رواية طغاة التاريخ 

بقلم الكاتبة سمر إبراهيم

الفصل السابع

رواية

طغاة التاريخ 

(الأميرة أولغا أميرة الانتقام)

النهاردة معادنا مع طاغية جديد بس المرادي الطاغية بتاعنا مش را جل لا دا ســ ت تعالوا نشوف ايه حكايتها.

كلنا سمعنا عن أمير الانتقام سواء اتفرجنا على الفيلم أو قرأنا رواية "الكونت دي مونت كريستو" للكاتب الفرنسي "ألكسندر دوما" بس حد فيكم سمع عن اميرة الإنتقام ودي قصة حقيقية حصلت بالفعل أميرة عملت إبادة لشعب بأكمله انتقاما لزوجها متخيلين.

الأميرة "أولغا" أميرة "كييف الروسية" ويقال لها أيضا "سانت أولغا" ومعناه القديسة أولغا لأنها أخدت لقب قديسة بعد كدا كأول أميرة روسية تعتنق المسيحية. 

كييف الروسية ولاية ضمت أجزاءً من روسيا وأوكرانيا وبيلاروسيا وبولندا.

مدينة كييف تسمى أيضا بـ "أم المدن الروسية" لأنها أصبحت عاصمة روسية مهمة جدًا، وكان موقعها الجغرافي موقع متميز وبفضل الموقع الجغرافي ده استطاعت كييف السيطرة على التنقلات عبر نهر "الدنيبر" وروافده وده خلاها تجمع الأتاوات من الأقوام السلافية المجاورة.

وبالاضافة إلى ذلك فإن التجارة كانت تتم عبر الطريق النهري أي عبر أنهار "الدنيبر، وفولخوف، ودفينا الغربي" وخلال فترة طويلة كانت كييف هي المصدر الرئيسي والسبب الوحيد لازدهار الروس القدماء. 

وكانت الدولة البيزنطية شريكتهم التجارية إلى جانب مدن بحر البلطيق التجارية فضلاً عن الجيران المسلمين في الجنوب الشرقي.

❈-❈-❈

أولغا كانت بنت جميلة جدا جدا بس محدش عارف سنة مولدها فيه اللي قال ولدت عام 890م وفيه اللي قال 879م بس دي تواريخ بعيدة جدا لأن ابنها ولد عام ٩٤٢م ومش معقول تكون خلفته وهي في السن ده وفيه اللي قال 920م ودا الأقرب للحقيقة 

زي ما اختلفوا في عام ميلادها اختلفوا كمان في أصلها فيه اللي قال أن الحاكم "إيغوربن رودريك" وهو حاكم كييف الروسية التقى بها في مدينة "بسكوف" ودي مدينة تقع  شمال غرب روسيا وتبقى كدا أولغا من  أصل بلغاري.

ورأي آخر يقول  إنها من قبيلة روسية تانية.

  ورأي ثالث يُنسبها للدول الاسكندنافية علشان اسم أولغا ده منتشر فى البلاد الاسكندنافية (النرويج، والدنمارك، والسويد)

اختلف المؤرخين كمان في تاريخ زواجها بالأمير إيغور فيه منهم قال أنهم تزوجوا عام ٩٠١م وفيه اللي قال ٩٠٣م وفيه اللي قال ٩٤١م وأنا شخصيا بأميل للرأي ده لأن لما إيغور مات سنة ٩٤٥م كان ابنهم "سفياتوسلاف" عنده ٣ سنين فمش من المنطقى أنهم يكونوا اتجوزوا لمدة تزيد عن ٤٠ سنة وابنهم ٣ سنين يعنى الغالب إنهم اتجوزوا لمدة أربع سنوات.

كانوا بيحبوا بعض جدا وكان إيغور زوج كويس وحنون قدر يحببها فيه رغم انه كان حاكم صارم مع شعبه..

❈-❈-❈

الحكاية كلها بدأت عام ٩٤٥م كان فيه قبيلة اسمها "الدريفليان"Drevlyans، وهي واحدة من قبائل السلاف الشرقيين وكانت تسكن شرق أوروبا وكانت قبيلة مشهورة بإنتاج العسل وتربية الحمام وكانت بيوتها عبارة عن أكواخ بدائية مبنية بالحطب والقش.

القبيلة دي كانت تابعة لكييف وكانت تدفع جزية للحاكم إيغور نظير حمايته ليها لكن اللي حصل إن إيغور في السنة دى فرض عليهم الجزية مرتين وطبعا الكلام ده معجبهومش بس بدل ما يعترضوا على القرار ده أو حتى يعلنوا استقلالهم عن كييف عملوا حاجة تانية خالص خطفوا الأمير إيغور وقاموا بجعل شجرتين تنحنيا 

(ضموا شجرتين على بعض)

وبعدين قاموا برطبه في الشجرتين وأفلتوا الشجرتين علشان جسمه يتمزق وتتناثر أشلاؤه.

طبعا موتة بشعة جدا جدا مهما بلغ ظلم انسان لا يستحق موتة زي دي.

بعد موت الأمير إيغور تولت الأميرة أولغا الحكم كوصية عن ابنها "سفياتوسلاف" اللي كان عنده ٣ سنين في الوقت ده زي ما قولنا.

طبعا موت زوجها اللى كانت بتحبه جدا كان صدمة كبيرة بالنسبالها واللي زود المبلة طين زي ما بيقولوا إن قبيلة الدريفليان مكتفتش باللى عملته لا دا الأمير بتاعها وكان يدعى "مال" أرسل مجموعة من شيوخ القبيلة وحكمائها وعددهم حوالي ٢٠ شخص علشان يطلب إيد الأميرة للزواج.

طبعا طلب الزواج ده مكانش حبا فيها ولا حاجة كانوا عايزين يستولوا على حكم الإمارة وبدل ما كانوا تابعين ليها يبقوا هما الحكام بتوعها.

لما رُسُل الأمير وصلوا لأولغا طلب الزواج عملت إيه بقى؟ قامت واخداهم هيلة بيلة كدا وامرت الحراس بتوعها يدفنوهم أحياء، بس كدا؟ لا طبعا بعتت رسالة لأمير الدريفليان بتبلغه فيها بموافقتها على الزواج منه وإنها خلت الرسل بتوعه عندها علشان تكرمهم وأخبرته إنها تريده أن يرسل لها بعثة تمثله لإصطحابها إلى بلاده. 

بالفعل الأمير "مال" أرسل لها البعثة، وهي بعتتهم لقضاء يوم في حمام البخار للإستحمام، وبعدين ولعت النيران في الحمام بمن فيه.

بعد عدة أيام، دعت أولغا خيرة رجال الدرفليان، لحضول حفل تأبين زوجها، تكفيرًا على ذنبهم في قتله. 

وطبعا أمير الدرفليان مكدبش خبر وبعتلها ٥٠٠٠ واحد من خيرة الشباب والجنود اللي فى القبيلة ولما راحوا استقبلتهم أحسن استقبال وقامت بادخالهم قاعة في القصر وأمرت بإسكارهم و انتظرت حتى أسكرهم شرب الخمر، وأمرت خدمها بذ بحهم جميعا ال ٥٠٠٠ شخص كلهم.

تسكت على كدا لا طبعا ابسلوتلى على ما وصل الخبر للقبيلة كانت محصراهم بجنودها وطبعا مكانوش يقدروا يواجهوها وهما في موقف ضعف وطلبوا منها السماح واستسلموا وطلبوا منها تفك الحصار مقابل كل انتاجهم من العسل وهى وافقت الصراحة ولأن القبيلة كانت مشهورة بتربية الحمام طلبت منهم أولغا أن يرسلوا ثلاث حمامات وثلاث عصافير عن كل بيت في عاصمتهم إسكوروستن Iskorosten (كوروستن حالياً).

  طبعا أهل القبيلة وافقوا فورًا وأعطوها العسل والحمام والعصافير.

تمشي بقى وتسيب القبيلة لا طبعا عملت إيه بقى الســ ت أولغا هانم ؟جابت الحمام والعصافير وربطت في ديل كل واحدة منهم خيط طويل فى آخره قطعة قماش غرقانة كيروسين وولعت فيها وطيرت الحمام علشان يرجع لبيته وفى لحظة كانت بيوت القبيلة كلها النار مسكت فيها وكل اللي يحاول يهرب من النار كانت بتقتله هى وجنودها لحد ما تمت إبادة القبيلة باللي فيها واللي نجى بعد ده كله خدتهم عبيد عندها ورجعت قصرها تاني بعد ما انتقمت لزوجها من كل اللي كان السبب في موته.

❈-❈-❈

بعيدا عن الانتقام واللي حصل بس كانت أولغا مشهورة بين شعبها بالحكمة وكانوا بيحبوها واعتنقت المسيحية عام ٩٥٥م وتم تعميدها في القسطنطينية وأطلقوا عليها اسم "يلينا" أو هيلين (هيلين ، يلينا ، إيلينا)

وزي ما قولت أصبحت الأميرة أولغا الأولى بين الحكام الروس القدامى الذين اعتنقوا المسيحية، وهي تحظى بالتكريم كقديسة في الكنائس الأرثوذكسية والكاثوليكية.

ودخلت المسيحية روسيا على إيد حفيدها فلاديمير والذي استطاع أن يقوم بتعميد البلد كلها.

من المواقف اللي استخدمت أولغا فيها دهاءها كمان كان موقفها من إمبراطور اليونان اللي كان بيحبها جدا وعايز يتجوزها وهى كانت رافضة الجواز ده لأنها مكانتش عايزة تعيش في اليونان، كانت عايزة ترجع لروسيا بس خافت ترفض صراحةً تحط نفسها وشعبها في مشكلة قدامه.

عملت إيه بقى؟ قالت له:

- أنا سوف أتزوجك بعد ان أصبح مسيحية أولًا لأنك مسيحي وأنا لا أزال وثنية.

طبعا الإمبراطور فرح جدا بقرارها ده وكان من ضمن اللي اشتركوا في تعميدها وبعد تعميدها قالت له:

- أنا سأكون جدا سعيدة إن تزوجتك وأصبحت زوجتك لكن أنت بمثابة ابي الذي عمدني وأنت لا تستطيع أخذ اختك كزوجة لك»

وفعلا مقدرش يتكلم بعد اللي قالته ومقدرش يطلب الزواج منها تاني.

❈-❈-❈

ظلت أولغا هى الحاكمة الفعلية للإمارة بتاعتها حتى بعد بلوغ ابنها لأنه كان متفرغ لتوسيع حدود الإمارة وترك لها شؤون الحكم وتوفيت11 يوليو عام ٩٦٩م ولسة التاريخ بيخلد اسمها كصاحبة أكبر انتقام على مر التاريخ .

وزي ما قولت إنها بعد اعتناقها للمسيحية أطلقوا عليها لقب قديسة وفي عام 1997م تأسس وسام الأميرة أولغا في أوكرانيا.

يتبع