قراءة رواية ما بين العشق والهوس كاملة 

تنشر حصريًا على مدونة رواية وحكاية قبل أي منصة أخرى

ردت بأسى:

- 

- انا بنت خالها صفاء اللي كنت ساكنة في الصعيد مع جوزي ، بس هو ربنا يرحمه بقى دلوقتي، عشان كدة رجعت تاني لأهلى 

برقت عيني خميس بحماس شديد مرددًا:

- جوزك مرحوم،  ودا جاله قلب ازاي يموت ويسيب شابة حلوة زيك. 

تبسمت تغطي على فمها بخجل:

- يووه يابا الحج، ما قولتلك الحظ بقى، حكم بنات عيلتنا كلهم حلوين بس حظوظهم منيلة

تغضنت ملامحه بضيق ينهيها:

- ما بلاها منها ابا الحج دي، انا صغير وفي عز شبابي  ميغركيش الواد سمير جوز اسراء دا البكري اللي خلفته وانا عشرين سنة، يعني تلاقيني مكملتش الخمسين بس انا مش بحسب. 

عادت المرأة لهذه الضحكة الخجلة مرة اخرى، لتجاربه بمكر:

- معلش متأخذنيش ، دا حتى واضح من هيئتك انك صغير.

اطربه كلماتها،  ليملس على شعر رأسه المزروع حديثًا، والمصطبغ بالاسود،  يردف بثقة:

- لا يا ستي ولا يهمك، انا اصلا بتظلم كدة دايما من الناس، بسبب الحلوف ابني، اكمنه شكله اكبر من سنه

اومأت رأسها وقد شعرت انها اطالت معه ، لترد بعجالة:

- اهو كل واحد بياخد نصيبه، عن اذنك بقى اللحق اسراء 

كادت ان تتحرك ولكنه عاد يوقفها بقوله:

- طب استني اخد رقمك الاول عشان اطمن عليها، حكم هي واخداني بذنب ابني ومش بترضي ترد عليا، لكن ربنا العالم،  انا بعمل ايه مع الجبلة ده عشان اجمعهم على بعض، دا غير اني مستعد ادفع للعيل عشان يتعالج  من الف لمية الف واكتر كمان....  

بس كنت عايز اللي يتوسط ما بينا ، ايه رأيك يا؟... معلش لو فيها تعب، ممكن تقولي اسمك تاني.

قال الاخيرة بنبرة يتخللها المرح بعض الشيء،  وجاء ردها سريعًا وهي تخرج هاتفها بلهفة وقد جذبتها عبارة النقود الكثيرة التي تفوه بها بفخر:

- ما قولتلك من الاول، اسمي صفاء ، همليك رقمي ترن عليه، اصل انا معنديش رصيد، بس اسجلك بإيه؟ انا كمان معرفش اسمك. 

تبسم بملء فمه حتى ظهر صف اسنانه الامامية كلها ليجيبها بابتهاج:

- اسمي خميس،  خميس الرواي يا صفاء اشهر تاجر في المنطقة عندنا. 

❈-❈-❈

اختلقت حجة من الهواء كي تأتي إلى داخل غرفة الأرشيف وترى الوضع على الطبيعة مع هذه الفتاة المتلونة، يساورها شعور غريب من ناحيتها لا تعلم له صفة، ولكنه مقلق وخانق، وهي لن تستريح ابدا ما دامت تلك الفتاة موجودة بقربه، وتنعم بما لم تجده هي منه:

- صباح الخير يا عبد الفضيل .

القت بالتحية فور ان حطت قدمها داخل الغرفة لتجد الترحيب من الثلاثة في غياب بهجة والتي لم تجدها كما توقعت في هذا الوقت لاستراحة الموظفين،  والذي استغلته الأخرى في الالتقاء بأصدقاءها القدامى من العاملين .

- اهلا اهلا يا لورا هانم، اتفضلي واؤمري باللي انتي عايزاه .

تنهدت تخطو لتجلس على الكرسي المقابل له، ترد التحية للسيدتين الاتي فغرت افواههم بالتطلع اليها بانبهار،  لتردف للرجل المسالم:

- متشكرة اوي يا عبد الفضيل، عاملين ايه يا ستات وانتوا واخدين الجمب المريح هنا بعيد عن الدوشة ووجع الدماغ. 

-  تمام اوي يا لورا هانم ، ربنا يحفظك من كل سوء،

احنا فعلا عندنا الهدوء  يعني لو عايز تروقي اعصابك في اي وقت تعالي واتفضلي عندنا.

قالتها احداهم، لتبادلها بابتسامة مصطنعة قبل ان تذهب بعيناها نحو المكتب الفارغ ، تسأل بفضول:

- ما هو الهدوء دا في ناس مش مستحملاه، بدليل انهم ما بيصدقوا وقت البريك يجي عشان يجروا ويروحوا للدوشة.

مصمصمت المرأة تعلق بغيظ، وكأنها وجدت الفرصة:

- وهي بتقعد اساسا،  دي كل شوية اجازة،  غير خروجها بدري عن المواعيد الرسمية، حظوظ بقى.

اعتدلت لورا بحلستها بشر معلقه:

- ليه يعني؟ وانتوا ازاي ساكتين اساسا على الفوضى دي؟ هي كانت شركة اهلها. 

لحق عبد الفضيل على الفور يوضح:

- يا هانم مش لدرجادي، في كل مرة البنت بتبقى معاها حجتها، يعني منزودهاش بقى؟

توجه بالاخيرة بحزم نحو الموظفة زميلته، كي يلجمها عن زيادة اللغو مع هذه المتحاملة من الاساس ، ليعود اليها مردفا:

- مقولتبش بقى يا لورا هانم، كنتي جاية هنا ليه؟

تحمحت تستعيد برأسها الحجة التي أتت بها، لتجيبه بعقل يزداد سخونة بالأفكار التي تتناطح داخله:

- هقولك يا عبد الفضيل هقولك. 

❈-❈-❈

والى بهجة التي كانت جالسة مع رئيستها الان اسفل الشجرة العتيقة، بعيدًا عن جمع الموظفين،  والتي اصبحت مكانهم الاساسي، نظرا للهدوء الكبير بها، لتأخذ راحتها في الحديث معها:

- لف بيا النيل يجي اكتر من ساعة ونص،  واليخت مقولكيش بقى، حاجة كدة ملوكي، بيقولك وارثه عن ابوه ، وخصني انا عشان يفسحني فيه، بعد ما لاقاني زعلانة وحزينة وانا بكلمه في التليفون، رطب على قلبي يا ريسة بحنيته، كان نفسه يقضي اكتر وقت معايا بس انا رفضت وخوفت،  سمع كلامي ومردضاش يضغط عليا، ورجعني فعلا قبل اتناشر،  

كانت تتحدث بحالمية لم تخفى على رئيستها التي تسمع لها بانتباه شديد، لقد حدث ما كانت تخشاه، والفتاة اصبحت متيمة به، رغم كل ما تدعيه من حذر ، ولكنها وقعت في المحظور.

- مالك ساكتة ليه يا ريسة؟ ما تردي عليا وكلميني .

تنهدت بعمق تعقب على قولها:

- يعني هقول ايه بس يا بنتي؟ ربنا يهنيكي، وانا اتمنالك ايه غير ان قلبك يرتاح .

تلقت عبارتها الاخيرة لتردف بتمني:

- اه يا ريسة، قوليها دي من قلبك ، نفسي اوي تحصل،  نفسي قلبي يرتاح .

رفعت صباح كفيها للسماء:

- ربنا يريح قلبك يا بنتي، ويسعدك ويعطيكي كل اللي بتتمنيه وتحلمي يا بهجة، دي دعوة بدعيها في صلاتي مش بس قدامك. 

- حبيبتي يا صبوحة. 

قالتها بهجة لتنهض بعفوية وتقبلها من وجنتها المكتنزة

- الله يا عم ع الغراميات، وانا اقول واخدين جمب لوحدكم ليه؟

صدرت من زميلها القديم تميم، والذي جاء بالصدفة على مشهدهم هذا ، قاصدا الانضمام اليهما، قابلت صباح قوله بمرح لترد على مزحته، عكس بهجة التي شعرت بالتوتر في وجوده، لما تعلمه جيدا من مشاعر يحملها لها.

- عاملة ايه يا بهجة؟ خلاص معدتيش تيجي عندنا القسم، 

أومأت بابتسامة مجاملة لتنهض وتجيبه:

- في نعمة والله يا تميم ربنا يخليك، انا همشي بقى معلش اشوف شغلي .

واقفها بصدمة:

- تمشي كدة فجأة يا بهجة اول ما انا حضرت،  دا حتى البريك لسة فاضل عليه نص ساعة .

بررت بارتباك:

- وانا ههرب منك ليه بس يا تميم؟ بقولك ورايا شغل، عن اذنكم. 

قالتها وانصرفت على الفور، ليظل هو متعلق بابصاره في اثرها لعدة لحظات حتى نهرته صباح:

- هتفضل كدة متنح في ضهرها كتير،  ما تختشي يا واد على دمك .

التفت اليها مبررا:

- والله ما قصدي اللي في دماغك خالص يا ريسة، انا بس متفاجيء ، هي مالها كدة بتتهرب مني؟

عبست ملامحها بضيق مرددة هي الأخرى :

- ما هي قالتلك وراها شغل، ولا انت بس عايز تعملها حكاية،  يا باي عليك يا تميم،  اوعي كدة انا كمان ورايا شغل .

قالتها لتنهض هي ايضا وتتركه .

الصفحة التالية