رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل السادس والأربعون

تم النشر الخميس

27/2/2025

وصلوا لمكان حفل المزاد واول ما طلعوا بطاقات الدعوة دخلوا علطول من غير تفتيش ولا حتى مروا من على بوابات الانذار

لانهم لو كانوا عملوا دا كانوا اتكشفوا علطول 

اتنهدوا براحة ان اول خطوة في مهمتهم عدت بسلام 

وبعد كدا مشيوا في ممر طويل من الرخام الفاخر وحواليهم الزرع المزين بعناية فائقة كان المكان مبدع وخرافي وقيم جدا 

فقالت مادونا في نفسها 

يا خسارة المكان الفخم دا في التفجير والله 

واول ما خلاص هيدخلوا من البوابة الداخلية بص مالك لمادونا 

مش هوصيكي لو حاول يتعدى حدوده وقفيه عند حده بطريقتك مفهوم 

كانت عنيه بتشع غيره فاستشعرت بيها مادونا وابتسمت وهي بتهز راسها 

وبعدين دخلت هي الاول وبعدها مالك وعلي 

واول ما شافها الجوكر مسك ايديها وباسها 

سنيوريتا سارا نورتي الحفلة بوجودك 

سارة 

ميرسي امجد بيه 

اما مالك اللي كانت عينه عليهم كان بيكور قبضة ايده من الغيظ لأن فيه راجل غريب مسك ايد مراته وكان تكة وهيتحرك من مكانه يخلص عليه ففضل يبص ليهم وشرارت الغضب بتنط من عنيه 

فحط علي ايده ع كتف مالك 

اتحمل يا مالك علشان المهمة متبوظش ويلا بينا احنا عارف الطريق اللي بيري قالتلك عليه ؟

مالك اخد نفس عميق وبيحاول يخرج فيها كل مشاعره الغاضبة وقال 

ايوا عارفه يلا علشان منضيعش وقت اتحرك من غير ما تثير الشكوك لاي حاجة 

علي 

اكيد هيكون فيه حرس على المكان اتحرك لوحدك وانا وراك 

وبالفعل اتحرك مالك وعمل انه رايح ناحية البار ومسك كاس وطلب انه يتملي على الاخر ولسه هيتحرك علشان يمشي لقى البنات والستات اللي ف الحفلة بتتجمع كلها حواليه 

فنفخ بضيق وشاور لعلي يتصرف ويبعدهم عنه 

فجه علي وقال للبنات

سينور جو محجوز لملكة الحفلة يا بنات 

فالبنات بعدت لان محدش يقدر يتعدى على ملكة الحفلة اللي مش معروفة ولسه الجوكر مأعلنش عنها

فانطلق مالك في طريقه وعلى خلسة من الجميع ودخل رواق طويل كان هناك خمس حراس 

قدر مالك يتخطاهم بسهولة ويقضي عليهم 

و بعدها عد خمس خطوات بعدين حرك تاني صورة متعلقة على الحيط فاتحركت الحيطة من مكانها

ودخل منها مالك بسرعة وبعدين اتقفل الباب علطول

ولحد هنا كانت بيري قالتله على كل اللي عرفته اما الباقي كان مطلوب من مالك انه يستكشفه بنفسه 

فضل مالك يدور في المكان اللي دخله لكن مفيش اي حاجة قدامه يعرف من خلالها خطوته التانية فضل يلف حوالين نفسه في اوضة من اربع حيطان مربعة الشكل وضلمة جدا الا من النور اللي خارج من الساعة اللي ف ايد مالك 

وفضل ع الحال دا يدور لحد ما لحق علي بيه وشاف الحيرة على وشه فقال 

ايه مالك ملقتش المخرج من هنا 

مالك بضيق 

خايف يكون دا مقلب الباب بيبتفتح من برا بس مش من جوة ولو معرفاش طريقة للخروج من الاوضة دي هنتحبس هنا

علي 

لا يا عم فال الله ولا فالك مقلب ليه سمي الله كدا وخلينا نفكر بعقول المجرمين علشان نوصل للمخرج 

❈-❈-❈

رجع من برا ودخل اوضته وغير هدومه وبعدين خرج منها يدور على فداء ولما ملقهاش خمن انها في اوضة كيان بنته 

فخبط على الباب 

كيان

 ادخل 

خالد 

مساء الخير يا كوكو عاملة ايه 

اتعدلت كيان ف قعدتها احتراما لوالدها

الحمد لله يا بابي اتفضل ادخل حمدا لله على سلامة حضرتك 

خالد 

الله يسلمك يا روحي هي مامي فين انا فكرتها معاكي هنا في الاوضة

كيان 

لا مش هنا كانت في اوضتها اخر مرة شوفتها كانت واقفة ف الفراندا 

خالد 

اها يبقى انا منتبهتش ليها هناك تمام يا قلبي تصبحي على خير 

واتوجه خالد لاوضته تاني 

فداء كانت ماسكة الفون وبتحاول تتصل باياد لكن بيعطيها مشغول فقالت

استغفر الله العظيم يارب وبعدين بقا يا اياد بتقفل فونك ليه وتقلقني عليك ينفع كدا مش هعرف انام الا لما اسمع صوتك  

واول ما سمعت صوت فتح باب الاوضة عرفت انه خالد رجع فجريت بسرعة ع السرير وعملت انها نايمة علشان مش عايزة تكلم خالد ولا ف مزاج رايق ليه 

اول ما دخل اتوجه للبلكونة علطول ولما ملقهاش عرف انها جوة ولما اتوجه للسرير وشافها نايمة او بتدعي النوم 

نفخ بضيق 

وبعدين يا فداء هتفضلي زعلانة كدا مني كتير 

لغى فكرة العشا بالرغم من انه جعان ورفع الغطا واتمدد جنبها من غير ولا كلمة ونام 

اما فداء فاتنفست براحة وفضلت طول الليل مش عارفة تنام بسبب قلقها على اياد وحاسة ان فيه حاجة حصلتله 

❈-❈-❈

اما اياد فعرف انه يوقف المجرمين المحبوسين معاه عند حدهم ومحدش فيهم قدر يكلمه لانه مش جبان ولا سهل علشان يتغلبوا عليه 

وقضا ليلته ف الزنزانة في ركن لوحده فارش ملاية قديمة على الارض ونايم عليها مدد جسمه وايده تحت راسه عاملها مخدة وباصص قدامه لفوق بيفكر في حاله والطريق المسدود اللي وصل ليه وهو بيردد 

لا حول ولا قوة الا بالله.. لا حول ولا قوة الا بالله 

فظهر طيف عسل قدام عينه فلاح طيف ابتسامة على وشه ونام على اثرها واخر حد تشوفه عينه هو صورتها هي وبس 

❈-❈-❈

اما شوق فمكانتش عارفة تشم نفسها خالص بسبب خروجاتها المتكررة هي وايات بيخلصوا كل اللي ناقص للبنات علشان فرحهم اللي بعد كم يوم رغم ان كل حاجة بتم بمجرد فون وضغطة زر على الابلكيشن الا ان شوق لازم تروح للشقة وتفحص كل حاجة بنفسها وتحطها بايديها 

كان العمل من الجميع على قدم وساق حتى ان ادم هو كمان مكانش فاضي يادوب يخلص شغله يروح يتابع الاخبار مع شوق وطول الوقت دا مكانش عنده الوقت يقعد مع وعد مراته ودا كان مضايقه اوي 

ولما فاض بيه لانه ما صدق كتب كتابه علشان يعرف يتكلم مع وعد لكن مفيش اي فرصة انه يقابلها فقرر انه يعمل حاجة مجنونة 

وقف تحت بلكونة اوضتها وفضل يبسبس لكنها مسمعتش ودا لانها كانت نايمة 

مسك فونه ورن عليها لكنها وكالعادة عاملاه سايلنت 

فنفخ بضيق 

مش فاهم عروسة وفرحها كمان يومين جايلها نوم ازاي المفروض متعرفش تنام لسنتين قدام 

وقرر يكمل جنونه للاخر وبخفة ومهارة اتسلق الحيطة ونط بحرافية للبلكونة اللي كانت مقفولة فضل يخبط بشويش علشان متتفزعش 

لحد ما انتبهت وعد 

وفتحت نور الاباجورة 

وعد 

ايه اللي بيخبط على باب البلكونة دا 

وهنا شافت فونها بينور و ادم بيتصل بيها 

فردت 

الوا ... ادم خير اوعا تكون انت اللي بتخبط على باب البلكونة من برا 

ادم 

حصل فعلا افتحي بسرعا 

وعد 

نعم انت مجنون ايه اللي طلعك لبلكونتي وايه افتح دي انت بتهزر... على فكرة انا كنت نايمة وانت قلقت منامي 

ادم 

جالك نوم يا قادرة واني مش عارف انام من غير ما اشوفك 

وعد 

ادم احنا لسه متقابلين الصبح لما كنت واقف مع مامي 

ادم 

نعم بتسمي دي مقابلة اشوفك اكده واسلم عليكي زيي زيي الغريب لاه طبعا لازم اسلم عليكي بطريقتي 

وعد 

امم بطريقك طب روح نام يا ادم وارجع من مكان ما جيت تصبح على خير 

ادم 

استني اوعي تقفلي يا مجنونة افتحي باب البلكونة الاول 

وعد 

لا مش فاتحاها احنا هنستعبط مينفعش تدخل اوضتي ترضاها لاختك يعني 

ادم 

وربنا ما عندي اخوات بنات بس لو فرضا وعندي اخت زي القمر زيكي كدا ومتجوزة يبقى ليه لا ليه متفتحش لجوزها حبيبها اللي نفسه يشوفها وهيموت يا عيني 

ضحكت وعد برقة لانها اول مرة تشوف الجانب دا من ادم اللي علطول بيكون جد وحازم معاه 

ادم بتوهان 

لا انا مش هتحمل ضحكتك داي افتحي بقا يا بنتي

وعد بدلع 

لا مش فاتحة روح امشي يلا 

ادم بالحاح 

بالله عليكي

وعد 

قلت لا يعني لا 

ادم بغيظ 

فكرك يعني اني مش هعرف افتحه تحبي اوريكي هفتحه ازاي 

وعد 

لا اوعا يا مجنون ميصحش 

ادم 

طب افتحيه انتي بدل ما افتحه انا 

وعد 

ادم بجد انا كنت نايمة يعني مينفعش تدخل 

ادم 

طب البسي اسدال الصلاة واطلعيلي البلكونة يا وعد 

اضطرت وعد انها تقوم ولبست اسدالها بسرعا وفتحت باب البلكونة وهي بتقول 

بقا ينفع اللي بتعمله دا اتفضل يلا وبطل حركات العيال دي وامشي مامي وبابي لو شافوك هنا يقولوا عليك ايه 

سرح ادم في عيون وعد وقال 

مساء القمر والجمال على احلى عيون في الكون 

وعد بجدية 

ها خلاص خلصت كلامك اللي عايز تقوله اتفضل امشي بقا 

ادم 

بت انتي انا مش ماشي الا بمزاجي فبطلي امشي داي 

وعد

يوووه يا ادم اللي بتعمله دا غلط 

ادم بحب 

ليه غلط هو انا بعمل حاجة حرام ولا واقف مع حد غريب انتي مراتي يا بنتي 

وعد 

لا لسه مش مراتك لما اروح بيتك ابقى مراتك 

ادم 

يااه امتا بقا ديه يحصل اني نفسي ومنى عيني النهاردة قبل بكرة 

اتحرجت وعد وخدودها احمرت وقالت بحرج 

طب من فضلك انزل بقا علشان ميصحش والله واوعا تعملها تاني يا مجنون 

ادم 

اعمل ايه مقادرشي انام ولا هيجيلي نوم الا لما اسلم عليكي وبطريقتي 

وعد بارتباك 

نعم طريقة ايه دي 

❈-❈-❈

مر اكتر من كم دقيقة والثواني في المهمات اللي زي دي بتفرق معاهم 

بدأ التوتر يدب في نفوسهم وحبات العرق بتتصبب على جبينهم 

والاتنين بيبصوا لبعض مش لاقين المخرج من الاوضة اللي هما فيها 

حتى مادونا بدأت تتوتر هي كمان لان مفيش منهم اي اشارة زي ما هما متفقين وكل شوية تتفحص المكان حواليها يمكن تشوف اي إشارة لكن مفيش اي حاجة خالص 

مالك في الوقت دا نام في الارض وغمض عينه 

فعلي قال 

مالك مش وقت استسلام دلوقتي قوم اتحرك لازم نلاقي المخرج قوم بدل ما اقومك بطريقتي 

مالك قال 

هشش اسمع بس عايز اسمع لو فيه اي صوت او مصدر للهوا جاي من برا احنا دورنا في كل مكان في الحيطان اظن ان المخرج المرة دي هيكون تحت الارض بس فين دا اللي هنكتشفه 

فعمل علي زي مالك ونام ف الارض وبدأ يرهف السمع هو كمان 

وبعدها بصوا لبعض وابتسموا لانهم اكتشفوا المخرج فعلا 

وقاموا بسرعة وقفوا وبصوا على البلاط اللي معمول منه الارضية ومشيوا على الألوان بطريقة معينة ولاكتر من مرة ولاكتر من طريقة لحد ما فلحت اخيرا واتفتحت الارضية على هيئة سلم ونزلوا منه لتحت 

كان المكان كأنه سرداب طويل تحت الأرض ملوش اول من اخر 

ومليان بالخردة وقطع الغيار اللي محتاجة إعادة تدوير 

كانوا عاملين المكان ليوهم اللي يشوفه انه مجرد مكب للنفايات لكن الحقيقة واللي اكتشفها مالك وعلي وسجلوها بأدوات التجسس اللي معاهم 

انه عامل زي سجن تحت الارض بيحبسوا فيه الأشخاص اللي عايزين يخفوها عن العالم زي العالم المصري اللي مهمة مالك وعلي انقاذه وكمان بيخبوا بيه المجوهرات والتحف الثمينة لحين بيعها بأحسن تمن ..

كل دا سجله مالك وعلي بكاميراتهم وفاضل بس يلاقوا العالم المطلوب 

فضلوا يدوروا في كل مكان واللي سهل عليهم المهمة ان المكان مفيهوش ولا حارس لان محدش يعرفه الحراس كلهم فوق وبس علشان يمنعوا اي حد يحاول ينزل لتحت وبالفعل لقوا العالم المطلوب مكبل بالسلاسل فبمهارة قدروا يفكوا قيوده لكن حالته كانت صعبة خالص 

مالك 

للاسف العالم تقريبا كانوا بيعطوه ادوية تغيب عقله وتخليه بالمنظر دا طلوعه معانا من هنا هو مهمتنا الحقيقية والأصعب ف المهمة كلها 

علي

 معاك حق مش هيقدر يتفاعل معانا خالص انا بقول نلفه كويس وواحد فينا يشيله على ضهره كأنه معدات 

مالك للاسف مش هينفع الخروج بيه بالشكل اللي بتقول عليه مجرد خروجنا من هنا بالطريقة اللي جينا بيها هتكون مثيرة للشكوك وكمان صعب مع كمية الحراسة اللي اتخطيناها فوق 

على 

طب الحل ايه 

مالك بعد تفكير

 مفيش غير حل واحد هو انتحاري صحيح لكن دا الحل الوحيد

علي 

ايه هو الحل دا 

مالك 

اننا نعمل مخرج بنفسنا غير المخرج اللي جينا منه نعمل طريق يخرجنا لبرا المكان دا 

علي 

اللي بتقوله دا مستحيل يا مالك 

مالك 

مفيش مستحيل مع الأمل والعقل والادوات اللي معانا .. هنستغرق وقت علشان منثيرش الانتباه لكن هنقدر ... انا عارف بالظبط احنا نزلنا تحت الارض لمسافة قد ايه واظن انهم هنا عاملين مخرج لاي طوارىء فمهمتنا اننا ندور عليه وبس

علي 

يسلم افكارك يا مالك طيب يلا بينا نبدأ الحفر 

وبالفعل كل واحد اخد جانب وبدأ يحفر فيه لحد ما يلاقوا المخرج 

وبعد ساعتين من الحفر قدر علي انه يلاقي المخرج فكلم مالك عن طريق ساعته 

مالك انا لقيت المخرج تعالى وهات العالم معاك يلا بسرعة وانا هعطي لسارا الاشارة اننا خارجين علشان تعمل حسابها وتخرج هي كمان 

انا عند مادونا 

كان الجوكر مشغول بالحفلة والبنات اللي حواليه وكانت مهمة مادونا انها تخليه يسكر اكتر من اللازم علشان يغيب عن الوعي ... فلما جالها الاشارة من علي 

اتنهدت براحة انهم بخير وحاولت تبعد لكن الجوكر كان منتبه ليها ومنعها انها تمشي 

سارا رايحة فين خليكي معايا انا وبس 

وشد ايديها قعدها تاني 

فنفخت بضيق وهي بتقول 

وبعدين في النيلة دا همشي ازاي بالشكل دا وبعدين منامش ليه دا شارب شرب يكفي بلد بحالها 

وبعد شوية من التفكير قالت 

امجد بيه 

معلش رايحة التويلت وراجعة علطول 

جوكر 

اوك يا روحي متتأخريش عني 

في الوقت دا مالك وعلي قدروا يخرجوا بالعالم لبرا المكان لكنهم مازالوا ف دايرة الخطر 

علشان كدا طلبوا دعم سريع 

ومالك بعت إشارة تاني لمادونا انها تخرج من المكان بسرعا 

فبدال ما مادونا تروح للتويلت اتهجهت لمكان الخروج 

لكنها اتفاجئت بالحرس بيوجه السكاكين حوالين رقابتها 

وصوت الجوكر بيقول 

على فين سارة!! فكرك اني نايم على وداني وسكران؟؟؟ 

بلعت مادونا ريقها لانها اتكشفت وعرفت انها مش هتخرج من المكان حية 

❈-❈-❈

اما عند ادم ووعد 

لسه ادم هيتكلم لقا فردة شبشب بتتحدف عليه من حيث لا يدري وشوق ورائد قدامه 

وعد

مامي وبابي!!! 

ادم 

يادي الكسفة والكبسة ابلة شوق ودكتور رائد!!! 

شوق وف ايديها الفردة التانية 

كبسة بالرز واللحمة يا ولا انت ايه اللي جابك اهنه !!!

يتبع