قراءة رواية أبلة فلافل كاملة

تنشر حصريًا على مدونة رواية وحكاية قبل أي منصة أخرى

قراءة رواية ونوفيلا أبلة فلافل

من روايات وقصص 

الكاتبة أسماء عبد الهادي

الفصل الرابع

تونا مشيت وهي ع آخرها لأنها كانت هتموت وتشرب أي حاجة ساقعة 

فكرت هتروح فين مش عايزة ترجع لحسن والست حفيظة علشان ميزعلوش إنهم ودوها مكان غلط فقررت إنها تروح تقعد عند فلافل لحد ما تشوف هتعمل إيه 

وصلت لبيتها 

لقيتها واقفة وبتبص لفوق وبتقول

_إنزل ياض من على الشجرة  بقولك 

_لا مش نازل

_إنزل ياض متعملش زي القرود يخرب بيتك هتقع ورقبتك تتكسر

_لا مش نازل إنتي هتضربيني، وربنا دي مبقتش عيشة دي 

_أيوة أنا كنت عارفة إنك متنتميش للبني آدمين وإنك من فصيلة القرود

_بقا كدا يا فلافل طب والله ما أنا نازل وهفضل هنا 

_طيب إنت حر هبقى أطلعلك اتنين كيلو موز وابقى خلصت ضميري من ناحيتك

تونا ضحكت وقالت 

_هو في إي يا فلافل 

فلة لفت وشها وقالت

_إيه دا تونا إنتي رجعتي ليه وبتعملي إيه هنا 

تونا قالت بهم 

_هحكيلك بس هاتيلي الأول حاجة أشربها وقعديني لأني مش قادرة أقف ع رجلي

_طب ادخلي ادخلي هعرش عربية الفول دي واغطيها كويس وأجيلك

_ابوكي جوا

_لا يا بت لو جوا هقولك ادخلي بقلب جامد كدا 

_طيب داخلة 

غطت تونا العربية واطمنت عليها وراحت لتونا اللي مستنياها في اوضتها وجابتلها كوباية عصير وماية

_خدي إروي عطشك شكلك ملحلحة ياعيني، في إيه يا بت مالك متبهدله وشايلة الهم ليه إيه اللي حصل، هما طلعوا ناس صعبة متتعاشرش أهلك دول ولا إيه 

تونا كانت بتشرب العصير وبعدها قالت

_مش لو كانوا أهلي من أصله

فلافل أخذت منها كوباية العصير

_لا عنك إنتي بس كوباية العصير دي 

وشربت منها وتفته على وش تونا 

اللي قالت 

_الله يقرفك بتعملي إيه 

_إيه بعبر عن صدمتي... يا وكستك أومال كنتي بايتة عندهم يوم بليلة بتعملي إيه يا بت .

_اسكتي يا فلافل متفكرنيش أنا كل لما أفتكر إني سمحت للراجل الغريب أحمد بيه ده إنه يحضني بكره نفسي

_بت متخدنيش في دوكا وقوليلي في إيه، وإزاي مش أهلك ، أومال عم حسن بيقول إنهم اهلك إزاي 

_يا ستي مطلعوش أهلي الراجل الكبير اللي إسمه أحمد بيه علشان منى عينه بنته ترجع أو ما شافني ولقى فيا مواصفات كتير من بنته قال إني بنته وصمم على ده 

_وبعدين يا آخرة صبري

_مفيش أحمد بيه ليه إبن إسمه سيف وشاب كدا أعوذ بالله سماجة الدنيا كلها فيه ... نزل تهزيق فيا وإنتي نصابة وإنتي حرامية ومش عارفه إيه وطردني من الفيلا بعد ما بينلي إني فعلاً مش أخته ... أخته معندهاش شامة على عنيها وكمان عينيها خضرا إنما أنا عينيا عسلي 

_ينيله راجل، أستغفر الله العظيم يارب... يلا معلش متزعليش الحمد لله إنها جت لحد كدا 

_مش عايزاكي تقولي حاجة لبابا حسن

_ليه أومال هتقعدي فين يا بت 

_مش عارفة مش عارفة والله هقعد فين 

_لا أنا هجيب البلغة وهنسلها على جتتك

_إيه بس يا فلافل عايزاني أرجع تاني لعم حسن وهو راجل غلبان وعلى قد حاله ليه يفضل شايل همي طول عمره، كفاية عليه شالني طول عمري، مش هزود عليه الحمل أكتر من كدا 

_تقومي تتشردي في الشوارع يامنيلة علشان مش عايزة تزودي حمله.

_طب أعمل إيه عندك حل تاني 

_إنك تفضلي عايشة معاهم يأخدوا بحسك وتساعديهم في شغل البيت والست حفيظة بقت صحتها ع قدها،واللقمة اللي هايكلوها الجوز هتكفيكم إنتم التلاتة وممكن كمان تنزلي تدوري على أي شغل في أي صيدليه أو محل او تساعديهم إنما عته وكلام غير ده أنا مش عايزه 

عيطت تونا وقالت

_وأنا هفضل كدا معرفليش أهل يافلافل ، كان نفسي على الأقل أعرف هما مين وبس حتى لو مش هعيش معاهم بس أعرف هما مين 

_يخيبك يا بت إنتي هتعيطي ياخايبة في السن ده أومال سبتي إيه للواد حبيب اللي هعلقه في الساقية علشان جايبلي كحكة في امتحان الدراسات 

قال إيه اذكر ما تعرفه عن موقعة أبي قير البحرية يكتبلهم أنا معرفش حاجة والله العظيم حتى اسألوا الواد حاموكشا 

ضحكت تونا وقالت

_حرام عليكي يافلافل والله بتعرفي تخرجيني من المود في ثواني 

_طب قوليلي إنتي أعمل أنا إيه في جوز المعاتيه دول، وفي الآخر طالع لي فوق الشجرة وعاملي فيها شمبانزي

قومي قومي يا بت ساعديني بدل  ما إنتي لا شغلة ولا مشغلة كدا، وتعالي نقطع البصل والفلفل علشان عربية الكبدة 

_ماشي يا فلافل معاكي اهو

_أيوة كدا يا بنتي فكي محدش واخد منها حاجة 

_الحمد لله 

❈-❈-❈

_ايه الحكاية رغد كل ده نوم ولا إيه ...دادة حليمة ..شوفتي رغد النهاردة

_لا ياأحمد بيه مشفتهاش تقريباً لسه مصحيتش... تحب حضرتك أطلع أشوفها 

_لا لا سيبيها نايمة براحتها تلاقيها معرفتش تنام طول الليل بسبب تغيير المكان والأحداث الجديدة عليها 

بعد كم ساعة وتحديداً العصر وفي وقت الغدا 

سيف جه يقعد على السفرة وكأنه معملش أي حاجة خالص

أحمد قال

_لا كدا اتأخرت أوي... يا دادة... دادة حليمة اطلعي صحي رغد وخليها تنزل تتغدى هي هتقضي اليوم كله نوم ولا إيه ده حتى غلط على صحتها

_حاصر ياأحمد بيه 

سيف قال

_استني يا دادة متتعبيش نفسك تسنيم أصلاً مش موجودة هنا في الڤيلا

أحمد قال

_أومال فين،، أختك راحت فين، وإزاي تخرج من غير إذني 

_تسنيم مش أختي يا بابا وأنا طردتها من الڤيلا الصبح وارتحنا منها النصابة دي

أحمد قام وقف وقال بوش كله فزع

_إيه إنت إزاي تعمل كدا إزاي جالك قلب تطرد أختك من الڤيلا... أختك اللي فضلت سنين عمري بحلم إنها ترجع لحضني ووقت ما ترجع تمشيها بالسهولة دي إنت لا يمكن تكون إنسان طبيعي

اتكلم ببرود

_بابا اهدى البنت دي مش أختي وأنا اتأكدت من دا بنفسي ولا أنا هطرد أختي ليه يعني أنا ما اصدق إني ألاقيها 

_تسنيم هي أختك يا غبي، تسنيم هي رغد اللي تاهت مني من خمستاشر سنة

_تاني يا بابا هو مفيش فايدة قلت لحضرتك إنت بتتوهم علشان نفسك رغد ترجع بس للأسف رغد راحت ومش هترجع تاني 

_إياك اسمعك تقول كدا تاني تسنيم هي رغد أفهم بقى ياغبي

_طب فهمني يا بابا اللي حضرتك بتقوله ده 

أحمد خرج من جيبه سلسلة وقال

_شايف السلسة دي 

_اه دي سلسلة ماما الله يرحمها 

_الله يرحمها يارب

_أنا كان معايا أختها أمك هدتها ليا أيام الخطوبة وأنا احتفظت بيها ولما خلفت أختك لبستها ليها ووعدتها إنها متخلعهاش من رقبتها أبداً ومهما حصل وهي وعدتني بدا 

_مش فاهم إيه علاقة السلسلة دي بتسنيم 

_السلسة دي كانت تسنيم لابساها وأول ما شفتها في رقبتها عرفتها علطول 

_عادي يا بابا يمكن شبهها مش حكاية ، أو ممكن لقتها في أي مكان فأخدتها مش دليل

_هقولك الدليل أنا السلسلة بتاعة أختك كانت مكتوب عليها أول حرفين من إسمي أنا وأمي ، جيت أنا لما عطيتها لأختك حفرت عليها أول حرف من إسم رغد 

والحرف ده لسه موجود على السلسة  اللي مع تسنيم 

_بردو مش دليل زي ما قلت يمكن لقتها في أي مكان 

_سألت تونا قالت إن دي سلسلتها وهي معاها من زمان وإن أمها بتقول إنها لما لقتها كانت متعلقة في رقابتها 

سيف قام وقف وقال

_ إيه؟

عرفت بقا إن تونا هي أختك رغد

سيف انصعق بللي سمعه وقال لنفسه 

_ده أنا كنت غبي فعلاً... ده أنا بهدلتلها وكنت وقح معاها ومعطيتهاش ريق حلو وفي الآخر مشيتها من الڤيلا وقلت عليها نصابة وحرامية كمان، كل ده عملته في أختي اللي من لحمي ودمي أختي اللي كنت بدعي ربنا دايماً إني ألاقيها تاني وأضمها لقلبي، معقولة أختي كانت قدامي وأنا فرت فيها بالشكل ده، لا حول ولا قوة الا بالله 

أحمد قام وقف وهو حاسس بالتعب وبيكح

_ اسمع يا سيف إياك ترجع الڤيلا تاني إلا وأختك في إيدك إنت المسؤول عن ضياعها تاني، بعد ما رجعت لحضني حرام عليك..اااه ااه

سيف قرب من أبوه وقال 

_ اهدى يا بابا علشان صحتك هلاقيها وهرجعها تاني زي ما كنت السبب في إنها تمشي متقلقش ..اطمن اقعد واطمن

في الوقت ده كريم جه وقال

_السلام عليكم يا بشر، أنا جيت في معاد الغدا اوعوا تكون حماتي مش بتحبني 

سيف سحبه من إيده وقال

_ مش وقت طفح تعالى معايا 

كريم وقف وقال

_  لا أنا احتج أنا جعان وأمي مسافرة يا عم وزهقت من أكل المطاعم كل يوم، أكلوني عندكم ياسيف ينوبكم ثواب في العبد لله الغلبان إعتبرني زي أخوك

 سيف زعق وقال

_ إنت لسه هترغي، إمشي يلا معايا بسرعة مفيش وقت

_ طب أخذ حتى طبق أي حاجة ،،الا إنتوا طابخين إيه النهارده

_كريم إمشي قدامي مش وقت هزارك ده 

_ طب فهمني في إيه طيب أخدني كدا على ملا وشي ليه 

_ رايحين نجيب أختي يا سيدي إخلص 

_ إيه دا بجد إنتوا لقيتوها إمتا

_ ده لسه هيقف يحقق أنا ماشي 

_ لا إستنى طالما الموضوع فيه أختك يبقى نأجل الغدا شوية 

ركبوا العربية وكريم قال

_احكيلي يلا لقيت رغد إزاي وعرفت مكانها إزاي

_ اسكت يا كريم ده أنا عكيت الدنيا خالص يارب ألاقيها يارب

_ معروفه طول عمرك مدب وبتضرب ولا تهتمش 

_ مش وقت تقطيم دلوقتي

_ اه إنت كدا لما تتزنق وتكون غلطان تقول مش وقته ... احكيلي احكيلي 

 سيف حكاله على كل حاجة 

وكريم برق وقال

_أوبا إنت غبي يا سيف 

_ غيره أبويا لسه قايلي الكلمتين دول دلوقتي 

_ وحمار كمان 

_ كريم إتلم 

_ إيه دي الحقيقة أكدب عليك حد يعمل عملتك دي..  شاكك فيها طب اتأكد الأول منها قبل ما تمشيها ياأخي

_ اهو اللي حصل يا كريم أنا لقيت  أبويا متعلق بيها وهو أصلاً بيتعلق بأي قشاية قدامه وده اللي غاظني بس بس أختي إزاي، رغد مفيهاش شامة على عينها

_ إنت بتتكلم عن رغد أختك وهي عندها ٣ سنين يعني فات عمر طويل، أكيد طبعاً هتكون اتغيرت تماماً وظهرت حاجات واختفت حاجات ربنا عالم أختك اتعرضت لإيه وهي بعيدة عنكم أدت لظهور الشامة دي ممكن تكون مش شامة اصلاً وده أثر نتيجة خبطة مثلاً

_ بس بردو احنا لسه متأكدناش إنها هي ... 

_هتكون هيا إن شاء الله أنا متفائل ... إنت عارف مكانها فين 

_ هروحلها عند أهلها اللي كانت عايشة معاهم 

_ طب إفرض يا حلو مرجعتش للناس دي 

_ دي تبقى وقعتي سودا 

_ ومهببة بطين 

وصلوا لبيت عم حسن 

_ السلام عليكم ده بيت عم حسن والد تسنيم 

_ وعليكم السلام أهلا ً يا بني مين 

_ سيف أحمد الدمنهوري 

_ إيه إبن أحمد بيه الدمنهوري، أبو تونا بنتي 

_ هي موجودة عندك يا عم حسن 

حسن لون وشه اتغير وقال 

_ موجودة فين هي مش عندكم؟؟؟ أنا رجعتها ليكم إمبارح ، تونا بنتي راحت فين؟

سيف مردش عليه ومشي وقال

_ طيب تعالى يا كريم 

حسن قال

_ رد عليا وديتوا بنتي فين 

كريم قال 

_ اهدى ياحج متقلقش هنلاقيها إن شاء الله... تلاقيكم وحشتوها فقررت تيجي تزوركم... خليك هنا تلاقيها في الطريق جيالكم ولو جت هنا أرجوك تبلغنا ده رقمي اتفضل.

كريم لحق بسيف اللي كان قاعد وهيفرقع في العربية وبيضرب في الدركيسون بإيديه 

_أنا مني لله أنا السبب في اللي بيحصل ده 

_صح إنت تستاهل ضرب الجزمة

_كررريم

_إيه؟؟... الراجل ياعيني الدم هرب من عروقه وكان هيروح فيها بسببك 

_هو أنا يعني كنت أعرف إنها أختي ما أنا مفكرها نصابة بتشتغلنا زي ما حصل معانا قبل كدا 

_طب قولي يا حلو هتتصرف إزاي

فضل سيف يفكر شوية وقال 

_أنا كنت سمعتها بتتكلم عن بنت صاحبتها إسمها فلفلة تقريباً... تعالى خلينا نسأل عليها

_طب مسألتش عم حسن ليه يا أذكى أخواتك

_استنى مش محتاج أسأل، بص كدا العربية اللي هناك دي 

كريم بص على عربية ملاكي وقال

_مالها

_مش دي يا أحول، بص على التانية دي عربية الكبدة دي

_اه العربية الخشب دي مالها، 

_مكتوب عليها فلافل، وتقريباً هو ده نفس الإسم اللي سمعته إسم صاحبتها

_طيب بينا نسألها 

تونا كانت واقفة مع فلافل بتظبط الأكل وأول ما شافت سيف جاي عليهم قالت برعب 

_ببت بت يا فلافل

_إيه يا بت مالك بترتعشي وبتخبطي في بعضك ليه، والله العظيم لو طلع صورصار لهكون حطاه في قفاكي، ناقص كمان الصراصير اللي نخاف منها

_بصي قدامك على الراجل اللي جاي علينا ده، هو ده إبن الراجل اللي فكرته أبويا 

_هو شكله عامل زي الصورصار فعلاً بس على كبير شوية ومعندوش قرون الإستشعار، إنما شكله جاي وفارد جناحاته وشكله جاهز للهبوط علينا بين اللحظة والتانية 

تونا جريب وقالت

_وأنا بقى جاهزة للإقلاع قبل ما يشوفني، هي المشرحة ناقصة قتلى

_استنى يا بت رايحة فين هو يقدر يجي جنبك وأنا موجودة؟

_ااا لا أنا ماشية مش عايزة أقابله. سلام 

جريت تونا لبعيد 

أما سيف قرب من عربية الكبدة وقال

_إنتي فلفلة

قالت برخامة

_فلافل، ولا البعيد مبيعرفش يقرأ

_ ما تلمي نفسك يا بتاعة إنتي

_وكمان بتاعة أنا شكلي هستخدم معاك أسلوب مبحبش أستخدمه من أول مرة ، بعطي إنذار الأول علشان يبقى عملت اللي عليا 

_اسمعي بقا  هقولك إيه أنا مش فاضي للكلام الفارغ ده

_ ولا أنا ياخويا، هو أنا يعني  اللي فاضية ده أنا ورايا شيء وشويات وبلاوي متلتلة تقطيع خضار وتحضير ساندويتشات وتسليك عين البوتجاز ومذاكرة للعيا...

قاطع كلامها وهو بيزعق

_بس اسكتي إنتي بالعة رايدو 

_لا يا خويا والله لسه مأكلتش حاجة من ساعة الغدا، بعد ما أخلص الكبدة ولو فاض حاجة هبقا اتعشى بيها والحمد لله على كدا 

_يارب صبرني على الشلل ده 

_سلامتك يا أستاذ بتشتكي من إيه في هنا داكتور حمير كويس أوي، هيفيدك في حالتك أصل أنا عارفه. كويس الحالات اللي زي حالتك كدا 

_ ماتتلمي يا بت إنتي بدل ما ألمك مالك كدا عمالة تنطحي بالكلام من أول ما جيت 

_إيه يا أستاذ هو حد داسلك على طرف.. بص كدا وراك إطمن عليه يمكن دوست عليه من غير قصد

سيف إستغرب وقال

_هو إيه 

_ديلك يا أستاذ إيه ما تصحى معايا أومال

سيف اتعصب وضم قبضة إيده وكان مستعد يخنقها

_لا إنتي بجد عايزة تتأدبي وأنا مستعد لده

_حوش حوش يا عم شايفني هخاف، ده أنا فلافل على سن ورمح وكل اللي في الحارة هنا بيعملي حساب

_أصره يا مصيبة إنتي 

_فلافل إسمي فلافل

_عايز أسألك سؤال 

_مبتعرفش 

_إنتي يا متخلفة هو أنا جاي أطلب منك رقم تلفيونك

_ياخويا هو إنت تطول 

_لا أطول ولا أقصر... متعرفيش تونا فين 

_ما تفتح معايا أومال يا أستاذ دي عربية كبدة مببعش تونا هنا 

_بقولك إيه مش عايز لف ودوران .. أنا عارف إن تسنيم صاحبتك هي قالت دا بنفسها 

_تسنيم مش تقول كدا من الصبح الا أعرفها دي صاحبتي الروح بالروح وأختي الصغيرة كمان 

_حلو هي فين بقا

_معرفش.. وبعدين إنت مين إنت وجاي تسأل عليها ليه 

_أنا... أنا سيف أحمد الدمنهوري أخوها 

_الله أخوها إزاي إنت مش لسه طاردها الصبح من بيتكم إنت جاي تشتغلني

_ يبقى جتلك وحكت لك كمان هي فين بقا 

_ اه طبعا لازم تحكيلي بقولك أختي يعني بحبها أكتر من نفسي كدا

_طيب يا ستي الله يرضى عنك قوليلي هي فين 

_لا ما هو أنا مش بطلع أي معلومة كدا بلوشي 

_ اه إنتي منهم ... أهو يا ستى عايزة كام 

_تؤ تؤ عيب عليك كدا إنت الظاهر متعرفنيش صحيح فقيرة وعلى قد حالي لكني عفيفة ياخويا ماببصش على قرش غيري ابداً

_طب إنتي عايزة إيه علشان تتكلمي انطقي أنا بدأت ازهق 

_لا اصبر كدا لاحسن يطقلك عرق وإنت لسه صغير وفي عز شبابك 

_طب كويس إنك عارفة إني لسه فى عز شبابي لأنك هتوصليني لمرحلة الشيخوخة لحد ما تنطقي

_طب قولي الأول إنت لسه عايز منها إيه، هي والله مش نصابة هي كانت مفكراكم أهلها فعلاً ، دي بنت غلبانة وملهاش حد ومتعرفش مين أهلها الحقيقين علشان كدا أول ما شفنا الإعلان حطينا أمل واتعشمنا إنكم تطلعوا أهلها أخيراً

سيف قال بتأثر وندم على اللي عمله فيها وقرر إنهم حتى لو مطلعوش أهلها مش هيتخلى عنها ابداًض 

_واحنا فعلاً أهلها

_ده بجد والنبي، يوووه نسيت مينفعش أحلف بغير الله ،لا إله الا الله 

_ في إحتمال كبير  إنها تطلع أختي، علشان كدا عايزها علشان نعمل التحليل للتأكد من دا 

_ والإحتمال ده من إمتا إن شاءالله، إنت مش بتقول إن أختك ملهاش شامة

يُتبع..