قراءة رواية جديدة كيد النسا قهر الرجال كاملة

تنشر حصريًا على مدونة رواية وحكاية قبل أي منصة أخرى

رواية كيد النسا قهر الرجال

 رواية جديدة قيد النشر

من قصص و روايات 

الكاتبة منى محمود

الفصل التاسع

( كشف القناع )

قفلت احلام ورمت التلفون ومن كتر غضبها مسكت ازازة برفان وضربتها في الحيطة وقعت واتكسرت في نفس وقت دخول شريف عليها الاوضه 

شريف بخضه:

_ ايه دا في ايه ؟ انتي كويسه يا حبيبتي

احلام بدون وعي :

_ اخيرا شرفت انا عايزة اعرف حالا مشروع ايه دا اللي هتعمله مع اخوك هه هتضيع فلوسك علي واحد فاشل ومراته استغفلته وضحكت عليه ؟ مش كفايه دفعتله ٢٠ الف وانا سكت ومرضتش اتكلم كمان رايح ترمي فلوسك في مشروع ملكش فيه خالص ايييييه خلاص لما صدقو عشان يسحبوك وياخدوك في عبهم هه خلاص هيجروك وراهم من غير ما تفكر أن دي فلوسنا وشقانا وحقنا احنا وبس لا فوووووق انا متجوزة راجل مش دلودل لأهله أمه وأخواته اللي يمشوه مش هيحصل يا شريف مش هيحصل علي جثتي

شريف باندهاش :

_ ايه التخاريف اللي بتقوليها دي !! احلام انتي واعيه للي بتقوليه ولا اتجننتني ؟ 

احلام بعصبيه :

_ لا واعيه واعيه اوي كمان انت اللي معندكش رد علي كلامي مش كدة كلامي صح وانت مش عارف ترد عليه يا شريف 

شريف بعصبيه وصوت عالي :

_ صح ايه وهبل ايه ... بصي يا احلام عشان انا راجع مصدع ومش عايز رغي كتير ... انا عارف انك مبتحبيش عيلتي واظن عمري في يوم ما اجبرتك تحبي حد فيهم ولا اجبرتك تكوني قريبه منهم ... لكن لحد كدة وكفايه اوي انا اخويا في محنة وهقف جمبه لاخر نفس فيا ولاخر قرش معايا تمام عجبك يا بنت الناس كان بها وملكيش دعوة ولا تساليني ولا انا هقولك مش عجبك براحتك بردو الباب يفوت جمل وحقوقك كلها هتوصلك لحد عندك تمام اوعي بقا كدة خليني اخد شور وانام ساعتين وأقوم اشوف ورايا ايه ... اوعي 

زقها ودخل الحمام وهي فضلت واقفه مكانها مصدومة من رد فعله عليها اول مرة شريف يعلي صوته عليها ... اول مرة يقولها مش عجبك امشي ... اول مرة يكون مستغني كدة عن وجودها في حياته ... أهله السبب .. هي كانت صح لما قررت تبعده عنهم ... أهله خدوه منها وهي لازم تلحق تتصرف 

❈-❈-❈

في المستشفى بعد إصرار ياسين أنه يخرج حتي لو هيكتب إقرار علي نفسه الدكتور اخيرا وافق وفهم هناء التعليمات اللي مفروض تمشي عليها مواعيد الادويه التمارين للأيد والارجل عشان الأعصاب تفك اسرع تعليمات للاكل الفترة الجايه ...

ياسين خرج ومعاه هناء وجلال وكانو في الطريق ل بيت هناء 

وفي بيت هناء كان الوضع بيهدد بالانفجار في اي لحظة 

محمود بغضب :

_ الاء اقفي هنا 

الاء بدهشه :

_ في ايه يا بابا !!

محمود بغيظ :

_ حضرتك رايحه فين أن شاء الله ؟

الاء :

_ هقابل ناس صحابي في كافيه 

محمود :

_ صحابك ! بلبسك دا ؟ يا نهارك الاسود انتي اصلا بتخرجي باللبس دا عادي كدة من زمان ولا ايه هه وقلتي اصلا لمين انك خارجة ولا بمزاجك واحنا اخر من يعلم 

الاء ببرود :

_ ماله لبسي مش فاهمه لابسه بنطلون جينز وتشيرت فين المشكلة ؟ وبعدين انا بعت مسج ل ماما زي ما بعمل ديما لما احب أخرج وهي مش موجودة ببعتلها مسج ولما بوصل ببعتلها لوكيشن للمكان 

محمود :

_ والله بكل سهوله كدة !! ماله لبسك ؟ يعني البنطلون مش مقطع من كل حتة ؟ والتشيرت مش قصير ومبين بطنك ؟ دا منظر دا تخرج بيه بنت محترمة ومتربيه ؟ وبعدين احنا مش اتكلمنا واتفقنا أن طالما انا اتهببت رجعت وبقيت موجود معاكم الدخول والخروج بأذني انا حصل ولا محصلش ؟ 

الاء :

_ اوك سوري يا بابا مخدتش بالي .. لما اوصل الكافيه هبعت ل حضرتك اللوكيشن وهطلع اغير لبسي .. حاجة تاني ؟

محمود بغيظ من برودها :

_ مفيش خروج خالص يا الاء ... ماماتك اتكلمت وهي في الطريق ومعاها ياسين وجلال يعني حضرتك زي الشاطرة تطلعي تغيري المسخرة دي وتندهي اختك اللي مبقتش تخرج من اوضتها دي وتنزلو تحضرو الغدا عشان الناس ال جايه خلو عندكم شويه دم بقا 

الاء بصتله بغيظ بس مقدرتش تتكلم وطلعت علي اوضتها بسرعه 

أما محمود فضل يتنفس بسرعه وبيحاول يهدي نفسه هو عارف اللي هناء بتمر بيه ومش عايز يحسسها باي حاجة وبيدعي ربنا من قلبه أن الفترة دي تعدي بسرعه وعلي خير 

بعد حوالي نص ساعه وصلت هناء واخواتها وكان في استقبالهم محمود 

محمود :

_ حمد لله على السلامه يا بطل الف سلامة عليك يا حبيبي

ياسين ابتسم :

_ الله يسلمك يا حودة تسلم ... معلش هقعد معاكم يومين كدة لحد ما هناء هانم تفرج عني وتسيبني اروح بيتي

محمود كشر :

_ تصدق كدة هزعل منك ... معني كلامك دا يا ياسين انك مش معتبرني اخوك وشايفني حد غريب ... لا بجد زعلت والله 

ياسين :

_ لا والله ما اقصد متقلش كدة يا حودة انت اخويا وربنا يعلم غلاوتك عندي 

محمود :

_ يبقي الكلام دا ملوش لازمة يلا تعالو ع السفرة ع طول البنات حضرو الغدا انهاردة 

هناء برقت :

_ بنات مين ال حضرو الغدا ؟ قصدك هند يعني ؟

محمود ابتسم :

_ لا هند والاء كمان انا طلبت منهم هما الاتنين يحضرو الغدا سوا 

جلال ضحك :

_ بركاتك يا ابيه تقريبا دي اول مرة لولو تدخل المطبخ وتعمل اكل دا كان آخرها وبعد خناقة كمان تعمل شاي أو قهوة أو تحضر السفرة وهند وهناء اللي بيعملوا كل حاجة تانيه 

محمود برفعه حاجب :

_ لا الكلام دا كان زمان يا حبيبي دلوقتي مفيش كدة الاتنين يعملو كل حاجة زي بعض مفيش تفرقه 

هناء ضحكت :

_ والله يا محمود انت عملت اللي انا بقالي سنين بفشل اعمله هتريحني والله 

محمود بغمزة :

_ ايه رايك الخمهم في المطبخ ونقعد احنا سوا يا جميل يا ابيض انت 

هناء اتصدمت وضحكت بخجل 

ياسين بضحك :

_ خدني يا بني معاك وانت ماشي عشان الغمزات والابتسامات اللي بتحصل دي 

جلال :

_ اخدك ايه انا هقعد اتفرج بص هناء اختك مكسوفه ازاي يختي حلوة شكلها عسل وهي مكسوفه كدة 

هناء بنظرة تحذير :

_ جلال اتلم 

جلال كشر :

_ اتلميت اهو

ضحكوا عليه وثواني وكان الكل علي السفرة بيتغدو سوا وبعد الغدا طلع ياسين يرتاح في اوضه الضيوف بعد ما اخد ادويته واستاذن جلال عشان يروح يجيب جودي من عند منال ويطمن علي امير 

❈-❈-❈

بعد الغدا هند رجعت اوضتها تاني بسرعه فتحت النت علي تلفونها وجالها اشعارات رسائل كتير  من فارس لأنها قفلت فجأة وهما بيتكلمو .. قعدت تقراهم وهي مبتسمة 

_ هند 

_ هند روحتي فين ؟ 

_ هاااااااي

_ يابنتي مش كنا بنتكلم روحتي فين ؟

_ لا كدة كتير بقا بقالك ساعتين قافله بتعملي اي كل دا ؟

_ هند اي وقت تفتحي طمنيني طيب عليكي اوك 

_ ماشي يا هند لما ترجعي بس علي الحركة الرخمة دي ماشي 

هند ابتسمت وكتبت :

_ هاي .. موجود ؟

فضلت ماسكة الفون وهي حسه أنه هيرد وفعلا دقيقه بالظبط ولاقيته بيكتب وبعت 

فارس :

_ ينفع كدة ؟ 

هند :

_ سوري كتير كتير والله 

فارس :

_ كنتي فين كل دا ؟

هند :

_ كنت بحضر الغدا انا واختي عشان خالو خرج من المستشفى علينا وبابا ندهلي فجأة ملحقتش اقولك بجد سوري متزعلش 

فارس : 

_ فارق معاكي زعلي اوي يعني ؟

هند :

_ اكيد طبعا 

فارس :

_ ليه ؟

هند :

_ هو ايه اللي ليه ؟

فارس :

_ ليه اكيد طبعا فارق معاكي زعلي ؟

هند سكتت ثواني وبعدين كتبت :

_ عشان احنا صحاب والصحاب بيفرق معاهم زعل بعض 

فارس :

_ انتي شايفه أننا صحاب يا هند ؟

هند :

_ اومال احنا ايه يا فارس قولي انت لاني اي مسمي ل علاقتنا طبيعي يطلع منك انت مش مني انا ف قولي انت احنا ايه 

فارس سكت ثواني هو كمان وكتب :

_ احنا مش صحاب يا هند بس حقيقي مش هعرف اقول اكتر من كدة يمكن قدام شويه اقدر اقول لكن حاليا كل اللي اقدر اكدهولك واكدة لنفسي أننا مش صحاب 

هند قرت وسكتت مكنتش عارفه ترد تقول ايه مكنتش عارفه المفروض اصلا تحس بايه تفرح أنه قال إنهم مش صحاب ولا تزعل لانه رافض يعترف أن في بينهم مشاعر حب ومش فاهمة ليه رافض يعترف ب دا طالما متاكد ان الشعور متبادل بينهم ... فاقت من شرودها علي صوت مسج منه 

فارس :

_ هند روحتي فين تاني ؟

_ هند 

هند :

_ أيوة معاك 

فارس :

_ هو أنا كلامي زعلك ؟ 

هند :

_ لا ابدا مزعلتش ولا حاجة 

فارس حب يغير الموضوع لانه فعلا مش متاكد من مشاعره ناحيتها ومش حابب يتسرع 

فارس :

_ طيب قوليلي بقا عملتي غدا ايه ؟ لحسن انا بدأت اجوع ومحتار اكل ايه 

هند :

_ ما تجرب تعمل اكل انت في البيت والله هيبقي احلي كتير من الدليفيري اللي كل يوم تطلبه دا 

فارس :

_ ما قلتلك حاولت قبل كدة كتير وفشلت 

هند :

_ طيب حاول اخر مرة وأنا معاك ممكن عشان خاطري 

فارس :

_ هتقوليلي اعمل ايه يعني ؟

هند :

_ اها هكلمك صوت واشرحلك تعمل ايه بالظبط بس عرفني الاول اي عندك في المطبخ 

فارس :

_ طيب خليكي معايا ثواني ادخل المطبخ واكلمك 

هند :

_ اوكي 

غاب خمس دقايق ورجع اتصل بيها مسنجر 

هند ردت : 

_ ها لاقيت ايه عندك 

فارس :

_ لاقيت بانيه ومكرونة بس مفيش صلصة ولا طماطم حتي عشان احاول اعمل مكرونة ايه النحس دا 

هند :

_ وهي يعني المكرونة متنفعش الا بصلصه بس بقولك ايه اقفل معايا واطلب من سوبر ماركت ال جمبك لبن وكيس بشاميل بالجبنه وأكد عليه يكون بالجبنه وصلصه وفلفل اخضر والوان اوك 

فارس :

_ اي كل دا انتي متخيلة اني هعرف اعمل كدة 

هند :

_ والله دي اسهل اكله في الكون كله اللي هخليك تعمليها دي اسمع كلامي بس يلا بسرعه 

فارس :

_ حاضر يا تعبه قلبي لما نشوف اخرتها سلام مؤقت 

هند ابتسمت لما قالها يا تعبه قلبي  وقفلت واستنت عشر دقايق لاقيته بيتصل بيها تاني 

هند :

_ ايه الاخبار ؟

فارس :

_ جبت الحاجات اللي قولتلي عليها اعمل ايه بقا 

هند:

_ اول حاجة حط المكرونة تتسلق اظن سهله دي وبتعرف تعملها 

فارس :

_ تمام ثواني 

دقيقتين واتكلم 

فارس :

_ المكرونة ع النار بتتسلق اهي ها 

هند :

_ اغسل البانيه كويس وقطعه شرايح مربعه ومتكنش رفيعه اوي اوك 

فارس وهو بيعمل اللي بتقوله :

_ اوك ... والله شكلك هتدبسيني وهنام من غير اكل خالص في الاخر 

هند ضحكت :

_ لا عيب عليك خليك واثق فيا اكتر من كدة 

فارس :

_ لما نشوف اخرتها ... خلصت اهو تقطيع 

هند :

_ حطة في بوله غويطة بقا وعليه ملح وفلفل اسود وببريكا وصلصلة ومعلتين زيت ومعلقتين خل وقلب كله مع بعضه كويس اوي اوي 

فارس عمل كدة :

_ تمام يا شيف هند 

هند :

_ طاسه سخنة بقا وانزل بالبانيه كدة وشوحهه علي نار متوسطة وقلبه باستمرار وشويه وحط عليه الفلفل الالوان يستوي معاه وانت بتقلب المكرونة لحد ما الاتنين يستو ولما تخلص هقولك نعمل ايه تاني 

فارس :

_ اوك خليكي معايا اوعي تقفلي هزعل منك والله يا هند 

هند بحنيه:

_ متخافش مش هقفل وهفضل معاك

فارس ابتسم علي كلامها وعمل اللي هي قالتله عليه 

فارس :

_ شيف هند انا بقلب اهو ولو ماكلتش اكل حلو انهاردة هتدفعي انتي حق الدليفيري اللي هطلبه اظن دا العدل 

هند :

_ وانا موافقه بس لو اكلت اكل حلو هيبقي انا اللي ليا عندك دليفيري علي حسابك ديل؟

فارس :

_ ديل يا شيف ... المكرونة استوت والبانيه كمان استني بس انزلهم من ع النار وارجعلك 

هند :

_ اوك 

فارس :

_ تمام اعمل ايه تاني بقا 

هند :

_ عندك ثوم ؟

فارس باستغراب :

_ ثوم ؟! 

هند :

_ اه ثوم ها عندك ولا ايه ؟

فارس :

_ اه عندي .. لما كنت عند حبيبه اخر مره ادتني علبه كدة فيها ثوم مهروس ومتفرز

هند :

_ تمام حلو اوي هات بقا حتة صغننه خالص خالص يادوب فص ثوم واحد بس وحطها في حله صغيرة ومعاها حتة سمنة صغننه اوي بردو وانزل بكيس البشاميل وقلب وبعدين افتح النار وضيف اللبن بالتدريج وانت بتقلب بالمضرب لحد ما يبقي يستوي اوك 

فارس :

_ مع اني مش مقتنع وبدأت احس انك بتعكي بس اوك حاضر 

بعد خمس دقايق 

فارس :

_ شيف هند خلصت خلاص اعمل ايه دلوقتي وخلي بالك انا مرضتش ادوق اي حاجة حابب اتفاجا بالنتيجة 

هند :

_ دلوقتي هات طبق غويط شويه حط فيه المكرونة وبعدين كبشيتن بشاميل وبعدين البانيه علي الوش من فوق كدة ودوق وقولي رايك يلا

فارس عمل زي ما قالتله وهي سماعاه وهو بيتذوق بتلذذ اوي ومبسوطة 

فارس :

_ تحفه تحفه تحفه ممممم طعمها حلو اوي بجد يا هند بقولك ايه اقفلي بقا خليني اكل وهرجع اكلمك ماشي 

هند ضحكت :

_ خلاص خلص غرضك مني وناقص تقفل في وشي السكة 

فارس بحب :

_ مقدرش طبعا انا ليا بركة الا انتي بجد يا هند شكرا الاكل طعمه جميل اوي انا فعلا كنت مفتقد اكل البيت جدا 

هند :

_ انا معملتش حاجة يا فارس هسيبك تاكل براحتك وهروح اعمل نسكافيه وارجع اوك 

فارس :

_ اوك هستناكي 

قفلو سوا وهما الاتنين الابتسامة مرسومة علي وشهم الشعور اللي جواهم بيكبر كل يوم عن اليوم ال قبله 

❈-❈-❈

أما عند الاء كانت قاعدة في اوضتها زهقانة ومضايقه من تحكمات محمود اللي كل يوم تزيد من يوم ما جه تلفونها رن برقم اميرة ردت علي طول 

الاء :

_ ميرووووو

اميرة :

_ ايه يا روحي فينيك مجتيش ليه الكافيه زي ما اتفقنا ؟

الاء كشرت :

_ بابا مرضيش يا اميرة عشان خالو طلع من المستشفى علينا هنا 

اميرة :

_ يا خسارة القاعدة كانت حلوة اوي بجد بجد كانت نقصاكي 

الاء بحزن :

_ معلش بقا تتعوض النزوله الجايه 

اميرة :

_ اكيد حبيبتي ... تعالي بقا احكيلك البت ميرنا كانت جايه لابسه ايه بجد لو كنتي شوفتيها كنتي ضحكتي ضحك 

الاء بحماس :

_ بجد .. احكيلي يلا بسرعه 

❈-❈-❈

جلال وصل عند نوال وطلب يتكلم شويه مع امير لوحدهم ونوال بلغت امير و وافق ودخله جلال 

جلال وهو بيحضنه :

_ حبيبي يا ميرو عامل ايه يا كبير 

امير :

_ الحمد لله انت عامل ايه واخوك عامل ايه دلوقتي طمني عليه ؟

جلال :

_ الحمد لله احسن كتير خرج انهاردة ووصلته عند هناء واطمنت عليه وجيتلك 

امير :

_ حمدالله على سلامته وان شاء الله ربنا يتم شفاه علي خير يارب 

جلال :

_ اللهم امين يارب ... طبعا انت عارف ان اللي حاشني عنك الشديد القوي انا والله ما كنت قادر اسيب المستشفى لحظة واحدة وياسين في الحاله ال كان فيها ... متزعلش مني و

امير قاطعه :

_ متكلمش يا جلال عيب عليك احنا اخوات واللي بينا اكبر من كدة انا اكيد مقدر ظروفك والله ومش زعلان منك خالص صدقني واديني اهو الحمد لله كويس ادامك 

جلال ابتسم :

_ يارب ديما بخير يا سيدي عموما كلها كام يوم وابقي مقيم معاكم هنا عشان جودي لحد ما تزهقو مني وتقولولي يلا اطلع برة 

دخلت نوال بالعصير :

_ مين دا اللي يقدر يقول ل جلجل حبيب قلبي اطلع برة دا انا كنت بالشبشب كدة علي دماغه 

امير ضحك :

_ جايبلنا الكلام ديما انت كدة 

جلال :

_ احسن والله بفرح اوي فيكم ... اومال فين جودي مش شايفها يعني ؟

نوال :

_ جودي بتعمل كيكة شكولاته ل امير قبل ما تنزل عشان عارفه أنه بيحبها

جلال كشر :

_ لامير بس يعني وجوزها ايه ملوش نايب ؟ 

جودي دخلت :

_ جوزي اللي كل ما يجي يقوم ماما عليا انا واخواتي هه 

جلال ببرائه :

_ انا !! انا بقوم ماما عليكم انا !! الله يسامحك 

نوال كشرت :

_ لا يا حبيبي دي هي اللي مفتريه بنتي وانا عارفاها والكيكة كلها تتحط قدامك كدة تاكل لحد ما تشبع بعدين هما يأكلو ولا تزعل نفسك 

جودي وامير بصو لبعض بصدمة وبعدين كلهم ضحكو علي نوال وحبها الكبير ل جلال 

أصرت نوال أنهم يتعشو كلهم سوا الاول وبعدين يحلو بالكيكة قبل ما جودي وجلال يمشو وحكت جودي ل جلال كلام شريف واتحمس جدا جلال للفكرة 

❈-❈-❈

ياسين كان مريح علي السرير لكن النوم رافض يزوره 

شريط حياتة كله عمال يمر قدام عينيه بيسال نفسه اساله كتير من غير اجابه 

هو عمل ايه غلط ...

قصر في ايه ...

طب معقول دا يكون ذنب حاجة علمها وهو مش واخد باله ...

هيعمل ايه وهو حاسس بالعجز والخذلان دا كله ...

هيقدر يقف وسط الطلبه ويدي محاضرات تاني ...

هيقدر يحس أنه راجل كامل ...

ليه حاسس ان كل اللي حواليه شايفنه مغفل وغبي ...

ليه حاسس أنه حياته خلاص انتهت ...

❈-❈-❈

الليل عدي علي الجميع بمشاعر مختلفه وتاني يوم احلام فضلت متجاهله شريف طول اليوم لحد ما جه معادها مع الشيخ مندوه قالتله أنها نازله مشوار مع اسماء اختها ونزلت بسرعه 

كانت مقررة أن المرة دي الشيخ لازم يعملها عمل قوي 

عمل يخلي شريف في حضنها وجنبها هي وبس 

عمل يخلي أهله كلهم بعيد عنهم للابد 

وصلت المكان اللي كان مكتب كبير مكتوب عليه من برة مكتب العالم الفلكي مندوه الفقي انتظرت ربع ساعه وبعدين السكرتير اللي موجود سمحلها تدخل 

كانت اول مرة تيجي من غير اسماء .. خايفه متوترة لكن متحمسه اوي 

دخلت وهي مقررة متجيش المكان دا تاني مكنتش تعرف ان الشيخ مندوه عنده معاها خطط تانيه 

خطط هتغيرلها مسار حياتها كله 

خطط هتقلب كل الموازين 

يتبع 

إلى حين نشر الفصل الجديد للكاتبة منى محمود من رواية كيد النسا قهر الرجال, لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة