رواية عشق الروح

بقلم الكاتبة منى محمود 

الفصل التاسع 

رواية

 عشق الروح 

بعد ما فرح هزقت جيجي ويوسف كمل عليها هو كمان انسحبت في هدوء 

يوسف ...

ممكن تهدي بقا خلاص اهي مشيت اهي

فرح بغيظ ... 

انا هاديه خالص على فكره بس حضرتك باماره ايه تقولها اني حبيبتك وقريبا خطيبتك هه؟

يوسف ببتسامة ... 

باماره انك فعلا حبيبتي و فاتحت بابا في اني عايز اتقدملك ومستني موافقه حضرتك عليا

فرح بدهشه ... 

انت كلمت ولدك عليا ؟؟ 

يوسف ...

 يا فرحتي افهميني انا بجد بحبك ب شقاوتك و لسانك الطويل دا و عينيكي عينيكي ال خطفتني من اول مره شوفتك فيها انا متأكد من مشاعري انا صابر بس عشان انتي تتأكدي من مشاعرك بس انا وبابا ورامي صحاب جدا واحنا مش بنخبي عليه حاجه ف حكتله عنك لكن انا مستعد استنى لما تحسي انك مقتنعه و بتحبيني بجد هستني يافرح 

فرح بخجل ... 

يعني هقول ايه بعد الكلام الحلو دا ... بص انا هكون صريحه معاك انا انا يعني احم حاسه بمشاعر ناحيتك بس انا متلخبطه خلينا بس مش نتسرع ممكن 

يوسف ضحك ... 

ممكن جداااا يا فرج الله حاسه بمشاعر ناحيتي

وقام يوسف وقف وجرى ع تربيزه رامي وليلى

يوسف ببتسامة وصوت عالي شويه ... 

الحقوني حاسه بمشاعر ناحيتي يا خونا

فرح من وراه ... 

انت اتجننت يا يوسف هههههههه

ليلى ... 

هههههههه مالك يا بني

يوسف ... 

بتقولي حاسه بمشاعر ناحيتي انتم متخيلين يا جدعان

رامي بضيق ... 

وايه جايبكم من تربيزاتكم مفروض تقعدو مع بعض شويه الساعتين قربو يخلصو حسو بقا وخلو فيه شويه دم 

ليلى بخجل ...

 رامي مش كده ف ايه

رامي بغيظ ....

رامي ايه بقا ما تمشي يا زفت انت لسه واقف ليه 

يوسف برخامة ...

 طب ايه رايك بقا مش همشي اقعدي يا فرح

وقعدو فعلا

رامي كشر ...

 يوسف متهزرش انا عايز اقعد مع لي لي بجد

يوسف ...

 هتاخدني معاك الحفله و اجيب فرحتي معايا ولا لا ؟

رامي ...

 حاااضر انا معايا اربع دعوات ومن غير ما تقول كنت هقولك اصلا قووووم بقا

ليلى بحرج ... 

رامي خلاص اصلا احم الوقت اتأخر وخالتو هتزعل مننا لازم نمشي

رامي لسه هيتكلم تليفون فرح رن وكانت سميره

فرح ... 

يختي ماما بترن لو عرفت اننا مش في الطريق للبيت هنبات علي السلم 

ليلى ... 

طب ايه قومي نجري بسرعه 

رامي ... 

هههههههه مش ل درجه تجرو خلاص يلا وان شاء الله توصلو بسرعه و ياريت تطمنيني لما توصلي يا لي لي

ليلى برقه ...

 اوكي

فرح ... 

وانت يا عم الحلو مش عايزني اطمنك لما اوصل

يوسف ...

 اسمها يا حبيبي بصي سهله قولي ورايا ح ب ي ب ي

فرح لسه هترد عليه قاطعتها ليلي

ليلى ... 

لاااااا بقولكم ايه لسه هتردو ع بعض خالتو هتاكلنا

ضحكو و وصلو الشباب البنات لحد البيت ولما طلعوا سميرة زعقت معاهم علي التأخير وليلي خدتها حجة وسابت فرح بتحايل في سميرة ودخلت بشويش علي اوضتها قبل ما فرح تستجوبها علي اللي حصل النهاردة 

❈-❈-❈

لكن فرح فهمت اللي ليلي فكرت فيه و دخلت وراها كانت ليلي في البلكونة حضنة الفون بتاعها وسرحانة 

فرح ...

 ال شاغل عقلك وقلبك يا ليلي بقالي شويه واقفه وانتي مش حسه بوجودي خالص

ليلى ... 

هه ابدا مفيش

فرح ...

 اولا انا عايزه اعرف عيطتي ليه اول ما روحنا ثانيا ايه حكايه رامي بالظبط

ليلى ... 

حكايه رامي اني حاسه اني بحبه 

فرح ... 

رغم انك بتهربي من اولا بس براحتك هنرجع لها تاني .. المهم وهو حاسه أنه بيحبك

ليلى ...

 اه حاسه بصي انا شبه متأكده

فرح ... 

طب الحمد لله يعني الافكار ال عبيطه دي طلعت من دماغك خلاص

ليلى كشرت ... 

أفكاري مش عبيطه لا طبعا انا عند رأي رامي معايا عشان وضعه دلوقتي لو عمل العمليه هيبعد عني بس انا مش هسمح بكده

فرح ... 

شاطره هتدافعي عن حبك صح

ليلى ... 

لا ههرب واسيب البلد كلها قبل ما هو اللي يبعد واتجرح تاني 

فرح بصدمه ... 

قولي انك بتهزري صح

ليلى ...

 لا مش بهزر بصي انا مرتبه كل حاجه بجد انا مش هقدر اتحط في موقف دا تاني يا فرح افهميني

فرح بحده ...

 افهم ايه واهبب ايه كفايه بقا انتي ازاي تفكري كده وبلد ايه ال تسيبها وانا وماما ايه مش في حساباتك مفكرتيش فيا يا ليلي خالص

ليلى ... 

فرح اهدي حسي بقا انا تعبانه انا بحبه اوي ومش هقدر اعيش الرفض ال عيشته من عمر وقبلها امي مش هقدر اعيش الرفض دا من رامي كمان

فرح بغضب وإصرار ... 

والله ما هتحرك من هنا الا لما اعرف كل حاجه سامعه كل حاجه يلااااا

ليلى حكت لفرح كل حاجه موضوع مامتها و موضوع عمر فرح دموعها نزلت وهي بتسمع ليلى وساكته ومش بتنطق

ليلى ... 

انا مخبتش عليكي حاجه والله انتم اللي كنتم مخليني عايشه اصلا وخبيت عليكي عشان مكنتش عايزة احس بأس شفقة أو حزن عليا كنت مبسوطة ان العلاقه بينا مش عشان أنا صعبانة عليكي يا فرح بس مش هقدر افضل واتجرح تاني 

فرح من غير ولا كلمه قامت وحضنت ليلى اوي

فرح ...

 لي لي ممكن انام ف حضنك

ليلى بدهشه ... 

مالك يا فرح في ايه مش رد الفعل اللي توقعته منك ؟

فرح ... 

مش هتكلم ف حاجه دلوقتي عايزه انام في حضنك بس 

حضنو بعض ونامو

❈-❈-❈

نيجي للشباب بقا

يوسف ... 

وادي احلي فنجانين قهوة ممكن تشربها في حياتك ها بقا يا سيدي ممكن تفهمني عملت كده ليه؟

رامي ...

عشان ال كنت عامل حسابه هو ال حصل ليلى لو عرفت اني شفت هتبعد عني ومش هتصدق اني بحبها لازم اجبهالها بالتدريج لازم الأول تثق في حبي ليها فهمت

يوسف ...

 رامي هو هو انت فعلا يعني بتحبها؟ 

رامي بثقه ... 

هههههههه انا مش بحبها انا بموت فيها بعشقها هي حاله كده ع بعضها مش موجوده هي الحنيه والدفا والحب والامااان اااه يا جو محستش ب دفا وأمان غير وانا معاها بس لما شوفتها وعيني جت ف عينيها حسيت اني عايز ادخلها جوه ضلوعي ومتخرجش ابدا وان حضني هو دا مكانها انا مش عارف هقدر اسيطر ع نفسي ازاي ادامها لا لا لازم نتجوز في أسرع وقت

يوسف بدهشه ... 

اوبا دا روميو حب بجد بقا انا مبسوط اوي بيك انا بعتبر ليلى اختي و فعلا هي محظوظه بحبك دا ربنا يسعدكم يا حبيبي

رامي ...

 رغم اني كنت زعلان انك دائما بتشكك في مشاعري بس كنت راجل اوي في نظري وانت خايف عليها حبيبي يا جو

يوسف ...

ربنا يسعدكم يا حبيبي يارب 

❈-❈-❈

وفي صباح يوم جديد في شركه ليلى دخل رامي ويوسف

ليلى ... 

اهلا اهلا جيتو في وقتكم

رامي ...

 صباح الفل يا لي لي

يوسف ...

 صباح الخير يا لي لي

ليلى ... 

صباح النور بصو بقا من غير ما حد يطلب مني تفاصيل فرح زعلانه مني ومكشره في وشي من امبارح ساعدوني اصالحها ممكن ؟

رامي بدهشة ...

 لا ثانيه بس مين مكشر فرح وميييين ال مزعلها انتي انتي يا لي لي

ليلى ... 

رامي بليز من غير تفاصيل ساعدوني بقا

يوسف ... 

اصل غريبه اوي طيب عايزانا نعمل ايه بالظبط ؟

ليلى لسه هتتكلم دخلت فرح .. فرح كانت مطفيه مكشره كانت واحده تانيه خالص الحزن مسيطر عليها

فرح بحزن ... 

صباح الخير

يوسف باهتمام ...

 فرح مالك انتي كويسه؟

فرح بضيق ...

 لا مش كويسه ومش عايزه اتكلم لو سمحت.. رامي يلا نبدء ولا هتقعد مع ليلى شويه

ليلى كشرت ... 

شوفتو مش راضيه تكلمني ازاي 

فرح بصت ل ليلى بحزن وعتاب وسكتت

يوسف ... 

يا جماعه استهدو بالله انتم اتحسدتم ولا ايه في ايه مالكم

فرح بسخريه وانفعال ...

 اتحسدنا هههههه تصدق ضحكتني اتحسدنا ع ايه.. ماخلاص طلعت ولا فارقه مع الهانم وعايزه تسافر وتسبيني ولا كان في ناس هنا متقدرش تعيش من غيرها ولا كان في واحده مش بتعرف تخطي خطوه من غيرها كل دا رميته وهتسافر

فرح كانت بتتكلم بعصبيه هي موجوعه عليها اه بس مكنتش متخيله ان ليلى تستسهل بعدها عنها كده ونسيت خالص وجود رامي اللي كلمه السفر نزلت عليه خلته مصدوم

رامي ... 

سفر ! سفر ايه دا يا ليلي كنا مع بعض امبارح ومجبتيش سيره السفر ؟

ليلى وشفها احمر واتوترت و ايديها بدأت تعرق و عماله تشبكهم في بعض

رامي بحده ... 

ما تردي عليا سفر ايه دا ؟

يوسف مراقب الوضع وحس باللي ليلى فيه

يوسف بهدوء ... 

ممكن كلنا نهدي لو سمحتم رامي اهدي ليلى مش عارفه تتكلم من الحده اللي في صوتك اهدي شويه 

فرح حست انها زودتها وحطت ليلى ف موقف وحش حبت تصلحه

فرح بتوتر ... 

 دي دي أصلها عايزه تفتح فرع للشركه في دبي عشان في واحده صحبتنا هناك اقنعتها بكده

ليلى اتنفست ورامي ويوسف متأكدين ان فرح بتكذب

رامي ... 

والله ممممم طيب

ليلى بصوت ضعيف من توتر ...

 ررامي انا انا كنت هقولك اكيد و و انا اصلا لسه يعني بفكر

رامي بضيق ...

 اوكي يا ليلي لما تاخدي قرار ابقى بلغيني

يوسف بمرح ... 

لا كده كلنا بربطه المعلم اتحسدنا اللي يشوفنا بالليل ميشفناش دلوقتي بصو احنا نعدي اليوم دا كده من غير كلام في اي حاجه وبكره الحفله نهاري نتكلم ف جو ظريف لطيف مع بعض تمام

رامي ...

 تمام عن اذنكم هروح شغلي يلا يا فرح

مشي رامي وفرح وفضلت ليلى ويوسف

يوسف ... 

طبعا انتي عارفه انه حقه يزعل وطبعا انا وانتي واثقين ان فرح بتكذب بس هنعدي اليوم يا ليلي وبكره لينا كلام تاني نكون كلنا هدينا سلام

❈-❈-❈

ليلى حست انها مخنوقه خدت شنطتها ومشيت راحت ل دكتوره همت كانت محتاجه تتكلم مع حد حست انها متلخبطه

رامي حاول يفهم من فرح السبب الحقيقي لسفر ليلى و فرح رفضت تتكلم هي منكرتش انها كذبت بس رفضت تقول السبب الحقيقي ورامي كان واثق انه هو السبب

عدي اليوم من غير كلام بين أبطالنا وجه يوم جديد يوم هيغير مصير أبطالنا تماما

في صباح يوم جديد وتحديدا عند البنات فرح دخلت ع ليلى اوضتها لاقيتها قاعده ومش بتجهز للحفلة 

فرح ... 

حضرتك مش بتجهزي ليه وماما بتقول انك رفضتي تفطري كمان 

ليلى بحزن ... 

مش عايزه اكل ومش هروح حفلات

فرح ... 

بتهربي هه عارفه انه مصدقش الكدبه الخايبه بتاعتي وهيسالك ف بتهربي

ليلى ... 

فرح عمرك ما كنتي قاسيه عليا كده ايه اللي حصل زعلتي مني تمام معاكي حق انا فكرت ف قلبي انه ميتهنش للمره تانيه بس والله عمري ما شفتك مش مهمه ازاي قدرتي تنطقيها اصلا

فرح بدموع ...

 انا حاسه بيكي والله وموجوعه عشانك ومقدره بس فكره كنتي مخبيه عني كل دا و انك تستسهلي بعدي دي دبحتني يا لي لي

ليلى وهي بتحضنها ... 

حقك عليا انا اسفه اوعدك هفكر تاني بس متزعليش مني بالله عليكي

فرح ... 

انتي كمان حقك عليا انا مكنش مفروض في الوقت دا اقسي كده عليكي انا اسفه

بعد ما خلصوا عياط وهديو شويه 

فرح ... 

لي لي لازم تروحي الحفله ولو رامي كلمك اطلبي منه يأجل اي كلام لحد ما تاخدي قرار الهروب مش حل خالص

ليلى بتنهيدة ...

 اوك تعالي اختاري معايا فستان

❈-❈-❈

عند الشباب

يوسف ... 

رامي انا سبتك تهدي امبارح بس الأمور متتخدش بعصبيه كده ليلى خايفه ومش هتتكلم وهي خايفه كده

رامي كشر ...

 المفروض اكون هادي وانا عارف ان ممكن في ثانيه اعرف ان البنت الوحيده اللي حبيتها هربت مني وسابت البلد صح؟

يوسف ... 

لا المفروض تفكر بعقل انت كنت عارف انها هتهرب منك اه مش لدرجه السفر لكن اكيد عارف هي بتمر بأيه يبقى طمنها سامع طمنها وحسسها انك امانها مش تتكلم بعصبيه وهي تخاف اكتر ايه مصعبتش عليك امبارح

رامي بحزن ...

 كنت هموت وانا شايفها خايفه كده ااااه يا يوسف والله ما عارف اعمل ايه

يوسف ...

 نقوم نروح الحفله نتعامل كويس وانت تتعامل بهدوء وحب تحتويها و تشيل الخوف من قلبها يلا يا بطل نجهز

❈-❈-❈

وصلو الشباب واول ما بنات نزلو

رامي ابتسم تلقائي وهو شايف حبيته نازله شافها ملكه  بصلها بحب اوي لدرجه ان هي استغربت وهو اتوتر وبص الناحيه التانيه

اما بقا يوسف نزل من العربيه وهو وشه احمر من الغيظ والغضب بسبب فستان فرح

يوسف ...

انتي رايحه فين يا فرح كدة 

فرح ... 

مالك يا بني هركب عشان نروح الحفله

يوسف بحده ...

 دا انتي نهارك اسود انهارده ايه اللي انتي لابساه دا

فرح بغضب ...

 انا انا نهاري اسود اتعدل يا يوسف

يوسف ... 

انا معدول يختي اطلعي غيري الزفت دا مفيش مرواح كده

فرح بعند ... 

لا هروح كده حلو و عجبني يا يوسف يا مش هروح خالص

ليلى بهدوء ...

 يوسف اهدي الناس بتتفرج علينا

يوسف ...

 يعني ينفع ال هي لابساه دا يا ليلي 

فرح ...

 اه ينفع وانت لو كنت اتكلمت معايا بأسلوب احسن من كده مكنتش رديت عليك كده

يوسف ... 

ارحميني يا فرح انا مش هقدر اسيبك تخرجي كده ارجوكي غيري الفستان دا

فرح بعند ...

 لا مش هغير حاجه اقولك معنديش غيره ويلا بقا كلمه كمان مش هروح خالص وهاخد ليلى معايا ونطلع بيتنا

رامي ...

 لاااااا ليلى ايه اللي تطلع انت يا بني مشاكلكم دي حلوها بعيد عني 

يوسف بهدوء ... 

تمام يا فرح اتفضلي بس لسانك ميخاطبش لساني 

ومشي قبل ما هي ترد حست انها زودتها هي كانت قصده تناغشه لكن تزعله لا يوسف بقا حبيبها وملك قلبها

❈-❈-❈

ركبو وطول الطريق رامي عينيه على ليلى اللي حست ان في حاجه غريبه وفرح بتبص ف المرايه ع يوسف ويوسف متجاهلها تماما ووشه مفهوش اي تعابير

وصلو الحفله و كانت في مكان مفتوح على النيل فيها رجال أعمال و مكاتب محاسبه و رجال الاقتصاد المهمين في البلد راحو على التربيزه المحدده ليهم

فرح بتردد ... 

احم يوسف انت زعلان مني بجد ولا اي

يوسف مش بيرد

ليلى ... 

رامي ممكن نتمشى شويه

رامي ...

 اوك يلا بينا

بعد ما قامو فرح قربت من يوسف ومسكت ايديه

فرح بحب ... 

يوسف بصلي انت زعلان مني اوي كدة

يوسف مشاعره اتلخبطت بسبب مسكه ايديها له لكنة فضل باين ثابت زي ما هو 

يوسف ... 

انتي عملتي حاجه تزعلني؟

فرح ... 

انا انا مكنتش اقصد وبعدين دا ستايل لبسي وانت عارف

يوسف ... 

لا تقصدي انا قلتلك ارجوكي اطلعي غيريه وانتي عندتي معايا انا بحبك وبغير عليكي كنت فاكر ان دا بقا حقي بس تقريبا انا اتسرعت و 

فرح قاطعتة ... 

لا والله مش كده وبعدين طبعا حقك انا كلي تحت امرك حقك عليا انا اسفة 

يوسف بدهشه ...

 مين ال كله تحت أمري ؟

فرح ببتسامة ... 

انت يا نجم النجوم 

يوسف ... 

فرح انتي عيانه فيكي حاجه؟

فرح ... 

هههههههه لا انا كويسه انا بس يعني بصراحه كده

يوسف ببتسامة ...

 ايوه قولي في ايه ما اكيد بعد الكلمتين دول لازم بس ويعني قولي قولي

فرح ... 

بص انا بحبك

يوسف تنح 

فرح ... 

يوسف مالك؟

يوسف ... 

انا اتجننت يا فرح وبقا يجيلي تهيؤات بسببك تخيلي اتهيئلي انك هههههههه

فرح ...

 حبيبي انا فعلا بحبك ودي مش تهيئوات دي حقيقه

يوسف ... 

حبيبي وبحبك ورا بعض هموت كده يا فرح مش قادر لا مهديلي الموضوع واحده. واحده

فرح ...

 هههههههه ما تنشف كده يا شبح في ايه 

يوسف كشر ...

 شبح فصلتني بصي بسبب الاعتراف الهايل دا انا هتغاضي على موضوع الفستان بس لبسك كله هيتغير اوك ولا مش اوك 

فرح ببتسامة ... 

اوكي يا حبيبي

يوسف ...

 يا لهوي عليا طب ايه اقوم ارزعك بوسه قدام الناس دي كلها ولا اعمل ايه

فرح بزعيق ... 

نعمممم ترزع مين يا أمور يوسف اتعدل بدل ما اعدلك

❈-❈-❈

عند رامي وليلى

ليلى ... 

رامي انت لسه زعلان مني ؟

رامي ...

 ليلى انا بحبك

ليلى اتصدمت ...

 ب بتحبني ا انا

رامي بحب ...

 اه بحبك انتي.. انتي اللي خطفتيني انتي اللي دخلتي قلبي انا مش بس بحبك لا انا عديت الحب بكتير

ليلى بتردد وخجل ...

 رامي انا انا

رامي بثقه ... 

بتحبيني صح؟

ليلى ...

 دا ثقه ولا غرور

رامي ... 

لا مش غرور بس عارف حبيبتي بعرفها من غير ما تتكلم حتى

ليلى بحزن ... 

بكره تبعد عني لما ترجع تشوف رامي انا مش ههرب منك زي ما كنت ناويه بس احنا علاقتنا محكوم عليها انها تنتهي من قبل ما تبدء

رامي ... 

ومين بقا اللي حكم بكدة حضرتك؟

ليلى ... 

من غير تريقه لو سمحت انا حكتلك كل حاجه ومش هقبل لما ترجع تشوف انك تكمل معايا شفقه او انك تتهرب مني يبقى بلاش نوجع قلوبنا من اولها كده

رامي ... 

ليلى انا بحبك سامعه وانتي احلى بنت شافتها عيني

ليلى ...

 لما تشوفني مش هتقول كده.. انا انا مش البنت اللي في خيالك 

رامي ...

 انتي طلعتي احلى مليون مره من خيالي وانا شايفك بفستانك الي جنني دا ولا خدودك اللى من أقل كلمه تحمر صحيح يا لي لي ملفتين اوي لازم نشوف ليهم حل

ليلى بتوتر وصدمة ... 

ش شايفني ا ا ازاي؟

رامي ...

اهدي.. انا لما سافرت عملت العمليه ورجعت ويوم ما رجعت اتقابلنا كنت شايفك و خفت اقولك تبعدي عني ليلى انتي لو بعدتي عني انا هموت ارجوكي اديني فرصه اثبتلك اني بحبك

ليلى اتوترت و بدأت ايديها تعرق و وشها يحمر وسكتت

رامي ...

 لي لي انا لما بشوفك خايفه كده سكاكين بتقطع فيا حبيبتي والله بحبك والله انتي احلى بنت شوفتها في حياتي انا مش عايز من الدنيا غيرك انا لو هبعد كنت بعدت بعد ما شوفتك لكن انا اول ما عيني لمحتك حسيت اني عايز اخدك جوه ضلوعي ومتخرجيش من حضني ابدا ليلى ارجوكي متبعديش عني هموت من غيرك

ليلى كانت في دنيا تانيه معقول بيشوف معقول شايفني قدامه وبيقولي الكلام دا رامي هو ال بيرجوني افضل جمبه عقلها رافض يستوعب بس قلبها صدقه

رامي ...

 لي لي ساكته ليه؟

ليلى .. 

مش عارفه اقول ايه

هنا قاطع كلامهم دخول عمر عليهم

استوب عمر شاب وسيم اسمر عينين سودا واسعه طول بعرض جمال شرقي وهو صاحب مكتب المحاسبه الي خطب وساب ليلى

عمر بابتسامه .. 

مش معقول لي لي ازيك ايه الصدفه الجميلة دي

ليلى اتوترت خلاص حست ان الارض بتدور بيها مفاجأت كتير وهي مش ملاحقه

رامي بضيق ..

 اهلا عمر ازيك

عمر .. 

تمام ازيك يا رامي سوري مخدتش بالي عيني راحت ع القمر ال جمبك علي طول 

رامي بغيره .. 

والله القمر ال جمبي دي خطبتي وفرحنا قريب اوي

عمر بصدمة ...

 خطيبتك.. ازاي وامتي ليلي الكلام دا صح؟

رامي بحده .. 

هو ايه قله الزوق دي بقولك خطبيتي وفرحنا قريب كلامك معايا انا مش معاها وبعدين فين خطيبتك سيباك ليه لوحدك

عمر وهو باصص ل ليلى ..

 انا فسخت خطوبتي انا اتسرعت اوي يا ليلي ارجوكي قولي انك متخطبتيش ارجوكي قولي انك مضعيتش مني 

ليلى ساكته هي لا عارفه تقول ايه ولا قادره تنطق من كم المفاجأت اللي نازل عليها

رامي بغضب ..

 انت شخص مش محترم اقسم بالله لو ما مشيت من قدامي دلوقتي ل هنسي احنا فين وهعلمك الأدب من اول وجديد

عمر بعند ..

 مش همشي الا لما اسمعها منها ليلى انتي اتخطبتي بجد انتي ضعيتي مني 

رامي بغضب .. 

انا مش هستحمل كده كتير ليلى انطقي انا علي أخري 

ليلى بصوت ضعيف من التوتر .. 

ا انا ب بحب رامي و خطوبتنا ر رسمي قريب يا استاذ عمر وميصحش كده

رامي بتحدي .. 

ها ياريت تخلي عندك دم وتغور من وشنا دلوقتي

عمر بحزن وندم .. 

انا ماشي بس قبل ما امشي احب اقولك انت معاك جوهره حافظ عليها لو ضاعت منك هتندم اوي اوي صدقني

خلص كلامه و جري من قدامهم رامي ملحقش يرد عليه جه يروح وراه ليلى منعته ومسكت ايديه بحركه عفويه منها

ليلى بقلق ..

 رامي بليز مترحش وراه

رامي بغيره .. 

ليه خايفه عليه اوي

ليلى بعفويه ..

 لا خايفه عليك انت والله

رامي ابتسم و مسك ايديها الاتنين وبص بحب في عيونها

رامي ..

 خايفه عليا ليه؟

ليلى بخجل ..

 ر رامي مينفعش كده علي فكرة 

رامي بغيره ..

 فعلا مينفعش كده خدودك دي شوفي ليهم حل قلتلك ملفتين اوي هه

ليلى نسيت كل حاجة ..

 هههههههه اعمل ايه يعني مش بأيدي ع فكره

رامي بغمزة .. 

وانا بعشقك على فكره 

ليلى اتكسفت وبصت في الارض

رامي ..

 لاااااا بقولك ايه الكلمه اللي قولتيها أدام الزفت اللي كان هنا انا عايز اسمعها تاني واضحه وصريحه حالا

ليلى .. 

رامي متحرحنيش ممكن وبراحة عليا انا مش مستوعبه كم المفاجآت دا مش عارفه اعمل ايه. لا اقول ايه وانت اكيد عارف كدة

رامي ..

 عارف ايه ليلى انا مش عارف غير اني بعشقك انتي ايه مشاعرك ناحيتي

ليلى بتوتر ..

 احم انا انا كمان يعني انا كمان

رامي .. 

هههههههه خلاص خلاص واحده واحده هتاخدي عليا وتقوليها عادي عموما كلها شهر ونبقى في بيت واحد

ليلى ...

نعم ! شهر ازاي؟؟

رامي ..

 شهر ٣٠ يوم ونكون متجوزين وفي بيت واحد بصي هو شهر كتير انا عارف بس عشان الحق اوضب شقتي ل ملكتي اللي هتسكن فيها

ليلى ببتسامة ..

 ملكتك

رامي بحب ..

 اها انتي ملكه في نظري وملكتيني بعينيكي الحلوه دي و خدودك و 

ليلى قاطعتة ..

 رااامي

رامي بحب ..

 عيونه وقلبه وعقله

ليلى ...

 هههههه رامي بس ونتكلم جد بقا شهر ازاي مش هلحق اخلص حاجه

رامي ..

 انتي كل اللي عليكي تؤمري وانا هنفذ ليلى مش هقدر ابعد عنك اكتر من كده حسي بيا بقا

ليلى اتكسفت وسكتت

رامي .. 

بقولك ايه ما تيجي نخلع من الحفله الممله دي

ليلى ..

 هنروح فين؟

رامي .. 

لا دي هتبقي مفاجأة

ليلى ..

 لاااا كفايه مفاجات عليا كده انهاردة هموت منك

رامي كشر ..

 بعد الشر عنك يا روحي .. اقولك انتي تروحي وتبلغي خالتك ان هنجيلكم بالليل انا مش هضيع وقت انا هاجي بالليل أتقدم لك و بكره هننزل نشتري الدبل لازم كل الناس تعرف انك بتاعتي

ليلى ..

 مممم مش بس غيور لا ومتملك كمان

رامي ابتسم ..

 معاكي انتي بس والله

❈-❈-❈

ليلى لسه هتتكلم قاطعها دخول يوسف وفرح عليهم 

يوسف .. 

باركولنا خلاص البرنسيس وافقت الحمد لله

رامي .. 

طب خد عندك الاخبار دي بقا .. ليلى عرفت إني بشوف واعترفتلها بحبي و بالليل هاخد ابوك ونروح نتقدم وفرحنا بعد شهر

فرح ويوسف مصدومين

فرح .. 

مين اللي بيشوف يا هندسه

رامي ببتسامة .. 

انا يا فرح الاسبوع ال غبناه عملت العمليه والحمد لله نجحت

فرح وهي بتبص بغيظ ليوسف .. 

وحضرتك مقلتليش ليه و مين ال فرحه بعد شهر و استنى كده اعترفت ب ايه رامي عيد كل اللي قولته كده تاني يمكن دماغي تستوعب في الاعاده

يتبع ...