتقول ايه يا انس صابرين دي اختي ع فكرة وربنا يعلم انا بحبها اد اية متقلقش انت انا هتصرف
انس بتحذير ...
مش محتاج أكد عليكي طبعا أن محدش يعرف حاجة
مكة كشرت. ....
اتمسي يا انس عشان مزعلش منك هه
انس ...
مقصدش يا حبيبتي انا بس مش عايزاها تتحرج من اي حد هنا
مكة ...
قلتلك خلاص هتصرف والله متقلقش
انس ...
لسه كدة فاضل مشكله كمان
مكة ...
في اي تاني ؟ هو يوم باين من أولو
انس ....
الأخوة اللي احنا عايشين فيها دي اخرتها ايه ؟ كدة كتير ع فكرة وظلم واستبداد كمان
مكة برفعه حاجب. ...
ليكون مش عجبك العقاب بتاعي ؟ والله
قطاعها انس بسرعه ....
استهدي بالله كدة ومتحلفيش انا مقلتش مش عجبني انا بقول كتير المدة كبرت اوي وانا بجد مش قادر ( هدي نبرة صوتة واتكلم بهمس ) وحشتيني اوي يا مكة بجد وحشتيني هو انا معقول كل دا موحشتكيش ؟
مكة بحب ...
لا طبعا وحشتني
انس وهو بيقرب منها ...
الله طب لما انا وحشتك وانتي وحشتيني اية بقا
مكة وهي بتبعد ....
اية انت تالا معانا وماماتك واختك في الاوضة اللي جمبنا اتلم يا انس ونام يلا
انس وهو بيديها ضهرة بعصبية وبيشد الغطا علية ....
هتخمد اهو يا مكة اهو يارب ترتاحي كدة
ضحكت مكة وحضنت بنتها ونااامت نوم عميق
❈-❈-❈
تاني يوم الصبح محسن جمعهم كلهم علي الفطار قبل حتي ما اي حد ينزل شغله فطرو سوا والضحكة علي وشهم والفرحة بدات ترجع لحياتهم الا عمار اللي لسه قلقان وخايف في اي وقت اختة تتفضح وكان باين للكل سرحانة و القلق المرسوم علي وشه لكنه اتحجج أنه في قضيه جديدة وهو مسكها ف شغله باله الكل اقتنع الا لمار ال حست أن الموضوع يخصها لكنها سكتت
بعد الفطار خرج كل واحد علي شغله وكلم عمار يوسف وقاله أنه جيله علي القسم ميجيش هو وفعلا خلال ساعه كان عمار قاعد مع يوسف في مكتبه
يوسف ....
فهمني بقا في ايه انا بدأت اقلق
عمار ....
هفهمك بس معلش عرفني الاول تلفون الواد دا كان معاه ؟
يوسف ...
لا مكنش معاه تلفون فهمني يا عمار في ايه ؟
عمار ...
انت اكيد عارف ال حصل لأختي مش كدة ؟
يوسف ...
اه طبعا وكلمتك وقلتلك متقلقش معتز اصلا متروق ومتوصي عليه اوي بس دا ايه علاقته بحوار حسن
عمار بثبات ....
حسن يا سيدي يبقي عامل الفندق اللي لمار اداته فلوس عشان يصور معتز مع الزباله ال كانت معاه وانت شايف بنفسك وضع لمار ايه لو اتعرف أنها كلمت حسن أو كانت علي تواصل معاه هتدخل في دائرة التحقيقات وسين وجيم وهي حاليا مش ناقصه الدكتور اصلا ماكد علينا أنها تبدء علاج نفسي فهمت بقا انا مش عايز اتكلم ليه
سكت يوسف ثواني بيفكر في كلام عمار وعمار ثابت زي ما هو
يوسف ببتسامة ...
اوكي يا باشا ولا كانك كلمتني ولا كاني سمعت حاجة اختك هي اختي اكيد
عمار ببتسامة ...
دا العشم بردو يا يوسف تسلم يارب
يوسف برفعه حاجب ...
بس انت عارف طبعا أن محدش في الزمن دا بيعمل حاجة بدون مقابل ولا ايه
عمار اتصدم كدة شوية وبعدين رد ....
مقابل ايه اللي انت عايزة ؟
يوسف ....
اكله محشي وبط وملوخيه من ايدين الحجة لحسن عيشه العزوبيه اللي عيشها دي مبهدله اخوك والله يا جدع
عمار وهو بيضربه ف كتفه ...
والله انك عيل بارد انا صدقت بجد انك هتندل معايا يا بايخ
يوسف بضحك ....
عيب عليك بس بردو الطلب ال طلبته انا جد فيه جدا جدا جدا اه انا في الاكل مبهزرش
عمار ....
خلاص يا عم بكرة أن شاء الله الغدا عندي وهخلي الحجة تظبطك مرضي كدة ؟
يوسف ....
هو دا الكلام انا همنع اكل من النهارده بقا عشان اكل بكرة بمزاج كدة واعرف استمتع يييييا الواحد جاع ع السيرة والله
ضحك عمار علي صحبه اللي مش هيتغير الاكل شيء أساسي في حياته والجدعنة كمان
❈-❈-❈
البنات كلهم اتجمعو في شقه ابتسام عشان ميتعبوش لمار ومكة مش سيبه فرصه ل صابرين خالص أنها تمسك التلفون
هايدي كانت قاعدة قلقانة و عينيها علي تلفونها ديما قربت منها زهرة
زهرة ....
مالك يا دودي مش علي بعضك ليه ؟
هايدي بضيق ....
عدي نفذ اللي في دماغه وخد هو كريم يوصله ل باباه وانا قاعدة قلقانة يحصل بينهم اي حاجة خصوصا قدام كريم
زهرة بتفهم ....
متقلقيش عدي استحاله يعمل اي مشكله قدام كريم
قاطع كلامهم صوت تلفون هايدي ال فتحت قبل حتي ما اول رنه تكمل
هايدي بلهفه ...
الو يا عدي
عدي ....
ايه يا حبيبي مال صوتك مخضوض كدة ليه
هايدي ....
حصل حاجة بينك وبين وليد ؟ كريم فين دلوقتي ؟
عدي ....
اهدي شوية محصلش حاجة نهائي وكريم معاه في الملاهي و علي الساعه خمسه كدة هرجع واخدة تاني ونروح في ايه للقلق دا كله
هايدي. ..
مش عارفه ليه مش مصدقاك
عدي ....
وانا هكدب ليه وهكدب ف ايه اصلا
هايدي ....
في أن محصلش شد بينك وبين وليد
عدي ....
لا حبيبي صدقيني محصلش شد ولا حاجة هو مجرد ما شافني جايب كريم بنفسي فهم الرساله اللي عايز اوصلهالو واتعامل علي أساسها اطمني انتي متشغليش دماغك الحلوة دي بحاجات تافهه اشغليها بيا انا وبس
هايدي ابتسمت باحراج لأن زهرة جمبها...
احم طيب تمام
عدي ....
ممممم طالما قلتي احم يبقي حد جمبك صح
هايدي ...
ماشاء الله عليك ما انت شاطر اوي اهو
عدي ....
طول عمري علي فكرة كفايه اني اخترت احلي ست فيكي يا مصر
هايدي ....
في مصر بس ؟
عدي ...
في الدنيا كلها يا قلبي بقول ايه اقسم بالله اجي بالليل تقوليلي نام جمب كريم ها
هايدي بتحذير ....
ها ايه هه عرفني ؟
عدي ...
هزعل يا هايدي هزعل وانتي وضميرك بقا
هايدي ضحكت علي كلامة وفضلو يهزرو شوية وبعد ما قفلو مكة جمعتهم كلهم وجابت شنطة مليانة مسكات وكريمات وقررت اليوم يكون يوم بنات وبس
يتبع ....
