رواية جديدة أسود الداخلية لأسماء عبد الهادي - الفصل 3 و 4
قراءة رواية أسود الداخلية كاملة
تنشر حصريًا على مدونة رواية وحكاية قبل أي منصة أخرى
قراءة رواية أسود الداخلية
من روايات وقصص
الكاتبة أسماء عبد الهادي
الفصل الثالث والرابع
قفل مع قصي وبص لسمر بحدة
_ قدامي إخلصي أخذت الإذن من أخوكي كدا ارتحتي
_ لا طبعاً .. أنا مش عايزة أركب معاك إيه اللي يجبرني لدا
أدهم تنح شوية واتضايق منها وبعدين مشي وسابها
راح عند عربيته وهو بيكلم نفسه
_ غبية هي فاكرة نفسها إيه.. بس طالعة دماغها ناشفة لأخوها .. اه لو أقدر أكسر دماغها دي مكنتش هتأخر
خرجت سمر ونادت عليه
_ ااا أدهم
_ عايزة إيه
_ ممكن من فضلك توصلني للحامعة
_ نعم ياختي أومال أنا كنت بقول إيه دلوقتي وأخذت إذن مين
_ ماهو أصل يعني أنا اتأخرت ولازم أوصل بسرعة علشان المحاضرة متفوتنيش
_ طب ما تفوتك وأنا مالي
_ إيه دا يعني مش هتوصلني
_ لا شطبنا خلاص
_ هو إيه
_ إنتي يا متخلفة إنتي مش لسه قايلة من شوية مش عايزة تركبي معايا
_اا أيوة ودا لأنك عايز تجبرني على دا وأنا محدش يجبرني أنا أعمل اللي على مزاجي
أدهم بغيظ
_بقا كدا .. طب روحي جامعتك لوحدك وركب العربية وسابها ومشي
_إيه دا .. دا مشي وسابني بجد ..عااا .. يا مغرور... يا غبي.. يا...
وفجأة لقت حد من وراها بيقول بصوت مخيف
_ سمعيني تاني كدا إنتي قولتي إيه
اترعبت واتخضت وبصت وراها
_ هييء إنت سمعتني إزاي وجيت ورايا إمتا وأنا شايفاك سايق العربية قدامي
_ لبست طاقية الاخفا ياختي.. المهم كنتي بتقولي إيه؟
ضحكت بسخافة
_ هيه لا دا كنت بتخانق مع دبان وشي معلش مجنونة بقا متاخذش على كلامها .. دادا .. تقريباً ماما بتنادي عليا.. أنا هطلع أشوفها عايزة إيه وبلاها جامعة النهاردة .. حاضر يا ماما جاية أهو
إعترض طريقها
_ اقفي يازفتة إنتي هنا
بلعت ريقها
_ أستر يارب وعديها على خير دا هيتحول لأسد من أسود الداخلية إنتي اللي جبتيه لنفسك يا سمر
فقالت
_ أدهم قصدي حضرة المقدم أدهم أنا آسفة أوي أرجوك عديها وربنا ورايا محاضرة مهمة
شاور لها على العربية
_أركبي ومسمعش صوتك طول الطريق إخلصي
ركبت وهي بتبرطم
_قال يعني أنا اللي عايزة أركب معاك هو إيه الهم دا
_بتقولي حاجة يا بنت عمي
_ها لا أنا بقول دعاء الركوب سبحان الذي سخر لنا هذا وما كنا له مقرنين
_طيب كويس
سمر فضلت طول الطريق مكتومة خالص
وأدهم ضحك بتسلية ووصلها لحد الجامعة فنزلت بسرعة
_شكراً يا أدهم سلام
_ إستني يازفتة متجريش كدا
_ إيه إتاخرت وربنا المحاضرة خلاص بدأت من خمس دقايق
بصلها بحدة
_قلت متجريش سمعتي أنا قلت إيه
زفرت بضيق
_طيب حاضر
_اياني أشوفك بتجري في الجامعة لأي سبب
مردتش فزعق
_فاهمة!!
_ما قلت طيب يا أدهم الله
قالتها ولفت ومشيت وهو إبتسم تاني بتسلية وركب عربيته وراح على الشركة
❈-❈-❈
وفي مكتب قصي
_خير يا قصي
_خير أقعد .. عدي كان طالب يطلع رحلة مش كدا
_هيزعلوا لو رفضت بصراحة آخر مهمة أدوها بنجاح فسيبهم يفرحوا
قصي بغموض
_وماله الرحلة هتكون لحلايب وشلاتين
_ هار إسوح إنت كدا بتسوحنا ياقصي
_ مش عايزين رحلة.. أدي رحلة في وسط الطبيعة الساحرة
_ قصدك في الهِو يا قصي حرام عليك دول مش بعيد يطبوا ساكتين كدا .. دا إنت ناقص كمان تقول إنها مهمة مش رحلة
_ بالظبط كدا
_ حلو تبقى كملت.. دول هيتصدموا صدمة عمرهمم
_ أنا مش عايزك تقولهم حاجة غير إنها رحلة وهناك هتتلقوا التعليمات المطلوبة منكم بالظبط
أدهم أدى انتباه
_ تمام يا فندم
في الوقت دا الموظف خبط
فقعد أدهم بسرعة وقال
_ طب هات أي ملف كدا أساعدك وأهو أجرب نفسي
_يا بني مش هتفهم حاجة إدي العيش لخبازه
وبعدها بص للموظف
_تعالى يا إكرامي جبت الملف اللي طلبته منك
_اه يا فندم إتفضل
_تمام سيبه هنا وروح إنت
_حاضر يا فندم
حطه إكرامي ومشي
أدهم بضيق
_المسرحية السخيفة دي هتستمر لحد إمتا
قصي بحدة
_ ششش إكتم ياأدهم إنت الوحيد اللي تعرف بدا حتى مازن وعدي ميعرفوش ودا لأني بعتبرك نصي التاني وكاتم أسراري فمش عايز أي غلطة أو لخبطة منك فاهم
بلع أدهم ريقه بخوف
_فاهم ياباشا قلبت ليه
اتنهد قصي وقال
_ لسه مآنش الأوان إنت عارف إني مستهدف من قبل عصابات كتير فدا الحل الأنسب خليهم مفكرين إنهم اتغلبوا عليا وارتاحوا مني
❈-❈-❈
وصلت لمكتبه كان لافف وشه للحيط وعاطيها ضهره
_ أنا جيت أهو يا أيهم زي ما طلبت
_ إتأخرتي ليه
_ متأخرتش مسافة السكة على فكرة
زعق
_مرام إنتي هتجادليني أنا قلت إتأخرتي
_ أنا آسفه يا أيهم مش هتأخر تاني
_اقعدي
إستغربت إزاي عرف إنها واقفه وهو مش بيبصلها أصلاً
قعدت بهدوء وقالت
_ أنا جيت أهو شكلها مهمه جديده ولا إيه
_بالظبط كده مستعده!
اتنهدت بأسى لأنها معندهاش حل تاني
_مستعدة يا أيهم
لفلها وشه .. كان شعره طويل وملامحه قاسية رغم إنه وسيم
وناولها ملف
_ دا الملف فيه كل اللي هتحتاجيه عن المهمة الجاية وعايز تنفيذ دقيق إنتي فاهمة يا مرام ولا فيها روحك أو الداخلية تقبض عليكي ونخلص
اتضايقت مرام
_ أيهم إنت بتكلمني ليه كدا .. أنا على طول بنفذ مهامي بدقة متناهية
_ عارف ومتأكد من دا علشان كدا مسكتك المهمة الدقيقة دي
بصلها لقاها متضايقة فحب يصالحها
_ إنتي عارفة إننا منقدرش نستغنى عنك يا مرام
_ ماهو باين من أسلوب التهديد اللي بتكلمني بيه يا أيهم
_ مرام متنسيش نفسك ولازم تكوني عارفة إن دا أسلوبي
_ مع أي حد إلا أنا .. أنا أختك ياأيهم
_ معاكي حق لازم أفرق فعلاً.. يلا إدرسي الملف وهقابلك بكرة أشوف خططتك هتعملي إيه
_ ماشي .. سلام
جت تمشي فقال
_ إستني خدي الفيزا كارد دي هتحتاجيها في المهمة الجاية
_ تمام
خرجت من مكتب أخوها وركبت عربيتها تاني وروحت على البيت.
❈-❈-❈
مازن كان قاعد مع أدهم و عدي في شقه عدي وأول ما سمع بخبر المهمه فضل يندب حظه
_قلبي عندكم يا فرقة الأسود مش مكتوب لكم الفرح أبداً لا وأنا اللي كنت نازل علشان أخطب يا فرحه ما تمت عيني عليك باردة ياخويا
عدي مقدرش يمسك نفسه من الضحك أما أدهم فزعق وقال
_ إنت يازفت إنت هتفضل تندب كده زي الستات ما تنشف شويه
_ أنشف إيه هو أنا بقا فيا حيل ده بيقول لك حلايب وشلاتين يخربيت كدا دا لو قاصد ينفينا ماكنش هيبعتنا هناك ده إيه الغلب ده يا ناس
عدي
_ لا وكل دا وهو مش شغال معانا أومال لو رجع تاني يشتغل في الداخليه هيعمل فينا إيه
أدهم
_ خلاص بقى ياشباب هونوا عليكم مهمه وهتعدي وعلى فكره ...قصي قال إحنا طالعينها في الأساس رحله
مازن
_ دا ظاهرياً بس يعني مش عارف صاحبك حسره عليها وحسره عليها
مازن لسه هيكمل كلامه لقى قصي في وشه وبيبص له بحده
_ كمل كمل.. كمل نواح يا مازن
قالها قصي واداله بالبونيه في وشه مازن صرخ وقال
_ خلاص وربنا تبت مش هتتكرر إيدك تقيلة يا أخي
قصي بجدية
انتباه يازفت منك ليه
الكل قدم التحية العسكرية ووقفوا انتباه
قصي لف قدامهم بالكرسي المتحرك
_ إنتوا طالعين الرحلة وهتاخدوا راحتكم فيها على الآخر وفي اللحظة المناسبة هتتلقوا التعليمات بالمهمة الجديدة
عدي
معلش بس ياوحش عندي إستفسار
_ إتفضل
_يعني مش مفقوسة أوي المهمة دي .. يعني إيه اللي يخلينا نسيب شرم والغردقة أو مطروح والأماكن اللي ترد الروح دي ونطلع حلايب مش مفقوسة أوي دي
_ ما هو إنت يا فاشل جغرافياً منك ليه ...متعرفوش إن حلايب فيها أماكن سياحيه وطبيعية خلابة جداً ودي مناسبة جداً للي بيحب الكامبنج والتخييم مكان ساحر وهادي وللسفاري والسابقات وكمان بعيد للمهربين يتصرفوا براحتهم فهمت قصدي
عدي
فهمت يا باشا تمام حلايب حلايب
أدهم
واثقين في إختياراتك ياوحش
مازن
يا مدلعنا ومسوحنا ياوحش
قصي
_المفآجئة إني جاي معاكم
مازن فتح بوءه
أوبا الوحش بنفسه هيحضر المهمة دي شكلها مهمة خطيرة بقا
_ إنت يا غبي هحضر مهمة إيه بهيئتي دي... إنتوا طالعين رحلة عائلية فازاي يعني هتطلعوا من غير إبن عمكم لو طلعتوا لوحدكم زي أي مهمة بقيتوا تطلعوها من غيري هتكون مكشوفة أوي
مازن
_ اه صح معاك حق.. دي شكلها هتكون رحلة ما يعلم بيها إلا ربنا
_ بتقول حاجة يا مازن
_ لا أبداً دا أنا بقول سنتنا فل
_اه طب حيث كدا بقا نحاسب على اللي عملتوه النهاردة
مازن قام يجري
_استنى وربنا ما عملت حاجة دا أنا قمت من النوم على عندك على طول وربنا حتى ما بليت ريقي بماية حتى يا مفتري
قصي
_أيوة ما هو دا اللي هحاسبكم عليه ... إنتوا هتقضوا اجازتكم في النوم ولا إيه
عدي قام وقف
_لا ياقصي متهزرش أومال نقضي الأجازة في إيه مثلاً في الشغل
_طبعاً يا كسول منك ليه
عدي بضيق
_لا متقولش.. إنت بتهرج معانا مش كدا هي دي الكاميرا الخفية هي أنا عارف الكاميرا هناك أهي
قصي زعق
ولا إنت وهو نتعدل ها
مازن كان هيعيط
_لا وربنا اللي بيحصلنا كتير .. بص أنا هقولك أنا ياريتني ما دخلت شرطة ولا بقيت ظابط أنا. اانا هتجوز وأقعد في البيت أرحم
أدهم مقدرش يمسك نفسه من الضحك
عدي بانزعاج
إنت بتضحك يازفت .. إبن عمك هيخلينا نمشي نكلم نفسنا حرام عليك يا شيخ حرام عليك إنت حد مسلطك علينا
أدهم وهو لسه بيضحك
قصي خف عليهم هيفطسوا منك كدا
قصي
_يابني أعملهم إيه أكتر من كدا دا أنا مدعلهم على الآخر وهطلعهم رحلة
عدي
_اه رحلة اه
مازن
_رحلة بردو متشكرين يا زوق أنا ماشي ومش عايز أعرفكم من هنا لحد معاد السفر
أدهم
_خد يالا هنا... يا بني
_وربنا ما قاعدلكم فيها
قصي
_الواد دا مش هيكبر أبداً
مازن كان ماشي فكان هيخبط في الصينية اللي منة شايلاها
منة
عااا الأكل كان هيقع
مازن بهيام
أنا آسف أوي مأخدتش بالي إنك في طريقي
مش تاخد بالك يا مازن
أعمل إيه لأخوكي اللي هيموتني ناقص عمر بسبب عمايله
_لا بعيد الشر عنك يا مازن متقولش كدا بالله عليك
_خايفة عليا
منه اتحرجت ونزلت راسها وقالت بخفوت
_الأكل ماما طلبت مني أطلعه
_يا خبر وطالعة الثالث لوحدك طب كنتي نادي عليا وأنا أشيله عنك
_لا من التاني بس.. الأكل عملناه عندكم في الشقة
_بجد يعني إنتي كنتي عندنا في الشقة طول الوقت وأنا معرفش
_ يعني كنت هتعمل ايه
_كنت هزوغ من أخوكي طبعاً وأفضل في الشقة
_احم أنا هنزل بقا
_مع السلامة يا بنت عمي ..يارب قرب البعيد يارب
رجع مازن بالأكل و أول ما شافه قصي
_ إيه اللي رجعك
الحق عليا قلت أجيبلكم تطفحوا وتتقووا
قصي
_ لا فيك الخير يا خويا
_قصي بقولك إيه بعد الغدا أنا عايز افاتحك في موضوع مهم
عدي
_أيوة بقا يا عمهم
مازن
_إسكت إنت
قصي بهدوء
_ماشي يا مازن بعد الأكل نتكلم
بعد الأكل لسه مازن هيتكلم
_قصي أنا.. أنا
_انجز يالا أنا مش فاضيلك
_أنا كنت عايز.. اخ..
ولسه هيكمل جه تلفون لقصي
_تمام يا فندم هبلغهم حاضر في أمان الله
الثلاثة بصوا لقصي بترقب
عدي
_لا أوعى يكون اللي في بالي
قصي
_هو بعينه
مازن
_يا حظك المنيل يا مازن حتى الكلمة مش عارف تقولها .. اه يانا ياما ياانا
اتنهد أدهم وقال
_أسود ... قدامكم ساعة تظبطوا نفسكم على ما العربية اللي هتأخدنا تجهز يلا مفيش وقت
❈-❈-❈
في أوضتها قعدت مرام على المكتب بتقرأ الملف بصوت عالي
_أدهم شاكر المنشاوي ٢٨ سنة مقدم في الداخلية ملقب بأسد الداخلية هو وفرقته .. قوي بيتمتع بمهارة عالية في القتال وبيتميز بالحيلة والذكاء وسيم وجاد وملوش في الهلس ولا العلاقات النسائيه
مرام خلصت قراءه الملف وفضلت تفكر
_امم وده هدخله بأي طريقه !!!
اللي فهمته إنه جد وما لوش في العك زي اللي اشتغلت عليهم قبل كدا.. يا ترى إيه اللي ينفع معاك ياأدهم يا منشاوي... وليه أيهم حاطك في دماغه ... دا أيهم لما بيحط حد في دماغه بينسفه
جالها إتصال من أيهم
_نعم يا أيهم
_في تعديل في الخطة.. النيلة اللي مطلوب توقعيه عرفنا إنه طالع رحلة مع ولاد عمه إستعدي علشان تروحي على هناك ومش هوصيكي بقا هتعملي إيه
_رحلة ودلوقتي!! حرام عليك ياأيهم أنا لسه مخلصة مهمة إمبارح ملحقتش أشم نفسي
زعق وقال
_مرااام إحنا هندلع!! تحبي أبلغ الكبير
بلعت ريقها وقالت
لا خلاص اللي تشوفه بس الرحلة دي لفين
_لحلايب
_ نعم إيه حلايب دي كمان
_أنا عارف شوية عيال شايفين نفسهم ملوك زمانهم بيختاروا الأماكن الصعبة يخيموا فيها .. سمعت إنهم نازلين في مكان جنب جبل علبة في واحة هناك
_وإنت عرفت المعلومات الدقيقة عنهم دي منين
_عيب دا أنا ليا عيون في كل مكان .. أنا أيهم بردو ولا إيه
_صدق اللي سماك أيهم إنت ملكش حل
_ولا كتالوج كمان يا روحي ومدوخ كلاب الداخلية كلهم وقضيت على الوحش بتاعهم وخليته عاجز والدور على اللي بعده اللي عامل فيها فرقع لوز
_مم دا شكله خطير بقى طالما حطيته في دماغك
_ نسخة من الوحش علشان كدا لازم ينزاح من الطريق بس بطريقة تليق بيه
قالها وضحك ضحكة شريرة كلها إنتقام ووعيد
❈-❈-❈
طول الطريق ومازن وعدي مبوزين
مازن
_ إنت يا أخينا إنت وهو لما تكون مهمة إبقوا قولوا مهمة بلاش مسميات كدابة قال رحلة قال.. دا أنا قربت أخلل في العربية دي.. مأخدناش هليكوبتر ليه هو تعب وخلاص منك لله ياللي في بالي
قصي
_ بتقول حاجة يا مازن
مازن
_ قصي بقولك إيه وربنا ما فايقلك
أدهم حب يغيظ مازن أخوه أكتر
_ إيه يا ميزو .. دا منظر واحد رايح مهمة فين الروح الحماسية والإقدام والبسالة يا أخي
عدي ضحك
_يابني نقطنا بسكاتك هي ناقصاك إنت مش شايفه يعني بيطلع دخان من ودانه
إبتسم قصي بغموض وسكت
ولما وصلوا للمكان اللي هيقعدوا فيه الثلاثة تنحوا من جمال الطبيعة الخلابة والمنظر الأخضر الساحر
أدهم
_هي دي حلايب؟؟
عدي
_دا جبل علبة! معقول
مازن
_ إنت ضحكت علينا وجبتنا مكان تاني غير حلايب صح قول إن كلامي صح
ضحك قصي
_ هي حلايب بعينها علشان تصدقوني لما قلتلكم إنها رحلة
مازن قرب منه وباس راسه
_ لا أنا محقوقلك هات راسك ابوسها ياعم المكان هنا جنة إيه الجمال دا إزاي محدش يعرف المكان دا... أرض خضرا وجو بديع ومية صافية لا إحنا هنحتاج إيه أكتر من كدا
قصي إبتسم
_ولسه تعالوا شوفوا المكان اللي هنقعد فيه
دخلوا على المكان اللي هيباتوا فيه
لقوه فندق صغير مبني من الخشب لكن بتصميم قيم زي تصميمات اليابان كدا
عدي
_ قصي المكان خرافة إحنا مكناش نتوقع كدا أبداً فكرناك هترمينا في صحرا وخاصة إن المكان قريب من السودان وعلى الحدود
قصي
_ عيب عليك يابني أنا أعمل فيكم كدا
أدهم
_وأبو كدا كمان بس هو الحظ ضرب معانا المرة دي بس
ضحكوا كلهم ومازن رمى شنطته ونط على سريره
_أنا هنام علشان استكشف المكان البديع دا الصبح على رواقة
قصي
_فعلاً المشوار كان متعب ولازم نرتاح
وتنهد وقال
_ كان نفسي نجيب البنات تغير جو بس مش هينفع علشان المهمة
أدهم
_لو عرفوا هيزعلوا
مازن
_ إنت بتقول فيها دا زمان لينا عاملاها مناحة دلوقتي أختي وأنا عارفها
عدي ضحك
_ لو مكانتش المهمة أكيد كنتوا جبتوهم بس مش هينفع نعرضهم للخطر
قصي
_بالظبط كدا .. يلا كل واحد على أوضته نلحق نرتاح.. اه صحيح كل اثنين في أوضة مفيش غير كدا
عدي
_ أنا هنام مع أي حد فيكم إلا مازن
مازن
_ ليه يعني مازن بيقرص ولا إيه
عدي
_ ألعن بترفس يازفت هو حد ينام جنبك
قصي ضحك
_ الأوضة فيها سريرين فاطمنوا .. وعامة أنا وأدهم هنكون في أوضة واحدة
أدهم هز راسه تمام يا كبير
عدي
_اه هي كوسا بقى ما تاخد إنت أخوك ياأدهم
مازن
_ولا قالك سريرين متعملهاش حكاية .. لو مش عاجبك سيبلي أنا الأوضة كلها هنام فيها براحتي
عدي
_ ليه هتنام على السريرين
مازن
_ أيوة إنت مالك
عدي
_ لا خلاص صعبت عليا هنام معاك أونسك
❈-❈-❈
تاني يوم الصبح قاموا فطروا وخرجوا يستمتعوا بالمكان وقضوا أحلى وقت
وعلى العصر
عدي قال
_عارفين أنا بفكر في إيه .. عايز نعمل سباق رالي إيه رأيكم
أدهم
_فكرة جميلة يا عدي إزاي فاتت علينا دي... نخرج من الواحة هنا ونطلع بالموتسيكلات المخصصة أكيد موجودة هنا
مازن
_ معاكم طبعاً بس فين قصي ممكن يكون ليه رأي تاني
أدهم
مش عارف قصي في الأوضة لسه مطلعش
مازن
طب روح شوفوا ياأدهم
أدهم
اتحرك راح على الأوضة وخبط الباب
_ قصي دا أنا أدهم أدخل
قصي كان واقف بيتكلم في الفون
_تعالى يا أدهم
أدهم
_ إيه فينك مش بتخرج تقعد معانا ليه
_ بريح رجلي تعبت من القعدة
_ اه ربنا يكون في عونك خنقة بردو... بقولك الشباب عايزين يعملوا سباق موتوسيكلات موجود هنا ولا إيه النظام
قصي
_ حلو أوي علشان المطاردة هيكون أفضل
_لا متقولش إن المهمة دلوقتي
_دا صحيح جالي أخبار إنهم هيتحركوا خلال ساعة ولازم إحنا نكون مستعدين علشان ننقض عليهم وقت التسليم
_ تمام بينا نقولهم
قصي قعد على الكرسي وخرج مع أدهم وقالهم على الخطة الهجومية للشباب
_ها عرفتوا كل واحد هيعمل إيه
أخذوا وضع الإنتباه
_تمام يا وحش وإحنا جاهزين
خرجوا من المكان وطلعوا على الطريق وكل واحد أخذ موتوسيكل أجروه من المسؤول
أما قصي فركب ورا مازن
وعملوا إنهم طلعوا في سباق وسط المتسابقين
وفي الطريق قصي أعطاهم الإشارة فبعدوا عن الطريق وراحوا طريق تاني اللي فيه موقع المهربين
_ يلا كل واحد يتخذ مكانه ، صحيح هما يفوقونا عددنا خمس أضعاف لكن عارف إنكم قدها.. القافلة محملة فحاجات خطر على البلد ولازم نتصدى ليهم ... انطلقوا ياشباب
كل واحد استعد بسلاحه أما قصي ففضل على الموتسيكل بتاع مازن يتابع الوضع
إنطلق أدهم وفرقته وكل واحد وقف في مكان ولحظة التسليم انقضوا عليهم
أدهم
_ سلم نفسك وأرمي اللي في إيدك إنت وهو
عملوا للمهربين ارتباك
_ جم منين وإزاي . دا إحنا في مكان محدش يتوقعوا.. روحنا في داهية.. إضربوا عليهم بسرعة
وتم تبادل إطلاق النار بين الفريقين بس كان من الواضح تفوق فريق الأسود لأن التانين مكانوش على إستعداد
وتمت المهمة بنجاح
ركبهم أدهم في عربيه كانت معاهم وساق بيهم علشان يسلمهم لشرطة الحدود
أما مازن وعدي فأخدوا الحاجة اللي كانت معاهم علشان تتسلم للمختصين ورجعوا على الفندق في إنتظار عودة أدهم
وهناك قصي قال بفرحة
_أحسنتم يا شباب
مازن
_ هنعمل إيه بالصندوق اللي معانا دا
قصي
_ هيفضل معانا وهنرجع بيه المركز بتاعنا مينفعش يتسلم لأي حد
مازن : تمام
عدي
_مش ملاحظين أدهم اتأخر ولا بيتهيألي
قصي
_ زمانه جي
هنا جه إتصال لمازن
_ أوبا دي لينا اللي بتتصل... وربنا متأكد إنها هتفتحلي دش معتبر
عدي
إستلم يا حلو
مازن
إنت ولا على بالك ما إنت معندكش إخوات
عدي
_ ياريت كان عندي وربنا.. رد رد عليها
مازن
_مالك فرحان ليه كدا
عدي
_ يابني رد
فتح مازن الخط ولسه هيرد
سمع صريخ أخته العالي
_مااااازززن
فمقدرش يتحمله فبعد الموبايل بسرعة عن ودنه
_ يا شيخة حرام عليكي خرمتي وداني هو في كدا ياناس الرحمة
لينا بصراخ
_ مازن إنت كداب وغشاش وأناني كمان ها
_ عارف عارف وفيا كل العبر مجبتيش جديد
لينا عيطت
مازن أنا بكرهك إنت وأخوك ومش عايزه أشوفكم تاني
ضحك مازن
_ وأنا بحبك يامجنونة وبموت فيكي كمان
_اسكت مش عايزه أسمع صوتك، إنتوا مش بتحبوني إنتوا مش بتفكروا غير في نفسكم وبس
_ليه بس كدا ... تنكري إننا بنحب دلوعتنا الصغيرة
_ حب إيه دا .. لو كنتوا بتحبوني كنتم أخدتوني معاكم أنا وبنات عمك نغير جو معاكم إشمعنا إنتم تروحوا تتفسحوا وإحنا نتحبس هنا في البيت ها... البنات أول ماعرفت جالها اكتئاب والله حرام عليكم بجد إنتوا أندال أوي ... كنتوا هتخسروا إيه ها قولي رد عليا
_ ها خلصتي كل اللي عندك ولا لسه في كلام تاني عايزه تقوليه
_اه إنت بتستهزأ بيا سيادتك ومش هامك اللي بقوله... ماشي يا مازن إقفل أنا غلطانة إني كلمتك
_لا لا إستي بس.. أنا بس كنت عايزك تقولي كل اللي في قلبك متخبيش حاجة
_وهيفيد بإيه اللي بقولوا ما إنتم مش بتحبوا إلا نفسكم وبس
إتضايق مازن
_لينا متنسيش إني أخوكي الكبير ومش هسمح بكلامك دا حتى لو كنتي متعصبة مفهوم!!
لينا بحزن
_ أنا آسفة يا مازن بس إنتوا السبب في الإنفعال اللي أنا فيه دا.. عن إذنك أنا هقفل سلام
_ إستني يا لينا متقفليش
_ لا مش حابة أتكلم خلاص
_ إنتي يازفتة بقولك إسمعي
_ يووه عايز تقول إيه تاني.. هتضحك عليا وتقولي هجيبلك هدية وأنا راجع مش عايزه منك حاجة .. وعلى فكرة سمر ومنة زعلانين هما كمان بلغ أبيه قصي بدا بس طبعاً ميقدروش يكلموه ويقولوله دا.. سلام يا مازن
_ إستني يا لينا هتقفلي في وشي
_ مازن أنا آسفة مش قادرة أتكلم
_ لا وربنا ما تزعلي علشان خاطري أنا
_بعد إيه يا مازن بعد إيه
_ لما أجيلك وأحكيلك هتعذريني مش عايزكم تزعلوا بالله عليكي
ردت بهدوء ظاهري
_ماشي يا مازن ممكن أقفل بقى
إتنهد وقال
_ مع السلامة يا حبيبتي خدي بالك من نفسك
قفل مازن الخط وبص لقصي بضيق
_ عاجبك كدا يا قصي .. اه إخواتك البنات متضايقين ومقموصين منك
قصي بهدوء
_ لما نرجع ونقولهم هيتفهموا بلاش تكبر الموضوع
عدي
_ إنت يابني كدا إزاي بيقولك البنات زعلانة يعني إتصل وراضيهم بكلمتين إتلحلح.. أتعلم من أخينا دا ..
❈-❈-❈
أدهم سلم المجرمين للقسم شرطة للحدود علشان التحقيق معاهم ورجع تاني بالعربية وفي طريقه شاف....
مرام جالها أخبار بتحركات أدهم ومكانه
أيهم كلمها
_مرام الهدف على الطريق دي فرصتك يلا
مرام بتعب
_ماشي مستعدة
وأول ما لمحت عربية أدهم جاية عليها وقعت قدامه على الطريق
وقف أدهم العربية بسرعة
وقال بقلق على البنت اللي شافها واقعة قدامه على الارض
_ يا نهار أبيض البنت دي جرالها إيه
نزل من العربية بسرعة وحذر في نفس الوقت بص على مرام وبص حواليه ملقاش حد
حاول يفوقها
_ يا آنسة إنتي سامعاني... يا آنسة إنتي كويسة يا آنسة ... طب يامدام
ملقاش منها أي رد لأن مرام كان أغمى عليها فعلاً
حاول يشوف علاماتها الحيوية مسك إيدها وجس النبض من رسغها
_الحمد لله في نبض .. تقريباً مغمى عليها شفايفها زرقا ووشها أصفر.. أكيد إما حالة اختناق أو الضغط واطي .. طب هتصرف إزاي بس
مكانش عارف يعمل إيه
فشالها وركبها جنبه في العربية وساق في طريقه للفندق
ولما وصل
عدي كان بيحاول يقنع قصى إنه يكلم إخواته البنات
_يابني كلهم راضيهم بقى
وهنا شافوا أدهم بينزل من العربية لأنهم كانوا بينتظروه تحت
عدي
_ أهو أدهم جه أهو.. أخيراً يابني إتاخرت ليه
أدهم بلع ريقه وشاور على العربية
_يا شباب أنا معايا في العربية واحدة
مازن
_ نعم ياخويا واحدة يعني إيه وواحدة واحدة ولا واحدة ونص
أدهم بضيق
_ إنت هتقلش دا وقته
قصي بجدية
_ أدهم في إيه ومين اللي معاك
_ دي بنت لقيتها مغمى عليها في الطريق
مازن بإنزعاج
طب وإحنا مالنا جايبها هنا ليه الله أعلم البنت دي سكتها إيه أو هي مين
أدهم
_ إفهم يازفت أنا إستحالة أسيب بنت مرمية في الطريق واتجاهلها.. قصي هو فيه أي مستشفيات هنا أو دكاترة
_ أكيد في علشان السياح اللي هنا بس معرفش مكانها.. خلينا نسأل صاحب الفندق
وبالفعل عدي راح سأل صاحب الفندق
_لو سمحت في مستشفى قريب من هنا
_خير يافندم حضرتك محتاج دكتور؟ أنا ممكن أتصل بالدكتور هيكون عندك خلال نص ساعة
_ اه ياريت و بسرعة هكون ممنون ليك
_ حاضر يا فندم مسافة السكة بس وألف سلامة
عدي راح لأصحابه الدكتور جاي
أدهم
_ هنخدها فوق عندنا لحد ما الدكتور يجي
مازن
_ إنت اتجننت في عقلك هتدخل بنت غريبة لا ومغمى عليها في شقة أربع شباب عزاب
ضحك أدهم
_ إيه إنت مش واثق في نفسك ولا إيه
مازن بضيق
_ مش القصد يازفت .. فكر إنت في منظر البنت لما تفوق تلاقي نفسها في جناح أربع شباب أغراب .. رد فعلها هيكون إيه
أدهم
مفيش حل إلا دا الفندق كله رجالة مفيش هنا أي ست حتى عمال النظافة رجالة فبالتالي جناحنا هنا ءامن مكان
وطلع بيها فوق ونيمها على الكنبة في الصالة ومازن جاب غطا من أوضته وغطاها وبعد شوية جه الدكتور وكشف عليها
قصي
_ خير ياكتور إيه سبب الإغماء دا
_ خير البنت بس جالها هبوط حاد في الدورة الدموية بشكل مفاجئ أدى للأغماء
أدهم
_ وإيه سبب الهبوط دا
_ أسباب كتير منها سوء التغذية وفقر الدم وغيره... أنا هركب لها المحلول المغذي دا وأول ما يخلص هتفوق وهتبقى كويسة إن شاءالله ااه وممكن تحتاج تعمل شوية تحاليل
أدهم
_ تمام يا دكتور متشكر جداً
❈-❈-❈
فضلوا الشباب حوالين مرام قلقانين عليها ومنتظرين تفوق
أما قصي فدخل أوضته وطلب منهم يبقوا يطمنوه عليها
وخاصة إنه قدر يتعرف عليها
قصي
_ دي البنت أم لسان طويل اللي شوفتها إمبارح بس يا ترى إيه اللي جابك هنا حلايب... وهل دا مجرد صدفة ولاااا ... اه لو كان اللي في بالي يا ويلك مني
بعد شوية بدأت مرام تفوق وقالت بتعب
_اه .. أنا فين
أدهم
_حمدالله على السلامه يا آنسة
انتفضت بفزع وبراعة في التمثيل
_ إنت مين وبتعمل إيه هنا
ضحك مازن
_ إهدي بس متخافيش إحنا في جناحنا إنتي اللي مشرفه معانا هنا
_ وأنا بعمل إيه في جناحكم
بصت حواليها وحاولت تقوم كانت هتقع
أدهم سندها
حاسبي إنتي لسه تعبانة
حاولت تقول بخوف
_ إبعد إيدك عني... إنتوا جبتوني هنا إزاي أنا لازم أمشي حالاً وإيه اللي بيحصل بالظبط
عدي
اتفضلي أقعدي بس وإحنا هنفهمك
مرام
أفهم إيه أنا بعمل إيه في مكان رجالة
أدهم
_ إنتي مش فاكرة حاجة
_ حاجة حاجة إيه أنا كل اللي فاكراه إني كنت رايحة اتمشى بالعريية ف.. ف..
غمضت عنيها بألم وخوف
_لااا مشوني من هنا .. أرجوكم متؤذونيش سيوبني في حالي
جت تركن على إيديها وتقوم الكانيولا وجعتها وايدها جابت دم
مرام أول ما شافت الدم اتفزعت
_لا دم عااااا
واغمي عليها تاني
مازن
إيه البنت الفافي الرقيقة دي من نقطة دم من ايديها فرفرت
أدهم شالها تاني
_ فضي سريرك يا مازن
إشمعنا سريري وليه أوضتنا بالتحديد إنت بتخم يا أدهم
عدي
أنا هتصل بالدكتور تاني
الدكتور جه وفحصها
هي كويسة وهتفوق بعد مدة شكلها منامتش بقالها كتير الأفضل تسيبوها ترتاح
خرجوا الشباب وسابوها نايمة
وهي إبتسمت بخبث
إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
