رواية جديدة 

حرب نواعم (قواعد عشق النساء)

تنشر حصريًا 

على مدونة رواية وحكاية 

قبل أي منصة أخرى

الفصل الثامن

1

تم النشر الثلاثاء

12/3/2024

❈-❈-❈

 نظر زهران إلى جلال وجاسر  أبناءه  ثم قال:

_شفتم نتيجة التحاليل

جاسر وهو ينظر له في هدوء:

_ أنت كويس يا بابا مافيش داعي للخوف أو القلق

جلال القى نظرة باردة على ميرال التي تجلس إلى جوار والدها ثم قال:

_التحاليل بتقول انك كويس 

زهران وهو يضع يد على يد ميرال وكأنه يواسيها من جفاء اشقاءها:

_دام أنا كويس ومليح اي اللي جابكم من شغلكم لحد هنا يا جلال انت وجاسر 

جاسر جلس على إحدى المقاعد وقال في ثقة:

_جايين نشوفك يا بابا, نطمن عليك، وحشتنا والبلد كمان وحشتنا

جلال نظر إلى والده ثم قال في لهجة تعجب واستنكار واضح:

_اي الحكاية؟ هي ميرال خلتك مش عايز تشوفنا ولا اي؟

نظر زهران إلى ابنته في شفقة ثم قال:

_ميرال وقلبها الحنين جت علشان تاخد بحسي لولاها في مرضي كنت مت وكنتم زمانكم بتزور قبري انت وأخوك بدل ما تشكروها 

نظر جلال إلى ميرال في استهزاء وقال:

_شكراً يا ميرال، خدت بابا مننا وخدتي اي كمان؟  

جاسر نظر إلى جلال نظرة تحذير في حين قال زهران في ثقة:

_هو فاضل اي ل ميرال علشان تاخده؟ مش كفاية اللي خدتوه انتم الاتنين انتم ناسيين أن الشركات دي بتاعتي أنا، ناسيين أن المال دا كله بتاعي أنا, انتم معملتوش شركات ولا بدأتم من الصفر، أنتم خدتم نجاحي واموالي وكملتم 

كل الصفقات اللي عملتها انت وأخوك تمت ونجحت ورسيت عليكم علشان اسم زهران ابو المجد، ولا تكونوا فاكرين أن دا تعبكم وشقاكم؟

نظر جلال إلى جاسر نظرة استقواء يريد منه أن يناصره في القول ويعقب على كلماته:

_بس بردوا العقل الذكي له تقل يا أبو جلال ولا اي؟ العقل اللي يحافظ على اسم أبوه ومكانته ويزيد منها ويعلى بيها فوق الحيتان اللي كانت  مستنية  تنزل باسمك

 أو تمسحه كل دا يا أبو الرجالة ملهوش قيمة عندك؟ 

نظر زهران إلى جلال ثم قال:

_اوع تنسى أن أنا اللي علمتك دا كله، الحيلة والمكر في الشغل صبيته

في عقلك صب، يعني يا ابن زهران لازم تصقف لأبوك اللي  علمك مش ابوك اللي يصقف لك 

جاسر قال وهو ينظر إلى جلال في غضب:

_واي لزمة الكلام دا يا جلال؟ ابوك عارف اخبار السوق كويس اوي، هو انت يعني اللي هتعرفه، ما هو عارف انا وانت بنتحرك ازاي, فكرك يعني مصر واسكندرية  بعيدة عن بوك ولا اي؟ 

زهران وهو يرفع رأسه عالياً:

_واللي اكتر من كدا يا جاسر انت وجلال اني عارفكم وفاهم كل واحد فيكم بيفكر ازاي

نظر زهران إلى ابنته وقال:

_شوفي الخدم هيعملوا غدا اي النهاردة، وخلي بالك اخواتك بيحبوا اللحوم بلاش فراخ، لو في مندى يبقى كويس اوي، وبلاش شغل السلطات أو الأكل الخفيف خليها صواني، 

والعصاير  كذا نوع فااكهه  ٠ 

جلس جاسر على مسافة قريبة من والده ثم قال:

_في اي يا بوي؟ مالك اي اللي مغيرك علينا؟ 

زهران ابتسم ساخراً ثم تابع:

_أنت وأخوك جايين طول السكة تفكروا، جايين تشوفوا اخبار الأملاك اللي هنا اي؟ راحت لاختكم ميرال؟ ولا لسه؟ ميرال اللي من بعد مني مش هتلاقي لها سند أو حد يطبطب عليها,  طول عمرك تمت وأخوك معندكوش عواطف، طول عمرك أنت وأخوك باصين الدنيا دي نص أنا ونص انت، نظرتك انت وأخوك أن  الدنيا  تجارة وصفقة  وفلوس وبس، شفت اختك يا جاسر مقلتهاش 

ازيك من باب جبر الخاطر 

ثم نظر إلى جلال نظرة حزن وقال:

_وانت يا جلال جاي تسن سنانك عليها جاي تعمل لها رهبة علشان تعرف بعد كدا اسلوبك اي؟ وتعرف كمان أن مالهاش قوة في حضورك مش كدة عاد؟ 

جلال حاول أن يتحدث ولكن والده أوقفه بإشارة من يده:

 _اوعي تكون فاكر انت وأخوك أن بنتي بعد مني لقمة سهلة، بعد ما اموت كل البلد هتقف جنب ميرال، محدش  هيفوتها لوحدها، انا عارف وواعي لكل واحد فيكم بيفكر ازاي٠

جاسر نهض من مكانه ثم توجه نحو إحدى النوافذ وقال:

_ملوش لازمة الكلام دا يا ابوي، ميرال اختنا وشايلة اسمك معزتها من معزتك جوانا الدم مش هيبقى ميه، احنا بس كنا ملهوفين عليك خايفين عليك 

زهران نظر إلى جلال وقال:

_وانت يا جلال رايك من رأي اخوك؟ 

جلال هز رأسه في أسلوب استسلام:

_محدش يقدر يقول غير أن ميرال اختنا، حتى لو كانت من ام تانية بس  العصب عصب ابوي والجدر كمان يا ابو الرجالة 

نظر زهران إلى كل منهم في عمق ثم قال:

_بعد ما اموت مش عايز حد يشاور عليكم ويقولوا بعد ما ابوهم مات بهدلوا البنية، بعد ما اموت عايزكم تحافظوا عليها هي, هي دي وصيتي ليك انت وهو فهمت يا ابن زهران؟ 

جلال في نبرة تأكيد كاذبة:

_طبعاً يا ابوي 

جاسر وهو يقترب بخطواته إلى جوار جلال:

_اكيد يا ابو الرجال 

نظر زهران إلى كل منهم في هدوء ثم قال:

_التحاليل بتقول أن الحالة لسه في الاول صح كدا؟ 

جاسر نظر إلى والده في دهشة ثم قال:

_ايوا بس بس انت:::::

تنهد زهران ثم قال:

_عرفت ازاي؟ مش كدا يا جاسر, وأنت يا جلال مش مستغرب زي اخوك ليه؟ 

جلال وهو ينظر إلى والده في تفكير:

_انت خدت راي دكتور هنا في التحاليل دي؟ اتكلمت مع دكاترة هنا؟ 

زهران نظر إلى جلال ثم قال في هدوء:

_لا بس كان زمان امي بتقولي الإنسان طبيب نفسه وهو بس اللي يعرف اي اللي بيوجعه ويحس بين  قبل ما الحكيم يقوله، وأنا عارف ان دا مرض النهاية، قعدت في الدنيا كتير، اتجوزت مرتين وشفت الحلو على ايد الاتنين،

امكم لو كانت عايشة كانت قالت لكم أنها شافت معاي اجمل ايام حياتها، ماتت وأنا في قلبها، واتجوزت بعدها علشان حد يفضل معايا ف اخر ايامي، اصل الوحدة صعبة اوي، مراتي التانية جابت لي ميرال وماتت، زي ما كانت بتقولي أنا سبت لك 

قلب حنين أهو يفضل وياك،  ميرال هي وش السعد كل التجارة بعد ما ولدتها زادت  اكتر من عشر مرات وكبرت عملت فلوس كتير، كسبت كتير كتير، الشركات سبتها للي  يشيلوا اسمي، علشان اسيب من بعد ما اموت اسم زهران ابو المجد في الدنيا، كفاية عليا في الدنيا كدا خدت نصيبي منها ، بس اللي مخوفني مش الموت، الموت حنين وأنا عارف، هناك نور مش ضلمة، هناك الأهل اللي كانوا هنا من زمان واشتقت ليهم و اشتاقوا ليا، هناك الراحة بعد التعب اللي كان في الدنيا، هناك  بيوت تانية هادية، الخوف مش من الموت، الخوف على  البنيه اخت الرجال، الخوف عليها من قسوتكم انتم٠

جلال في استنكار:

_خايف على الاخت من اخوها؟ خايف عليها منا ليه يا ابوي؟ 

جاسر وهو يؤيد كلام شقيقة:

_قسوة اي يا بوي؟ للدرجة دي احنا وحوش؟ 

الصفحة التالية