الحلقة الرابعة

مزارات ثعبانية

هااا لسه بتقولوا إن كوكب الأرض مجرد كوكب بيلف و خلاص و عايش عليه الناس؟؟

و الا بدأنا نقتنع إن فيه سكان كتير غيرنا سواء جن بنسبة كبيرة أو فضائيين بنسبة بسيطة!

يلا أهو يكون في شوية أكشن كده في الدنيا..

١-(جزيرة جرينارد):

جزيرة صغيرة بيضاوية الشكل...موجودة شمال غرب "إسكتلندا" و تابعة ليها..سنة ١٩٤٢ اشترتها "الحكومة البريطانية" بغرض تجربة أسلحة بيولوجية عليها...

لا و مش أي سلاح بيولوجي ده ال "Anthrax" (الجمرة الخبيثة) بجلالة قدرة..

و ده عبارة عن مرض قاتل بتسببه بكتيريا اسمها "بكتيريا الجمرة الخبيثة" و بيصيب الحيوانات و البشر..

ال "Anthrax" انتشر في الجزيرة بشكل مرعب و اتسبب في موت ٩٥٪ من الحيوانات اللي اتجرب عليها..فمن الطبيعي البشر ميقربوش من الجزيرة بدل ما يتصابوا...

و فضل الجزيرة ممنوع زيارتها لحد سنة ١٩٩٠ قررت "الحكومة البريطانية" إنها تطهر الجزيرة و تزيل بقايا الحيوانات الميته بالمرض..

و خلاص الجزيرة بقت أمان و زي الفل بس محدش اتجرأ يقرب منها...معلش دي جزيرة كان عليها مرض قاتل و موت ٩٥٪ من اللي عليها..ايه الجذاب في الجزيرة دي يعني يخليني أزورها..دي كلها موت!!!

بعد كده طلع مجموعة من العلماء قالوا إن بنسبة كبيرة لسه بكتيريا ال "Anthrax" عايشة في تربة الجزيرة فأي بشر هيدخلوها هيبقوا عرضه للعدوى...و أن الجزيرة هتفضل كده لكام قرن و يا عالم المرض هيروح منها و الا لا........

❈-❈-❈

٢-(قعر جهنم):

فاكرين فيلم journey to the center of the earth..لما نزلوا لباطن الأرض و كانوا بيقابلوا عوالم تانيه و مناظر طبيعية تسحر مش موجودة هنا على الأرض..بالظبط ده اللي حصل في "اليمن" من كام شهر!

ننزل محافظة "المهرة" في "اليمن" و هنلاقي هناك مكان كده اسمه "بئر برهوت"...ماله بقى البئر ده؟؟

دائري و قطره ٣٠ متر و اتسمى على اسم الوادي اللي فيه اللي هو "وادي برهوت"..طب نعرف جواه ايه لا طبعا بس بنسمع اصوات منه تخوف كده و اصوات جريان مايه..و لو قربنا شويه هنلمح حمام و أفاعي ساكنة البئر...و كعادتنا كبشر و عرب لما بيكون فيه حاجه زي دي بنقول بااااس ده فيه جن ساكنين المكان ده..

طب هحكيلكم حكاية كده صغيره رواها "الأصمعي" عن راجل من "حضرموت"...بيقولك اي بقى...أن الراجل اللي من حضرموت ده هو و قومه كانوا قاعدين عادي في يوم من الأيام و فجأه لقوا ريحة وحشة جدا جاية من نواحي البئر فجأة كده و هوووب بعد شوية عرفوا أن فيه راجل كافر مات لا و مش أي كافر ده من الأسماء التقيلة.

طب حاجة تانية كده لو فتحنا معجم "البلدان" هنلاقي أن "ياقوت الحموي" ذاكر أن اسم برهوت:(وادي في اليمن توضع فيه أرواح الكفار).

حكاية تالتة بقى منتشرة جدا هناك أن واحد خيم هناك في الوادي جمب البئر بس فضل طول الليل يسمع "يا دومة يا دومة"

مين دومة ده...دومة ده يقال أنه الملك الموكل بأرواح الكفار.

باااس يا نور ده كده ١٠٠٪ البئر ده جواه أرواح الكفار اللي بيموتوا.. ده كده جهنم اللي بيتعذبوا فيها ف بس احنا نشهر المكان ده ب "قعر جهنم".

طب بئر يا نور من الطبيعي جواه مايه..ما هو فعلًا جواه مايه بس دي شر مياة الأرض...هتقولولي ايه الكلام ده....اقولكم تعالو...

الخليفة على ابن أبي طالب رضي الله عنه قال( أبغض البقاع إلى الله

تعالى وادي برهوت بحضرموت فيه بئر ماؤها أسود منتن يأوي إليه أرواح الكفار)..

لا و خدوا الكبيره بقى أن  النبي صلى الله عليه وسلم  قال عن البئر :(إن فيه أرواح الكفار والمنافقين، وهي بئر عادية في فلاة واد مظلم، وروي عن علي رضي الله عنه أنه قال: أبغض بقعة في الأرض إلى الله عز وجل: وادي برهوت بحضرموت، فيه أرواح الكفار، وفيه ماؤها، أسود منتن، تأوي إليه أرواح الكفار)، وعنه أنه قال: شر بئر في الأرض: (بئر بلهوت في برهوت، تجتمع فيه أرواح الكفار)..

طب ما البئر ده كده حكايتة تقلق و زي ما هتقلق ناس هتثير فضول ناس برضه أنهم يحاولوا يعرفوا ايه جواه..و ده فعلا اللي حصل بس بالعقل كده مكان معرفش ايه جواه و بترعب لو وقفت جمبه من الأصوات اللي بتطلع أقوم أنزل فيه..طب ما فيه راجل قبل كده نزل فعلا بس طلع ميت و دي حكاية بتتقال هناك عن البئر..لا ده احنا نجيب كاميرا و ننزلها مع طياره درون..و فضلت الكاميرا تنزل تنزل تنزل تنزل و مفيش نهاااية طب نطلعها بقى...

الكاميرا عطلت لسبب محدش يعرفه و لحد الأن مش راضية تشتغل🙂 و ده زود رعب الناس هناك بأن المكان فعلا مسكون أو جواه أرواح شريرة.

المهم بقى فضل الوضع كده و قنوات تروح تصور الوادي و تحاول تصور في البئر لكن متعرفش تقارير تنزل عن أن البئر مكان مسكون و مجهول و كلام من ده...لحد ما جه اتنين من خيرة شباب "عمان" و قرروا أنهم ينزلوا بنفسهم يستكشفوا البئر و نزلوا و عرفونا كام حاجه..

-عمق البئر طلع ١١٢ متر.

-قطر فوهة البئر قولنا قبل كده ٣٠ متر..لكن قطر قاعدة البئر ١١٦ متر..نازل على وسع يعني.

-فيه حيوانات كتير عايشة جوه البئر ضفادع بقى و خنافس غير الأفاعي.

 

-ماية البئر بتنزل من الجوانب ف بتدينا شكل شلالات جميلة جدا.

-منظر البئر من تحت يسحر أي حد و الصور أها عندكم...

طب طالما البئر طلع كويس أهو أومال اللي الأحاديث بتقوله ده و اللي "الأصمعي" قاله و ده راوي محترم من رواة العرب و الراجل اللي نزل و طلع ميت ده..طب بلاااش اللي خيم في الوادي و سمع "دومة يا دومة"..ده بقى لا يعلمة إلا الله و احتمال كبير تكون مجموعة أساطير تناقلت بين الناس و احتمال وارد برضه أن البئر فعلا يكون مأوى أرواح الكفار..ده كله هيبان بعدين بأذن الله. 

❈-❈-❈

٢-(جزيرة بوفيليا):

على شمال ايطاليا كده ناحية البندقية هنلاقي جزيرة "بوفيليا" و اللي معروف إنها مسكونة بالأشباح..

و ده بسبب أصوات و أضواء مجهولة المصدر بتخرج منها و ترعب السكان اللي ناحيتها...

  

و بصراحة كده بقى بنسبة كبيرة جدًا الجزيرة دي مسكونة لأن مع انتشار "الطاعون" في "البندقية" سنة ١٣٤٨...كانت "بوفيليا" هي الحجر الصحي و المرضي بيتبعتوا لهناك مستنيين مصيرهم الحتمي و هو الموت!

و من كتر الوفيات أتخلصوا من الجثث عن طريق حرقها..

و الموضوع خلص على كده؟ لالالالا

في القرن ال ٢٠ نضفوا الجزيرة إلى حد ما بس عشان يحولوا المباني اللي كانت حجر لمستشفى أمراض عقلية و في حكاية إن دكتور من دكاترة المستشفى كان بيستغل المرضى بإنه يعذبهم و يقتلهم و بعد ده كله اتلعن و اتجن و اتقتل!! هل ده انتقام من أرواح المرضى اللي قتلهم بدون أي حق!

و اتقفلت المستشفى سنه ١٩٦٨ بعد ما سابت الحكاية دي وراها و اللي سببت رعب كبير في نفوس الناس...و الحكومة منعت إن أي حد يقرب من الجزيرة سواء ساكن محلى أو سائح منعًا لأي حاجة مش لطيفة ممكن تصيب أي حد..

و ده معناه إن المكان بالفعل غريب سواء بقى من كم الطاقة السلبية اللي انتشرت فيه بسبب الحجر و المستشفى..أو مسكون بأرواح ضحايا "الطاعون" و دكتور المستشفى!

الله أعلم..

و بس كده خلصت رحلتنا النهاردة و استنوني في رحلة جديدة على الكوكب اللي ملوش نهاية ده.

دمتم سالمين.

نورهان نصار