قراءة رواية نفق الجحيم 

الجزء الثاني

من روايات وقصص 

الكاتبة ريناد يوسف

الفصل الخامس والثلاثون

انتفضت شام من قعدتها وهى سامعه حس بتها اللي شق صوت الدوشه ووصل لمسامعها وقلبها، وقامت عليها جري، وبمجرد مافتحت باب بيت ابو دراع اتخبطت ربيعه فيها وهي طالعه من البيت تجري، فخدتها امها فحضنها والتنين وقعوا عالارض من شدة الخبطه، وشام لمت ربيعه فحضنها بخوف وهي واعياها عتتلفت حواليها وعيونها كيف مايكونوا مترقبين لظهور وحش كاسر هيهجم عليها! 

شام بخوف ورعب من حال بتها:

ربيعه مالك فيكي ايه يابنيتي وخايفه من أيه؟

ربيعه بلعت ريقها وهي لساها عتتلفت حواليها وردت على امها بشرود:

هاه.. مفيش يمه يمكن كابوس.. بس كابوس واعر قوي خوفني وكان هيوقف قلبى كيف مايكون حقيقه!

اتنهدت شام وسمت وصلت ع النبي بحسها العالي وبعدها قالت وهي عتمسد على ضهر ربيعه بحنان:

كنت خابره ان العين هتصيبك وهتنكد عليكي وكل اللي عيعمله ابو دراع عشانك مهيعديش بسلام.. قومي يابنيتي واستعيذي من الشوطان وصليلك ركعتين لله وادعيه يبعد عنك شر العين.

ردت عليها ربيعه بديقه:

مش لما اصلى الفروض اللى عليا يمه فلاول، داني من العصر مصليتش وفاتني العصر والمغرب وادى العشا.

شهقت شام وهى عتسمع بتها وقالتلها بإستنكار:

واه ياربيعه.. ليه إكده يابنيتي ومن ميته وانتي عتتهاونى فصلاتك وتأجليها لأي سبب، إحنا مش قلنا الا الصلاة والفرض عمره مايتاخر بأي حال من لحوال، سوا الواحد ميت من الحزن او طاير من الفرح، وإن الصلاة في الفرح شكر، وفى الحزن حمد وصبر، مش هو ديه اللي سمعناه في الراديو من الشيخ ياربيعه. 

ردت عليها ربيعه بتنهيده:

معرفش يمه حسيت بكسل وحاجه دايسه عليا ونمت مخبرتش، ولما قمت قمت عالحلم العفش ديه.. دلوك هتوضى واصليهم سوا وربنا يتقبلهم مني عاد.

خلصت كلامها واتحاملت على روحها وقامت، ومدت يدها لامها كمان قومتها، وراحوا التنين عالبيت، وطول الوكت ربيعه سامعه القرآن بتاع الليله فى المكبر وحاسه بخنقه ونفسها تصرخ وتقول وطوا الصوت محملاهش فمخى ولا فوداني، لكنها سكتت واتحملت،

 وأول ماوصلت البيت ودخلته.. وقفت شوقيه اللي كانت فإنتظارها، وبمجرد ماشافت منظرها ولون وشها المخطوف، وحمار خدودها الباهت، ابتسمت بنصر وهي واعيه اول البوادر ظهرت عليها، واتوكدت إن المراد خلاص تم.

أما ربيعه فدخلت اتسبحت واتوضت وراحت الأوضه بتاعتها هي وامها عشان تصلي، وبس فرشت سجادة الصلاة ووقفت عليها حست بتقل على كتافها وعلى جفون عنيها، وخشمها كيف مايكون اتخيط مقدرتش تفتحه ولا تنطوق حرف واحد، وبعد دقايق من وقوفها وهى ساكته قعدت على حيلها وهي مش فاهمه فيه إيه؟! 

وبس قعدت حست بنوم غريب كبس عليها، فاتمددت عالمصلايه واستسلمت للنوم، وبمجرد ماعينها راحت فى النوم حست إنها عتجري فشوارع البلد اللي شافتها مع ابو دراع كلها، وكلاب سوده عملاقه عتجري وراها، وكل ماتدخل فبيت وتحاول تهروب منهم تلاقيهم حفروا بضوافرهم في بابه لغاية ماعملوا لروحهم فتحه يدخلولها منه، واول مايدخلولها تفط هي من الشباك وتجري وهما وراها.. وهكذا لما لففوها كل البلد وقطعوا نفسها، والغريبه إن البلد كانت كلها فاضيه مفيهاش صنف مخلوق غيرها هي والكلاب وكل البيوت اللي دخلتها خاليه من السكان!

متعرفش ربيعه عدى وكت كد ايه على نومتها، مفاقتش غير على علي حس امها ولمسة ايدها الحنونه وهي عتقولها:

ربيعه.. ربيعه قومي يابنيتي ايه اللي منومك فى الارض إكده، قومى نامي ففرشتك الارض قاسيه عليكي.

قامت ربيعه بضعف وهي حاسه ان ريقها ناشف وضربات قلبها سريعه من الكابوس اللي حلمت بيه، وبصت لامها بعيون زايغه وقالتلها:

عطشانه يمه.

قامت شام قوام جابتلها ميه وهي واعياها سابحه فعرقها وحالها حال، وبعد مالافتها الميه وشربت ربيعه سألتها شام:

صليتي يابنيتي؟

بصتلها ربيعه وبعد تردد دام لثواني هزتلها دماغها بإيجاب، فتبسمتلها شام وهي عتقومها عشان تنام موطرحها، أما ربيعه فبعد ماكذبت بشأن صلاتها لأول مره فحياتها.. حست بحجر تقيل هوى على قلبها واستقر فوقه، بس ماكان بيدها حيله على خنقتها اللي عتحس بيها بمجرد ذكر الصلاة وانها لازمن تصلي ومعارفاشي سبب الخنقه والديقه داي ايه!

نامت ربيعه ففرشتها بس النوم جافاها بمجرد ما زاحت حمل الصلاة من فوق كتافها، وفضلت باصصه للسقف وعتتفكر فمنظر الشي المخيف اللي دخل عليها الاوضه حدا ابو دراع، وحلم الكلاب اللي اول نوبه تحلم بيه.

أما شام فجات هي كمان ونامت جارها بعد ماخلصت كل اللي وراها واتسبحت، ونعست غصب عنها من التعب، وراحت في نوم عميق مكانش يقطعه غير نوبات الكحه اللي عتزلزل صدرها زلزله.

وفضلت ربيعه على نفس نومتها وبحليقها للسقف، وبس قسم الليل حست بقشعريره عتسرى فبدنها كله وهي حاسه بانفاس حد جار ودنها وهوا بارد عيمر عليها برغم ان الاوضه مقفوله ومفيش مصدر لتيار هوا، واول ماحست بإكده دفنت روحها فحضن امها بخوف وغمضت عيونها بالقوة متجاهله الانفاس والإحساس،

 وبعدها راحت فى النوم ومحستش علي حالها غير وامها عتصحيها لصلاة الفجر، وأول ماصحيت سمعت القرآن بتاع الفجر عالي، وأمها كالعاده مشغله الراديو عالقرآن، قامت منتوره ورمحت عالراديوا طفته ووقفت تفرك اديها فبعضهم وهي حاسه إن حيطان الاوضه عيطبقوا على ضلوعها!

اما شام فكانت واقفه ومستغربه من حركات بتها العجيبه، وقالتلها بعد ماشافت وقفتها طولت:

متخشى تتوضى عشان تصلي ياربيعه ولا هتفضلى صافنه إكده ومسوحه، مالك يابنيتي انتي مش عاجباني من عشيه واصل!

اتحركت ربيعه من قدامها ودخلت الحمام عشان تتوضى، لكنها بمجرد مادخلت الحمام حست بمعدتها قلبت ووقفت ترجع بلا توقف، مع انها لا واكله ولا شاربه من عشيه، بس الترجيع ديه كله جه منين متعرفش!

أما شام فبمجرد ماسمعت حس ترجيع بتها فضلت تخبط على باب الحمام وتسألها برعب:

ياربيعه مالك، عييتي يابتي ولا ايه، افتحي يانن عين امك خليني اشوف مالك.. وبعد مناهده طويله فتحت ربيعه الباب بعد مااتصفت من الترجيع، وبمجرد مافتحت الباب اترمت فحضن امها مغمي عليها، وشام صرخت من الخوف على بتها اللي تقل جسمها خدها ووقعوا هما التنين فى الارض، ومع صرختها داى والصرخات اللي تبعتها وهي عتستنجد بحد يلحقها، صحيوا اهل البيت كلهم ونزلوا يشوفوا فيه ايه، ولما شافوا حال ربيعه إكده ورده وبدور ساعدوا شام ورفعوها عالسرير، وكرار وعزت وصفوت واقفين من بعيد يسألوا فيه ايه ومالها، وشام واقفه متلاعه معارفاشي تعمل ايه ولا لاقيه نجده من حد لبتها اللي راحت فدنيا تانيه، بس في الاخر جريت على الشخص الوحيد اللي عارفه إنه فيده نجدتها:

ابو دراع.

واللي بمجرد ماخبطت على بابه وسمع الخبطه اللي متوحيش بخير قام من نومه مفزوع مع انه مبقالوش ساعه نايم من بعد ماخلصت الليله بتاعته.

واول مافتح الباب وشاف شام قدامه بلونها المخطوف سألها بخوف:

ام ربيعه مالك فيه ايه جرا ايه؟

وهي بس كلمه وحده اللي نطقتها، وهي اسم ربيعه، ولقته طلع من بيته يجري قدامها على بيت المقاول كيف الاعصار، ودخل وفرق كرار وعزت الواقفين على باب الأوضه زي قلتهم، ووصل لربيعه، وبمجرد ماوصل عندها قعد جارها ورفعها من كتافها وابتدا يهزها بعنف عشان يفوقها، ويضرب على خدودها وهو عيسأل شام عن اللي حصلها ووصلها للحاله داي وهو مهملها امبارح فبيته كيف الورده المفتحه؟ 

وابتدت شام تحكيله اللي جرا، وهو مستمر يفوق فيها وحاسس إن روحه خلاص هتروح منه وهو واعيها مابين حيا وموت ومعارفلهاش حاله..لكن روحه ردتله هو وشام سوا وهما واعيينها عترمش بعيونها وطلعت منها أنة وجع.

فقعدت شام جارها قوام وخدتها من ادين ابو دراع لحضنها وهي عتسمي وتصلي عليها، وبمجرد ماابتدت تقرا عليها المعوذتين برقت ربيعه عنيها برعب وبعدت عن حضن امها قوام كيف اللي لدغتها عقرب، وقالت للكل بحسها العالي إنها زينه مفيهاش حاجه كل واحد يروح لموطرحه.. وطلعوا كلهم على بره وكل واحد راح على اوضته، مفضلش جارها غير امها شام اللي معارفاشي بتها مالها، وابو دراع اللي متوكد إن ربيعه مش زينه بالمره، وشوقيه اللي قاعده قبالهم عالدكه وحاطه رجل على رجل وعتتفرج على نتاج عمايلها وقلبها عيرقص بفرحه وحاسه بزهو وإنتصار منقطع النظير وهي واعيه فرحتهم اللي اتنغصت، وهمست لروحها وهي باصالهم هما التلاته وهما مكوكرين على بعض(ولسسسه).

❈-❈-❈

وفضل ابو دراع قاعد جار ربيعه، وبس اذن الفجر قام اتوضى وصلى جارها وهي ففرشتها، وشام هي رخري اتوضت وصلت في الموطبخ وبعدها حضرت فطور ليهم هما التلاته وخدته وراحت بيه على الاوضه، وحطته جار ربيعه وقالت لابو دراع اللي كان لساه على سجادة الصلاة عيقرا ورده يقوم يفطر، وبالفعل قام ابو دراع، وربيعه محدش كلمها على صلاة وهما واعيين حالتها، وقعد ابو دراع وسمى بالله، وكسر اول لقمه وغمسها ومدها لربيعه عشان تاكلها، وهي صدت بوشها بعيد من الوكل وهي مطايقاش تشوفه قدامها، وأبو دراع اصر وحلف عليها تاكل، ولو هي مكلتش مش هياكل هو ولا امها كمان هتاكل، وقصاد اصرارهم وافقت ربيعه وكلت لقمتين اتنين بالعافيه، وبعد ماكلتهم حستهم نار نزلوا فجوفها،

وكانت حاسه انها عايزه تجري تستفرغهم قوام، لكنها اتحملت لغاية ماامها وابو دراع كلموا فطورهم وطلعوا من الاوضه، وبعدها قامت بهدوء دخلت الحمام وفضلت تستفرغ وهي حريصه ان حسها ميعلاش عشان أمها متخافش عليها اكتر من إكده.

وبعد ماخلصت رجعت لفرشتها من تاني ونامت، وبعد شويه لقت الحفافه عتدخل عليها الاوضه وتقولها إن ابو دراع هو اللي باعتها، وكمان كانت شايله فباطها صره كبيره، اول ماحطتها عالسرير جار ربيعه وفتحتها وبان اللي جواها، شهقت ربيعه من جمال الفستان الاوبيض اللي خطف قلبها خطف ومسكته وبصت فيه وضمته لصدرها، وكمان اقلام البودره وعلبة المكياج اللي على شكل قلب اوحمر، 

وقامت برغم كل اللي فيها مع الحفافه اللي عملتلها كل إجراءات العروسه والمغره، وحفت وشها وابتدت تجهز وتذوق فيها للفرح، َكل ديه وامها شام داخله طالعه عليها تتطمن وتجيب وتحط قدامها وكل وشرب وتوصيها تاكل، وتوصي الحفافه تاكل معاها وتوكلها، وهي تطلع تشوف حال البيت والحمام اللي عتطيب فيه لعشا العروسه والعريس اللي عتجهزه، والامور ماشيه قدام اهل البيت كلهم كيف مايكون عرس بحق وحقيقي.

❈-❈-❈

اما ابو دراع فهو كمان حلق وظبط روحه وصبغ دقنه اللي كان فيه كام شعره بيض، ولبس جلابيته البيضه والتلفيحه واللاسه وبص لروحه في المرايه بعد ماخلص، وانتبه لكرار اللي واقف وراه من غير مايحس بيه وهو عيقوله:

صغرت عشر سنين ياملكوم وشكلك عريس عالنعناعه واللي يشوفك ميقولش إنك اكبر مني وهتتجوز بتي؟!

رد عليه ابو دراع وهو عيفتح قزازة المسك ويتطيب منها فدقنه ورقبته:

القلوب العمرانه بالخير والمحبه عمر صحابها مايشيخوا ولا يعجزوا، عيقعدوا شباب القلب والروح لاخر العمر.

سكت كرار قدام بسمرة ابو دراع ليه، وابتسمله بمحبه، رغم إنه خابر إن ابو دراع مطايقهوش، لكنه فرحان إن هو اللي هيتجوز ربيعه وتكون على ذمته، لأن فى إعتقاده إن ربيعه مهيقردش عليها غير ابو دراع، برغم جلعه ليها، الا انها وكت ماتاجي تغلط ابو دراع هيكون كتالها ويده اول يد هتسبق بغسل العار.

خلص ابو دراع، ووقف قدام المرايه يبص على روحه بصه اخيره، وطلع من البيت وهو متجاهل كرار، وطلع كرار وراه، وراح على بيت المقاول عشان ياخد ربيعه منه للكوشه المنصوبه فى الجنينه ومعازيم الفرح هما اهل بيت المقاول وبس،

 وبمجرد مادخل البيت  وشافوه الحريم كلهم وقفوا على حيلهم وصابهم الذهول، وعيونهم كلهم زاغت عليه بإعجاب، يشبه إعجاب ضيوف زليخه بيوسف، وعيونهم اتعلقت بيه يفرزوه من ساسه لراسه،

 وزغرتت عدويه بعد ماسمت وصلت على النبي، وباقي الحريم ردوا عليها بالزغاريت، وحتى شام زغرتت معاهم، وهي حاسه إن الزغروته، طالعه من قلبها بفرحه مليهاش مثيل. 

❈-❈-❈

واخيراً جات اللحظه واتفتح باب اوضة الجده عديله وطلت منه ربيعه اللي كل عين جات عليها برقت والخشوم اتفتحت للي أول نوبه تحط فوشها حاجه وطالعه ايه في الجمال، ولا الفستان حدث ولا حرج، كيف مايكون متفصل عليها بالملي ولايق على جمالها، وأول اللي اتفاجئوا بجمالها هو أبو دراع، اللي شافها بالزواق كبرت عن سنها ياجي خمس سنين! 

وحتى كرار بصلها واتفاجأ بيها وبانها اتحولت لنسخه طبق الاصل من امها فيوم فرحها، اول يوم دخلت فيه شام  البيت وكانت بنفس الجمال إكده ونفس الطله، وحس بالحنين للأيام الماضيه اللي كان يقدر يقرب فيها منها وخد فيهم متعه من قربها تساوى سنين قربه من شوقيه كلها. 

أما ممدوح فهو الوحيد اللي كان قلبه عيموت حسره عليها من اول ماوعيها، والود وده يخطفها على إكده، ويرمح بيها ويهروب بيها من الكل وباصصلها بتمنى وعيتخيل روحه موطرح ابو دراع، وربيعه عتقرب منيه وهى عروسته وحلاله وعيونها كلها استسلام ليه ومحبه وشوق ولهفه. 

وشوقيه واقفه بعيد وباصه لربيعه بعيون ماليها الكره وهي عتتقدم ناحية ابو دراع، وبس وقفوا جار بعض، قلبها اتقرص بالغل وهي واعياهم التنين احلا من بعض ولايقين على بعض كيف مايكونوا اتفصلوا لبعض تفصيل، 

ولو حد منهم وقف جاره واحد غير التاني مهيخيلش عليه واااصل، كيف مايكونوا شقين قمر واجتمعوا عشان يكملوا بعض. 

دقايق وقفها ابو دراع وسطهم هو وربيعه، وبعدها مسك يدها وطلع بيها من بيت المقاول، وهو عيحلف مع كل خطوه يبعد بيها عن البيت ديه إن اللي شافته فيه ماعادت تشوفه، وإنه هيعوضها عن كل اللي قاسته تحت سقفه، وإن خلاص عهد عبوديتها انتهى، ومن اليوم ورايح هيكون بيته مملكتها وهي الآمره الناهيه فيه لحدت ماياجيلها اميرها بمملكه جديده وتتنقل ليها معززه مكرمه. 

وقعد بيها في الكوشه، وطول الوكت شام بصالهم و تكبر عليهم من عيون اهل البيت اللي عيشعوا غيره وإستكتار، وخصوصى بدور اللي فهمت بعد سنين إن ابو دراع كان عاشقها، لكنها لما فهمت للاسف كان الاوان فات، ومن بعد ماعرفت من اختها ورده فساعة صفا وهي كل يوم تسخط على عمها وابوها وحتى على عزت اللي خدها ومهملهاش لابوا دراع؛ يمكن كان عاملها كيف البني آدمين، مش كيف عزت اللي مساوى كرامتها بالاسفلت ومعدي عليها كل يوم بمداسه رايح جاي.. وايقنت ان الغباء وعدم الفهم  عيضيع فرص كتير من البنى آدم لما عيدركها عيتندم عليها العمر كله. 

❈-❈-❈

 خلص الفرح اخيراً، وأبو دراع خد ربيعه وراح بيها على بيته،وخطت ربيعه برجلها اليمين فى مملكتها الخاصه اللي وهبهالها ابو دراع من كل قلبه وبكل طيب خاطر وبدون مقابل ، مودعه عهد قديم ومستقبله عهد جديد مختلف كلياً. 

يتبع

إلى حين نشر الفصل الجديد للكاتبة ريناد يوسف من رواية نفق الجحيم الجزء الثاني، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة