قراءة رواية نفق الجحيم الجزء الثاني كاملة

تنشر حصريًا على مدونة رواية وحكاية قبل أي منصة أخرى

قراءة رواية نفق الجحيم 

الجزء الثاني

من روايات وقصص 

الكاتبة ريناد يوسف

الفصل الثاني عشر

عديله خلصت كلامها ونقلت عيونها بين الكل، والكل سكت لكن رد عليها سلام وقالها:

ومن ميته الحريم عتورث؟ وبعدين انتي هتعملي ايه بالورث والفلوس ياستي وانتي في السن ديه؟!

عديله:

هعمل اللي اعمله، هجيب حمام واطيره حدش ليه صالح بيا.

كرار:تجيبي حمام وتطيريه!

عرفتي ليه الحريم متتورثش، عشان ميوبقاش الراجل تعبان وشقيان طول عمره عشان يعمل القرش للزمن وتاجي المره في الاخر تجيب بشقاه وتعبه حمام وتطيره! 

عديله:

-اقفل خاشمك انت وهو ومحدش يتحدت معاي، اني كلامي بيني وبين ولدي، وديه شرع ربنا وحلاله، وبعدين لو مزعلك الحمام اللي هطيره فاني هروح احج بالفلوس واغسل بدني، هاه هتعترض على داي كمان ولا ايه؟

كرار بحزم:

مفيش ورث ليكي.

عديله بصت لولدها نعيم ومستنيه رده وهو بعد تفكير قالها:

هنعطوكي اللي يكفيكي تروحي الحج يمه.

عديله:

له مش اللي يوديني الحج بس، اني ليا حق وعايزاه.. وكمان ليا ورث من ولدي توفيق كنت هسيبه لعياله بس بعد قلة ادب ولده كمان عايزاه.

ردت عليها حوريه النوبادي:

واني ليا ورث فجوزي وعايزاه طالما كل واحد هيدور عاللي ليه.

عديله:

خديه حد حاشك؟ 

نعيم بزعيق:

باااااس، اسكتي منك ليها، كمان الحريم هتقوم بروس وتطالب على ورثه ياك، خشو كل وحده تشوف وراها ايه، ومفيش ورث للحريم وديه اخر كلام ومفيش بعديه. 

حوريه اتبسمت وبصت لعديله بإنتصار لانها خلت خطتها فتشتيت الورثه فشلت، وخصوصي وهي عارفه ومتوكده الفلوس اللي عايزه تاخدها هتعمل بيها ايه وتديها لمين. 

دخلت عديله اوضتها بعد مابصت لنعيم بصة عتب، وحوريه كمان دخلت الموطبخ، ووقفت وربعت اديها على صدرها بتفكير، وشوقيه كانت واقفه وعينها عليها، وفهمت إنها عتنسج خطه وعتفكر بشي، ايه هو داي حاجه لازمن تعرفها، وضروري تعرفها. 

وطلعت تاني وفضلت واقفه على باب اضتها ومراقبه كل شي عيوحصول وكل كلمه عتنقال، ومن وقت للتاني عيونها تاجي فعيون كرار فتتبسمله وتهزله دماغها بتشجيع، وهو بس تعمل إكده حسه يعلا ويحاسب ويطالب بكل كبيره وصغيره، واتحدت مع عمه بخصوص كل شي ومهملش صغيره ولا كبيره الا وطالب بيها وطلب بتقسيمها. 

واتفقوا علي كل حاجه، وقرروا إنهم بكره يحسبو كل شي وبعد يوم ولا تنين يجيبو القياس يقيس ويقسم، 

وبعدها قام نعيم طلع أوضته وهو مهموم وحاسس إن كل اللي عيمله هو واخوه وحتى ابوه طول عمرهم، هده كرار واد اخوه فدقيقه وحده. 

قلع عمته ودخل في سريره واتمدد، وغمض عيونه وهو مقهور، لكنه قال لحاله يمكن إكده احسن، ولما يقسم على حياة عينه بدال ماعياله وعيال اخوه يختلفوا بعدين ويعملوا كيف اللي عيسمعوا عنهم عيكتلوا بعض عشان الورث. 

شويه وسمع صوت الباب عيتفتح، وعرفها من خطوات رجليها الخفيفه وهي عتقرب منه وتقعد جاره، وبلمسه حنونه حطت يدها على شعره ومسدت عليه وقالتله بهمس:

عارفاك مقهور ومتكاد، وعرفتك هتقعد تهري وتنكت فروحك فجيت اخفف عنك واقولك متزعلش روحك، هي الفلوس والورثه دلوكيت ولا بعدين مسيرها ليهم، ودلوك احسن من بعدين عالاقل يكون فى حضرة الكبير وتحقن الدم والمشاكل. 

فتح نعيم عيونه ورفع يده مسك يدها وقربها من خشمه حبها وقالها:

من يوم يومك حنونه ياعدويه وعتشيلي عن قلبي كل الهم والغم، صدقيني كل اللي قولتيه ديه هو اللي جه فبالي، ولسه قايله لحالي،

 اني بس كل اللي حازز فنفسي كلمة كرار واد اخوي - انت عمرك مهتكون كيف ابوي- مع ان داي الحقيقه بس وجعتني، اني عمري ماكنت كيف توفيق ولا هكون، توفيق برغم طيبة قلبه الا إنه قاسي وقت تلزم القسوة، لين مع الناس بس وكت الغلط انشف من الحجر..

 واني عمري ماعرفت اكون قاسي ولا ناشف.. عمري ماقدرت ازعل حد مني.. جايز اللي هيوحصول دلوك ديه لموصلحتي اني وانتي، وكان لازم يحصول من زمان؛ عشان متوبقاشي فيه دايماَ مفاضله بيني وبين اخوي كيف اللي كنت اشوفها فعيون الناس. 

اني عليم الله عمري ماحزت فنفسي ولا كنت عامل لبصات الناس ولا كلامهم باعت، بس كنت اشوفها فعيون عيالي وكت كانوا يشوفوا عمهم هو الامر الناهي واني اطيع زيي زيهم.. 

كنت اشوفها فتعبك وانتي شغاله زيك زي بت من بناتك وبنات اخوي، واختك واقفه علي راسك عماله تتامر وتتشرط عليكي وانتي تنفذي من خشم ساكت. 

ردت عليه عدويه بحنيتها المعهودة:

طب وفيها ايه يعني ماهي في الاول وفي الاخر اختي ولازمن اسمع كلامها حتي لو هي الصغيره بس ومالو برضها اختي ، وبعدين اني عخدم فحد غريب، مش لجوزي وعيالي وبيتي، وعيال اختي اللي كيف عيالي ومربياهم فحجري!

عمر الخدمه ماعتهد حيل يانعيم ولا عمر المحبه عتتعب، واني طول عمري ععمل الحاجه بمحبه؛ وعشان إكده ربنا مباركلي فحيلي وعيني وصحتي. 

نعيم بصلها وابتسم ورد عليها:

-طول عمرك قلبك اوبيض وحنينه ياعدويه، ووالله وحياة عيونك الحلوين دول اني كل مااتطلع عليكي احمد ربنا في سري إنك بقيتي من نصيبي واترحم علي ابوي اللي قسم القسمه وخلاكي من نايبي، واني اصلا كنت متمنيكي من ربنا بيني وبين روحي واقول يارب قسمهالي مع انها لتوفيق لان الكبيره للكبير، بس كان عندي امل فربنا، واقول يارب لما يختار اخوي توفيق ميختارهاشي هي، بس ابوي كارم عدل القول وليسه فحوريه اختك، كيف مايكون قلبه كان حاسس بيا وباللي فقلبي. 

اتبسمت عدويه بخجل ونزلت عيونها للارض ونعيم كمل:

حقك عليا ياعدويه مع انها جات متأخره، واوعدك ان اللي جاي كله هيكون لراحتك انتي وعلى هواكي، وأول شي هيتعمل هيوبقي بيت سياح نياح يتبني علي شرفك انتي وليكي لحالك، وتكوني كبيرته والآمره الناهيه فيه، وتقعدي وتتستتي والكل يخدمك، واديكي الحلوين دول ميتمدوش فأي حاجه واصل والحاجه تاجيلك لحد عندك، وحريم عيالك التنين يخدموكي. 

عدويه:

يانعيييم، بيوت ايه بس وأوامر ايه وبتاع ايه،، خلاص اللي باقي في العمر مش كد اللي راح واصل، واني اتولدت واتربيت واتجوزت وخلفت وهموت إهنه.. خلي البيوت للشباب اللي طالعه للدنيا جديد داي، وان كان عالخدمه ياسيدي ربنا يديم عليا الصحه وافضل اخدمك لحد مايخلص الأجل. 

نعيم : ربنا يعطيكي طولة العمر يااصيله يابت الأصول ياراضيه بقليلك ياطيبة القلب،ويجعل يومي قبـ... 

وقبل مايكملها عدويه حطت يدها علي خشمه منعتها تكمل وردت عليه بلهفه وخوف:

اوعا تدعي عليا الدعوه داي يانعيم، اوعاك تدعي عليا بالمذله والمرمطه والرخص، الوحده من بعد جوزها معتسواش بصله ولا حد عيعملها قيمه وعتوبقي لعبه فيد الصغير قبل الكبير وعتتمرمط، ومن بعد القيمه عتتقل قيمتها. 

ربنا يجعل يومي اني قبل يومك وتوديني بأديك وتعززني لأخر نفس واعيش رافعه راسي على حسك لحد ماتقع على صدري. 

نعيم بصلها ومتكلمش، لكنه فضل مبتسم وهمس لروحه:

صوح الدنيا معتديش كل حاجه، بس كل واحد عتراضيه باللي لو اتأمله يشوف حاله واخد حظه من الدنيا بزيادة، واني ربنا عطاني مره تغني عن كنوز الدنيا وجاهه.. الف حمد وشكر ليك يارب عالرفقه الطيبه والجوار الزين والسكن الدافي. 

❈-❈-❈

انفض المجمع من حوش الدار وكل واحد راح علي غرفته وهو عيحسب في باله ياتري هيطلعله ايه من الورثه وهيعمل بيه ايه وهيرتب اموره كيف من إهنه ورايح. 

كرار دخل لشوقيه اللي خدته بالحضن وفضلت تفخم فيه وفاللي عيمله ومبقتش تقوله غير يامقاول.

وسلام ومعروف وصفوت كل واحد كمان راح علي غرفته يشوف مع حاله هيعمل ايه الخطوه الجايه. 

وعزت هو كمان فضل يفكر ياتري إيه اللي عتؤول ليه اموره وهو ماحداهش ادنى تفكير يدير حياته لحاله كيف، لكنه قرر إنه كيف ماهيعملوا خواته وعيال عمه هيعمل ويمشى علي نهجهم وخلاص. 

أما عديله فدخلت اوضتها قبلهم وقت قالها نعيم تدخل، وقفلت الباب عليها وقعدت عالسرير جار شام ودموعها نزلوا غصب عنها وهي صعبانه عليها نفسها. 

شام بس شافت دموعها متحملتهمش وقالتها بشفقه:

بسك ياستي ايه اللي مبكيكي عاد، ان كان عالحج خدي الدهبات اللي حداكي بيعيهم وحجي واعملي اللي نفسك فيه، هو اني هعمل ايه بالفلوس يعني؟ 

ردت عليها عديله بهمس وصوت مغلوب:

بس ياهبله انتي ايه اللي عتقوليه ديه، اني اصلا عايزه الفلوس عشانك وعشان بتك تقومي تحكي إكده.. اكتمي خالص، والدهب اوعاكي اسمعك تجيبي سيرته مره تانيه علي لسانك ولا حد يدرى بيه سامعه. 

الدهب ديه لبتك هو اللي عينفعها من بعد ربنا، وهو اللي هتتكل عليه فاللي جاي من حياتها. حسك عينك ياشامه الدهب ولا اللي هعطيهولك حد يعرف شي عنه، انتي حواليكي كلاب سعرانه لو عرفوا إن حداكي هبره كيف داي هيخطفوها ويطيروا بيها ومش بعيد ينهشوا لحمك معاها نهش. 

شام وهي عتبص لبتها ردت علي ستها:

اني ياستي معاوزاشي من الدنيا غير بتي وبس، لا عايزه دهب ولا جاه،، أباااي لو اخدها واروح اعيش بيها فبيت ابوي ووسط ناسي، ياااه عالحلم ديه ياستي. 

عديله:

هملينا من الاحلام دلوك وخليكي فاللي احنا فيه ديه، عايزاكي من إهنه ورايح تفتحي عيونك زين وتحطيهم فنص راسك، البيت دخلته حيه جديده يمكن تفوق حوريه فسمها، البت من بصة عنيها مبينه إنها ناويه عالشرور، واديكي شفتيها من اول يوم قومت حاروقه في البيت. 

وانتي دلوك اكبر عدوه ليها في البيت واول من هتبخ فيه سمها كله،

 ففتحي وهملك من الهبل اللي انتي فيه ديه. 

اوعي لروحك فلاول عشان تتعلمي توعي لبتك اللي مليهاشي غيرك في البيت ديه. 

شام سمعت كلام ستها وهزتلها دماغها بفهم، وعديله رفعت يدها وحطتها على جبين ربيعه واتنهدت براحه وبصت لشام وقالتلها:

الصخانه راحت والبت بردت الحمد لله. 

شام بإبتسامه: إيوه ياستي من اول ماعطيتها الدوا اللي حابه ابو دراع الصخانه راحت طوالي. 

عديله: ربنا مايرقدله جته يارب ويراضيه ويرضى عنه. 

شام: اميين يارب، والله الجدع ديه متزعليش مني ياستي برجالة بيت المقاول كلهم. 

عديله ردت عليها وهي عتهز دماغها بتأييد:

وهزعل ليه من الحق يابنتي ماديه صوح، ابو دراع بكل رجالة البيت..واتنهدت وكملت وهي باصه لبعيد ومركزه كيف ماتكون شايفه حاجه في الفراغ:

بالك ياشامه، والله ابو دراع ديه ماكان عدلك الا انتي، كان صانك وحاجى عليكي بروحه وحطك تحت جناحه وضلل عليكي، بس حظك النحس جعلك مرت كرار، وديه خلاكي اخر وحده في الدنيا منكن ابو دراع يفكر فيها مره ليه او يبصلها حتي. 

شام ردت علي ستها بمراره:

ياستي لو عالحظ كان اولى يهملني مع اللي اختاره قلبي وعشقته روحي، مش يجيبني لابودراع وغيره، همليني اني من صنف الرجاله عشان كرهتهم كلهم ومبقتش اطيق سيرتهم بالذات لو مقرونه بجواز وطلاق.. اني وهبت صحتي فى سبيل الله، ووهبت اللي جاي من عمري لبتي وخلاص علي إكده، بس ربنا يبعد عني كرار ويلهيه فمرته الجديده وينساني واصل. 

عديله اتنهدت وردت عليها:

ياعالم عاد يابتي بكره شايلك ايه، مايمكن كل ديه يكون حديت وكلام والدنيا يتشقلب حالها معاكي وحظك يحط فعينه حصوة ملح ويتعدل، وكرار قلبه يحن عليكي، وانتي ربنا يهديكي عليه وتخلفي بدال العيل تنين وتلاته وتوبقي الكل في الكل وست الدار كمان. 

شام ضحكت وهزت دماغها بإستنكار وهي عتلاعب فبتها اللي فتحت عيونها، وستها عديله كملت..متستغربيشي مفيشي حاجه بعيده علي ربنا، بس انتي لو تسمعي كلامي كل ديه هيوبقي فال وكان. 

بس اني وراكي والزمن طويل ومش ههملك غير وانتي مفتحه ومتنصحه، ولو مت قبل إكده عاد يوبقي ربنا مرايدلكش بالنصاحه ياحزينه. 

❈-❈-❈

حدا كرار فأوضته مع شوقيه:

شوقيه:

ودلوك ايه اللي هيوحصول يامقاول، ايه اللي هياجي من نصيبك؟ 

كرار: معارفشي لسه ياشوشو، بس الاكيد هاخد في الجنينه والارض والمعدات، بس المعدات لسه. مااعرفش كيف هيقسموها، هيقسموها معدات ولا ايه؟ 

شوقيه:

له معدات ايه، المعدات تتباع ويتقسم حقها فلوس واللي عايز معده يشتريها لحاله او ياخد المُعده بحقها اللي تتفصل بيه، اصل علي مااظون المعدات فيهم الجديد وفيهم القديم المهلوك، مين اللي ياخد ديه ومين اللي ياخد ديه، عقولك ايه ياحبة عيني تخليش حد يضحك عليك ولا يستغفلك، فتح وصحصح واوعا لروحك.. ولو باعو المعدات اشترى اجدد واحسن لودر فيهم ولو عوزت فلوس اني ابيعلك دهبي واكملك، ولو مكفاشي اجيبلك من ابوي مهيقوليشي له، والمعدات التانيه خد نايبك فيها معده، وبكده هتوبقي حطيت رجلك على اول الطريق يامقاول كرار. 

كرار سكت وبص بعيد بتفكير وقلبها فراسه، وشاف إنه لو صوح اشتري اللودر وخد معده يوبقي عدي خط الفقر واتفتحت قدامه طاقة القدر، ديه ابوه بجلالة قدره ابتداها سواق على مُعده مش صاحبها. 

ونام على دراع شوقيه اللي فضلت تلعب فى شعره وتخططله وترسمله خطاوي رجليه اللي جايه ووين يحطهم، وهو غمض عيونه واستسلم ليدها اللي عتلعب فشعره ولسانها اللي عيلعب في عقله، وهو بقي مابين داي وديه كيف حتتة العجينه الطريه اللي عتتشكل لاول مره. 

❈-❈-❈

أما في المستشفى حدا همام

عزام وهو عيلم في الحاجه من المستشفي:

- خلاص ياخوي راجعين على دارنا وهنقعدوا فبيتنا وهنرتاحوا من قعدة المستشفيات. 

همام بصله ومردش وبسيمه هي اللي تولت مهمة الرد:

ايوه الله ياعزام داي قعدة المستشفى تقصر العمر وتديق الصدر، يابوي على ريحتها وعلى القرف اللي الواحد حاسس بيه فيها، مع انها بلاط وحيطان نضيفه ومبيضه وسراير بسفنج بس برضك فيها حاجه إكده تنفر الواحد منيها. 

عزام: فيها ريحة العيا يامرت اخوي، ريحة العيا عفشه قوي ومحدش عيتحملها. 

بسيمه ردت عليه وهي عتطوي الحصيره اللي في الارض:

ايواالله ياعزام معاك حق. 

والتنين انتبهوا مره وحده لحس همام وهو عيزعق فيهم:

ماتهموا وتخلصوا اللي فيدكم ديه بدال الرط والكلام الفارغ اللي عمالين تحكوه، خلص منك ليها عايزين نعاودوا عالزفت ونتزفتوا فيه. 

بسيمه كشرت وكملت اللي فيدها، وعزام اتبسم وراح علي همام وقعد جاره وميل عليه وبخبث قاله:

عتغير علي مرتك من اخوك يابو، داي اختي ياحزين. 

رد عليه همام بهمس وحِده:

بالك ياعزام اني مش عغير عليها منك، اني عغير عليها من خلجاتها اللي علي جتتها، عغير عليها من الارض اللي شايله رجليها، عغير على كلامها اللي عيسمعه حد غيري، على وشها لما يتطلع فيه حد غيري، ياخي والله العظيم لو بخطري كنت فتحت صدري ودخلتها وقفلت عليها ضلوعي. 

عزام بضحكه رد عليه:

يابووي للدرجادي؟ 

همام وهو باصص لبسيمه:

واكتر ياعزام واكتر ياخوي، اخوك اتمرمر واللي كان كان. 

❈-❈-❈

عدى اليوم وجه اليوم الموعود، ورجالة بيت المقاول كلهم عطلوا عن الشغل، وقعدوا عشان يقسموا الورث بينهم، وبعد ماقسموه وكل واحد عرف اللي ليه، جه الدور عالمعدات وكرار اقترح كيف ماشوقيه قالتله إنهم يتباعوا، واول ماقال إكده عيال عمه التنين اعترضوا، وحتي عزت، بس صفوت ايده في الرأي، ولما نعيم شاف إكده مرضيش ياجي مع عياله فرأيهم وجه مع عيال اخوه علي عياله عشان لو عدي الزمن ميقولوش عمي ظلمنا، وتمنوا المعدات، والمعده الجديده وقفلها كرار وقال اني هشتريها. 

وهو نطق الكلمه داي وكل الوشوش اترفعت عليه وعلامات الاستغراب بانت وسلام سقف بأديه وهو عيضحك ويقول:

ايوااااااااه، والله والمدسوس هيطلع اهه والمستخبي هيبان وعرفنا القرد داسس وين ولده. 

يتبع

إلى حين نشر الفصل الجديد للكاتبة ريناد يوسف من رواية نفق الجحيم الجزء الثاني، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة