رواية رومانسية جديدة زوج مؤقت

من روايات وقصص الكاتبة

 هالة محمد الجمسي

❈-❈-❈

وضعت نهال يدها على راسها وهي تتمتم: 

_مش معقول مستحيل مستحيل فريد يعمل كدا اكيد في حاجة تانية 

قال الأب وهو ينظر إلى إبنته في شفقة: 

_انت لسه عايزة تلاقي حجة لواحد ندل وجبان زي دا؟ 

رفعت نهال بصرها إلى والدها وتابعت: 

_بابا، فريد بيحبني جه من أمريكا مخصوص لما افتكر اني مش هكمل دراستي كان خايف على حبنا 

قاطعها الوالد في صرامة: 

_كان جاي يتسلى ويلعب، دا مراهق مش راجل ولا يعتمد عليه، جري علشان جوازة من أمريكية، علشان مصلحته ومصلحه عيلته، ضحى بيك أنت أنت لازم تفوقي وتفهمي أن الكلب دا ميستهلش حتى تحزني عليه، ربنا كشفه والبت اللي جت دي، كانت جاية علشان تفهمك حاجات عقلك رافض يفهمها 

انحدرت دموع نهال، مع دخول إيفا بكوب العصير قائلة: 

_في اي؟ العروسة بتعيط علشان هتسيب البيت 

لم تجب نهال في حين قال مراد: 

_سيبنا لوحدنا يا ايفا 

امتثلت ايفا لأوامر مراد بك الذي قال في صوت منخفض: 

_اسمعي يا نهال أنا وافقت على الشخص دا علشانك أنت،  مكنتش مقتنع بيه بس مؤمن انك لازم تكوني سعيدة، وربنا كشفه ليا و  ليك، بعد ما سبتك اتصلت على ناس في المرور علشان لو في حادث حصل الساعات اللي فات اعرف الكل أكد لي أن مافيش حوادث حصلت في الطريق من شقته لحد هنا، حمدت ربنا وقلت اكيد لسه في الشقة والموبايل اكيد فاصل شحن او واقع هنا ولا هنا  لما روحت على الشقة بتاعته اللي المفروض تكون الليلة اول يوم ليكم هناك سوا، شقة مضلمة ومسكتة، مافيش مظهر بيدل على أن في استعداد للفرح مافيش زينة أو انوار، كدبت ظني وقلت دا شاب وميفهمش ف الحاجات دي، نزلت البواب أساله قال لي أنه خرج بالعربية للمطار مع واحدة ومع شنطة، كلام البواب مخدتش بيه اتصلت على المطار وأكدوا لي أن فريد سافر من ساعة، يعني يدوب قفل معاك وراح على المطار،  واضح اوي أن البيه عايز لك فضيحة من طراز فاخر، عايز انتقام بمعنى اصح، دا شيطان حقيقي، مش بني ءادم، اي كمية الغل اللي جواه دي؟ وليه؟ علشان يكسرني أنا كمان ما هو أنا وأنت قلب واحد

نظرت له نهال في حزن مما دفع الأب أن يكمل: 

_يهرب يوم الفرح بطيارة خاصة محجوزة ليه من امريكا بتوصية من برا علشان يروح لعروسه هناك، والفرح اللي هنا ينكسل، عارفة ليه؟ علشان سيرتك أنت تبقى زي الزفت، نهال بنت مراد رجل الأعمال جوزها سابها يوم الفرح، سابها ليه؟ ويوم الفرح كمان!!

أنا لآخر لحظة في الجوازة دي كنت بسأل نفسي ليه نصيب بنتي يبقى كدا؟ ليه نهال الجميلة المثقفة الحبوبة تتجوز واد زي دا 

ربنا قال لي خلاص كدا مش هتتجوزه، طيب والسيرة وسمعتي وسمعتك، الشيطان اختار 

وقت حرج  وقت قاتل لينا وقت يمكن منقدرش ناخد قرار أو نرتب أمور تانية، وهو سافر علشان يتجوز وأنت كمان لازم تتجوزي 

نظرت له نهال في حزن ثم قالت وهي تمسح دموعها:  

_جواز اي يا بابا!؟ أنا حاسة أن في كابوس ارجوك يا بابا قول اني دا حلم وأنا شوية وهفوق، اكيد فريد جاي اكيد هيدخل دلوقت فريد بيحبني يا بابا أنا عارفة 

صمت مراد بضع دقائق قبل أن يكمل في حسم: 

_الفرح هيتم الجوازة هتكمل مش هسيب حد يسب فيك أو ينولك في كلمة وحشة سمعتي وسمعتك المع وانضف من الالماظ  وصور فرحك هتنزل في كل مكان والدنيا كلها هتحلف أن مافيش عروسة  اجمل من نهال

قالت نهال وهي تمسح دموعها: 

_يعني اي يا بابا؟ مش فاهمة 

قال الأب وهو يرفع رأسه عالياً: 

_يعني المأذون هيعقد الليلة والقاعة هتمتلي و المعازيم  يرقصوا وقبل ما فريد ينزل صور خطوبته على بنت أمريكا

هتكون صور فرحك مالية الدنيا، الناس مش هتقول  بنت مراد اتجوزت واحد تاني غير خطيبها، الناس بس هتفضل تقول بنت مراد سابها خطيبها يوم فرحها، علشان كدا لازم تتجوزي الليلة وكل اللي اترتب له مش هيهد هيتم يعني هيتم

هزت نهال رأسها في علامة الرفض وقالت:

_يا بابا مستحيل  ازاي يا بابا ازاي اتجوز حد غير فريد 

قال مراد في صوت غاضب: 

_علشان أنا قلت خلاص، فرحك النهاردة يا نهال على شاب محترم وابن ناس ورجل أعمال كمان 

نظرت له نهال في حسرة وقالت: 

_بابا دا جواز وأنا :::

تابع الأب في حسم:

_ما هو أنا هجوزك واحد امين عليك يا بنتي هيصونك ويحترم كلمتي معاه، جواز قدام الناس علشان لسانهم يخرس، جواز كام شهر

فكرت نهال بعض الوقت كيف سوف الناس بعد هذا الموقف؟ بل بعد الفضيحة كيف يفعل بها فريد هذا؟ لم يعبأ أن يوجه لها كلمة واحدة قبل هروبه؟ لم يرق قلبه لها لم يشعر بحجم حزنها واحباطها في هذا الوقت، كيف هدر بمشاعرها بتلك القسوة؟ كيف له أن يتخلي عنها بمثل تلك السهولة؟ كيف له أن يدير ظهره لها ويمرمرغ كرامتها بتلك الطريقة،الأب على حق يجب أن تثأر ل كرامتها، يجب أن ترد له الصفعة 

يجب أن يكيل له بذات المكيال بل بنصيب أعلى وأثقل، يجب أن ترتفع صور زفافها بكل مكان قبل أن يزف خبر خطوبته أو صفقته الميمونة إلى العالم، 

الوالد على حق، أنها سمعته وسيرته خاصة أن المجتمع الشرقي يختلف كثير عن المجتمع الغربي 

قالت نهال في يأس: 

_انا موافقة يا بابا أن الفرح يكمل مع اني معرفش العريس مين،  بس لازم احافظ على سمعتك وسمعتي، وزي ما كنت طرف في الفضيحة دي لازم المها وأقتلها بمعنى اصح قبل ما تنتشر في كل مكان،  بس بشرط واحد بس، جواز مؤقت جواز محدد المدة بتاعته كام شهر وينتهي

قال الأب وهو يرفع وجه ابنته عالياً: 

_أتفقنا واوعديني راسك تفضل مرفوعة وتظهري النهاردة قدام الكل أن الشاب دا هو حب عمرك كله، عايزك تقتلي كل حزن جواك الليلة دي قدام الناس عايزك الليلة دي قدامهم بنت الأكابر اللي اتجوزت أمير المدينة الفرح النهاردة هيكون اسطوري 

ثم نظر إلى كوب العصير وقال: 

_اشربي العصير الفريش بتاع العرايس

أمسكت نهال كوب العصير ثم قالت وقد انتبهت إلى أمر ما: 

_بابا فاضل ساعة واحدة على ميعاد المأذون لازم يكون العريس موجود قبليها

قال الوالد وهو يتجه إلى الخارج: 

_هروح اجيبه بنفسي اطمني الليلة دي  الصحف كلها هتتكلم عن العريس اللي فاز ببنت مراد