أساطير حرفة

أما كوكب الأرض ده طلع كوكب خطر و يتخاف منه بسبب الأماكن الملغمة بفضائيين و جن و ظواهر غريبة...متأكدة إن بعد السلسلة نظرتكم للكوكب و للحياة كلها هتختلف...و نعيد تاني كل حاجة قولتها عن أي مكان حقيقية و لو أسطورة بقول ده...مش برعبكم و خلاص لا هو الكوكب مرعب مش محتاج يعني...و بينا على تالت دفعة من الأماكن الغريبة و اللي ملناش نروحها..

اللي ميعرفنيش و ميعرفش السلسلة..أنا (نورهان نصار) كاتبة و باحثة مصرية..و قررت اعمل السلسلة دي بعنوان(مزارات بلا عودة)عشان أعرفكم على أغرب أماكن الكوكب و اللي مستحيل تزوروها..

٣-جبل حرفة:

ننزل "السعودية" في مدينة "النماص" و تحديدًا مركز "بني عمرو"..

 هنلاقي الجبل سمعته سبقاه هناك بأن لو جاتلك الجرأة (إنك تبات فيه ليلة فهتنزل تاني يوم شاعر عظيم...يا مجنون!!!)

 

ارتفاع الجبل ٢٤٩١ م..و بيحاط بيه مجموعة كبيرة من الغابات و كمان بيغطي الجبل غيوم ضخمة..و في نص الجبل موجود صخره شكلها قريب للباب و بليل بتتحول لباب لباب حديدي و اتشهر ب "باب حرفة"

طب ما حوار إن الصخره بليل ممكن تبقى خرافة...معاكم و بصراحة بقى الجبل ده بيتقال عنه حكاوي ترعب..

تعالوا بينا بقى نعرف الحكايات دي...

-أول حكاية (اتنشرت في الصحف السعودية):

شخص من قبيلة "بني رافع" كان معزوم على فرح و في طريقة كان معدي على الجبل و هناك قابل ٤ أشخاص تركيين و معاهم عربية...عادي سياح و بيحبوا الأماكن الغريبة..

بس ممكن يبقوا واقفين جمب الجبل عادي فحب يروح يحذرهم أنهم يبعدوا عنه...لكن اتفاجئ لما لقاهم بيقولوا أن اتنين من صحابهم طلعوا الجبل من الساعة ١٠ بليل و لحد اليوم التاني منزلوش!!

 ف يمكن يبقوا تاهوا و عاوزين حد عارف المكان يطلع يدور معاهم..وافق يساعدهم..و طلعوا على الجبل..

فضلوا يدوروا على الاتنين المفقودين لحد ما لقوا واحد منهم متعلق بالصخر  و كأن حد ماسكة و ايده بتنزف بغزارة..جرى الراجل اللي من بني رافع عليه و بقى يقرأ المعوذات و آية الكرسي لحد ما ايده اتفكت من الصخر.

و فضلوا يدوروا على التاني لكن ملقهوش...فقرروا يبلغوا الدفاع المدني..

الراجل أخد معاه اتنين من التركيين و ساب اتنين مع صاحبهم اللي كان متعلق في الصخر...و أول ما رجعوا و معاهم قوات الدفاع المدني لقوا الشخص اللي لقوه من شوية مرمي على الأرض و ايده بتنزف...و العربية بتاعتهم متكسره..

-الحكاية التانية:

سنة ١٩٩٥ قرر ٤ أصحاب يخيموا هناك ناحية الجبل..و قعدوا لحد بعد نص الليل سهرانين بيتكلموا عن قصص الجن و الأماكن المسكونة و من ضمن الأماكن دي جبل حرفة اللي هما جمبه زينا يعني....

لحد ما واحد منهم اسمه "ناصر" الجرأة خدته و مين شجاع يطلع معايا على الجبل.

رد عليه "محمد" بأنه موافق و شجاع و مش خايف من أي حاجة و أكيد قصص الجبل دي خرافة..

أخدوا عربية "ناصر" و طلعوا في طريقهم للجبل و أخونا "ناصر" بدأ يخاف شوية و يتوتر و هووووووب...

داس فرامل سأله "محمد" وقف ليه قاله هو أنت مشوفتش اللي أنا شوفته!!!

"محمد" اعتبر ده مقلب من ناصر و إنه قاصد يخوفه..و كملوا طريقهم للجبل و لما لقوا جولتهم بالعربية عدت على خير قرروا ينزلوا يتمشوا حوالين الجبل..

لكن في طريقهم كانوا بيسمعوا صوت أطفال بيلعبوا!! طب ايه جابهم دول ده الفجر قرب..و مجرد ما يحاولوا يشوفوا مصدر الصوت يلاقوا الصوت اتقلب لصوت عياط.

و شكلها قلبت بجد و يلا نرجع العربية بسرعة بدل ما نتلبس لكن فين العربية...تاهوااا..

بقوا يلفوا في الجبل يدوروا على العربية و إذ فجأةً صوت ست بتنادي عليهم عايزة مساعدة.

ما هو مش هنبقى ملبوسين و معدومين الرجولة بينا نروح نشوف الست دي يمكن تبقى تايهة زينا..

راحوا لمكان الصوت لقوا ما أشبه بالعمود عليه قطعة قماش كبيرة بتتحرق..و هنا حس "ناصر" إن فيه حد بيشده من هدومه..

لف عشان يشوف مين لقى طفل صغير شكله يخوف   بيبتسم ليه و بيقوله:أمي بتقولكم إنكم صحيتوا أخويا من النوم!

هنا "ناصر" اغمى عليه من كتر الرعب..و صوت وقعته على الأرض سمعه "محمد" و جرى عليه بيحاول يفوقه..

حس "محمد" إن فيه تراب و حصى بيقع على دماغه فرفع رأسه لقى ست شكلها يخوف واقفه و شايلة طفل..

اتخض و أترعب لما الست قالتله:

-متخافش قولت للصغير يسكن جسم صاحبك!

بقى يعيط و بيحاول يبعد فقالت له:

-هو أنت مفكر إنكم هتخرجوا من هنا! 

و بقت تأكل الطفل اللي شيلاه...ده كله تحت صدمة "محمد"...و قالت:

-أنت دلوقتي ابني!

و فضلت تكرر فيها لحد ما قالها:

-إزاي و أنا إنسان!

قالتله:

-عارفة..بس ابني كان نايم على الأرض و انت ماشي دوست عليه و قتلته..و حاليًا انت ابني!

أتاخروا في رجوعهم فقرر أصاحبهم إنهم يبلغوا عن اختفائهم و بعد كام يوم لقوا "ناصر" ميت في كهف من كهوف الجبل...و على بعد ٦٠٠ متر لقوا "محمد" بس كان فقد عقله كليًا...اتجنن يعني!

و بعدها مات "محمد" في ظروف غامضة في مستشفى للأمراض العقلية.

و بصراحة كده بقى القصة دي مش داخله دماغي أوي..ما هو الأحداث دي كلها وصلتلنا منين؟؟

لو من محمد اللي لقوه و قالوا إنه اتجنن ف ممكن تكون هواجس بنسبة كبيرة و أحداث هو افتعلها!

-الحكاية التالتة (أشهر الحكاوي):

كان فيه بنت جميلة جدًا رايحة لبئر في الجبل تجيب منه ماية..و لاحظت جوه البئر خاتم جميل جدًا...حاولت تجيب الخاتم و نزلت للبئر بس مطلعتش منه تاني..و يقال إن فيه حاجة ظهرت فجأة و سحبتها من ايديها.

طال غياب البنت و دوروا عليها لكن ملهاش وجود.. و بعد أيام كان أبوها قاعد في بيته و لقى حية كبيرة داخلة من باب البيت..

قام الأب بسرعة عشان يقتل الحية لكن الحية اتكلمت و قالت:

-أنا من الجن اللي بيسكنوا جبل حرفة و بنتك أعجبت بيها و أخدتها للعالم بتاعي و بقت مراتي..و أنا جيت عشان أشوف طلباتك و أي شئ تطلبه هيجيلك!!!!

-الحكاية الرابعة:

مجموعة من السياح الأتراك عددهم ٤ قرروا يطلعوا الجبل لكن منزلوش فأهل المنطقة بلغوا الدفاع المدني و جه و بدأ يدور عليهم و لقوا الأربعة متربطين في صخرة..

مين ربطهم؟ مش فاكرين إنهم شافوا حد أصلًا..هما ناموا و صحوا لقوا نفسهم كده..

و مستحيل يبقى مقلب من حد منهم يعني ربطهم و ربط نفسه معاهم في الصخرة!!! طب ازاي!!!

و القصة دي اتنشرت في الصحف التركية و اتشهرت جدًا رغم إنها شبيهه لتاني حكاية. 

-الحكاية الخامسة:

اتنين طلعوا الجبل عشان يثبتوا للكل إن كل اللي بيتقال عن الجبل مجرد خرافة زي فيفيان فوتش" و أصدقائه "بيل داوسون" و "مارتن شيل فيلدز...اللي طلعوا جزيرة اللاعودة زي ما قولنا قبل كده و مرجعووش...ربنا يرحمهم بقى.

طلعوا الجبل بعربيتهم و هوووب العربية وقفت فناخدها موتو رجل بقى..و في طريقهم بقوا يسمعوا شوية أصوات صراخ و شوية دق طبول و حركة غريبة...و يتخيلوا بحاجات حواليهم..

و شافوا ست شكلها مش لطيف...قال الناجي منهم إنها أكلت صاحبة و هو أغمى عليه...و لما بلغ الشرطة باللي حصل.

طلع معاه ظابط للجبل على أمل إن اللي حصل ده كان هواجس و صاحبه لسه عايش بس تايه...لكن ملقوش حاجة..

و بعد يوم بيت الظابط بقى كومة تراب متفحم!!!! اتحرق كله من غير سبب!!!!

مع كل القصص دي و ترديدها بين السكان بقى كله يترعب يعدي بس من جمب الجبل بالنهار..

رغم إن من المعروف عن جبل حرفة إن عادي ممكن تطلعه الصبح بس ممكن تشوف حاجات و ممكن لا..لكن الليل لما يجي..أهل المكان بيسمعوا أصوات غريبة لكن مش عارفين ليها مصدر..

يعني لو سمعوا صوت بيفضلوا ماشيين وراه لحد ما يلاقوا نفسهم بقوا في حته بعيدة و مهجورة مستحيل حد يكون فيها و يعمل الأصوات دي.

و لو منبع الأصوات هو الجبل..ف بمجرد ما بنقرب ليه الصوت يسكت!

فمن رأيي المتواضع نلم من بعضنا و نعمل رحلة لكل التعابين اللي في حياتنا و نوديهم الجبل ده...

تفتكروا الجبل مسكون فعلًا بعد الحكاوي دي كلها و الا اي كلام؟طب تفتكروا بقى انهي حكاية فيهم صح؟

و بس كده...استنوني في الحلقة الجديدة من السلسلة...دمتم سالمين.

نورهان نصار