أساطير نسائية

مبدئيا كده بعتذر لاي حد مش هيعرف ينام النهاردة موضوع النهارده هيناقش مجموعة اساطير ف يلا اعملوا شير عشان غيركم يعرف و عرفوني رأيكم عشان ده بيخليني أكمل قراءه ممتعه

١)أم الدويس:في الخليج العربي عموما و تحديداً دوله الإمارات منتشر بين كبار السن أسطورة أم الدويس..الأسطورة بتحكي عن جنية جميلة جداً بتفتن الرجال و بمجرد تعلقهم بيها و ملاحقتها بتقتلهم أو تأكلهم...و معروف عنها خوفها من الستات...و يقال أن أصل الأسطوره من خيال الستات كمحاوله في إبعاد الرجال عن الوقوع في الزنا...

❈-❈-❈

٢)أم الصبيان:في اليمن و إيران بتنتشر أسطورة أم الصبيان و هي أنثي غول و ليها أرجل بقره بتتنكر في شكل ست جميلة عشان تفتن الرجال و تعرض عليهم الجواز..لو رفضوا ف طبعا مصيرهم معروف بتظهر قبل الفجر..و يقال أن صرخه منها كافيه في انها تسبب الموت أو الجنون..ده غير شكلها البشع اللي لو ظهرته لحد يموت فيها...بعض الأقاويل بتقول أن أم الصبيان جنية..و أقاويل تانيه بتقول انها سعلوة(و دي في البوست الجاي باذن الله) و الشيخ محمد بن شمس الدين أصدر فتوي بأن أم الصبيان ما هي إلا خرافه و ملهاش أصل شرعي.

❈-❈-❈

٣)ذات الفم المشقوق:تخيل تبقي ماشي بليل في أمان الله و ست توقفك و تسألك(انا جميله؟!)...من قواعد الزوق اللي اتربينا عليها بأنك هترد ب أه...بس صدقني الزوق مش هينفعك وقتها خالص

في الفلكلور الياباني في أسطوره ذات الفم المشقوق(كوشيسا كي أونا) بتحكي عن ست عاشت من مئات السنين و بعض الأقاويل بتقول أنها عاشت بالتحديد في حكم سلاله هان...و كانت زوجه لمحارب ساموراي...جميله جداً بس مغروره و خانت جوزها..و مقابل خيانتها ليه شوه وشها (شق فمها بسيفه من الودن للودن)و صرخ فيها ب( من سيظن أنك جميله بعد الأن)...و من هنا اتبنت الاسطوره...في ليالي الشتاء بتظهر ذات الفم المشقوق في شوارع اليابان و هي لابسه كمامه(ف احذروا بقي الايام دي كورونا و كده و كلنا بنلبس كمامات يمكن ذات الفم المشقوق تندس بينا و الا حاجه و اه ذات الفم المشقوق مش مقتصر ظهورها في اليابان بس لا ده ظهرت في كوريا الجنوبيه سنه ٢٠٠٤ و سببت حاله ذعر)الغريب بقي أن من عادات الشعب الياباني في أيام الشتاء أنهم يلبسوا كمامات عشان لو حد عنده انفلونزا مثلا مينقلهاش لغيره..او حد ياخد العدوي من التاني...ف مش غريب أن ست تلبس كمامه و كده...نرجع بقي خلاص انت قررت تراعي مشاعر الست اللي وقفتك و قولتلها اه جميله...وقتها هتقلع الكمامه و تسألك تاني(أنا جميله؟)لو لسه ربنا رايدلك تعيش بعد اللي شوفته..ف طبعا لازم تجاوب عليها...

١) لو قولتلها اه و لسه برضه مراعي زوقك و مشاعرها في هي هتسيبك تمشي لحد بيتك و هناك هتدبحك...او زي ما انت شايفها جميله باللي في وشها..في هي هتشوه وشك بنفس الطريقه...و ممكن تبقي رحيمه بيك و متقتلكش بس هتهديك ياقوته بتقطر دم..و تمشي بعيد عنك...

٢) لو قررت بقي تبقي صريح و تقول لا مش جميله ف هتقتلك برضه..و سلاحها في ده مقص كبير...

خليني بقي اقولك لو حظك الهباب وقعك معاها تعمل اي بالظبط...ممكن بسهوله جدا تخليها تبعد عنك و متتعرضش لأي اذي...طب ازاي؟!

وقت ما تسألك (انا جميله؟)..رد ب( انتي عاديه لا حلوه و لا وحشه) و اطلع اجري و هي مش هتيجي وراك..او اسألها(انا طب أنا جميل؟)وقتها هي اللي هتضايق و تمشي

في ١٩٧٩ اشاعات كتير انتشرت بين الناس بأن ذات الفم المشقوق اتشافت في الشوارع...بس مش ده الغريب...الغريب في ٢٠٠٧ بالصدفه اكتشفوا أن فيه ست كانت بتطارد الاطفال في نفس الوقت اللي الاشاعات انتشرت فيه...و ماتت في حادثه عربيه..و كان فمها مشقوق!!انا شايفه اننا نخلي بالنا يا جماعه و اتعملت قصه ذات الفم المشقوق فيلم...

❈-❈-❈

٤)هانكو سان:في اليابان و في المدارس الابتدائي منتشر أسطوره هانكو سان..و دي بنت صغيره في المدرسه مقدرتش تتحمل التنمر و الاضطهاد اللي اتعرضت ليه من زمايلها ف انتحرت..و روحها سكنت حمام البنات بالتحديد الكابينه التالته و لابسه أحمر و عيونها ترعب أي حد يبصلها و وشها شاحب...ف لو حصل و الحمام اتزحم و اضطرت بنت تدخل الكابينه المشئومه دي لازم تخبط علي الباب و تسأل(هانكو.. أنتي هنا؟)لو جالها رد (نعم)لازم تطلع تجري بسرعه و ألا روح هانكو هتسحبها للكابينه و تقتلها..و ده بيحصل في كل المدارس الابتدائيه هناك.

❈-❈-❈

٥)السعلوة:(ألا تري نيران السعالي و تغير لونها...بنوك و بناتك أوصيك بهم خيراً) دي كانت جمله ست(أو زي ما هو كان فاهم)لجوزها لما شافت بليل نار عند القبور و طارت و مرجعتش تاني😀..

في الحقيقة أنها مكانتش ست أصلا لا كانت سعلوة..

في تراثنا العربي معروفه بالسعلوة(سعلاة) و التراث الأوروبي Succubus يقال أن أصلها شخصية ليليث من ملحمة جلجامش..و شكلها مخيف بس عندها قدره أنها تتحول لست جميلة بتفتن الرجال و تقتلهم...

و وصفها دكتور جمال السمرائي في كتابه السعلاة و الطنطل بأنها:

-ليها قرون خشب.

-جسم ماعز لكن حجمها أكبر ٣ مرات.

-شعر كثيف في نص رأسها و باقي رأسها مفيش(قرعه يعني).

-ليها عين حمراء و التانيه صفراء.

-رجلها الأولي رجل حمار و التانيه رجل جنيه.

-انفها لونه أحمر و فمها واسع و أسنانها طويله و شفايفها عريضه.

-آكله لحوم بشر.

-قوية جدا.

-رجليها من الرقع.

-بتخطف الاطفال.

-بتعيش في الأماكن المهجوره.

-بتقتل فريستها بسلاح حاد.

و لحد الأن فيه كتير مؤمنين بوجودها في الجزيره العربيه و العراق و سوريا و الأردن...لدرجه أن لما البنت بتغلط بتتشبه بيها كمثال السوء و القبح...و من ضمن المعتقدات المنتشره عن السعلوة أنها جنية موجودة في القبور و من أنواع السحر الأسود و هيئتها بتتغير من قبر للتاني(غراب..كلب أسود).

❈-❈-❈

٦)تاكي تاكي:نيجي بقي لأسطوره تاكي تاكي و هي برضه أسطوره يابانية لكن ليها أصلين..

ألاول:أن تاكي كانت بنت خجوله جدا و ده عرضها للتنمر من زمايلها..و في يوم كانت في محطه القطر و حد من زمايلها حب يستلطف و حط حشره علي كتفها..و من خوفها وقعت علي قضبان القطر و عدي عليها موتها و قطع رجليها...

التاني:أن تاكي ست وقعت بالغلط علي قضبان القطر و حصل معاها نفس الحاجه..

و في الحالتين تاكي تاكي بتتحرك بليل في محطات القطر عن طريق ايديها و بتقطع رجلين أي حد يقابلها..و أسمها جه من صوت حركتها تاكي تاكي.

❈-❈-❈

٧)فاتنة منتصف الليل:في الفلكلور البرازيلي هتلاقي أسطوره فاتنة منتصف الليل بتحكي عن شبح ست جميله بتظهر بليل في الحانات و لابسه أحمر أو أبيض..و فريستها بيكون راجل بشرط يكون قاعد لوحده..و بتدعوه لبيتها قبل نص الليل و بيفضلوا ماشيين في طريق مسدود و هو غافل عن ده لحد ما يوصلوا لحيطه سد و تقول:هنا أسكن ألا تريد البقاء معي..و يكتشف أنه عند قبر و مع  بتختفي من جمبه مع تمام منتصف الليل.

❈-❈-❈

٨)فانيوري:سكان اليابان دايماً بيقولوا أن اختفاء السفن و غرقها أو موت البحاره و الصيادين سببه فانيوري..فانيوري بنت اتعرضت للاغتصاب من مجموعه بحاره و رموها في البحر و غرقت و روحها رجعت عشان تنتقم..و انتقامها شمل مهاجمه السفن و البحاره و الصيادين.

❈-❈-❈

٩)جريلا:في العصور الوسطي و تحديداً في أوروبا الشمالية منتشر أسطوره جريلا اللي ذكرها المؤرخ الأيسلندي سنوري سترلسون في قصائده إيدا..جريلا بتعيش في الكهوف المهجوره هي و زوجها و ولادها ال ١٣ و القط بتاعهم...جسمها عباره عن نص حيوان و نص قزم و ليها ١٥ ديل و كل ديل مربوط فيه ١٠٠ كيس و كل كيس يكفي ٢٠ طفل..و حالياً جريلا بتظهر في ليله رأس السنه عشان تخطف الأطفال و تأكلهم.

نورهان نصار