الحلقة الثانية والعشرون (سلسلة أماكن مسكونة) - حفل للجن
السابق
الحلقة الثانية والعشرون
سلسلة أماكن مسكونة
حفل للجن
بطل قصتنا النهاردة مش المكان المسكون زي كل مرة لا البطل في القصة دي الشخص اللي راح المكان المسكون.
هنتكلم عن حادثة مشهورة جدا ناس كتير تعرفها الحادثة دي كانت سبب في تغيير مسار حياة فرقة موسيقية وتسببت في اعتزالهم الغناء نهائيا.
النهاردة معادنا مع حكاية نورة الطقاقة وسبب اعتزالها للغناء هي وفرقتها بس تعالوا الأول أعرفكم على نورة دي علشان نعرف حكايتها من الأول.
نورة كانت مطربة خليجية مشهورة جدا في فترة الثمانينات والتسعينات ولقب الطقاقة ده أو الطجاجة باللهجة الخليجية دا لقب كانوا بيطلقوه في الخليج في الوقت ده على المطربات الشعبيات اللي بيحيوا الأفراح مع فرقتهم وفي الغالب كانوا بيستخدموا الآلات الإيقاعية زي الدفوف والطبول ولأن في الوقت ده مكانش فيه دي جي كانت الأفراح بيحييها مطربين ومطربات وكل واحد منهم بيبقى معاه فرقته الخاصة.
❈-❈-❈
اتولدت نورة سنة ١٩٥٠م وأمها تبقى مطربة شعبية كويتية مشهورة جدا اسمها "صنعة" وتعتبر أمها من أوائل المطربات في الكويت.
درست نورة العلوم السياسية في جامعة الكويت واتخرجت منها علشان تكون أول مطربة شعبية تاخد شهادة جامعية ودا على حسب كلامها اللي قالته في صحيفة قبس بعد لقاء أجراه معاها الصحفي الراحل يحيى عبد الرحيم.
اتأثرت نورة بالفن الشعبي وحبته جدا من وهي طفلة وبقت تروح مع والدتها الأفراح اللي بتحييها في الستينات وفضلت تغني في فرقة والدتها لحد ما قررت والدتها إنها تعتزل الغناء بعد مسيرة فنية طويلة جدا وغنية بالأعمال الفنية.
من هنا قررت نورة إنها تكمل مسيرة أمها وتحترف الغناء ودا حصل بعد ما اشتغلت بشهادتها الجامعية لمدة أربع سنين بس ملقتش نفسها إلا في الغناء علشان كدا استقالت وقررت تكون فرقتها الخاصة وبالفعل عملت فرقة مكونة من ٦ بنات غيرها ويقال ٨ بنات ومن هنا بدأت مسيرتها الفنية كطقاقة محترفة مش هاوية.
أكتر حاجة كانت بتميز نورة عن غيرها من الطقاقات اللي كانوا موجودين في الوقت ده إنها كانت بتألف وتلحن أغانيها بنفسها ودا طبعا غير جمال صوتها وبحته المميزة وعلشان كدا حققت نورة هي وفرقتها نجاح كبير جدا في الثمانينات والتسعينات ومش في الكويت بس لا دي كانت بتلف دول الخليج كلها تعمل حفلاتها وبقت الفنانة الشعبية الأولى في الخليج العربي والأعلى أجرًا.
أحيت نورة أفراح وحفلات الأمراء والطبقات الثرية في دول الخليج واصدرت شريطين كاسيت ما بين عامي ١٩٩٢م و ١٩٩٣م وكمان ظهرت في التليفزيون الكويتي مع فرقتها في كتير من جلسات الطرب الشعبية المصوّرة.
في يوم جمعة من أيام سنة ١٩٩٧م كانت نورة وفرقتها واخدين أجازة في اليوم ده علشان يريحوا من زحمة الشغل وفجأة جه لنورة إتصال من واحدة ست علشان تحيي فرح بنتها بس نورة اعتذرت للست علشان الجدول بتاعها كان مليان ومفيهوش يوم فاضي الأيام كلها مشغولة بس الست قعدت تتحايل على نورة كتير جدا وتقولها إن بنتها بتحبها أوي ومش راضية تعمل فرحها إلا لو هي اللي غنت في الفرح ولو مجتش الفرح هيبوظ وقعدت تقولها إنهم كلهم بيحبوا صوتها ونفسهم تغني في الفرح.
بعد طول محاولة وافقت نورة على طلب الست ومرضيتش تكسر بخاطر العروسة ولما سألتها الفرح إمتى قالتلها النهاردة الساعة ١٠ نورة اتصدمت لأن النهاردة أجازة وحاولت تعتذر للست تاني بس الست مدتلهاش فرصة للاعتذار ومش بس أغرتها بالكلام دي كمان اغرتها بالفلوس وعرضت عليها ٥٠٠ دينار كويتي أجر للفرح ودا كان مبلغ ضخم جدا في الوقت ده كان يعادل ١٦٠٠ دولار وطبعا نورة مقدرتش ترفض الإغراءات دي كلها وفي الآخر وافقت والست قالتلها إنها هتبعتلها عربية مخصوص تأخذها هي وفرقتها وهترجعهم تاني آخر الفرح يعني من الآخر سهلتلها كل حاجة علشان متعرفش تقول لأ.
اتصلت نورة بالبنات أعضاء الفرقة وقالتلهم على اللي حصل وقالتلهم يحضروا نفسهم علشان الفرح الساعة ١٠ ولازم يكونوا هناك في الميعاد.
وصلت نورة وفرقتها لبيت العروسة الساعة ١٠ بالظبط واتفاجئوا ان البيت كان عبارة عن قصر كبير جدا ورائع الجمال والقصر كان موجود في منطقة الصباحية في جنوب الكويت تبعد عنها حوالي ٣٢ كيلو بس.
أول ما دخلوا القصر حسوا بحاجة غريبة وقلبهم اتقبض من غير سبب ومكانوش مستريحين ابدا خصوصا نورة وبنت معاها في الفرقة كان اسمها شمس بس مخدوش في بالهم وحاولوا يكذبوا إحساسهم ده خصوصا إن مظاهر الإحتفال كانت واضحة جدا في القصر.
عدد مهول من الضيوف، بوفيه رهيب كبير جدا وفيه ما لذ وطاب من كل أنواع الطعام خصوصا اللحوم، الأضواء والزينة مالية المكان، التحف والمجوهرات الغالية في كل ركن من القصر، والمعازيم باين عليهم الثراء الفاحش.
استقبلهم والد العروسة بترحاب كبير ودخلهم أوضه علشان يستريحوا فيها قبل بدء الحفلة.
بعد كده دخلت عليهم والدة العروسه اللي كلمت نورا في التليفون علشان ترحب بيهم بس الغريب ان والدة العروسه كانت كبيره في السن جدا وكانت ضخمه جدا طويله وعريضه ولما جت تسلم عليهم كانت إديها خشنة جدا وصلبة ووشها وهي بتبوسهم صلب جدا عامل زي البلاط بس برضوا معلقوش وقالوا يمكن علشان ست كبيرة في السن.
بعد كدا دخل صحبات العروسة وقرايبها علشان يسلموا عليهم، الغريب إنهم هما كمان كانوا زيهم زي والدة العروسة إديهم ووشهم خشن جدا وناشف وده اللي زود القلق جوا قلب نورة وباقي البنات دا غير الحرارة الشديدة اللي حسوا بيها لما البنات دي دخلوا مع ان الجو المفروض انه برد ولما خرجوا الجو رجع برد تاني.
كل دي حاجات خوفتهم وده اللي خلى شمس تتكلم وتقول إن فيه حاج غريبة وإنها مش مستريحه للي بيحصل ده بس نورة قالتلها تسكت وقالت إن دي تهيؤات ومفيش حاجة ابدا وانهم هيخلصوا الليلة ويروحوا وخلاص.
طبعا نورة كانت ملاحظة كل حاجة بس مكانتش عايزة تخوفهم ومن وجهة نظرها مينفعش بعد ما جم المشوار دا كله يسيبوا الفرح ويمشوا لمجرد شكوك في دماغهم.
❈-❈-❈
خرجت الفرقة علشان تقدم الفقرة الأولى واتفاجئوا لما شافوا العريس والعروسة اللي كانوا لابسين لبس غريب جدا العروسة كانت لابسة فستان أسود مرصع بالأحجار الكريمة وباين عليه انه غالي جدا بس أسود مش ابيض زي ماهو متعارف عليه في الأفراح دا غير إن كان عليه حروف غريبة زي ما تكون طلاسم.
العريس بقى كان لابس لبس من العصور القديمة زي ما يكون لبس من العصر العثماني وكانت الكوشة غريبة جدا كانت على شكل رأس إنسان فاتح بوقه بطريقة مخيفة زي ما يكون بيصرخ والعريس والعروسة قاعدين في فتحة بوقه دي.
دا غير انهم مبيتحركوش أبدا ولا بيبصوا لبعض ولا بيتكلموا زي مايكونوا تماثيل مش بني آدمين.
بدأت الفقرة الأولى وكان المعازيم متفاعلين جدا مع الفرقة وبيغنوا ويرقصوا عالأغاني بشكل مبالغ فيه.
بعد ما خلصت الفقرة راحت الفرقة أوضتهم علشان يستريحوا على ما تبدأ الفقرة التانية بس نورة كانت مصدعة جدا وحاسة بدوخة علشان كدا فضلت انها متروحش الأوضة مع البنات علشان الدوشة وقررت تشوف أوضة تانية تنام فيها شوية على ما الفقرة التانية تبدأ.
طلعت الدور التاني اللي اتفاجئت لما لقته قديم جدا الحيطان قديمة والدهان واقع والأبواب متهالكة طبعا استغربت جدا إزاي الدور الأول بالشكل ده والدور التاني عامل كدا بس تعبها خلاها تشوف أي أوضة تنام فيها والسلام.
دخلت أول أوضة لقتها قدامها كانت أوضة قديمة فيها سرير صغير عليه تراب بس هي مهمهاش ونامت من كتر التعب.
وهي نايمة حلمت بكابوس وحش جدا واحدة ست ضخمة شكلها وحش جدا ولابسة إسود في إسود بتصرخ وتجري وراها.
صحيت نورة من النوم مفزوعة من الحلم الوحش ده بس لما فتحت عنيها لقت أكرة باب الأوضة بتتحرك والباب اتفتح مرة واحدة ولقت الست اللي كانت بتجري وراها في الحلم واقفة قدام الباب.
مصدقتش نورة اللي شافته وكذبت عنيها وقالت إنها اكيد لسة بتحلم وغمضت عنيها بسرعه ولما فتحت عنيها تاني ملقتهاش قدامها ولقت باب الأوضة مقفول زي ما هو علشان كدا أقنعت نفسها إن ده من تأثير الحلم عليها.
خرجت من الأوضة ولقت في الطرقة طفل صغير بيلعب افتكرته من معازيم الفرح راحت علشان تكلمه بس الولد سابها وطلع الدور التالت وهي طلعت وراه.
لما طلعت الدور التالت لقته زيه زي الدور التاني مهجور زي ميكون محدش سكن فيه من سنين تراب وعش عنكبوت في كل مكان والدهان واقع والأبواب قديمة جدا ومتهالكة زي ميكون اهل البيت مش مهتمين الا بالدور الأول بس.
قعدت تدور على الولد مش لاقياه سامعة صوته بيضحك بس مش شايفاه وفجأة شافته بيجري في آخر الطرقة وبيدخل أوضة من الأوض وقفل الباب وراه جريت وراه.
راحت وراه وحاولت تفتح باب الأوضة اللي دخلها بس معرفتش الباب مقفول مش راضي يفتح قعدت تخبط على الباب محدش فتحلها حطت ودنها عالباب مفيش صوت خارج من الأوضة نهائي.
بتلتفت علشان تمشي لقت واحد واقف قدامها شكله وحش جدا حبت تجري معرفتش لقت رجليها متسمرة في الأرض مش عارفة تحركها والشخص ده عمال يقولها:
“غني، غني، أنا أحب سماع صوتك”
وقعد يكرر الكلام أكتر من مرة.
غمضت نورة عنيها علشان متشوفوش وقالت أنا خايفة رد عليها وقالها متخافيش محدش بيموت ناقص عمر قالها الكلام ده واختفى ورجليها اتحركت وقدرت تمشي ونزلت الأوضة اللي فيها باقي الفرقة.
نزلت نورة جري وهي مش قادرة تتمالك نفسها وعندها يقين إن فيه حاجة غلط بس لما نزلت ودخلت أوضة باقي الفرقة اتفاجئت بشمس منهارة وباقي البنات بيحاولوا يهدوها ولما سألتها مالك؟ حصل إيه؟ قالتلها انها لما اتأخرت قعدت تدور عليها لحد ما حد من المعازيم قالها إنها طلعت الدور التاني فطلعت تدور عليها بس ملقتهاش ولقت الدور كله مهجور وفيه وشوش مرعبة عالحيطان وفي آخر الطرقة شافت واحد واقف بيبصلها وملامحه مختفية جت تجري معرفتش ولقت نفسها غصب عنها بتروح للشخص ده من غير إرادة منها فضلت تقرب منه لحد ما وشها بقى في وشه وشافت أبشع منظر ممكن تتخيله في حياتها واحد ملامحه مش موجودة في وشه اصلا.
قرب منها وقالها “غني، غني، أنا أحب سماع صوتك”. وهنا شمس مقدرتش تتمالك أعصابها وغمضت عنيها وقعدت تعيط وكل ما يطلب منها تغني تعيط أكتر لحد ما اداها بالقلم على وشها.
قلم قوي جدا لدرجة انها اتنطرت من مكانها ووقعت في الأرض بعد كدا الشخص ده اختفى وهي نزلت جري وهي منهارة وقعدت تقول لنورة البيت ده فيه حاجة مش مظبوطة الناس دول مش بشر.
قعدت نورا تهديها وتقولها إنهم لازم يكملوا الحفلة لو عايزين يخرجوا من المكان ده سلام وقالتلهم إنها شافت حاجات هي كمان بس لازم يكملوا علشان ميتئذوش.
خرجت الفرقة وبدأت الفقرة التانية وبدأ المعازيم يغنوا مع الفرقة وبدا صوتهم يعلى ويغطي على صوت الفرقة والبنات مرتبكة مش عارفة تغني ونورة عمالة تبصلهم علشان يكملوا وميوقفوش.
مع دقات الساعة ١٢ بدأ عددهم يزيد جدا جدا فوق ما حد يتخيله لدرجة إنهم بقوا محاوطينهم من كل ناحية وبدأ صوتهم يعلى أكتر وأكتر لحد ما صوت الفرقة معادش ظاهر اصلا واكتفوا بالعزف وتحريك شفايفهم وخلاص.
بقوا يرقصوا بشكل هيستيري أكتر وأكتر ستات ورجالة ومع اندماجهم بدأت الستات يرفعوا فساتينهم علشان يعرفوا يرقصوا وهنا كانت الصدمة لما البنات شافت رجليهم اللي مكاناش رجول بني آدمين أبدأ كانت رجال حيوانات بالتحديد رجول ماعز.
طبعا اول ما شافوا المنظر مقدروش يفتحوا بوقهم وشمس وقعت واغمى عليها وهنا خدتها نورا وباقي البنات علشان يفوقوها ولما فوقتها قالتلهم إنهم لازم يكملوا غنا لحد الفجر ما يطلع لو عايزين يخرجوا من المكان ده وقالت لشمس اللي كانت منهارة جدا إنها لازم ترجع معاهم حتى لو مش هتغني تقعد معاهم وخلاص وفعلا راحت معاهم وقعدوا ومكانوش عارفين يتمالكوا اعصابهم من المناظر اللي شايفينها والتانيين اعدادهم بتزيد مش عارفين بييجيوا منين وعمالين يغنوا ويرقصوا وياكلوا بنهم رهيب كانوا بياكلوا لحوم بس وبطريقة رهيبة مثيرة للغثيان.
بعد شوية جابوا آلة موسيقية غريبة قد كف الإيد وقعدوا يعذفوا عليها عزف غريب وبدأوا يقولوا طلاسم مش مفهومة ويعيدوا فيها وكل ما يعيدوا الطلاسم رقصهم يزيد بطريقة مجنونة لدرجة ان واحدة منهم فضلت تقطع في شعرها وترميه عالأرض زي مايكون باروكة بس اللي خلاهم يعرفوا ان ده شعرها لما شافوا الخصلات اللي عالارض وفيها دم ومن راسها.
وشوشهم بدأت تتحول وتبقى مرعبة وبقوا يبصولهم بطريقة ترعب وفجأة وبدون سابق إنذار وأول ما الفجر أذن كلهم بصوا للبنات مرة واحدة وأشكالهم بقت مرعبة أكتر وأكتر وهوب اتجمدوا مكانهم من غير حركة زي ما يكونوا اتحولوا لتماثيل من الحجارة وقبل الأذان ما يخلص الكهربا قطعت من البيت كله.
سكون مميت في وسط الضلمة فجأة مفيش حركة مفيش نفس زي مايكونوا اختفوا وفي لحظة نورة والبنات اتسحبوا بالراحة وسابوا آلاتهم وكل حاجة وخرجوا من القصر وطلعوا يجروا.
❈-❈-❈
فضلوا يجروا في الشارع وهما بيصوتوا لحد ما لقوا راجل عجوز شكله رايح يصلي الفجر.
الراجل اول ما شافهم استغرب جدا وسألهم انتوا مين؟ وإيه اللي جابكم المكان ده في الوقت ده؟
البنات بقوا عمالين يتكلموا في صوت واحد بطريقة مش مفهومة لحد ما هداهم وقالوله إنهم كانوا في حفلة في البيت اللي وراهم ده.
الراجل استغرب جدا وقالهم أن البيت ده مهجور من أكتر من ١٠ سنين أصحابه سابوه وبيتقال عليه انه مسكون وأصحابه سابوه علشان كدا.
طبعا كلهم استغربوا مهجور إزاي؟ ولسة نورة بتقوله مهجور إزاي واحنا كنا في فرح فيه حتى شوف النور والزينة عالبيت إزاي وبتلف علشان تشاورله عالبيت لقت كل ده اختفى في لحظة مفيش نور ولا زينة ولا أي حاجة البيت ضلمة ومهجور وشكله قديم جدا وهنا اترعبوا زيادة.
الراجل الكبير قالهم ميجيبوش سيرة لحد عن اللي حصل وحذرهم انهم ممكن يتئذوا لو حكوا عن الموضوع وسابهم ومشي وهنا قالت شمس إنه ممكن يكون الراجل ده من الجن هو كمان وبيحذرهم علشان ميقولوش لحد عن اللي حصل.
بعد شوية الناس اتلمت عليهم اللي راجع من صلاة الفجر واللي رايح شغله ولما عرفوا الحكاية أكدوا كلام الراجل العجوز أن البيت مهجور من أكتر من ١٠ سنين ومعروف انه مسكون والكل بيخاف يقرب منه دا غير الأصوات اللي بتخرج منه بالليل.
الناس جابولهم عربية توصلهم بيوتهم ومن وقتها والفرقة كلها بلا استثناء بطلت غنا ومظهروش تاني أبدا.
طبعا كانت صدمة كبيرة جدا للناس ومتعهدي الحفلات وحاولوا يقنعوهم يرجعوا تاني بأي طريقة بس هما كانوا خدوا قرارهم مفيش غنا تاني خلاص.
❈-❈-❈
في رأي بيقول إن اللي حصل في البيت مش هو لواحده سبب اعتزالهم وإنهم بعد ما روحوا كانوا بيشوفوا ويسمعوا حاجات مرعبة وكانوا بيظهرولهم وهما نايمين وهما صاحيين كمان وخصوصا والد العروسة وأمها والست العجوزة اللي ظهرت لنورة في الحلم كانت ديما بتجيلها وبتطاردها أما والد العروسة كان ديما بيجيلها ويقولها “غني، غني، أنا أحب سماع صوتك”
كلهم بلا استثناء كانوا بيظهرولهم بس اكتر واحدة فيهم اتأذت هي شمس يقال علشان حكت اللي حصل لكل الناس اللي تعرفهم علشان كدا كانت أكتر واحدة مأذية فيهم وماتت في ظروف غامضة بعد أقل من شهر من الفرح المنكوب ده ويقال أن موت شمس هو السبب في اعتزالهم بشكل نهائي إيه الحقيقة الله أعلم.
كمان بيقال إن فيه واحد صحفي راح عمل مع نورة لقاء بعد اعتزالها بكذا سنة وهي حكتله عن اللي حصل بالتفصيل واللي حصل لشمس بعد كدا، ويقال أن الصحفي ده راح البيت اللي حصلت فيه الحفلة بالفعل ومعاه مصور صحفي علشان يصوروا البيت من برا ومن جوة بس اول ما دخلوا البيت اللي كان ضلمة جدا بس على فلاش الكاميرا كان الصحفي بيشوف حاجات بتتحرك حواليه في مل مكان.
كل فلاش بحاجة غير اللي قبلها أطفال صغيرة ونساء بتصرخ بطريقة مرعبة بش مش طالعلها صوت وأشكال مرعبة ولما فرغ الكاميرا بعد كدا لقى الصور بيضة ممسوحة مفيهاش أي حاجة ويقال انهم ظهروله وحذروه إنه ينشر حاجة عنهم أو عن اللي حصل وهو فعلا منشرش حاجة لحد ما مات واللي قال الكلام ده ابنه اللي بعد وفاة والده وهو بيدور في حاجاته شاف من ضمن الأوراق الحوار اللي عمله مع نورة ومذكرات والده اللي بيحكي فيها عن اللي حصل.
هل دا حصل حقيقي برضو ولا إشاعات الله أعلم.
ماتت نورة سنة ٢٠١٦م ومحدش عارف إيه سبب موتها ماتت ومات سرها معاها علشان تبقى قصتها أشهر قصة رعب متداولة في الكويت والخليج العربي كله لحد النهاردة.
طبعا القصة دي مشهورة جدا جدا خصوصا في الكويت وبيتناقلها الناس سواء صغيرين وكبار ومؤمنين بيها جدا ومصدقينها لدرجة ان في ناس كتير جدا منعت حضور الأفراح بسبب القصة دي تقريبا كانو خايفين يروحوا يلاقوا الجن هناك ولا يلاقوا حد يعرفوه ويطلع مش هو أو حتى يلاقوا حد شبهم ولابس نفس اللبس بتاعهم وواخد مكانهم في الفرح.
القصة حصلت فعلا ولا لأ؟ الله أعلم لأن فيه ناس بتشكك في صحتها وبيقولوا خيال وتأليف لأن مفيش دليل واحد على صحتها ومفيش دليل ملموس بيقول ان نورة هي وفرقتها اللي حصلها كدا خصوصا ان نورة مطلعتش بنفسها قالت الكلام ده ولا حتى نفته لما اتقال هي بين يوم وليلة اختفت من الساحة هي وفرقتها وخلاص من غير إبداء أي أسباب.
ناس كتير حاولت تفسر اللي حصل ده وقالوا إن الجن بيحبوا النوع ده بالذات من الموسيقى والأغاني دي بالذات لأن إيقاعها سريع مع دق الطبول والدفوف فبيشبه الزار وبيحضروا لما بيسمعوه وقالوا كمان إن وارد جدا الجن يكون حاضر في الأفراح خصوصا اللي بيكون فيها رقص وغنا على أغاني شبه دي.
ناس تانية قالت إن الجن بيحضروا الأفراح متشبهين بالبشر وممكن يتشبهوا بحد من المعازيم بالفعل يعني ممكن تقابل حد تعرفه في فرح ما وفي الحقيقة الشخص ده مش صاحبك ولا حاجة دا جن ومتشبه في صورة صاحبك عادي جدا متقلقش ومتحاولش تبص على رجله أو رجلها اللي في الغالب بتكون رجل معزة.
ووارد جدا يكونوا سمعوا نورة وفرقتها في حفلة من الحفلات اللي حضروها واعجبوا بصوتها علشان كدا كانوا عايزينها هي اللي تحيي حفلتهم.
وفي ناس قالوا ان اللي حصل ده لا يمكن يكون حصل من غير مساعدة بشرية خصوصا المكالمة اللي جت لنورة وتفسيرهم لده أن اللي كلمتها ممكن تكون دجالة استعان بيها الجن الطيار علشان تساعدهم وتجيبهالهم الحفلة بما إنهم بينفذوا للدجالة طلباتها وبينهم مصالح مشتركة وخدمة قصاد خدمة.
أما حتة رجول الماعز دي فبيقولوا أن الجن لما بيتشبه بالبشر مستحيل يتشبه بيهم بشكل كامل علشان كدا في الغالب بتبقى رجليهم مش رجول بشرية إنما بتبقى رجول حيوانات وخصوصا الماعز.
❈-❈-❈
الحادثة اتقالت بالتفصيل في مجلة الجريمة الكويتية المعروفة في الوقت ده بس من غير ما يقولوا اسم الطقاقة المقصودة وزي ما قولت مفيش مصادر مؤكدة للقصة ومفيش حد عرف يثبت إن الطقاقة نورة بنت صنعة هي المقصودة بالقصة دي خصوصا زي ما قولت ان نورة وفرقتها عمرهم ما اتكلموا عن الموضوع ده ومفيش دليل عليه سواء صوتي أو مرئي مع إن في بعض المصادر طلعت وقالت إن نورة طلعت في لقاء تليفزيون وحكت عن الحادثة بس أنا شخصيا معرفش صحة الكلام ده وهل هي قالته بالفعل ولا لأ بس معظم المصادر قالت إنها محكتش حاجة عن اللي حصل لحد وفاتها.
انتوا بقى رأيكم إيه في الموضوع ده وهل دا حصل حقيقي ولا تأليف وإشاعات مالهاش أساس والناس ألفتها بعد اعتزال نورة وفرقتها المفاجئ اللي حصل بدون سابق إنذار ومن غير إبداء أسباب وده اللي خلى الناس تنسج الحكاية دي من وحي خيالها ولا هو لازم يكون في أساس تتبني عليه الحكاية مهو استحالة يكون حد ألفها من العدم صحي من النوم جاله الإلهام وقرر يألف الحكاية دي علشان يتوارثها الأجيال انا شخصيا مش عارفة وعايزة أسمع رأيكم في الموضوع.
وبكدا تكون خلصت حلقتنا النهاردة وإلى لقاء آخر مع حلقة جديدة ومكان مسكون جديد من سلسلة أماكن مسكونة وأتمنى حلقة النهاردة تكون عجبتكم.
سمر إبراهيم
