قراءة رواية روضتني 2 (طمس الهوية) كاملة
  تنشر حصريًا على مدونة رواية وحكاية قبل أي منصة أخرى

 

 

رواية روضتني 2

(الجزء الرابع من رواية ترويض الفهد)

طمس الهوية

للكاتبة أسماء المصري

الفصل التاسع والثلاثون

1

تم النشر يوم الأحد

10/3/2024

انزعجت بعد أن استمعت لحديثه الموجه ﻷخته وهي تراقبه من أعلى الدرج وكم شعرت بالحزن والألم يغزو كيانها من أسلوبه المجحف والذي لم ولن تعتاد عليه أبدا.

دلفت جناحها حزينة وبكت بحرقة وهي تتذكر كم المرات التي عاقبها فيها بسبب حُسن نيتها ومحاولاتها المضنية لإسعاد اخته الصغرى ومدللته الكبرى؛ فمهما حاول هو إخفاء تدليله لها يفشل أمام زوجته وأمام الجميع حتى مازن نفسه استطاع رؤية ذلك ووبخه على فعلته تلك.

تنهدت بحزن وهي تجد سيارة مازن تغادر القصر وهي تتابع البوابة من شرفة جناحها المطلة على الحديقة الخارجية ورأت بعدها سيارة زوجها تخرج هي الأخرى وقد تأكدت أنه تركها بل والأدهى أنه اصطحب اخته لحفل خطبة توأم روحها.

عادت تجلس على الفراش باكية وأمسكت هاتفها متصلة بابنة عمها والتي أجابتها فورا بقلق:

-عدت ولا ايه؟

شهقت باكية وهي تجيب:

-عدت ع الكل ما عدا أنا طبعا، أنتي فين؟

أجابتها فورا:

-عند بابا ونرمو جوه بتبلس، طيب عدي اليوم انهارده عشان الخطوبة ونبقى نشوف هنعمل ايه بعدين.

لم تعقب عليها فسألتها شيرين:

-انتي لسه عندك؟ جايه امتى دي نرمو عيزاكي عشان تختاري معاها الميك اب.

مسحت عبراتها وأخبرتها:

-أنا مش جايه.

لمعت عين شيرين وهتفت بذعر:

-انتي بتتكلمي بجد؟

نبهتها فورا وهي تتحرك داخل الجناح تعلق ملابسها بمكانها:

-وطي صوتك وبلاش تقولي حاجه لنرمو عشان منكدش عليها فرحتها.

جعدت جبينها وسألتها بدهشة:

-وهو لما متلاقكيش جنبها مش هتتنكد؟ هو فارس بيعمل كده ليه؟

ضحكت حزنا:

-بيعاقبني وآخد چنى معاه تحضر الخطوبة، كأن أنا بس اللي غلطت في الموضوع ده.

ارتمت على فراشها بعد أن تناولت حقيبة بلاستيكية وفتحتها تنظر لما بداخلها وهي تشكي همها وحزنها لابنة عمها:

-وأنا اللي كنت ناوية بالليل احتفل معاه وجايبه بدلة رقص جديدة.

علقت عليها من الطرف الآخر:

-احنا كنا عارفين إن رد فعله مش هيكون بسيط.

أومأت وهي تمسح عبراتها:

-بس كنا مخططين أنه ميعرفش من الأساس لكن أنتي معرفتيش تخلي مازن ميزعقش ويعلي صوته لحد ما سمعه.

رفعت حاجبها وسألتها:

-أنتي هتلبسيني أنا سبب اللي حصل! أنا حاولت أساعد لما نرمو رفضت الموضوع وبقيت أنا الغلطانه كمان.

هتفت بحدة وغضب:

-لا غلطانه ولا حاجه يا شيري، محدش غلطان غيري خلاص كده بس مكانش يعاقبني بأختي يعني، كان عاقبني بأي حاجه تانية بس هو عارف ايه اللي بيوجعني وبيعمله.

سألتها بتوجس:

-طيب أنتي هتعملي ايه؟ أنا لو منك ألبس وانزل وهو لما يشوفك عند بابا هيضطر يسكت و...

قاطعتها بعد أن صدحت ضحكتها الساخرة:

-مين ده اللي هيسكت وعشان مين؟ فارس هيسكت لو كسرت كلمته وروحت الخطوبة؟ أنتي مجنونه يا شيري وعيزاه يموتني خالص؟ ﻷ طبعا أنا مش هعمل كده، أولا عشان مش عايزه نكد وزعل بينا أكتر من كده وكمان كده هبقى فعلا بتحداه ولو في مجال للصلح بينا هيضيع خالص.

ضحكت شيرين ساخرة:

-بعد اللي عمله معاكي وأنتي اللي بتفكري في الصلح؟

أومأت مؤكدة:

-منا بحبه وعارفه اني غلطانه بس كانت نيتي خير ولو كان هو شايف إن السبب في ده اني بفكر في سعادة چنى فالحقيقة والسبب الأهم عندي كان هو وزعله على أخته وموقفه من مازن والحزن اللي كان متقل كتافه وهو مش عارف يحلها، بس هو مشافش كل ده وشاف بس اني كسرت كلامه، فارس الفهد عمره ما هيتغير.

❈-❈-❈

وقف خلف الباب يستمع لها باهتمام وكأنه ينتظر أن يرى ردة فعلها على أوامره وتحكماته التي لا يستطيع الاستغناء عنها، ولكنه شعر بغصة قوية تضرب قلبه فور أن وجدها أغلقت الهاتف وارتمت على فراشها تبكي بحرقة.

شعر باهتزاز هاتفه الجوال الذي وضعه على الوضع الصامت فور مغادرة مازن؛ فابتعد قليلا عن مرمى الباب حتى لا تستمع له وأجاب ذلك المتصل اللحوح مخفضا صوته:

-خير؟

رد يزن رافعا نبرته بلهفة:

-أنت فين يا فارس كل ده؟ وباعت چنى على هنا ليه فهمني؟

أجابه موضحا:

-خدها معاك عشان مازن مينفعش يوصلها وهي عايزه تحضر.

تنفس يزن عاليا وتحدث بنبرة غاضبة:

-ومازن موقفه ايه يا ترى من خطوبتي أنا ونرمين؟

تنهد مخرجا زفيرا معبئا بالكثير من التعب والإجهاد:

-يا بني مفيش حاجه، موضوع نرمين ومازن خلص من زمان وملوش لازمه كل شويه تتكلموا فيه وهو خلاص عرف غلطه وانتهى.

هز يزن رأسه وتصنع التفهم وهو بعيدا كل البعد عن ذلك بعد أن علم من نرمين تصريحه بحقيقة مشاعره تجاهها، سأله قبل أن يغلق معه الآخر:

-طيب انت جاي امتى؟ مش عايز أتأخر اكتر من كده احنا لسه رايحين عابدين والطريق طويل.

هتف فارس محتدا ولكن بنبرة منخفضة:

-يا بني أكلت دماغي برغيك، نص ساعه وهتحرك ونتقابل هناك تحت البيت عندهم.

أغلق معه وعاد ليقف أمام باب جناحه وأطل برأسه ليراها أمامه كما هي مقوسة لجسدها على الفراش ولا زالت تبكي بقهر؛ فدلف يخطو على أطراف أصابعه وأراح جسده بجوارها وحاوطها بذراعيه يحتضنها ودفن رأسه بعنقها فتشنجت هي إثر لمساته ولكنه أحكم ذراعيه عليها وهمس بجوار أذنها:

-متعيطيش.

زاد بكائها من حديثه فأدارها لتنظر له وهو يبتسم ويدللها:

-ﻷﻷﻷ حبيبتي، مقدرش انا على زعل الجميل ده.

دفعته بقبضتها المرتشعه وحاولت الابتعاد عن حضنه وزاد بكائها فرفض محاولتها الابتعاد عنه وقبلها من وجنتها فتذوق عبراتها المسالة عليه وهمس بحب:

-خلاص عشان خاطري بقى متسوقيش فيها، أنتي عارفه انك غلطانه وأنا من حقي أعاقبك على عدم سمعانك الكلام ومع ذلك مبقدرش أكمل أبدا في اي عقاب ليكي.

ردت وهي تشهق باكية :

-عقاب كأني عيله صغيرة وأبوها بيربيها، أنا مراتك مش بنتك يا فارس.

أومأ مقبلا ثغرها قبلة سطحية:

-انتي مراتي وبنتي وحبيبتي وأختي وكل ما ليا، وأنا بحبك ومش عايز لا أزعلك ولا أزعل منك بس انتي ساعات بتتخطي الحدود وبتنسي انا مين.

لمعت حدقتيها ببريق الدهشة من تكبره وغروره الذي لا يستطيع التخلص منه أبدا ولا تعتاده هي مهما حاولت؛ فتكلمت وغصتها عالقة بحلقها:

-أنا بتخطى الحدود عشان اريحك وعشان مصلحة اختك بس انت مش قادر تفهمني وعلى طول جاي عليا وأسلوبك مش بيتغير مهما حاولت، هتفضل فارس الفهد المتسلط واللي عايز كل حاجه تتعمل بالأمر العسكري.

سحبها حتى تسطحت بظهرها على الفراش وأعتلاها وانحنى يقبل عنقها وتمتم بصوت هادئ:

-انا بحاول يا سلطانه، وانتي ساعديني برده واستحمليني شويه وأنا بحاول عشانك.

ردت وهي تحاول الابتعاد عن لمساته الغير بريئة:

-انت بعد ما روحت الحج المفروض أسلوبك يتغير وتبقى اهدى وتتناقش معايا بالعقل من غير التحكمات بتاعتك.

أومأ وهمس بجوار أذنها:

-عيوني، وانتي ساعديني عشان أقدر أعمل كده، بس برده انتي لازم تغيري من نفسك شويه ﻷن مش كل مره تتصرفي من دماغك والموضوع يعدي، مره من المرات هتلاقي نفسك وقعتي في كارثة حقيقية زي وقت ما حملتي في البيبي اللي بعد چاسمين وكانت حياتك هتبقى التمن لولا ستر ربنا، ومش كل مره تسلم الجره زي ما بيقولوا.

حركت رأسها موافقة على حديثه ونظرت لعينيه التي تسلطت عليها وسألته بتوجس:

-مش هتروح الخطوبة؟

غمز لها مبتسما:

-هروح طبعا، يلا أومي ألبسي الفستان الاخضر عاجبني اوي.

جعدت جبينها وسألته:

أخضر؟ انهي ده؟

اعتدل جالسا وهو يضحك:

-انتي جايبه 3 فساتين، اخضر وأحمر وأسود وأنا عاجبني الأخضر.

ضحكت عاليا واعتدلت هي الأخرى تصحح له:

-قصدك المينت جرين  والكشمير والأسود.

أشاح بيده ووقف يسحبها من راحتها لتقف هي الاخرى:

-أخضر ولا منت جرين أنا بلبس 4 الوان في حياتي كلها.

الصفحة التالية