رواية رومانسية جديدة حرب نواعم 

(قواعد عشق النساء)

من روايات وقصص الكاتبة

 هالة محمد الجمسي

راقبت عيناها تحليل الحمل بلهفة صدرها يدق في عنف تمتمت في صوت ممتليء بالبكاء:

_يا رب يا رب٠

نظرت إلى السماء دقيقة ثم إلى اختبار الحمل الذي لم يعطي سوى علامة واحدة تفيد بالسلب وعدم حدوث حمل، زفرت في ضيق ثم ضمت يدها على بطنها وقالت في صوت حزين وهي تناجي خالقها في خشوع :

_يا رب تعبت من الانتظار وتعبت اكتر من اللي جوا قاسم، يا رب بر قلبي وعوض حرماني يا رب٠ 

صوت خطوات خارج غرفتها جعلها تنهض في سرعة إلى الحمام حتى تغسل وجهها من أثر البكاء، هي تعلم جيداً أن القادم هو قاسم، فتح باب الغرفة ثم قال في صوت به نبرة إصرار:

_داليا داليا٠ 

من خلف باب الحمام هتفت:

_ثواني يا قاسم جاية٠

ألقى بجسده على الفراش وهو يشعر بارهاق شديد، لمح في مرآة الدولاب اختبار الحمل ملقى اسفله،عدل من وضع رأسه حتى يشاهد النتيجة، قبل أن يحركه في هدوء وسرعة إلى أسفل السرير، تنهد في عمق، في حين خرجت داليا جلست إلى جواره قائلة:

_خير يا قاسم صوتك متضايق٠

نظر لها قاسم ثم قال في صوت منخفض بعض الشيء:

_ايوا متضايق علشان كدا بفكر نخرج برا أنا وانت٠

داليا نظرت له في حيرة وقالت:

_اي اللي حصل؟ 

قاسم نهض من الفراش ثم نظر من النافذة إلى رقعة الارض الخضراء الممتدة أمام بصره وتابع:

_حاسس أني محتاج كام ساعة كدا راحة، عارفة نفسي في اي؟ 

هزت داليا رأسها علامة النفي وقالت:

_لا مش عارفة٠

قاسم قال في صوت به لهجة تصميم:

_نركب فلوكة في النيل، ولو ساعة واحدة، نخرج نتمشى سوا٠ 

داليا ابتسمت رغم حزنها التي تحاول أن تخفيه وقالت:

_خلاص بكرة نروح٠

قاسم وضع يده على كتفها وقال:

_لا دلوقت يا لا بينا٠

حاولت داليا أن تعترض ولكن قاسم قال في لهجة تحذير:

_لا لا لو أجلت الموضوع دا مش هنروح وانا محتاج افصل من دا كله، عايز اقعد معاك قعدة لوحدنا مية وسما ووش حسن، يا لا يا بت الناس مشاكل العباد مش بتنفض وابن عمك تعب وعايز ساعة بس من نهار اكون فيها معاك وبس٠

(في إحدى مراكب النيل الهادئة)

اغمض قاسم عينيه واستنشق الهواء الطلق وقال وهو يلمس بيده الماء:

_مافيش اجمل من كدا بجد٠ 

ثم نظر لها وقال:

_اي رايك؟ 

هزت داليا رأسها علامة الموافقة وتابعت:

_شكل يومك النهاردة كان صعيب٠ 

نظر قاسم  إلى السماء، راقب بعض السحب الزرقاء الصافية  وهي تمر في سرعة أمامه، ثم نظر مرة ثانية إلى وجه داليا الذي ينتظر أن يسرد عليها ما حدث خلال اليوم فقال في لهجة موافقة على كلماتها:

_دماغ الناس هي اللي صعيبة مش اليوم يا داليا٠ 

تمتمت داليا في نبرة حزن:

_تعبوك الناس؟! العمودية بردوا ليها ضريبة٠ 

قاسم ابتسم وتابع:

_اهالينا وناسنا وأمانة لازم نكون ادها، تعرفي بفكر زمان ايام ما كنت أحضر القعدات مع ابوي وعمي مشاكل الناس زمان كانت اوعر واصعب من كدا بكتير، كان كل عيلة ناحرة في ناسها ومش هامها النهاية اي ولا من اللي هيفضل؟

 العلم بردوا نور دماغ الأهالي والفكر اختلف، 

حتى لو المشاكل لسه موجودة بس خفت في صلابتها و جموديتها و عنفها عن زمان، ويوم عن يوم هتقل مدام فيها 

الصالحين  واللي ضمايرهم   صاحية، اكيد بكرة مش هنسمع عن مشاكل وهموم في البلد واصل٠ 

داليا نظرت له في شفقة وقالت:

_ مشاكل بكرة هو انت شايل هم الناس  اللي لسه هيتولدوا؟

صمتت داليا دقيقة ثم أكملت:

_طول عمر قلبك كبير يا قاسم، طول عمرك صبور 

ومخك يوزن بلدك، بس انت زي جوف الجبل صعب  حد يعرف جواه اي؟ 

نظر لها قاسم في دهشة وتابع:

_انت الوحيدة اللي عارفة قاسم يا بنت عمي٠ 

تنهدت داليا في حزن ثم قالت:

_اي اللي حصل النهاردة يا قاسم وقلب عليك المواجع؟ 

قاسم نظر في عينيها وقال:

_يعني احنا خارجين في البحر شوية علشان اهرب من مشاكل الناس، نقعد هنا نتكلم عن مشاكلهم؟ 

داليا نظرت له في هدوء ثم تابعت:

_الحق وياك وكلامك صح، بلاش نتكلم عن الهم٠ 

جذب قاسم يدها ثم وضعها في الماء مما جعلها تهتف له في نبرة عتاب:

_يا قاسم بلاش كدا٠ 

ارتفعت ضحكة قاسم وقال:

_بلاش اي عاد؟ 

أخرجت داليا يدها من الماء وهي تنفض الماء منها، مما جعل قاسم يمسك يدها مرة ثانية ويضعها في الماء وهو يهتف:

_بلاش اي ما تقولي؟ بلاش أمسك يدك؟ بلاش اي؟ 

ظهر الانزعاج على وجه داليا مما دفع قاسم أن ينفجر ضاحكاً وهو يقول:

_وشك في الحزن جميل وفي الفرح اجمل أنا خارج بيك هنا وحاطك في المركب مخصوص علشان اشوف تجعيدة وشك يا بنت الناس٠

رفعت داليا رأسها علامة التمنع ولكنه همس في اذنها:

_اي نروح؟! 

أمسكت داليا يده فجأة ثم غمرتها في الماء، في حين قال هو وهو ينظر لها في عمق:

_ مش شوية ميه اغرق فيهم انا، انا غرقان فيك انت٠

ابتسمت داليا وهي تنظر إلى وجه قاسم ونظرت عينيه التي تلمع من الضحك، وقالت:

_بعدين وياك يا قاسم؟ 

هز قاسم كتفيه في جذل ومكر وتابع:

_ما أنت عارفة بعدين وياي اي؟

لم تجب داليا نظرت إلى السماء وقالت:

_ساعات الواحد بيكون منتظر فرحة يغرق فيها، فرحة تنسيه تعبه وحيرتة٠ 

قاسم نظر لها في عتاب وقال:

_وانت ناقصك اي عاد؟ 

داليا نظرت له في عمق ثم قالت:

_هو هو اللي ناقصك انت، أنا حاسة باللي جواك ٠ 

قاسم نظر إلى البحر، فكر قليل ثم تجاهل كلماتها  وقال:

_منذر حدد ميعاد مع اهل رويدا خلاص، هنروح كمان يومين أنا وهو وأنت كمان اعملي حسابك هتكوني ويانا٠ 

نظرت داليا له في حزن حاولت أن تعود إلى الموضوع الآخر ولكن قاسم قال في لهجة حاسمة:

_منذر كلمني من ساعتين، وهيجي بعد بكرة الصبح واحنا هنروح في الليل٠ 

وضعت داليا يدها على كتف قاسم وقالت في لهجة توسل:

_قاسم٠

نظر لها قاسم في هدوء، فكرت أن تخبره أن يعودون من جديد إلى باب الأطباء ولكن الأمر كان مفروغ منه الجميع أقر بعدم وجود أي عائق ، لهذا تجاهلت رغبتها في الامر وتابعت:

_تعرف انك بتوحشني وأنت جنبي، والساعات اللي بتكون فيها برا البيت بيكون هاين عليا اكلمك واقولك ارجع بيتك كفاية كدا٠ 

أبتسم قاسم ثم قال:

_لا معرفش، واي كمان معرفهوش انا؟ 

هزت داليا رأسها وتابعت:

_لا أنت عارف، عارف كل حاجة٠

قاسم نظر في عينيها وقال:

_عايز اعرف تاني وتالت ورابع كمان٠ 

تظاهرت داليا بالنظر إلى البحر وقالت:

_طيب بعدين٠ 

أشار قاسم إلى المراكبي وقال:

_يا لا يا ريس رجعنا تاني للبر٠ 

المراكبي صاح في صوت خشن:

_تمام كدا ثواني ونكون على البر٠

داليا اعترضت في هدوء:

_بسرعة كدا؟! 

قاسم أمسك يدها في حنان وتابع:

_ايوا كفاية على البحر كدا، نروح بيتنا نشوف الكلام اللي انت قلتيه دا أساسه واثباته٠ 

همسات داليا في حيرة:

_كلام اي؟

قاسم قال وهو ينظر في عينيها مباشرة:

_لما أكون برا يكون هاين عليك تكلميني تقولي لي تعال على البيت، صح كدا؟ 

هزت داليا رأسها  علامة الموافقة دون أن تتكلم، في حين قال قاسم:

_خلاص نروح بيتنا نكمل كلامنا هناك ٠

يتبع