هو هل احنا بس المصريين اللي بندور على كنوز الأجداد و المصايب اللي حصلت من ورا حفر البيوت عشان الأثار؟؟و الا فيه شعوب تانية كده؟؟

في المغرب...عندنا بنت جميلة جدًا اسمها نعيمة..مالها نعيمة بقى..من ذوي الاحتياجات الخاصة بسبب عيب خلقي في رجليها اتسبب في بطء حركتها...

كانت في يوم مع اختها و رايحين لحد قريبهم و فجأه نعيمة اختفت..و بعد ٤١ يوم لقوا بواقي جثتها مع بواقي الفستان اللي كانت لبساه مرمي على جبل..و اللي لقى ده راعي غنم!

نعيمة بجانب إن عندها عيب خلقي في رجلها..بتتصنف إنها طفلة زوهرية!! ايه الطفل الزوهري؟

طفل عادي جدًا أبوه و أمه من البشر..و هو بشري لكن عنده علامات معينة تميزه عن غيره..

!كف ايده فيه خط كامل من النص مش زينا..

!عيونهم فيها نسبة حول بسيطة...

!لسانهم فيه خط مستقيم طولي بيقسم اللسان لنصين..

!جميع الأطفال الزوهرين ذو عيوب خلقية..

طب ما كل دي عيوب خلقية..ايه بقى زوهري و الكلام الغريب ده؟؟

يقال إن أصل كلمة زوهري من كتاب الزُوهار و ده أكبر كتاب سحر يهودي...

أو إن أصل الكلمة جة من كلمة الزهر..اه في إشارة لحظ الطفل العالي...

ما أصل الطفل الزوهري ده عنده قدرة يكشف أماكن الكنوز تحت الأرض و كمان الجن بيحب يبقى حواليه جدًا عشان دمه نقي و ده شئ غالي جدًا للجن..و بيتحرموا الزوهري جدًا و بيخافوا منه..

ف جم السحره و الناس اللي بتحب تدور على الكنوز و بس نستغل الاطفال دي..و بقى كل ما يلاقوا طفل عنده العلامات اللي فوق دي يخطفوه من أهله و يطلعوا بيه كنز و يا يرجعوه لأهله أو يقتلوه يا يسيبوه معاهم أهو يطلعلهم كان كنز.

طب ما يسيبوه و خلاص..

ازاي بس و هما بيروحوا للمكان اللي ساكنين إن فيه كنز و يكتبوا نصوص معينة على جبين الطفل و يخلوه يمشي و أول ما الطفل يقع على الأرض يعرفوا إن الكنز تحته...

و فيه منهم يقدموا الزوهري للجن ما الجن بيحب الزوهري بسبب دمه النقي فاحنا بقى نقدم لهم الدم ده!!!

عشان كده كترت حالات اختفاء الأطفال اللي عندهم العلامات دي خصوصًا في المغرب..و عشان كده برضه الأسر هناك بقوا يخفوا ولادهم لما يلاقوا فيهم اي علامة من دول!!

نيجي بقى الأديان..هل اتذكر حاجة زي دي أو مشابهة حتى؟

لا مفيش..لا في القرآن و لا التوراة و لا الإنجيل..

من الأخر و رأيي الشخصي مجرد عيوب خلقية جرا وراها شوية سحره و لصوص كوسيلة لتحقيق أطماعهم.

اتقبض على قاتل نعيمة و هو راجل في الستينيات و ليه تاريخ سابق في البحث عن الكنوز...

و على فكرة كون إنك تدور على كنز ده مُجرم في بلاد كتير و على رأسهم المغرب...

الطفل الزوهري طفل عادي جدًا لكن جهل و أطماع الغير جعلوا منه كنز متحرك.

نورهان نصار.