رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الرابع والثلاثون

تم النشر الجمعة

10/1/2025

قام مالك مفزوع من نومه يبص حواليه يدور ع الأيد اللي ماسكة السكينة من وراه بدأ يتلفت لكنه مشافش حاجة رغم انه بيقدر بسهولة يشوف ف الظلام الا أنه مشافش حاجة 

فبسرعة اتحرك من مكانه وفتح النور فنور المكان كله لكنه ملقاش حد اتحرك ناحية الشباك اللي التعليمات جتله انه ميتفتحش خالص دلوقتي لقاه مقفول زي ما هو يعني لا حد دخل ولا خرج واكيد مش هيلحق يخرج ويقفله وراه بالسرعة دي 

بص لباب الجناح لقاه مقفول من جوة زي ما قفله بالظبط وكل حاجة ف مكانها متحركتش يعني مفيش اي حد اخترق المكان 

فرجع لمكانه وقعد ع الكنبة 

مفيش اثر لأي حاجة مفيش اي دليل على ان حد غريب دخل هنا طب اللي شوفته دا ايه والسكينة اللي شوفتها معقولة كنت بتوهم ولا انا لحقت اروح ف النوم لدرجة ان اللي شوفته دا كان مجرد حلم فمش عارف افرق بينه وبين الحقيقة 

اما هي فرجعت بسرعة لمكانها وقلبها بينهج جامد وحاولت تخفي السكينة اللي ف ايديها تحت المخدة وهي بتقول 

لالا ايه اللي انا كنت ههببه دا كنت هتكشف دا كان لسه صاحي منامش ولو كان مسكني مكانش هيحصل كويس ركزي وخططي كويس يا مادونا علشان تتم المهمة بنجاح... متقلقش يا بابي هنتقم ليك من اللي كان السبب ف موتك وقتلك بدم بارد

❈-❈-❈

تاني يوم 

رغبة ملحة من ادم انه قبل ما يدخل مكتبه ويتابع شغله انه يروح يشوفها في مكان عملها ويطمن عليها 

اتحرك من مكانه كأنه مسلوب الإرادة لحد ما وصل لمكان شغل وعد 

بدأ يبص بعنيه ويدور عليها في كل مكان لكنه ملقاهاش 

فاستغرب وبدأ القلق يتسرب لقلبه هتكون راحت فين 

ولسه هيتحرك من مكانه علشان يسأل هي فين 

افتكر انها مش بتيجي النهاردة فضرب بكفة ايده على مقدمة دماغه وقال 

واه انا  طلعت غبي اوي وعد مش بتيجي النهاردة مهواش معادها واساسا اني عبيط ليه لو كانت جاية كنت هروح بنفسي اجيبها من بيتها واوصلها لحد اهنه اني ايه اللي عملته ديه وبعمله معقول للدرجة دي بدأتي تشغلي تفكيري وعقلي يا وعد هو اني اكده حبيت!!! ديه الحب والتعلق اللي بيقولوا عليه!!! ... ايوا لقيتها اني امي اهناك عنديهم اتحجج اني چاي لأمي واطمن عليها ...

وبعد ما خلص شغله كان متحمس انه يطوي الطريق طي بسرعة علشان يوصل ليها ويطمن عليها 

ولما وصل لهناك سلم على البواب 

السلام عليكم يا راجل يا طيب كيفك وكيفها احوالك 

قام عم امين من مكانه وسلم على ادم بحرارة 

اهلا اهلا بحضرة الظابط نورتنا يا باشا والله انا بخير وصحة الحمد لله 

ادم مد ايده وسلم ع امين 

يارب دايما يا عم امين ربنا يديك الصحة ويعينك محتاج مني اي حاجة 

امين

 تسلم وتعيش يا حضرة الظابط ... الحمد لله بفضل ربنا اللي يعيش في بيت الابلة شوق ميشلش هم حاجة ربنا يباركلنا فيها علطول سباقة بالخير وبتعمل المعروف من قبل ما نطلبه وكأنها حاسة بينا وعلطول شايلة همنا وواعية لحالنا اكتر مننيا 

ادم

 قال بتأكيد على كلام امين 

معاك حق الابلة شوق دايما سباقة بالخير ربنا يكتر كم امثالها ويباركلنا فيها 

امين

 اللهم امين يارب اتفضل ادخل الست هناء جوا ف الجنينة بتسقي الزرع 

اتحرك ادم لجوة ولسه هيبص بعينه يدور ع امه 

وصل لمسامعه صوت ضحكاتها ايوا ضحكات اللي خطفت قلبه وشغلت تفكيره بدون تخطيط منها ولا ارادة منه

فتلقائيا اخدته رجليه لحد عندها فشافها قدامه وواقفة مع أمه 

فتلقائيا الابتسامة اترسمت في قلبه قبل وشه 

وعد كانت بتسقى الزرع مع هناء وهي بتضحك

حرام عليكي يا طنط هناء والله مش قادرة اوقف ضحك معقول مامي كانت بتعمل كدا 

هناء 

يييه واكتر كمان هو محدش حكالك ولا ايه 

وعد 

لا طبعا حكولي كتير ومواقف عجيبة  بس بصراحة اللي حضرتك بتقوليه دا اول مرة اسمعه 

هناء 

الابلة شوق مكانش بيهمها في الحق لولة لائم واللي يغلط بتديه بالبلغة علطول مهمن كان مين حتى لو كان العمدة ذات نفسيه 

ضحكت وعد 

مامي مفيش منها اتنين طبعا 

ولما بصت وعد قدامها وانتبهت لوجود ادم اللي كان واقف سرحان قالت بحرج

ايه دا حضرة الظابط ادم واقف هنا من زمان طب مش تزمر علشان انتبه بدال ما انا بضحك كدا طب تقول عليا ايه دلوقتي 

ادم اتنحنح بجدية 

ازيك يا دكتورة وعد السلام عليكم ورحمة الله وبركاته في الاول

وعد وهي بتتخطاه علشان تمشي 

وعليكم السلام ورحمه الله وبركاته انا عارفة انك جاي لوالدتك اسيبكم انا بقا وامشي انا يا ترى عمو اسعد السواق هنا ولا فين 

ادم قرب من امه وباس أيدها ورساها وبعدين نادى ع وعد 

استني يا وعد اني هوصلك ف طريقي بدال ما تنتظري عم اسعد لانه مش اهنه اكيد لساته ف داره فخليه مرتاح 

وعد 

مش عايزة اتعبك يا حضرة الظابط وبعدين انت جاي لوالدتك 

ادم 

اني جيت اسلم عليها وتوي راجع لشغلي تعالي اتفضلي هوصلك انتي رايحة الجامعة مش اكده 

وعد 

اه عندي كام حاجة كدا هخلصها هناك 

ادم تمام ادخلي بلغي ابلة شوق چوة واني في انتظارك 

وبالفعل استأذنت وعد من شوق 

اللي طلعت معاها للجنينة تسلم على ادم 

شوق يا اهلا وسهلا يا حضرة الظابط عامل ايه يا غالي 

ادم 

الحمد لله كيفك انتي يا ابلة شوق وايه اخبارك 

شوق 

الحمد لله في نعمة كبيرة تستوجب الشكر لله الفضل والمنة 

ادم 

ربنا يباركلك يا ابلة شوق 

شوق 

بقولك ايه يا ادم اني كنت رايدة اروح مشوار اكده وطالما انك عايز توصل وصل وصلني معاك ف طريقكم ولا هعطلك!! 

ادم 

لاه طبعا تعطليني ديه ايه ديه اني اتعطل علشانك يا ابلة شوق تعالي اتفضلي تآنسي وتنوري 

❈-❈-❈

في مكتب خالد كان قاعد بينفخ بضيق  ورايح جاي في مكتبه 

وبعدين بقا فداء دماغها ناشفة ومش عايزة ترجع البيت مش عارف اقعد فيه من غيرها وف نفس الوقت معرفش انفذ لها اللي طلبته و الزفت اياد منشف راسه هو كمان ومش عايز يرجع معاها وعامل مقموص اوي طب اعمل ايه دا 

في الوقت دا جت السكرتيرة وقالت 

خالد بيه ابلة شوق برة وعايزة تقابل حضرتك 

خالد اتوتر لما سمع اسم شوق 

ااا شوق ااا خليها تتفضل بسرعة 

ولما دخلت شوق 

السلام عليكم ورحمة الله وبركاته...ازيك يا خالد عاش من شافك 

خالد 

اهلا يا ابلة شوق اتفضلي اقعدي 

قعدت شوق قصاده على المكتب وقالت 

اظن انك خمنت سبب زيارتي  ليك اهنه في الشركة مش أكده 

خالد عمل انه مش فاهم بتتكلم عن ايه فقال 

انتي تنوري الشركة في اي وقت مش محتاجة سبب علشان تيجي يا ابلة شوق 

شوق 

لاه اني فعلا جاية لسبب والسبب ظيه انت عارفه كويس يا خالد متحاولش تتوه او تلف وتدور 

خالد قال بانزعاج

اكيد فداء واياد اشتكوا ليكي 

شوق 

ولا كلام من ديه حصل ولا كنت هعرف منيهم ابدا اللي لفت نظري هو مهند والواد يزن بقا ينفع أكده يا خالد هو ديه اللي اتفقنا عليه زمان هو ديه وعدك ليا وحلفانك ايمانات الله 

خالد بتوتر 

شوق انا معملتش حاجة على فكرة لكل اللي بيعلموه دا 

شوق 

ييي كل ديه ومعملتش حاجة اومال لو عملت كنت هتهبب في الواد ايه... اني كنت عارفة انه هياجي اليوم اللي هتحس فيه بالملل والضجر مش اكده بعد العمر ديه كله عايز تتخلى عن الواد يا خالد 

خالد 

انا مقولتش كدا ولا عملت كدا يا شوق انتي اكيد فهمتي غلط 

شوق 

طب فهمني ونورني ايه سبب تصرفاتك داي مع اياد غير انك خلاص مبقتش رايده وسطيكم غير انك بقيت حاسس انه غريب يا حبة عيني وسط اهله قولي نورني ديه انا هتجنن منك بسبب تصرفاتك ما بالك بالواد الغلبان اللي لا حول ليه ولا قوة...

خالد 

ايه يا شوق هو انا يعني اول ولا اخر واحد يقسى ع ابنه ويشد عليه شوية ولا ايه انا بربيه يكون راجل 

شوق 

واياد كبر وبقا راجل ملو هدومه ويعتمد عليه بحق وحقيقي بدليل انك بتعتمد عليه في الشركة وهو اللي قايم بكل الشغل فيها وشايل مسؤليتها كلها فوق عاتقه .. ليه تقسى عليه اكدم وتقل منه وكمان تتهمه بالسرقة هي حوصلت يا خالد الواد اخد ع خاطره منيك انت بمعاملتك ليه خليته يظن انه مش ابنك لو انت مبقتش رايده يا خالد قوله الحقيقة وريحه انت اكده بتدمر الواد قوله الحقيقة وفوته يختار طريقه براحته ويكون ف علمك انت لو اتخليت عنيه اني عمري ما هسيبه ابدا... فكر وخد قرارك كيف ما يلد عليك ومحدش هيقولك انت اخترت القرار ديه ليه... السلام عليكم 

قالتها شوق وقامت مشيت وسابته يتخبط في مشاعره مش عارف ياخد قرار  هل هو فعلا مبقاش يحب اياد هل فعلا مبقاش عايزه يعيش وسطيهم هل فعلا بقا متخوف منه وخايف في يوم يتآمر عليه؟؟ 

❈-❈-❈

بعد كم يوم 

ادم كان في مهمة وانصاب فيها لكنه مهتمش ورجع على شغله وقعد ع مكتبه يتناقش مع فريقه 

الحمد لله المهمة تمت بنجاح وقدرنا نسترجع  كل الاسلحة اللي استولوا عليها من خلال هجومهم على مقر لصناعة الأسلحة الخاصة بعملا تبعنا 

زميل ليه قال

الحمد لله يا باشا كل دا بفضب توجيهاتك وتعلميات سعادتك 

ادم 

بس مش كفاية يا حسين مش كفاية اننا استرجعنا أسلحتنا احنا محتاجين نعطيهم درس عمرهم ما ينسوه على تجرأهم علينا بالشكل دا وكمان اعتقد ان اللي اداهم الجرأة داي ان فيه حد جاسوس عميل بيشتغل لصالحهم سواء اهنه ف الشرطة او حد من تبع مصنع الاسلحة زات نفسيه ولازم يقع لازم نجيبه 

حسين 

هيقع يا باشا وهنجيبه بعون الله طالما انت رجعت لينا كل الفيران اللي خرجت من جحرها وقت غياب القط هترجع تاني او هتقع ف شباكك ده شيء اكيد وجوك وسطنا مكسب لينا يا ادم باشا 

ادم 

تسلم يا حسين انا ولا حاجة من غيركم 

وجه ادم يتحرك من مكانه فحس بالوجع 

ااه 

فقال مهاب لما شاف هدوم ادم اللي غرقانة دم 

ادم باشا انت بتنزف انت انصابت اثتاء المهمة 

ادم بلا مبالاة 

ايوا الحمد لله جت سليمة اصابة سطحية متاخدش ف بالك انك 

حسين 

يا باشا ايدك يتنزف جامد الافضل تروح تطمن عليها قبل ما يحصل اي التهاب لا قدر الله 

ادم 

بعدين لما نحط خطة علشان نأدبهم الاول 

حسين يا باشا هيحصل بس اطمن ع صحتك الاول 

ادم بقلة حيلة ماشي هروح اخلي اي حد يشوفها وامري لله

حسين 

تحب حضرتك اناديلك دكتور ياسر!! 

افتكر ادم وعد فقال لالا اني عارف هروح لمين يشوفها خليكم في مكاتبكم لحد ما ارجعلكم 

وبالفعل اتحرك بهدوء تام ودا لان الاصابة فعلا وجعاه والمها بدأ يزيد لكنه بيكابر 

وصل لحد اوضة مكتبها اللي بتشتغل فيه وخبط ع الباب علشان تنتبه ليه وهو بيقول 

السلام عليكم ورحمة الله وبركاته يا دكتورة وعد 

وعد رفعت راسها عن ملفات حصر اعداد الادوية اللي ف ايدها 

وردت السلام 

وعليكم السلام ورحمه الله و... 

لسه هتكمل 

شهقت بصدمة لما شافت منظره بيزف 

يا خبر انت بتنزف يا ادم 

وجريت بسرعة من مكانها ناحيته وهي بتسحبه وهي مش في وعيها المهم تنقذه وبس 

وقالت وهي بتجري زي النحلة من مكان لمكان علشان تحضرله كل الادوات المطلوبة 

انت مصاب انا لازم اوقف النزيف دا حالا ونشوف الجرح وصل لفين يارب سلم يارب 

اتكلم ادم بهدوء 

هدي نفسك يا دكتورة عادي بتحصل مهياش لا اول ولا اعرف إصابة يعني جسمي اخد ع اكده زي ما تقولي نحس مبقاش يفرق معاه فطولي بالك متخافيش وميبقاش قلبك رهيف اكده 

زعقت فيه وعد 

على فكرة انا مش فاهمة انت ازاي كدا ازاي مهم في نفسك بالشكل دا... من الواضح ان الاصابة من فترة وانت سايب الجرح ينزف ولا على بالك ولا هامك صحتك ان لبدنك عليك حق يا استاذ انت 

راق لادم انه يشوفها متعصبة كدا فقال ببرود 

ورب الكعبة اني ظابط منبش استاذ ولا حاجة اومال بهبب ايه اهنه في الحربية والاصابة داي جتلي ازاي كني اتعاركت مع قلم حبر ولانيش داري 

وعد مطت شفتها بضيق 

وكمان فيك حيل ومزاج تضحك انت بتستعبط مش كدا ... اقف ثابت ومتتحركش لاني هخيط الجرح معلش هو هيألمك شوية بس انت قدها اتحمل 

ادم 

لالا الزقيه بأي بلاستر اكده وحتة شاشة  تكتم النزيف وشكرا على اكده

وعد بحدة 

انت بتهزر!!! ولما انت عايز تكروت جرحك وتعمله اي كلام جايلي هنا ليه ها ... اقف مكانك واقعد ساكت خليني اخلص شغلي مفهوم 

ادم بتسلية

مفهوم يا استاذة اا قصدي يا حضرة الدكتورة الشرسة وعد 

وعد 

نعم !! 

ادم 

ايه اني ساكت اهو كيف ما طلبتي 

هزت وعد راسها ومقدرتش بعدها تمسك نفسها من الضحك 

ادم 

لاه ورب الكعبة لازمن افهم عتضحي ليه عاد كني بلياتشو قدامك اياك 

وعد 

تصرفاتك زي الاطفال انت ظابط انت 

ادم 

واه واني عملت ايه دلوك اني بحاول ارضيكي يا بنت الناس 

وعد 

انت متعود ترجع كل مرة لطنط هناك متبهدل كدا؟؟ 

ادم 

يووه متعديش هي تقريبا خدت ع اكده وانتي ان شاء الله بوجودك اهنه هيجيلك مناحة وتتنيح قريب متقلقيش 

وعد 

انا خلصت خيطت الجرح وطهرته ولفيته وكل حاجة حافظ عليه علشان ميتفتحش ارجوك وبلاش اهمال في صحتك ماشي؟؟ 

ادم 

ماشي تسلم يدك يا دكتورة حقيقي يدك خفيفة محسيتش بيها نهائي وطلعتي دكتورة شاطرة اهو 

وعد 

طبعا اومال مفكرني دكتورة كدا وكدا؟؟ 

ادم ببلاهة 

يعني ايه أكده واكده 

وعد 

يعني نص نص اقصد 

ادم كشر 

كني فهمت الاولى علشان افهم التانية 

وعد

 يي يا ابني يعني انت مفكرني مش شاطرة ولا ايه 

ادم 

اه مش تقولي اكده من الصبح لاه طبعا اني عارف انك طول عمرك مجتهدة ومتفوقة ربنا يحرسك لشبابك...

يتبع