قراءة قصة أحببتها مرتين القصة الأولى من سكريبتات بقلم أسماء عبد الهادي كاملة

تنشر حصريًا على مدونة رواية وحكاية قبل أي منصة أخرى

قصة أحببتها مرتين 

القصة الأولى من سكريبتات 

بقلم أسماء عبد الهادي 

 رواية جديدة قيد النشر

من قصص و روايات 

الكاتبة أسماء عبد الهادي 

الفصل الأول 

يا بنتي استني بس انتي واخداني ورايحة على فين بس 

رشا مش هنتأخر مشوار بسيط كدا ونرجع علطول 

ريم 

انتي عارفة ان ابن عمك معندوش تفاهم ومش بيحبني اتأخر على البيت اخاف نتأخر وتحصل مشكلة دا غير اني بسببك خرجت من غير ما اقدر حتى استأذنه بقى ينفع كدا 

رشا بخبث 

مش لازم يعرف دلوقتي احنا هنعمله مفاجئة هتبرجله حياته انتي مش دايما بتقولي شكل مناخيرك مش عاجبك مجرد عملية تجميل بسيطة من دكتور خبير جاي مصر لساعات معدودة وماشي تاني هتخليكي اميرة في عيون ادهم 

ريم 

مين قالك اني عايزة اعمل العملية انا اه شكل مناخيري مضايقني بس مش للدرجة دي يلا نروح 

رشا 

يا بنتي بطلي عبط بقا بعدين دي عملية بسيطة وكله بيعملها والدكتور الخبير دا هتعجبك تفاصيله جدا يلا بس 

ريم 

لا يا رشا بالله عليكي مش عايزة 

لسه ريم مخلصتش كلامها لقت اللي بيحط القناع ع وشها فنامت متخدرة ف الحال 

اسمعوا عايزاها مشوهه واحدة تانية خالص مش عايزة جوزها يحبها عايزاه ينفر منها انتوا فاهمين 

وبعد كم ساعة من العملية 

قامت ريم تصرخ من الالم 

اااه اااه وشي اااه انا تعبانة مش قادرة مش قادرة الالم ف كل مكان من وشي 

رشا بفرحة قالت للدكتور

ها عملتوا المطلوب 

الدكتور 

ايوا نفذنا اللي طلبتيه بالظبط غيرنا ملامح وشها خالص اللي يشوفها مش هيقدر يتعرف عليها بس ااا 

رشا 

في ايه بس ايه ما تنطق 

الدكتور 

للاسف العملية الخطيرة دي ليها اثار جانبية 

رشا 

اه الالم عادي انا عايزاها تتألم طول حياتها انا همشي قبل ما هي تعرف الصدمة يااااه مكنتش عايزة افوت العرض دا لكن مش حابة اتورط معاها سلام يا دكتور 

ريم كانت نايمة ف اوضتها ووشها مربوط بالشاش الا من عيونها ومناخيرها وبوءها 

الدكتور راح عطالها مسكن علشان الالم بنامت 

ولما فاقت وخف الالم بصت حواليها 

انا فين 

الدكتور 

حمدا لله على السلامه ها حاسة بايه دلوقتي 

ريم 

انا فين وبعمل ايه هنا لو سمحت 

الدكتور بتوتر 

انتي مش فاكرة انتي مين؟؟ 

ريم هزت راسها 

لا مش فاكرة حاجة خالص انا فين وبعمل ايه هنا وليه حاسة بوجع في وشي وليه وشي ملفوف كدا والاهم انا مين 

الدكتور بتوتر

اا احنا منعرفش حاجة عنك انتي اتعرضتي لحادث سير ونقلوكي ع هنا عملنا اللازم علشان ننقذك واعتقد فقدانك للذاكرة دا نتيجة الحادثة 

ريم 

فقدان ذاكرة معقول انا ناسية كل حاجة حتى اسمي؟؟ 

دماغي صفحة بيضا تماما مفيهاش اي زكريات خالص لا استحالة استحالة دا يحصل 

الدكتور 

هدي نفسك علشان الزعل مش كويس ع صحتك جايز لما تهدي وتخفي من العملية اللي اتعملتلك ذاكرتك ترجع تاني متستعجليش 

ريم بحماس 

يعني فيه امل يا دكتور بجد 

الدكتور 

كله يعتمد عليكي انتي.. انتي اللي هتخلي ذاكرتك ترجعلك وانتي اللي هتأخري ان دا يحصل بتوترك وقلقك

وعدى اسبوعين ع ريم في المستشفى ولسه مش عارفة تفتكر اي حاجة خالص 

ريم 

وبعدين يا دكتور هعمل ايه دلوقتي انا مش فاكرة حاجة.. معقول معقول انا كنت مقطوعة من شجرة ومحدش يعرف عني حاجة للدرجة دي... للدرجة دي اهلي مسألوش فيا ولا هاممهم يعرفوا بنتهم راحت فين ويا ترى انا كنت متجوزة ولا مخطوبة ولا لسه متجوزتش ولا ارتبطت ويا ترى لو اتجوزت هل معايا اطفال لا لا مش فاكرة مش فاكرة 

الدكتور اشفق عليها وحس بالذنب بسبب اللي عمله علشان كدا لما جت رشا تسأل عليها تاني يوم قال 

فلاش بااااك 

رشا 

ها يا دكتور ايه الاخبار عملت ايه لما فاقت وشافت وشها المشوه 

الدكتور 

فضلت تكسر كل حاجة ف المستشفى ومقدرناش نسيطر عليها خالص لدرجة انها طلعت تجري برا المستشفى مش عارفين هي راحت فين ومحدش طبعا كان قادر يقرب منها 

رشا بفرحة 

احسن دا افضل شىء عملته يارب تختفي للابد ومترجعش تاني 

الدكتور عامر اتنهد بأسى وقال ف نفسه 

انا ايه اللي عملته دا ايه اللي ورطني معاها الورطة السودا دي بس للاسف مينفعش اتكلم لو اتكلمت هروح ف داهية مستقبلي المهنى هيضيع وهتفضح وهعيش مشرد بقية حياتي لا مينفعش حد يعرف بسرها انا هساعدها توصل لأهلها لكن من بعيد لبعيد جايز لو راحت عندهم ترجع ليها ذاكرتها على الاقل

❈-❈-❈

أحمد كان بيعيط ورافض الاكل تماما وكل شوية يصرخ ويكسر في كل حاجة 

الخدم واقفين متكتفين مش عارفين يعملوا حاجة 

اهدى بس يا حبيبي بلاش تعمل كدا علشان متتعبش 

احمد الطفل الصغير بعمر ٤ سنين 

لا انا مش ههدى لحد ما ترجعوا ليا ماما.. ماما ضاعت وانا مش عارف راحت فين انا عايز ماما دلوقتي حالا هنا قدامي لاما هفضل اكسر وابهدل في كل الدنيا مش هسكت ابدا ابدا لحد ما ترجع 

في الوقت دا جه ادهم من برا وقال بهم حاول يخفيه

احمد حبيب بابا وحشتني يا بطل 

احمد بعده عنه 

اوعا ابعد كدا يا بابا انا زعلان منك ومش عايز اكلمك علشان انت مش عايز تقولي ماما فين مش عايز تقولي الحقيقة 

ادهم 

ياريت كنت اعرف ماما راحت فين يا احمد وانا كنت هقولك علطول اسبوع كامل مختفية محدش عارف عنها اي حاجة خالص فجأة كدا وكأنها فص ملح وداب انا هتجنن 

احمد 

انت وعدتني انت وعدتني انك تلاقيها وترجعها ليا ترجعها لأحمد حبيبها.. ماما عمرها ما تفكر تسيبني ابدا 

ادهم 

ما هو دا اللي انا هتجنن بسببه انا متأكد ان ريم عمرها ما تفكر لا تسيبني ولا تسيبك دي روحها فينا احنا الاتنين هتبقى راحت فين 

وكمل كلامه في نفسه 

خايف تكون اتخطفت او حصلها حاجة 

بعدها نفض دماغه لالا تف من بوءك ان شاء الله مفيش حاجة من دي هتحصل ريم كويسة وهترجعلنا قريب وانا هلف عليها البلد كلها تاني وتالت وعاشر كمان 

ف الوقت دا جت رشا وعملت انها مش فاهمة ف ايه

ايه يا ادهم مالك انت متخانق مع ريم ولا ايه 

ادهم 

ريم انتي تعرفي مكان ريم انطقي يا رشا ارجوكي كانت معاكي اخر مرة 

رشا بتوتر 

ليه هي ريم مش موجودة فوق وانتوا متخانقين ولا ايه مش فاهمة 

ادهم بحسرة 

ريم مرجعتش البيت بقالها اسبوعين من وقت ما خرجت معاكي الشغالين قالوا انك اخدتيها وخرجتي 

رشا 

اه صح دا حصل خرجنا اشترينا شوية حاجات بعدين جالها اتصال فردت عليه ووشها اتغير وبعدها قالت انها لازم تمشي واستأذنت ومشيت وسابتني لكن وهي ماشية سمعتها بتكلم حد اسمه تقريبا سيف

ادهم 

ايه انتي ازاي عارفة كلام خطير زي دا ومش بتقوليلي عليه 

رشا بخبث

اقولك ايه بس يا ادهم انت ابن عمي ازاي اخرب حياتك بعدين انا مش متأكدة بردو كمان معرفش ايه علاقتها بسيف دا وكمان معرفش انها مش ف البيت من اسبوعين معرفش حاجة كل دا لسه عارفاه منك دلوقتي 

وقالت ف نفسها 

معقول اتصدمت من منظر وشها المشوه فهربت وبعدت عن بيتها وحياتها وجوزها وحبيبها وابنها!!! 

بعدها قالت بابتسامة مكر 

دا احسن خبر سمعته ف حياتي واحسن من اللي خططت ليه كمان ما هو مش انا رشا اللي ادهم يفضل واحدة زي ريم عليا كان بيحبني انا وميال ومعجب بيا انا لكن بمجرد ما شاف ريم وهو قلب واتحول تماما كأنها سحراله وحبها واتجوزها وخلف منها وسابني انا حب حياته وطفولته واللي متربين سوا طول عمرنا علشان كدا كان لازم اتصرف وابعدهم عن بعض واهو حصل اخيرا

ادهم كان هيتجنن مش عارف مراته راحت فين ولا مع مين 

وبعدين يا ريم انتي فين بس انا وابنك محتاجينك اوي ارجعيلنا علشان خاطري .. يارب يارب 

وعدى اسبوعين كمان يعني شهر ع اختفاء ريم اللي هز قلب ادهم وخلاه مبقاش لا عارف يشتغل ولا يمارس حياته بشكل طبيعي 

اما عند ريم ف المستشفى 

عامر جالها 

انتي دلوقتي تقدري تفكي الاربطة اللي على وشك جاهزة للخطوة دي 

ريم بحسرة 

هتفرق في ايه هبص لنفسي ف المرايا ليه اصلا وانا مش فاكرة مين انا 

عامر افتكر وقت العملية 

فلاش باااك 

رشا طلبت مني اشوه وشها وشكل مناخيرها علشان جوزها ينفر منها ويطلقها لكن انا حبيت اجرب فيها بحث جديد اتعمل ف مجال التجميل لانه بصراحة البنت كانت جميلة اوي وخسارة اشوه وشها الجميل فقررت اني اغير تماما من ملامح وشها يا ترى خطتي نجحت والعملية هتنجح ولا هكون سبب ف تشوه وشها للأبد 

باك 

عامر كان عنده رهبة كبيرة ف انه يفك الاربطة عن وش ريم وكل يوم بيكون متردد لكن النهاردة اخد القرار خلاص 

عامر 

يلا استعدي انا هفك الاربطة 

واول ما فكها هنا كانت الصدمة .... 

❈-❈-❈

رشا في خلال المدة اللي فاتت كانت بتحاول تقرب من ادهم علشان تقدر بعدها بكل سهولة تحل محل ريم 

رشا في الشركة 

اطمن يا ادهم انت هتلاقيها ان شاء الله وهتعرف هي مشيت ليه بس متعملش في نفسك كدا انا عارفة انك الفترة اللي فاتت دي كلها معرفتش تشتغل واجلت شغل كتير بس انا موجودة وهسد مكانك يا ابن عمي متقلقش انت مهم اوي بالنسبة ليا يا ادهم علشان كدا مش هسيبك تقع ابدا 

ادهم بوجع 

هعتمد عليكي يا رشا انا حاسس اني تايه مش لاقي نفسي وكمان احمد ابني تاعبني صعبان عليا صراخه طول اليوم مش بيهدى غير لما يتعب وينام 

رشا 

لا عافر وقاوم يا ادهم انت اقوى من كدا عيش حياتك بشكل طبيعي طالما هي اللي اختارت البعد لحد ما ترجع بأسباب منطقية ما هو مفيش واحدة عاقلة تسيب جوزها وابنها وبيتها اللي مليون واحدة تتمناهم وتروح لحد ضحك عليها بكلمتين الله اعلم بينهم ايه ولا ضحك عليها بإيه 

ادهم اتنرفز 

رشا اسكتي ريم مش كدا ابدا ريم كانت مثال للطهر والأخلاق استحالة تعمل اللي بتقولي عليه دا .. كمان انا وريم مكانش بينا اي مشاكل علشان تمشي وتسيبني انا حاسس ان اللي حصلها دا مدبر 

رشا بتوتر 

ايه مدبر؟ مدبر ازاي يعني انت عارف مين اللي بعدها عنك 

ادهم 

ياريت كنت اعرف كتت همحيه من على وش الدنيا بس بقالي شهر بنتظر اي اتصال من الخاطفين منتظر اي ابتزاز منهم او انهم يطلبوا فلوس مفيش حاجة من دي بتحصل مش فاهم ليه ومين اخدها وغرضوا ايه انا عارف ان ليا اعداء كتير ف السوق بس متوقعتش توصل بيهم الحقارة لانهم ياخدوا مراتي يارب يارب تكوني بخير يا ريم يا كل حياتي 

رشا كانت بتسمع كلامه اللي بيقوله بغيظ وقالت ف نفسها 

معقولة بتحبها الحب دا كله عماله اكرهك فيها واقولك مشيت مع واحد وسابتك وانت مفيش فايدة فيك عمال تطلع لها اعذار انت ايه للدرجة دي ريم خطفت قلبك للدرجة دي اعمى مش شايفني اوف بقا ما هو انت هتشوفني يعني هتشوفني وانا هعمل المستحيل علشان اوصل لقلبك 

بعد شوية جه اتصال لأدهم .

ايوا يا يوسف انا جايلك حالا تمام مسافة السكة 

ولما قابل يوسف صديق عمره 

ها مفيش اي اخبار؟ 

يوسف 

للاسف يا ادهم مفيش اي جديد نهائي كل لما نوصل لطرف خيط ونمشي وراه فجأة يتبخر ونلاقيه وهم محدش يعرف عنها حاجة ولا راحت فين 

ادهم 

مش هفقد الأمل هلاقيها هلاقي حبي الابدي هي وعدتني اننا هنفضل مع بعض هنربي اولادنا سوا مش معقول هتمشي وتسيبنا مش هنهون عليها هتعافر علشان ترجعلنا انا متأكد 

يوسف 

متقلقش هترجع يا ادهم هترجع ان شاء الله 

ادهم 

اه بالمناسبة محتاجك تعمل اعلان محتاج ناني جديدة لأحمد لانه كره كل اللي موجود ومش بيسكت مع حد منهم عايزة واحدة تكون رحيمة وبتحب الاطفال تاخد بالها منها وتقدر تهديه الولد لا بقا ياكل ولا يشرب وخايف عليه اوي يا يوسف 

يوسف 

طيب ورشا بنت عمك فين ما انا بشوفها عندكم اربعة وعشرين ساعة لازقة بغرا مش عايزة تمشي 

ادهم 

احمد طول عمره مش بيحبها ولا بيرتاح معاها حتى لما كانت ريم موجودة ودلوقتي لما امه اختفت أصبح مش بيطيقها ولما بيشوفها بيصرخ اكتر 

يوسف 

سبحان الله احمد عنده حق انا كمان عمري ما ارتاحت ليها ابدا 

ادهم 

سيبك من رشا دلوقتي بصراحة هي وقفت معايا طول الفترة اللي فاتت وهي واقفة جنبي وقفة موقفهاش اقرب الناس ليا المهم اعمل الاعلان ووريه ليا قبل النشر 

يوسف

تمام يا ادهم هعمله وهجيبه تشوفه بس بقولك ايه خد احمد خرجه شوية فسحه خليه يشوف العالم يشوف الناس يمكن لما يغير جو يفك من الحالة اللي هو فيها وحالته تتحسن شوية 

ادهم 

وفكرك اني معملتش دا يا يوسف فكرك اني محاولتش أخرجه لكل كل لما بعمل دا بيفضل يصرخ ويجري زي المجنون ف كل مكان بيدور ع مامته انا عملت كل حاجة ممكن تخطر ع بالك ومتخطرش يا يوسف احنا تعبنا تعبنا اوي 

يوسف 

معلش حاول معاه تاني وتالت يمكن تقدر تلاقي حاجة تلفت انتباهه لما تاخده مكان متاخدوش لمكان كنت بتاخد امه فيه قبل كدا لانه هيكون مفتقدها وياكم فيه... خده مكان جديد بعيد عن كل خروجاتكم السابقة يمكن لعل وعسى 

ادهم 

ماشي يا يوسف هعمل كدا وربنا يسهل تابع انت موضوع الاعلان دا متتاخرش فيه 

❈-❈-❈

يوسف رجع ع الشركة وقرر يصمم الإعلان ولسه هيكتب جالته السكرتيرة 

يوسف بيه... البنت اللي جت علشان وظيفة المصممة جات وواقفة برا اخليها تدخل ولا اقولها ايه 

يوسف 

ااام طيب ماشي خليها تدخل يا سامية 

ولما دخلت البنت 

يوسف تعالى اتفضلي اتعرف باسمك 

مريم بغباء 

عايز تتعرف باسمي ليه 

يوسف رفع حاجبه 

اكيد يعني مش عايز اتعرف عليكي او اعاكسك مثلا هاتي ملفك يا انسة خليني اشوفه انتي مش جاية هنا علشان شغل ولا انا غلطان 

مريم بحرج 

ااه اه انا اسفة اوي اتفضل السي في بتاعي انا اسفة اوي بعتذر لحضرتك 

يوسف هز دماغه بانزعاج منها لكنه لما شاف السي في بتاعتها انبهر فقال 

اامم طيب انا هعمل معاكي تحدي لو قدرتي تجتازيه هتكوني من ضمن تيم التصميم بتاعنا 

مريم 

تمام ماشي 

يوسف 

دلوقتي هطلب منك تفاصيل اعلان صاحبه طالبه لو قدرتي تعمليه وهو وافق عليه هتشتغلي علطول 

مريم 

تمام اتفقنا 

يوسف 

طيب تمام اقعدي اقولك ع التفاصيل 

❈-❈-❈

انبهر الدكتور عامر اول ما شاف وش ريم مكانش مصدق ان العملية اللي عملها من المرة الاولى نجحت معاه فكان فرحان ومتحمس واخد كم صورة لريم علشان يوثق اللي عمله 

عال عال احب ابشرك ان العملية اللي عملتها ليكي نجحت وكدا تقدري تخرجي من المستشفى خلاص انا هعطيكي شوية ادوية وكريم علشان يخفي اثار الجراحة ف وشك وكل حاجة هتبقى تمام بس بلاش تتعرضي لأشعة الشمس المباشرة 

ريم بحزن 

انت عايزني أخرج من المستشفى يا دكتور طيب هخرج اروح فين انا معرفش حتى اخرج من باب المستشفى لوحدي مش فاكرة حاجة وهخرج اروح لمين مش فاكرة بيتي ولا اي حاجة خالص 

عامر 

متقلقيش انا عندي شقة قديمة مبقتش استعملها ممكن تقعدي فيها لفترة لحد ما تقدري تشتغلي وتعتمدي ع نفسك وكمان هعطيكي مبلغ تعيشي منه لحد ما تقبضي اول مرتب ليكي 

ريم عنيها دمعت بتأثر

اا انا مش عارفة اقول لحضرتك ايه يا دكتور بجد انت انت كريم اوي وقلبك طيب ان شاء الله في يوم من الايام هردلك جميلك دا.. انت كفاية انك انقذتني من الموت واهتميت بيا طول الشهر دا ودلوقتي بتعطيني مكان اقعد فيه وفلوس بجد كدا كتير اوي 

عامر بادعاء الطيبة 

انا معملتش حاجة اي حد مكاني كان هيعمل دا انا كان لازم اساعدك ..ومحتاج منك تيجي المستشفى هنا كل شهر علشان اتابع العملية 

ريم 

حاضر يا دكتور عن اذن حضرتك 

عامر 

تعالي هوصلك انتي مش هتعرفي الطريق 

ريم 

لالا مش حابة اتعبك اتفضل كمل شغلك انا حابة اتمشى شوية برا حضرتك قولي ع العنوان وانا هتصرف

يتبع

إلى حين نشر الفصل الجديد للكاتبة  أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة‏