قراءة قصة قصيرة غريق أنا والغرق فيك

قراءة قصة غريق أنا والغرق فيك

قصة قصيرة جديدة

من روايات وقصص 

الكاتبة حنين منصور 

تم النشر يوم السبت

20/7/2024 

يزن: عهد

عهد:...... 

يزن: حتى الرد عليا مابقيتيش عايزاه

عهد: عايز إيه مني! 

يزن: أنا…..أنا… 

عهد مع ازدياد مستوى صوتها: قولتلك عايز مني إيه تاني!!! 

يزن: أنا آسف

وإذا بـ عهد تقوم بـ اغلاق الهاتف….وإذا بـ انهيارٍ أصابها وقامت العيون بـ خيانتها والسماح للدموع بـ النزول….. 

مريم: مالك يا حبيبتي… ايه اللي حصل

عهد: أنا بحبه أوي يا ماما

مريم: طب مهو كلمك أكتر من مره وفي كل مره تقفلي في وشه

عهد: أعمل ايه ياماما أنا والله تعبت

مريم: طالما انتي بتحبيه… سامحيه اللي بيحب بيسامح يابنتي

عهد: مستحيل أسامحه يا ماما مستحيل

مريم: طب بتعذبي نفسك كده ليه؟ 

عهد: مش عارفه يا ماما مش عارفه 

وإذا تبادر مريم بـ عناقٍ لـ عهد كـ تخفيفًا لما أُصيبت به… 

❈-❈-❈ 

وإذا في حينٍ آخر بـ يزن يجلس مع والده….. 

أحمد: طالما انت قاعد مش طايق نفسك كده ماتروحلها

يزن: يا بابا عهد حرفيًا لو شافتني دلوقتي مش بعيد تلم عليا الناس

أحمد: لازم تستحمل يا يزن…. لانك… 

يزن: أنا اللي كسرتها…. أنا دمرت عهد يا بابا… أنا السبب ان ضحكتها تختفي وتتبدل بـ وجع

أحمد: يابني هوّن على نفسك

يزن: عهد كرهتني يا بابا

أحمد: اللي يحب مايعرفش يكره يا يزن

يزن: أنا مش عارف أعمل إيه! 

أحمد: هي لسه مصرّه على الطلاق! 

يزن: ومعندهاش حل غيره

أحمد: أنا مش عارف أقولك ايه والله

يزن: قوللي إني أستاهل اتعاقب بـ بعدها عني… انا مستاهلهاش يا بابا

وإذا هو الآخر قامت عيناه بـ خيانته وانهمر شلالٌ من الدمع وكأنه كان ينتظر السقوط…! 

يزن: أنا تعبان أوي يا بابا….. عهد دي مش مراتي بس… دي بنتي وحبيبتي والملجأ اللي بهرب فيه من الدنيا… ماينفعش تسيبني وتمشي… بالله عليك يا بابا قولها تسامحني أنا عارف إني غلطان بس والله كانت لحظة غضب ومش هتتكرر تاني والله 

أحمد: ماتقطعش قلبي عليك يابني 

يزن: قولي أعمل ايه يا بابا…. قولي ازاي أرجعلها أنا مش عايز أطلقها… 

أحمد: روحلها يا يزن… روحلها يابني… احكيلها كل اللي في قلبك… واعتذرلها…. عهد قلبها طيب وبتسامح

يزن: حاضر يا بابا… حاضر 

وإذا بـ يزن في طريقه إلى المنزل… ولكن إذا بـ رجلٍ فاق من العمر 60 عامًا ينادي عليه….. وبعد حديثٍ دار بينهما أكمل يزن طريقه إلى منزل عهد….. 

يزن: السلام عليكم 

مريم: وعليكم السلام ورحمة الله وبركاته 

يزن: ازيك يا ماما

مريم: الحمدلله يابني بخير انت عامل إيه! 

يزن: مش كويس خالص والله…. هو أنا ممكن أشوف عهد

مريم: هي مش موجوده دلوقتي يا يزن

يزن: أمال هي فين! 

مريم: في مكانها يابني 

يزن: تمام يا ماما

مريم: روحلها يابني…. بنتي بتحبك والله بس…. 

يزن: أنا عارف والله إني غلطت في حقها لكن خلاص ندمت والله

مريم: ربنا يهدي سركم يابني

يزن: يارب يا ماما يارب

❈-❈-❈ 

وعِند عهد أثناءَ جلوسها أمام البحر باكيةً شايكةً لـ ربها….. 

عهد: أعمل إيه بس يارب!..... أنا خلاص والله فاض بيا بقا… في أول حياتي اللي المفروض تبقى فترة دلع بالنسبالي او على الأقل مفيش فيها ضغط عليا محصلش غير إني انضغطت كنت أنا المسئوله بعد ماما في البيت وانتي البنت وانتي الكبيره وكإن ده خلاص بقى قدري إني أفضل مضغوطه طول عمري… وبعدين قولت أكيد ربنا هيعوضني بـ زوج احبه ويحبني ويجبر بخاطري وادعي في كل ركعه بالعوض… فـ رزقتني بـ يزن وقولت هو ده العوض وخلاص مش هتكسر تاني ولا هسمع كلام يجرحني بس الظاهر إني حتى في ده كنت غلطانه وعاقبني على حاجه مش بإيدي ولا اقدر أغيرها وكسرني… المشكله فيا أنا طيب!!....طب انا عملت إيه يارب عشان أتكسر الكسر ده كله…. أنا والله تعبت.. أنا حتى مش عارفه إذا كان يزن حبني أصلًا ولا لا… 

يزن: والله حبيتك

عهد: انت إيه اللي جابك هنا يا يزن! 

يزن: ممكن تسمعيني! 

عهد: لا أنا المره دي أنا اللي هتكلم وانت اللي هتسمعني… عايزه أقولك إني كنت صادقه في كل كلمه قولتهالك وعمري ماكدبت عليك زي ما انت اتهمتني… عايزه أقولك… عايزه أقولك… 

يزن: عايزه تقولي ايه يا عهد! 

عهد: أنا مش عارفه عايزه أقول إيه من كتر ما أنا مابقاش عندي طاقه أفكر حتى في رد الفعل اللي المفروض أعمله…. طب أنا هسألك سؤال… أنا من ساعة ما جيت خبطت على باب بيتي وطلبتني أذيتك ولو حتى بكلمه! 

يزن:....... 

عهد مسيطرةً عليها مشاعر الغضب: رد عليا يا يزن أنا عمري أذيتك! 

يزن: محصلش يا عهد إنتي طول الوقت كنتي السند وعمرك ماجرحتيني ولو حتى بنظره واحده

عهد: طب ليه!!.... فهمني ليه!...... ليه تهد كل ده لمجرد إنك مش قادر تتحمل قدر ربنا… أنا ذنبي ايه! 

يزن: مالكيش ذنب والله أنا غلطت في حقك أنا آسف

عهد: يزن انت فاكر أنا قولتلك إيه في أول قاعده قعدناها عندنا! 

يزن: أه فاكر

عهد: سمعني كده الحوار بيني وبينك وقتها

Flash back 

مريم: عهد روحي اقعدي انتي ويزن في الڤرانده عشان تشوفوا هيبقى في تفاهم ولا لا قدر الله مفيش

يزن: أنا متفائل يا طنط إن شاء الله خير 

مريم: إن شاء الله يا ابني

يزن: ازيك يا عهد

عهد: الحمدلله بخير وانت

يزن: الحمدلله… أحب أعرفك بـ نفسي أنا المهندس يزن أحمد عبد الحميد تخصص ديكور عندي 24 سنه والحمدلله شغلي مرتبه كويس ويقدر يفتح بيت…. أنا وحيد والدي ماليش اخوات.. 

عهد: أهلا بحضرتك تشرفت

يزن: الشرف ليا… ممكن تعرفيني بنفسك! 

عهد: أنا عهد عبد القادر محمد درست تمريض وحاليا بكمل كليه عندي 22 سنه وعندي أخت بس عايشه بره مصر مع جوزها.. 

يزن: أهلًا بيكي تشرفت جدًا

عهد: تسلم…. بص حضرتك هو أنا في كام حاجه كده حابه أقولك عليهم لإنهم ممكن يكونوا سبب في تغير أي تفصيله

يزن: اتفضلي… 

عهد: بص حضرتك أنا مش هكدب على حضرتك أنا تعبت كتير جدًا في حياتي وعمري ما علقت قلبي بـ أي شخص عشان ده عهد حطاه على نفسي ومش هستحمل أبدًا إني بعد ما أسلمه يرجعلي مكسور

يزن: معلش ممكن توضحي

عهد: أنا ان شاء الله لو حصل نصيب مع جملة المأذون اللي هبقى بعدها مراتك شرعًا هسلمك قلبي كـ أمانه… محتاجه منك وعد ان ده لو حصل تكون اللي تسندني مش تكسرني لإن دي اللي هتجيب النهايه…. 

يزن: ربنا يقدرني ان شاء الله وأخليكي أسعد واحده في الدنيا

عهد: تسلم…حاجه كمان 

يزن: إيه هي!!....

عهد: أنا عمري ماكدبت ولا بحب الكدب.. فـ بالله عليك اوعى تكدب عليا في أي حاجه حتى لو الحاجه دي هتزعلني

يزن: أكيد طبعًا لازم اي علاقه تتبني على الصدق

عهد: بالظبط كده

Back 

عهد: طب كويس إنك فاكر الحوار كله

يزن: أنا عمري مانسيت حاجه انتي قولتيها يا عهد

عهد بـ انهمار دمعها: لا نسيت…. نسيت إني مابحبش الكدب… نسيت إني اديتك قلبي بعد معاناه وانت عارف كده كويس… عن اذنك أنا لازم أمشي

يزن: استن…. 

عهد: ورقتي توصلني يا يزن من غير شوشره أرجوك

❈-❈-❈ 

وقام يزن بـ العودةِ إلى منزله حزينٌ في أمره….. 

أحمد: ها يا ابني عملت ايه! 

يزن: ولا حاجه 

أحمد: يعني ايه ولا حاجه! 

يزن: يعني ماسمعتش مني أي حاجه…. أنا خلفت وعودي ليها يا بابا

أحمد: يابني مفيش حياه من غير مشاكل وانتم لسه في أول حياتكم

يزن: بس أنا وجعتها أوي… الكلام ده لو كان اتقالي ماكنتش هقدر استحمله… بس هي استحملت

أحمد: عهد يابني بتحبك والله ومش عايزه الطلاق ده أصلًا

يزن: طالما هي مش عايزاه ليه طلبته ليه!! 

أحمد: عشان خايفه… 

يزن: خايفه مني!! 

أحمد: لسه كل ده ومافهمتش مراتك يا يزن…. عهد خايفه من بكره لا منك ولا من أي حد…. عهد يا ابني خايفه لـ يمر عليها حزن تاني…. خايفه لـ تيجي في يوم وتخسرك خالص

يزن: ده على أساس إنها كده مش بتخسرني! 

أحمد: ده الحل اللي قدامها يا يزن… هي عايزه بس تتطمن

يزن: يا بابا ده قالتلي ورقتي توصلني يا يزن من غير شوشره 

أحمد: اعتبرها لحظة غضب وعديها

يزن: دايمًا يا عهد كده محيراني معاكِ

أحمد: عهد بنت حلال وتستاهل

يزن: ما انا عارف والله انها تستاهل عشان كده مكمل

أحمد: ربنا يهدي سركم يابني 

يزن: يارب يا بابا يارب

أحمد: يلا ادخل أوضتك ارتاح شويه 

يزن: حاضر 

❈-❈-❈ 

وفي حين جلوس يزن في غرفته عيناه مغمضتان إذا به يتذكر شريطًا من مقطفاتٍ عند خطبتهِ لـ عهد…. 

يزن: يا عهد اديني فرصه بس أجيبلك هديه من قيمتك

عهد: يا سيدي أنا مش عايزه هدايا غاليه كفايه انك بتقدرني ولو حتى بـ كلمه

يزن: بس أنا عايز اجيبلك هديه تفرحي بيها وتفتخري قدام اللي حواليكِ

عهد: طب ولو هديه بسيطه ايه المشكله! 

يزن: أنا بس عايز أفرحك

عهد: والله أنا مش بيفرق معايا الهدايا والماديات كفايه إنك بتكون فاكر المناسبه وبتعايدني وبعدين ماهو انت بتديني عديه دايمًا عايز إيه تاني! 

يزن: دي حاجه ودي حاجه تانيه! 

عهد: الإتنين نفس المبدأ… وبقولهالك تاني أنا مش عايزه هديه غاليه أنا عايزه ذكرى بس… ولو جبت حاجه غاليه مش هاخدها منك

يزن: يعني هي بقت كده! 

عهد: أه بقت كده

❈-❈-❈ 

عهد: يا يزن بالله عليك خلاص كفايه

يزن: أنا مش هسيبه عشان يحرم يبصلك تاني

عهد: خلاص بقا عشان خاطري

يزن:......... 

عهد: يزن قولتلك كفايه

يزن: عاجبك كده أهو جري… 

عهد: مش كفايه اللي انت عملته فيه عايز منه ايه تاني! 

يزن: كنت هخزقله عنيه بس

عهد: حرام عليك كده كفايه أوي

يزن: انتي بتدافعي كده ليه! 

عهد: عايزني أعمل ايه!! أقعد أسقف واشجعك! 

يزن: ده المفروض

عهد: وعاجبك اللي خدتها في وشك دي يعني! 

يزن: مش مشكله فداكِ

عهد: لا مش فدايا وحسك عينك تعمل كده تاني… أنا مش هفرح لما يحصللك حاجه

يزن: خايفه عليا! 

عهد: شششششش خالص

❈-❈-❈ 

يزن: قولتلك لا يعني لا

عهد: ليه بس كده بس بس كده! 

يزن: ليه!!...... أولًا عشان الفرح ده هيبقى فيه أغاني وأنا مش هفرح لما ميزانك يتملي ذنوب

عهد: طب وثانيًا… 

يزن: ثانيًا بقا عشان ده مختلط وانا لو عرفت إن حد بصلك بس لو حتى صدفه هروح أطربق الفرح على دماغك ودماغهم

عهد: وأنا مالي يالمبي! 

يزن: انتي اللي هدوئك الغريب وضحكتك اللي بيشدوا الناس ليكِ

عهد: أبطل أضحك طيب! 

يزن: تضحكي بس قدامي أنا بس 

عهد: ااااه ما احنا كتبنا الكتاب بقا 

يزن: طبعًا أمال ايه! 

عهد: طب مهو محدش هيشوف ضحكتي عشان أنا لابسه النقاب

يزن: عيونك الحلوين دول هيوضحوا انك بتضحكي وكله كوم وعيونك دي كوم تاني

عهد بـ نظرةٍ مشاكسة : خلاص يا يزن خليني قاعده جنبك زي البطه البلدي كده عشان تنبسط

يزن: أيوه كده شطوره 

❈-❈-❈ 

عهد: يا سيدي خدها بقا هو انت مش بتثق في اختياراتي! 

يزن: لا طبعًا ده كفايه انك اختارتيني

عهد: ياربيييي نفسي في نص ثقتك دي

يزن: خليها في نفسك بقا

عهد: بقا كده! 

يزن: أيوه كده

عهد: طب خد بقا خلي ثقتك في نفسك تنفعك

يزن: استني هنا

عهد: عايز ايه! 

يزن: انتي هتمشي وتسيبيني! 

عهد: أعملك ايه يا يزن ما انت اللي راضي تختار بدله من الاتنين دول أعمل ايييييه! 

يزن: انتي بتزعقي! 

عهد: مين ده؟… أنا!!.... 

يزن: لا حاسك بتزعقي

عهد: لا طبعًا محصلش… 

يزن: بيتهيألي صح! 

عهد: اه طبعًا…. دي أكيد تهيأات بسبب قلة النوم… يبقى نام كويس

يزن: أنا بقول كده برضو 

عهد: يبااااي عليك…. ها هتاخد ايه! 

يزن: انتي أنه واحده عجباكِ أكتر! 

عهد: السوده

يزن: خلاص أنا هاخد الكحلي

عهد: والله! 

يزن: بهزر معاكِ والله خلاص هاخد السوده

عهد: أيوه كده… 

❈-❈-❈ 

وحينها في مكانٍ آخر تحديدًا في منزل عهد إذا بها هي الأخرى تقوم بـ استرجاع أحداث ذلك اليوم الذي كان سببًا في فراقها عن يزن…. 

Flash back 

عهد: مالك يا يزن! 

يزن: مفيش ياعهد

عهد: لا في مالك

يزن بـ صوتٍ غاضب: قولتلك مفيش

عهد: لا بقا في… من ساعة ما جينا من عند الدكتوره وانت بتتجاهلني وكمان دايمًا متعصب… ليه ده كله! 

يزن: بجد والله!..... بتسألي ليه…. واحد الدكتوره تقوله للأسف يا أستاذ المدام عندها مشكله في الرحم فـ مش هتقدر تخلف… 

عهد: كمل

يزن: أكمل ايه! 

عهد: بس ماتقلقش مشكلة المدام بسيطه وان شاء الله لما تمشي على الدوا ده هتتحسن

يزن: كلام أي دكتور لازم يقوله عشان يضمن شغله

عهد: لا مش لازم أي دكتور يقول الكلام ده هو مش مضطر انه يكدب عليك

يزن: انتي بتقولي كده عشان عارفه انك السبب

عهد: بجد والله!!.... خلاص بقيت انا العائق اللي مانعك عشان تخلف! 

يزن: أيوه… أنا نفسي أخلف ويبقى عندي طفل

عهد: هعمل ايه ده قضاء ربنا! 

يزن: عهد هو انتي كنتِ عارفه المشكله دي من قبل ما نروح للدكتوره سوا

عهد: لا طبعًا وهعرف منين! 

يزن: أصلك كل ما أقولك روحي اكشفي تقوليلي لسه ربنا ما أذانش…. الحمل عند ناس كتير بياخد وقت… ماتقلقش ان شاء الله خير 

عهد: تقصد ايه يا يزن! 

يزن: انك كنتِ عماله تكدبي عليا عشان ما اكتشفش ان المشكله عندك وأطلقك

عهد: انت إزاي تتهمني الإتهام ده!.. 

يزن: والله هو ده الواضح

عهد: انت اللي أعمى مفيش حاجه من الكلام ده حصلت

يزن: احترمي نفسك يا عهد

عهد: أنا ماغلطتش في أي حاجه انت اللي بترتب الأحداث على مزاجك وبس عشان تطلعني غلطانه

يزن: لإنك انتي فعلاً اللي غلطانه وكمان كدابه…. كان ممكن تصارحيني من الأول لو خايفه من الطلاق

عهد: أنا لا غلطانه ولا كدابه ولا خايفه من الطلاق يا يزن…. اللي عندك اعمله… وأنا بقا رايحه عند ماما وأنا اللي بقولك أهو طلقني وروح اتجوز وخلف وسيبني في حالي…. وصدقني والله لا ترجع عن كلامك اللي جرحتني بيه ده لإنك متأكد مليون في الميه إن ده ماحصلش… وماتنساش انك خلفت وعودك يا يزن.

Back 

وإذا بـ صوت مريم يقطع شرود عهد….. 

مريم: الجميل هيفضل قاعد كده لوحده

عهد: عايزه حاجه يا ماما! 

مريم: عايزاكِ تطلعي تقعدي معايا شويه

عهد: بس أنا…… 

مريم: عشان خاطري أنا

عهد: خلاص ياحبيبتي اطلعي انتي وأنا جايه وراكِ

مريم: مستنياكِ

عهد: حاضر جايه اهو

❈-❈-❈ 

يزن: بابا

أحمد: نعم

يزن: هو ممكن تكون عهد مش من نصيبي وأنا بحاول على الفاضي! 

أحمد: اسمع يا يزن… ربك يابني رحيم بـ عباده وانت وعهد بتحبوا بعض وماعصيتوش ربنا في وقت الخطوبه كنتوا دايمًا حاطين في حسابكم ياترى الفعل ده هيرضي ربنا ولا هيغضبه… وبعدين ربنا بيبعت للعبد إشارات تطمنه وأنا متأكد إنه بعتلك إشاره…. 

يزن: إشارة ايه بس يا ب... 

أحمد: ايه سكتت ليه! 

يزن: أصلي يا بابا وأنا رايح عند عهد البيت لقيت راجل كده عجوز نده عليا و…… 

Flash back 

جبريل: يا ابني… 

يزن: أنا! 

جبريل: أيوه انت

يزن: نعم يا حاج

جبريل: ماتسيبهاش يابني… اوعى تسيبها

يزن: هي إيه يا حاج؟ 

جبريل: مراتك اللي انت رايح تصالحها يا غالي

يزن:........ 

جبريل: أنا عارف انك مصدوم ازاي أعرف الحوار ده…. 

يزن: انت مين ياحاج؟ 

جبريل: أنا عمك جبريل يابني

يزن: وعرفت منين إني رايح أصالح مراتي؟ 

جبريل: بص يابني أنا عارف إنك متجوز عهد اللي ساكنه في آخر الشارع ده وكنت بشوفك أوقات لما بتيجي تزورها… وانهارده انت جاي نفس الشارع ومهموم يبقى أكيد زعلانين سوى… 

يزن: أيوه فعلًا إحنا زعلانين مع بعض

جبريل: بص ياحبيبي أنا كنت زيك كده كنت متجوز وبسبب كلام في لحظة غضب زعلت زي مراتك كده بالظبط لإنها كانت مستنيه الوجع من أي حد إلا أنا بس للأسف خذلتها

يزن: كمل يا عم جبريل سامعك

جبريل: طلبت مني الطلاق…. 

يزن: وطلقتها؟ 

جبريل: للأسف أيوه كنت فاكر انها هتزعل كام يوم كده ونرجع نتصالح عشان عارف إنها بتحبني

يزن: وبعدين 

جبريل: عدا يوم والتاني والتالت بعد الطلاق وأنا كنت متابع أخبارها من جيرانها وكده لكن في يوم كده كان عدى على طلاقنا اسبوع روحتلها بقا وأنا خلاص تعبت من فراقها وهصالحها بس للأسف محصلش

يزن: ليه؟ 

جبريل: روحتلها لقيت ربك استرد أمانته يابني

يزن: ماتت؟ 

جبريل: أيوه يابني…. عشان كده حسيت اني لازم أقولك دلوقتي اوعى تطلقها واوعى تسيبها أنا مالحقتش مراتي يمكن ربنا جعلني سبب عشان ألحقك انت… 

يزن: بس هي مش راضيه تسمعني

جبريل: حاول مره واتنين ومليوون… صدقني هتندم لو سبتها

يزن: حاضر يا حاج تشكر

جبريل: الشكر لله يابني

يزن: ونعم بالله

Back 

يزن: وبس كده

أحمد: ماشاء الله الغباء عندك بالكوم

يزن: ليه كده بس يا بابا؟ 

أحمد: يابني الراجل فيه الخير وحذرك وانت لحد دلوقتي مش معتبر إن دي اشاره من ربنا يا آخرة صبري

يزن: خلاص يا بابا… أنا بقا عايزك تساعدني

أحمد: قول عايز ايه! 

يزن: هقولك…. 

❈-❈-❈ 

مريم: مين حبيبت ماما!! 

عهد: عايزه ايه يا مريم؟ 

مريم: قليلة أدب… مريم كده حاف! 

عهد: يلا يا مريم بقا قولي عايزه ايه؟

مريم: بصي يا ستي أنا كنت زهقانه وكده فقولت نروح سوا مكانك ده ع أعرف بتحبيه على ايه! 

عهد: هو إيه ده؟ 

مريم: المكان يا عهد ها المكااان

عهد: سمعت خلاااص 

مريم: طيب يا لمضه اسبقيني انتي بقا وخدي المايه دي معاكِ وأنا هلبس وأحصلك

عهد: ليه مانروحش سوا! 

مريم: أصلي هقعد أرغي مع خالتك شويه وأنا جايه!! 

عهد: طالما الموضوع فيه خالتوا يبقى لازم أروح لوحدي فعلًا

مريم: يابنت الـ…   

عهد: عييييب يا مريم كده بتشتمي نفسك ياحبيبتي 

مريم: امشي يا بت من وشي

عهد: حااضر… 

وبعد خروج عهد من البيت إذا بـ مريم تقوم بـ الإتصال بـ مجهول وكانت محتوى المكالمه: حصل يا باشا

وبعد وصول عهد لـ ذلك المكان إذا بنظرةٍ صادمةٍ على وجهها من ما رأت

يزن: يانا يا مفيش أصلي معنديش في الحب هزار…. يا انا يا بلاش ومتحسبهاش مفيهاش اعذار…. أنا اللي اقول فين وامتى وأنا اللي اختار

عهد: يزن! 

يزن: هو حد يقدر يغنيلك الأغنيه دي غيري ولا ايه!!.... ده انا كنت أطربقها على دماغك ودماغه

عهد مسيطرةً على ابتسامتها: جبت الورقه

يزن: أه طبعًا جبتها

عهد خافيةً لـ صدمتها من سهولة التخلي: طب…. طب هاتها

يزن: اتفضلي أهي… 

وبعدما قامت عهد بـ فتح الورقةِ إذا بـ جملةٍ واحدةٍ بها وهي "أنا مش هسيبك عهد لـ يزن مهما حصل" 

عهد: فين ورقة الطلاق! 

يزن: هو انتي فاكره اني هطلقك! 

عهد: أه طبعًا

يزن: لا طبعًا ده بعدك… خدي روحي الأول

عهد: بعد الش….. 

يزن: ماتكمليها يختي هو أنا واكل ورثك! 

أحمد: خد البتاع ده قطع نفسي عقبال ماجبته

يزن: المفروض إن الورد ده يكون معايا يا أحمد ومن اول ماتشوفني زي ما الخطه بتقول

عهد: خطه… خطة إيه! 

أحمد: ماشاءالله نفس غباء جوزك شكل الموضوع عدوى

يزن: ماخلاص بقا يا أحمد مش كده

مريم: يا آخرة صبري هو أنا عمري حبيت القاعده على البحر ده أنا حتى بخاف منه… فجأه كده هبقى عايزه أروح! 

عهد: مجاش في بالي

مريم: هو انتي من امتى بييجي في بالك حاجه أصلًا

عهد: ما خلاص بقا يا مريم

أحمد: فيه ايه يلا منك ليها انت تقولي يا أحمد وانتي تقوليلها يا مريم في ايييييه! 

مريم: عيال قلالاة أدب

أحمد: دي حقيقه

عهد: حاسه اننا بنتهزأ

يزن: تقريبًا كده

أحمد: اتصالحوا بقا خلينا نخلص

يزن: عهد أنا آسف حقك عليا والله كانت لحظة غضب وخلاص

عهد:......... 

يزن: ياستي فكي بقا والله مش هتتكرر وبعدين يعني اعملي حساب اني عملت خطه عشانك ولبست البدله السوده اللي نقيناها سوا وجايبلك ورد يعني

عهد: شامه ريحة ذل

يزن: لا أبدًا محصلش

عهد: لا حساك بتذلني! 

يزن: لا لا

عهد: يعني انت مش بتذلني

يزن: يا ستي لا يا ستي لا 

عهد: بتزعقلي! 

يزن: مين ده انا! 

عهد: اه حساك بتزعقلي

يزن: خدي ياحبيبتي الورد… خديه بقا

عهد: هات

يزن: خلاص صافي يا لبن! 

عهد: حليب يا قشطه

أحمد: الحمدلله وأخيرًا

يزن: ايه ده استني! 

عهد: ايه في إيه!!! 

يزن: هو انتي مش لابسه الجوانتي ليه! 

عهد: مهو أصل…. أصل أنا كنت مستعجله يعني و…. 

يزن: استنيني هنا

عهد: رايح فين؟ 

يزن: قولتلك استني

أحمد: عيال فراكه بطلوا فرك شويه واقعدوا ساكتين

عهد: قول لـ ابنك يا عمي الاه

يزن: خدي ده

عهد: ايه ده؟ 

يزن: جوانتي جديد البسيه دلوقتي 

عهد: طيب حاضر 

يزن: وحسابك معايا في البيت هو أي حد ماشي في الشارع كده يشوف ايدك!!..... ليه كيس جوافه أنا! 

عهد: ما انا كنت مستعجله طيب

أحمد: ما خلاص يا يزن قالتلك كانت مستعجله

يزن: اقعد انت بس دلوقتي كده يا أحمد وسيبني

أحمد: هتخليني أهزقك قدام مراتك روح يا ولا منك ليها على بيتكم وبطلوا فرك بقا

يزن: يلا بينا…. 

عهد: يزن انت مش هتسيبني في أي ظرف صح! 

يزن: وكيفَ أترككِ وأنا غريقٌ والغرقُ فيكِ.....

تمت

لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية..

رواياتنا الحصرية كاملة