رواية زواج مثالي 

بقلم الكاتبة منى محمود

رواية زواج مثالي

الفصل الخامس والعشرون

والأخير

الحياة الزوجيه مش كلها حب و دلع و رومانسيه ولا كلها نكد و خناق و مشاكل 

الحياة الزوجيه زي الطفل الصغير بالظبط محتاجة اهتمام ورعايه دائما ...

  محتاجه تغافل احيانا .... 

وتسامح احيانا محتاجة ....

محتاجة صبر كتيييييير 

واهم حاجة عشان الحياة الزوجيه تستمر بحلوها ومرها ان يكون في مشاركة بين الطرفين مش طرف يدي وطرف ياخد وبس 

الكلام الحلو و تطيب الخاطر مش حاجة تافهه دول ممكن يقومو بيت كامل او يهدموه في ثانيه واحدة

 راعو مشاعر بعض وزي ما بتطلبو الكلمة الحلوة قالوها الاول

مفيش زواج مثالي لأن ببساطة مفيش حد فينا مثالي عشان يقدر يعيش في زواج مثالي 

كلنا فينا عيوب كلنا عندنا قصور في شخصيتنا كلنا نفسنا في اللي يتقبلنا زي ما احنا فلازم احنا كمان نتقبل اللي قدامنا ومنحاولش نشكله علي مزاجنا أو طباعنا

اول غلطة الستات بتقع فيها هي ((( الندب ))) دور الضحيه الي بيعجبها وبتستسلم له وتفضل ٢٤ ساعه بينها وبين نفسها أو مع المقربين منها تندب انا حظي وحش انا جوزي فيه وفيه انا مظلومة انا مقهورة انا مغلوبه علي امري 

اي واحدة ظروفها اقوي منها قدامها حل من اتنين

 يا تتعلم ثقافه الرضي بالمكتوب وتعافر وتحاول من وسط كل المشاعر السلبيه اللي محواطاها أنها تعمل حاجة حتي لو صغيرة جدا جدا ليها هي ترسم بيها الضحكة علي وشها حتي لو فنجان قهوه حتي لو بسكويت مع كوبايه شاي

 اي حاجة تحسي انها خاصه بيكي وبيتعمليها

 ل نفسك عشان تطبطبي عليها وتحبيها وتهوني عليها اللي هي فيه 

يا بقي تتحدي الواقع ترفعي عنك الازي باي طريقه ممكنه تعرفي انك لو عايزة تعملي حاجة هتمعليها أن كيدهن عظييم انتي قوية ومعافرة و بتعملي مليون حاجة في وقت واحد هتقدري تكملي وتعدي وتنجحي بس انتي مبتطليش معافره

البيت مش حطيان ولا مكان لازم يكون نظيف ٢٤ ساعه ....

 البيت دفا وضحكة حلوة وكلمة احلي من حد بترتاح معاه وحاسس أن مينفعش تكمل من غيرة 

الزواج المثالي .... الزواج القائم علي المشاركة بين الاتنين  والكلمة الحلوة وتطيب الخاطر والتغافل المتبادل و قبول الطرف الآخر لشريكة بعيوبه قبل مميزاتة

الزواج المثالي .... في أن كل زوج و زوجة يراعو ربنا في شريك حياتهم

اتمني ليكم التوفيق جميعا نرجع ل رواياتنا بقا 

❈-❈-❈

عدي بعد ما كان متعصب جدا ... نبرة صوتها و ابتسامتها ونظرة عينيها له خلوه من غير ما يحس هو كمان يبتسم ابتسامة عبيطة كدة 

عدي وهو مبتسم  ...

بجد ؟ 

هايدي مقدرتش تمسك نفسها علي شكله اللي اتحول وضحكت ضحكة بصوت عالي جدا فاق عدي من حاله اللي كان فيها ورجع لل غضب تاني 

عدي ...

انتي بتثبتيني يا هايدي ؟ 

هايدي بحب ....

والله العظيم بحبك يا تاعب قلبي 

عدي وهو بيقرب منها ...

وانا كمان بحبك بحبك اوي 

صابرين من علي باب الاوضه ...

اااااحم اااااحم انتم في بيت خالتي ابتسام ام عمار ولستم في منزلكم اااااحم اااااحم 

هايدي اتحرجت جدا لانها فعلا نسيت هما فين و ولسه هتجري برة الشقه عدي لاحقها ومسكها من كتفها جامد 

عدي بتحذير ....

ادخلي البسي عبايه ولا حاجة واسعه الاول ويلا علي شقتنا خلي يومك دا يعدي علي خير 

هايدي بتهرب ....

انا هكمل اليوم مع البنات و انت هات كريم وتعالي 

عدي برفعه حاجب ...

نعم يختي !! بنات مين ؟ بقا انا سبت الاجتماع المهم اللي  كنت قاعد فيه في امان الله وجيت علي ملا وشي وتقوليلي هقعد مع البنات 

هايدي لسه هتتكلم عدي قاطعها 

عدي بحزم ....

اخلصي يا هايدي ولو علي معاد كريم ف متقلقيش انا عامل حسابي ع كل حاجة يلا يختي يلي فرحانة بصوت ضحكتك اوي يلا 

هايدي خدت الاسدال ال كانت داخله بية والبنات جوة عماله تضحك عليها وخرجت مع عدي علي شقتهم 

مكة بتحسر ....

شايفين اخويا حبيبي في الرومانسيه مبيهزرش ازاي حسره عليا وعلي حظي

راويه بتعجب ...

نعم ؟ هي فين الرومانسية دي دا داخل يزعق ويقولها يومك اسود 

مكة كشرت ...

هو كدة قمة الرومانسية يا بنتي ايش فهمك انتي حبيبي يا دودو عنيف اوي في حبة هييييح بقا

زهرة ...

هي حصلت ل هييييح ما تشوفي اخوكي فين يا صابرين يجي للي بقت هييييح علي نفسها هنا دي 

صابرين بضيق ....

والله انتم عالم فاضيه انا جعانة هو السمك دا جاي امتي يا زهرة بقا 

مكة ...

يا بنتي ارحمي نفسك لسه بدري علي الغدا

صابرين ...

لسه بدري ؟ يعني ايه لسه بدري دي لا انا جعت خلاص 

راويه ...

تعالي يا صابرين نعمل سندوتشات تصبيرة كدة ومعاها عصير هتظبط معاكي شوية 

صابرين وهي قايمة مع راويه ...

يلا يختي بلا وجع قلب 

زهرة ...

صابرين دي فظيعه بجد يا بخت اللي هتكون من نصيبه

مكة ...

والله دي كلمتي دايما باقول يا بخت اللي هتكون من نصيبه ما يغركيش انها بتحب الاكل والهزار والكلام ده صابرين جدعه جدا ست فعلا ب 100 راجل وطيبه وحنينه اوي 

زهرة ببتسامة ...

عارفه يا مكه احلى حاجه ان احنا كلنا كده فينا شبه من بعض يعني نفس الطيبه والحنيه والجدعنه الحمد لله

لمار بصتلهم بحزن ووطت راسها بعد كلام زهرة الاخير مكة خدت بالها 

مكة بتااييد ...

فعلا والله الحمد لله اي نعم لمار كانت محتاجه ضبط زوايا بس اهي اتعدلت الحمد لله ورجعت وبقت زينا بالظبط وضحكتها جميله ازاي بصي منوره وشها وبكره تقوم وتقف على رجلها وترجع ترازي فينا ونرازي فيها

زهرة ...

ان شاء الله بكره تقف على رجلها تاني وترازي فينا يا ستي براحتها ما حدش هيقول لها انتي بتعملي ايه

بصت لهم لمار بحب وابتسمت علي كلامهم اللي عمرها ما كانت تتخيل تسمعه منهم ابدا 

❈-❈-❈

نرجع ل عدي وهايدي بعد ما نزلو الشقه 

عدي بهدوء ...

هو انا مش قايل الميك اب ما يتحطش بره البيت صح ولا لا

هايدي ...

صح قلت 

عدي ...

ومش قايل ان صوت ضحكتك ده يوطى وبلاش المياعه اللي بتبقى في الضحكه دي صح ولا لا

هايدي ...

صح قلت 

عدي ...

و منبه مليون مره على اللبس بره البيت انه يبقى واسع ومش ضيق صح ولا لا

هايدي...

صح منبه 

عدي برفعه حاجب....

يا اختي حلوه ولما هو صح كل الكلام ده ما بيحصلش ليه النهارده حصل عكس كل حاجه انا قلتها ليه افهم

هايدي ببتسامة ...

اولا انا رحت بالاسدال ثانيا انا ما حطيتش ميك اب غير ساعه لما جيت اصور لك الفيديو ثالثا هو كان يوم وطقت في دماغنا ان احنا نعمل حاجات مجنونه فيه عادي يعني كلنا كنا ستات واديك شفت اول ما الباب خبط كلهم جريو على الاوضه وانا بس اللي فتحت لك عشان عرفت ان انت فاكيد لو كان انس اللي جه او حتى عمار برده كنت انا كمان هاجري على الاوضه ما كانش حد هيشوفني ما تكبرش الموضوع بقا 

عدي كشر. ...

هو انا كل ما اتكلم معاكي في حاجه تقولي لي ما تكبرش الموضوع اقول لك وليد قال لك ايه تقولي لي ما تكبرش الموضوع اقول لك ما تحطيش ميك اب قدام حد تقولي ما تكبرش الموضوع يا ستي انا بني ادم بحب اكبر المواضيع انا كده و خلاص اللي حصل ده ما يتكررش انا مش عايزك ملفته قدام اي احد حتى لو ستات اقول لك حتى لو امي واختي مش عايزك تبقي قاعده قدامهم باين ان شكلك حلو اتفقنا ولا ما اتفقناش

هايدي باستغراب ...

انت بتتكلم بجد ولا بتهزر

عدي ...

لا طبعا باتكلم بجد هي الحاجات دي فيها هزار

هايدي بتردد. ...

اصلي يعني مش عارفه بس اصل يعني انت ما كنتش كده

عدي ....

مكنتش وبقيت يا ستي .... وعلي فكرة لو ركزتي شويه هتلاقيني طول الوقت كنت بغير عليكي يمكن مكنش بصورة واضحة اوي كدة لكن كانت الغيرة جوايا والله لما قلتلك شغل لا لما سيرة وليد كانت بتجنني لما تهزري زيادة شوية مع انس أو عمار انا من زمان واقع فيكي وبغير عليكي بس مكنتش فاهم نفسي صح 

هايدي بدلع ...

مممممم ودلوقتي بقا فهمت 

عدي وهو بيقرب منها ...

يالهوي دا انا فهمت فهم مفهمتوش في حياتي كلها تعالي افهمك معايا 

هايدي وهي بتجري منه ...

لا لا انا مش عايزة افهم شكرا لخدماتك 

عدي وهو بيجري وراها ....

خدي يا بت هنا ... متقطعيش نفسي في الجري حرام عليكي .... خدي بس هقولك على حاجة اخيرة بجد 

هايدي ....

ابدا مش هقف ويلا أمشي معاد كريم قرب يادوب تلحق تجيبه وترجع هنتغدي كلنا سوا انهاردة 

عدي وهو بيبطل جري ...

الله هو انا مقلتلكيش

هايدي هي كمان بطلت جري ...

لا مقلتليش في ايه ؟

عدي ببتسامة مكر ...

انا كلمت عمي ياخد هو كريم من وليد ويخليه بايت عندهم انهاردة يعني الليله ليلتك يا جميل يا مدوخني يا ابو فيديوهات تجنن انت 

وقبل ما هايدي تفكر تجري منه تاني كان عدي لاحقها وشايلها علي كتفه 

هايدي بصدمة ...

عدي نزلني ايه اللي بتعملو دا انت مالك بقيت كدة ليه ؟

عدي وهو بينزلها في اوضتهم وقريب اوي منها 

عدي بهمس ...

بقيت كدة اللي هو ايه ؟

هايدي بخجل ...

كدة يعني جريء شوية 

عدي ...

يمكن عشان اتاكدت اني بعشقك مثلا 

هايدي بحب ...

انا كمان بعشقك يا عدي ربنا يخليك لينا يا حبيبي 

عدي ابتسم وقرب اكتر من هايدي قرب من حبيبته ومراته من اللي ملكت قلبه وخلته رجع شاب مراهق تاني 

 ❈-❈-❈

بعد ساعتين تقريبا كانو متجمعين علي الغدا عند محسن ما عدا هايدي وعدي 

ابتسام ...

يجعله عامر دائما يا حاج 

محسن ....

بلمتنا ديما يارب يا ام عمار

عمار بتذكر ...

صحيح يا ماما ده  يوسف صاحبي عايز يجي يتغدى بكره عندك محشي وبط وملوخيه الله يخليكي بقى معلش هاتعبك معايا بس هو طلب مني وبصراحة مش بيتاخر عليا ابدا في اي حاجة ف اتحرجت اقولو لا

ابتسام ...

عيني يا حبيبي يشرف وينور متشلش هم 

مكة ...

محشي وبط وملوخيه هي العزومه دي ليوسف صاحبك بس ولا ايه النظام

ابتسام ...

من غير ما تقولي يا غلباويه انتي كلنا هنتغدى مع بعض بكره

احلام ...

لا معلش اعذرونا احنا بقى نرجع بيتنا ادينا بقى لنا يومين هنا اهو

صابرين كشرت ...

هو في ايه يا ماما احنا لسه لحقنا نقعد بتقول لك محشي وبط وملوخيه ما تصلي على النبي بس كده في سرك واستهدي بالله

احلام ....

عليه الصلاه والسلام يا بنتي حرام عليكي فضحاني في كل حته كده اللي يسمع كده يقول ان انتي ما بتاكلهمش ابدا

ابتسام ...

باقول لك ايه سيبيها براحتها تقول اللي هي عايزاه وما فيش مشيان لسه احنا قاعدين مع بعض كام يوم ما تتكلم يا انس انت مش كلمت ابوك وابوك وافق

انس ...

والله قلت لها ان هو وافق انه يسيبهم تاني يومين ثلاثه اسبوع حتى وهو بنفسه كلمها وقال لها اقعدوا براحتكم لكن هاعمل ايه بقى هي اللي ما بتقدرش تقعد بعيد عن بيتها ولا بعيد عن جوزها

صابرين ...

طب وانا ذنبي ايه يعني خلاص يا ماما روحي انت وسيبيني انا قاعده هنا معاهم 

ايمان ...

خلاص يا احلام قضي بكره معانا كمان اللمه حلوه يا حبيبتي وبعد كده عايزه تروحي انتي روحي وسيبي صابرين اسبوع ولا حاجه معانا وانس يبقي يرجعها

صابرين ...

الله عليكي يا خالتو يا حبيبتي هو ده الكلام

عمار ...

ايه يا راويه مالك ساكته كدة ليه ؟

مكة ...

بتاكل بتاكل ساكته عشان بتاكل اوعي تكون فاكر انها لسه ما فكتش ونيني نيني ولا حاجه دي كانت لسه جايبه صابرين من شعرها جوه دلوقتي 

راويه ...

انا مش عارفه انتي حاطه نقرك من نقري ليه هو سالني وانا كنت لسه هارد عليه مالك انتي تردي ليه نيابه عني هه

زهرة ...

لا هي مكه حاطه نقرها من نقر اي حد ما تعرفيش مالها مهيبره بقى لها كام يوم علي الوضع دا

صابرين ....

 بالها رايق ومرتاح وهيييييح  مش عايزين نوضح يا جماعه 

مكة برفعه حاجب...

طب لمي نفسك يا صابرين

ايمان ...

هي قالت حاجة غلط مالك ومالها

انس بحب ...

ربنا يريح بالك ديما يا حبيبتي

صابرين ...

اوعدنا يارب بقاااا

ضحكو كلهم علي مكة اللي حدقت صابرين بالمعلقه والتانيه وطت بسرعه عشان متجيش فيها وقت كله ضحك وهزار وحب 

❈-❈-❈

 بعد الغدا زهرة اتكلمت مع عمار واقنعته يدخل يشوف لمار عايزاه ليه ودخل فعلا دخل وهو مكشر ومعاه الأجندة والقلم وحطهم قدامها 

عمار ...

زهره قالتلي ان انتي عايزه تتكلمي معايا وتبلغيني بحاجه خير حاجة ايه دي ؟

بصت لمار بحزن ومسكت الاجنده والقلم وكتبت

لمار ...

انا عارفه انك زعلان مني ومش طايق تبص في وشي ومهما قلت انا اسفه مش هتغير حاجه  رغم ان كل اللي هنا سامحني بس انا عارفه ان انت مش هتصفي بسهوله انا بس كنت عايزه اطلب منك حاجه اخيره ممكن ؟

عمار هز دماغه بموافقة بهدوء وهي كملت 

لمار ...

انا عارفه انك هتطلقني من معتز و أن حق اللي عمله فيا هيجيلي انت مش هتسيبو بس انا عملت حاجة ومش عارفه مفروض اتصرف فيها ازاي ...

عمار كان واقف جمبها وبيقرا اللي بتكتبه بتركيز شديد 

لمار ...

انا قبل ما كل دا يحصل لميت دهبي كله و خبيته في الاوضه اللي شايلين فيها الكراكيب تحت السلم ونسيت في وسط كل اللي حصلي ومش عارفه اخدة ولا اسيبه ليهم ولا اعمل ايه ف قلت اقولك انت وانت تتصرف و رجاء يا عمار عشان خاطر ربنا حاول تسامحني انا مش هعرف اسامح نفسي ولا ابدء من جديد الا لما انت تسامحني يا عمار انت ابويا واخويا وصحبي وانا والله ندمانة اوي واسفة يا اخويا حقك عليا حاول تسامحني

خلصت كتابه ورفعت وشها ل عمار وهي دموعها نازله مش بتقف وبتبصلة بندم وحزن وهو بقا واقف محتار مش عارف يعمل ايه ولما طولو كدة نزلت لمار راسها بحزن علي أنه مش قادر يسامحها وهو اتخنق و لف عشان يخرج وقبل ما يخرج قالها 

عمار بوجع ...

اللي انا فيه دا غصب عني سيبي الايام هي اللي تدوب الجليد اللي بقا بينا واكيد هصفي واسامح في يوم انتي ف الاول والاخر بنتي ... ( خد نفس عميييييق وكمل ) ... بالنسبه ل دهبك هجبهولك دا حقك و طلاقك من معتز مساله وقت وعلي فكرة الحيوان اللي كلمتيه اتقتل ال عرفته من سجل مكالمته أنه كان له علاقه ب ستات متجوزة كتير وتقريبا حد منهم أو من اجوازهم خلص عليه اطمني انتي ف امان من اي فضيحة 

خلص كلامة وخرج من غير ما يبصلها وهي انهارت في العياط علي اللي وصلت له الندم مش بيسيبها كل ليله لما حسه أنه بيخلص عليها بالتدريج 

❈-❈-❈

خرج عمار ودخل البلكونة و ولع سيجارة و وقف مخنوق وحاسس أن الهوا بيخلص من حواليه لاقي ايد بتطبطب علي كتفه بيبص لاقاها زهرة 

زهرة بحب ...

حاول تنسي عشان خاطري 

عمار بوجع ...

مش قادر في حاجات كتير انتي متعريفهاش  لمار كسرتني يا زهرة 

زهرة بحزن وهي بتحضنه ...

بعد الشر عليك من الكسرة يا حبيب زهرة متقلش كدة ربنا يخليك لينا وتفضل سندنا وضهرنا العمر كله 

عمار شدد علي حضنها واتكلم بحب ...

بحبك يا زهرتي والله بحبك اوي عارف اني كنت غبي معاكي و كنت باجي عليكي كتير بس انتي حبيبتي و هتسامحي مش كدة ؟؟ مش هتوجعي قلبي يا زهرة فوق ما هو موجوع صح 

زهرة كانت حسه بالوجع اللي في صوتة حست أن قلبها هي ال وجعها هي بتحبه وانتهي الأمر 

زهرة رفعت راسها وخرجت من حضنة لكنة خلاها قريبه منه اوي 

زهرة ...

وهي زهرة تقدر تعيش من غير حب عمار ... وهي زهرة اصلا اي من غير عمار انت عارف اني بحبك ومقدرش ابعد عنك ابدا يا حبيبي

عمار بحب ...

وعمار بيعشق زهرة والله العظيم وعمره ما هيزعلها تاني ... بحبك يا زهرتي 

ولسه هيقرب عليها خبت وشها في حضنة 

زهرة بخجل ...

احنا في البلكونة يا مجنون 

عمار ضحك ...

دي مشكلتك البلكونة طب تعالي نكمل كلامنا جوة في اوضتنا يلا 

زهرة كشرت وهي بتزقه ...

ايه هو دا انت مش مكتئب وانا كنت بواسيك 

عمار ...

الله ما انا لسه مكتئب وانتي جوة هتواسيني حلو  اوي كمان انا متاكد تعالي بس يلا 

زهرة وهي بتدخل وبتدبدب علي الارض ....

والله قليل الادب 

عمار رمي السيجارة ودخل وراها ...

بت يا زهرة تعالي يا بت واسيني في أحزاني انا وحيد وربنا بقالي مدة كبيرة وكدة غلط انتي يا بت 

❈-❈-❈

انس كان قاعد هيطق ومن كتر العصبيه رايح جاي ف الاوضه مش قادر يقعد بعد مدة دخلت مكة 

مكة باستغراب من شكلة ...

ايه دا مالك في ايه ؟

انس بغضب وصوت واطي...

هو انا هافضل في حظر التجول كده كتير وانتي قاعده بره كل ده بتعملي ايه

مكة ...

في ايه يا انس بالراحه كنت قاعده مع صابرين وخالتو  و تالا اخذت وقت جامد على ما نامت

انس بغيظ ...

كده كتير يا مكه كتير اهتمي بيا شويه زي ما بتهتمي بكل حاجه حواليكي 

مكة ....

انت عايز تنكد ولا ايه يا انس مالك ما كنا كويسين

انس بغيظ...

ما مكملناش الكويسين  انا هفضل كاتم في نفسي كدة لحد امتي أن شاء الله هه

مكة بضحك ...

هههههههههههههههه وانا مالي انا اختك لسه هتقعد معانا اسبوع ولا اتنين بقا وربك يسهل 

مسكها انس من كتفها جامد و قربها منه 

انس ...

لا بقولك ايه انتي مش تشتغلي دلع وتخليني هتجنن عليكي وترجعي تقوليلي لما ربك يسهل اظبطي كدة معايا 

مكة وهو بتحط ايديها حوالين رقبته ...

وانا ذنبي ايه يعني أخرج اقولهم امشو روحو عشان جوزي مجنون مش قادر يصبر

انس شدها من وسطها عليه واتكلم ب همس 

انس ...

لا متقوليش حاجة بس ترحميني شوية وبعدين انتي لو كتمتي صوتك دا شوية وقفلنا الباب بالمفتاح مش هيحصل حاجة يعني وحشتني اوي يا مكة اوي 

مكة بحب ...

وانت كمان وحشتني اوي اوي يا حبيبي

فقد انس اخر ذرة تماسك عندة وقرب منها ونمشي احنا بقا 

❈-❈-❈

صباح يوم جديد مشرق كله حب وتفائل كله رضا وحمد 

الستات من الصبح بدري كانو بيجهزو للعزومة العدد كبر بوجود راويه و صابرين واحلام و حسين جوز احلام الي محسن أصر عليه يجي يتغدى معاهم ويرجع مع احلام تاني يوم الصبح وطبعا يوسف 

ابتسام ...

يلا يا زهرة سيبي اللي ايديك دا وروحي ريحي شوية انتي جوة متضغطيش علي نفسك يا قلبي 

زهرة ابتسمت ...

وهو انتم سايبني اعمل حاجة انا يدوب خلتوني احضر حاجات السلطة و عليا في الاخر الملوخيه اديني قاعدة معاكم القاعدة الحلوة دي بالدنيا والله 

راويه ل مكة ...

انتي بتكعوري ورق الكرنب مش بتحشيها يا بنتي ايه دا 

مكة برفعه حاجب ...

بت انتي خليكي في حالك 

ايمان وهي بتضربها علي رأسها ...

ما هي معاها حق ايه المنظر دا كام مرة أعلمك تحشي الكرنب و ورق العنب ازاي وانتي جاموسه زي ما انتي 

الكل ضحك خصوصا راويه 

مكة كشرت ...

شكرا يا ماماتي شكرا يلي رافعه معنوياتي قدام الناس شكرا اوي 

هايدي ...

خليكي انتي وصابرين ف البتنجان والفلفل يا موكا وسيبيلي انا ورايه الكرنب و ورق العنب دا 

مكة بحب ...

قلبي يا مراه اخويا شايفه يا اااامي الكلام بيتقال ازاي 

زهرة ...

قومي من قدام طنط بسرعه شكلها مش مبشر

صابرين بضحك ...

خالتي بتتحول يا جدعان 

ضحكو وكملو كانت وليمة مش سفرة وعمار وانس وعدي اصرو أن كل واحد فيهم يشارك ب حاجة في العزومة ومهما محسن يتكلم إلا أنهم نفذوا اللي في دماغهم 

❈-❈-❈

وقبل ما الرجاله يوصلو كانت البنات جهزت ولبست لبس مناسب و حضرو كل حاجة 

يوسف من اول ما دخل وسلم عليهم وهو عينيه اتعلقت علي واحدة بس وفضل متابعها من غير ما حد ياخد باله لكن عمار خد باله 

عمار  ...

عينيك يا باشا بدل ما امشيك أعور من هنا

يوسف ببتسامة ...

هي مين ؟ ومرتبطة ولا لا ؟

عمار برخامة ...

ملكش دعوه

يوسف برفعه حاجب ...

بقا كدة طب مش هقولك علي اخر اخبار جتلي عن قريبك اللي من. اسكندريه 

عمار بلهفه ...

رامي !! قول عرفت ايه ؟

يوسف برخامة ..

ملكش دعوة

عمار بغيظ ...

مش وقت رخامة يالا قول 

يوسف مبتسم ومش بيرد 

عمار ...

ابو رخامتك اسمها صابرين تبقي اخت انس جوز مكة بنت عمي وكانت مخطوبه والموضوع مكملش من اسبوعين تلاته كدة 

يوسف ببتسامة...

الحمد لله أنه مكملش ما انا مقعدش كل دا نفسي اتهبب ويوم ما احس ان في واحدة مناسبه اتهبب معاها تطلع مخطوبه كنت هتعقد انا ودا مش كويس عشاني 

عمار بغيظ ...

بطل هري نسوان واخلص ماله رامي ؟؟

يوسف ...

اتمسك في اخباريه مخدرات كان معاه حوالي ست رجاله كدة و عربيه مكربسه هيروين اتمسك متلبس يعني ومتحفظين عليه جامد عشان شهد علي الراجل اللي مشغله من اول قلم وقال علي كل حاجة 

عمار بحزن ... 

الله يرحمها أمه لو كانت عايشه وشافت اللي بيعمله دا 

يوسف قاطعه ..

كانت طبت ماتت واديها ماتت خلينا في الحايين دلوقتي انا عايزة اتكلم مع صاصاتي كلمتين ع جمب كدة قبل اي خطوة 

عمار بقرف ...

تتكلم مع مين يا حيلتها ؟

يوسف ببتسامة....

صاصاتي باعتبار ما سيكون يعني 

عمار لسه هيرد ندهو عليهم علشان الغدا اتجمعو علي السفرة اللي مكفتش وجابو ترابيزة طويلة تانيه قصادها 

محسن ...

منورين يا جماعه طبعا مش محتاجين عزومة دا بيتكم يلا بسم الله 

حسين ...

منور بأهله يا حج تسلم وتسلم ايديكم جميعا علي تعبكم 

ابتسام ...

ولا تعب ولا حاجة الف هنا وشفا ... واد يا يوسف كل يا واد متعمليش فيها مكسوف 

يوسف ببتسامة...

لا مكسوف ايه دا انا اللي طالب الاكل دا ومن امبارح مكلتش عشان اعرف اكل مزاج تسلم ايدك يا ست الكل تسلم ايديكم جميعا 

ابتسام ...

تسلم يا حبيبي بالهنا والشفا

انس ...

بس كانت مفاجأة حلوة منك يا عمي انك قدرت تقنع بابا يجي 

محسن ...

اومال يا بني هو انا هفأ زيكم 

عدي كشر ...

ايه يا حج هو حد فينا اتكلم دلوقتي 

عمار بسخرية ...

دلوقتي هيقولك ( قلد صوتة ) انا براحتي اقول اللي انا عايزة وقت ما انا عايز 

كلهم ضحكو علي طريقه عمار وهو بيقلد عمة وبعد الغدا عمار خد يوسف و انس وعدي وقعدو في البلكونة و محسن وحسين كانو بيلعبو شطرنج برة في الصاله و الستات منتشرة راويه و مكة كانو بيغسلو المواعين ويروقو المطبخ و زهرة و صابرين بيجهزو المشروبات وهايدي بتروق مكان ما اكلو وإيمان وابتسام و احلام قاعدين سوا يتكلمو 

زهرة وصابرين خلصو ومدخلين القهوة والشاي

صابرين ...

خدو وشوفو مين عايز ايه اتصرفو مع بعض بقا 

عمار ...

ما تدونا انتم ما احنا قلنا لما جينا نطلب كل واحد عايز ايه 

صابرين ...

واحنا بقا هنفضل فاكرين صح ؟ يا بني احنا دخالنا المطبخ عملنا نص العدد شاي سكر برة ونص تاني قهوة مظبوط وانتم مع نفسكم بقا 

يوسف ببتسامة...

تفكير سليم والله يا انسه صابرين 

صابرين بصتله من فوق ل تحت وابتسمت ابتسامة رخمة ...

ممم 

انس ...

ماشي يا آخرة صبري احنا هنتصرف تسلم ايديكم .

خرجو البنات ويوسف غمز ل عمار أنه عايز يتكلم ع صابرين وعمار ضحك علي صحبه اللي طب في الحب من أول نظرة 

❈-❈-❈

بعد مرور تلت سنين حاجات كتير اتغيرت منها الحلو ومنها الوحش 

راويه اتجوزت من سنه المحاسب ال ماسك حسابات المعرض وحياتها الزوجيه هي كمان  بدأت  بحلوها ومرها  وحاليا في انتظار مولودة جميلة تنور حياتهم و راويه مصممة تسميها خديجة علي اسم ماماتها وجوزها مش ممانع ابدا 

صابرين كمان بعد العزومة دي بسنة كانت هي ويوسف متجوزين وحاليا معاهم ياسين و يحيي تؤام وحياتهم كلها ضحك ومرح وحب 

أما ابطالنا 

زهرة وعمار ربنا عوضهم ب سليم نور حياتهم وقربهم من بعض اكتر واكتر

انس ومكة جابو اخ ل تالا وسموة اسر 

عدي وهايدي وكريم أسرة صغيرة بس سعيدة وراضيه 

كل حاجة كانت جميلة عدا أن لمار جسمها مستجبش للعلاج الطبيعي نهائي وفضلت علي الكرسي بس كانت راضيه من جواها حسه أنا عقاب ربنا ليها في الدنيا ومتقبلاه وراضيه بيه وكل يوم تصلي وتدعي أن ربنا يغفر لها ويسامحها وعمار يوم بعد يوم بيقرب منها تاني مرجعوش بنفس القوة الي كانت بينهم بس العلاقه بينهم اختلفت كتير بقا فيها مودة ورحمة 

والعمارة اللي جمعتهم متمسكين بالقعاد فيها مهما حالتهم الماديه ما تحسنت ومهما عدداهم ما زاد إلا أن العمارة ال شهدت لمتهم و حبهم ووجعهم ليها معزة خاصه جوة قلوبهم واستحاله يفرضتو فيها أبدا 

تمت بحمد الله

اتمني من اي حد الروايه عجبته أو شف فيها قصور معينه ميبخلش عليا برأيه سواء في كومنت أو ريفيو والقاكم علي خير أن شاء الله في نوفيلا صغننه بعنوان (((عشق الروح)))