رواية رومانسية جديدة راهبات الحب

من روايات وقصص الكاتبة

 هالة محمد الجمسي

رواية جديدة 

راهبات الحب

تنشر حصريًا 

على مدونة رواية وحكاية 

قبل أي منصة أخرى

الفصل السادس

تم النشر السبت

6/7/2024

(منزل غرام وعمر )

دلفت ساندي صديقة غرام إلى المنزل والقت بحقيبتها على الأريكة ثم قالت في صوت يحمل لهجة فرح:

_غرام،  عندي ليك اخبار هائلة ومفاجآت كتيرة اوي٠

نظرت غرام إلى ساندي في إهتمام وظهر بريق شغف كبير  في عينيها وتابعت:

_أكيد إعلان جديد،صح كدا!؟ 

ابتسمت ساندي في مكر وقالت وهي ترمق غرام بنظرة اعجاب وقالت:

_ايوا إعلان يا غرام، بس مش اي إعلان، كل إعلاناتك اللي عملتيها طول عمرك  في كفة، والاعلان دا في كفة تانية، وفي حفلة كمان٠

اعترضت غرام في إصرار:

_لأ، حفلات لأ٠ 

ساندى نظرت لها في هدوء وتابعت:

_يعني وافقتي على الإعلان ورفضتي الحفلة؟ ما هي الحفلة كلها هدايا٠

نظرت لها غرام في عمق وتابعت:

_الحفلة سهر وممكن بيات وتحضير قبلها يوم وبعدها يوم والحفلة نفسها عايزة مجهود تكوني مستعدة قبلها وعارفة هتقعدي مع مين؟ وساعات موديلز جداد بيدخلوا ويلقطو بتوع الخليج والليلة كلها بتكون ماسخة، فهمتي؟ 

تنهدت ساندي في عمق وقالت؛

_ما هو محدش فهمني الحفلات غيرك يا غرام٠

ابتسمت غرام في ثقة وتابعت:

_طيب ابقي افتكري٠

ساندي وهي تضع يد على خدها:

_أنا أساساً مقدرش استغني عنك يا غرام، ومش عارفة اي قرار اعتزال اللي جه فجأة كدا ، وإصرارك على الجواز من سليم مع انك يدوب كنت تعرفيه٠

غرام اتجهت إلى المطبخ وأشارت لها أن تتبعها قائلة:

_تعالي ناكل شوية سناكس،  ونشرب كافيه٠

نظرت ساندي في أرجاء المنزل وتساءلت:

_عمر هنا؟ 

نظرت لها غرام في استنكار وقالت:

_متقلقيش، عمر برا من بدري٠

ساندي في لهجة اعجاب:

_عمر دا عايشها بالطول والعرض، فاهم الحياة صح وبياخد منها كل ملذتها٠ 

جلست كل منهم في مواجهه الأخرى على الطاولة في حين قالت غرام وهي تضع طبق السناكس بينهم وتضع القهوة في الماكينة المخصصة لها التي توجد على يسارها:

_سليم بيحبني وأنا حاسة اني هاكون سعيدة معاه٠

نظرت لها ساندي في عدم تصديق وتساءلت في شك:

_يعني الحب دا جه خبط لزق كدا؟ أنت يدوبك عزلتي جيتي هنا وبعدها بكام يوم قلتي خلاص انا اتخطبت ل سليم، أنا مش فاهماك خالص يا غرام بصراحة٠

نظرت لها غرام في حزن ثم قالت:

_غريبة اوي،  يعني كتير عليا حد يختارني أكمل معاه؟ 

فكرت ساندي قليلاً ثم قالت:

_لأ يا غرام مش كتير عليك كدا، بس انت فاهمة أنا بتكلم عن اي؟ 

هزت غرام رأسها علامة رفض منطق ساندي  وقالت:

_ساندي قلت لك سليم بيحبني ودا كفاية اوي٠

ساندي قالت في لهجة اعتراض:

_بيحب غرام ولا لوليتا؟! 

رفعت غرام رأسها عالياً في غرور وتابعت:

_ببحب غرام طبعاً ميعرفش حاجة عن لوليتا الموديلز ٠

ساندي قالت في لهجة اعتراض:

_وهيعرف  امتا؟ 

ابتسمت غرام في لهجة سخرية وقالت:

_مش هيعرف يا ساندي،  علشان خلاص انا قررت أن لوليتا تموت، لوليتا كانت موجودة علشان الشهرة والدهب والفسح والرحلات والمستوى الهاي، كل دا سليم 

هيوفره ليا٠

ساندي قالت في لهجة اعتراض و  خوف محفوف بمخاطرة الرفض من جانب غرام:

_يعني  عرض الاعلان الأخير اللي أنا جاية بيه دا مرفوض!؟ 

سادت لحظة صمت بين الاثنين في حين تابعت ساندي في لهجة تشويق:

_الاعلان مغري و العا ئد كمان والشركة مصممة أن لوليتا هي اللي تعمل الإعلان قلتي اي؟ 

غرام فكرت قليل ثم قالت:

_الاعلان عن أي؟!

ابتسمت ساندي وقالت في لهجة نصر:

_عربية احدث طراز٠

رفعت غرام رأسها وهي تفكر ثم قالت:

_والعرض فلوس وعربية!؟ 

هزت ساندي رأسها علامة الموافقة في حين تابعت غرام:

_وعمولتك هتبقى زي مش كدا!؟ 

ارتبكت ساندي قليلاً في حين تجاهلت غرام احراجها لها وتابعت:

_مين صاحب الشركة اللي مصمم عليا اوي كدا؟ 

كادت ساندي أن تفتح فمها ولكن غرام قالت وهي تشير لها بإصبع يدها الا تتكلم:

_أكيد السعودي طلال أبو حمد مش كدا؟! 

اعترفت ساندي في لهجة اعجاب بتفكير صديقتها غرام:

_ايوا هو مظبوط، مصمم أن لوليتا هي اللي تعمل الإعلان٠

سادت لحظات صمت قبل أن تقطع ساندي السكون الثقيل قائلة:

_الكل عارف ان طريقك ميعرفهوش غيري، وهو مصمم عليك٠

نظرت لها غرام في تفكير وقالت:

_وأنا موافقة بس بشرط٠

تساءلت ساندي وهي تنظر إلى غرام في خوف وقلق حقيقي أن يكون شرطها هو سبب في ضياع الاتفاق كله، وخسارتها إلى عمولتها:

_اي هو الشرط يا غرام؟

تنهدت غرام في  عمق ثم تابعت:

_الهدية اللي كنت هاخدها في الحفلة، هاخدها من غير ما أحضر الحفلة، العقد الالماظ اللي جايبة بن حمد هاخده بعد الاعلان٠

نظرت لها ساندي في شك وقالت:

_طيب ولو رفض وقال كفاية العربية وفلوس الاعلان؟ 

هزت غرام كتفها بعدم اكتراث وقالت:

_خلاص يشوف حد غير لوليتا يعمل له الاعلان، الموديلز كتير٠

ساندي نظرت لها في تفكير وقالت:

_خلاص هعرض عليه الأمر ونشوف ٠

وضعت غرام القهوة أمام ساندي وقالت:

_على فكرة أنا فرحي قرب اوي، يعني قدامك يومين بالكثير علشان اعمل الاعلان، لو اتاخر في الرد، من غير ما تيجي شوفي واحدة غيري،  لازم اتفرغ لتحضيرات وتجهيزات فرحي، أنا موفقتي بشروط، وبردوا عاملة حساب انك جيتي هنا يا ساندي،  وعمولتك  تكون مضمونة معاهم، يعني قبل ما هاخد فلوسي لازم اطمن انك كمان راضية بعمولتك وفي جيبك٠

نظرت لها ساندي في عمق ثم أخرجت هاتفها وقالت:

_انا هكلمه حالاً واعرف رده، رقمه الخاص معايا اكيد هيرد عليا٠

بعد الاتصال الثاني تم الرد من قبل طلال أبو حمد:

_ها يا ست ساندي ايش الاخبار؟ 

ساندي اخذت نفس عميق قبل أن تقول وهي تنظر في عين غرام تستمد منها جرأة وشجاعة:

_لوليتا وافقت بالعافية ع الاعلان، أنت عارف انها اعتزلت وأنا عملت مجهود جبار علشان أقنعها، وحياتك عندي يوم وليلة أكلم فيها، لحد ما وافقت ع العربية وفلوس الاعلان، والعقد الالماظ  عايزاه بعد الإعلان، مش عايزاه في الحفلة، غيرة الموديلز بتتعبها نفسياً٠ 

سادت لحظة صمت ع الاثير، كاد قلب ساندي أن يقفز من مكانه قبل أن يقول طلال في لهجة موافقة:

_شروطها مجابة الحلوة، بس فهميها الاعلان هيكون ازاي؟ التصوير بكرة بليل في استديوهات تاج٠

ابتسمت ساندي في فرح وثقة ونظرت إلى غرام نظرة تهنئة وقالت:

_خلاص كدا مبروك٠

أغلقت ساندي الهاتف ثم نظرت إلى غرام في لطف وقالت:

_كنت عارفة أنه هيوافق مش كدا  يا غرام!؟ 

تنهدت غرام وقالت:

_طلال عايز لوليتا تعمل اعلان، خلاص يدفع علشان لوليتا تيجي له٠

ساندي قالت في لهجة تساؤل:

_شكلك كدا هتلغي الجوازة، وترجعي ل لوليتا٠

هزت غرام رأسها علامة النفي وقالت:

_لأ الاعلان بتاع العربية دا اعلان وداع ل لوليتا، وداع يليق بيها، زي ما بيقول كدا تشريفة غالية، 

وبعدها خلاص فينتو، لوليتا عاشت محدش يعرف عنها حاجة غيري أنا وأنت،  وهتنتهى علشان  غرام هي اللي هتفضل موجودة وبس مع سليم٠

❈-❈-❈

مساء اليوم التالي

ساندي نظرت إلى غرام وهي تضغط على أزرار الفون وقالت:

_بتعملي اي يا غرام، يدوب نمشي٠

غرام نظرت لها في استنكار وقالت:

_بسيب رسالة ل سليم أن راحة اعمل ماسكات طبيعيه في مركز تجميل وهتأخر شوية٠

ابتسمت ساندي وقالت وهي تجلس إلى جوار غرام في سيارتها:

_اكتر حاجة عجباني فيك، انك مش بتسيبي اي حاجة للظروف، مافيش هفوة يا غرام٠

غرام انطلقت بالسيارة وقالت وهي  تنظر إلى ساندي:

_ربنا أدانا العقل علشان نفكر ومنغلطش ولا اي؟ 

ضغطت غرام زر التسجيل فانطلقت اغنية 

(Somebady working on the rain) 

بعض الأشخاص يعملون في المطر، دندنت غرام مع كلمات الأغنية في حين قالت ساندي في لهجة تحذير:

_عايزنك تتكلم بالفرنسية في الإعلان يا لوليتا٠

هزت غرام كتفها بعدم اكتراث وتابعت:

_وعارفة اللبس اللي هو مجهزه للاعلان، أنا فاهمة طلال كويس، ساندي لو مفهمتيش الناس في مجال الاعلانات دي هتفشلي فيه٠

ترددت ساندي دقيقة قبل أن تقول:

_يعني انت عارفة  الاعلان هيكون أزاي؟ 

اومات غرام برأسها علامة الموافقة وقالت:

_مدام مصمم على لوليتا، يبقى اعلان فيه جرأة و::

صمتت ساندي دقيقة ثم قالت:

_غرام عمر يعرف حاجة عن لوليتا؟

هزت غرام رأسها علامة النفي وتابعت:

_ أكيد لأ، عمر مش متحرر زي ما انت فاهمة ولا هيوافق ع حاجة زي كدا، عمر لما جه سافر طلبت منه اروح معاه، هو رفض قال لما اعمل شركة الاول وارتب نفسي كان عندي تمانتشر سنة، 

كان بيبعت لي فلوس اصرف وادفع ل دراستي، 

دا واجبه اللي كان حاطه في دماغه أنه بيعمله، ولما عمل الشركات مبعتش ليا بردوا اعيش معاه، تعرفي يا ساندي أنا سافرت تركيا مع فرقة استعراض، رحت أنقرة، كان عندي شغف رهيب اشوف البلد دي، رحت وقعدت هناك تسع أيام، قدمنا استعراضات شرقية، وخدت مبلغ محترم، رحت ورجعت  وعمر لحد اللحظة دي ميعرفش حاجة عن اني كنت في بلد جنبه٠

نظرت لها ساندي في حيرة وقالت:

_أنت غريبة اوي يا غرام٠

أوقفت  غرام سيارتها أمام الاستديو وقالت وهي تفتح السيارة وتنظر إلى السيارات الاخرى في الجراج:

_طلال لسه  مجاش، يالا بسرعة اكيد المخرج موجود جوا قبل الكل ٠

ساندي قالت في سرعة:

_نستناه علشان الشيك والعربية والهدية٠

(في غرفة الملابس ساندي وغرام واحدة الفتيات تحاول إقناع غرام بضرورة وجودها، في حين أصرت غرام على خروج الفتاة فهي قادرة على ارتداء ملابسها دون الحاجة إلى مساعدة وفي النهاية أخبرت غرام الفتاة أن العائد المادي سوف تحصل عليه كاملاً بواسطة تزكية منها فاضطرت الفتاة إلى الخروج والوقوف أمام غرفة الملابس حتى لا يضيع أجرها٠

وضعت غرام باروكة الشعر الحمراء أعلى رأسها وقالت وهي تضع مساحيق التجميل على وجهها:

_اهلا لوليتا٠

أحضرت ساندي الفستان الساتان الأسود القصير ورفعته عالياً وقالت:

_هو دا الفستان٠

لم يبد على وجه غرام اي اعتراض، قامت بتبديل ملابسها، ظهر التاتو الذي يتخذ شكل ثعبان ذهبي من الكتف الى منتصف الجسد قالت ساندي في لهجة اعجاب:

_حلو اوي التاتو دا، هيظهر  في الاعلان؟

غرام وضعت العدسات اللاصقة الزرقاء في عينيها وقالت:

_لأ الباروكة هتداري عليه والفستان كمان ليه أكمام مش هبيبان٠

سادت لحظة صمت، ساندي تراقب غرام في اعجاب وهدوء، في حين استدركت غرام فجأة وهي ترتدي الحذاء:

_اللي يهم طلال دا٠

أشارت إلى ساقها التي تظهر في وضوح من قبل الركبة بمسافة كافية إلى أسفل القدم، ثم أشارت إلى فتحة الفستان التي تظهر بين صدرها وقالت:

_ودا٠

نظرت غرام إلى ساندي عبر المرآة وقالت:

_فين السيجارة؟ طلال عايز لوليتا ب سيجارة أنا متاكدة٠  

ساندي قالت في صوت مرتفع وهي تضحك:

_يا لا يا لوليتا على التصوير، طلال هو اللي هيولع لك السيجارة بنفسه جوا الاستديو٠

خرجت كل من ساندي وغرام تتبعهم الفتاة في صمت وقف الجميع داخل الاستديو، المخرج نظر إلى غرام في اعجاب وقال:

_مدهش٠

طلال ظهر في الاستديو وقال ينظر إلى (غرام)  في اعجاب وولع شديد:

_محدش ينفع يعمل الاعلان دا غيرك٠

نظرت غرام إلى الكاميرات ثم الى السيارة وقالت:

_طيب نبتدي بقا علشان مبحبش أعطل حد٠

أشار المخرج الى السيارة قائلاً:

_هتركبي في نص العربية راسك هتكون باينه لينا، وأنت باصة للعربية٠

وضع طلال السيجار المشتعل  بين يد غرام وقال:

_علامات الأنوثة كلها فيك انت يا بنت حوا٠

تابع المخرج وهو يحاول الاستيلاء على انتباه غرام:

_عايز الدخان يطلع في قوة من تمك الحلو دا، وتقولي بالفرنسية 

صعب اوي تلاقي عربية بالمواصفات دي، بعدها هتنزلي من العربية وتشاوري  عليها  وتلفي حوليها و الكاميرا تلف معاك وترجعي تركبي العربية تمام ٠

انتهى تصوير الاعلان من المرة الأولى، لم يحتاج المخرج الى اعادة اي لقطة، ذكاء غرام وخبرتها، طريقة السير، وحركة الجسد و النظرة ذات المغزي   وفهمها إلى ما يريد طلال والمخرج جعل الأمر ينتهي في نجاح  وكذلك سريعًا،  مما أجبر المخرج أن يظهر اعجابة واشادته بها، وحدث نفسه كثيراً أن الفتاة التي أمامه تصلح ل نوعية معينة من الأفلام بما   تملكه من جسد ونظرة ووجه، فقال وهو يلتهم ج-س-د غرام بعينيه٠

-انا كدا ضامن ومتأكد أن العربيات هتتباع بسرعة الصاروخ بعد ما ينزل الاعلان بدقيقة واحدة٠

طلال نظر إلى غرام نظرة تفحص كامل إلى ج_سد_ها وقال:

_مافيش حد بيخليني اتفاءل بنسبة البيع غير لوليتا، جمالها الفتاك وحسنها وأنوثتها اللي تتحط في كفة والعالم كله ف كفة وتطب كفتها هي٠

صفق الجميع إلى غرام، التي تظاهرت  بالتوتر  و هي تقول:

_ميعاد الطيارة٠

طلال اقترب منها وقال:

_كان ودي يكون اكتر من شغل بينا يا بنت حوا، كان ودي العلاقة تكون اقوى من كدا بكتير، تعرفي اني معجب بيك يا ست الكون، واتكلمت عن دا من اول حفلة شفتك فيها٠

رفعت غرام رأسها في سخرية وقالت:

_احنا اتكلمنا قبل كدا وأنا ماليش في جواز الميسار ولا العرفي ، أنا يدوبك الحق ميعاد طيارة  هغير جو هناك مع الماما٠ 

أعقب طلال في لهجة أسف:

_الاربعة اللي ع ذمتي بنات العم، وعار عليا لو طلقت واحدة فيهم، حكم ربك يا بنت الناس ماليش فيه ارادة، بس لو فتشت في القليب مافيش غير لوليتا٠ 

هزت غرام رأسها علامة  الموافقة وتابعت:

_نرضى بحكم الله وتدبيره٠  

وقع طلال الشيك، وأخرج العقد الالماظ وضعه بين يديها، ثم أشار الى السيارة وقال:

_هي ليك، اي مكان تريدي اشحنها ليك فيه راح اشحنها، اؤمري أمر ٠

ابتسمت غرام وتابعت:

_عنوان ساندي مناسب دلوقت العربية تتشحن عليه، لما ارجع من السفر هاخدها٠

استوقف طلال غرام قائلاً:

_طلب اخير يا بنت حوا٠

نظرت له غرام في هدوء وأشارت له بيدها أن يكمل كلامه فتابع:

_لو في اعلان كمان وطلبتك استحلفك برب السما ما ترفضي٠

لم تجب غرام اكتفت بابتسامة ثقة كبيرة، وغادرت مع ساندي، قامت على تغيير ملابسها، ثم قالت وهي تتجه إلى خارج الاستديو:

_باي باي طلال، باي باي لوليتا٠

يتبع