رواية جديدة كيد النسا قهر الرجال لمنى محمود - اقتباس
قراءة رواية جديدة كيد النسا قهر الرجال كاملة
تنشر حصريًا على مدونة رواية وحكاية قبل أي منصة أخرى
رواية كيد النسا قهر الرجال
رواية جديدة قيد النشر
من قصص و روايات
الكاتبة منى محمود
اقتباس ..
هي ...
الايام بتجري وانا واقفه مكاني لا قادرة أقرب منه ولا قادرة ابعد عنه ... ادمنتة ادمنت وجودة وصوتة وحنيته ادمنت نظرة عينيه اللي بحس انها بتحضني وبتطمن خوفي ... لكن أنا عارفه كويس اوي أنه ابعد عني من نجوم السما عارفه أن عمرنا ما هنكون مع بعض عمرنا ما هيكون لينا فرصه سوا ودا اللي مكسر قلبي ميت حته ورغم الوجع ورغم اليأس ورغم المسافات اللي بينا اللي اني مقدرش ابعد مقدرش ابطل أحبه ...
❈-❈-❈
هو ...
ليه ظهرتي تاني دلوقتي ؟ ليه رجعتي في حياتي من تاني ؟ انا كنت خلاص بدأت اصدق نفسي اني فعلا نسيتك ... اتاريني لا نسيت ولا كرهت اتاريني بضحك علي نفسي عشان اعرف اكمل واعيش ... اعمل ايه معاكي دلوقتي ؟ اكون جمبك احميكي واطمن خوفك واخدك في حضني ولا ابعد عنك ؟ ليه مقدرتش اكرهك وليه مش قادر اسامحك مليون سؤال جوايا ملهمش إجابة ... كنت فاكر ارتحت من وجع القلب اتاري قلبي موجوع بس مداري ...
❈-❈-❈
هي ...
مالك ! متغيرة وحالك متشقلب ليه ؟ كل دا عشان عرفتي أنه هيخطب ؟ طب ما هو كان قدامك طول عمرك ولا مرة جه علي بالك ولا مرة شغل تفكيرك ليه دلوقتي مش طايقة نفسك وحسه ان في نار جواكي ليه دلوقتي حسه انك عايزة تجري عليه وتقوليله ارجوك متعملش كدة ؟ فوقي بقا حتي لو حبيته خلاص هو هيكون مع إنسانة تانيه مش من حقك تفكري كدة انتي اتغيرتي كملي صح وان شاء الله ربنا هيعوضك خير ...
❈-❈-❈
هو ...
معقول اللي انا حسه دا ؟ انا اتجننت ولا ايه ؟ دا فرق السن بينا لوحدة مشكله ازاي دونا عن كل البنات دي بس اللي قلبي يدق ليها ؟ طب يا تري هي حسه بيا ؟ اكيد لا ايه الهبل دا دي اول مرة شافتك قالتلك يا ابيه هتحس بيك ازاي بس ... اوف استغفر الله العظيم يارب انا مالي حظي في الحب وحش ليه كدة مرة اتخدع ومرة قلبي يختار حب مستحيل يكون متبادل .... مش مكتوبلي احب واتحب زي كل الناس ليه ؟ وجع القلب هيفضل معايا العمر كله ولا ايه بس ...
❈-❈-❈
هو ...
انا عارف انك خايفه . عارف انك شايفه نفسك اوحش ست في الدنيا . وانك متستهاليش فرصه تانيه . بس انا مش شايفك كدة ابدا . انا شايف قدامي إنسانة اتحرمت من كل حاجة ووقعت وغلطت بس تابت وندمت وقامت وقفت علي رجليها من تاني وقادرة تكمل رغم كل الظروف اللي محوطاها .. انا شايفك جميلة وقويه وصبورة وفخور بيكي . اقولك من الاخر انا شايفك العوض اللي انا استاهله بحبك ...
❈-❈-❈
هي ...
اوعي تكون فاكر انك خلصت مني بسهوله كدة لااااااا انا قدرك ونصيبك .. طول ما انا وانت فينا نفس وعايشين هنفضل مربوطين ببعض .. مش هنسيب بعض ابدا ... انا بس سيبتك شويه تهدي كدة عشان اعصابك كانت تعبانة مش اكتر لكن تتجنن وتفكر مجرد تفكير تبعد عني يبقا هتشوف مني وش عمرك ما شوفتة انا وعيت ع حبك وهموت وانا مراتك بمزاجك أو غصب عنك مش هتفرق فاهم ولا لا ...
❈-❈-❈
هو ...
يارب يارب انا تعبت لو كان اختبار ل قوة تحملي وصبري ف والله انا راضي وصابر بس غصب عني تعبت .. يارب نجيهم ليا ومتورينش فيهم حاجة وحشه ابدا يارب مليش غيرهم انا تعبت اوي لحد ما وصلت ل هنا يارب ما ارجع ل نقطة الصفر تاني يارب نجيهم واحفظهم ليا يارب يا كريم يا رحيم ما توجع قلبي فيهم ابدا يارب يارب ....
❈-❈-❈
هي ....
معقوله تكون هي دي نهايتي ؟ معقوله دي آخرتي ؟ عمري ما كنت أتخيل أن دي تكون نهايتي ... ايه خلاص كدة هستسلم وارضي ب اللي بيحصل فيا ... لا والله ابدا ما يحصل ولا يكون انا دي عمرها ما تكون نهايتي مش انا اللي اتذل أو اتهان ما عاش ولا كان اللي يذلني ... انا هرجع وهبقي اقوي من الاول ويا انا يا انتم ...
❈-❈-❈
هو ....
ايه ! بتفكر تهرب تاني ؟ طب اول مرة واتحججت بالفلوس والمستقبل والبنات .. دلوقتي هتحجج بايه ؟ ولحد امتي هتفضل تهرب من الحقيقة ؟ لحد امتي هتفضل جبان ورافض تواجهه نفسك ؟ لحد امتي هتفضل حاسس انك تابع ... نص راجل ... لحد امتي احساس عدم الرضا هيفضل يكبر جواك ... فوق بقا انت كبرت خلاص اللي جاي مش قد اللي راح ... واجه نفسك واخلص من الحمل اللي علي كتافك ... حتي لو محتاج لمساعدة مش عيب ولا حرام ... المهم اللي جاي تعيشه مرتاح ومبسوط وسط اهلك وعيلتك الصغيره ... هما يستحقو دا وانت كمان تستحق دا
❈-❈-❈
هي ...
انا بحبك . .. امتي وازاي وليه انت بالذات معرفش معنديش اي اجابات كل اللي اعرفه و واثقه فيه اني بحبك ... رغم اني كنت واثقه أن قلبي صعب يدق تاني صعب يحب تاني بعد ما انكوي بالفراق وداق العذاب قبل حتي ما يدوق حلاوة اللوقي .... حبيتك ... يمكن اكون صغيره في نظرك ... يمكن اكون مش بفهم في أمور العشق والحب زيك ... بس صدقني حبيبي انا بحبك ... ومش بتمني حاجة من الدنيا دي كلها إلا قربك ... ومهما قابلنا و واجهنا من مشاكل بسبب ظروفك كن واثق اني هفضل جمبك لآخر عمري ... هفضل معاك وهيفضل حبك يكبر في قلبي ومش هكون ابدا ابدا غير ليك ... انا بحبك
❈-❈-❈
هو ...
عملتي فيا ايه ! ازاي بتقدري تجرحيني ومفيش غيرك يداويني ... ازاي تبقي الايد اللي بتاذي وفي نفس الوقت الايد اللي تطبطب .... يا تري في امل في يوم حالنا يتصلح ويكون لنا فرصه سوا ؟ يا تري انا هقدر اتقبل عنادك وتمردك الدائم ؟ يا تري انتي هتقدري تسامحني علي قلبك اللي جرحتة بعنادي ... كنت فاكر اني هفرح لما الاقي في عينيكي حزن اني ضيعت من بين ايديكي ... لكني حسيت بحزن العالم كله في قلبي لمجرد اني حسيت اني سبب حزنك و دموعك اللي حاولتي تداريها شوفتها حبيبتي وعرفتني اني غلطت ... غلطت غلط كبير اوي ومش عارف هصلحة ازاي ولا خلاص فات الاوان ...
❈-❈-❈
هي ...
انا تعبت ... عارفه اني غلطت وغلط كبير كمان ... عارفه اني مستهلش فرصه ثانيه منك ... بس انا محتاجلك ومليش غيرك والله انت كل حاجة ليا ... يا تري هتتخلي عني ؟ هتسبني أواجه المجهول لوحدي ؟ معقول تكون كرهتني ومبقتش فارقه معاك ولا حتي خايف عليا ؟ حقك عليا يا حبيبي جرحتك بس والله كنت مجروحة قبلك اتصرفت غلط بس انا عيشت في واقع كان كله غلط في غلط ... خليك معايا أنا خايفه من شيء مش عارفاه ... انا حسه أن كل يوم بيعدي عليا بقرب فيه من الموت خطوة ... لو صعب تحميني ... لو صعب ترجع ل حضني ... اوعدني اني اموت وانت مسامحني وغفرلي غلطي ... بلاش تحرمني من اخر امنيه ليا في الدنيا ...
يتبع
إلى حين نشر الفصل الجديد للكاتبة منى محمود من رواية كيد النسا قهر الرجال, لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
