الحلقة الأولى 

ممنوع الزيارة

كتير بنسمع إن مناطق كتير على الكوكب بتحصل فيها حاجات غريبة و ظواهر غير مفسرة...بنصدق معظم الكلام و أوقات كتير بنقول دي تخاريف...بس الصراحة دي مش تخاريف...لأن الكوكب فعلًا مليان بمناطق بتحصل فيها بلاوي و ملهاش أي تفسير...و قررت في أعرفكم المناطق دي في سلسلة جميلة اسمها "مزارات بلا عودة"

بتضم حكايات المناطق دي و تفسير الظواهر اللي بتحصل فيها لو ليها تفسير...أتمنى السلسلة تعجبكم و خلونا نبدأ النهاردة بأول ٤ أماكن متفكروش تزوروها.......

١-جبال (الخرافة):

في سنة ١٨٤٨...هاجر الألماني "Jacob walts يعقوب والتز" لأمريكا عشان يشتغل في المناجم و التعدين...و راح سلسلة جبلية في منطقة فينيكس التابعة لولاية اريزونا الأمريكية عشان ينقب عن الدهب..اسمها سلاسل جبال الخرافة..و من المعروف عن جبال الخرافة إن فيها دهب و بكميات كبيرة...و بعد فترة نجح فعلًا يعقوب في اكتشاف كنز ذهبي ضخم جدًا..اتسمى بالكنز الهولندي الذهبي المفقود...طب اي هولندي دي...ما أصل المهاجرين الألمان كانوا بيطلقوا عليهم الهولنديين زمان...

و كان الكنز ضخم جدًا لدرجة أن يعقوب كان بيتجول في الشوارع و هو معاه أكياس دهب تحت أنظار الناس

بدأ الناس وقتها يراقبوه و هو طالع الجبل عشان يعرفوا مكان المنجم بالظبط...و اللي يحاول يطلع هو كمان و يدور..لكن ده بدون أي فايدة...

و في ١٨٩١ أتصاب يعقوب بالالتهاب الرئوي نتيجة حدوث فيضان مدمر في فينيكس...و مات و ساب وراه ٥ أكياس دهب قيمتهم ١٥ ألف دولار....يبقى كده فعلًا هو اكتشف منجم دهب.

و من يومها بيحاول ناس كتير من أهل فينيكس و غيرها اكتشاف مكان الكنز المفقود لكن مش عارفين...لدرجة أن فيه ناس اتوفت خلال رحلة بحثهم...و سائد اعتقاد هناك بين السكان المحليين أن أرواح الناس دي موجوده حواليهم.

❈-❈-❈

٢-مزرعة (بيجلو):

في شمال غرب ولاية يوتا الأمريكية هنلاقي مزرعة كبيرة جدًا مساحتها ٤٨٠ فدان..

مالها بقى المزرعة دي؟؟

بيحصل فيها بلاوي و مصايب و بيتشاف فيها حاجات متتشافش...

يعني مثلًا كتير جدًا نلاقي حيوانات ميتة و مشوهة بجانب رؤية أجسام غريبة شوية غير بشرية و بوجود الاتنين دول أي حد هيقول أن الجزيرة دي عليها فضائيين....

لا و مش بس كده ده صاحب الجزيرة الكُبره في يوم من الأيام شاف ذئب كبير جدًا حركاته و بنية جسمة تجمع بين البشر و الذئاب فهووووب ده كده مستذئبين...و شكل الموضوع هيقلب بجد...فقرر أنه يدي العيش لخبازه...و باع المزرعة لمؤسسة علمية بتحاول تفسر ظاهرة واحدة من الظواهر اللي فوق دي.......

❈-❈-❈

٣-جزيرة (اللاعودة):

على بحيرة تركانا في دولة كينيا هنلاقي جزيرة كده شكلها غريب جدًا...و الحقيقة مش شكلها بس اللي غريب...ده قصتها كمان غريبة...

الجزيرة لو فتحنا جوجل و عملنا سيرش عنها مش هنلاقي الا صورة أو اتنين!!!طب ايه السبب في ده؟؟؟

السبب في إن كل ما طياره تعدي من عليها عشان تصورها.. الدنيا تمطر و تقلب بعواصف رعدية!!!

يعني الجو زي الفل و أول ما الطياره تطلع الجو يقلب و كله يرجع..و مقدرناش نلقط ليها الإ صورتين بس و الجزيرة مش واضحة فيهم أوي...طب ده فل جدًا...

من ضمن الحاجات برضة اللي بترعب هناك غير شكلها و عدم القدرة على تصويرها...إن أي حد يدخل الجزيرة ميخرجش منها!!

طب بالراحة كده يعني جزيرة عادية اه شكلها غريب و عادي يعني ممكن تبقى صدفة كل ما طياره تطلع ناحيتها تقلب بعواصف رعدية...كله تمام بس الناس اللي بيختفوا فيها دول بقى بيروحوا فين؟؟؟

ده بقى لا يعلمه إلا الله.

طبعًا الجزيرة بكل الغموض اللي حواليها ده يعني لا عارفين نصورها و حتى لو دخلناها مش هنخرج منها ده غير شكلها اللي يُقبض...ده كله اتسبب في رعب لسكان الأماكن المجاورة للجزيرة.....لحد ما قرر المستكشف الإنجليزي "فيفيان فوتش" و أصدقائه "بيل داوسون" و "مارتن شيل فيلدز"

أنهم يعملوا رحلة استكشاف للجزيرة و أهو ينهوا أي غموض عنها و يطمنوا الناس و يمحوا خوفهم...بس اللي حصل عكس كده خالص...فيفيان و أصدقائه دخلوا و مخرجوش من الجزيرة!!!! و لحد الأن محدش يعرف ايه حصلهم!!!

تعالوا نعد بقى كده مع بعض...

جزيرة شكلها مرعب+صعب إلتقاط أي صورة ليها بسبب عواصف رعدية بتظهر فجأة مع أي طياره تقرب من الجزيرة+ناس بتدخل و متخرجش منها=كائنات فضائية!!!!

من ضمن النظريات اللي فسرت ده كله إن الجزيرة ما هي الإ قاعدة لكائنات فضائية...و أكبر دليل على ده إنه من ضمن الصورتين اللي خدوهم للجزيرة لقوا بقايا أكواخ شكلها غريب شوية.

فبس أنا بقول بقى إنه يادوب نلحق نحضر شنطنا و السفن بتاعتنا مش هنستني يعني أما نلاقي الفضائيين على أول الشارع!!!!

❈-❈-❈

٤-هضبة (من يأتي هنا فلن يعود أبدًا):

ننزل بقى كازاخستان و تحديدًا كيسلوردا...مالها بقى الهضبة الغريبة دي بأسمها الأغرب منها...

بما إن لكل شئ نصيب من اسمه...ف بسم الله الرحمن الرحيم كده الهضبة دي اللي بيروحها و مبيرجعش!!

أي جهاز إلكتروني يدخل نطاق الهضبة يعطل!!

أجهزة الملاحة بتعطل لمجرد إنها تقرب من الهضبة!!

عيلة راحت تسكن جمب الهضبة و حصل معاهم حاجة غريبة؟

طبعًا هتقولي ظهرلهم كائن غريب مثلًا و إلا شافوا أنوار غريبة...

لالالالا ده جلد أفراد العيلة بالكامل أتحول للون الأزرق..و القصة دي حقيقية يا جماعة و معروفة مش خيال..لكن ملهاش تفسير علمي لحد الأن...

فيه تفسير كده الله أعلم بصحته...إن الإتحاد السوفيتي بيعمل أبحاث سرية هناك زي المنطقة ٥١ كده..أو فيه بلوه هناك محدش يعرف ايه ماهيتها هي اللي بتسبب ده كله...

من كتر الظواهر الغريبة اللي بتحصل صنفوا الهضبة كمحمية طبيعية سنة ١٩٣٩ و منعوا زيارتها.

الهضبة ملهاش صور كتير و لا مذكور عنها معلومات كتيرة و ده يأكد أن فعلًا عليها بلوه. 

نورهان نصار.