الحلقة الخامسة 

سلسلة مزارات بلا عودة 

سحر أم خرافة

حلقتنا النهاردة برعاية أم الدنيا مصر...بس قبل ما نبدأ كده ما تنسوش تصلوا على حبيبنا النبي و توحدوا الله..

دايمًا كده لازم نلاقي أم الدنيا منورة في أي مكان و أي حتة و أي وقت...حتى في الأماكن المسكونة اللي ملناش كبشر نقرب منها..هنلاقي مصر مليانة أماكن كتير من دي..و على رأسهم..

عمارة رشدي:

من ضمن الأماكن اللي يقال إنها مسكونة عندنا هي عمارة رشدي..اللي مفيش حد دخلها و شاف يوم عدل فيها..و اتسمت بالاسم ده عشان موجودة في حي رشدي..على طريق أبو قير...

نيجي للبداية كده و تحديدًا سنة ١٩٦١ لما قرر الخواجة"بارديس"

و ده راجل اعمال يوناني قرر يعمل عمارة شيك يعيش فيها هو و مراته و عياله و يسكنها كمان مفيش مانع..و جاب مهندسين و بدأوا شغل و خلصت العمارة بعد شهور و كانت تحفة فنية حاجة كده فاخر من الأخر..بل إنها اتصنفت من أجمل و أروع عمارات "اسكندرية" و مكونة من خمس طوابق.

 

و انتقل الخواجة "بارديس" بعيلته للعمارة و قرر يطلع رحله صيد مع عياله و ساب مراته في العمارة...و في خلال الرحلة اتقلبت بيهم السفينة و مات الخواجة "بارديس"و عياله..فدخلت مراته في اكتئاب..جوزها و عيالها ماتوا في نفس الوقت و مبقاش ليها حد..و كرهت العمارة.

عرضتها للبيع بشكل كانت من نصيب "محسن بيك" و ده تاجر خشب تقيل وقتها..ماله بقى عن الحج...قال مش هبيع شققها تمليك بس هأجرها و أجر شقق أول طابق لراجل اسمه"سيد عباس".

اللي بعد يومين من وجود عيلة سيد في العمارة..الطابق الاول بالكامل ولع!!

 و مات "سيد عباس" في الحريقة..و مراته و عياله قالوا لا ده كده العمارة دي فعلًا نحس.

و فضلت العمارة فاضية كام شهر لحد ما "محسن بيك" وقع على دكتور أسنان عاوز يأجر شقة تنفع لعيادة فأجرله شقة من العمارة في الطابق التاني.

  بدأ الدكتور يجهز عيادته بديكوراته و معداته لكن مات يقلب أمه في حادثة قبل ما حتى يفتح العيادة بشكل رسمي...و نركز بقى في تفاااصيل الحادثة.

الدكتور كان نازل من العمارة عادي و لسه بيحط رجله على اسفلت الشارع جات عربية و راحت خبطاه و مات فورًا و ربنا يرحم أمواتنا جميعًا...

جات ست أرملة أجرت شقة في الطابق التالت..لوحدها و ولادها جابولها الشقة تقعد فيها..مفيش كام يوم و لقوها مقتولة!!!

طب التحقيقات وصلت للقاتل؟؟؟

لا مفيش أي بصمات و لا في أي حاجة اتسرقت من الشقة..و فنفس الوقت الست دي كلها بيشهد لها بإنها طيبة و ملهاش خلافات...فاللي عمل كده بقى سببه ايه؟؟؟

دي بقى لا يعلمها إلا الله...

 و شركة أجنبية أجرت الطابق الرابع كمقر ليهم في مصر لكن الشركة فلست و صاحبها انتحر جوه مكتبه!!!

و بعد كام يوم اتفزع الناس على صوت صريخ فطلعوا يشوفوا في ايه...و لقوا مستأجر شقة في الطابق الخامس و الأخير..بيرمي نفسه من البلكونة و مات!!!!

و ده كله و عم "محسن بيك" صامد و مبعهاش..لحد ما مات..و فضلت العمارة فاضية و سمعتها مسمعة اسكندرية كلها..و عدت كام سنة و جم أحفاد المعلم "محسن" و قالوا بس يلا نحاول نأجرها و نشوف حظنا..و بالتأكيد الناس نسوا اللي حصل زمان..

لحد ما وقعوا على عريس أجر الطابق الأول عشان يسكن فيه مع مراته..و جاب عمال يجهزوا الدنيا لكن لقاهم بيقولوله إنهم بيسمعوا أصوات غريبة و كمان بيشوفوا بقع دم على الحيطة.

وقتها طنش و قال ممكن بيتخيلوا أو حاجة.

و بعدين كل حاجة جهزت و الفرح اتعمل و دخل الشقة هو و مراته..و ده طبعًا من غير ما يحكيلها حاجة عن اللي العمال قالوه عشان ميقلقهاش...بدأ يلمح بقع دم بتظهر على الحيطان و كذلك عروسته فحاولوا يتجاهلوا ده و ميبوظوش ليلتهم ممكن يبقى عيب تشطيب أول حاجة..

 عريسنا دخل الحمام ياخد دش و أول ما فتح الدش لقى دم نازل عليه فاتفزع  سمع مراته بتصرخ...

جرى على أوضتهم لقاها على الأرض بتصوت و في قط لونه أسود قاعد على السرير و حجمه كبير قريب من الكلب بيبرق ليهم..

و راح ناطط القط عليهم و بدأ يخربش فيهم و لقوا كل حيطان الشقة ماسكة فيها النار بدون سبب مرة واحدة كده!!!

جروا على باب الشقة لكن لفوا الشقة كلها مش لاقيين الباب!!

حسوا بحركة وراهم..لفوا فشافوا جسم ست بيتحرك في الصالة ناحيتهم بس من غير رأس!!! 

و على الأرض لقوا رأس بتبص ليهم و بتضحك بشر!!!

طلعوا يجروا على المطبخ قريب منهم و أهو ينطوا من شباكه..بس لقوا هناك راجل أسمر جدًا و ليه أنياب و بيقربهم منهم عشان يأكلهم...

طلعوا يجروا على البلكونة و نطوا هما الاتنين..

العريس أغمى عليه و العروسة نزلت ميتة!!!

و فاق العريس على أصوات الناس و هنا بيحاولوا يفوقوه في الشارع و يغطوا جسمه هو و عروسته لأنهم عريانيين!!!

نتلم بقى و نتقي ربنا..لاااا ازاي نشوف مستأجرين جداد..

كام عيلة منهم يقوموا يلاقوا عفشهم مرمي في الشارع متكسر..

اللي منهم يحس بزلزال...و اللي الحنفيات عنده تنزل دم..خيالات بيشوفوها و أصوات بيسمعوها..

 

فقرر أصحاب العمارة اللي هما أحفاد "محسن بيك"

ياخدوا خطوة جد و يجيبوا شيخ أهو يعرفهم في ايه لو في سحر يفكهولنا و نُرزق بقى.

جابوا كام شيخ بقى؟؟؟؟؟

الشيخ الأول:

لسه بيقول يا هادي و هيطلع العمارة ملقاش أي درجة سلم!! السلالم كلها اختفت مرة واحدة!!

الشيخ التاني:

طلع عادي بس ملقاش أي باب شقة!! الطوابق كلها عبارة عن جدران لكن مفيش باب يدخله لأي شقة!!

الشيخ التالت:

كان شايف إن اللي بيتقال عن العمارة مجرد سُمعة بس عشان حالها يقف..و إن مفيش جن يقدر يعمل الأفعال دي و كلها حكايات فارغة..

فقرر إنه يأجر شقة في العمارة و يا أنا يا الجن اللي فيها...و فضل في الشقة يوم و التاني عمال يقرأ قرأن و يدور على أدلة للي بيحصل و لو فيه جن فبيحاول يطرده بالقران الكريم لكن مع اليوم السابع صحى كل السكان اللي جمب العمارة على صوت صريخ..فيه ايه فيه ايه؟؟؟

لقوا عم الشيخ نازل بيجري من العمارة و هو بيصوت و شكله مفزوع و العفش بتاعه مرمي في الشارع و متكسر..حاولوا يهدوه و يفهموا منه ايه حصل بس مردش عليهم و أخد ديله في سنانه طلع يجري..لكن الشيخ فقد النطق من حالة الرعب اللي كان فيها و بعد كام يوم مات متأثر من خوفه!!

باني العمارة و مات بعياله!!

كل سكان العمارة بعد كده ماتوا في ظروف مش لطيفة اللي منتحر و اللي مقتول و اللي محروق!!!

العريس و عروسته ربنا يرحمها!!

شكاوي السكان بحوادث غريبة!!

الشيوخ و اللي حصل معاهم!!!

طب ايه بقى اللي مخلي العمارة مسكونة..ما كل حاجة ليها سبب...

١-بيقولك كان في مقام مبني و جه صاحب الأرض هده عشان يبيع الأرض..و المشتري كان الخواجة بارديس..فلعنة ربنا حلت على المكان و روح الوالي ساكنة العمارة بتنتقم من السكان.

٢-كعادة أي مكان مسكون فإحنا كبشر نقول ده أتبنى على مقابر قديمة..و نفس الحال في حالة عمارتنا.

٣-إن الخواجة بارديس أتفق مع شركة مقاولات صحابها اتنين شركاء يبنوها..و واحد منهم غدر بالتاني...فقام التاني رايح لساحر و عمله سحر و دفنه ف العمارة عشان يوقف حالها...

٤-إن في مصحف مدفون في أساسات العمارة وقع من جيب واحد من العمال..و العمارة اتبنت عليه و ده حرام عشان كده المكان ملعون..

و بعدين البوليس قرر يتدخل لإن دماغه وجعته من كتر الكلام على العمارة دي فمنع دخولها لأي شخص اللهم إلا حارس العمارة و اهله اللي ساكنين في البدروم..طب و دول يا نور ليه مش بيحصلهم حاجات غريبة؟

بصوا بقى زي ما في حكايات بتقول إن العمارة مسكونة في حكايات تانية بتقول العكس...

لأن شباب مصريين قرروا يقتحموا العمارة و فعلًا نفذوا يوم ٣١ أغسطس سنة ٢٠١٢..و فضلوا ماشيين في العمارة لمدة ساعة كاملة و البواب عمال يصرخ بإنهم يخرجوا بدل ما يولعوا كلهم..و طلعوا و هما بيقولوا هو فين الجن ده يا جماعة..و مين اللي يسكن العمارة دي و كل شققها على المحارة!!!!!

يعني كده اللهم صلي على النبي في دليل إن العمارة عادية و مش مسكونة فإن لو مسكونة أكيد الشباب دول كانوا هيتأذوا لكن كلهم طلعوا كويسين من هناك و أخيرًا قدر حد من البشر يثبت عكس اللي بيتقال عن مكان..لا و مش أي حد دول المصرررررين.

و بس بعد الحركة دي العمارة خدتها شركة مقاولات و كملوا طوابقها لحد ما بقت برج مكون من ١١ طابق

 و أهو متسكن و لا حد من سكانه ضرسه وجعه حتى..و تفضل حكاوي عمارة رشدي منتشرة و الأراء منقسمة لجزء يقول مسكونة و جزء يقول لا مجرد خرافات...

أنتوا بقى رأيكم ايه؟؟؟؟؟

و في الختام متنسوش تصلوا على حبيبنا النبي و توحدوا الله و متنسونيش في دعوة حلوة و ليكم بالمثل بأذن الله..

نورهان نصار..