قراءة رواية أبلة فلافل كاملة

تنشر حصريًا على مدونة رواية وحكاية قبل أي منصة أخرى

قراءة رواية ونوفيلا أبلة فلافل

من روايات وقصص 

الكاتبة أسماء عبد الهادي

الفصل الثالث

وفجأة لاحظت فلة حاجة غريبه فقالت

_استنى كدا لحظة يا خالتي

واتسحبت وقربت من العربية لقت ايد بتتمد براحة وبتسحب ساندويتش كبدة 

فمسكت ايده وقالت

_مسكتك يا فار يا حرامي الكبدة يا صايع، طب كان عندك بواقي الأكل خده وانت ساكت انما اقول ايه فار وعبيط كمان

شدت إيديه وهو حاول يداري وشه علشان فلة متتعرفش عليه 

لكنها قدرت تتعرف عليه واول ما شافته شهقت وقالت

_ينيلك يا واد يا حموكشا انت بتسرق اختك يالا يا خسارة تربيتي فيك، تربية هم ورب الكعبة ما سايباك النهاردة

حمدي صرخ وقال

_لا والله خلاص يا أبلة فلافل أخر مرة مش هعمل كدا تاني

_لا وربنا ما سايباك انت بتعمل كدا اومال سبت ايه للغريب والحرامية ها 

_جعان يا أبلة فلافل جعان، وبصراحة ريحة الكبدة بتاعتك واصلالي من قلب البيت 

_طبعا لازم توصلك، ما انت طفس ومبتشبعش مش بقولك بلاعة وملهاش غطا... غور يلا علشان ريحتك فاحت انجر ع البيت اخلص في يومك ده 

_طب هاتي الساندويتش يا أبلة عيني هتطلع عليه 

_يا خويا يكش تطلع وارتاح منك، امشي ياض

_ططط طب نصه حتى

_والله ولا عشروا حتى امشي فز ياض من هنا

حمدي زعل وقال 

_والله انتي معندكيش قلب ولا بتحسي.... بقولك جعان 

_تعالى يالا خد صعبت عليا 

_الله ايه دا اخيرا هتأكليني كبدة الله 

وطت وخلعت شبشبها ونزلت بيه على دماغ اخوها وقالت

_لا يا روح أمك مش هأكلك كبدة هأكلك علقة محترمة لحد ما يبانلك صحاب

_الله ايه ده يا أبلة حرام عليكي

_حرمت عليك عشتك يا بعيد... انت يلا مبتحسش انا مش لسه عاطياك واحد انت وأخوك قبل ما أبدأ شغل انت هتفضل طفس كدا لحد امتا

_ماهو واحد بس ميكفيش ميعملش معايا حاجة

_لا تعالى كلني يالا بالمرة، أعملكم ايه اكتر من كدا اولع في نفسي يا زفت علشان تكونوا مبسوطين

_يعني حتة الساندويتش اللي هيأزم معاكي يعني يا أبلة

رفعت ايدها تدعي

_يارب يارب، يا تهديهم يا تهدهم أيهما أقرب، انا تعبت يارب 

_,غور يالا من وشي، انا لو عطيتك العربية كلها مش هتشبع، يا طفس يا طفس.

جت الست حفيظة واشفقت عليه وطلعت فلوس وقالت

_طيب معلش اديله ساندويتش كمان على حسابي

_انتي بتقولي ايه يا خالتي ده انا اللي اجبلك العربية كلها ومتغلاش عليكي 

جه حاموكشا وقال 

_اهي قالتلك اهي على حسابها هاتي بقا وبطلي بخل يا جلدة 

فقالت

_ياولا انا ماسكة نفسي عنك بالعافية متخليش جننوتني تطلع عليك ف الشارع امشي هتفش الزباين.

_ما انا زبون والست حفيظة هتدفعلي هاتي بقا 

حفيظة قالت

_اديله علشان خاطري يا فلافل، وادي حقه اهو

_خلي فلوسك معاكي يا خالتي، هعطيله علشان خاطرك ها... وانت يا طفس متاخدش على كدا فاهم ولا افهمك بطريقتي 

حمدي حط الأكل في بوءه وقال وهو بيأكل الساندويتش كله مرة واحدة 

_فااهم

_يخربيتك حطيته في بوءك مرة واحدة ازاي، وربنا فعلا فيه بلاعة جوا 

__

سيف دخل ورا تسنيم المطبخ فلقاها واقفة  بتتكلم مع الداده فقال بزعيق _انتي يا زفته مش بكلمك

تسنيم بصتله بحدة 

_ما تحترم نفسك يا جدع انت الله، انت قاعد تغلط وانا ساكتالك من الصبح وبعدين انت مغرور ومتكبر وشايف نفسك على ايه مش فاهمة، فيك ايه مميز يعني عن اي حد، 

سيف رفع حواجبه والدادة حطت ايدها على بؤها بصدمة وشدت تسنيم من ايدها وقالت

_استنى انتي بتقولي ايه اسكتي.

سيف ربع ايده حوالين صدره وقال

_لا سبيها تغلط أكتر علشان حسابها معايا زاد اوي

_حساب ايه انت مفكر نفسك مين، اتفضل اطلع برا 

_كمان، لا انتي بجحة بقا، برااا ومشفتش وشك هنا تاني 

قالها سيف وخرج من المطبخ وهو منترفز

تسنيم بصت للدادة وقالت 

_دادة مين الانسان الوقح ده 

الدادة قالت وهي بتضم بؤءها

_ده سيف بيه ابن أحمد بيه يعني اخوكي يا انسة رغد 

تسنيم فتحت بوءها وقالت بصدمة 

_نعم ده اخويا، طب مش كنتي تزمري يا دادة بدل ما انتي سايباني داخلة فيه زي القطر من غير فرامل 

ضحكت الدادة وقالت

_فعلا دوستي ومن غير توقف 

_بتضحكي يا دادة ماشي اعمل ايه انا دلوقتي واودي وشي منه فين دلوقتي ، بقا ده اول تعارف ما بينا واطلع قليلة الزوق اوي كدا 

_معلش هو هيتفهم ده، اطلعي انتي اعتذري منه وفهميه انك مكنتيش تعرفي وفرحيه بأنك رجعتي دول هيموتوا عليكي بقالهم سنين 

_حاضر يا دادة هطلع ، بس انا محروجة منه ، اقولك هنتظر بابا لما يصحى.

_طب ايه رايك تطلعي تشوفيه وتصحيه علشان ده معاد الغدا وتتغدوا كلكم مع بعض

_والله فكرة... ماشي تمام .

__

سيف طلع فوق ودخل اوضة ابوه يطمن عليه فلما لقاه نايم 

قرر انه يروح اوضته ويغير هدومه وبعدها يروح لوالده يصحيه علشان يتغدوا سوا.

__ في الوقت ده تسنيم طلعت  اوضة أحمد ولما لقته نايم، فضلت واقفة قصاده تبص عليه وتتأمل في ملاحه وهي لحد دلوقتي مش مستوعبة انه فعلا باباها

ولما لقته مستغرق ف النوم قالت

_لا حرام بلاش اصحيه خليه نايم، اكيد تعبان ومحتاج يرتاح

ولما جت تخرج لقت اللي بينادي عليها

_تعالى يا رغد يا بنتي

تسنيم لفت وشها وابتسمت ليه وقالت

_اسفة اني ازعجت حضرتك

ابتسم وقال

_لا ازعاج ايه بس، ده انا ما صدقت اني اصحى على الوش الجميل ده وش بنتي حبيبتي ونور عيني... تعالي يا رغد قربي مني ولا تحبي اقولك يا تسنيم 

_لا عادي اللي حضرتك تشوفه

قام أحمد وحضن بنته واتنهد براحة وقال 

_الحمد لله ان ربنا ردك لحضني تاني الحمد لله .. مالك مبلمة ليه 

_بصراحة لحد دلوقتي لسه مش مستوعبة 

_معلش مع الوقت انا عارف. انك حاسة ان الوضع جديد عليكي ومش واخدة عليه، بس لما تشوفي محبتنا ليكي هتتأقلمي علينا بسرعة... اه من حق زمان اخوكي سيف رجع من الشغل، يلا ننزل علشان تشوفيه واعرفك عليه 

وقفت تسنيم بحرج وقالت

_اه ما انا شفته 

_بجد طب حلو اوي

_لا مش حلو، معرفناش بعض وشدينا شوية 

ضحك أحمد وقال

_معلش هو سيف اخوكي عصبي شوية وساعات بيكون مدب بس قلبه طيب جدا وحنين... المهم احكيلي بقا شديتوا ازاي

_ولا حاجة هو فكرني الشغالة الجديدة وانا فكرته واحد مغرور ومتكبر وقلتهاله في وشه 

أحمد ضحك جامد وتقريبا كدا مضحكش من قلبه كدا من فترة طويلة جدا 

وقال

_وهو سابك تقوليله كدا وسكت، ده مش بيسكت لحد أبدا 

ضحكت تسنيم وقالت

_لا ما هو طردني وقالي برا مشوفش وشك هنا.

ضحد أحمد تاني فضحكت تسنيم هي كمان.

وهنا دخل سيف ولما شافهم بيضحكوا  كشر وقال

_ البنت دي بتعمل ايه هنا انا مش قلتلك تطلعي برا 

تسنيم بصت لأحمد وقالت

_اهو شوفت بنفسك 

ضحك وقال _شفت

وبعدها قال لسيف

_تعالى يا سيف ومتبقاش حمقي كدا

_ازيك يا بابا وحضرتك عامل ايه دلوقتي

_الحمد لله كويس يا ابني، روحي اتردت ليا بعد ما اختك رجعلتنا بالسلامة

_نعم اختي مين اللي رجعت وهي فين

_اختك رغد يا سيف واهي قدامك اهي

_نعم دي رغد ازاي يعني، هو كل من هب ودب يجي يقول انا بنتكم رغد نصدقه! 

_لا مش من هب ودب يا بني دي اختك رغد فعلا

_امتا وازاي يا بابا ما انا كنت لسه معاك الصبح من كم ساعة لحقت تلاقيها فين دي وتتأكد انها رغد اختي

_أنا قلبي حس بيها يا بني، انا قلبي دليلي وانا مش ممكن اتوه عن بنتي أبدا

سيف قال باستياء 

_يا بابا اكيد حضرتك بتهزر مش كدا، ازاي بعني اللي بتقوله ده 

_في ايه يا سيف انت بتشكك في كلامي

_العفو يا بابا بس النصابين والاستغلاللين كتير واكيد دي واحدة منهم

_سيف عندك انا مسمحلكش تقول على اختك كدا 

_دي مش اختي ولا هتكون

وبعدها وجه كلامه ليها وقال

_انتي مين يا بت انطقي بدل ما اوديكي في ستين داهية

تونا قالت

_اتلم يا سيف انا لحد دلوقتي ساكتة وعاملة اعتبار لأبوك ،لكن لو اتعديت حدودك متلومش الا نفسك انا بقولك اهو

_لا والله عال انا مشفتش زي كدا بجاحة، امشي اطلعي برا حالا

هنا أحمد زعق وقال

_سيف انت بتقول ايه انت اتجننت

_يا بابا حضرتك ازاي تقول عليها انها اختي، حضرتك اتأكدت ازاي من دا، هل لحقت عملت الدي ان ايه  ونتيجته طلعت علشان تكون واثق كدا

_قتلك انا مش محتاج اعمل اي حاجة انا واثق انها بنتي من غير اي حاجة 

_يا بابا الله يرضي عليك مفيش كدا، اكيد دي كلها تهيؤات ملهاش اي اساس من الصحة كل ده علشان حضرتك منى عينك بنتك ترجعلك علشان كدا ما صدقت ان البنت دي فيها كتير من صفات رغد او حتى بتتدعيها وكدبت الكدبة وحضرتك صدقتها 

تسنيم كانت واقفة مصدومة 

اما أحمد فكشر بوشه وزعق وقال

_سيف انت بتقول ايه، كل اللي بتقوله ده مش صحيح ،تسنيم بنتي انت فاهم، واياني اسمعك تقول غير كدا 

_يا بابا طب ممكن حضرتك تقولي ايه اللي يثبت ده، طب حتى حضرتك ننزل حالا نعمل التحليل

_مش محتاج أعمل ده وقلتلك تسنيم بنتي انت فاهم يا سيف

قالها ومسك ايد تسنيم وخرجوا من الاوضة

_يلا يا تسنيم ننزل نتغدى تحت

وقال لابنه اللي واقف مصدوم من ابوه

_عايز تنزل تتغدى معانا تنزل وانت ساكت ،لكن كلام من البايخ بتاعك ده انا مش هسمح بيه ابدا 

سيف وقف بيأكل في نفسه من الغيظ

_اه يا بت الإيه، بقا عرفتي تلعبي اللعبة على ابويا صح وقدرتي تلحسي عقله بالسرعة دي، لا بجد انتي نصابة محترفة من الدرجة الاولى... بس على مين مش هسمحلك بده أبدا، انا وراكي والزمن طويل

علشان كدا قرر انه ينزل يشاركهم الغدا

_انا هنزلها وهتكون تحت عيني لحظة بلحظة لحد ما انتهز الفرصة المناسبة اللي هوقعها فيها وهقلعها من هنا

❈-❈-❈

اما تحت احمد لقى تسنيم واقفة زعلانة فقال بصوت كله حنان

_ متزعليش يا بنتي، سيف ميقصدش اي كلمة من اللي هو قالها

_لا حضرتك هو معاه حق في اللي قاله

_يا رغد افهمي، سيف يوميا دا ان  ما كانش كل ساعة بيتلقي اتصال كاذب فيه مليون بنت بتقوله انها رغد، علشان كدا اعذريه في تصرفه ده، معاكي انك ممكن تعتبريها قلة زوق او وقاحة، بس هو فعلا تعب يا رغد كلنا تعبنا سنين طويلة جدا بندور عليكي ومفيش خيط واحد بس، وفجأة الخيوط كلها تكون في ايدنا وتظهري انتي من العدم

_بس انا بردو لسه عند رأيي  ان حضرتك لازم تعمل تحليل الحمض النووي ده

_ماشي هعمله علشان اريحكم كلكم ،انا عارف انكم مش هترتاحوا ولا هتسكتوا الا لما اعمله بس مش دلوقتي في وقته ان شاء الله.

جت تنسيم ترد فشاور لها احمد على السفرة وزق الكرسي علشان تقعد جنبه

_عايزك جانبي علطول ومش عايزك تفارقيني أبدا

_بابا احكيلي عنك أكتر 

_ممم عايزة تعرفي ايه وانا أجاوبك

_مم حضرتك بتحب ايه بتكره ايه بتشتغل ايه كم سنة ماما فين واسمها ايه وانا ازاي ضعت منكم كل كل حاجة يا بابا 

_انتي مش عارفة انا بشتغل ايه، ما الاعلان مكتوب المهندس  احمد صاحب أكبر شركة للسياحة في مصر

_بصراحة لا مركزتش لده لان اول ما بابا قالي انه مش بابا انا اتبرجلت ومفكرتش ف اي حاجة تانية غير اني ازاي هسيبهم وهمشي

_لا متخافيش مش هبعدك عنهم ولا هحرمك منهم... وحاضر هحكيلك كل حاجة بس بعد الأكل، ما احنا هنقضي كل وقتنا مع بعض فهنقول كل حاجة لاني كمان حابب اسمع منك عن حياتك كاملة.

_حاضر هحكيلك كل حاجة، حضرتك مش هتبطل ضحك عن فلافل

_مين فلافل دي بقا

_دي أعز صديقة ليا، وجارتي كمان وليها فضل كبير جدا في حياتي

في اللحظة دي جه سيف وسمع اخر كلمة قالتها تسنيم لكنه مهتمش وقعد مكانه بهدوء

أبوه ابتسمله وفرح انه نزل علشان يشاركهم الأكل 

بدؤا كلهم يأكلوا وسيف كل شوية يبص لتونا بضيق شديد

وتونا تتحاشى انها تبصله 

وبعد الأكل أحمد جاله اتصال فقال 

_هرد على الاتصال المهم ده وهرجعلك يا حبيبتي

اما سيف قرب من الكرسي بتاع تسنيم وقال

_متفكريش انك كدا كسبتي اللعبة، وقدرتي تعملي اللي انتي عايزاه، لا أنا مراقبك وعيني عليكي ها، خليكي متأكدة من دا 

_ممكن أعرف انت عايز مني ايه

_عايز اكشفك على حقيقتك المزيفة

_الله يسامحك يا سيف 

_اخرسي متجبيش اسمي على لسانك انتي فاهمة يا بت انتي

هنا أحمد خلص مكالمته وجاي عليهم

فسيف همس لها 

_اياكي تقولي اي حاجة لبابا فاهمة 

_اسمع انا عارفة انك مش متأكد اني انا اتنمى للعيلة دي ولا انا على فكرة متأكدة، بس عايزة اطلب منك طلب ممكن تتحملني كم يوم بس لحد ما أحمد بيه بعمل التحليل ونتأكد

_لا يا شيخة واسيبك ترمحي هنا زي ما انتي عايزة 

  _معلش اعتبرني يا سيدي، ضيفة او عابرة سبيل وجاية عندكم يومين واوعدك مش هعمل ايه حاجة تضايقك 

_موافق بس تتنيلي تدخلي اوضتك ومتطلعيش منها غير بإذني فاهمة وتخفي عن ابويا شويا ها شغل السهوكة والنحنحة ده انا مش عايزه

تونا قالت في نفسها

_ يا باي عليك، اتمنى بجد مكونش اختك علشان اخلص من وشك ومن سماجتك اعوذ بالله ايه البرود والرخامة دي

_ها قلتي ايه 

_ها... ماشي ماشي اللي تشوفه

_مش مطمنلك من ساعة ما شوفتك

_وانا والله مش مرتحالك ابدا، القلوب عند بعضيها بتنفر علطول

_اتلمي يا بت بدل ما ألمك

_ بت لما تبتك، لا اسمع لما اقولك ان كنت مفكر انك هتستعبدني هنا وانا هسكتلك لاااا 

_اوف شغل الحواري بدل، يع بيئة اوي

_سيبت ليك الدلع يا نوغا

سيف قام وكان هيضربها 

_وقسما بالله لأوريكي 

أحمد جه وقال

_سيف انت بتعمل ايه 

سيف اتوتر و شال ايده وقال

_لا ده .. ده انا كنت ببوس اختي يا بابا 

وقرب من تسنيم وعمله انه بيبوس راسها وهمس وقال

_طولة لسان انا مش عايز خدى بعضك وعلى فوق مش عايز اشوف وشك يلا 

تونا بصتله بضيق وقالت

_ب.. بابا 

سيف بصلها بنظرة نارية

فأحمد قال

_نعم يا روح بابا 

_انا تعبت وعايزة اطلع اوضتي 

_ماشي يا حبيبتي اطلعي ارتاحي ولما 

تصحي نتكلم بقا براحتنا 

_ماشي يا بابا 

سيف قام وقف وقرب منها 

_بردو انتي مبتفهميش 

تسنيم سابته وطلعت ع اوضتها 

وقالت

_ اعوذ بالله وربنا رخم رخامة ودمه يلطش انا مش هنزل تحت وهو موجود تاني ابدا، يلا بقا يا احمد بيه اعمل التحليل النيلة ده خلينا نخلص بقا

سيف بالليل طلع اوضته ومسك صور اخته وبدأ يقلب فيها ويفتكر أيام وهو صغير وكان بيشيلها ويلعب بيها 

فقال

_ياااه يا رغد كنت بحبك اوي كنتي كل حياتي... كنتي عيني اللي بشوف بيها 

وفجأة عينه لمعت

_لحظة واحدة... اه يا بنت النصابين، دلوقتي بس كشفتك على حقيقتك 

مسك الصورة من ع المكتب وجري ع اوضة تونا

وفتحها وبدأ يدور عليها وهو متعصب 

وفجأة لقى حاجة ضربته ع دماغه

_اااه 

_حرامي حرامي .. حرامي دخل اوضتي 

حط ايده على بوءها  وقال

_اكتمي هتصحي بابا يا متخلفة

_اهو انت 

_بت انتي ضربتيني بإيه 

_بالطاسة يا حلو 

_ليه ياختي فاكرة نفسك روبزل زمانك

_اينعم انا هيا، بس يعني شعري مش طويل بس مش مشكلة 

_طب انجري كدا وانتي عاملة زي عم برعي البواب

_برعي في عينك، صدق انك معندكش نظر ولا زوق كمان وجاي تتهجم على اوض بنات الناس زي الحرامية

_والله محدش هنا حرامي الا انتى انتي يا بت جبتي الطاسة دي منين هنا

_ها لا هههه ... اصلي كنت بتعشى

_بتتعشي في الطاسة ازاي

_عادي جعت نزلت لدادة حليمة وساعدتها وعملنا بيض واخدته وطلعت علشان اكل في اوضتي زي ما انت طلبت وبس 

_لا والله، ومفيش حاجة اسمها طبق تحطي فيه يا معفنة

_اتلم يا سيف وبعدين انا قلبي دليلي قالي ان فيه متحمرش هيجي يدخل اوضتي فكان لازم يكون معايا سلاح ادافع بيه عن نفسي من شرك

_ السلاح ده اللي هو الطاسة 

_اينعم

_ممم لا واضح انك نصابة ومتخلفة كمان .. الاتنين 

_بردو بتغلط انت شكلك عايز تجرب الطاسة كمان

_لا الغلط لسه جاي قدام متقلقيش

_قصدك ايه، طولة لسان انا مبحبش 

_ لا ما هو لساني مش بيطول الا على الحرامية والنصابين اللي زيك 

_ استغفر الله العظيم يارب 

_ايوة يا بت اعملي انك عارفة ربنا 

_الحمد لله واحسن منك كمان

_طيب اتزفتي اقعدي خليني اواجهك بالحقيقة لما نشوف اصل الكدب حباله قصيرة والحمد لله حبال الكدب عندك مدامتش يوم واحد 

_ اتكلم قول اللي عندك سامعاك 

_اختي رغد 

_مالها 

_ بصي كدا للصورة دي 

_بصيت مالها انا قلت لأحمد بيه اني مش فاكرة اي حاجة اصلا

_ايوة قالي متلتيش كتير

_انا مش بلت برد على كلامك

_طب اسمعي ... اختى رغد هنا ف الصورة مكانش عندها شامة، بصي لنفسك في المراية كدا، للشامة اللي عندك دي خير دليل ع انك مش اختي.

تونا اتصدمت وفتحت بؤءها

_ اصبري لسه فيه تاني ، رغد اختي عنيها ملونة انما انتي عنيكي بني ... ها اقول كمان أدلة انك مش اختي ولا لسه مصرة 

تونا قامت وقفت وقالت

_لا خلاص رسالتك وصلت يا بيه انا اسفة انا لوهلة ظنيت اني خلاص رجعت لاهلي اللي معرفش عنهم حاجة 

_بطلي تمثيلك ده مش بتعرفي تمثلي اصلا وامشي اطلعي برا

_نعم اطلع برا فين 

_ايه اكتشفت حقيقتك لسه هتقعدي تعملي ايه هنا

_ طيب همشي فين بالليل كدا

_مم طيب بكرة الصبح اول ما النهار يشقشق تأخدي بعضك وتمشي فاهمة 

_ حاضر

سيف جه يخرج

_استنى

_ايه تاني 

_انا مش هعرف اروح لوحدي

_نعم ياختي

_ والله مش هعرف بابا اللي كان جايبني وانا مركزتش في الطريق 

_والمطلوب مني ايه 

_توصلني لحد اهلي تاني 

_ده انتي بتحلمي بقي 

_ارجوك انا حرفيا لو خرجت هتوه

_ما توهي هو انتي كنتي من بقيت عيلتي

تونا قالت ف نفسها

_جاتك صاروخ في معاميك 

لكنها قالت بتستعطفه

_طب ءأرف بيا أنا زي اختك بردو وبنت مكسورة الجناح وغلبانة وضعيفة و...

_بس بس بطلي موشح الشحاتة ده

_يعني هتوصلني بجد

_لا طبعا ،وبكرة اصحى من النوم الاقيكي مش موجودة 

سابها ومشي و هي وقفت  شوية مش عارفة تعمل ايه 

بعدها راحت ع شباك الاوضة ولما شافته قالت

_روح يا زفت جتلك الهم، واحد معندوش زوق ولا جنتلة صحيح، يارب تقع على جدور رقبتك 

لسه توما مخلصتش الكلمة

كان سيف بينزل السلم فوقع 

فضحكت تونا وقالت

_الحمد لله ربنا استجاب لدعوتي وأخد حقي منه.

❈-❈-❈

تاني يوم الصبح تونااا صحيت بدري او بمعنى اصح معرفتش تنام من اصله 

وبدأت تدور في الاوضة وقالت

_استنى يا بت يا تونا انتي بتدوري ع ايه 

ردت ع نفسها

_هجمع هدومي وحاجتي علشان امشي... اه صح انا مليش حاجة هنا

بعدها خدت بعضها ومشبت وقالت

_كله منك يا بابا انت اللي اصريت اني اجي هنا عجبك قلة القيمة اللي انا فيها دي ، ساكنة عند ناس اغراب واتعامل المعاملة دي 

خرجت عند البوابة فلقت عربية معترضة طريقها فوقفت تزعق

_انت يا اخينا هو ايه اصله ده ما تحاسب خليني اعدى 

بص براسه من شباك العربية وقال

_ اركبي 

_اركب فين

_اركبي اوصلك مش كنتي بتتحايلي عليا امبارح علشان اوصلك

_وانت رفضت وانتهينا، عايز ايه مني تاني 

_بقولك هوصلك انتي بتفهمي

_لا شكرا، مش عايزة هعرف اتصرف لوحدي 

_بطلي مقاوحة واركبي علشان متوهيش 

_ملكش دعوة هو انا كنت من بقيت عيلتك 

_زفتة بلاش تستفزيني

_وانت بلاش تعمل نفسك جنتل وانت اصلا ولا حاجة

_بت انتي اسكتي  احترمي نفسك

_وان ما سكتش هتعمل ايه يعني 

_هطلع أكسر لك صف اسنانك ده 

سيف جاله اتصال

_اقفي اصبري لما ارد ع الموبايل واشوف هتصرف ازاي معاكي

ولما خلص مكالمة ملقاش تونا قدامه 

_هي راحت فين دي 

جه يتحرك بالعربية لقى العجلات نايمة

فقال

_اااه يا بنت اللذينة عملتيها وهربتي 

اما تونا فكانت اخدت بعضها وجريت بسرعة قبل ما يلحقها 

وبعدها وقفت تنهج

_احسن احسن علشان يتعلم الأدب 

وبعدها فضلت تسأل أكتر من حد علشان توصل المكان اللي كانت عايشة فيه وبعد ساعات طويلة كانت وصلت الحارة على الظهر.

كانت الشمس جامد اوي والحر غير محتمل 

فجريت على معصرة القصب اللي ع اول الشارع وقالت

_ عم صبحي كوباية قصب الله يكرمك وابقى ضيف الحساب ع النوتة بس متقولش لابويا عليه اكتبه باسمي وانا هردهولك والله قريب

_ماشي يا عروستنا الجميلة، انتي تؤمري، ده المعصرة كلها ليكي بس انتي توافقي يا قمر

تونا اتبرجلت وقالت

_نعم عروسة وقمر واوافق اوافق ع ايه 

_توافقي على المحروس ابني، بسم الله ربنا حارسه وصاينه ساقط اعدادية بس شقى وتعب لحد ما بقى صبي سواق قد الدنيا 

_اه هه ماشاء الله ربنا يزيده يا عم صبحي، فين كوباية القصب خليني أمشي مش قادرة اقف على رجلي.

_ اتفضلي كرسي اهو يا عروسة ده انتي ان مشالتكيش الارض تشيلك رموش عنينا 

_ليه كنت دمعة يا عم صبحي ،بقولك ايه انا على اخري فالله عليك بلاش حوارات ع المسا

_ماله مزاجك يا عروسة، وافقي انتي بس على الواد حنكش واحنا هندلعك أخر دلعك وهنشهيصك ونعنشك يا قمر

تونا قالت في نفسها

_هما فاكريني عود قصب قدامهم ولا ايه 

وبعدها ابتسمت وقالت

_ ااه... الكلام ده بعدين يا عم صبحي هات العصير الله يكرمك

_احلى كوباية عصير للعروسة 

_تاني، طيب ماشي هاتها هي فين 

_افهم من كدا انك موافقة يا عروسة

قامت وقفت 

_لاااه انت هتزلني علشان كوباية عصير،ان شالله عني ما شربتها انا ماشية 

_استنى بس يا عروسة مسمعتش موافقتك ... طب استنى يمكن محروجة خدى العصير اهو يا قمر

_اطفحه انت 

_نرفوزة اوي عروسة ابني بس قمر