رواية جديدة كيد النسا قهر الرجال لمنى محمود - الفصل 26
قراءة رواية جديدة كيد النسا قهر الرجال كاملة
تنشر حصريًا على مدونة رواية وحكاية قبل أي منصة أخرى
رواية كيد النسا قهر الرجال
رواية جديدة قيد النشر
من قصص و روايات
الكاتبة منى محمود
الفصل السادس والعشرون
نوال بعد الفطار كلمت شريف في شغله وحكتلة اللي حصل مع اسماء من مصطفي طليقها وقالتله كمان علي فكرة احلام أن الظابط يوري مصطفي الدليل علي ادانه أمة
شريف
حاضر يا ماما هتصل بيه وأبلغه وأشوف هيقولي ايه
نوال
لو عايز ترجع بيتك مع مراتك براحتكم بس اسماء هتفضل تحت عيني هنا مش هسيبها
شريف بتوتر
ااا احم لا يعني خلينا معاكي شويه لحد ما يعني نشوف الدنيا فيها ايه
نوال باستغراب
مالك يا واد ؟ في ايه ؟
شريف بتهرب
مفيش حاجة يا ماما .. هقفل بس دلوقتي عشان الشغل ولما ارجع نتكلم سلام
قفل التلفون ومنتظرش ردها ... وهي اتنهدت بحزن وهي فاهمه التخبط اللي عايش فيه ابنها بس مش هتقدر تساعده المرة دي ... لازم يحدد مشاعره تجاه احلام لوحده بدون اي مساعدة منها
❈-❈-❈
في شقه شادي
كانت ياسيمنا زي ما هي محبوسه ... شادي بيجيب كل يوم الاكل جاهز ويسيبه ويمشي بس المرة دي فجأته ياسمينا وهي ماسكة اكبر سكينه في الشقه
ياسيمنا بجنون
استني عندك ... اقف هنا وكلمني وبدل ما والله هلبسك مصيبه
شادي ببرود
سيبي يا شاطرة اللي في ايديك دا كخ كدة تتعوري
ياسيمنا
شاااااادي انا علي أخري خلاص متستفزنيش واقف كلمني
شادي
خير ؟ عايزة ايه ؟
ياسمينا
عايزة امشي من هنا ... طلقني وسبني امشي من هنا حالا
شادي
بس كدة عيوني غالي والطلب رخيص ورخيص اوي وكمان بس مش لما نتفق الاول
ياسمينا
نتفق علي ايه تاني ؟
شادي
عايز فوق المبلغ اللي اتفقنا عليه خمسين ألف زيادة واتمم جوازي منك وبعدين يا روحي ننزل علي اقرب مؤذون ومع الف الف الف سلامة
ياسمينا بغضب
خمسين ايه و جواز ايه اللي تتمه ... انت اتجننت بجد يا شادي ولا ايه ... دا انا اقتلك والله ومابقي علي اي حاجة
شادي
طب يلا اقتليني وريني كدة هتعمليها ازاي عند فضول اعرف
ياسمينا
شاااادي متجننيش احنا متفقين انك مش هتلمسني خليك راجل قد كلامك بقا
شادي
تاني بتغلطتي ؟ انتي ايه مبتحرميش ابدا ؟
ياسمينا بدأت تصوت وتستنجد بالناس لكن شادي واقف وحاطط ايديه في جيوبه ومبتسم باستفزاز
شادي
خلصتي ؟ محدش هيعبرك ولا هيقولك انتي فين واظن سبق وجربتي وانا مش موجود انك تستنجدي بيهم ومحدش عبرك بردو
ياسمينا بدموع بتلمع
ازاي ؟ ازاي يسمعوني ومحدش يفكر يرد عليا حتي ازاي
شادي
عادي كل الموضوع اني وريت الساكن المسؤول عن العمارة هنا عقد جوازنا ومعاه تلت اربع شهادات من مصحات نفسيه بانك بتعاني من اكتئاب وهلاوس سمعيه وبصريه احيانا وأننا ملناش حد نهائي وقعدت بقا استسمحة أنه يخيلنا هنا واني هقفل عليكي عشان متهربيش مني واروح اشوف شغلي عشان ادويتك الغاليه اللي واخدة كل فلوسي وأنهم ميتكلموش معاكي وانتي بتهدي لوحدك حبتين تأثر بالكلام كدة صعبت علي الراجل وقال لكل السكان نفس كلامي عشان كدة محدش هيعبرك مهما تعملي ومهما تقولي ف ريحي نفسك عشان تخرجي من هنا لازم تنفذي اللي قلتلك عليه يا نفضل زي ما احنا انا معنديش مشكلة
ياسمينا دموعها نزلت
لا مش هتقربلي لا .... انا ملك حبيبي وبس محدش يقربلي غيره ... هديك الفلوس اللي انت عايزاها كلها لكن تلمسني لا يا شادي لا
شادي
شكلك غاويه دراما وانا بصراحة بقا زهقت ومليت من الموال دا
شادي كان بيقرب عليها بهدوء
ياسمينا وهي بترجع ل ورا
ابعد يا شادي هقتلك ابعد
شادي ابتسم
قلتلك وريني يلا هتقتليني ازاي
ياسمينا لما حست بالخطر وانها فعلا صعب تقتله حدفت عليه السكينه اللي تفادها شادي بسرعه ووطي مسكها ولسه بيرفع رأسه عشان يهددها اتفاجا أنها جريت علي البلكونة كان متخيل أنها هتزعق وتستنجد تاني بالناس لكن هي فجأته ونطت من البلكونة
للحظة شادي اتجمد مكانة ... ولما قرب وبص شافها في الشارع غرقانه في دمها والناس كلها ملمومة عليها نزل جري علي تحت وهو مش عارف هيتصرف ازاي في المصيبه دي
❈-❈-❈
في بيت نوال وصلت هند مع ياسين كان امير في استقبالهم
امير
ايه المفاجآت الحلوة دي بجد مصدقتش نفسي لما قلتلي انك جاي
ياسين
اديني سبقت وقدمت السبت اهو
نوال وهي خارجة من المطبخ
وتقدم الاحد والاثنين كمان عندك مانع
ياسين ضحك
انا أقدر بردو يا نونا عامله ايه ؟
نوال
الحمد لله يا حبيبي في فضل ونعمة من ربنا ... ازيك يا هند عامله ايه يا قلبي
هند ببتسامة
الحمد لله يا طنط كويسه
نوال كشرت
ما بلاش طنط دي قوليلي زيهم كدة نونا
هند
حاضر يا نونا انتي تؤمري
خرجت جودي واحلام وسلمو عليهم ... كانت في الوقت دا اسماء معاها تلفون في اوضتها
ياسين
احم هو هو فين اياد وايلين وتيا مش سامع صوتهم يعني
نوال
يختي ع الصداع افتكرلنا حاجة عدله ... في اوضه جودي بتلمهم حواليها كل يوم وتلعب معاهم أصلها وهي صغيره معاشتش طفولتها باين ولا ايه
جودي
ايه يا نونا مالك ع الصبح يا قلبي
نوال
يختي ممليش وصبح ايه دا احنا خلاص داخلين ع العصر اهو
انسحبت نوال واحلام للمطبخ يحضرو الغدا
وامير دخل جاب الولاد وياسين وهند اندمجو معاهم وفضلو يلعبو سوا وامير وجودي قاعدين بيتفرجو عليهم واسماء لسه في اوضتها
امير
واخدة بالك انتي أن قال ايه البيه يقولي هاجي اقعد معاك ف البيت بدل ما ننزل في الحر دا هه واهو مطنشني اهو وبيلعب مع العيال
جودي
ولا التانيه اللي قال ايه هاجي اختار معاكي الديكورات وهي مطنشاني بردو من وقت ما جت وبتلعب معاهم ايه يا اخويا العيلة اللي عندها طفوله متأخرة دي
امير كشر
بلاش انتي والنبي تتكلمي علي الطفوله المتأخرة هه احنا مستحملينك ومستحملين هبلك بقالنا سنين وساكتين اهو
جودي كشرت
تصدق انك رخم رخمان السنين
امير كشر
وانتي رخمة رخامة التنين
ياسين وهند كانو سامعينهم واول ما قالو كدة هما الاتنين وقعو من الضحك عليهم
امير
يا سلام عجبتكم اوي
ياسين وهو بيضحك
جدا هههههههههههههههه بجد انتو مشكلة
هند
ايه التنين ورخمان دي انتم بتجيبو الكلام دا منين
جودي
من عند ام حسين
ياسين وهند بصو لبعض وبصو ل جودي تاني مش فاهمين
امير
ايه يا جماعه بتألش حضرتها بتموت في الألش الرخيص اللي يجلط ويجيب الضغط
جودي وهي بتضحك
وربنا حلوة هههههههههههههههه
امير
ما المشكلة انك كل مرة تألشي انتي الوحيدة اللي بتضحكي علي ألشك
هند ببتسامة
لا حلوة والله يا أمير
امير كشر
جامليها جاملي
ضحكو كلهم علي جودي اللي حدفت امير بالمخدة لبست في وشه .... بس وقفو ضحك فجأة لما سمعوا صوت نوال بتزعق في المطبخ
ياسين بقلق
ايه دا في ايه ؟
امير بهدوء
لا متقلقش تلاقي ماما بتطرقع ل احلام ولا اسماء
هند
طب ادخل شوف في ايه
جودي
لا مش محتاج يدخل هي ماما هتخرج تكمل هنا دلوقتي متقلقيش
فعلا لاقو نوال خارجة متعصبه من المطبخ واسماء واحلام وراها بيحاولو يكلموها
نوال
ابدا ابدا ولا هكلمكم ولا ليكم دعوة بيا ابدا عشان أنا خلاص كلامي مبقاش بيتسمع يا ست اسماء
امير
في ايه يا نوال مالك قلبتي عليهم ليه ؟
نوال كشرت
نوال في عينيك يا قليل الادب يا قليل الربايه
امير بدهشه
الله ! طب ليه كدة طيب انا عملت ايه ؟
نوال
شحط زيك يقول ل أمة نوال ايه خلاص معرفتش اربي
امير
يوة مش انتي لسه قايلة ل هند تقولك نونا واصلا طول عمرنا بنقول نونا في ايه بقا اي زعيق وشتيمة وخلاص
نوال
لية كنت مجنونة انا ولا مجنونة هه
جودي
معلش يا حبيبتي انا اللي مجنونة متزعليش نفسك
نوال
اسكتي انتي خالص ملكيش دعوة
جودي كشرت
مين فيكم اللي عصبها كدة ؟ اهي هتفضل طايحة فينا كلنا اليوم كله مين السبب عشان اطلع عينيه انطقو
نوال
متشخطيش فيهم قلتلك ملكيش دعوة يا رخمة
اسماء قربت منها
نونا انا اسفه والله بس مش هينفع ارجع في قراري عشان خاطري اهدي وتقبلي دا عشان خاطري
نوال
يا بنتي انتي عايزة تجننيني منين قائلين هتفضلي هنا تحت عينا عشان زفت مصطفي ميقدرش يوصل للعيال ويأذيهم ومنين عايزة تنزلي بيهم شغل ؟ عايزة افهم بتفكري ازاي انتي ؟
اسماء كشرت
اعمل ايه طيب معنديش حلول تانيه والله
احلام
يا اسماء انتي بنفسك كنتي مرعوبه من المسج ازاي هتخرجي بيهم من البيت الفترة دي استني طيب لما نشوف الظابط هيعمل ايه وبعدين نتصرف
اسماء
صاحبه الحضانة اللي كلمتني ع الشغل مستنيه مني رد انهاردة يا ب اه يا ب لا
نوال
يبقي ب لا وبناقص الحضانة دي ولما شريف يتصرف في موضوع مصطفي تبقي تنزلي تدروي علي شغل براحة راحتك ودا اخر كلام عندي يا اسماء
هند وياسين كانو حسين أنهم محروجين خصوصا انهم مش فاهمين حاجة امير حس بيهم ف حب يخفف الجو شويه
امير
وبعد كل النقاش دا يا تري في غدا ولا الخناقه جوة كانت مشتعله ف نسيتو تعملو الاكل ؟
نوال
يا واد انت بارد كدة لمين هتجنني
جودي
انتي مش مسيطرة يا نوال
نوال
يا بت بطلو نوال دي عيب
جودي ضحكت
هههههههههههههههه لا بجد مالك
نوال
يا تقولو نونا ويا تقولو ماما لكن نوال كدة عيب انا مش صغيره بلعب معاكم
الكل ضحك عليها وهي كشرت
نوال
اضحكو اوي ... وانت يلي جعان انت قوم خرط الملوخيه يلا انا دراعي وجعني واحلام هتنشر واسماء هتروق
ياسين وهند ضحكو
امير كشر.
ملوخيه ايه اللي اخرطها يا ماما عيب كدة
نوال بصتلهم وهما بيضحكو
انتم بتضحكو علشان هيخرط الملوخيه طب ما انتي يا حلوة هتقومي تحشي المحشي معايا وياسين هيقعد بالعيال لحد ما نخلص
ياسين وهند بصو لبعض بدهشة وسكتو
.وبعد ربع ساعه كان الكل بينفذ تعليمات نوال
❈-❈-❈
في المطبخ نوال وهند بيحشو المحشي وامير قصادهم بيخرط في الملوخية وهو مكشر اوي وهند كل ما تبصله تضحك
امير
هتفضلي تضحكي كدة كتير يعني ولا ايه ؟ عجبك كدة يا ماما ؟
نوال
اه عجبني ضحكتها جميله ومنورة وشها
هند بحب
حبيبتي يانونا متحرمش منك
امير
لنا الله ... هقول ايه لنا الله
برة كان ياسين قاعد بيلعب مع العيال ف الريسبشن خلصت اسماء وراحتله
اسماء بحرج
انا اسفه جدا اكيد تعبوك وصدعوك معلش
ياسين ابتسم
لا ابدا بالعكس انا مبسوط والله بالقاعدة معاهم اوي
اسماء
دا عشان مش يوميا في الزن دا صدقني لو جربت الزن دا يوميا هتهرب منهم بعد كدة
ياسين
هو احم هو مش تدخل مني والله بس يعني ا
اسماء ببتسامة هاديه
ليه التوتر دا كله في ايه ؟
ياسين
احم ... انا يعني اللي فهمته أن في مشكلة عندك وعشان كدة انتي هنا .. وانك عايزة تشتغلي بس مينفعش تنزلي لا انتي ولا الولاد من هنا صح كدة ؟
اسماء
اه فعلا دي المشكلة
ياسين
طيب انا ممكن اساعدك
اسماء باستفسار
ازاي ؟
ياسين
عندك لاب توب ؟
اسماء بتفكير
هو معنديش .. بس عندي امكانيه اني اجيبه بس ليه ؟
ياسين
طيب علي ما انتي تجيبه وتظبطيه هكون انا كلمتلك الطلبة اللي عندي اللي بيعملوا ماجستير وبيحضرو دبلومات وجبتلك ملفين تلاته كدة تكتبيهم ورد وتنسقيهم و
قاطعته اسماء
لا انا مش بعرف انسق والحاجات دي غير اني لغويا مش شاطرة اوي عشان أتقن اللي بتقول عليه دا
ياسين
طيب هسيبلك اسبوع واحد تكوني جبتي اللاب توب وشوفتي فيديوهات عن الموضوع دا وظبطتي نفسك اتفقنا
اسماء بتردد
لو معرفتش ... هبوظ للطلبة بتوعك مشروعهم يعني لا اخاف
ياسين ضحك
تبوظي مرة واحدة هههههههههههههههه لا يا ستي متخافيش مش هتبوظي حاجة اعملي بس زي ما قلتلك وكله هيبقي تمام
اسماء ابتسمت وهزت راسها بموافقه
امير خارج من المطبخ
ادي اليوم اللي قلت اروح اريح من الشمس في البيت ادخل اخرط ملوخيه وفي الاخر تقولي ايه اللي انت مهببه دا وتعيد عليا انا اللي غلطان والله لا والتانيه كل شويه تبصلي وتضحك كأنها شايفه اراجوز قدامها
ياسين
عاش يا بطل خلصت خرط الملوخيه ولا ايه
امير كشر
والله يا أمير لو اتريقت انت كمان هزعلك بس هه
اسماء
طب عن ازنكم هاخد الولاد جوة
ياسين بلهفه
لا سيبهم .. ا اقصد يعني خليهم يلعبو حوالينا كدة
اسماء
انا قلت يعني عشان تقعدو براحتكم من غير دوشه
امير حس في عيون ياسين بلهفه جامدة للولاد كان عارف من جلال اللي حصل معاه وعارف اد ايه هو مشتاق للاطفال
امير ببتسامة
لا سبيهم هما بيلعبو حوالينا اهو واحنا كدة كدة مش بنعمل حاجة قاعدين عادي مع بعض
اسماء
اوك .. هدخل بقا ل نونا واحاول اصالحها
امير
ربنا معاكي
بعد ما دخلت ياسين بص ل امير وسأله مباشرة
ياسين
هو مين مصطفي ؟ وايه المشكلة أن عند اسماء و ولادها ؟
امير بحرج
ا مصطفي دا يبقي طليقها ويعني في مشاكل بينهم كتير وهي خايفه ياخد منها الولاد
ياسين
رغم أن حاسس ان في حاجات اكبر من كدة بس تمام انا عموما عرضت عليها شغل من البيت عشان متنزلش
امير
شغل ايه دا ؟
ياسين حكاله وامير رحب جدا بالفكرة
بعد حوالي ساعة كانو متجمعين علي السفرة بيتغدوا سوا وانضم ليهم جلال شريف اللي سكت لما عرف بوجود ياسين وهند ومرضيش يتكلم ف موضوع الظابط ومصطفي
بعد الغدا جودي خدت هند وجلال ودخلوا اوضتها وبدأوا يختارو ديكورات المكان سوا
امير وياسين وقفو في البلكونة يشربو قهوة وسجاير
شريف ونوال واحلام واسماء كانو ف اوضه نوال بيعرفو اخر الاخبار
نوال
يعني انت أكدت علي الظابط يعرف مصطفي كل حاجة انهاردة يا شريف ؟
شريف
اه والله يا ماما انا شرحتله الوضع كله وهو وعدني هيساعدني متقلقوش بقا
احلام
شوفتي اهو أن شاء الله الموضوع هيتحل بطلي عياط ونكد بقا
اسماء كشرت
انا نكديه يا احلام
احلام
اه نكديه وعليكي بوز يقطع الخميرة من البيت
اسماء
شايف مراتك يا شريف
شريف
أيوة شايف وشاهد كمان انتي ليكي حق عرب كدة
نوال
ايه يا حريقه افندي اهدي هه يلا يلا نخرج نقعد برة عيب عندنا ضيوف يقولو علينا ايه
شريف باستغراب
لا حول ولا قوه الا بالله العلي العظيم هو مين اللي دخلنا هنا وقفل الباب عشان يعرف اللي حصل هه مش حضرتك
نوال
اه حضرتي وخلاص حضرتي عرفت يبقي يلا بقا
احلام
صح بقالنا كتير هنا يلا بينا
خرجو قعدو في الريسبشن وشويه وامير وياسين انضمو ليهم ولما جودي وهند خلصو خرجو قعدو معاهم شويه وبعدين ياسين استأذن وخد هند ومشيو
❈-❈-❈
في قسم الشرطة كان واقف شادي متوتر ومش عارف يعمل ايه ... الظابط لو دور وراه كويس هيعرف أنه زور الشهادات اللي معاه غير أنه معرف الجيران كلها أنهم يتامي ملهمش حد لكن دلوقتي حاليا مفروض احمد والد ياسمينا في الطريق .. مكنش متوقع أنها تنتحر ... مكنش في دماغه ابدا أنها تنهي حياتها ولا أن حد غير حبيبها يلمسها ... ويا تري مصيرة هيكون ايه دلوقتي ؟
هند لما روحت الاء خدتها اوضتها وحكتلها موضوعها مع عاصم كله وأنه خلاص هيجيب عمها ويجو يطلبو ايديها وهند فرحت من قلبها لاختها وفرحت اكتر أن الاء بدأت تقرب منها بعد ما كانت مكتفيه ب اميرة وبس
ياسين من وقت ما روح وهو شاغل تفكيره ايه المشكلة اللي عند اسماء ؟ وليه أطلقت ؟ وليه خايفه تنزل وقاعدة عند حمات اختها ؟ وليه هو شاغل باله اوي كدة بكل دا ؟
شريف زي ما هو لسه مش قادر يتعامل عادي مع احلام ولا قادر يبعد عنها
ولسه هي بتحاول تقرب منه بالتدريج عشان متضغطش عليه
يتبع
إلى حين نشر الفصل الجديد للكاتبة منى محمود من رواية كيد النسا قهر الرجال, لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
