رواية زواج مثالي 

بقلم الكاتبة منى محمود 

الفصل الثاني عشر

صابرين قابلت احلام وهي خارجة من اوضة انس وقفتها 

صابرين ...

بردو عملتي اللي في دماغك يا ماما 

احلام بدموع ...

صابرين انا مش ناقصاكي أنا علي أخري وربنا 

صابرين ...

حرام عليكي الضغط دا عليه كف

قاطعو كلامهم بسبب صوت اللي سمعوة 

احلام بلهفه ...

ابنيييي

دخلو جري علي الاوضه لقو انس واقع الأرض 

احلام ...

انس انس قوم يا حبيبي مالك فيك ايه 

صابرين...

انا هروح انده لصالح ابن عمي بسرعه ننقله المستشفى

بعد نص ساعه تقريبا كان انس في المستشفي متعلق له محاليل وباين علي وشه التعب والارهاق

صابرين ... 

خير يا دكتور ؟ طمنا الله يخليك

الدكتور ...

الضغط عنده كان عالي جدا وقت ما جالنا الحمد لله اننا لحقناه في الوقت المناسب 

صابرين بدموع ...

الحمد لله طيب هو مش بيفوق ليه لحد دلوقتي 

الدكتور ...

الادويه اللي واخدها في المحلول كتير وكلها بتنيم عشان الجسم يرتاح اكبر وقت ممكن متقلقيش ساعتين تلاته وهيفوق أن شاء الله عن ازنكم 

بعد ما خرج الدكتور قربت صابرين من احلام اللي كانت قاعدة جمب انس ودموعها نازله 

صابرين ...

ماما اهدي عشان خاطري الدكتور اهو طمنا 

احلام ...

انا السبب انا اللي ضغط عليه بالكلام انا السبب 

صابرين ...

لا حول ولا قوه الا بالله حبيبتي هوني علي نفسك ومتقوليش كدة الحمد لله هو كويس اهو اهدي عشان خاطري 

احلام ...

ربنا يشفيك يا حبيبي ويطمن قلبي عليك 

صابرين ...

اللهم امين ... طب ايه هنعرف مكة ولا ايه ؟

احلام بحيرة ....

والله ما عارفه يا صابرين محتارة بصراحة

صابرين ...

طيب نستني لما انس يفوق وهو يقولنا نعمل ايه 

احلام ...

ربنا يدبر من عندة يا بنتي ويعدي الايام الصعبه دي علي خير 

بعد ساعتين انس كان فاق وطلب منهم ميبلغوش مكة مش عايز يحس أنه بيضغط تاني عليها بموضوع مرضه عايز يسبلها مساحة شوية تفكر وتوافق تديلة فرصه تانيه بدون ضغط منه احلام وصابرين وافقو مقدروش يعارضوة لأن الدكتور محذر جدا من اي انفعال في الفترة دي او منهم اللي اوهمو أنه هيسكت ..

                        ❈-❈-❈    

الليل مر بدون احداث جديدة مفيش غير أن ابتسام كلمت ايمان وحكتلها علي كلام زهرة وأنها مش عارفه تتصرف وإيمان طلبت منها تسايسها للصبح وهي هتقول ل محسن يتصرف 

في صباح يوم جديد زهرة صحيت وهي مقررة أن انهاردة هيكون اخر يوم ليها في البيت دا هي خلاص اكتفت والحل الوحيد عشان ترتاح أنها تبعد كانت عارفه أن ابتسام مش هتتقبل قرارها دا بسهوله لكن هي في كل الأحوال هتنفذة الباب خبط ودخلت ابتسام بضحكتها البشوشه 

ابتسام ...

صباح الخير حبيبتي

زهرة ...

صباح الخير يا ماما 

ابتسام ...

هايدي و مكة برة عايزين يشوفوكي ويطمنو عليكي ادخلهم ولا تعبانة اقولهم انك نايمة ؟

زهرة ابتسمت ...

لا يا حبيبتي انا كويسه خليهم يدخلو 

ابتسام خرجت و دخلو البنات 

هايدي ...

حبيبتي عامله اي دلوقتي الف سلامة عليكي

زهرة ...

الحمد لله كويسه الله يسلمك

مكة ...

سلامتك يا زوزا الف سلامة عليكي حبيبتي

زهرة ...

الله يسلمك يا مكة تسلملي 

هايدي ...

مش محتاجة اي حاجة نعملهالك ؟

زهرة هزت راسها بنفي ...

لا يا حبيبتي شكرا مش محتاجة حاجة 

مكة بتردد ...

هو احم هو انا ينفع اسالكم علي حاجة مع اني عارفه أنه مش وقتة الكلام دا

زهرة بتعب ...

اسالي يا مكة مع اني حسه انتي عايزة تقولي ايه 

مكة اتنهدت ...

هتعملو ايه بعد ما كل حاجة انكشفت ؟ صابرين امبارح بعتتلي فويس قالتلي أن خالتو اتكلمت مع انس وشدت جامد عليه وبعد ما خرجت وقع من طوله ونقلوه المستشفى وفضل فيها مفروض هيخرج انهاردة علي الظهر كدة وطلبت مني متصلش بيها عشان انس أكد عليهم كلهم أن محدش يعرفني حاجة 

هايدي ...

وانتي عاملتي ايه ؟ وهو عامل ايه دلوقتي ؟

مكة ...

بعتلها علي الواتس سالت عليه وقالتلي أنه ضغط علي عليه تاني والدكتور علقله محاليل كتير وأنه مفقش الا بعد ثلاث ساعات

زهرة بتأثر ...

طب ليه طلب منهم ميعرفوكيش ؟

مكة بحزن ...

صابرين بتقولي أنه مش حاسس يضغط عليا تاني بسبب مرضه دا خصوصا بعد ما شاف اني مقدرتش استحمل وانهرت 

زهرة ...

وانتي يا مكة ناويه علي ايه ؟ هتكملي ؟

مكة بحيرة ...

مش عارفه يا زهرة صدقيني مش عارفه عشان كدة بسالكم انتم ناويين علي ايه ؟

هايدي ...

حبيبتي اي كان اللي احنا ناويين عليه ملوش اي علاقه بموضوعك لازم قرارك يكون نابع من جواكي و انس كان معاه حق مينفعش موضوع مرضه يأثر عليكي اديكي جربتي تكملي مرة بسبب تعبه دا وفي الاخر اللي حصل انك اتبدلتي بقيتي واحدة تانيه غير مكة اللي الكل يعرفها يبقي مينفعش تكرري نفس الغلط مرتين يا موكا

زهرة ...

هايدي معاها حق يا مكة قرارك لازم يكون من جواكي من غير اي عوامل تأثر فيه 

مكة كشرت ...

ماشي قراري من جوايا وكل حاجة وفهمة كل دا بس بردو عايزة اعرف هتعملو ايه في مشاكلكم وعايزة رايكم في مشكلتي ايه مشكلتكم في كدة بقا ؟

هايدي ابتسمت ...

ايه كمية المشاكل دي هههههه عموما انا عن نفسي من ناحيه وليد طليقي رجع ولو عرف اني انفصلت دلوقتي من عدي هيعملي مشاكل كتير ويلا نرجع وعشان ابننا و هيبدء يضغط عليا ب كريم ومشاكل كتير اوي انا في غني عنها ومن ناحيه تانيه كريم متعلق جدا ب عدي وعدي طالب فرصه تانيه للحياة بينا ف قراري كان أن هنفضل سوا طول إجازة وليد هنا في مصر ولما إجازة وليد تخلص اكون اخدت قرار نهائي

مكة ...

يا سلام وافرضي بقا أن استاذ وليد دا اجازتة يومين اتنين بس هتعملي ايه ؟

هايدي ضحكت ...

يا خرابي نفس رخامة اخوكي نفس السؤال ب نفس الطريقه 

مكة برفعه حاجب....

انا اخويا مش رخم واتفضلي جاوبي حضرتك 

هايدي ...

خوفت انا كدة ما علينا يا موكا أقل إجازة وليد بياخدها بتكون اسبوعين واكتر إجازة بتكون شهر وانا مش محتاجة لا اقل ولا اكتر من كدة عشان اكون خدت قرار نهائي

زهرة ...

متأكدة أن دا وقت كافي يا هايدي 

هايدي هزت راسها بموافقه....

أيوة يا زهرة متأكدة 

مكة ...

طب وانتي يا زهرة هتعملي ايه ؟

زهرة بتهرب ...

انتي قوليلي الاول ناويه علي ايه يا مكة ؟

مكة بصوت مخنوق ...

صدقيني انا محتارة يا زهرة منكرش اني مجروحة منة اوي قلبي واجعني والوجع اللي جواه لا بيهدي ولا بيقل ابدا بس لما عرفت أنه تعب قلبي كان هيقف قلقت عليه ولاقتني طول الليل دموعي نازله وبصلي وادعيلو ومع صابرين علي الواتس كل شوية عشان اطمن عليه مجروحة منة ومش قادرة اسامح ومش عارفه ابعد عنه مش عارفه اعمل ايه مش عارفه  

زهرة بحزن ...

هوني علي نفسك يا مكة انتي لسه بتحبيه دا واضح اوي بس الجرح ال جواكي منستهوش اديلو فرصه ينسيكي الجرح دا حاولي مرة أخيرة لو مش عشان خاطر حبكم خليها عشان خاطر تالا بنتك متترباش بعيد عن ابوها خليها عشان خاطر خالتك وامك اللي لو حصل الطلاق علاقتهم هتتاثر جدا بس المرة دي يا مكة وانتي بتديله فرصه متكتميش جواكي عرفيه انك مش مسامحة عرفيه انك محتاجة وقت كبير قليل زي ما يكون عشان تقدري تكملي معاه بشكل طبيعي قبل كدة اوك مقبلش خلاص متضغطيش علي نفسك 

هايدي بترقب ...

وانتي يا زهرة ؟ 

زهرة ...

خلينا في مكة دلوقتي يا هايدي 

مكة ...

مكة ايه في ايه يا زهرة انتي مش عايزة تتكلمي معانا يعني عادي مش هنزعل

زهرة بهدوء ...

لاء طبعا مش قصدي والله انا ( خدت نفس طويل ) انا نويت أطلق من عمار وهسافر اعييش مع خالتي في اسكندريه 

هايدي ومكة بصدمة ... ايه !!

                      ❈-❈-❈    

محسن صحي متأخر عن معاد كل يوم كان حاسس أنه تعبان المشاكل كتير والبيوت اللي ممكن تخرب ثلاثه مش بيت واحد ... التفكير كان تعبه كان حاسس ان في جبل فوق كتافه

خرج من اوضتة لاقي ايمان حطت الفطار وعملت الشاي وبتحطو علي السفرة 

محسن بتعب ...

صباح الخير يا ايمان 

ايمان ...

صباح النور يا حج نمت كويس ؟ انا حسيتك تعبان يا اخويا مهنش عليا اصحيك أول ما لاقيتك بتتقلب عرفت انك قربت تصحي قمت احضر الفطار 

محسن وهو بيقعد ...

كنت محتاج انام كتير فعلا الحمد لله 

ايمان ...

طب يلا يلا أفطر وافصل دماغك دي عن التفكير شوية لحد ما تفطر وتشرب كوبايه الشاي بالنعناع المظبوطة دي وبعدين ابقي ارجع فكر تاني ع راحتك

محسن ...

قبل ما افطر اتصلتي الصبح ب ابتسام وفهميتها اللي قولتلك عليه ولا نسيتي ؟

ايمان ...

اطمن منستش قولتلها بس مكة وهايدي عند زهرة بيسالو عليها وقاعدين معاها شوية لسه منزلوش ع ما تفطر انت وتصلي يكونو نزلوة وهي عملت اللي اتفقنا عليه 

محسن هز رأسه بموافقة...

طيب ربك يدبرها بالخير من عندة يلا افطري معايا انا مش بفطر لوحدي وانتي عارفه 

ايمان ...

عارفه يا حج هفطر معاك اهو (ضحكت)

محسن بستغراب ...

بتضحكي علي ايه خير ضحكيني معاكي ؟

ايمان ...

اصل ابنك ساب كل طباعك ومخدش منك غير حتت أنه مبيعرفش ياكل لوحدة زيك 

محسن ...

اااه ابني 

ايمان بحدة ...

بقولك ايه بلا اه بلا لا افطر الاول متتعبش قلبي معاك وبعدين نشوف الهم والمشاكل اللي ورانا

محسن بخوف ...

حاضر حاضر هفطر اهو 

بعد الفطار محسن صلي وجهز نفسه عشان يطلع ل زهرة بعد ما اتاكد أن عمار من الصبح مش فوق ايمان وقفته 

ايمان ...

يا حج البنات لسه فوق منزلوش

محسن ...

عارف وكدة كدة كنت هعدي علي كل واحدة في شقتها فهما وفرو عليا الدخول والخروج واتجمعو في مكان واحد اقول انا لا 

ايمان ...

براحة عليهم يا حج الله يخليك 

محسن بصلها بسخريه ...

هو انا طالع اطوح فيهم الضرب انا هشوف هنعمل ايه يلا تعالي معايا سنديني 

ايمان ...

حاضر يا اخويا يلا ربنا يفرجها من عندة

طلعوا عند ابتسام وهي استأذنت البنات أن محسن عايز يتكلم معاهم 

البنات طول الوقت دا بيحاولو يقنعو زهرة انها ترجع عن قرارها خصوصا بعد ما عمار صد لمار قدامهم والحزن اللي باين جدا عليه ومعرفتهم بقصه حبهم اللي الكل متاكد منها لكن زهرة كانت مصرة جدا مقتنعه بقرارها ومعندهاش اي استعداد أنها حتي تفكر مرة تانيه 

دخل محسن وبعد السلامات والاطمئنان علي صحة زهرة بدء يتكلم 

محسن ....

اول حاجة كدة لازم تعرفوا ان اللي هنتكلم فيه هنا ودلوقتي مفيش مخلوق تاني هيعرفو غير ايمان و ام عمار وبس (بص ل هايدي) اهلك ميعرفوش حاجة (بص ل مكة ) وانتي كمان لا خالتك ولا اي حد يعرف مفهوم ولا لا ؟؟

كلهم هزو دماغهم بموافقه وهو كمل ...

تسمعو بقا اللي هيحصل بالظبط واللي انتم التلاته هتنفذوه بالحرف الواحد بسم الله 

يتبع..