قراءة رواية أسود الداخلية كاملة

تنشر حصريًا على مدونة رواية وحكاية قبل أي منصة أخرى

قراءة رواية أسود الداخلية

من روايات وقصص 

الكاتبة أسماء عبد الهادي

الفصل الحادي عشر

وقفت مرام قدام سليم وكأنها بتحميه من شر أيهم

_ بعد الشر عن سليم.. أيهم إنت عارف سليم بالنسبالي إيه 

مسك أيهم دراع مرام 

_ وإنتي عارفة اللي يخالف أوامري وفي المهمات بالذات بعمل فيه إيه 

ردت مرام بثبات 

_ أيهم إنت عارف إني بأدي مهامي على أكمل وجه وإنت مش محتاج إني أقولك دا 

_ تقدري تفهميني مجبتيش أي معلومات ليه لحد دلوقتي

_ علشان إنت عارف إن المهمة دي غير أنا مع ناس لو فيه أي خبر مش بيقولوه حتى بينهم وبين نفسهم فصعب إني أطلع منهم معلومة بسهولة فاصبر شوية 

_ لا إنتي الظاهر عجبتك القعدة هناك إخلصي ها .. عايز معلومات دقيقة وشاملة في ظرف كام يوم ويوم ما اعطيكي الإشارة.. الزفت أدهم دا رقبته تكون عندي فاهمة 

_ فاهمة ياأيهم اللي تقوله هنفذه 

_ ياريت دا يتم قبل العملية الكبيرة اللي بنجهز لها علشان مزعلش منك

_ تمام 

سابها أيهم ومشي 

وهي سلمت على سليم 

_ يلا سلام بقى ياسليم هتوحشني أوي ومش عايزاك تخاف من حاجة طول ما أنا موجودة... يلا باي 

_ إنتي اللي هتوحشيني أوي خدي بالك من نفسك

إبتسمت 

_ ماشي رغم إني مش محتاجة وصاية 

_ أكيد دا إنتي مدوخة الداخلية كلها 

_ طيب يبقى إيه بقى 

_ دا ميمنعش إني بخاف عليكي

_ عارفه سلام قبل ما يكتشفوا غيابي 

_ سلام ياحبيبتي 

ورجعت مرام العربية تاني مع رضوان 

فقالت 

_ حط في بطنك بطيخة صيفي يارضوان 

رضوان الدم اترد لوشه من تاني 

_ كنت عارف إنك الوحيدة اللي هتنقذي إبني من غلطة عملها بجهل وتسرع 

مرام سكتت وفضلت بتفكر هتعمل إيه في اللي جاي 

❈-❈-❈

أما عند مازن والبنات كانوا خلصوا كل اللي جم علشانه 

مازن بص لمنة وقال 

_ مبسوطة!! 

منة إبتسمت وسكتت 

مازن قال

_ مردتيش يبقى مش مبسوطة 

لينا 

_ مبسوطة يابني هي بس مكسوفة خلاص بقى

مازن بغلاسة

_ لا لازم أسمعها منها هيا .. ها يامنة ردي عليا مبسوطة 

منة بكسوف 

_ اه مبسوطة شكراً يامازن 

إبتسم

 _ الله أنا أسعد إنسان في الدنيا كلها النهاردة أخيراً ياناس الحمدلله يارب 

وهنا جه أدهم 

_ اه أنا كنت عارف إيه هو سر التأخير دا ما تخف ياعم النحنوح الجماعة في العربية خلاص فرفروا وإنت واقفلي هنا تتنحنح ما تنجز يابني 

مازن 

_ إيه ياأدهم هو إحنا كنا بنلعب ما كنا بنخلص كل اللي محتاجينه 

_ اه واضح إنكم كنتم بتخلصوا .. يلا قدامي على العربيات يلا فين نور 

البنات اتوتروا وبصوا لبعض 

فمازن قال 

_ الله مش كانت معاكم يابنات .. كانت واقفة معاكي يا سمر 

هنا جت مرام وفي إيدها شنط ودا لأنها رجعت بأقصى سرعة واشترت أي حاجة قدامها والسلام وحصلتهم .

أدهم بص للشنط 

_ كنتي فين وإيه الشنط دي 

❈-❈-❈

نروح لقصي وعدي في البيت 

عدي عمل فنجان قهوه ليه ولقصي 

_ عملت لك فنجان قهوه معتبر إتفضل 

قصي وهو بيبص في الكمبيوتر

 _ تسلم إيديك..  ها عملت إيه في المعلومات اللي طلبتها منك 

قعد عدي جنب قصي وقال

 _ شغال عليها زي ماإنت شايف الفترة اللي فاتت انشغلت في المهمات فمقدرتش أخلي كل تركيزي عليها  

_ عايزك تكثف كل جهودك الفترة الجاية عليها وبس تمام

_ تمام ياقصي في حاجة جدت ولا إيه 

_  تقدر تقول كدا بس لسه مش متأكدين منها علشان كدا محتاجين اللي طلبته منك وعلى وجه السرعة  

هز عدي راسه ومسك اللاب توب بتاعه وبدأ يشتغل هو كمان 

❈-❈-❈

 أما عند مرام 

مرام بصت للبنات وبعدين بصت لأدهم وقالت 

_ ااا دي شوية حاجات كدا كنت محتاجاها فجبتها  

مازن

_ ليه كدا يانور أنا مش قلتلك لو احتجتي حاجة بلغيني 

أدهم بحدة 

_ إنتي عارفة لو قصي عرف اللي عملتيه دا هيعمل فيكي إيه 

نور بلعت ريقها بخوف لأنها خلاص بدأت تفهم شخصية قصي وعرفت إنه مش هيعدي دا بالساهل أبداً فقالت 

_ لا بالله عليك ياأدهم بلاش تقوله فيها إيه يعني لما أجيب حاجة محتاجاها 

 أدهم

 _ فيها كتير وكتير أوي يانور.. إحنا قلنالك إنتي بقيتي هنا زي البنات بالظبط وأي حاجة تحتاجيها مسؤولة مننا

_ ااا أنا معايا فلوسي والله 

_ خلي فلوسك معاكي أكيد هتحتاجيها في أي وقت لكن طول ما إنتي معانا وفي بيت واحد فإنتي مسؤولة مننا إحنا فهمتي 

مرام إبتسمت 

_ تمام فهمت شكراً ياأدهم ربنا يخليكم كلكم ليا 

أدهم بهدوء 

_ يلا اتفضلوا 

وركبوا العربيات ورجعوا على البيت 

لكن مرام كانت طول الطريق بتفكر في سليم وإزاي تخرجه من ورطته قبل ما ينتبه أيهم لدا 

ولما وصلوا البيت مازن قال 

_ عدي المطعم بعت الطلبات اللي طلبتها ولا لسه 

عدي 

_ لسه يامازن مافيش حاجة جت

مازن بضيق

_ إزاي دا أنا مأكد عليهم ميتأخروش دا إسمه تسيب أنا هتصل بيهم ابهدلهم حالاً 

وما هي إلا لحظات و جه الحارس بتاعهم وقال 

_ الحاجة دي جت لحضرتك يامازن باشا 

إبتسم مازن فعدي قال 

_ متسرع كنت هتبهدل الناس على الفاضي 

مازن 

_ طب قوم ظبط معايا القعدة هنا 

قصي 

_ ما تخلص يامازن وتلبس الخاتمين وتنجز في يومك ليه كل دا وليه الرسميات دي 

مازن كشر وقال 

_ بقولكم إيه الليلة ليلتي ومحدش يتدخل حتى لو كنت إنت ياقصي معلش بقى 

بصله قصي بحدة فعدي قال 

_ عديها ياقصي وخليه يفرح الليلة 

اتنهد قصي بضيق وسكت 

أما مازن فمسك رقبة عدي وباس راسه 

_ هو أنا بحبك من شوية ياد إنت 

عدي بإنزعاج 

_ ابعد ياعم وشوف هتعمل إيه إنجز 

مازن ضحك وقال 

_ البنات هتطلع تجهز وتلبس الفساتين وإحنا هنا المطلوب نظبط القعدة والأكل والجاتوه والحاجات دي كلها ولما ينزلوا نبدأ بقى 

مرام قالت 

_ خليني أنا هظبط كل حاجة على ما البنات تجهز

قصي

 _ وإنتي مش عايزة تجهزي زيهم 

مرام

_  ما أنا لابسة أهو وحلو أوي كدا 

الشباب بصوا لبعض وفكروا إنها زعلانة على موت أهلها 

فقرب منها مازن وقال بحزن 

_ أوعي تزعلي مني بالله يا نور بس إنتي عارفة طبيعة شغلنا وما صدقت لقيت الوقت وكمان قصي وافق على الخطوبة 

مرام

_  لا لا أبداً مش زعلانة أفرح واتبسط يامازن وربنا يرحم امواتنا جميعاً أنا صحيح مفتقده أهلي جداً إنما متأكدة إنهم في مكان أفضل من هنا بكتير 

_ ربنا يرحمهم يارب ويجعل مثواهم الجنة 

اتنهدت مرام 

_يارب 

بعد شوية البنات نزلوا وكل واحدة فيهم لابسة فستان رقيق ومحتشم ورغم إنه بسيط إلا إنه جميل أوي 

أما منة فخطفت قلب مازن أكتر وأكتر وحس إن قلبه بيرفرف من جوا

وشاورلها على الكنبة جنبه وقال 

_ إتفضلي ياعروستنا الجميلة أقعدي...

قصي كان هينفجر وجه يتحرك ناحيته عدي وأدهم كل واحد منهم حط ايده على كتف قصي 

عدي 

_ ها إحنا قلنا إيه ياقصي 

مازن لأمه 

_ ماما فين الشبكة ياست الكل وإنتي يا خالتي ما تسمعينا زغرودة كدا دا بعد إذنك يانور

مرام رفعت ايدها 

فانطلقت الزغاريد من حنان ونادية

ونادية قالت 

_ أهي الشبكة ياحبيبي لبسها لخطيبتك يلا 

هنا قصي قرب وقال 

_ مازن هات أنا هلبسها لمنة أو تلبسيهالها إنتي ياخالتي نادية 

هنا مازن زعق وقال 

_ لااا لا يمكن دا يحصل وربنا ماحد ملبس منة شبكتها غيري أنا دا أنا بحلم باليوم دا من قديم الازل قال تلبسها إنت قال 

قصي 

_ إنت يازفت الكلام دا مفيهوش هزار 

مازن 

_ يا عم مش هلمس ايدها متخافش همسك الخاتم واحطه على طرف صباعها وهي تكمل .. هاتي يا ماما يلا 

وبالفعل بدأ مازن يلبس منة الخاتم من غير ما يلمس ايدها وكمان الأنسيال فتحوا ولبسوا ليها وقفلوا تاني وهو بيقول 

_ مبروك علينا يامنة .. أنا أسعد مخلوق في الدنيا علشان فزت بيكي ..

منة بخفوت 

_ الله يبارك فيك 

مازن 

_ فاضل بس الكوليه دا 

هنا قصي قال 

_ لا عنك إنت بقى ياحلو 

مازن

_ إيه هلبسهولها 

قصي

_ إنت بتحلم هات اللي في إيدك دا إخلص 

مازن بإنزعاج 

_ خد ياباي عليك .. بس بقولك إيه استنى أنا هتصل بالمأذون يجي أنا عايز أنا اللي ألبسه لمنة 

قصي بحدة

 _ مازن هي خطوبة بس فبلاش تخليني أزعلك 

مازن 

_ شايفة أخوكي يامنة إن ماطلعت عليه كل دا يوم خطوبته مبقاش أنا مازن 

عدي ضحك 

_ يابني أسكت واحمد ربنا ... دا إنت الأصغر فينا وبتخطب قبلنا 

مازن

_ أعملكم إيه ما أنا لو استنيتكم كدا هشيب قبل ما أخد الخطوة دي .. دا إنتوا يومكم بسنة 

قصي لبس أخته العقد وقال وهو بيبوس راسها 

_ ألف مبروك ياحبيبتي 

منة بكسوف

_ الله يبارك فيك ياأبيه 

وأم قصي قالت

 _ عقبالكم كلكم يابنات لما نفرح بيكم إنتوا كمان ياحبايبي

عدي 

_ أنا جعان فين الأكل فين الجاتوه يامازن أنا عارفك شكلك ناوي تدكنه ليك 

مازن 

_ هناك أهو يا طفس ... لينا من فضلك حضري له طبق 

عدي 

_ لا لا متتعبيش نفسك يالينا أنا مش محتاج عزومة أنا هقوم بالواجب 

مازن

_ ياطفس كله هنحضر له طبق

عدي 

_  لا أنا بحب أكشف الغطا وأكل من الحلة إنت مالك ما تركز في خطيبتك 

مازن

_ اه ما هو ياخوفي ملاقيش حاجة أكلها أنا وخطيبتي 

الكل ضحك وقضوا يوم جميل كله ضحك ومرح إلا مرام اللي كان باين عليها التفكير لكنها كانت بتحاول تخفي دا 

❈-❈-❈

في صباح اليوم التالي 

 مرام صحيت متأخر وهي قاصدة دا ولما خرجت من الأوضة لقت أدهم بيفطر مع حنان ونادية فقالت بصوت كله نعاس 

_ صباح الخير 

حنان 

_صباح الخير ياحبيبتي تعالي افطري يلا 

مرام قعدت على السفرة وقالت 

_ إيه دا أنا اتأخرت في النوم ولا إيه البنات فين 

نادية

_ مشيوا من بدري على جامعتهم 

مرام

_ غريبة محستش بسمر وهي بتفتح النور علشان تلبس وتستعد للجامعة 

حنان 

_ لا هي محبتش تزعجك أخدت هدومها وجت لبست في أوضتي 

مرام 

_ ااه أنا آسفة أوي عاملت لكم دربكة في بيتكم 

نادية بحنان

_ متقوليش كدا يانور يابنتي ربنا اللي يعلم معزتك عندنا عامة إزاي 

مرام ورغم المهمة اللي جاية علشانها كانت متأكدة من صدق مشاعرهم ليها وحبت أوي حنان ونادية لأنهم فكروها بأمها وحنانها واللي من بعد ما ماتت اتحولت مرام لواحدة تانية خالص على ايد أخوها أيهم 

هنا ادهم قام وقف 

_ طيب ياجماعة أنا خارج عايزين حاجة 

نادية 

_ ماشي يابني مع السلامة

مرام 

_ إنت رايح فين ياأدهم 

أدهم

 _ رايح الشركة عند قصي وخدي بالك أنا مبحبش حد يقولي رايح فين وجي منين ..  ولو لاحظتي حتى ماما مسألتنيش السؤال دا بس أنا جاوبت عليكي المرة دي فمتخديش علة كدا ها 

رفعت مرام حاجبها بإنزعاج 

فضحت حنان 

_ ههه دا طبع ولادنا يانور يابنتي وكلنا اخدنا عليه خلاص 

مرام 

_ اها .. طب ممكن أطلب منك طلب وبالله عليك ماترفض ..

أدهم بضيق 

_ عارف هتقولي إيه 

مرام

 _ طب وافق علشان خاطري ياأدهم 

نفخ أدهم بضيق 

_ طيب ماشي تعالي بس مش هنتظر أكتر من خمس دقايق 

جريت مرام علي الأوضة

 _ أقل من خمس دقايق هكون جاهزة 

ولما دخلت مرام أوضة سمر علشان تستعد 

نادية قالت 

_ أيوة كدا يابني فرح قلبها دي وحيدة ويتيمة وغلبانة وملهاش غيرنا 

اتنهد أدهم وقال في نفسه 

_ أتمنى تكون كدا فعلاً وإلا محدش فينا هيرحمها

وبعد عشر دقايق جت مرام 

_ أنا خلاص جهزت ياأدهم يلا بينا 

أدهم بص في ساعته 

_ عشر دقايق ؟؟ هما دول أقل من خمس دقايق هكون جاهزة

ضحكت مرام 

_ ميبقاش قلبك إسود كدا ياأدهم .. مكانوش خمس دقايق 

شاورلها أدهم قدامه 

_ طب إتفضلي يلا مفيش وقت

❈-❈-❈

وركبوا عربية أدهم اللي جاله إتصال من عدي لكنه ما بينش دا قدام مرام

_ أيوة 

عدي 

_ أدهم التعليمات جتلنا إن فيه تحرك سري هيتم الليلة الساعة ١٢ بالليل 

_ تمام كويس أوي ماشي في المعاد تفتح الباب

_ تمام ياأدهم إنت جاي معانا

_ لا إحتمال كبير لا 

_ خلاص ماشي هنتصرف أنا ومازن 

_ كويس أوي..في أمان الله 

رغم إن كلمات أدهم مبهمة جداً لأي حد عادي يسمعها إلا إن مرام ولأنها مش غبية ومتدربة كويس أوي على دا فهمت كل اللي قاله أدهم وابتسمت بخبث 

ولما وصلوا الشركة 

انبهرت مرام بحجم وفخامة الشركة ومدى التنظيم والإدارة اللي بيمشي عليها العمل 

_ واو حلوة أوي ياأدهم بجد قصي متمكن جداً من كل حاجة خسارة بجد إنه ميقدرش يمشي

أدهم 

_ قصي مفيش منه اتنين واللي يشوفه عاجز يبقى أعمى 

مرام بصتله بغموض وسكتت 

وركبوا الأسانسير وطلعوا عند قصي اللي رحب بمرام

_ أهلاً يانور إزيك نورتي الشركة 

مرام 

 _الشركة منورة بأصحابها ياقصي بجد حاجة جميلة أوي وكأني في شركة كبيرة في لوس انجلوس 

ضحك قصي 

_ لوس انجلوس مرة واحدة .. عامة ماشي إتفضلي أقعدي تشربي إيه 

أشرب قهوة لأني ملحقتش أشربها في البيت من صاحبك اللي متسربع دا 

قصي 

_ صاحبي دا متسربع دا أنا عايز أفرمه ... أنا يابني مش قايلك متتأخرش اتأخرت ليه 

أدهم 

_  اسألها دبستني وهلبس في أقل من خمس دقايق وإنت عارف البنات بقى 

ضحك قصي 

_ إن كان كدا سماح المرة دي ... واتفضل يلا أقعد ساعدني عندي شغل كتير 

_ اه إنت هتستلمني أنا ما صدقت إن عندي أجازة النهاردة 

مرام

_ اااه أنا ممكن أساعدك ياقصي 

قصي

 _ أكيد طبعاً بس هتحتاجي حد يفهمك النظام وللأسف كلنا مشغولين النهاردة أول ما يكون فيه فرصة هفهمك وتساعديني أكيد 

 مرام 

_ تمام أوك .. طب تسمحلي أشرب قهوتي وأنا بأخد جولة في المكان 

هز لها قصي راسه وهي قامت وقفت ولسه بتتحرك مأخدتش بالها وخبطت في العامل اللي شايل صينية القهوة أو بمعنى أصح إدعت إنها مأخدتش بالها لأنها هي اللي قاصدة دا