النهاردة مش هنتكلم عن بيت أو مستشفى أو حتى جزيرة لأ النهاردة هنتكلم عن مدينة كاملة مشهور عنها إنها مسكونة بالأشباح.

مدينة عدد سكانها بالملايين ومع ذلك بيتقال عليها كلام كتير جدا وتعتبر أكتر مدينة مثيرة للجدل في العالم.

نيو أورلينز "New Orleans"

مين فينا مسمعش عن المدينة دي مدينة السحر والموسيقى مدينة سحر الفودو المشهورة  ومركز تجمع سحرة الفودو في العالم وكمان تعتبر نيو أورليانز مسقط رأس موسيقى الجاز المشهورة اللي بدأت فيها وانتشرت لكل أنحاء العالم.

نيو أورليانز عكس غيرها من المدن كلنا عارفين إن لما يبقى فيه بيت أو مكان معروف عنه إنه مسكون الناس بتهرب منه وسعره بينزل الأرض إلا في المدينة دي أسعار البيوت والأماكن المعروف عنها إنها مسكونة أعلى بكتير جدا عن الأماكن العادية حاجة غريبة بجد تعالوا بقى أحكيلكم الأول عن المدينة دي وتاريخها قبل ما ندخل على أماكنها المسكونة.

نيو أورلينز هي مدينة أمريكية موجودة في ولاية لويزيانا في جنوبها الشرقي بتطل على نهر المسيسيبي وعدد سكانها ٣٣ مليون نسمة.

اتأسست في مايو ١٧١٨م على إيد شركة مسيسيبي الفرنسية برآسة "جان بابتيست لو موين دي بينفيل" وتم تسميتها  تيمنًا ب "فيليب أورليان" اللي كان رئيس فرنسا في الوقت ده وكان بيسكنها في الوقت ده قبائل اسمها  شيتيماكا "Chitimacha"

فضلت المدينة تابعة لفرنسا لحد سنة ١٧٦٣م لما خدتها منها أسبانيا بعد معاهدة باريس وبقت المدينة تابعة ليها وكانت المدينة في الوقت ده ميناء لتهريب المساعدات أثناء الحرب الثورية الأمريكية وبالفعل قدروا يخرجوا الإنجليز من المدينة وبقت تحت السيطرة الكاملة لأسبانيا.

سنة ١٨٠١م رجعت المدينة تاني لفرنسا، وفي سنة ١٨٠٣م باعها نابليون بونابرت للولايات المتحدة الأمريكية هي وكل المناطق المحيطة بيها علشان تنضم لولاية لويزيانا ومن هنا بدأت المدينة تنمو نمو كبير جدا وكان أهم حاجة بتميزها اختلاف الأعراق فيها كانت بتضم ناس من مختلف الجنسيات زي الفرنسيون، والكريول، والأمريكيون، والأفارقة، والألمان، والأيرلنديون.

كمان أدت ثورة هايتي سنة  ١٨٠٤م إلى قدوم أعداد ضخمة من اللاجئين ل نيو أورليانز من البيض والأفارقة ومن هنا  أصبحت نيو أورلينز أكبر منطقة لتجارة العبيد في المنطقة.

استمرت نيو أورلينز في النمو لحد ما بقت من أكبر الموانئ الأمريكية وبقت مدينة جذب سياحي وفيها الكتير من الأماكن السياحية.

سنة ٢٠٠٥م  ضرب إعصار كاترينا المدينة واتسبب في غرق 80% من نيو أورلينز تحت المية ودا طبعا اتسبب في خساير مادية كبيرة جدا وعدد كبير جدا من الوفيات وصلوا لأكتر من ١٥٠٠ سخص من سكان المدينة.

لحد هنا والكلام عادي جدا والمدينة زيها زي غيرها من المدن طب إيه السبب في السمعة اللي طالعة عليها دي؟

طبعا مدينة عمرها ٣٠٠ سنة شهدت حروب أهلية وثورة عبيد وغيرهم من الأحداث  خلفت حمامات من الدم دا غير الأوبئة زي الحمى الصفراء وغيرها اللي نتجت طبعا عن الحروب والجثث وكان نتيجتها ضحايا بالآلاف زود على دا كله تعدد الأعراق اللي في المدينة فطبيعي ينتج عن دا كله أساطير كتير جدا عن أشباح موجودة في كل مكان في المدينة وخصوصا مقبرة سانت لويس اللي بيقال عنها أنها أكتر مقبرة مسكونة بالأشباح في العالم.

زي ما قولت في أول القصة نيو أورليانز تعتبر مركز لسحر الفودو لدرجة إنهم أطلقوا عليها مدينة الفودو.

(الفودو هو نوع من أنواع السحر الأسود الخطير جدا بيتم من خلاله الاستعانة بالجن والأشباح علشان ينفذوا اللي بيتطلب منهم وفي الغالب بيستخدموا عروسة بيتحكموا من خلالها في الشخص المطلوب وأي حاجة يعملوها للعروسة دي بتحصل للشخص المرتبط بيها)

وموجود لحد دلوقتي في المدينة محلات كتيرة جدا متخصصة في بيع مستلزمات الفودو وكل اللي بيحتاجه السحرة علشان أعمالهم المهببة دي.

أشهر ساحرة للفودو في العالم كان إسمها "ماري لافو" من كتر تمكنها في السحر سموها ملكة الفودو وكانت عايشة في نيو أورلينز ولما ماتت اندفنت في مقبرة سانت لويس ويقال إن شبحها بيخرج يتجول في المقبرة ليلة عيد القديس يوحنا اللي بيوافق يوم ٢٣ يونيو من كل سنة.

بالإضافة لشبح ماري لافو المقبرة كمان بتشهد نشاط شبحي غير طبيعي يقال إن بيظهر فيها  آلاف الأشباح للناس اللي مدفونة في المقبرة من ضحايا الحروب الأهلية والحمى الصفراء وغيرهم من الضحايا اللي أشباحهم بيقال إنها بتخرج لحد النهاردة وتتجول في المقبرة كل يوم بالليل.

كمان من ضمن الأساطير اللي اتقالت إن في أوائل القرن ال ١٩ كان فيه بنت سمرا من نيو أورليانز إسمها جولي كانت بتشتغل مطربة ويقال إنها كانت عا..هرة للفرنسيين الأغنياء اللي عايشين في المدينة بس اللي حصل إنها حبت واحد من  الفرنسيين دول كان ظابط فرنسي وسيم جدا وهي حبته بجنون ويقال إن هو كمان حبها.

بعد فترة من علاقتهم طلبت جولي منه إنهم يتجوزوا وطبعا في الفترة دي كان صعب جدا واحد في مركزه يتجوز واحدة بمواصفاتها وعلشان يعجزها وتبطل تكلمه في الموضوع ده قالها إنه موافق يتجوزها بشرط إنها تقضي ليلة كاملة في البلكونة وهي عريانة وكانوا في شهر ديسمبر يعني في عز التلج.

طبعا جولي ما صدقت وقامت جري دخلت البلكونة ونفذت اللي قالها عليه وهو سابها ودخل أوضته ونام وهو على يقين إنها أول ما هتحس بالبرد هتدخل علطول وبالكتير هتقعد ساعتين تلاتة مش أكتر من كدا.

لكن كانت المفاجأة لما صحي الصبح وطلع لقاها مرمية في البلكونة عريانة زي ما هي بس جثة هامدة ماتت من كتر البرد ويقال إن شبح جولي بيظهر لحد دلوقتي خصوصا في ذكرى موتها بتتجول في البيت اللي ماتت فيه في البلكونة وعلى السطوح وهي عريانة زي ما ماتت بالظبط.

الأشباح في نيو أورلينز موجودة في كل مكان في المدينة في الشوارع والفنادق والحانات والبيوت موجودين في كل مكان لدرجة إن معظم الفنادق الموجودة في المدينة بيقال إنها مسكونة بالأشباح وخصوصا فنادق الحي الفرنسي وفيه ناس كتير قالت إنها شافت الأشباح في الفنادق دي أكتر من مرة.

تعالوا معايا أقولكم نبذة عن الفنادق دي:

 فندق دوفين أورلينز:

الفندق دا بقى من أقدم الفنادق الموجودة في نيو أورلينز تم بناؤه سنة ١٧٧٥م وكان ف الأول عبارة عن حانة وبيت دعا رة قبل ما يتحول لفندق وبتدور حواليه أساطير كتير جدا من ضمنها حكاية بنت كانت بتشتغل فيه اسمها ميلي كانت مخطوبة لجندي من جنود الكونفدرالية ويوم فرحهم وهي مستنياه بفستان الفرح اتقتل خطيبها بسبب ديون قمار وراحلها وهو جثة غرقان في دمه ولحد دلوقتي بيظهر شبحها في بار الفندق وهي لابسة فستان أبيض وبتدور على عريسها.

فندق مونتيلون HOTEL MONTELEONE:

الفندق ده من أشهر فنادق الحي الفرنسي في نيو أورلينز اتبنى سنة ١٨٨٦م ويقال إنك لما هتروح هناك هتشوف أشباح لشخصيات مشهورة كانت متعودة تنزل في الفندق ده زي "إرنست همنغواي، وويليام فولكنر، وتينيسي ويليامز" وغيرهم من الشخصيات وعادي جدا لو لقيتهم بيتجولوا في قاعات الفندق.

كمان بتشوف أشباح الموظفين السابقين اللي كانوا بيشتغلوا في الفندق ولسة أرواحهم متعلقة بالمكان وبيظهروا وهما لابسين اليونيفورم الخاص بيه.

في ناس قالت إنها شافت أطفال بتجري في الممرات الطويلة بتظهر فجأة وتختفي برضو فجأة.

وتعتبر أكتر قصة مؤثرة ومأساوية متعلقة بالفندق هي قصة أسرة صغيرة كانت مقيمة في الدور ال ١٤ في الفندق وفي يوم الأب والأم كانوا في حفلة لدار الأوبرا الفرنسية المشهورة في شارع بوربون وبعد نهاية الحفلة وهما راجعين للفندق انقلبت بيهم العربية وماتوا ويقال إن لحد دلوقتي نزلاء الفندق بيسمعوا صوت صراخ طفل صغير خارج من قاعات الفندق طفل مستني أمه وأبوه يرجعوا من سهرتهم لكن عمرهم ما رجعوا.

بيت ضيافة لافيت Laffite Guest House:

الفندق أو بيت الضيافة ده موجود في الحي الفرنسي في المدينة وكان الفندق ملحق بمستشفى وطبعا كلنا عارفين اللي بيحصل في المستشفيات وجثث داخلة وجثث خارجة وناس بتموت فلكوا أن تتخيلوا فندق مكون من ١٤ أوضة كلهم مسكونين بالأشباح اللي كانت موجودة في المستشفى.

دا غير الحوادث المأساوية اللي حصلت في الفندق من أول ما تم إنشاؤه، يقال إن بنت المالكين الأصليين في الفندق وقعت من على السلم وماتت ولحد دلوقتي شبحها بيظهر في الدور التاني لابسة هدوم النوم وبتتجول في المكان.

كمان فيه أخين ماتوا في الأوضة رقم ٢١ واحد مات بالحمى الصفراء والتاني انتحر بعد موت أخوه ولحد دلوقتي الناس هناك بيسمعوا صوت بكاء طالع من الأوضة دي.

فندق لو بافيلون Le Pavillion:

الفندق دا بقى راح ليه محققين في الظواهر الخارقة  وما وراء الطبيعة وبعد عمل جلسة تحضير رصدت أجهزتهم أكتر من ١٠٠ روح نشطة في المكان فلما تروح الفندق ده متشتغربش أبدا لما تلاقي حاجة بتعدي من على رجلك وانت نايم أو بتمسك إيدك أو بتحسس على وشك.

كمان فيه ناس شافت زوجين لابسين هدوم سهرة وبيتمشوا في الدور الأرضي وواحدة ست لابسة هدوم شيك بتتمنى في الردهة وطفلة صغيرة عندها ٦ سنين بتظهر في الأوضة رقم ٩٣٠ في الدور التاسع وشبح تاني بيهزر مع العمال والنزلاء في الدور التالت وغيرهم وغيرهم من الظواهر الغريبة والأنشطة الشبحية.

فندق بوربون أورلينز:

الفندق دا بقى كان معروف إنه مسكون بالأشباح من قبل تحويله لفندق واللي اشتراه وحوله لفندق كان قاصد يستغل قصة إنه مسكون علشان يروج للفندق بتاعه ويجذب ليه اكبر عدد من الزوار.

الفندق كان في الأول عبارة عن دير ودار لرعاية الأيتام وبدأت قصته مع الأشباح في القرن ال ١٩ لما الحمى الصفراء ضربت دار الأيتام وأصابت الأطفال ومات عدد من الأطفال بسببها واللي اشباحهم بتظهر في الفندق لحد دلوقتي وشافهم عدد كبير من نزلاء الفندق.

كمان ناس قالت إنها بتسمع صوت صراخ خارج من الأوضة رقم ٦٤٤ واللي بيقال إن واحدة من الراهبات انتحرت فيها.

دا غير شبح جندي كونفدرالي بيظهر غرقان في دمه في الدور السادس والثالث.

الفندق كمان مشهور بروحه المرحة ودا مش من الأحياء بس لا دا من الأشباح كمان معظم الأشباح الموجودة فيه دمها خفيف جدا وبتحب تهزر مع الناس.

واحد من النزلاء قال إن فيه شبح ضربه بالقلم علشان قال كلمة خارجة وواحد تاني قال إنه خد بوسه ناعمة من شبح خفي دا غير ريحة السجاير مجهولة المصدر اللي النزلاء والموظفين بيشموها في ردهة الفندق بيصاحبها ظهور راجل عجوز قاعد في ركن في الردهة بيقرأ جريدة وبيدخن وزي ما بيظهر فجأة بيختفي برضو فجأة.

فندق لو ريشيليو:

الفندق ده موجود في الحي الفرنسي ومعظم النزلاء بيقولوا إنهم بيشوفوا مجموعة من الجنود الإسبان لابسين زيهم الرسمي الكامل  وبيتمشوا في فناء الفندق.

فندق أومني رويال أورلينز:

الفندق دا بقى الأشباح اللي فيه مسخرة بيحبوا النظام والنضافة جدا فعادي جدا لو نمت وانت رامي الجاكيت بتاعك عالكرسي وتصحى تلاقيها متعلقة في الدولاب أو تكشف الغطا من عليك وانت نايم وصحة تلاقي نفسك متغطي كويس أو تدخل الحمام وترجع تلاقي السرير مترتب حاجة خمس نجوم من الآخر يعني.

يقال إن اللي بيعمل كدا شبح واحدة كانت شغالة في الهاوس كيبنج ولسة مهووسة بالنضافة والنظام لحد دلوقتي.

فندق بروفينشونال Hotel Provincial

الفندق ده كان عبارة عن مستشفى عسكرية قبل ما يتحول لفندق وطبعا كان فيه عدد لا يحصى من الجنود اللي كانوا في الحرب الأهلية واللي شافوا من المآسي ما تقشعر له الأبدان زي ما بيقولوا والكلام اللي بيتقال عن الفندق ده إنك تبقى قاعد مشغل الراديو أو التليفزيون وتلاقي المحطة اتحولت لوحدها أو تيجي تخرج من الأسانسير تلاقي ومضات قدامك بتشوف فيها مشاهد لمستشفى في عصر الحرب الأهلية.

 أكواخ أودوبون:

لو روحت المكان ده هتسمع لحن بيتعزف مش عارف مصدره ويقال إن كان فيه جندي ساكن في الأكواخ دي وكان متعود يعزف اللحن ده زمان ولحد النهاردة اللحن بيعزف في المكان يوميا.

فندق أندرو جاكسون  Andrew Jackson:

الفندق ده بيوفر لزواره أجواء القرن الثامن عشر مع المفروشات التاريخية الساحرة وغرف الضيوف الواسعة المريحة وتم تصنيفه من ضمن الفنادق التاريخية سنة ١٩٦٥م.

الفندق اتبنى سنة ١٨٩٠م كان في الأول  عبارة عن مدرسة داخلية للأطفال اللي فقدوا أهاليهم بسبب الحمى الصفراء بس في سنة ١٧٩٤م حصلت حريقة في المدرسة مات بسببها خمس أطفال بيقال إن أرواحهم لسة بتظهر لحد دلوقتي في الفندق وبيسمعوا صوتهم وهما بيلعبوا في فناء الفندق خصوصا بعد نص الليل كمان فيه ناس شافوا شبح  طفل صغير بيقال إن اسمه أرماند بيظهر في الأوضة رقم ٢٠٨ وشبح واحدة ست كانت بتشتغل في رعاية الأطفال وماتت في الحريقة هي كمان.

كل الأماكن دي حاجة وقصر ديفلين لالوري حاجة تانية خالص القصر ده يعتبر أكتر مكان مسكون في نيو أورلينز وأكتر مكان حصلت فيه أحداث مأساوية بس الكلام عليه محتاج يتعمل في حلقة لواحده علشان كدا هنخليه للمرة الجاية ان شاء الله.

وبكدا تكون خلصت قصتنا النهاردة يا ترا رأيكم إيه فيها وهل الفنادق دي مسكونة فعلا ولا دا وهم مسيطر عالناس ولا ممكن أصحابها هما اللي بيعملوا كدا علشان يوهموا الناس إنها فعلا مسكونة ويجذبوا الناس ليها أنا شخصيا مش عارفة ومحتارة جدا وحابة أسمع رأيكم.

دمتم بألف خير وإلى لقاء آخر إن شاء مع قصر ديفلين لالوري المشهور.