قراءة رواية عسل مالح الجزء الثالث كاملة

تنشر حصريًا على مدونة رواية وحكاية قبل أي منصة أخرى

قراءة رواية عسل مالح 3

من روايات وقصص 

الكاتبة أسماء عبد الهادي

الفصل الخامس

❈-❈-❈

رآها فتوتر قلبه وازدادت نبضاته قوة و حدة، ابتلع ريقه عدة مرات بغية ان يتحكم في ذلك القابع بين اضلعه لكنه سرعان ما تمالك نفسه وغض بصره عنها وبالرغم من صعوبة الأمر على قلبه المشتاق إلا أنه فعلها حتى لا يخون أخيه، فهو الرجل ابن الرجال

استمع صوتها تقول ع استحياء وضعف 

ااا انا جبت المسكن لفاطمة هيريحها ان شاء الله

كم كان مشتاق لصوتها بات يلعن الظروف التي جعلت بينها وبينه مئات الأميال ويلعنها هي أيضا لتخليها عنه ،لذا قال بصوت يملؤه الحدة والخشونة بعدما افسح لها الطريق

تقدري تدخلي ليها وتعطيهولها بنفسك 

قالها وانسل هو خارجا وبسرعة البرق يسابق الريح إلى خارج الدار كله 

يلهث وكأنما هناك وحشا ضاريا يطارده 

رفع رأسه للسماء يناجي ربه 

يارب ريح قلبي وجنبني الفتنة يارب 

أما نادين فدخلت لفاطمة ونادت عليها بضعف 

فاطمة طمنيني عنك المسكن اهو 

ما ان استمعت فاطمة صوت نادين

حتى نهضت من مكانها وركضت بسرعة تغلق باب غرفتها عليها وهي تقول 

تسلمي يا نادين يا خيتي اني بخير الحمد لله مفياش حاچة 

نادين استغربت كلامها 

طب الحمد لله انا قلقت عليكي لما كنتي بتتوجعي تحت انا جربت كل انواع الوجع دا ومجرباه علشان كدا متحملتش اشوفك بتتوجعي 

قالت فاطمة بأسى

 يا حبيبتي ربنا يعافيكي يارب ابشري فرج الله قريب ان شاء الله 

نادين

أمين يارب متنسنيش من دعائك يا فاطمة 

فاطمة ابدا مش بنساكي علطول فاكراكي يا حبيبتي دا انتي مرة الغالي 

اتنهدت نادين لذكرها ذلك لكنها تذكرت فعلة فاطمة فقالت بتساؤل 

بس استنى قوليلي انتي ازاي بقيتي كويسة بمجرد ما طلعتي اوضتك مش فاهمة 

ضحكت فاطمة هههه انتي لسه مفهمتيش دا كانت مسرحية اكده عملتها علشان اخوي عز كان واقع ف ضيقة وانا قلت اساعده 

طالعتها نادين بعدم فهم مسرحية وعلشان عز انا مش فاهمة حاجة

جلست فاطمة ع طرف الفراش وامسكت بطرف شعرها تلعب به 

ماهو صدق اللي قال يقطع الحب وسنينه 

نادين فاطمة لا انا مش فاهمة ماله عز 

فاطمة يا بنتي افهمي مش عز اخوي بيحبك؟؟ 

نادين هو عز لسه بيحبني ليه انا عملت كل دا علشان يكرهني

فاطمة يا صبر ايوب يارب رغم اني محبتش قبل اكده لكني عارفة ومتأكدة ان اللي بيحب بجد لا يمكن يكره حبيبه بسهولة مهما حصل حتى لو غلط وغلط غلطة كبيرة كمان مش بساهل ينسى مهواش زرار ينضغط يتمحي كل حاجة انتي ذات نفسك اتجوزتي اخوي ومقدراشي تنسي عز 

اخفضت نادين راسها للاسفل وتنهدت بأسى 

لتقول فاطمة نادين اني عندي فكرة بس هي مجنونة شوية طبعا انتي وعز لسه بتحبوا بعض و...

قاطعتها نادين بحدة لا يا فاطمة لا استحالة اكون لعز اخوكي استحالة ما انا قلتلك قبل كدا 

تنهدت فاطمة بأسى يا نادين حمزة اخوي بيحب مرته نوارة واني مرضياشي ع الوضع ديه أبدا ليه منصححش الأوضاع وبلاها وجع القلب للكل ديه وكل قلب يسكن مع القلب اللي يميل ليه 

نادين

مش كل حاجة عايزينها نقدر ننولها يا فاطمة 

فاطمة طب ليه منسعاشي ونحاول ننولها وهي ف ايدينا 

نادين مفيش اي حاجة ف ايدينا خلاص كل حاجة راحت 

فاطمة انتي ليه متشائمة اكده 

نادين مش تشاؤم دا واقع يا فاطمة صدقيني، انا بالنسبة لنوارة اقسملك اني مش موافقة ولا راضية ليها الوضع دا علشان كدا انا بقولك ان وجودي هنا مش هيطول 

فاطمة بصدمة ايه هتطلبي الطلاق من حمزة اخوي 

نادين بالظبط كدا دا اللي هيحصل وقريب اوي بس بالله عليكي اوعي تقولي لحد علشان حمزة ميزعلش لانه طلب مني محدش يعرف بدا 

جلست فاطمة وسحبت نادين لتجلس جوارها 

لا تعالي اجعدي جاري اهنه وفهميني يعني ايه حمزة طلب منك متقوليش لحد معنى اكده أنه عارف بموضوع طلبك الطلاق وموافق عليه كماني 

نادين بالظبط كدا يا فاطمة بس بالله عليكي متقوليش لحد دا امانة مش عايزة ازعل حمزة مني 

صمتت فاطمة قليلا وكأنها تفكر ف شىء ما وبعدها قالت 

معنى اكده ان حمزة اخوي عارف بالحجيجه وانك انتي وعز بتحبوا بعض 

نادين دا حقيقي انا حكيتله كل حاجة مخبتش عليه اي حاجة خالص 

فاطمة وضعت يدها ع رأسها 

يالهو بالي يانا جلتي لجوزك انك بتحبي غيره وهو عادي اكده سلم للأمر ومجالش حاجة ورضي بيه واتجوزك كماني 

نادين تعرفي اني معجبة بحمزة اخوكي جدا ، حقيقي شوفته راجل مثالي اوي يا بخت نوارة بيه حقيقي ونعم الرجال 

شعرت فاطمة بالدوار فوضعت يدها ع رأسها بتيه 

لاه لحظة اني منيش فاهمة ايتها حاچة واصل 

نادين الحقيقة ان انا وحمزة متجوزناش خلاص كدا ارتحتي 

نهضت فاطمة من مكانها ع عجل وقالت بصدمة ايه؟؟ اااه اني دلوك فهمت اكيد ديه ملعوب من حمزة اخوي علشان يأدب نوارة ع اللي عملته فيكي انتي وعز ووشاهدتها بيكم بالزور مش اكده 

نادين بالظبط كدا 

امسكت فاطمة بيد نادين وقالت بفرحة ديه احسن خبر سمعته ف حياتي ورب الكعبة دلوك مفيش داعي لحزن نوارة وكمان عز اخوي فرصته في انه  يتجوزك بقت سهلة ويسيرة 

نادين بردو يا فاطمة هتقولي كدا 

فاطمة بإصرار ايوة تاني وتالت ورابع كماني اني فرحانة فرحانة جوي علشانكم 

نادين بغيظ تعرفي اني غلطانة اني قولتلك حاجة 

فاطمة ليه بس يا نادين بالله عليكي 

نادين بحزم فاطمة لو مش عايزة تزعليني اياكي تقولي الحقيقة لاي مخلوق انا ءأتمنتك ع السر دا وواثقة انك مش هتخرجيه لبرا، انا لما اتطلق من حمزة هرجع القاهرة وهتابع حياتي بعيد عن عز وهو ربنا يرزقه ببنت الحلال اللي تناسبه 

جلست فاطمة ع طرف الفراش وهي تقول بحزن

ياربي ع وجع الجلب ، هو فيه اكده يا ناس 

❈-❈-❈

استمعت لرنين هاتفها فركضت مسرعة ظنا منها أنها فاطمة من تود محادثتها لكنها وجدته اخر شخص تود الحديث معه او حتى سماع صوته 

امتعض وشهها بضيق وتركت الهاتف مرة اخرى وكادت لتعود لمباشرة عملها ف تنظيف المطبخ 

لكن مع إصراره ع الرنين 

أجابت لتنهي الأمر 

وما إن اجابت حتى سمعته يقول بانزعاج

ايه سنة علشان تردي 

اجابت زهرة ببرود 

ايه كني فاضية إياك و جاعدة يمة التلافون ليل ونهار موراييش شغل بعمله دلولك وانت عطلتني مثلا 

رد بضجر طب خلاص هتحكيلي قصة حياتك 

زهرة رايد ايه يا جلال بتتصل دلوك ليه 

اجابها بغزل مصطنع ايه مكلمش خطيبتي نتسامروا مع بعض اياك 

زهرة لا ما فضياش اتاسمر معاك يلا اجفل فوتك بعافية 

جلال حك ذقنه وهو يقول ياعيني ع الحلو لما يتدلع يا عيني 

زهرة بحدة جلال يا ابن عمي وبعدهالك اني هجفل 

جلال لاه استنى اني عايزك ف موضوع مهم 

زهرة موضوع ايه ديه 

جلال لاه مهينفعش ف التلافون اسمعي جابليني بكرة الصبح عند دار عمك وهجولك 

زهرة لاه اني مهجابلش حد برات داري اني واحدة متربية وعارفة حدودي اكويس 

جلال يا بت كني بجولك نتقابل ف موعد غرامي اياك ، اني عايزك ف كلمتين مهمين من غير ما حد يسمعنا 

زهرة قولهم دلوك وخلصني 

جلال قلتلك مينفعش هتفهمي ولا مخك اتخين 

زهرة واني مش هقابلك ف اي مكان برات داري 

جلال اباي عليكي جبر يلم العفش 

زهرة عتدعي عليا يا جلال هي حصلت طب اجفل اجفل 

جلال استدرك نفسه 

يا بو انت جلت العفش وانتي كيف البدر منور، مهدعيش عليكي ولا حاچة ها هنتكلم فين 

زهرة اهنه ف الدار وديه اخر كلام عندي 

جلال لاه داركم اخر مكان ممكن نتحدتوا فيه ،بصي اسمعي انتي هتروحي السوق بكرة؟ 

زهرة ايوة ليه 

جلال هجيلك ع هناك ونتكلموا براحتنا سلام دلوك 

زفرت زهرة بضيق اعوذ بالله ربي يخلصني منك يارب ربنا ع الظالم والمفتري

❈-❈-❈

نهضت نادين من غرفتها 

طيب انا هقوم اروح اوضتي لاني تعبت 

فاطمة لاه بالله عليكي خليكي معايا اهنه جاعدتك معيتشبعش منيها ولو تعبتي تعالي نامي اهنه ف فرشتي 

وف تلك الاثناء استمعوا لصوت طرقات ع الباب 

وصوت بهية بت يا فاطمة عاملة ايه دلوك يا بت 

اسرعت فاطمة للفراش يالهوي امي هتجفشني وتعرف اني مكنتش تعبانة ولا حاجة 

ابتسمت نادين ع تلك الحركات الطفولية من فاطمة وتذكرت مرحها ف الماضي وانها كانت تفعل ما يحلو لها بحرية تامة 

ههه متخافيش انا هقول اني جبت المسكن اللي بستخدمه وهما اكيد هيفهموا انه عمل مفعول كويس معاكي، انا كدا مش بكدب انا جبته فعلا معايا اهو 

فاطمة ماشي وربنا يستر 

دلفت بهية ومن خلفها حمزة 

بهية طمنيني عليكي يا بتي 

فاطمة اني بقيت كويسة الحمد لله ياما اطمني 

حمزة بحنان الف سلامة عليكي يا حبيبتي لسه بتتوجعي نروح نكشف نطمن 

فاطمة لا يا خوي شوية مغص وراحوا لحالهم تسلم وتعيش 

ضربتها امها ع رأسها 

انتي كيف القردة اها كنتي هتدجلعي اياك، قيمتي الكل من ع الوكل يا مصيبة 

فاطمة اخ ياما ايدك تجيلة 

حمزة معلهش يا ما فداها اي حاچة المهم انها كويسة يالا اني هستأذن أني 

فاطمة متحرمش منك ابدا يا خوي 

بهية انزلي يا نادين كملي وكلك يا بتي  الأكل لسه ف مكانه انتي ملحجتيش تحطي لجمة ف بوءك من المصيبة داي 

فاطمة لاه ياما خلي ام الخير تطلعلنا الوكل اهنه في الاوضة هاكل انا ونادين سوا 

بهية شايفة يا نادين الجلع بتاع بتي ديه 

فاطمة وماله ياما ان ما اتجلعتش ف دار ابوي هتجلع فين يعني 

ابتسمت نادين ربنا يباركلنا في عمو الحج عيسى يارب 

بهية 

وربنا طالعة من بوءك زي العسل يا بتي 

هنا جاءت نوارة وقالت عابسة 

ايوة عسل ، ماهي خلاص خدت موطرحي وبجت الكل في الكل، چت أخدت انتباه الكل ليها حتى انتي يا ست الدار وبجيت اني صفر ع الشمال 

فاطمة متجوليش اكده يا نوارة انتي عارفة معزتك عندينا كلنا وعندي اني بالذات 

نوارة كلام وبس يا فاطمة كلام وبس ، قصره اني كنت چاية اطمن عليكي لكن من الواضح انك بخير يلا فوتكم بعافية

ابتأست نادين لحالة نوارة وغيرتها منها دون داعي لكن ما باليد حيلة 

وما ان همت نوارة بالرحيل حتى قالت بهية استني يا نوارة رايده  اتحدت معاكي بكلمتين 

وضعت نوارة يدها ع رأسها مدعية التعب 

معلهش يا خالة دماغي فيها ريحة صداع خلينا نتحدت  وقت تاني اكون روجت هبابة

علمت بهية انها لا تريد التحدث الان فقالت ماشي يا بتي اللي يريحك ربنا جادر يهدي سرك ان شاء الله

❈-❈-❈

في اليوم لم تكن زهره تود الذهاب للسوق ذاك اليوم حتى لا تقابل صاحب الوجه العكر 

لكن استغربتها امها 

بت يا زهرة انتي اتأخرتي على السوق مش هتروحي علشان ترجعي جبل القيالة يا بنتي 

ارتبكت زهرة واضطرت لأن تذهب ااا ها طيب يامه اني هروح اهو ، بس الأول طمنيني ع خالد اخوي اني مشفتوش النهاردة 

أجابت أمها بينما تعيد خياطة بعض الملابس 

خرج يشم نفسه يا حبة عيني اتخنق من جاعدة البيت ربنا يحفظه ويبارك فيه 

تنهدت زهرة بأسى لأخيها وقالت أمين يارب ماشي يامه اني رايحة فوتك بعافية 

وفي الطريق ظلت تحدث نفسها ربنا يرجعك لينا سالم دايما يا خوي اني عملت اكده علشانك انت وبس 

وبينما هي منهمكة في عملها باختيار بعض من حبات الطماطم اذ جاءها جلال وهمس بجوار اذنها 

الجميل اخيرا طل علينا عوقتي يا زهرة بستناكي من بدري 

تركت ما بيدها والتفت اليه قائلة بانزعاج

لخص وجول رايد ايه يا جلال اخلص اني منيش فاضية 

كشر بوجهه وقال بضيق 

چرا ايه يا بت ما تتكلمي معايا عدل ، انتي هتشوفي نفسك عليا ولا ايه كانك نسيتي نفسك اياك 

زهرة انجز يا جلال وقول الكلمتين بتوعك وخلصني 

نظر جلال حوله ليرى مكان مناسب وما ان وجده بجوار سيارته التي تركن في الظل 

طب تعالي اهنه جار عربيتي اقولك عليهم

سارت معه ع حذر 

ها ادينا وصلنا خير 

وما ان قص عليها ما يود منها فعله 

ضربت ع صدرها 

واااه انت عتجول ايه لاه اني لا يمكن اعمل اكده واصل انت اتچنيت ولا چرى لعجلك حاچة 

طالعها جلال بوجه قاتم وقال بصوت يشبه فحيح الحية 

اللي عجولك عليه تنفذيه بالحرف الواحد انتي سامعة يا بو انتي 

ردت زهرة بحنق وغضب 

اسمع لما اجولك انت ملكش صالح بفاطمة نهائي وإلا ورب الكعبة هجوم الكل عليك وساعتها ابقى جابلني لو عرفت تخلص منيهم 

أمسك هو بذراعها بحدة وهو يقول بتحذير 

وربنا المعبود يا زهرة الكلب انتي لو حد شم خبر باللي جولتهولك ديه  لهترجعي دارك لا تلاقي لا أمك ولا اخوكي وكمان هتجولي ع نفسك يا رحمن يا رحيم وانتي عارفة ديه امنيح ومتأكده منيه 

سحبت يدها وهي تقول بقهر 

حرام عليك انت عايز مننا ايه سيبنا في حالنا بجا يا أخي دا احنا على باب الله وعايشين اليوم بيومه سيبنا اللي فينا مكفينا 

جلال طالعها بوجه قاسي 

اللي جولته مفيش مخلوق يعرف بيه انتي فاهمة والا وقسما بالله ارميكي لكلاب السكك ينهشوا فيكي واجف اتفرچ عليكي 

اذدردت ريقها وقالت بخوف 

مهجولش حاجة ولا هفتح خشمي ربنا على الظالم والمفتري، بس خرچني اني من الموضوع ديه مجدرش ءأذي فاطمة بالله عليك مهجدرش 

تكلم بلين قليلا 

يا بت هو اني هأذيها يعني لا سمح الله ، لاه ديه زي تهويش اكده علشان أكسر شوكتها وتوافج تتجوزني 

 قالت زهرة بحنق يعني انت رايد تتچوزها في حلال ربنا؟؟ 

جلال بخبث ايوة طبعا اومال ايه 

زهرة طيب روح اتجدم ليها ولو وافجت بيك يبجي حلال عليك 

جلال في نفسه كني لو كنت متوكد انهم هيوافجوا كنت اترددت ثانية لكني متوكد ان محدش فيهم هيوافج وخاصة البو عز ومفيش طريجة اوصلهم بيها غير أكده

لذا قال ايوة كل ديه علشان افوز بيها يا بت 

زهرة باللي عتجول عليه ديه بالإجبار وكسرة النفس والفضيحة انت فاهم الكلام اللي عتجول عليه ديه وواعيه 

جلال ملكيش صالح انتي تنفذي وبس انتي فاهمة يا بت انتي ولا عايزة تتجرصي علشان تفهمي أني مستعد افهمك ودلوك حالا ، الكلاب  السعرانة عندي ومنتظرة اي لحم ارميه ليهم وبصراحة مهلاجيش احسن واطعم من لحمك يا جمر انتي  

قالها وطالعها بنظرات جرئية لتنتفض هي مكانها من الخوف فهي تعرف ان جلال لا يمزح أبدا وليس لديه قلب ولا ضمير 

لتسمعه يقول وعلشان اضمن انك هتنقذي كلامي بالحرف يا جمر انتي ،اخوكي خالد دلوك مشرفنا لحد ما المهمه تتم 

شهقت زهرة بخوف ع اخيها ايه خالد اخوي حرام عليك ديه لسه مفاجش من اللي هو فيه فيه سيبه في حاله الله يخليك 

جلال اعملي اللي بقولك عليه يا زهرة علشان تشوفي اخوكي تاني لاما هوديه ورا الشمس وقسما بالله ما تشوفيه تاني بعد اليوم ولو عملتي ايه 

ردت سريعا بخوف ع اخيها 

ماشي هعمل اللي انت عايزه بس بالله بلاش اخوي 

جلال بشر  يبجى نفذي يا زهرة ودلوك 

يتبع

إلى حين نشر الفصل الجديد للكاتبة عسل مالح 3، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة