قراءة رواية البطة السودا كاملة

تنشر حصريًا على مدونة رواية وحكاية قبل أي منصة أخرى

عمر وهو قاعد في اوضته بسرعة قام هب مرة واحدة وقال 

انا ازاي مفكرتش ف الطريق دا قبل كدا طريق السوشيال ميديا.. صحيح انا معنديش موبايل ادخل منه على الفيس وموبايلي بزراير عادي لكن عندي الكمبيوتر ومتوصل بيه نت علشان شغلي انا ممكن ادخل ع السوشيال ميديا اكيد لو اهلي بيدورا عليا هيكتبوا وانا كمان ممكن اكتب ادور عليهم بنفسي ممم بس انا مليش ف حوار الفيس دا.. انا هتصل بفؤاد جارنا يجي يفهمني حوار الفيس بوك دا 

وبالفعل جه فؤاد وعمل حساب لعمر وبدأ يفهمه ازاي بنشر وازاي يدور ف صفحات المفقودين وازاي يعمل منشور مجهول الهوية وكل حاجة عمر كان محتاجة 

لكن فجاة أتوقف فؤاد للحظة وهو بيبحث وبدأ يقرأ بحماس وشرود 

عمر 

ايه ف ايه وقفت فجأة ليه كدا 

فؤاد 

عمر تعالى كدا قرب من الشاشة اقرأ البوست دا 

عمر بدأ يقرأ بصوت عالي 

" إلى ابني وحبيبي عمر يمكن دي المرة المليون اللي اكتب فيه بوست زي دا ويارب المرة دي يوصلك بقا وحشتني اوي مشيت وسبتني من وانت عندك ٧ سنين بس كان عقلك اكبر من عمرك بكتير كنت ذكي ما شاء الله عليك مشيت وسبتني ليه يا عمر انا محتاجاك اوي ارجعلي يا عمر ارجوك انا من غيرك عايشة من غير روح... ارجوكم اي حد يعرف يتوصل لابني يدلني عليه دي صورته وقت ما فقدته اللي يشوفه يوصلني بيه ارحموا ام هتموت وتشوف ابنها بالله عليكم "

عمر 

البوست دا كأنها بتحكي عني ماما سامية بتقول لقوني ف السن دا 

فؤاد 

طيب والصور دي صورك وانت صغير ؟؟ 

عمر 

مش عارف مليش اي صور ف السن دا هنا معرفش بس الصور تشبهني إلى حد ما مش عايز اعشم نفسي 

فؤاد 

طيب ما تسأل الحجة سامية واتأكد هما هيبقوا عارفين مش هتخسر حاجة 

عمر نادى ع امه وابوه ولما جم شافوا الصور اكدوا انها لعمر 

سامية بفرحة 

ايوا دي صورك دا انت يا عمر اول ما شوفناك .. جبتهم منين اهلك بيدورا لسه عليك لحد دلوقتي الحمد لله شوف هما مين بسرعا 

عمر 

متأكدة يا امي ان دي صوري ولا اختلط عليكي الأمر 

ناجي 

هي صورك يا عمر احنا مش هنتوه عنها يا ابني بسرعة اتصل بيهم كلمهم قولهم انك ابنهم واخيرا الحمد لله يا فرج الله 

عمر ضربات قلبه زادت وكان متحمس انه اخيرا هيشوف اهله فقال 

فؤاد ادخل ع صفحتها لازم نعرف مين هي ونتواصل معاها ازاي 

فؤاد فتحله صفحتها وقرأ الاسم 

بتول سليم رشدي ومكتوب ع الصورة اللي ف المكتب اللي قاعدة فيه انها رئيسية مجلس الإدارة دي شكلها حد واصل اوي يا ياض يا عمر 

عمر فضل الاسم يتردد ف دماغه بتول سليم المرشدي بتول .. تولا 

فؤاد افتح صورتها اعملها زوم 

وفضل عمر يبص ف الصور 

فجأة مرة واحدة افتكر كل حاجة كان ناسيها امه بتول وابوه أحمد اللي مات وهو عنده ٣ سنين تعب بتول من الحزن بسبب موت حبيبها وسندها ف الحياة وطرد ابوها سليم ليها افتكر لما قرر يضحي علشان سعادة أمه ومشي وراح اشتغل عامل بناء ف مدينة تانية ولما وقعت عليه الخشبة وبعدها اتحولت حياته لحياة تانية خالص فرح وهو بيقول 

بتول بتول امي واخيرا افتكرتك يا نور عيني يااه يا بتوول 

سامية مكانتش مصدقة اللي بتسمعه 

عمر انت الذاكرة رجعتلك ! عرفت مين اهلك الله اكبر الله اكبر ربنا كريم اوي 

فجأة عمر سرح مع نفسه وهو بيبص لصورتها وبيقرأ رئيسة مجلس الإدارة 

فقال ف نفسه 

ياااه يا تولا الحمد لله الظاهر انك رجعتي لسليم ورضي عنك وحياتك اتغيرت بعد ما مشيت انا شوفتي مش قولتلك لما امشي سليم هيرجعك لقصره تاني.. اخاف دلوقتي يا تولا لو رجعتلك يحرمك تاني من كل العز اللي انتي فيه.. عارف انك هتموتي وتشوفيني وانا كمان هموت واجي اترمى في حضنك يا امي بس مش هينفع مش هينفع بعد العمر دا كله والعز اللي انتي فيه احرمك منه انا معملتش كل دا وبعدت علشان ف الاخر اشوفك بتتعذبي تاني... لا انا صحيح افتكرتك وعرفت انك امي لكن مش هينفع ارجعلك استحالة دا يحصل مش هسمح ان حياتك تتأثر بسببي .

قالها ومشي وسابهم وهو شارد تايه مش بيرد ع تساؤلاتهم ولا نداءاتهم المتكررة ومشي وهو زعلان ومصدوم وحزين بقا اليوم اللي يفتكر فيه امه وذاكرته ترجعله والمفروض انه يكون اسعد يوم واسعد لحظة بالنسبة ليه اتحول لاتعس لحظة ممكن يمر بيها في حياته امه خلاص عرفها وع بعد امتار منها لكنه مكتوم مش عارف يروح لها ومش قادر ولا هينفع 

نزلت دموعه رغما عنه 

اسف يا بتول حقك عليا اسف ع البعد 

وبعد ساعات من الضياع اللي عاشها عمر فجاة لاح طيف امل قدام عينه وفرح وقال 

انا ممكن مقولش لبتول مين انا انما ممكن اقرب منها واكون جنبها واعرف اخبارها واتابعها من غير ما تعرف هويتي 

فرح بالفكرة دي وقرر ينفذها من بكرة فرجع ع البيت لقا امه وابوه قلقانين عليه واول ما شافوه فرحوا 

سامية 

ها يا عمر قولي عملت ايه قابلتها وخلاص هتروح تعيش معاهم وانت دلوقتي جاي تودعنا مش كدا اوعى يا عمر اوعى تنسانا دا انت ابني اللي مخلفتوش يا عمر 

عمر باس ايديها وقالت 

انتي مهما حصل هتفضلي امي حتى لو لقيت امي الحقيقية... لكن ف الواقع ف الوقت الحالي كل شىء هيفضل لما هو عليه

ناجي بفزع 

ليه يا عمر معترفوش بيك مصدقوش كلامك يا ابني؟؟ 

عمر 

لا انا مش هينفع اظهر دلوقتي ف الوقت المناسب يا بابا وارجوكم محدش يسألني ليه لاني معنديش اي جواب علشان ارد عليكم بيه عن اذنكم انا هترتاح ف اوضتي 

سامية 

احنا واثقين فيك وف اي قرار تاخده يا عمر ربنا معاكي يا حبيبتي وييسرلك كل عسير 

عمر ابتسملها ودخل ع اوضته 

...

في اوضة سراج وفتون كانت بتتصفح الفيس ففجاة اتغير لون وشها وقالت 

اختك الهبابة نزلت البوست تاني يلا بسرعة كلم ادمن الصفحة اللي هو تبعنا اصلا بعد ما اشترينا الصفحة دي من صحابها واطلب منه المعتوه دا يحذف البوست احنا مش متفقين معاه يحذف البوست بعد شوية من نشره الغبي دا محذفوش ليه 

سراج 

انا هكلمه حالا 

ولما طلبه كان غير متاح ومحدش بيرد 

ولكن بعد فترة لما أخيرا رد 

سراج قال 

انت يا زفت انت كل دا فين هو دا اللي اتفقنا عليه البوست نازل بقاله ساعة وانت نايم ف العسل انت متعرفش خلال الساعا دي ممكن يكون وصل لكم مليون ولا اتعمله كم شير؟ 

الرجل 

انا اسف يا سراج بيه بس المدام كانت بتولد وانا كنت معاها مكنتش معايا نت انا اسف بس متقلقش انا هعمل اتصالاتي واطلب كن اصحابي انهم يتتبعوا كل شير حصل للبوست دا ويحذفوه زي ما بنعمل طول السنين اللي فاتت او بنغير صورة الطفل بصورة تانية كتمويه علشان متاخدش بالها ان فيه حد بيحذف بوستاتها 

سراج 

طيب اتصرف بسرعة وغلط زي دا لو اتكرر تاني انت عارف انا هعمل فيك ايه 

الرجل 

اسف اسف يا باشا والله حقك عليا متوقعتش انها تنزل البوست ف الساعا اللي مراتي بتولد فيها ما انا قاعد ع البيدج اربعة وعشرين ساعة براقب اي بوست ليها 

سراج 

بطل حجج وادخل شوف شغلك حالا 

الرجل 

ماشي حالا اهو يا باشا

وبالفعل دخل حذف البوست اللي بتول نزلته 

ولما عمر دخل اوضته تاني وبدأ يدور ع البوست ملقاهوش 

هو راح فين ما كان موجود من شوية عامة مش صعب اني اوصل لأمي خلاص ذاكرتي رجعتلي انا أسأل عن عيلة سليم أكبر عيلة ف مصر وهلاقيها وبالفعل بعد شوية بحث عرف يلاقي حسابها من تاني وعمله متابعة وفضل يبص ع صورها بشوق كبير 

وحشتيني اوي يا ماما ياااه منى عيني اضمك لقلبي دلوقتي حالا لكني معرفش ظروفك ايه مش عايزك تعيشي في تعاسة وفقر 

ولما عرف اسم الشركة بتاعتها اتضح انها نفس الشركة اللي هو شغال فيها لكن هو شغال ف الفرع فقرر انه يروحلها ف الشركة الأم 

راح للمشرف وطلب منه النقل 

حضرتك كنت وعدتني تنقلي في اي وقت اطلب منك دا.. ممكن تعمله دلوقتي ارجوك 

المشرف 

ماشي يا عمر علشان ان شاب مجتهد وشايف شغلك صح انا هعمل اللي انت عايزه رغم اننا هنفتقدك هنا بس انا عايز ليك الاحسن بس اوعا تنساني لما توصل يا عمر 

عمر 

وعد مش هنسى اللي هتعمله ليا وهعتبره دين عليا هرده ليك في وقته 

وبالفعل اتنقل عمر للشركة الأم وبدا عمر اول خطوة ف خطوات الوصول لوالدته

اما ربا كانت وصلت للشركة وطلبت مقابلة سليم بيه وعرضت الكارت 

سليم لما شاف الكارت سمح لها بالدخول 

وقال 

تعالى يا بنتي ادخلي ها اسمك ايه بقا 

ربا 

اسمي ربا يا سليم بيه 

في الوقت دا جت بتول 

صباح الخير يا سليم بيه اتفضل الملف دا محتاج تبص عليه 

سليم 

تمام يا بتول اتفضلي اقعدي معايا لحظة بس 

وبص لربا ها وريني الملف بتاعك وهل انتي دارسة ولا متعلمتيش 

ربا 

لا انا كنت في هندسة بس سبتها لظروف خاصة ودلوقتي حضرتك انا محتاجة شغل علشان اصرف على نفسي وكدا يعني 

سليم 

طيب ليه مقولتيش عايزة شغل علشان تكملي دراستك 

ربا 

يمكن زي ما تقول كدا حضرتك فقدت الشغف 

سليم 

لو كملتي دراستك هتضمن ليكي مستقبل باهر وانا اضمنلك شغل هنا في الشركة كمان 

ربا 

صعب ف الوقت الحالي يا سليم بيه.. لكن افهم من حضرتك انك مش هتشغلني هنا عندك والله محتاجة الشغل اوي 

كل دا بتول كانت بتسمع وف نفس الوقت كانت بتتصفح ملف ربا فقالت 

اا معلش للمقاطعة يا سليم بيه.. بس اللي عرفته انك من عيلة وضعها المادي كويس كدا 

سليم 

انتي مش بتقولي انك يتيمة يا بنتي 

ربا اتنهدت بأسى 

دا حوار طويل يا سليم بيه .. بس انا عشت طول عمري في دار الايتام لحد ما اهلي لقوني من سنة او اتنين تقريبا 

بتول اول ما سمعت كدا اتحمست علشان تسمع القصة اكتر 

سليم 

ها كملي سامعك يا ربا 

ربا 

لا مفيش تكملة عادي انا عايزة استقل بنفسي ومحدش يصرف عليا ممكن حضرتك تشغلني اي حاجة هنا لو حتى فراشة انا موافقة 

سليم شاور لبتول اللي كانت متحمسة تعرف كل حاجة عنها فقالت 

طيب تعالي معايا يا ربا انا اللي هكون مسؤولة عن شغلك تعالي معايا ع المكتب 

ربا 

حاضر عن اذنك يا سليم بيه ومتشكرة اوي لكرم حضرتك 

ولما راحت ربا مع بتول مكتبها 

تعالي اقعدي يا ربا واقفة ليه

ربا 

شكرا والله انا مرتاحة كدا 

بتول قامت من مكانها وراحت عن ربت ورفعت وشها بإيديها بحنان 

اقعدي يا ربا وقوليلي ايه سر الحزن اللي مالي وشك 

ربا 

مفيش حاجة يا هانم مفيش حاجة تستاهل تتحكى والله 

بتول 

انتي قولتي انك كنتي تايهة من اهلك وعايشة ف دار ايتام مش كدا 

ربا ايوا يا هانم اتربيت عمري كله معرفش مين اهلي وكنت كلي شوق اشوفهم ويبقى عندي بيت وعيلة واهل

بتول قالت علشان تخلي ربا تتكلم اكتر 

تعرفي ان ابني تايه من سنين ومعرفش عنه حاجة ولفيت الدنيا كلها عليه ومش لاقياه 

ربا قلبها رق ليها وقالت ربنا يرده ليكي سالم يارب بس اتمنى لما يرجع يكون ف قلبك حب حقيقي ليه مش مجرد اوهام ولا يرجع ميلاقيش اي حاجة منه

بتول 

افتحيلي قلبك يا ربا ايه اللي حصلك نبرة صوتك والحزن ع وشك بيحكوا كتير 

ربا هنا قالت ببكا وحسرة 

كنت بحلم باليوم اللي اشوف فيه اهلي واترمي في حضنهم علشان يعوضوني سنين الوحدة واليتم هما كمان كانوا بيدوروا عليا كانوا عايزني ارجع لكن وقت ما دا حصل ورجعت ملقتش ف قلبهم الحب اللي انتظرته كانوا راسمين شخص معين ف مخيلتهم وبطبيعة معينة لما رجعت حصلهم صدمة كنت تقريبا عكس توقعاتهم ملقتش منهم الحب ومعرفوش يعطوه لحد غريب عنهم مترباش معاهم مشافهوش قبل كدا حتى لو كنت من دمهم وصلبهم فضلت معاهم بعاني كأني وحيدة زي ما انا الاختلاف بس اني اتنسبت لاسمهم لكن ملقتش لا قلبهم ولا احتواءهم قررت اتغاضى عن كل دا واشغل نفسي بدراستي وبالفعل عملت كدا ودخلت هندسة لاني كنت شاطرة وتفوقت فيها وكنت هروح منحة لحد ما جه اليوم المشؤوم 

هنا ربا سكتت 

بتول بتأثر وعنيها كلها دموع 

كملي يا ربا سامعاكي سكتي ليه 

ربا كملت بدموع 

اختي الصغيرة اللي بيحبوها المدللة بتاعتهم قتلت حد بعربيتها بالغلط طلبوا مني احل بدالها بحكم انها مش هتتحمل المحاكم والحبس وعدوني اني بس هحل محلها ف الاجراءات لكن مش هيحصلي حاجة لكن اللي محدش اتوقعه ان اتحكم عليا بسنة سجن فاتسجنت بدالها واتحرمت من حريتي وجامعتي ومن الحياة كلها 

بتول شهقت بصدمة والم 

يا خبر يا ربا كل دا حصلك وانتي ازاي ساكتة 

ربا وهي بتعيط 

ومش بس كدا طول السنة اللي فاتت دي محدش فيهم زارني ولو لمرة واحدة بس خوفا طبعا على وضعهم الإجتماعي قدام الناس ولما طلعت قررت اني مش هعيش معاهم تاني طلبت منهم شقة لوحدي وكأنهم ما صدقوا دا وانا حاليا عايشة لوحدي ومحتاجة اصرف ع نفسي من شغلي بالحلال لاني متأكدة انه هيصرف عليا شهر ولا اتنين بعدين هينساني لانه مش فاكرني اصلا 

ربا لما خلصت كلامها بتول حضنتها وهي بتعيط وفضلوا الاتنين ع الوضع دا يعيطوا يفرغوا كل شحنة الحزن والألم اللي جواهم لحد ما هديوا تماما 

بعدها بتول مسكت وشها بحنان وقالت 

يمكن جه الوقت انك تنسى احزانك احيانا بنظن انها نهاية الطريق لكننا منعرفش انها بداية لشىء جميل منتظرنا من النهاردة انتي هتعيشي معايا يا ربا مش هسيبك لوحدك ابدا وهتشتغلي معايا هنا وهتكملي دراستك ف هندسة كمان 

ربا 

كتر خيرك يا هانم يكفيني توفري ليا فرصة شغل وكدا والله رضا اوي 

بتول

اسمعي يا ربا انا بتعاطف جدا مع اي حد اسمع انه كان ف دار ايتام يمكن علشان ابني يلاقي حد يعطف عليه ويحن عليه زي ما بحن عليهم علشان ربنا يردلي ابني.. اعتبريها زي ما تعتبريها لكن كل اللي عايزاكي تعرفيه اني مش هسيبك يا بنتي ربنا يجعلني سبب ف اسعادك وطالما انا قادرة ع دا يبقى ليه لا استغلي الفرصة وامسكي فيها بإيديكي واسنانك قولتي ايه 

ربا وسط دموعها ضحكت بفرحة 

ربنا يكتر من امثالك ويردلك ابنك اللي ضايع منك سالم يارب 

بتول 

اللهم امين عمري ما فقدت الامل ابدا هلاقيه وحاسة أنه قريب اوي ربنا يردك لقبلي يا عمر 

بعد كدا بتول وفرت لربا شغل ف قسم الترجمة مؤقت وشغل سهل علشان تعرف تكمل تعليمها واخدت ورقها وبعتته للجامعا من غير ما ربا تعرف 

❈-❈-❈

تاني يوم عمر وصل لمقر الشركة وفضل يبص عليها بانبهار

مختلفة تماما عن الفرع ايه الفخامة دي يا جدي لكن للاسف فخامة من برا لكن من جوة قلوب زي الحجر ياما ابكيت امي وقهرتها بطردك ليها وحرمانها من كل حاجة ووقوفك ف طريق بابا لحد ما خسر كل حاجة حتى حياته مات من الحزن ع ضياع حلمه ربنا يسامحك يا جدي ربنا يسامحك يا ترى بتعامل امي ازاي دلوقتي 

ولسه بيتحرك من مكانه لقا نفسه خبط ف حد 

وسمع الامن اللي بيقول مش تفتح يا اعمى 

بتول 

حصل خير حصل خير خلاص مفيش حاجة 

عمر لف وشه واعتذر 

اا انا اسف والله مأخدتش بالي حضرتك ولما بص ف وشها تنح طلعت امه اللي خلط فيها 

بلع ريقه وفضل يبص ليها بشوق وعيون متلهفة كلها دموع لكنه حاول يمسك نفسه بأقصى ما عنده 

بتول فكرت انه حصله كدا بسبب انه خبط فيها فقالت 

حصل خير خد بالك بس بعد كدا .. انت شغال هنا ولا اعتقد دي اول مرة تيجي هنا بسبب ملامح الزهول اللي على وشك 

عمر مكانش عارف ينطق ولا لسانه يتحرك حتى فضل يبص فيها شوية 

بتول 

انت سامعني انت كويس !!! 

عمر فاق لنفسه 

لا .. ها اه لا .. لا انا انا كويس انا اسف اني خبط حضرتك انتي مدام بتول مش كدا 

بتول ابتسمت وقالت واضح انك تعرفني او سمعت عني... عامة لو انت موظف جديد سيب اسمك وان شاء الله تشتغل هنا متقلقش الشركة مفتوحة للجميع 

عمر 

اا اسمي اا اسمي اا 

وقال ف نفسه اقول اسمي ايه بس

بتول ابتسمت 

لا الظاهر انك متوتر جدا متخافش كدا بس خد بالك الشركة هنا محتاجة الشخصيات القوية والجرأة التردد اللي فيك دا مش لصالحك انت مش قليل لازم تآمن بنفسك وبقدراتك 

عمر ابتسم لها وافتكر كلامها ليه وهو صغير فبصلها بحنين وهز راسه 

طلعت بتول من شنطتها كارت وقالت 

اعطيهم الكارت دا هيشغلوك علطول بالتوفيق يا ابني 

قالتها ومشيت وعمر تنح ف مكانه 

امي قالتلي يا ابني انا قابلت امي اخيرا امي الحمد لله بخير وبصحة وعافية واخيرا بعد عشرين سنة امي قابلتها انا مش مصدق نفسي يااه يا ما انت كريم يارب 

حارس الامن خرجه من حالته دي لما قال 

انت يا اخينا شوف جاي ولا رايح مينفعش تقف كدا ف الطريق اتحرك 

عمر 

لا لا انا داخل انا داخل 

ودخل جوة وقدم اوراقه والكارت اللي عطيته ليه بتول فتم قبوله فورا ومسك شغله كمهندس في قسم عالي كمان لان اللي موصي عليه مديرة الشركة بنفسها  

❈-❈-❈

عمر رجع بيته وهو جواه فرحة وسعادة مش سايعاه علشان شاف بتول دخل البيت وفضل ينادي على امه وابوه اللي ربوه 

بابا ماما مش هتصدقوا اللي حصل النهاردة انا لازم احكيلكم كل حاجة بالتفصيل الممل 

الاب 

خير يا ابني قول ربنا يبشرك بالخير دايما يارب

عمر بفرحة وهو بيبص على امه 

تصوروا الشركة اللي اتنقلت ليها طلعت شركة مين؟؟؟ طلعت شركة جدي سليم والمديرة اللي هناك هي امي ومش بس كدا انا قابلتها شوفتها بعيني وقربت منها دا كان حلم غالي وحققته مش متخيلين كمية سعادتي قد ايه 

الام 

وهي عملت ايه لما شافتك قدرت تتعرف عليك اقتنعوا انك ابنهم طمني يا عمر 

عمر 

لا طبعا انا قولتك ان امي مش هتعرف انا مين انا بس بشوفها من بعدين لبعيد 

فجأة اتغيرت ملامح وشه وقال بحزن 

امي مش لازم تعرف إني موجود انا نا صدقت انها تتأقلم على حياتها وتعيش سعيدة لا مش لازم تعرف انا هفضل اتابعها من بعيد لبعيد رغم اني كان نفسي اخدها في حضني واطبطب عليها اوي واقولها عمر رجع يا بتول عمر مش هيسيبك تاني لكن للاسف مش هينفع مش هينفع عن اذنكم 

قالها وحس بالخنقة ودخل ع اوضته وهو بتحسر ع حاله 

الام 

لا حول ولا قوة إلا بالله عيني عليك يا ابني بختك قليل علطول كدا بنحلم توصل لأهلك الحقيقين ويوم ما ربنا يكرمك وترجعلك الذاكرة وتلاقي اهلك انت اللي ترفض انهم يعرفوا وتفضل تراقبهم وتبص عليهم من بعيد وانت مقيد ومتحسر على حالك 

الاب 

نفسي اعرف هو ليه مش عايز يقولهم ليه يعذب نفسه كدا 

الام 

فيه حاجة عمر مخبيها علينا حاجة بتوجعه مش عايز يقولها يا حبة عيني 

الاب 

واحنا هنقعد نتفرج عليه وهو بيتعذب كدا لا لا احنا لازم نتصرف ونساعده عمر طول عمره من وهو صغير وهو شايلنا اه دي الحقيقة مش احنا اللي شلناه الولد طول عمره شايل المسؤلية وبيساعدنا علطول يمكن جه الوقت اننا نساعده علشان نرجعه لأهله ونرجع البسمة لقلبه.. زي ما انتي سامعة اهله ناس واصلين ليه نسيبه يفضل عايش ف الفقر خايف يفكر ف الجواز لانه قليل الحيلة معهوش اللس يغديه بكرة

 مراته مسكت ايده وقالت بحماس 

ايوا بالله عليك يا حج ناجي اعمل حاجة اتصرف ساعد عمر الغلبان اللي فرحته ناقصة بالله عليك حتى لو هيبعد عننا حتى لو هيمشي ويسيبنا المهم يرجع لأمه بتول

ناجي 

ان شاء الله هتصرف عمر راجع بالليل للسكن هحاول اعرف منه المكان كأني بسأل عليه وعلى احواله هناك وان شاء الله ربك ييسر واوصلهم 

❈-❈-❈

تاني يوم عمر كان ف شغله مش عارف يركز منامش طول الليل من الحزن وف نفس الوقت مشافش امه النهاردة ومش عارف يلاقي فرصة يقابلها فكان هيتجنن 

لما جاله المشرف عليه عمر قال بعيون زايغة 

اا ممكن اروح اوري التصاميم دي للمديرة بدالك اا يعني شايفك لسه هتكمل جولتك الاشرافية ايه رايك 

المشرف هز دماغه 

تمام امسك المديرة عايزة تطلع ع الملف دا اعطيهم ليها الاتنين وشوف هتقول ايه وتعالى بلغني لو حصل اي خطأ او الملفات دي جرالها حاجة هتترفد مفهوم 

عمر بفرحة 

مفهوم مفهوم متقلقش 

وجري بسرعة وحماس ع مكتب امه بتول اللي هو عرف مكانه وحفظه عن ظهر قلب

وهو ماشي شاف ربا لكنه معلقش لكن ربا استوقفته 

ااا لو سمعت اا انا اسفا بس اا هو انت حضرتك الباشمهندس اللي قابلته ف كلية هندسة من سنة تقريبا؟؟ 

عمر ضيق عينه وحاول يفتكرها وبعدها قال 

اه صح افتكرتك انتي كنتي لسه طالبة ف سنة اولى ااامم كان اسمك ربا تقريبا 

ربا 

حضرتك بتمتلك ذاكرة قوية فعلا ايوا انا هيا 

عمر 

اممم شايف انك طالبة مجتهدة بتشتغلي هنا ولا لسه متدربة انتي ليكي حد قريبك ف الشركة ؟؟ 

ربا 

اه مدام بتول المديرة 

عمر عينه لمعت بمجرد ما سمع اسم امه فقال ف نفسه 

هي تقرب لبتول يعني قريبتي انا اكيد مش هكون عارفها يااه يا بتول اشمعنى هي تكون قريبة منك وانا لأ 

عمر 

احكيلي عن المديرة تعرفي عنها ايه 

ربا 

من الواضح انك لسه موظف جديد هنا بس كل اللي عايزاك تعرفه ان المديرة طيبة جدا جدا لابعد حد لو احتاجت لاي حاجة متترددش ف انك تطلب منها مش هترفض ابدا 

عمر ف نفسه 

ياه يا تولا طول عمرك قلبك كبير يا حبيبتي ربنا يخليكي ليا يا روح قلبي 

ربا لاحظت الدموع ف عنيه فاستغرب 

اا باشمهندس حضرتك كويس الظاهر انك تعبان 

عمر 

اا جاي من سفر بس ومنمتش جيت ع هنا علطول 

ربا 

الله يعينك يا باشمهندس خلاص البريك قرب ياريت تستغله وترتاح فرصة سعيدة حضرتك عن اذنك 

عمر اخد نفس عميق وطلعه بهم 

وبعدين افتكر انه رايح لبتول فطلع يجري على الاسانسير فاكتشف ان ربا فيه فقال 

انا اسف اتفضلي اطلعي وانا هطلبه بعدك 

وبالفعل وصلت بتول قبل عمر لمكتب بتول 

ربا بابتسامة 

صباح الخير حضرتك عاملة ايه النهاردة

بتول ابتسمت 

تعالي يا رورو صباح الهنا ها نمتي كويس ؟؟

ربا بامتنان

اول مرة في حياتي انام قريرة العين كدا.. انام وانا مش شايلة هم بكرة مش حزينة ولا حاسة اني موجوعة ولا مكسورة علشان لقيت العيلة لقيت السند اللي بحلم بيه.. صحيح مش اهلي الحقيقين لكنك غنتيني عن العالم كله 

بتول قامت حضنتها 

يا روح قلبي انتي .. تعرفي انا نفس اجيبك القصر معايا لكن للاسف مش كل اللي فيه هيتقبلوا دا علشان كدا بعت ليكي أكتر حد بثق فيها علشان تقعد معاكي وتهتم بيكي كأنها انا بالظبط دادا اعتماد 

ربا 

انا مقدرة فعلا وكمان انا غريبة مش هيتحملوا وجودي دا اهلي متحملوش

بتول 

مش عايزاكي تقولي غريبة تاني يا ربا اتفقنا 

ربا بابتسامة 

اتفقنا حضرتك كل عيلتي ومليتي عليا حياتي 

هنا جت السكرتيره وقالت 

فيه مهندس جايب الملفات وعايز يقابل حضرتك يا فندم 

بتول كانت واقفة لسه وحاضنة ربا فقالت 

دخليه 

ربا 

اا طيب استأذن انا علشان تشوفي شغلك انا بس جيت اسلم عليكي 

بتول 

استني خليكي عايزاكي 

ربا 

حاضر 

دخل عمر وعينه بتدور ف كل مكان على امه واول ما شافها عينه لمعت وحس بالغيرة من بتول ليه هي قريبة من امه وهو مش عارف حتى يقول اسمها 

فضل متنح فيهم من غير ما يتكلم 

بتول كانت حاسة باحساس مريح بالنسبة ليه حبته وارتاحت لوجوده ف شركتها فقالت بابتسامة صافية 

انت كل لما تشوفني بتسرح ليه اومال لو مكنتش عجوزة يعني 

عمر وهو مش منتبه

بعيد الشر عنك انتي طول عمرك جميلة ومازلتي جميلة 

بتول باستغراب 

انت تعرفني قبل كدا؟

عمر تدارك نفسه وقال بتوتر 

اا اقصد اني سمعت عنك كتير وعن طيبة قلبك وسمعتك الجميلة اللي سابقاكي ف كل مكان من قبل ما تروحيه 

بتول 

الله يعزك يا ابني هات الملفات اشوفها 

عمر عطاهالها وعينه متشالتش من عليها وقلبه كان بيرقص علشان بتقوله يا ابني 

بتول 

اتفضل اقعد واقف ليه اقعدي يا ربا 

عمر قعد وفضل مركز في كل تفصيله في وش امه بيقاوم رغبته ف انه ميجريش عليها ياخدها في حضنه 

بتول 

ربا خدي الملف دا ترجميه وابعتيه فاكس للرقم اللي عندك دا ولو جالك الرد بلغيني فورا

ربا قامت من مكانها وخرجت برا عند علشان تروح مكتبها 

بتول وهي بتتصفح بقية الورق 

اممم تمام يا باشمهندس تقدر تشتغل عليه وريني التصميم المبدئي وع اساسه هقولك كمل او لأ 

عمر هز دماغه من غير كلام لأنه حاسس ان لسانه انقعد مش عارف يتكلم ولا يطلع صوت حتى 

عمر قام يقف فقالت بتول 

انت لو تعبان يا باشمهندس تقدر تاخد إذن وتمشي ولو المشرف موافقش تعالى انا بنفسي همضي ع الإذن ليك الف سلامة عليك 

عمر اخد نفس طويل وخرجه بهم مش عايز يمشي مش عايز يسيبها بس مش عارف يفضل بأي حجة بخرج وهو بيجر رجليه بأسى وحسرة 

اما بتول فكانت مستغرباه حاسة فيه حاجة غريبة بس مش قادرة تفهمها 

وعدى كم يوم وعمر حالته النفسية بتسوء لدرجة انه بقا يتخنق يكلم أهله علشان اللي ف قلبه ميتفضحش ويبان انه ضعيف قدامهم اكتر مما هو عليه 

لكنهم كانوا حاسين بيه فقرر ناجي انه خلاص مش هيسكت فقال 

انا هسافر اروح الشركة لأم عمر واحكيلها ع كل حاجة انا مش فاهم عمر مش عايز يقولهم ليه 

الام 

روح يا حج ربنا يسلملك طريقك روح قولهم يمكن قلب عمر يرتاح ربنا يريح قلبه ويصلح ما بينه وبين أهله 

وبالفعل اخد ناجي اكتر من مواصلة علشان يوصل الشركة خرج من الصبح بدري لحد ما وصل ع الساعة ١١ 

وف الشركة كان بيسال السيكيورتي برا 

لو سمحت من دي شركة بتول هانم؟؟ 

في الوقت دا فتون كانت لسه داخلة الشركة فسمعت اسم بتول فوقف تسمع هيقول ايه 

السيكيورتي 

ايوا عايز ايه؟؟ 

ناجي 

انا محتاج اكلمها ضروري ارجوك وصلني بيها 

السيكيورتي 

الهانم مش فاضية تقابل كل حد عايز يقابلها ولو كنت عايز تقابلها لازم بمعاد مسبق او توصية 

ناجي 

ايوا بس انا مش معايا اي حاجة من دي انا جاي من محافظة تانية وبعيد عن هنا مهقدرش اجي وارجع تاني ف وقت تاني بالله عليك يا ابني خليني اقابلها 

السيكيورتي 

مش هينفع يا حج ما انا قولتلك هنا فيه نظام 

ناجي كان هيرجع بخيبة لانه زعلان انه مقدرش يقابل بتوع لكنه رجع تاني على اخر لحظة وقال 

اا طيب ممكن تقولها اني اعرف مكان ابنها عمر؟؟ 

السيكيورتي 

ياما جالنا ناس كتير بتدعي الكلام دا وكله بيطلع محتال في الاخر روح يا حج انت مش حمل بهدلة 

ناجي

صدقني يا ابني انا اعرف عمر ابنها دا انا اللي مربيه بالله عليك خليني اقابلها 

فتون اول ما سمعت كدا كانت هتتجنن 

معقول معقول الراجل دا يعرف عمر ابن بتول بجد معقولة هو اللي مربيه زي ما بيقول لا لا استحالة عمر يرجع لأمه استحالة بتول ترتاح استحالة 

قالتها وقربت من ناجي وقالت 

لو عايز تقابل بتول تعالى معايا  

وبالفعل راح معاها ناجي وهو فرحان انه هيقابل بتول 

في الوقت دا ربا كانت خلصت ترجمة الملف ورايحة علشان تصوره ف الماكينة المخصصة لدا 

لكن لفت انتباهها اسم بتول فوقفت لحظة 

فتون 

ايوا يا حج اتكلم انا ابقى مرات اخو بتول انت قولت انك تعرف مكان عمر ابنها 

ربا لما سمعت دا مكانتش مصدقة نفسها معقول اخيرا لقوا عمر ابن ماما بتول!!! 

فوقفت علشان تعرف الموضوع اكتر 

ناجي 

ايوا يا هانم انا اللي مربيه من وهو صغير كان فاقد الذاكرة ولسه راجعاله قريب وقدر يتعرف ع امه بتول لكنه لسه مقالهاش هو مين ع فكرة هو شغال هنا ف الشركة معاكم بقاله اسبوع بس مهندس الكترونيات اسمه عمر ناجي سميته ع اسمي اختارنا ليه الاسم دا لانه مكانش معروف اهله وبدل ما يروح دار ايتام ربيته انا كأنه ابني 

فتون بصتله بغيظ لكنها اخفت دا

اه اه كتر خيرك يا حج احنا اكيد ممتنين ليك واول ما بتول تعرف هتفرح اوي اتفضل سيب عنوانك وهنكلمك مع السلامه يا حج وشكرا ليك 

ناجي مشي وهو فرحان انه قدر يعرفهم مين ابنهم 

ربا مكانتش مرتاحة 

هي ليه مأخدتوش لبتول ليه مشته كدا ليه الهدوء اللي هي فيه دا ولسه هتتحرك من مكانها علشان تلحق الحج ناجي لكنها اتصدمت ووقفت مكانها لما سمعت فتون بتكلم سراج ف الفون وهي بتقول 

عمر ابن بتول ظهر يا سراج الواد دا لازم نخلص منه قبل ما تعرف مين هو انا قدرت اسحب الراجل ف الكلام وامشيه قبل ما يقابل بتول اتصرف واتخلص منه اسمه عمر ناجي في قسم الالكترونيات بسرعة يا سراج والا كل اللي بنيناه طول السنين دي هيتهد في لحظة 

ربا عنيها برقت من هول ما تسمع 

معقول معقول فيه ناس بتكره ماما بتول الست الطيبة اللي بتساعد كل الناس 

اتحركت من مكانها بسرعة أشبه للجري ووصلت ع مكتب بتول وهي بتنهج 

ماما بتول ماما بتول انا لازم ادخلها حالا ودخلت بسرعا من قبل ما تسمح لها السكرتيرة بدا 

شافت بتول الخضة ع وشها ودخولها المفاجىء فقالت بهدوء 

ربا فيكي ايه فيه حد خوفك اتكلمي 

ربا بصوت مبحوح 

عمر .. عمر ابن حضرتك هيقتلوه 

بتول قامت وقفت بصدمة وقلبها كان هيقف

بتقولي ايه يا ربا.. عمر ابني ؟؟ انتي تعرفيه اتكلمي بسرعا ومين اللي هيقتله عمر عمر ابني فين 

ربا بلعت ريقها وهي بتمسك ايد بتول 

عمر عمر ناجي هو ابن حضرتك انا سمعت الراجل اللي مربيه بنفسي ومدام فتون كلمت حد وقالت يتخلص منه قبل ما تعرفي 

هنا بتول كانت هتقع من طولها من شدة خوفها ع ابنها وقلبها اللي كان هيقف من فرط حماسها وانفطار قلبها ع ابنها ف نفس الوقت

فجريت مع ربا هو فين هو فين ابني 

ربا تعالي هنسأل عليه ف قسم الالكترونيات هناك هنسأل عن عمر ناجي بس بسرعة قبل ما يوصلوا ليه 

بتول اتوقفت لحظة

الكترونيات ؟؟ هو هو عمر ابني عمر طول عمره بيحب الالكترويات وكان بيقولي انه هيطلع مهندس الكترونيات لما يكبر هو هو عمر يا حبيبي يا عمر لاااا لااا فتون هتقتله لا طول عمرها بتكرهني بسرعة يا ربا .

ربا بقت تسند بتول اللي مش قادرة تتلم ع اعصابها لحد ما وصلوا للمكان المطلوب وهنا بتول حست بالخطر ع ابنها وقلبها كان هيقف فصرخت صرخة باسمه 

عمممممرررررر 

في الوقت دا اللي كان مكلف بقتل عمر كان وصل وبيدور عليه 

عمر كان واقف ع مكنة متعطلة مطلوب منه يصلحها ... كان مشغل اللاب اللي معاه وبيفحصها 

فجأة سمع صوت صرخة حد مش ممكن يتوه عنها ابدا فاتحرك من مكانه وقال لزميله 

خليك هنا انا راجع حالا السيتسم بيحمل مش هتأخر سيبه يحمل لحد ما ارجع 

وجري بسرعة يتطمن ع امه  

وصل القاتل المكان اللي المفروض عمر شغال فيه واول ما شاف واحد قاعد ووشه للاب راح بسرعة غرز السلاح الابيض في رقبته فمات ف الحال 

وبعدها هرب بسرعا من قبل ما حد يتعرف عليه 

اما فتون فكانت راحت عند كاميرات المراقبة وبتطلب من الموظف المسؤول انه يخرج 

ولما دخلت وفتحت ع المكان المطلوب شافت القاتل اللي بعتته بيقتل عمر ففرحت وابتسمت بتفشي وحذفت المشهد دا من كاميرات المراقبة وخرجت وهي بتحظر الموظف 

لو قولت اني دخلت هنا يبقى ملكش شغل هنا ولا ف اي مكان تاني مفهوم 

الموظف ولأنه عارفها كويس هز راسه وقعد مكانه من غير ولا كلمة 

اما عند بتول 

فراحت ع مكان عمر بعد ما سألت عليه ولما لقت الموظفين ملمومين وبعدها سمعوا صراخ واحدة من الموظفات اول ما شافوا الدم 

روحها كانت هتطلع من مكانها 

ووقعت من طولها وههي بتبكي بكاء عمرها ما بكته قبل كدا 

عمر عمر لااا بستناه بقالي سنين ويوم ما اعرف هو مين يموت لاااا عمر قالتها واغمى عليها

بصرخت بتول باسمها بخوف عليها الشركة كلها اتقلبت رأس ع عقب وحصل هرجلة ف كل مكان 

عمر مبقاش عارف يوصل لصوت امه وفضل يلف حوالين نفسه انا متاكد اني سمعت صوتها انا بتوهم ولا ايه 

ولما رجع القسم اللي شغال فيه شاف الكل متجمع ولما سأل 

هو فيه ايه يا جماعه ملمومين كدا ليه 

واحد من الموظفين 

فيه جريمة قتل حصلت والشرطة جاية حالا 

عمر بصدمة ايه ازاي دا حصل ومين اللي اتقتل؟؟ 

الموظف

 تقريبا كدا المديرة بتول 

عمر بفزع 

ايه لا امي... امي 

قالها وجري بسرعة بقا يتخطى الجمع كله ويزقهم علشان يعدي لحد ما وصل لقاها واقعة ع الارض وربا بتحاول تفوقها 

فبلع ريقه بخوف ورعب عليها 

امي بتول بتول... جرالك ايه.. انا اسف وعدتك اني احميكي بس مقدرتش اعمل دا.. بتول 

ربا بصدمة 

ااا انت عمر ابن ماما بتول؟؟؟ 

عمر ببكا 

قولي انا لسه عايشة انها مماتتش انا لسه مأخدتهاش في حضني لسه مفرحتهاش 

ربا 

لا الحمد لله هي مغمى عليها بس الحمد لله انك عايش يا عمر 

هنا صرخت فرحة خرجت من عمر عبر فيها عن كل وجعه وفرحته وشال امه 

بسرعة ع المستشفى 

بصتله ربا وهي فرحانة 

لكن فجأة ساد الصمت في مكان وجه سليم المالك الأكبر للشركة فكله وسع ليه المكان وورا سليم الاسعاف اللي بسرعة اخدت الموظف اللي اكد الكل انه مات ف الحال

سليم بغضب 

ايه اللي بيحصل هنا ومين اللي يتجرأ يقتل في شركتي ابواب الشركة اتقفلت محدش هيخرج ولا هيدخل من هنا الا بعد ما يتم التحقيق معاه علشان نشوف مين الفاعل حتىاو هتروحوا الفجر محدش ماشي

ولما أتطمن ان الاسعاف اخد المهندس اللي مات بص ع بتول وقال لربا 

تعبت من منظر الدم مش كدا بتول طول عمرها رقيقة 

وامر بنقلها للاسعاف 

فعمر اضطر يحطها في الترولي والاسعاف شالها وداها لجوة العربية وربا ركبت معاها هي وسليم 

عمر جه يركب 

سليم شاورله 

انت جاي تركب بصفتك ايه دورك خلص لحد كدا 

ربا 

اا سليم بيه دا ع...

عمر شاورلها انها متقولش حاجة 

فبصتله باستغراب 

لكنه همس لها ارجوكي خدي بالك منها 

هزت دماغها بمعنى انها مش فاهمة حاجة ليه مش عايز يقول هو مين 

فبصلها عمر وبعد واختفى وسط الجمع 

وسليم امر العربية بالتحرك 

عمر اخد جنب وفضل يعيط بخوف ع امه تعبانة ومش عارف يقربلها خايف من جده سليم 

بعد ساعات قدر امن الشركة انه يمسك القاتل ومحاولته انه يهرب بمساعدة رجال الشرطة ومع الضغط عليه بوسائل رجال الشرطة اعترف ع اللي طلب منه يعمل دا وبعد التحقيق تم التأكد انه بأمر من سراج فتم القبض عليه من داخل القصر 

اما عند بتول ف المستشفى 

سليم بيقول للدكتور 

خير يادكتور هي مبتفوقش ليه بقالها اكتر من خمس ساعات ولسه مغمى عليها 

الدكتور 

للاسف مدام بتول اتعرضت لصدمة عصبية ونفسية شديدة جداً ودخلت في شبه غيبوبة محدش عارف هتفوق منها امتا 

ربا كانت بتعيط زعلانة ع بتول وبتتحسر ع حالها وقت ما تلاقي حد يحن عليها تتعب وتدخل ف غيبوبة ومتعرفش هتفوق امتا 

اما عند عمر بعد ما تم التحقيق معاه وانه نعيد عن الشبهات تماما خرجوه وعمر كانت حالته النفسية صعبة جدا لانه مش عارف يتطمن ع امه فركب المواصلات ورجع لأهله اللي ربوه 

ناجي كان بيحاول هو ومراته انهم يتأقلموا على بعد عمر عنهم وانه خلاص لقا أهله 

لكنهم اتفاجئوا بيه في وشهم لكنه دخل البيت من غير ما يبص ف وش حد ولا يكلم حد ودخل اوضته وقفل عليه من جوا 

امه بصت لناجي باستغراب 

هو فيه ايه وايه اللي رجع عمر دلوقتي بعدين انت مش بلغت أهله بالحقيقة ؟؟؟ 

ناجي 

عملت كدا فعلا لكن معرفش ايه اللي حصل .. عمر حصله ايه اول مرة يرجع من غير ما يسلم علينا سلم يارب

❈-❈-❈

سليم كان هيتجنن ع بنته فقرب من ربا اللي كانت بتعيط جنب بتول 

ربا انتي كنتي معاها وقت ما الجريمة مش كدا احكي يا بنتي ايه اللي حصل .. اللي قتل كان ناوي يقتل بنتي علشان كدا دخلت في الصدمة دي 

افتكرت ربا انها لو قالت لعمر يجي لأمه ممكن تفوق فبصت لسليم بخوف لان عمر مش عاوزه يعرف فقالت بصوت متلجلج

لا لا مم معرفش حاجة اا انا تعبت عن اذنك هروح ارتاح واجي اطمن عليها بعدين 

قالها ورجعت ع الشركة وحاولت تدخل الشركة لكنها معرفتش تعمل دا بسبب الشرطة اللي محاوطة المكان 

لكنها قالت 

سليم بيه اللي باعتني اجيب ملفات مهمة لانه مشغول مع مدام بتول ف المستشفى 

وطلعت الكرات اللي سليم كان عاطيه ليها فوافقوا يدخلوها 

ودخلت بسرعة راحت قسم الموارد البشرية وفضلت تدور ع اسم عمر ناجي ع الكمبيوتر تحت إشراف الموظف المسؤل اللي لحسن حظها كان لسه بيتم التحقيق معاه ومخرجش من الشركة 

لحد ما لقت كل حاجة عن عمر وعنوانه ورقم فونه 

صورت بالموبايل كل معلومة عايزاها وخرجت بعد ما شكرت الموظف

شكرا سليم بيه اللي باعتني وتقدر تتأكد منه بكرة لما يفوق ونطمن ع مدام بتول 

وخرجت بسرعة من الشركة وراحت ع عربيتها وطلبت من السواق يطلع المستشفى 

وف الطريق اتصلت بعمر لكن مفيش رد اتصلت اكتر من مرة  

واخيرا عمر انتبه للفون ورد 

الو مين 

ربا فرحت انه رد 

باشمهندس عمر ناجي معايا 

عمر 

ايوا مين 

ربا 

انا ربا يا باشمهندس فاكرني ؟؟ 

عمر قام اتعدل وقال بسرعة 

قريبة بتول؟؟ طمنيني بالله عليكي هي كويسة فاقت؟؟؟ هي عاملة ايه دلوقتي اتكلمي 

ربا 

مش هخبي عليهك طنط بتول حالتها صعبة جدا وداخلة ف غيبوبة ومن وقتها مش بتفوق

عمر نط من مكانه بفزع ايه؟؟؟ بتول.. اا انتوا فين ف مستشفى ايه انا لازم اجي اشوفها بالله عليكي خليكي معاها لحد ما اجي واسمحيلهم اني ادخلها 

ربا 

هستنى حضرتك لاني لازم اتكلم معاك العنوان مستشفى النيل تعرفها 

عمر 

اعرفها اعرفها هاخد عربية مخصوص وجاي 

وبعد حوالي ساعة تقريبا كانت ربا منتظرة عمر تحت في استقبال المستشفى 

ولما وصل عمر رن عليها 

الوا ايوا باشمهندسة انا تحت عند البوابة 

ربا 

طيب تمام انا جايالك حالا 

وبالفعل دورت عليه لحد ما لقته حاله مبهدل ووشه باين عليه الزعر وبيقول 

بتول طمنيني عليها خديني ليها بسرعة 

ربا 

معلش الاول ممكن افهم ليه مش عايز حد يعرف انك عمر ابنها.. طنط بتول دورت عليك كتير طول السنين اللي فاتت بتدور عليه معقول مش عايز ترجع لأهلك 

عمر 

مينفعش مينفعش ارجع بس لازم اشوف بتول دخليني ليها انتي متعرفيش حاجة 

ربا 

طنط بتول محتاجاك هي جرالها كدا من خوفها عليك احنا فكرنا انك اللي اتقتلت علشان كدا وقعت مغمى عليها

عمر 

ايه بتول عرفت انا مين .. ليه مين قالها 

ربا 

عرفنا كل حاجة وناس بيكرهوكم عرفوا وهما اللي دبروا لقتلك يا باشمهندس واللي راح ضحيتها مهندس تاني 

عمر بصدمة تاني 

انا؟؟ عايزين يقتلوني انا... شوفتي اني مينفعش اظهر تاني ف الصورة لا انا همشي بتول خدي بالك منها قولي لها اني عايش وبسلم عليها لكني همشي مش هفضل ثانية واحدة مش هعرضها للخطر تاني 

ربا حاولت تمنعه مينفعش تسيب الست اللي غيرت حياتها للاحسن بتعاني كدا فقالت 

استنى بس يا باشمهندس بالله عليك مينفعش تسيبها ف أزمتها كدا وتمشي الحل ف ايدك انت.. انت لو جيت معايا ودخلت ليها وكلمتها وعرفت انك عايش وسمعت صوتك وحست بوجودك هتفوق ولما تفوق اعمل اللي تعمله مش همنعك المهم تفوقها ارجوك 

عمر مقدرش يمشي ويسيب امه في الحالة دي فوافق ع اقتراح ربا 

وطلع معاها على فوق 

ربا 

ااا اسمع انت مش هينفع تدخل معايا كدا لان سليم بيه هناك مش بيسيبها وطبعا هيسأل انت مين فأنا هحاول استلف ليك بلطوا ابيض تلبسوا ع اساس انك دكتور وكدا 

عمر 

ماشي اعملي اي حاجة المهم ادخل لها او ممكن تلهي سليم بيه لحد ما ادخل 

ربا 

لا خد البالطوا البسوا للٱحتياط يلا تعالى معايا 

وبالفعل راحت ربا واترجت واحدة من الدكاترة وقالت ان عمر ابن مدام بتول وعايز يدخلها بس مش عايز جده يعرف لأسباب خاصة بيهم هما 

فتفهمت الدكتورة الوضع وعطتها البالطو 

وربا اخدته وعطته لعمر يلبسوا 

ودخلوا بيه لأوضة بتول 

سليم كان قاعد برا بحزن ع بنته اللي مش عارف ليه حصلها كدا من مجرد حادثة ليه تدخل ف صدمة كان زعلان علشان دي بنته الوحيدة اللي بتحبه وبتخاف ع زعله ومصلحته بتحبه من غير اي طمع زي اخواتها 

واول ما شاف ربا قال 

انتي رجعتي يا بنتي 

ربا 

طبعا مقدرش امشي واسيب ماما ربا تعبانة ربنا يقومها بالسلامه يارب اا من فضلك ممكن ادخل مع الدكتور علشان يشوفها انا سمعت ان الدكتور دا ممتاز جدا علشان كدا جبته بنفسي 

سليم مكانش فايق انه يحقق ف الدكتور ولا يسأل تفاصيل عنه كان عامل زي الغريق اللي اتعلق ف قشاية علشان ينقذ حياة بنته 

دخليه دخليه بسرعة وخليكي معاه 

عمر دخل بسرعة وشوق لبتول 

جري عليها وحضنها باشتياق لا يمكن وصفه بالكلمات 

ربا قفلت الباب وفضلت واقفة مكانها تتابع من بعيد 

عمر فضل يبوس ايدين امه 

بتول امي حبيبتي جرالك ايه انا اهو عمر ابنك جيتلك والله ماتخافيش انا مجراليش حاجة قومي يا بتول متوجعيش قلبي عليكي كفايا اللي فيا كفاية اني شافك قدامي طول الوقت ومش عارف اقرب منك مش عارف اقولك انا اهو يا ماما انا ابنك اللي بتدوري عليه من سنين ابنك اللي ملهوف لحضنك ومشتاق وبيكافح علشان ميتكشفش كل لما اشوفك بحس بنار بتاكل ف جسمي واني مقيد النار بتحرقني ومش عارف اتحرك اقرب منك... بتول بالله عليكي اسمعيني مش هتحمل يجرالك حاجة هحمل نفسي المسؤلية سامحيني يا بتول وعدتك اني احميكي وموفيتش بوعدي انا اسف 

فضل يكلم فيها كتير لكن مفيش اي استجابة 

عمر بدأ يهزر بيها ويبكي 

فوقي بقا متوجعيش قلبي يا بتول تولا انا عمر عمر رجعلك يا تولا 

وبعد شوية مفيش اي استجابة من بتول اتنهد عمر بأسى وهو بيبص لربا بيأس 

لكنه اتسمر مكانه لما لقا ايد بتتمد وبتمسك فيه بكل قوتها رغم ضعفها 

عمر برق مش مصدق ان امه فاقت من الغيبوبة لما سمعت صوته 

فجري عليها واترمى ف حضنها ونسي انه مش عايزها تعرف هي مين ونسي كل العالم لكن فرحته برجوعها للحياة 

نسته كل حاجة 

بتول اتكلمت بضغف

عمر عمر ابني انت كويس مموتش اا انت رجعتلي يا عمر عمر حبيبي

عمر مسك وشها بين ايديه 

رجعت رجعت يا تولا انا اهو قدامك يا عمر 

بتول بكت في موقف مؤثر ابكت ربا اللي كانت بتابعهم وكانت بتتمنى لقاء حار زي دا من اهلها 

بتول 

ابني حبيبي ونور عيني انت عمر انا كنت حاسة بشعور غريب ناحيتك يا حبيبي.. بصاتك ليا مكانتش طبيعية خوفت اصدق حدسي واتعشم وف الاخر متطلعش انت لكن رغم كدا عمري ما فقدت الامل وكنت متأكدة ان ربنا هيرجعلي ابني مهما طالت الايام والمسافات.. عمر ابني حبيبي رجعلي 

عمر حضنها وهي اخدته في حضنها ومش عايزة تخرجه تاني خايفة يكون حلم جميل او انه يبعد ويسيبها تاني

وفضلوا ع الوضع دا لفترة لحد ما جه الدكتور الحقيقي علشان يفحص بتول 

فعمر بعد عن بتول لكن بتول فضلت ماسكة ايده ومش عايزة تسيبه اما سليم اول ما شاف ان بنته فاقت البسمة رجعت لوشه وقال وهو بيشكر عمر 

الحمد لله برافو عليك يا دكتور انت عملت معجزة انت رديت ليا الروح من تاني 

بتول جت ترد بفرحة 

عمر ضغط ع ايديها وبصلها وهو بيهز راسه فسكتت 

الدكتور 

عال عال الحمد لله .. اتطمنا ع حضرتك.. محتاجة بس شوية راحة وتبقى زي الفل ... المهدىء دا هيريحها لكم ساعة وهتفوق بعدها في احسن حال وتقدر تروح معاكم كمان يا سليم بيه 

عمر بانزعاج

ليه نيمتها ما كانت صاحية 

الدكتور 

القلب يا دكتور لسه مجهد محتاج راحة والظاهر أن حالتها النفسية بقت كويسة فالراحة هتعزز النفسية اكتر وتفوق كويسة 

عمر هز دماغه واستأذن وخرج

فربا مشيت وراه بسرعا 

اما سليم ففضل مع ربا قاعد ع الكرسي جنبها

ربا لعمر

باشمهندس عمر انت هتمشي بجد هتسيب والدتك ؟؟ خليك معاها شايف روحها اتردت ليها ازاي من فضلك هي محتاجاك في الوقت دا اكتر من اي وقت 

عمر طلع الصوت بصعوبة لانه زعلان انه هيمشي 

انا عارف انك بتحبيها ودا باين اوي من لهفتك عليها علشان كدا انا هسيبها في رعايتك مش هوصيكي عليها ارجوكي خدي بالك منها علشان خاطري 

ربا 

انت هتروح فين دلوقتي اللي فهمته انك هتمشي 

عمر

مش عارف رايح فين ارض الله واسعة عن اذنك 

قالها وساب ربا ومشي 

ربا اتنهدت بهم وفضلت قاعدة برا علشان اتحرجت من سليم اللي قاعد مع بتول جوا 

وبعد كم ساعة فاقت بتول وفضلت تدور بعنيها على عمر في كل مكان ف الاوضة لكنها ملقتوش 

عمر عمر ابني هو فين 

سليم انتبه لبنته 

حمدا لله على السلامه يا بنتي الف سلامة عليكي يا حبيبتي 

بتول لسه بتدور ع عمر بعيون زايغة

عمر ابني راح فين يا بابا

سليم بصلها بأسى 

ايه اللي فكرك بس بعمر دلوقتي ان شاء الله هنلاقيه في اقرب وقت فيه اخبار حلوة بخصوصه بس انا مردتش اقوله الا لما نلاقيه علشان متتعشميش 

بتول بدموع

انا لقيت عمر ابني فعلا يا بابا عمر كان هنا وكلمني عمر رجعلي يا بابا انا شوفته بعيني ولمسته بإيده كنت ماسكة ايده وحضنته يا بابا واخيرا حضنت ابني بين ايديا 

سليم بتأثر دموعه نزلت هو كمان 

ان شاء الله نلاقيه ف اقرب وقت وتاخديه ف حضنك يا بنتي اتمسكي بالأمل اوعي تفقديه اوعدك هنلاقي عمر الاخبار انه الحمد لله عايش 

بتول 

يا بابا عمر كان هنا انا فوقت لقيته قدامي انا ربا قالتلي ان الناس اللي ربوه جم وقالوا انه شغال معانا ف الشركة وابنك وفتون حاولوا يقتلوه علشان ابني ميرجعليش فأنا اغمى عليا لما فكرت ابني مات بس الحمد لله عمر عايش واللي اتقتل للاسف مهندس تاني عمر جالي هنا المستشفى وكلمته وكلمني يا بابا 

سليم استغرب من الكلام اللي سمعه من بتول 

الكلام اللي بتقوليه دا صحيح يا بتول؟؟ 

بتول 

ربا فين اسأل ربا هي كانت شاهدة وديت عمر ابني فين يا بابا 

سليم راح نادى ع ربا 

ربا تعالي من فضلك 

ولما دخلت ربا ابتسمت بتوتر 

حمدا لله على سلامتك يا حبيبتي 

بتول بلهفة 

ربا 

عمر كان معاكي انتي شوفتيه صح انا كلمته وحضنته ومسكته بإيدي مكانتش تهيؤات مش كدا يا ربا اتكلمي 

ربا بصتلها بأسى ومردتش 

بتول بدأت تتكلم بإنفعال

يعني ايه ساكتة ليه ايه معنى سكوتك دا .. عمر كان هنا انا متأكدة انا مكنتش بحلم ولا بتوهم يا ربا اتكلمي 

ربا بصت لسليم بخوف 

فسليم قال

بتول انتي لسه اعصابك تعبانة اوعدك اني هلاقيه وهجيلهولك 

هنا صرخت بتول بأسى 

لا يا بابا عمر ابني موجود مكنش حلم اقسم بالله ما حلم عمر كان هنا ومشي مشي ليه يا ربا اتكلمي انتي فيه حاجة مخبياها عني صح 

ربا اتكلمت وسط دموعها 

انا اسفة والله 

سليم باستغراب 

ربا فيه ايه انتي خايفة تتكلمي ليه انتي تعرفي حاجة 

بتول وهي حاسة بالجنون 

ربا عمر ابني موجود كان هنا ومشي صح قولي صح يا ربا ارجوكي 

ربا اشفقت ع الحالة اللي فيها ربتول وهزت دماغها 

اه

بتول هنا بلعت ريقها وقالت بحماس 

اه ايه عمر كان هنا عمر ابني كان هنا معايا ورجعلي مش كدا؟؟ انتي قولتي اه 

سليم بفرحة 

عمر رجع يا بتول؟؟ 

ربا بخوف 

اه عمر كان هنا بس ااا 

بتول قامت وحاولت تقف ع رجليها 

بس ايه اتكلمي يا ربا بس ايه 

ربا بصت لسليم بأسى 

بس مشي لانه خايف من سليم بيه مش عايزه يعرف بوجوده معرفش ايه السبب وبيسلم على حضرتك كتير وبيقولك خدي بالك من صحتك 

بتول هزت دماغها برفض للي بتقوله ربا 

لا لا عمر مش هيقرر نفس الغلطة وهيمشي ويسيبني تاني انا ما صدقت لقيته لا ازاي دا يحصل ليه سبتيه يمشي يا ربا ليه ممنعتيهوش 

سليم بصدمة 

عمر حفيدي خايف مني ليه!؟ هو اللي اتنكر وقولتي انه الدكتور وجاي يفحصها ؟؟ علشان كدا بتقول فاقت لما شافت عمر؟؟ 

ربا هزت دماغها 

فبتول قالت 

عمر لسه خايف منك يا بابا خايف عليا منك عمر بيظن انه لو رجعلي انت هتطردني من بيتك زي ما حصل زمان عمل للمرة التانية بيضحي علشاني لكن هو دلوقتي مش فاهم الحقيقة مش فاهم أن الوضع اتغير 

سليم هنا بكا بتأثر

انا السبب انا السبب ف ان ابنك يبعد عنك زمان والوقت بيعيد نفسه تاني واهو اتكرر من تاني انا السبب يا بنتي حقك عليا بس والله انا اتراجعت وعرفت غلطتي لكن كان الوقت فات وعمر كان مشي ومنعرفلوش اثر 

ربا اتأثرت باللي سمعته واشفقت عليهم وع الوضع المأزم اللي هي فيه وعرفت انها مش لوحدها بس اللي بتعاني في العالم علشان كدا قالت 

اا انا اعرف مكانه ومعايا رقم تلفونه كمان بس اكيد قفله لكن ممكن نلحقه قبل ما يمشي قبل ما يبعد 

سليم بسرعة قال لربا قوليلي قوليلي عنوانه وانا بنفسي اللي هروح اجيبه المرة دي 

ربا هزت دماغها وقالتله ع العنوان فسليم امر رجالته وراح معاهم ع هناك 

اما بتول فاترمت ف حضن ربا 

يارب يارب يلحقه وميختفيش تاني يا ربا عمر دا عمري وحياتي كلها

ربا طبطبت عليها بحنان 

ان شاء الله هيلحقه وهيرجعلك انا واثقة 

.❈-❈-❈

اما عند عمر فرجع البيت امه قابلته عمر انت كنت فين فجأة مرة واحدة مشيت من غير ما تقول رايح فين ايه اللي بيحصل معاك يا ابني 

عمر قال 

انا قابلت امي بتول يا امي الحمد لله قابلتها وشوفتها اخيرا واتكلمت معاها وعرفت انا مين ريحتها وارتحت اخيرا يا امي 

ردت بفرحة 

طيب الحمد لله يا عمر والله بدعيلك ليل ونهار يا ابني يردك لاهلك 

عمر بأسى 

اشوف وشكم على خير الحج ناجي فين محتاج اسلم عليه 

قالت وهي مفكرة انه هيرجع لأهله

اوعى تنسانا يا عمر ابقى تعالى شقر علينا يا ابني انت هتوحشني اوي 

عمر بحب 

عمري ما هنساكم ابدا ولا هنسى معروفكم معايا بس عايز لو حد سأل عليا قولوا اني مشيت ومتعرفوش حاجة عني خالص وانا هاجي كل فترة اسلم عليكم خلسة 

ردت بعدم فهم 

ليه يا عمر مش فاهمة حاجة انت بتقول كدا ليه انت مش هترجع لاهلك يا ابني؟؟ 

عمر 

لا للاسف موضوع الرجوع دا استحالة يحصل انا ماشي 

ردت بخوف 

عمر انت مخبي عننا ايه

عمر بهم 

بابا الحج ناجي فين محتاج اسلم عليه لاني ماشي وممكن اغيب عنكم كم سنة لحد ما ارجع... انا هروح اجهز حاجتي لحد ما يرجع وأسلم عليه وامشي 

ولما دخل عمر اوضته... امه قعدت برا تعيط وهي مش فاهمة ايه اللي بيحصل مع عمر 

وعلشان عمر كان راجع ع هنا مواصلات فأخد وقت ف الرجوع لمن سليم جاي بعربية خاصة وماشية بسرعة جه وراه بمدة بسيطة 

عمر سمع خبط ع الباب ففكر انه ناجي 

تعالى يا حج ناجي اتفضل انا كنت مستنيك علشان اسلم عليك قبل ما امشي 

سليم اتكلم 

عايز تهرب وتسيب امك تاني يا عمر 

عمر اتصدم من الصوت وبص وراه لقاه جده سليم 

فقال بتوتر

اا جدي!! انت عرفت مكاني منين اا انا والله همشي وهسيب بتول مش هخليها تعرف حاجة عني بس خليها معاك عايشة حياة كريمة بالله عليك متحرمهاش منك هي روحها فيك 

سليم 

وروحها فيك انت كمان يا عمر انت عايز تموتها بحسرتها 

عمر 

انا عايز مصلحتها مش عايزك تكون زعلان منها 

سليم 

انا اسف يا ابني سامحني كل اللي حصل دا بسببي انا جاي علشان اقولك اني فوقت لنفسي وعرفت غلطتي ولما دورت عليك علشان ارجعك انت وبتول زمان اكتشفت انك مشيت لكني كنت عايزك كنت عايز حفيدي كنت عايزة سعادة بنتي وطالما سعادتها معاك كنت هتقبلك وهقبل بيك لكن انت اتسرعت ومشيت والمرة دي بتكرر نفس الغلط وعايز تمشي وتسيبنا عارف احنا كل ساعة وكل دقيقة بندور عليك 

عمر بلع ريقه 

يعني انت متقبلني ف حياتك مع امي 

سليم فتح دراعه طبعا يا عمر انت حفيدي ونور عيني 

عمر بسرعا اترمى ف حضن جده

جده طبطب عليه 

حمدا لله على السلامه يا ابني انت متعرفش ان اعز الولد ولد الولد ولا ايه 

عمر هنا كأنه رجع طفل من اول وجديد وانهارت كل قوى الصمود اللي كان بيدعيها وبكا ف حضن جده

يتبع

إلى حين نشر الفصل الجديد للكاتبة  أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة‏