رواية رومانسية جديدة راهبات الحب

من روايات وقصص الكاتبة

 هالة محمد الجمسي

رواية جديدة 

راهبات الحب

تنشر حصريًا 

على مدونة رواية وحكاية 

قبل أي منصة أخرى

الفصل العاشر

تم النشر الإثنين

15/7/2024

(داخل غرفة بيت الطالبات بعد انتهاء اليوم الدراسي)

نهال قالت وهي تفرد جسدها ع سرير ود:

_الشفوي عدى وخدت الدرجة، الحمد لله وشكراً ليك يا ود انت ورينو٠

ود  أشارت لها بيدها وهي تجلس ع المكتب الخاص بها، وهي تشحذ  تركيزها لما تحاول أن تفهمه من الكتب:

_لا شكر على واجب٠

عادت ود إلى تركيزها في الكتب أمامها، في حين توقفت نهال عن جذب انتباه ود لأي حديث آخر

حتى تستطيع متابعة تركيزها الدراسي 

رينو كانت تجلس خلف نافذة الغرفة، تنظر من أعلى إلى العاملات وهم يقومون بتنظيف الحديقة التابعة للدار وقالت وهي تنظر إلى نهال:

_تعرفي الناس دي محتاجة تتكرم مننا احنا، لازم يحسوا أن احنا مقدرين تعبهم علشنا٠

نهال نهضت من السرير ثم نظرت إلى العاملات وقالت:

_المعاملة كمان معاهم لازم تكون معاملة مختلفة،  لازم الكل يعاملهم أنهم أصحاب فضل علينا٠

رينو تحركت قليل ونظرت داخل الغرفة وقالت:

_مضبوط ولو هدايا بسيطة قبل ما تمشي السنة دي هيكون ليها أثر حلو اوي جواهم٠

أمسكت نهال هاتفها وقالت:

_بصي أنا هصورهم من ضهرهم وانزل صورتهم على جروب الدار و نتفق مع البنات اللي معانا نعمل لهم اي٠

رينو قالت في لهجة اعتراض:

_من غير تصوير يا نهال، الكل عارف انهم تعبانين في الشغل هنا، وبعدين نصور ليه من غير استئذان٠

نهال كانت تنظر إلى الهاتف في إهتمام شديد، ظهر واضحاً أنها لا تستمع إلى كلمات رينو قالت في لهجة دهشة:

_رينو تعالي بصي على الخبر دا، مش دا المخرج اللي كان عارض عليك اعلان؟  ايوا الخبر قلب السوشيال  ميديا و الفيس والاخبار كلها  عن عمرو السيوفي٠

لم تحاول رينو أن تتحرك أو تنظر في الهاتف الخاص ب نهال فقط قالت في لهجة استهزاء:

_اي خبر خطوبته؟ اكيد خبر خاص يربط بيه مع واحدة مشهورة، ما هو مش عايز يضيع وقته٠ 

نهال نظرت إلى رينو في حزن وقالت:

_خطوبة اي!؟  دا بيقولوا عامل حادثة من ساعتين و اتنقل ع مستشفى وفي حالة خطر٠

رينو نظرت إلى نهال في دهشة ثم هزت راسها علامة الرفض وقالت وهي تحاول أن تستوعب الخبر:

_ ازاي وامتا؟ من ساعتين!؟ معقول! اكيد عمرو تاني او مخرج غيره٠

ثم أمسكت الهاتف الخاص ب نهال وقرأت الأخبار عدة مرات كانت الاخبار تنقل عبر صفحات النت السيارة الخاصة ب عمرو وهي محطمة من الجهة الأمامية تماماً،

جلست رينو على حافة الفراش وقد شعرت بقدمها لا تكاد تقوي على حملها ثم قالت في صوت منخفض جداً:

_ايوا تمام هي عربيته، ومكان الحادثة كمان قريب من المكان اللي كان فيه التدريب::::::

نهال نظرت لها في دهشة وقالت:

_أنت شفتي عمرو النهاردة؟ 

هزت رينو رأسها علامة الموافقة وتابعت:

_أنا قلت له كلام صعب اوي كلام يوجع، ممكن يكون هو دا السبب، الحادثة حصلت تقريباً بعد ما سبته ومشيت٠

نهال نظرت إلى رينو وهي تشعر بالشفقة تجاهها:

_لأ يا حبيبتي دا قضاء وقدر٠

ود نهضت من خلف المكتب وجلست إلى جوار رينو وتابعت:

_بلاش تشيلي نفسك ذنب يا رينو٠

هزت رينو رأسها علامة الرفض وقالت:

_لا يا ود أنا السبب فعلاً في اللي حصل٠

تبادل كل من نهال و ود نظرات حزن في حين تابعت رينو:

_أنا حاسة بالذنب٠

ود حاولت أن تخفف قليل من وقع الأمر على رينو فقالت:

_حبيبتي، اكيد التهويل دا شغل جذب للصفحات،  ممكن يكون حاجة بسيطة وهما اللي عاملين ضجة كدا علشان الريتش والتفاعل٠

هزت رينو رأسها علامة النفي وتابعت وهي ترفض منطق وحديث ود:

_العربية شكلها مدمر من الجنب قدام٠

أشارت نهال لها بيدها وقالت:

_انا هدخل على صفحة عمرو السيوفي وأشوف الخبر كدا لو هو طمن الناس يبقى فعلاً زي ما ود قالت حاجة بسيطة٠

كانت الدموع قد بدأت تجري على وجه رينو، بعد قليل قالت نهال:

_مافيش اخبار على صفحته خالص، من آخر خبر من يومين منزلش اي حاجة جديدة٠

نهال نظرت إلى رينو وقالت وقد لمعت في عينيها بريق ذكاء:

_انت معاك رقم شمس صح؟ 

انتبهت رينو إلى سؤال نهال فأعقبت:

_قصدك اتصل عليها اشوف اي أخباره هو؟ 

نهال هزت راسها علامة الموافقة وقالت:

_اي المشكلة يعني؟ 

ود نظرت إلى رينو وقالت:

_اكيد بعد دقايق هيطلع كذا خبر وهنشوف آخر تطورات الحالة الصحية بتاعته٠

أعطت نهال كامل تركيزها في الهاتف ثم قالت:

_بيقولوا نص ساعة بالضبط و الدكاترة اللي تبع المستشفى هيطلعو لايف يطمنوا  الناس٠

وضعت نهال الهاتف أمام رينو وقالت:

_بصي كدا يا رينو، جايين لايف من قدام المستشفى نفسه، الناس كلها واقفة برا فنانين ومخرجين و معجبين ناس عادية كمان٠

همسات رينو وهي تنظر إلى أعلى:

_يا رب أنا مش عايزة أشيل ذنبه، يا رب يكون بخير٠

ود ربتت على كتف رينو وقالت:

_اهدي يا رينو وكلمة هنطلع لايف دي معناها أنه هو كويس، المستشفى عايزه اعلانات ودعايا ليها، مش هيلاقوا احسن من مخرج مشهور زي عمرو يكون عامل 

 جذب ليهم واستثمار٠

صمتت رينو ولم تستطع أن تجيب ود بالايجاب أو الرفض، كان داخلها احساس عميق بالخوف 

وإحساس بالحزن، شعور بالذنب مثل المطرقة  الحادة التي لا تهدأ ولا تكف ولا تمل  من انتقاص هدوء وراحة  

الضمير، تعطي كامل طرقاتها على أبواب الأمان فتحيلها إلى فزع 

فزع كبير أن بئر سحيق 

من الذنوب والخطايا 

قد هوى إليه صاحبه 

بكامل ارادته، بئر مظلم 

لن ينجو منه الإ اذا نجا صاحب المظلمة اولاً

واعطي طوق نجاه و إنقاذ إلى صاحب الذنب 

بعد قليل وضعت نهال الهاتف أمام عين رينو وقالت:

_اللايف بدأ أهو، المصورين والدكاترة والصحفيين، بقولك بصي كدا على وش الدكاترة قبل ما يبدأو، بصي وشهم والميكروفات بتتحط قدامهم، بصي كويس يا رينو، شكل حالة المخرج عمرو  كويسة ومافيش خطر وشهم هادئ جدا مافيش انفعال أو اضطراب أهو٠

ود قالت وهي تشفق على  رينو من الألم الذي يظهر واضح في وجهها وجسدها المضطرب:

_هي شكل العربية اللي خدت الشر وباظت٠

بدأ حديث الأطباء، بعد أن طلبوا من الجميع التزام الصمت، ترك الأطباء الميكروفون إلى أكبرهم سن الذي بدأ حديثه قائلاً:

_بداية كدا أنا عايز بس الكل يقدر أن هنا مستشفى، مستشفى فيه مرضى الصوت العالي والشوشرة دا مصدر إزعاج للمرضي اللي هنا، والأطباء بردوا محتاجين هدوء علشان التركيز في العمليات الجراحية التانية، أحنا شفنا قلق من الناس كلها علشان حالة عمرو، المؤتمر دا علشان نهدي الناس ونعرفهم أن الوضع كويس، الأطباء عملوا مجهود كبير مع عمرو من اول ما دخل هنا في الحادثة، من غير ما نعرف هو مين، والأطباء هنا محترفين، مستشفى  السلام معروف اطبائها كويس، حالة عمرو مستقرة نوعاً ما،احنا نقلنا له دم علشان كان في ارتجاج  وتم التعامل معاه، مافيش كسور في الدماغ أو أي نزيف ف المخ الأمور مستقرة ، في كسر في الرجل اليمين، وفي  رضوض في الكتف اليمين، مافيش نزيف داخلي، في  بعض كدمات في الضهر، والرجل اليمين والشمال، هو محتاج راحة تامة وممنوع عنه الزيارة، 

هيفضل هنا مدة كافية لحد ما حالته تتحسن،  واول ما الدكاترة يتاكدوا من خلال الأشعة والتحاليل أن الوضع يسمح بالحركة ، هيسمحو له بالخروج٠

❈-❈-❈

نهال نظرت إلى رينو وقالت:

_ كلام الدكاترة بيقول أن مافيش خطر، هو بس محتاج راحة ولازم يكون مع فريق طبي الأيام اللي جاية دي٠

ود قالت وهي تعود إلى مكتبها حتى تستكمل دراستها:

_بلاش تحملي نفسك فوق طاقتها، بلاش تسجني نفسك في خانة الظالم لأن اي اتنين ممكن يحصل بينهم مناقشات ويختلفو، ودا قضاء وقدر أنه يعمل حادث وربنا ينجيه لأن دا مكتوب له٠

 

صمت رينو جعل نهال تقول ف استنكار:

_رينو الحوادث بتحصل في كل مكان، انت مش أجرتي بلطجي يضربه يعني٠

هزت رينو رأسها علامة الموافقة، وامسكت هاتفها تتصفح قليل اخبار الحادث، نهضت نهال من السرير وقالت:

_انا هروح اوضتي اذاكر شوية٠

(صباح اليوم التالي)

كانت رينو ترتدي ملابسها خلف خزانة الملابس في حين كانت ود تقوم على تجهيز حقيبتها وهي تقول:

_عندي  تدريب نحت و  صلصال  الساعة تمانية ولازم أكون موجودة قبلها٠

رينو قالت في صوت منخفض:

_أنا هنزل ع التدريب وبعدين  هروح الجامعة٠

ود قالت وهي ترتدي حذاءها وتبحث بعينيها عن البالطو الأبيض:

_تدريب بالية صباحي!؟ 

ود انهت تقفيل ازرار سترتها البيضاء واعقبت:

_ايوا سابينا بتستقبل الكل الساعة تمانية الصبح وتقفل تمانية بليل، هتدرب  وبعد كدا هاجي ع الجامعة٠

خرجت ود في صحبة رينو في حين أبلغت نهال كل منهم أنها سوف تذهب الى الجامعة بعد ساعتين على الأقل،

رينو توقفت أمام المستشفى الذي يجلس به عمرو السيوفي، شاهدت رينو شمس توقف سيارتها وتدخل إلى ساحة المستشفى في خطوات واثقة، انتظرت قليل خلف إحدى السيارات، استمعت إلى صوت أحدهم تتحدث لها:

_هي العربية دي بتاعتك٠

هزت رينو رأسها علامة النفي وقالت وهي تنظر إلى الفتاة التي تطل برأسها من إحدى نوافذ السيارة:

_دا مكان ركنة العربية بتاعتي، العربية دي جت وركنت هنا٠

أشارت رينو إلى المستشفى وقالت:

_أنت دكتورة هنا؟

هزت الفتاة رأسها وقالت:

_ايوا أنا رئيسىة التمريض هنا، منة عدل٠

نظرت رينو إلى الفتاة ثم إلى المستشفى، مما دفع الممرضة أن تسألها وهي تهبط من السيارة:

_أنت اكيد جاية تشوفي المخرج  اللي دخل المستشفى امبارح وصحته، امبارح طول النهار والليل البنات كلهم هنا عملو لينا ازعاج، دا لو مظاهرة مش هتبقى كدا، وكله كوم  والمصورين كوم تاني، عايزن يدخلو يصورو، الأمن كان بيمنعهم من قبل البوابة بمسافة، تخيلي أن في واحد اتجرأ ولبس لبس عامل ودخل اوضة العمليات، لولا الدكتور ندهه وقال يا جميل، طبعا الصحفي مردش، عرف على طول أنه مش عم جميل، راح طرده، جايين يعملوا لينا مغامرات هنا، كان يوم صعب اوي امبارح أول مرة يعدي على كدا، اوعي تكوني صحفية انت كمان، أو حتى بلوجر من بتوع النت ٠

رينو نظرت إلى منة وقالت :

_ لا أنا مش صحفية ولا مصورة ولا عايزة لقطة علشان الترند،  اطمني أنا مش عايزة حاجة  غير أن  اطمن بس أنه بخير٠

نظرت لها منة نظرة ذات مغزى وفي إبتسامة جذل تابعت:

_أنت اكيد واحدة من الشلة بتاعته بتاعت النادي أو بنات اعلانات،  ما هو كل البنات بتوع امبارح كان بيقولوا كدا٠

همست رينو في صوت مرتفع وكأنها تنفي التهمة عنها:

_لأ أنا مش تبع اي شلل أنا  زي أخته، مش اكتر أو اقل، وكنت عايزة اطمن بس أنه كويس ٠

منة قالت وهي تتخذ خطواتها إلى المستشفى:

_المؤتمر الطبي اللي اتعمل امبارح كان فيه شرح وافي للحالة، بس علشان تتطمني هو حالته مستقرة، ربنا لطف بيه ، متقلقيش يا كتكوتة هيعيش ويرجع تاني للدنيا بس الحكاية عايزة صبر لأن الكسر عنده مضاعف٠

سارت منة بضع خطوات ثم قالت وهي تبتسم إلى رينو:

_على فكرة ممكن أوصل له إنك سألتي عليه أول ما يفوق كدا ووعيه يرجع له، احنا أوقات كتير بنهتم بالعامل النفسي، يعني وقت ما نحس أنه محتاج الناس حواليه هنعمل كدا، وعلشان يكون عنده خلفيه أن الناس قلقانة عليه، أنت اسمك اي؟ 

رينو قالت في صوت مرتبك:

_مافيش داعي تقولي له أي حاجة، كفاية بس تعرفيني تطورات الحالة بتاعته٠

ضحكت منة ثم قالت في لهجة مرح:

_تعرفي أن اوضة المخرج مليانه بوكيهات ورد، المحل بتاع الورد اللي في ضهر المستشفي شطب امبارح، اشتغل شغل الشهر كله في كام ساعة بس، وكل كروت البوكيهات سوسو، توتو، ميمي، عرفيني بس اسمك وأنا هعرفه انك سالتي عليه، خليني اعمل لك خدمة تنفع بكرة، يمكن يكون ليك فرصة اعلان معاه بعد كدا،٠

رينو فكرت قليل ثم قالت:

_أنا عايزة بس ابقي اطمن عليه منك، بعد اذنك، عرفيني الحالة أول باول، هو دا كل اللي أنا عايزاه، الشخص دا يهمني أنه يكون بخير ، أنا مش هعرف افهمك اللي بفكر فيه والوضع اي، بس  أنا هأكون موجودة كل يوم الصبح هنا في نفس الميعاد، اكلمك انت وامشي بعدها ع طول، 

هزت منة رأسها علامة الموافقة وقالت:

_  ايوا فهمت الغموض والخفايا اللي في حيات المشهورين والناس اللي حواليهم في الضل٠

فكرت منة قليلاً ثم تابعت:

 - طيب انا موافقة بشرط٠

رينو هتفت في سرعة:

_اطلبي اي حاجة وأنا هنفذها ليك مدمت اعرف اغملها٠

منة تابعت في صوت مليء بالحيرة وهي تنظر الى السيارة التي كانت تقف خلفها رينو:

 _ انت هتيجي بدري قبل تمانية، عايزة اعرف عربية مين دي؟ اللي بتيجي تركن قدام عربيتي، هموت واعرف مين الشخص اللي بيعمل الحركة دي كل يوم، أنا المواصلات وحركة السير بتأخرني والشخص دا عارف ان دا مكان ركنة عربيتي وبيتعمد يعمل كدا، عايزة اعرفه ٠

همست رينو في لهجة تساؤل:

_ولو شفت شكله؟ 

أعقبت منة في بساطة:

_تابعي خط سيره، بيدخل هنا المستشفى؟ ولا بيروح ف انهي اتجاه؟

هزت رينو رأسها علامة الموافقة وقالت:

_تمام٠

ثم استدركت ةمنة الأمر فجأة أمر ما فقالت:

_هاتي رقمك علشان لو اتعمل تغيير شيفت مفاجئ نكون ع اتصال٠

رينو أخرجت هاتفها وقالت وهي تؤيد الفكرة:

_في اي وقت كلميني هأكون موجودة٠

منة ابتسمت وقالت:

_أنت بيتك قريب من هنا؟

رينو انتهت من كتابة الرقم الخاص بها على هاتف منة وتابعت:

_انا طالبة جامعية وقاعدة في بيت الطالبات٠

ظهر بغض القلق على وجه منة وقالت في لهجة نصح وتحذير':

_يبقى بلاش طريق الاعلانات،  وركزي في مذاكرتك، يعني هي وجهات نظر، بس انا شايفة أن شغلك بمؤهلك وأنت كدا بعد الجامعة،  بدل بوابة الاعلانات دي لأن ورا منها في أي الف باب وباب خطر ٠

رينو قالت وهي ترفع نظرها إلى منة:

_اطمني أنا بعيدة اوي عن أن أكون وجه اعلانات، دا مش طموحي ولا طريقي، أنا بس عايزة اطمن على عمرو من بعيد

من بعيد اوي كمان, 

منة قالت وهي تسرع الخطى إلى داخل المستشفى:

_خلاص اتفقنا.

شاهدت رينو شمس وهي تنصرف من داخل ساحة المستشفى وهي غاضبة فأدركت أن محاولتها للدخول الى عمرو قد باءت بالفشل.

يتبع