الزواج الرابط اللي بين اي اتنين ايه بيخليه ناجح ؟ 

ايه يخليه مثالي ؟

ويا تري العلاقات الي بتبان قدام الناس مثاليه وناجحة هي كدة فعلا في الحقيقه ؟

ولا قدام الناس حاجة واللي جوة البيوت ومقفول عليه حاجة تانيه ؟

ليه بنحاول نظهر أما أننا ناجحين جدا في علاقتنا بالطرف الآخر أو نظهر أننا مظلومين جدا معاه ؟ 

كل دي تساؤلات هنشوفها في حكايتنا حكايه الزواج المثالي اللي قدام الناس بيبان ناجح وبيلمع لكنة في الحقيقه ضعيف وهش ومن اول مشكلة بينهار بالكامل 

حكايات موجودة في بيوت كتير مقفوله علي صحابها جواها اسرار مبتتحكيش ولو اتحكت الحياة بعدها احيانا بتكون صعبه 

انس كان عارف أنه سفر ماماته دا كان حجة عشان تعرف تستفرد بيه بعيدا عن الكل  ودا اللي حصل فعلا اول ما وصلو وبعد السلامات والغدا دخل انس اوضته عشان يرتاح شويه ولاقي الباب اتفتح ودخلت احلام وقفلت وراها

احلام بملامح جامدة ...

عايزة اتكلم معاك شوية قبل ما تنام 

انس بهدوء ...

عارف يا ماما وكنت مستنيكي اتفضلي 

احلام ...

طب كويس انك عارف يا دكتور وياتري عارف انا عايزاك في ايه ؟

انس ...

اه يا امي عارف بس قبل ما تتكلمي عايزك انتي تعرفي اني ندمت والله ندمت واستحاله اعمل حاجة زي كدة تاني وكل اللي بتمناه في الدنيا أن اخد فرصه تانيه مع مكة ومعاكم كلكم والله ندمت يا امي 

احلام ...

وانت فاكر بقا اني هقعد اقولك انك غلطت و مكنش ينفع تعمل كدة والكلام دا

انس ...

اومال حضرتك هتقوليلي ايه ؟

احلام ...

لا يا نن عين امك مش دا اللي هقولو الكلمتين اللي عايزة اقولهم لك اني اللي حصل دا مكنش نزوة ولا فراغه عين منك لا اللي حصل دا كان سببه احساسك بالنقص قصاد مراتك يا انس 

انس ...

ماما لو سمحتي 

احلام بحدة ...

ولا كلمة الا لما اخلص كلامي يا دكتور ... لما انت شايف نفسك قليل اوي كدة قصادها لما انت حاسس انها من مجتمع و بيئه تانيه مختلفه عنك لما حاسس انك أقل من أنها تحبك وتتجوزك وتكون مراتك كنت بتحبها ليه ؟ كنت بتتجوزها ليه ؟ الراجل الحر لازم يكون ديما حاسس ان هو اللي بيقود العلاقه لازم يكون قوي وعارف أنه سند وضهر لمراتة لازم يكون شايف نفسه قد المسؤوليه والوعد اللي بياخدهم علي نفسه لما مش شايف نفسك فيك كل دا كنت بتدخلنا بيوت الناس ليه ؟ بتخليني افرح ليه ؟ لما شايف نفسك قليل مفضلتش في خبيتك دي جوة اوضتك من غير ما تعذب الناس معاك لييييييه؟؟

انس بغضب ...

انا راجل ومش قليل يا ماما انا راجل غصب عن أي حد 

احلام وهي بتضربه بالقلم ...

اخرررس متعليش صوتك دا عليا يا خسارة تربيتي فيك يا خسارة يا دكتورررر منك لله بسبب عملتك دي لو مراتك أصرت علي الطلاق هخسر اختي الوحيدة اختي اللي طلعت بيها من الدنيا مش هيكونلي عين ابص في وشها تاني منك لله 

احلام سابت انس في صدمتة من أنها مدت ايديها عليه وخرجت وهو فضل واقف مكانة مش مستوعب أن أمه واجههتة بللي ديما بيهرب منه واجهته بعقدة النقص ال عندة وحس أن القلم دا كان متأخر اوي فضل واقف مكانة والدموع بتلمع في عينيه وفجأة حس بدوخة شديدة وفي ثواني كان واقع علي الارض والدنيا سواد حواليه