رواية عشق الروح

بقلم الكاتبة منى محمود 

الفصل الحادي عشر

رواية

عشق الروح 

يظنون اني عشقي لك ضعفا مني 

ولا يعملون أن ضعفي في عشقك هو منتهي القوة 

ليلي كملت كلام 

ليلي ...

بص انا عندي مشكله لسه مش قدرت اتخطاها وهي قرب اي راجل مني يعني احم قرب بمعنى اي تلامس انا بعرق جدا و بتوتر ولو الوضع ذاد ممكن افقد الوعي و وانا عارفه انه حقك طبعا متصبرش عليا بس بس بليز يا رامي استحملني شويه كمان اوعدك هخف خالص عشانك بس مش تبعد عني

رامي مش بيرد

ليلى ... 

رامي انت ساكت ليه انا خلصت كلامي ؟

رامي بردو مش بيرد

ليلي رمت التلفون من ايديها وبدأت تعيط ..فرح دخلت وجريت عليها 

فرح بخوف ... 

ايه دا في ايه ؟ ليلي مالك ؟ 

ليلى ببكاء ... 

مفيش حاجة مخنوقه شويه

فرح كشرت ...

 انتي نكديه يا بنتي ف ايه 

ليلى بصوت مخنوق ...

 فرح لو سمحتي انا شويه هكون كويسه سيبني لوحدي ممكن 

رن تلفون ليلى باسم رامي

فرح ... 

طب ردي ع روميو وهو هيعرف يروقك

ليلى بضيق ... 

لا مش هرد واطلعي بقا يلا

رن تلفون فرح باسم رامي فردت بسرعه 

فرح ... 

ايوه يا روميو مزعل قمري ليه ومخليها بتعيط هه 

رامي ... 

فرح اديها التلفون لو سمحتي

فرح ... 

خدي بقا عايزاك وصوته جد اوي

اخدت ليلى الفون وهي لسه بتعيط

ليلى ببكاء ...

 الو

رامي ... 

جهزي نفسك ربع ساعه هكون عندك تنزلي

ليلى ... 

رامي انزل فين الساعه ١٠ ونص مستحيل طبعا خالتو توافق 

رامي ...

 انا اتصلت بخالتك واستأذنت منها هنلف بالعربيه نص ساعه وارجعك اخلصي يا ليلي زي ما سبتك ع راحتك انا ردي مش على الفون و الواتس انا ردي قدامك شخصيا سلام 

وقفل السكه من غير ما يسمع اي كلمه منها.. وبعد وقت قليل وصل رامي ونزلت ليلى وركبت جمبه وهي متوتره جدا

❈-❈-❈     

مشي رامي من غير ولا كلمه وصل لمكان فاضي خالص وقف العربيه ولف وشه ليها لاقها ع نفس حالتها ايديها بتعرق جامد و وشها احمر و بتفرك ايديها ف بعض بشده من توتر

رامي بهدوء ... 

ممكن اعرف ليه كل دا.. حبيبتي انا بموت لما بشوفك كده خصوصا لو التوتر دا مني انا يا لي لي

ليلى ... 

غ غصب عني بجد

رامي ... 

ليلى انتي معنى كلامك انك مش واثقه اني بحبك والله بحبك اوي انا عمري ما حبيت لان ال حسيته معاكي عمري ما حسيته مع أي حد قبلك حبيبتي ثقي فيا وقبل ما تثقي فيا ثقي في نفسك لي لي انا معاكي بقيت مختلف هموت ونبقى ف بيت واحد سوا لي لي انا غيرت عليكي من ابويا وحتى يوسف انا بجد بعشقك ولو فضلنا عمرنا كله كده كفايه وجودك جمبي كفايه أن ربنا أنعم عليا بحبك انا راضي ومبسوط واسعد واحد في الدنيا

ليلى بخجل ... 

يعني اقول ايه بعد كلام الحلو دا كله

رامي ببتسامة ... 

قولي اللي عايزاه واعملي اللي عايزاه ملكتي الجميله تأمر وبس

ليلى ...

 انا بحبك اوي يا رامي

رامي اتصدم ... 

قولتي ايه

ليلى ...

 قلت ب ح ب ك ا و ي يارامي

رامي ...

بجد مش مصدق لي لي اخيرا قوليتها بحببببببببببك

قالها بصوته كله وهي ضحكت من قلبها وروحها البيت كانت مبسوطة من قلبها خلاص حياتها هتبدء مع الإنسان اللي حبتة واختارته

❈-❈-❈     

 عدي اسبوع كمان كان الكل مشغول بين شغله وبين تجهيزات الفرح وفرش الشقه وفي يوم وليلي في مكتبها دخلتلها مها 

مها ...

صباح الخير يا استاذة اسفه علي التأخير

ليلي باهتمام ...

صباح الخير يا مها .. خير في حاجة ولا ايه اول مرة تتاخري انا قلقت عليكي 

مها ببتسامة ...

ربنا ما يحرمني منك يا استاذة مفيش بس امبارح كنت بقفل شقتي خلاص مفيش وقت 

ليلي بأسف ...

يا خبر دا فرحك قرب جدا انا نسيت خالص معلش يا مها حقك عليا فكريني كدة فاضل عليه اد ايه ؟

مها ...

كان الله في عونك مفيش بينا حقك عليا والكلام دا وفرحي كمان خمس ايام أن شاء الله

ليلي بذهول ...

خمس ايام ! وجايه حضرتك هنا تعملي ايه مش فاهمة اجازتك مبدأتش من يومين كمان ليه ؟

مها ...

انا عارفة ضغط الشغل اللي علي حضرتك مكنتش عايزه اسيبك الا قبل الجواز بحاجه بسيطه انتي كمان مضغوطه زيي ربنا يتمم لكم على خير انت واستاذة فرح

ليلي ...

حبيبتي يا مها ماشي يا ستي عموما انتي زي الشاطره كده هتروحي من النهارده الاجازه بتاعتك ويا ستي فرح موجوده معايا ولو في اي حاجه هي هتكمل مكانك الشغل لغايه اما احنا كمان برده شويه وهنقفل عشان احنا كمان هننشغل بتجهيز الشقه والكلام ده 

مها ...

حاضر يا استاذه زي ما حضرتك تؤمري هو يعني انا ينفع استاذن حضرتك في حاجه كده

ليلي ...

اكيد يا مها قولي محتاجة فلوس قولي انا زي اختك هو انت كده كده اصلا لك هديه من اختك بس لو في اي حاجه دلوقتي قولي لي

مها ...

شكرا يا استاذه ربنا يخليكي لا الموضوع مش كده خالص انا بس يعني كنت طمعانه ان حضرتك لو ينفع تشرفيني في فرحي انت استاذه فرح واستاذ رامي واستاذ يوسف هابقى فرحانه قوي والله ومبسوطه

ليلي ...

وهو ده الموضوع اللي متردده قوي كده وبتتكلمي بكسوف وانت بتقوليه ما طبعا هنكون موجودين يعني ده من غير ما انت تقولي اصلا انا صاحبه العروسه مش محتاجه عزومه ولا انتي شايفه حاجه غير كده

مها ...

يا خبر ده شرف ليا والله العظيم يا استاذه خلاص انا هامشي دلوقتي وهاستنى حضرتك يوم الفرح ان شاء الله يوم الخميس اللي جاي

ليلي ...

ان شاء الله يا مها على خير يا رب يلا يا حبيبتي مع السلامه

ليلي في نفس اليوم بلغت فرح ورامي ويوسف بمعاد فرح مها واكدت عليهم انهم كلهم لازم يكونو موجودين مهما كانو مشغولين 

وعدت الخمس ايام في بين الشغل والشقه ونسي رامي خالص موضوع توبا وقتل مريهان 

❈-❈-❈     

وجه يوم فرح مها اللي كان نقله في شخصيه ليلي بطريقه ملحوظة للجميع 

اتفقت ليلي وفرح يلبسو اسود زي بعض ليلي لبست فستان اسود طويل مقفول من فوق شوية بأكمام و ميكب هادي وغيرت تسريحة شعرها ولونه وطولته شويه 

أما فرح ف لبست بردو فستان اسود طويل بس مفتوح من قدام و مجسم جدا عليها 

أما الشباب ف رامي لبس قميص كحلي وبنطلون اسود و يوسف لبس بدله رمادي في اسود 

وصل الشباب و نزلت فرح الاول قبل ليلي لأن ليلي كانت بتمم علي الشقه أنها مقفوله كويس لان سميرة عند قرايبهم في البلد بتعزمهم علي الفرح وهتبات هناك ... يوسف اول ما شاف فرح تنح كانت جميلة جميلة جدا انثي بكل ما تحملة الكلمة هي كمان اول ما شافتة ابتسمت بحب وقربت منه 

فرح ببتسامة ...

مساء الخير يا كابتن 

يوسف ابتسم ...

مساء الفل يا عيون الكابتن

رامي ...

لا والله وبالنسبه لاخو الكابتن ال واقف ايه ؟

فرح ...

مسا مسا يا هندسه 

رامي ابتسم ...

مفيش فايدة مهما تبلسي ولا تعملي تباع سواق ميكروباص وربنا 

يوسف كشر ...

لا عندك لو سمحت فروحة برنسيسه قلبي ميتقلش عليها تباع ابدا 

رامي لسه هيرد عليه لاقي ليلي نازله كانت مختلفه ضحكتها منورة وشها مشيتها مختلفه كلها ثقه وسعادة لون شعرها الجديد كان لائق جدا عليها كأنها لوحة مرسومة بإتقان مفهاش غلطة 

ليلي برقه ...

مساء الخير 

رامي بحب ...

ايه الحلاوة دي ؟ يخربيت جمالك 

ليلي بخجل ...

ا احنا اتاخرنا يلا نمشي 

جت تمشي رامي مسك ايديها ...

استني هنا ... ايه تغيرات الي حصلت دي كلها هه .. بقولك ايه متتحركيش من جمبي وريني الدبلة باينه ولا لا بينها كدة علي طول فاهمه ولا لا 

ليلي ضحكت ...

فاهمه حاضر يلا بقا اتاخرنا بجد مش عايزة مها تزعل 

رامي بحب ...

يلا يا قلبي اتفضلي 

يوسف ل فرح ...

شوفي ال كان لسه بيرخم علينا

فرح ...

شفت يا اخويا شفت يلا يا سبعي 

اتحركو علي الفرح اللي كان يادوب لسه باديء وليلي اول ما دخلت وبصت مكان الكوشه تنحت وبصت ل فرح وفرح بصت ليها بتوتر وسكتو لكن في عيون بترصد اي حركة أو لفتة من ليلي وخدت بالها من اللي حصل 

رامي بهدوء ...

في ايه ؟ بصيتو لبعض بتوتر كدة ليه ؟

فرح ...

اصل .. اصل احنا نسينا والله خالص أن يعني 

يوسف ...

في ايه نسيتو ايه ؟

ليلي بتردد ...

اصل والله احنا نسينا خالص أن العريس يبقا مدير مكتب عمر مختار والله نسيت يا رامي

رامي اول ما سمع الاسم كشر وسكت 

يوسف ...

مممم هو يوم باين عليه مش هيعدي علي خير انا عارف ... عموما حصل خير احنا جاين نبارك ونعمل الواجب ونمشي علي طول ولا ايه يا رامي 

رامي ...

تمام بس اعملي حسابك أن نظام نقعد كتير في الفرح زي ما كنا متفقين دا خلاص لاغي احنا هنبارك ونمشي علي طول 

ليلي كشرت ...

ليه بس يا رامي مها كدة هتزعل مني 

وقبل رامي يتكلم اتفاجاو كلهم بالصوت اللي جاي من وراهم 

❈-❈-❈     

عمر ببتسامة ...

مساء الخير يا جماعه ... ازيك يا ليلي عامله ايه ؟

رامي بغضب مكتوم ....

مساء النور يا سيدي .. معلش انا قايل ل ليلي متردش علي اي راجل غيري ف الحمد لله ليلي كويسة جدا وفرحنا كمان عشرين يوم او اقل كمان وان شاء الله هتوصلك الدعوة علي المكتب كمان وعقبالك يا عمر لما تلاقي بنت الحلال 

الكل سكت لحظات ليلي متوترة وفرح قلقانة ويوسف متحفز ورامي غضبان وعمر حزين 

عمر بحزن ...

الف مبروك ... عن ازنكم 

رامي بغيظ ...

انا بقول يلا نمشي بقا عشان أنا علي أخري وربنا تمام 

يوسف ...

رامي خلاص اهدي هو مشي واكيد مش هيتكلم معنا تاني 

رامي بغيرة ...

مش هيتكلم يا يوسف لكن عينيه هه عينيه دي اللي متثبتة عليها وكلها ندم اعمل فيهم ايه ؟ اروح اخبطة خبطة تجيب اجله خالص وارتاح ولا اعمل ايه ؟

يوسف لسه هيرد اتفاجا هو كمان 

كريم بدهشه ....

مش معقول فررررح ايه الجمال دا ! وانا اقول القاعه منورة ليه ؟ ازيك يا فرح عامله ايه ؟ 

يوسف كان مبتسم اوي وباصص ل كريم وبص ل فرح مستني ردها 

فرح كشرت ...

افندم !! حضرتك تعرفني اصلا ؟

ليلي افتكرتة بس سكتت وكريم كمل 

كريم بحرج ...

انا كريم عبد السلام كنت عميل عندكم في المكتب من مدة قليله معقول مش فكراني 

فرح بجدية ...

هو اللي مش معقول أن حضرتك ال فاكرني مع أن شغلك كله اكيد كان مع ليلي مش معايا دا اولا ثانيا فرضا كان في شغل بينا وكنت فاكرة حضرتك ايه بقا في علاقه عمل حصلت وخلصت يخلي حضرتك تدخل تسلم عليا بالحميمية دي وكأننا اتنين أصحاب وعلي معرفه مع بعض ؟ 

يوسف ابتسم اوي كان مبسوط ب رد فرح 

كريم بجرأة ...

اللي يخلي حضرتي يتكلم كدة اكيد أنه كان واضح عليا طول الفترة اللي فاتت اني معجب جدا بحضرتك ودي كانت فرصه بالنسبالي اني اتكلم مرة تاني معاكي

فرح بصوت واطي ....

يخيتي حاولت وربنا انقذك بطريقه كويسه بس مفيش فايدة قابل بقا يا نحنوح 

يوسف بغضب ...

معجب بمين يا رووووو/ووووح امك مش شايف الدبلة اللي فى ايديها ولا عميت مش شايف انها واقفه مع رجاله ؟ دا انت نهار ابوك اسود 

بعد شويه كانو الاربعه في العربيه رامي ويوسف غضبانين وليلي و فرح مبتسمين اوي 

رامي ...

ممكن اعرف منشكحين اوي كدة ليه ؟ 

يوسف ...

عالم مستفزة (بص ل فرح ) اضحكي يختي اضحكي اوي دا انتي ليلتك مش معديه علي زي زفت الطين اللي محكتيلش عليه دا ماشي يا فرح 

فرح بضحك ...

اقولك ايه بس ... انا اصلا وربنا افتكرته بصعوبه ... يالهوي علي شكلكم وهو بيجري جوة القاعه وانت بتجري وراه هههههههههههههههه مش قادرة هموت هههههههههههههههه

ليلي ...

هههههههههههههههه ورامي كمان شويه يجري وراهم وشويه يلاقي عمر بيتحرك يقف ويرجع ناحيتنا هههههههههههههههه لما ياحرام عمر خاف و طلع من القاعه خالص 

رامي بغضب وعدم وعي ....

يا سلاااام وانتي بقا كنتي مركزة اوي مع استاذ عمر أنه بيقرب ويبعد وخرج من القاعة ليه هه وايه يا حرام دي ايه صعب عليكي اوي كدة ولا حنيتي للحب القديم هه 

❈-❈-❈     

سكوت سكوت سكوت ليلي دموعها في هدوء نزلت وفرح كشرت ولسه هتزعق ل رامي يوسف اتكلم 

يوسف ...

فرح ولا كلمة دا موضوع بينهم وبين بعض اقف هما يا رامي هننزل نقعد في الكافيه دا شويه انا وفرح وخليك انت وليلي في العربيه اتكلمو يلا 

ليلي ببكاء وصوت واطي ...

ا انا عايزة اروح 

يوسف ...

معلش يا ليلي عشان خاطري انا ربع ساعه بس وهرجع انا وفرح علي العربيه و هنروحك معلش ممكن ؟

ليلي سكتت ويوسف شد فرح نزلها غصب عنها كل دا رامي كمان ساكت الغضب ماليه و بيتنفس بسرعه جدا وبيضغط بأيديه الاتنين علي الدريكسون جامد جدا

رامي ...

لو سمحتي بطلي عياط 

ليلي عيطت اكتر وصوت عياطها بقا عالي

رامي بصوت عالي ....

ليلي بطلي عياااااط بقا 

ليلي حاولت تكتم صوت عياطها بايديها كان شكلها صعب اوي بص عليها وشتم نفسه أنه السبب في الحاله دي حاول يقرب منها لكنها خافت وانكمشت علي نفسها اكتر في الكرسي 

رامي بحزن ...

انتي .. ليلي انتي خايفة مني معقول ؟ انا رامي حبيبك 

صوت شقهات مكتوبه بس 

رامي كمل ...

ليلي انا اسف ... والله انا قلت كدة من غيرتي عليكي حبيبتي انا اسف والله مقصدش اللي قولتة والله من غيرتي عليكي وبس والله غصب عني صدقيني 

ليلي ...

انا عايزة اروح لو سمحت 

رامي ...

لا يا ليلي احنا اتفقنا مفيش هروب تاني مش هروحك والاقي بعدها رسائل علي الواتس بتطلعي فيها كل ال جواكي كتابه لا يا ليلي اتكلمي لو سمحتي زعقي اغضبي لكن مش هتهربي تاني يا ليلي

ليلي ...

انا مش عايزة ازعق ولا اغضب يا رامي انا بس زعلانة منك زعلانة اوي كمان 

رامي مسك ايديها ومهما حاولت تشدها إلا أنه ضغط جامد عليها 

رامي بحب ...

سيبي ايديك في ايدي لأني مش هسيبها ... حبيبه قلبي حقك عليا والله اسف انا من غيرتي فقدت اعصابي والله نظرات الزفت دا ليكي كانت نار بتكويني يا ليلتي سماح بقا 

ليلي بصتله بحب ...

ليلتك ؟ اول مرة تقولي كدة 

رامي ابتسم ...

ياء الملكيه دي من حقي لوحدي انتي ليلتي انا وبس مش كدة ؟ 

ليلي هزت دماغها بحب خجل ورامي لسه هيقرب اكتر لاقي يوسف وفرح بيركبو العربيه 

يوسف ...

اركبي يا آخرة صبري اركبي 

فرح ...

يا اخويا كان في صوت عالي من شويه و هاء وااء ودلوقتي في تسبيل وحاجات كدة استغفر الله العظيم

رامي ضحك ...

انتي لسانك دا ايه هه مش بيسكت ابدا 

فرح ... 

من غير كلام كتير اطلع علي شاورما الريم عشان تجبلي البوكس المتين تعويضا عن أنك زعلت ليلي 

رامي ...

نعم ؟؟ ... طب انا زعلت ليلي اجبلك انا البوكس ال ال ايه صحيح ؟

فرح ...

البوكس المتييييييين يلا بقا 

وفاجاة .... لا لا مش فاجاة ال تانيه كتير 

يتبع ...