قراءة رواية عودة هيما كاملة

تنشر حصريًا على مدونة رواية وحكاية قبل أي منصة أخرى

قراءة رواية عودة هيما

من روايات وقصص 

الكاتبة أسماء عبد الهادي

الفصل الثامن عشر

اتصل زيدان بظافر 

فقال ظافر _ ها يا زيدان الضيوف وصلوا 

_ وصلوا يا ظافر وفي انتظارك 

_ تمام اكرم ضيافتم لحد ما ارجع عندي مشوار هعمله وراجع علطول 

_ تمام يا ظافر نفسي افهم دماغك دي فيها ايه 

_ خلاص ان الآوان ان كل حاجة تبان للكل والحقيقة تظهر 

_حقيقة ايه في حاجة احنا منعرفهاش 

_اصبر يا زيدان لما ارجع حاول تجمع العيلة كلها وانا هجيب البنات واجي 

_تمام

❈-❈-❈

راح ظافر المستشفى علشان يطمن على تالين ف كانت معاها نورين وكمان غفران

اول ما شافته غفران قامت راحت عليه 

_ظافر طمني البنات كويسين 

_غفران اطمني كويسين وتقدري تبقي تروحي ليهم تزوريهم هناك كمان 

_هناك فين 

_في بيتنا القديم يا غفران 

_طب هما مشيوا ليه 

ظافر بانزعاج_ قال ايه مرتاحين هناك اكتر 

ضحكت غفران فقال ظافر بغيظ_ انتي بتضحكي وانا واقف هنفجر هنا 

غفران_ اقولك الصراحة يا ظافر 

_لا وفريها لنفسك تعرفي انك رخمة 

ضحكت اكتر_ اسمعني بس 

_بت انتي امشي من وشي السعادي 

_اهو شوفت اديك هتتحول واخواتك مش متعودين ع التحول دا وخاصة ف الظروف اللي هما فيها ظافر انت اتحولت وبعدت وقسيت عليهم ف اكتر فترة كانوا محتاجين فيها لحضنك ودعمك وحنانك ووقوفك جنبهم علشان يعدوا الفترة دي ع خير لكن للاسف دا محصلش ملقوش دا يا ظافر اتمنى تكون فهمت قصدي 

بان ع ملامح وش ظافر الحزن وجه يتكلم لكنه سكت ولف وشه عمل انه بيبص ع حاجة 

فمدت غفران ايديها ورجعت وشه ليها تاني وقالت بحنان 

_انا عارفة .. عارفة انك كنت بتمر بوقت صعب وعصيب انت كمان وان الظروف والحقايق اللي اتعرضت ليها ف الفترة دي هي اللي صنعت منك الإنسان القاسي اللي ظاهر للكل دا بس انا متأكدة انه بشكل مؤقت وانه مجرد قشور مغلفة هيما الحقيقي وهيرجع تاني لما يظهر كل حاجة ويرجع الحق لأصحابه 

ظافر قال بألم _للأسف هما مش شايفين دا يا غفران 

_هيشوفوه وهيقدروا ولازم يتحملوه انت الضربات كلها جت ع راسك مرة واحدة وضربة واحدة منهم كانت كفيلة انها تموتك انت بشر يا هيما بتغلط زي اي حد  بيغلط ... متزعلش انت نفسك وسيبلي انا الموضوع ده 

ابتسملها ظافر وقال_ ليه حق الواد زيدان يحبك يا بنت ايه.. ربنا يكملك بعقلك يا حبيبتي 

_ويخليك لينا يا هيما يارب 

_ايه ؟؟

_ايه على فكرة من هنا ورايح مش هناديك الا هيما وان كان عاجبك 

_لا مش عاجبني 

_هشكيك لزيدان 

_والله بقا كدا 

_طب لعلمك زيدان بح 

ضحكت غفران _ههه ابقا سمعه الكلام دا وشوف هيعمل ايه 

ضحك ظافر_ هيتجنن ومش بعيد يروح فيا ف ابو زعبل اكيد 

_بالظبط كدا 

ظافر بجدية _ربنا يسعدكم يارب 

بصت غفران لتالين اللي كانت قاعدة ع سريرها بحزن فقال ظافر 

_خدي نورين واخرجوا عايز اتكلم مع تالين شوية 

وبالفعل قربت غفران من نورين وطلبت منها يخرجوا شوية 

فقعد ظافر ع كرسي جنب تالين 

وقال 

_ازيك يا تالين عاملة ايه دلوقتي قلقتينا عليكي 

_نورين قالتلي انك انقذتني وانك اول واحد جريت عليا وكنت خايف يجرالي حاجة 

_كلنا بلا استثناء خفنا عليكي يا تالين انتي غالية علينا كلنا 

_الا زيدان 

_ممم خلينا نتكلم ف الجد شوية ممكن 

_مش حابة اتكلم ف حاجة ليه انقذتني ليه مسبتنيش اموت 

_اولا انا لسه هحاسبك ع اللي عملتيه دا لانه تصرف غلط وربنا ميرضاش بأذية النفس ابدا... عايزة تنهي حياتك ليه ها.. علشان واحد مش عايزك وايه يعني مش عايزك.. القلوب مش عليها سلطان ... ان كان هو مش عايزك يبقى ميستاهلش قلبك ومتزعليش نفسك علشانه 

_عملت المستحيل علشان يشوفني لكنه مش شايف الا غفران 

_تالين اسمعي صدقيني انتي مش بتحبي زيدان 

_لا بموت فيه كمان 

_لا دا مجرد اعجاب لو كنتي بتحبيه كنتي اتمنيتي ليه السعادة اينما كانت المهم تشوفيه مبسوط زي ما غفران كانت بتعمل .. غفران هي كمان بتحب زيدان وانتي عارفة لكنها كانت بتصده علشانك وكانت هتكون مبسوطة لو شافته متجوزك وسعيد معاكي ومكانتش هتعارض أبدا رغم حبها لان اللي بيحب بيضحي علشان حبيبه 

لكن زيدان بيحبها هيا مش انتي 

نزلت تالين راسها لتحت وبدأت تعيط 

ظافر طلع منديل وناوله ليها وقال 

_انا مش بقولك كدا علشان تعيطي فوقي بقا يا تالين فوقي لنفسي اللي انتي مضيعاها علشان وهم.. دي مش نهاية الدنيا انتي ليه عايشة علشان حد عيشي لنفسك وحبيها وصدقيني هتلاقي اللي يحبك ويبادلك نفس المشاعر وهنا بس هتلاقي السعادة... فكري فيها لو كنتي اتجوزتي زيدان وهو مش بيحبك  حب من طرف واحد عمرك ما كنتي هتلاقي السعادة او الاستقرار النفسي وكنتي هتزهقي من اول اسبوع 

تالين انا اكبر مني وفاهم اكتر منك فخديها نصيحة الجواز ان مكانش الحب مشترك من الطرفين هيبقى جواز فاشل او مجرد روتين 

انا ممكن اغصب ع زيدان يتجوزك دلوقتي حالا 

لكن انا مش عايز ليكي سعادة لحظية مؤقتة عايز ليكي سعادة دايما مع الشخص اللي يستحق قلبك بجد .. فكري ف كلامي يا تالين وبصي قدامك كويس وشيلي الغمامة اللي ع عينك هتعرفي كويس انك كنتي ع خطأ 

قالها وقام وقف 

_انا هرجع الفيلا وهبعتلكم السواق يجيلكم علشان فيه موضوع مهم لازم كلكم تسمعوه 

لو حاسة انك مش حابة تيجي اما مش هغصبك يا تالين ابدا .. سلام 

❈-❈-❈

رجع ظافر لفيلته

وصادف رجوعه مع حضور عمه عامر وعمته صفاء

فرحب بيهم عامر 

_يا اهلا وسهلا  وانا بقول ايه النور اللي حل ع الفيلا دا 

جريت عليه عمته وخدته ف حضنه 

_ظافر يا حبيبي يا نور عيني طمني عليك 

ظافر_ انا كويس ياعمتي الحمد لله زي ما انتي شايفة انا بس عندي عتب على حضرتك بس خليه لبعدين 

نزلت راسها وقالت بحزن 

_عارفة انت هتقول ايه يا ظافر انا فعلا اهملت اولادي ف اكتر فترة من عمرهم هيكونوا فيها محتاجين ليا ولتوجهاتي عارفة ومش هلوم عليك ف العتب أبدا لاني فعلا ندمت ع اللي عملته 

_للاسف متأخر اوي الندم يا عمتي شوفتي ابنك عمل ايه ولا شوفتي بنتك وصلت لإيه 

_عرفت اللي عمله راكان وروحت بنفسي قبل ما اجي ع هنا لأهلها واعتذرت ليهم وهرضت تعويض كمان لكن للأسف رفضوا وعندهم حق لكن تالين مالها بنتي حصلها ايه يا ظافر 

_اطمني يا عمتي بنتك كويسة وجاية دلوقتي ورايا هي والبنات وهتشوفيها 

اتقضلوا ادخلوا 

قرب عامر من ظافر 

_عملت ايه 

_اطمن يا عمي متقلقش ابدا كله تحت السيطرة 

اتنهد عامر وقال_ كنت عارف انك يعتمد عليك وانك اللي هترجع حقك وحقك شباب العيلة 

❈-❈-❈

زيدان جمع الكل في مكان واحد وهنا قال ظافر_ طبعا كلكم عايزين تعرفوا ايه سر التحول اللي حصلي وازاي انا عرفت بالوصية اللي كانت مع مهران 

خليني احكيلكم الحقيقة من اول ما عرفتها 

## فلاش باااك 

هيما اول ما لقا الجهاز اللي عليه جدته بيصفر حس بالخطر عليها وقال بصدمة لفقدانها 

_جدتي لااااااا جدتي 

في الوقت دا دخل الدكاترة بسرعة وحاولوا يعملوا اللازم لحد ما رجع قلبها يشتغل تاني لكن ما زالت غايبة عن الوعي 

في الوقت جه جه عامر لهيما وقرر انه يحكيله الحقيقة كلها 

عامر_ هيما انت من عيلة المنياوي ابن طاهر اخويا مش زي ما الكل كان مفهمك 

هيما بكره ليهم كلكم _عرفت دا... انت جاي ليه دلوقتي وعايز مني ايه سيبوني ف حالي انا فيا اللي مكفيني 

_جدتك انا هسفرها برا وهوديها لأفضل المستشفيات متقلقش 

_مقلقش ازاي دي دخلت ف غيبوبة والله اعلم هتفوق امتا 

_يبقى نعلن انها ماتت علشان مهران ميتعرضش ليها تاني 

_مش فاهم تقصد ايه 

_اسمع الاول نلحق ننقلها وهحكيلك كل حاجة وبالمرة انت كمان محتاج تسافر علشان رجلك واخواتي البنات هيسافروا معانا بس هيفضلوا ف الحفظ والصون في رعاية زيدان ابن عمك واظنك عارفه وعارف اخلاقه 

_عارفه 

وبالفعل لما تم ترتيبات نقل الجدة لمستشفى ف امريكا حكا عامر كل حاجة لهيما خاصة بأبوه 

_اسمعني ابوك كان بيحب زميلة ليه ف الجامعة اللي هي امك نحمدو يا هيما.. اعجب بأدبها واخلاقها العالية علشان كدا قرر يتجوزها بس لما سأل عنها عرف انها من عيلة فقيرة وعلى قد حالهم وطبعا هو عارف ومتأكد ان المنياوي ابوه عمره ما هيوافق ع كدا علشان كدا كلمني وطلب مني اني اساعده حاولت معاه انه ينساها ويشوف اللي مناسبة ليه لكنه مكانش شايف غيرها واترجاني اساعده يتجوزها 

قلتله_ في السر يا طاهر من ورا ابوك 

قال_ اعمله ايه ما انت شايف تصرفاته وتزمته معانا 

قلتله_ هساعدك بس مترجعش تندم لو ابوك عرف الحقيقة 

وبالفعل روحت معاه علشان نخطبها واتفق معاهم طاهر انه هيجيب لها شقة وان الجواز هيكون كتب كتاب وبس ع الضيق كدا علشان أهله مسافرين وجدته متوفية اهو اي حجة وخلاص علشان يوافقوا ع الجوازة وخلاص 

وبالفعل اهل والدتك وافقوا لما لقوا بنتهم عايزاه هي كمان 

عاش ابوك مع والدتك أحلى أيام  حياتهم ف سعادة وهنا وطبعا عمرهم ما فهموك انهم من عيلة كبيرة ولا حاجة لانه ابوك عارف ان ابوه لو عرف هيحرمه من الميراث فقرر انه ميفتحش ف الموضوع دا من اصله علشان يعيشوا بهدوء وسعادة  لحد ما للأسف وقعت بلساني مرة قدام مراتي وكشفت المستور كله وطبعا مكنتش اعرف وقتها ان هي اللي كشفته 

وجدك عرف وقيم الدنيا عليهم ومقعدهاش 

طبعا طلقهم من بعض ومنع امك من انها تشوفك عقابا ليهم قال يعني على انهم جوزوا بنتهم لواحد من عيلة المنياوي اللي عمرهم ما يليقوا بيها  

وعاقب ابوك كمان انه اخدك وشغلك ف الفيلا ومن غير ما تعرف حقيقة نسبك واجبر ابوك انه يقولك انهم محتاجين لشغل فانتوا الاتنين هتشتغلوا ف فيلا المنياوي دي علشان تسددوا الديون اللي عليكم 

وعلشان انت كنت راجل من صغرك يا هيما وافقت تساعد ابوك وصدقت كدبتهم وبقيت تشتغل ف الفيلا مرة جنايني ومرة بواب المهم جدك يشوفك مزلول قدام ابوك اللي كان بيتقطع علشانك بس مش عارف ينطق ولا يتكلم خوفا من ان جدك ياخدك لمكان ويحرمكم من بعض طول العمر زي ما حرم امك منك 

وعلشان امك اكيد كانت هتموت عليم ومموتة نفسها من البكا علشانك جدك جه هنا بحجة اننا كنا محتاجين ف الوقت دا جنايني وفضل معاك علشان يكون جنبك ويطمن قلب امك عليك  

وطبعا علشان مراتي كانت عارفة بالحقيقة كانت بتحاول تزلك هي كمان ودايما تطلب من مهران انه يهينك ويقلل منك وهحكيلك هي ليه عملت كدا بعدين ومع كتر زنها ع مهران ان هيما افضل منك وانك لازم تشوف حد لكبرياؤه دا قبل ما جدك يحبه ويميزه  عنك وعن احفاد العيلة كلهم 

من هنا بدأ مهران انه يستفزك ويعاديك 

وف يوم 

جالك مهران ومد الشوز ناحيتك وقالك_ اربطلي رباط جزمتي 

وعلشان انت كان عندك كبرياء مكانش عند حد قلتله وقتها_ لما تتشل هبقى اعمل دا 

الكلمة دي استفزت مهران جدا وبدأ يتخانق معاك وانت كمان مسكتلوش وبتدأتوا تتعاركوا عراك جامد اوي 

وعلشان مراتي الله يسامحها تحط التاتش بتاعها فضلت تصرخ وتندب 

_انقذوا ابن عيلة المنياوي من الجربوع دا اللي حاقد عليه دايما علشان هو اغنى منه وافضل منه مليون مرة دا عايز يموت ابني اكبر احفاد المنياوي واللي هيكون فخرها ورافع راسها زي جده بالظبط 

طبعا الكلام دا وصل للجد ولما شاف الخناق ع اشده واللي متفوق فيه انت يا هيما وفعلا كنت عدمت مهران العافية 

جه وزعق وضربك وطلب من ابوك طاهر انه يضربك قدام الكل 

لكن طاهر مقدرش يعمل دا وكمان جدك والد امك وقف لحمايتك هو كمان فطرده جدك من الفيلا وطردك معاه وقرر انه يحرم ابوك من انه يشوفك وانت ترجع لأمك 

ابوك بعدها اختفى ومحدش يعرفله طريق 

واهل والدتك قرروا انهم يبعدوا هما كمان علشان تعيش انت ف سلام بعيد عن العيلة دي واتجوزت امك من واحد تاني وخلفت اخواتك البنات اللي هما هدى وسما 

اتأثر هيما باللي سمعه دا وزاد كرهه لجده المنياوي وكان جواه غضب كبير اوي لانه حس انه اتظلم واتهام كتير 

كمل عامر كلامه 

_لما انت كبرت يا هيما وعودك اشتد 

وجدك كان ف اخر ايامه وشاف اللي وصل ليه مهران من فساد وشافك انت وعرف اخلاقك كويس 

قرر انه يحاول يعمل حاجة يكفر بيها عن ذنبه تجاهك قبل ما يموت 

كتب وصية علشان تعوضك عن سنين الحرمان ...لا وعملك الواصي ع فلوس العيلة كلها يمكن بدا يموت وهو مرتاح 

بس للاسف الوصية دي وقعت ف ايد مهران وزور فيها علشان يفضل هو المسؤول عن ممتلكات العيلة بس جدك كان عارف فساد مهران فعمل وصية طبق الاصل منها وعطاها ليا وأقسم عليا اني اعطيهالك بنفسي 

بس ف الحقيقة يا هيما انا مجتش اجبلك الوصية واقولك الحقيقة علشان الموضوع دا بس... فيه موضوع مهم عايزك تخلص عيلتك منه 

هيما بتريقة _عيلتي دلوقتي سميتها عيلتي 

_مهما كان ومهما حاولت تهرب هي عيلتك وانت منقذها الوحيد يا هيما اارجوك اسمعني للاخر 

_اتفضل كمل سامعك 

_مهران مش ابني يا هيما 

هنا هيما برق_ ايه؟؟؟