قراءة رواية سلسلة رغبات ممنوعة قصة البحث عن عريس صالح للإنجاب كاملة

تنشر حصريًا على مدونة رواية وحكاية قبل أي منصة أخرى

سلسلة رغبات ممنوعة 

قصة البحث عن عريس صالح للإنجاب  

 رواية جديدة قيد النشر

من قصص و روايات 

الكاتبة خديجة السيد

الفصل الأول

5

تم النشر يوم الجمعة

6/9/2024

أغمضت عينيها بضيق قبل أن تقول بحسرة 

=عاوزاكي تتفقي على ميعاد معاه في مطعم 

شيك على ذوقك عشان انا مش متعوده اسهر بره وما اعرفش مكان مناسب، وما تسالنيش ليه؟!. 

❈-❈-❈

بعد ساعتين في احد المطاعم بالفعل، تطلع شريف لها بنظرات متلاعبة وقال بإعجاب 

= المطعم هنا شكله حلو أوي وغاليه كمان طبعا ما واحده بالجمال ده زيك اكيد حتى الخروجات بتاعتها هتكون في مكان جميل زيها، تعرفي ما صدقتش نفسي لما عرفت انك عاوزه تقابليني.. لسه حلوه وجميله زي ما انتٍ عن اخر مره شفتك فيها 

نظرت إليه بأعين نافره وضيق لكنها تحملت هاتفة بابتسامه زائفة

= و انت بقى اخبارك ايه واخبار الشغل، واتجوزت على كده وعملت اسره وعيله 

هز رأسه برفض وهو يقول بانبهار

= أنا اتجوز برده وانتٍ جنبي! قصدي يعني اللي لازم اتجوزها لازم واحده ما تقلش عن جمالك، ولا رقتك ولا صوتك الناعم ولا..

ردّت نانسي عليه بحزم مفاجئ

= من ساعه ما قعدنا وانت ما قلتش كلمه الا لما تحشر فيها جمالي خلاص عرفت والله اني ست جميله.. وبعدين ما تحسسنيش ما فيش حاجه عاجبك فيا الا اني جميله انما لو ست عاديه ما كنتش بصيتلي .

توتر قليلاً ثم رسم شريف ابتسامة سمجة

=لا ليه بتقولي كده انا بس بعبر عن جمالك عشان دي احلى حاجه فيكي وجذابه! انما انتٍ أكيد شخصيه كويسه وجميله.. معلش بس في السؤال هو انتٍ جايباني هنا عشان تتفقي معايا على شغل ولا المقابله لغرض ثاني 

قبل ان تجيب وضع النادل الطعام امامهم، و سرعان ما عقد حاجيبة بقلق وهو يقول

= هو الاكل مش كتير شويه؟ قصدي يعني اكيد مش هناكل كل ده ولا ممكن نلفه واحنا ماشيين هو ينفع هنا الكلام ده.

نظرت إليه باستغراب بينما هو هتف بحسرة 

=اوبا انا ازاي ما اخذتش بالي من المنيو دي الاسعار فظيعه هنا؟ احم هو انتٍ اللي عازماني مش كده؟ اوعي تقوليلي هنعمل زي بره و كل واحد يدفع حسابه 

اتسعت عيناها واستدارت له هادرة بذهول 

=ده فعلا؟ يعني انت قلت لاما انا اللي عازماك لاما انت تدفع النص وانا النص.. ما شفتكش يعني قلت اختيار ثالث ان انت مثلا عشان الراجل تشيل الحساب كله من باب حتى الكلام 

هز رأسه برفض بسرعه قائلاً ببساطة مستفزة

=لا انا ما قلتش ان انا هدفع النص انا قلت كل واحد يشيل اللي اكله وانا قلت لك اكيد مش هاكل كل ده! وبعدين حتى لو أكلت كله هو الكلام ده بيشبع يبقى ليه ادفع المصاريف دي كلها.. وانا هروح البيت جعان.

تكَّدرت ملامح نانسي بدهشة بينما هو تدمدم بفضول وحماس 

= انتٍ ما قلتليش صحيح انتٍ عاوزاني في شغل ولا المقابله لغرض تاني .

شعرت بكلماته كصفعة على وجهها ولكنها تجاهلته بعزيمة لترد وهي تنهض للرحيل 

=ولا شغل ولا غرض تاني انا قعدت خمس دقائق ومش طايقك فعلا وهبه كان معاها حق لما سميتك شريف اللزقه، انا ماشيه مش عارفه عقلي كان فين لما فكرت في حاجه زي كده 

أسرع الآخر يقول بصوت ملهوف بخوف 

= استني بس انتٍ هتمشي وتسيبيني فعلا انا كده هغسل الصحون؟ قلت لك مش معايا حساب الاكل ده كله وبعدين انتٍ اللي طلبتيه وفي الآخر هتدبسيني فيه هو حد قالك اطلبي بقلب جامد كده.. ما كان كفايه كوبايتين عصير وكل واحد يشيل ثمنها 

التفتت له بهدوء وحافظت نانسي على صلابتها النارية وهي تقول باحتقار 

=هو ده كل اللي همك انت بجد فظيع، ما تخافش انا اللي هشيل الحساب كله.. و الباقي ابقي اطلبه تكويه وانت ماشي تتسلى بي.

❈-❈-❈

في منزل احد الأصدقاء كانت متواجده نانسي على غير العاده مع الجميع، لتقول أحدهم بدهشة 

= بصراحه احنا لحد دلوقتي مش مصدقين ان نانسي بجلالتها قاعده معانا، ده كويس ان انتٍ لسه فاكره زمايلك بتوع الجامعه والشغل اصلا

تنحنحت قبل أن تهز لها إحدى كتفيها وتقول بأسف مرتبك 

= معلش يا جماعه انا اسفه والله بس الشغل كان كتير عليا أوي الفتره اللي فاتت، و انتم بقي عاملين إيه في حياتكم 

ابتسمت الأخري هاتفه بنبرة مهتمة

=لا ده انتٍ فايتك كتير معظمنا لا كلنا اتجوزنا وخلفنا وعملنا أسره وفي اللي طلق واتجوز تاني! واللي سافر مع شريك حياته.. وفي إللي لسه بيدور على نصه التاني او حالياً خاطب انتٍ بقى بالنسبه للمواضيع دي ايه وضعك.

تبدلت أنفاس نانسي بصمت، لتهتف ياسمين التي كانت بجانبها باهتمام 

= عملتي ايه لقيتي عريس ولا لسه سرعي الوقت بيعدي وبعد كده هتلاقي نفسك ضيعتي اخر فرصه برده.

ظهر الانزعاج عليها فسارعت تقول بحده 

=تعرفي تسكتي انتٍ بالذات يا ياسمين عشان بسببك كنت هلبس نفسي تدبيسه مش عارفه كنت هعملها ازاي! ولا يا ستي ما لقيتش حد وبلاش الاستعجال دي عشان هتخليني اخد اي حاجه وبعد كده اندم على اختياري 

هزت رأسها باعتراض وهي تقول بصرامة لها

= طب ما انتٍ فعلا لازم تستعجلي ولا انتٍ بقى فاكره نفسك لسه هتقعدي تقيمي وتستني حد يتقدملك، ورحمه ابوكي بلاش مناخيرك اللي رافعها للسما دي وتقعدي تتامري، لو لقيتي قدامك حد كويس يبقى خلصي على طول، دول ست شهور يا حبيبتي يعني لو ناقصه بس نصهم فخلاص الفرصه ضاعت لأن احنا برده مش عارفين هتحملي في قد ايه بعد الجواز.

تكَّدرت ملامحها لتقول بصوتٍ مثقل 

=خلاص يا ياسمين شفتيني لقيت حد كويس وقلت لا، ما تخافيش ولا بتامر ولا رافعه مناخيره للسما بالعكس ده انا كنت هدبس نفسي في اقل واحد عرفته في حياتي وراضيه بس حتى ده ما نفعش.

صمتت لحظة تفكر فقالت الأخري بمكر

= بقول لك ايه هو انتٍ مش واخده بالك من اللي هناك ده مش بتشبهي عليه؟ ده خالد خطيبك القديم وفي مرحله الطلاق دلوقتي ما تجربي تقربي منه وترجعي الود القديم 

شهقت بصدمة لتدمدم باضطراب مكتوم

= وطي صوتك انتٍ اتهبلتي ده متجوز صاحبتي من ايام الجامعه ازاي ممكن تفكري اني ممكن اعمل حاجه زي كده .

لوت شفتاها باستخفاف وهي تقول بنبرة ساخرة 

=نعم على اساس لما اتخطبتله ما كانتش صاحبتك ولا عارفه انكم مخطوبين ما يعتبر برده خدته منك، سيبك من الحاجات اللي مش بتقدم ولا بتاخر دي هي عملت كده وانتٍ كمان اعملي زيها عادي 

ضغطت على شفتيها وهي تتحدث بصوتٍ مشحون بالغضب والحذر

=ياسمين اسكتي خالص عشان ما ازعلش منك هي لما عملت كده ما كناش مخطوبين يعني ما خدتهوش مني ولا حاجه ولا مفروض لما نسيب بعض خلاص يفضل محجوز ليا! و بعدين حرام دول بينهم اولاد حتى لو اتطلقوا قدامهم اي فرصه يرجعوا لبعض ليه انا ادخل وابوظ الدنيا بينهم، انا مش قليله الاصل وبعدين مش من قله الرجاله يعني اروح اخذ جوز صاحبتي 

هزت الأخري رأسها وهي تردف بتحدي

= وهي ما كانتش قليله الاصل ولا من قله الرجاله لما راحت خدت واحد كانت صاحبتها الانتيم مخطوبه لي، على العموم براحتك انا حاولت اساعد وانتٍ حره وطالما مش من قله الرجاله شوفي حد مناسب بسرعه. 

بهت وجه نانسي وارتجفت شفتاها لكنها زمتهما بقوة كي تربط جأشها ولا تتأثر وأخذت نفسًا عميقًا لتعي أن كل هذا النقاش لا جدوى منه وفتح الماضي الذي جاهدت نفسها على نسيانه لن يفيدها بشيء فقالت لها بشرود 

= تعرفي لما فكرت فيها مع نفسي لقيت ان انا هسيب ثروه كبيره للي هتجوزه وطفل! يبقي ليه ما اختارش اختيار كويس بمزاجي انا وشروطي طالما هحققله حاجات كتير بعد ما اموت .

عقدت حاجيبها للاعلي قليلاً بتعجب وهي تتسائل بغرابة

= مش فاهمه منك حاجه؟ ايه بتفكري تشتري عريس مثلاً! 

هزت رأسها بعدم مبالاة ثم لاحظت شيء لتقول بتعجب 

= هو انتٍ مش مره قلتيلي ان زينب اختك عندها مشاكل في الخلفه واحتمال تطلع ما بتخلفش امال الطفل اللي هي ماسكاه ده جابته منين هي اتعالجت 

أجابت ياسمين مبتسمة بخفوت

= مش بالظبط عملت عمليه حقن مجهري والحمد لله نفعت معاها.

قطبت نانسي حاجبيها وقالت بانتباه 

= حقن مجهري!. 

❈-❈-❈

تغيرت الأحوال عند نانسي توقفت عن الذهاب للعمل وتوقفت عن إهمال نفسها وبدأت في تنفيذ نظام غذائي جديد مجبوره لأجل صحتها..

طبطبت خيرية فوق ذراع نانسي تهمس برجاء

=ما تتصوريش فرحتي قد ايه يا استاذه نانسي لما بقيتي بتطلبي مني اعمل لك الاكل وتاكلي هنا ايوه كده اتغذي واهتم بصحتك بدل ما كل شويه كنتي بتخليني اعمل الاكل وفي الاخر تطلبي مني اخده معايا البيت وتقضيها اكل من بره.. 

رفعت الشوكة لتطعمها بنفسها ففتحت شفتيها  ثم أضافت لها بحنان 

=ما فيش احسن من اكل البيت برده بس انتٍ ليه بتخليني اعمل لك اكل مسلوق؟ هو انتٍ نسيتي اكلي بتاع زمان المسبك والمحمر ولا عشان تحافظي على جسمك زي بنات الأيام دي يا اختي كلي واتخني هو حد واخد منها حاجه .

صمتت نانسي قليلاً لتشرد عينيها للحظات قبل أن تهمس بحزن 

=يااه أول مره أخد بالي أن كان قدامي نعم كتير ما كنتش مقدراها الا لما اتحرمت منها يلا الحمد لله .

استغربت خيرية صمتها المفاجأة وقالت

= مالك يا هانم في حاجه؟!. 

مررت يدها فوق رقبتها تقول بارتباك وهي لا تعرف كيف تعبر عما تريده حقا 

=بقول لك ايه يا خيريه كنت عاوزه اسالك على حاجه؟ هي ممكن الواحده تطلب ايد الراجل؟ ويحصل العكس يعني وهو يوافق 

عادي

عقدت حاجيبها باستغراب مرادفة بعدم فهم 

= هاه! هي عمرها ما حصلت قدامي بس ياما بنسمع الأيام دي حاجات كتير غريبه بتحصل 

حمحمت نانسي وهي تقول بتلعثم

= مش شرط تكوني شفتي بس بتحصل عادي صح ؟!. هو مش حرام هي هتطلب شرع ربنا 

هزت كتفها بعدم مبالاة وقالت بما تعرفة

= اللي اعرفه حسب معلوماتي انها مش حاجه عيب ولا حرام وقبل كده سمعت الشيخ في خطبه الجمعه بيقول لو الراجل مكسوف فعلا يقدم على الخطوه دي ممكن الست اللي تطلبه طالما بتطلب الحلال.. بس حضرتك بتسالي ليه سؤال زي كده؟ اكيد صاحبتك اللي عاوزه كده صح ما هي مستحيل تكون واحده بجمالك ومكانتك دي وتكون انتٍ.. ليه الرجاله اتعمت 

ابتسمت نانسي وشعرت أنها تمدها بمزيد من التفاؤل والطاقة في التفكير في آخر أمل إليها للزواج، ثم أجابت بصوت محرج 

= آآ آه فعلا واحده صاحبتي كانت بتاخد رأيي في الموضوع وانا قلتلها ما اعرفش بس هسال أي حد حواليا 

قالت خيرية بلهجة باترة ورفض واضح 

=قوليلها احنا اتربينا وعشنا ان الراجل هو اللي بيدفع دم قلبه عشان يوصل للست عشان يحس بقيمتها، والاحسن تقعد في بيتها معززه مكرمه وهو اللي يجي لحد عندها 

تكّدرت ملامح نانسي وهي تقول بأسف حقيقي علي حالها 

=يا ريتها سهله كده بس هي ظروفها غير؟!. 

يتبع

إلى حين نشر الفصل الجديد للكاتبة خديجة السيد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة