قراءة رواية بحر ثائر كاملة

تنشر حصريًا على مدونة رواية وحكاية قبل أي منصة أخرى

رواية بحر ثائر

 رواية جديدة قيد النشر

من قصص و روايات 

الكاتبة آية العربي

صعدت الدرج وكادت تدخل لكنها وجدت الباب موصودًا لذا زفرت بتوتر فقد كانت تواربه  ، طرقته وانتظرت لتفتح لها منال التي حدجتها بملامح غاضبة ونطقت موبخة  : 

- إيه اللي جاب الجدع ده لحد هنا  ؟  وتنزلي ليه تقفي معاه في الحارة  ؟ 

نطقت دينا بتلعثم بعدما انكشف أمرها  : 

- هو جه لإني مش بروح الشغل يا ماما  ،  وبعدين هو مش حد غريب يعني ده مديري  . 

اشتعلت عين منال بالغضب وبصقت بانفعال  : 

- لاء مش مديرك يا دينا وكفاية لحد كدة  ،  ده لا شبهنا ولا احنا شبهه  ،  الشغل ده مابقاش يناسبك ومش هتروحي تاني  ،  الجدع ده مش مريح أبدًا  . 

لا تحب هذه التحكمات والأوامر لذا صاحت مستنكرة  : 

- ماما لو سمحتِ بلاش الأسلوب ده  ،  أنا مش صغيرة وهعرف اتصرف  ،  وبعدين فيه في العقد بتاعي شرط جزائي ماينفعش أسيب شغلي فجأة كدة  ،  وحاولت أقدم استقالتي وهو رفض  ،  سبيني أتصرف بنفسي معاه  . 

بصياح مماثل وخوفٍ نهش جدران قلبها نطقت  : 

- لاء يا دينا مش هسيبك تتصرفي بنفسك معاه  ،  ومافيش مرواح على شركته تاني واللي عايزه يعمله  ،  إنتِ هتبعدي عنه وأخوكي لما يرجع هو اللي هيشوف موضوع الشرط الجزائي ده  . 

جاءت بسمة من غرفة داغر على صوتهما وحاولت تهدئة منال المتحفزة فقالت  : 

- خالتو اهدي لو سمحتِ وسيبي دينا تفكر وأنا متأكدة إنها هتتصرف صح  . 

هكذا امتصت غضب دينا المتجلي على ملامحها وامتصت غضب منال التي زفرت تستغفر لتجيبها بلوعة قلب أم  : 

- يا بسمة أنا خايفة عليها  ،  أنا عارفة بنتي كويس هي عاملة فيها بارم ديله وهي بتغرق في شبر مية والجدع الصيني ده مش مريح  ،  ده كإنه استنى لما داغر يسافر وجه  ،  أنا لولا أنه مشي كنت نزلت عرفته قيمته  . 

- صالح جه وكلمه وهو مشي  . 

نطقتها دينا بدفاع عل والدتها تهدأ بعدما لاحظت خوفها عليها لتجيبها منال بحنين يسكن نبرتها  : 

- شوفته  ،  ربنا يباركله  ،  بس بردو أنا مش مأمنة ترجعي على شركته تاني  ،  يابنتي ده واحد مانعرفوش ولا نعرف بيفكر إزاي  ؟ 

عادت بسمة تطمئنها قائلة بتريث  : 

- ماتقلقيش يا خالتو قلتلك  ،  بصي أنا هكلم حد يعرف معلومات أكتر عنه واطمنك  . 

رفعت يديها تردف باستنكار  : 

- لاء  ،  ولا معلومات ولا مخابرات  ،  مادام قلبي مش مرتاحله يبقى الله الغني عنه  . 

هي أيضًا مثلها لذا لم تعترض على كلمات والدتها  ،  نعم تبغض طريقة الأمر والنهي ولكنها باتت ترى أن لوتشو يظهر تسلطًا لا يناسبها إطلاقًا لذا عليها أن تجد حلًا معه  .

❈-❈-❈

جلسا في مواجهة بعضهما على مسرحٍ علوي وأمامهما الكثير من الشباب ينتظران بدء المناظرة  . 

بدأ المقدم يعرفهما ويسرد نبذة عنهما ثم ترك لهما المجال ليتناظرا فبدأ ثائر يشرح وجهة نظره حيث قال  : 

- أنا أرائي مش هجوم ولكن انتقاد على تصرفات وأفعال وعادات كلها غلط  ،  تباهي مفرط بأفعال أجداد ماتوا من زمان  ،  على أرض الواقع التطور والتقدم والعلم والتكنولوجيا من نصيب المجتمع الغربي  ،  الوعي والتجدد الفكري من نصيب المجتمع الغربي  ،  حتى دبي ووضعها الممتاز مش هننكر إنها بأيادي غربية وطبعًا مش تقليل من المجتمع العربي اللي هو أصلًا مبهور بالغرب  ،  طيب ليه ننبهر لما ممكن نفكر ونطور من نفسنا ونكون إحنا اللي ينبهر بينا مش العكس  . 

كان يشرح ويوضح بيديه وتوليه ديما انتباهها  ،  هو محق في كلماته وهذا ما يحدث ولكن هذا نصف حق  ،  يجب أن يعطي كل ذي حقٍ حقه  . 

سلط أنظاره عليها وتابع بنبرة جادة وملامح ثاقبة  : 

- أستاذة ديما شايفة إن التطور الغربي كله لا شيء قدام انحلال الغرب  ،  شايفة إن أخلاق المجتمعات هي اللي بتحدد تطورها  ،  ممكن تكلميني يا أستاذة ديما عن ألة أو وسيلة أو علم اخترعته الأخلاق العربية وقدر يطور العالم  ؟  خلينا نتكلم بوضوح ونبدأ بمثال طبي لإن الطبيب هو أهم رمز بالنسبالي  زي ويليام هارفي الباحث في دورات الدم وزي سيرفيتوس واللي بسببهم تطور الطب لحد ما وصلنا للحظة دي  . 

نظرت له بدهشة  ،  لقد أخبرته ألا يتهاون معها فلم يفعل هذا  ؟  من المؤكد أن بعض الشباب هنا يعرفون الرد مثلها ولكنها زفرت تجيبه بثبات  : 

- واضح إن حتى الكتب اللي حضرتك بتقرأها كتب غربية بس  ،  لإن لو كنت بتقرأ كتب علمية عربية كنت عرفت إن اللي اكتشف الدورة الدموية الصغرى هو العالم العربي ابن النفيس  ،  وسجلها بنفسه في كتاب ليه اسمه شرح تشريح القانون واللي اختفى لقرون وبعد كدة نسبت وهم للباحث ويليام هارفي اللي قولت عليه بس لإن لازم الحق يترد لأهله ظهر الدكتور المصري محي الدين الطهطاوي وصحح المعلومة وقال إن المكتشف الحقيقي هو ابن النفيس وده بعد ما اكتشف مخطوطة باسمه في مكتبة برلين  . 

ابتسم ساخرًا وتساءل بشكٍ ظاهري  : 

- المعلومة دي مش جديدة عليا  ،  بس إيه دليلك وليه ممكن أصدق إن تم تزوير معلومة زي دي وماصدقش إن كمان تم تزوير اكتشافات ويليام هارفي وسيرفيتوس  ؟ 

استفاضت توضح ما لديها وتجيبه بثقة  : 

- هو ده بالضبط اللي شككوا فيه أستاذه الدكتور المصري محي الدين الطهطاوي لإنهم كانوا غربيين وعلشان كدة استعانوا بالباحث والمستشرق الألماني مايار هوف واللي وقتها كان مقيم في القاهرة وكتب تقرير وقتها إنه ذُهل من تحريف كتاب ابن النفيس من خلال سيرفتوس واللي أصلًا باحث ديني مش طبيب  وهتلاقي ده مذكور في أواخر كتاب تاريخ العلم لجورج ساردون وده طبعًا بعد ما مايار هوف بلغه بالحقيقة  . 

أومأ مرارًا يدعي التفاجؤ لذا نطق يعترف بالخطأ ويراوغ أيضًا  : 

- يمكن بحثي في الموضوع ده مكانش مكتمل بس لإن دي مش المعلومة الوحيدة اللي كان فيها شك بالنسبالي  ،  ومش معنى إن الاكتشاف ده طلع أصله عربي إن باقي الاكتشافات كمان زيه  ،  خلينا نروح لمثال تاني زي قانون الحركة اللي اكتشفه إسحاق نيوتن وبلاش تقولي إنها غلطة لإن تفاحته خير دليل  . 

قالها ساخرًا لتبتسم وتجيبه بثبات  : 

- طبعاً هقول لإن مكتشف قانون الحركة هما عالمين مسلمين ابن سينا وهبة الله ابن ملك وده بردو موجود في مراجع من قرون  ،  بس مش ده المهم دلوقتي يا أستاذ ثائر  ،  المهم هي أمانة المسلمين في الحقوق الفكرية لأصحابها  ،  يعني على مدار سنين مافيش مرة واحدة ذكر إن عالم عربي سرق أو نسب اكتشاف لنفسه وثبت بعد كدة العكس  ، دايمًا بيعترفوا وبينسبوا أي اكتشاف غربي لأهله  ،  ودي في حد ذاتها أمانة فكرية وخُلق بيفتقده المجتمع الغربي  ،  وهو نفسه اللي شايف إن بلد عربي على أرض عربية زي دبي هو السبب في تطورها ده  ، ، ويمكن أنا وجهة نظري في التطور مختلفة شوية  ،  يعني مش شوية مباني هما دليلي للتطور   ، التكنولوجيا نفسها مؤذية للموارد البشرية  ، الذكاء الصناعي علميًا قاتل للطبيعة   ،  التطور عندي في صحة وتعليم الانسان  ،  في نشر الأمانة والمحبة والسلام بين الناس  ،  التطور بالنسبالي هو قلوبنا على بعض ومحبتنا لبعض  ،  التطور هو الاستمتاع بالطبيعة وجمالها وألوانها اللي بتتمثل في النبات والأنهار وغيرها مش خلق طبيعة صناعية وإرغامنا على رؤيتها ومحاولة زرع وهم جوة عقولنا إن الجمال كله هو جمال لمعة مباني بدون روح ،  حلو إن يكون فيه تطور مرئي بس الأهم هو التطور الأخلاقي  ،  وده بالنسبالي لو حصل هيبقى منتهى السلام مش زي ما بنشوف حوالينا دلوقتي  ، للأسف . 

صفق الجمهور لها  ،  لامست كلماتها قلوبهم قبل العقول وجلس يحدق فيها بفخرٍ استشفته فطالعته بعتاب  ،  هذا ليس عدلًا  ،  يجب أن تكون المناظرة نزيهة  . 

ليتخذ من عتابها محاولة في طرح أسئلة أخرى فتجيبه بأجوبة تثبت مدى علمها وتطلعها وبالفعل كان بينهما تضاد يحمل انسجامًا من نوعٍ خاص أحبه الجمهور كثيرًا ليخرجا من المناظرة بنجاح لكليمهما

هي نجحت في إيصال وجهة نظرها وهو نجح في إعطاء هويتها حقها  . 

❈-❈-❈

انتهت المناظرة واتجها سويًا حيث المطعم المتصل بالمبنى الذي كانا فيه ليتناولا غدائهما  . 

جلست أمامه تتطلع على قائمة الطعام واختارت طلبها تبلغه للنادل وفعل ثائر كذلك ليرحل ويتركهما  . 

أمعنت النظر فيه ثم تحدثت بعتابٍ لم يزُل  : 

- طلبت منك تكون رسمي معايا وبردو تهاونت  ،  ليه كدة  ؟ 

ادعى الجدية يجيبها  : 

- لاء بالعكس أنا كنت رسمي  ،  وفعلًا المعلومة اللي ضيفتيها في المناظرة فاتتني  . 

بشكٍ صريح باغتته ليسبل جفنيه عنها ثم ابتسم حيث لم يعد يجيد الكذب عليها لذا تساءل بملامح منتعشة  : 

- معقول بقيتي قرياني بوضوح كدة  ؟ 

أومأت تجيبه بثقة  : 

- ده اللي حصل  . 

ابتسم وحدق بها بثقب لينطق بنبرة هامسة تحمل مشاعر قوية وجرأة مستترة ولغة فرنسية  : 

- أعدكِ أنني عما قريب سأناظركِ مناظرة قوية سأكون أنا الفائز فيها ومع ذلك لن تخرجي خاسرة منها أبدًا بل مستمتعة  . 

وترها كليًا فباتت تجلس أمامه كمن تم تجريدها من ثيابها وأرادت أن تركض أو وتهرب من نظراته التي أزاحها عنها ليرحم خجلها بعدما فهمت كلماته  . 

وليته لم يزح نظراته عنها  ،  ليته ظل يطالعها حيث أنه وجد أمامه آخر شخصٍ يود رؤيته  ، سها زوجة شقيقه التي دلفت المطعم تخطو بغرور يلازمها وقد تسلطت عينيها عليها لتتجمد مكانها وتظل كما هي تحدق به ولا تصدق أنه أمامها الآن  ،  بملامحه الوسيمة التي زادت هيبة وجمودًا  . 

لاحظت ديما تجهم ملامحه ورأت في بؤبؤي عينيه نظرة غضبٍ مستترة لذا قطبت جبينها بتعجب والتفتت تنظر نحو الباب لترى سيدة تقف تحدق به بنظراتٍ قوية واضحة ولحظات حتى ظهر رجلًا يجاورها ويتعجب من جمودها لذا لفت وجهها تعود إلى ثائر الذي تبدلت نظرة غضبه إلى حنينٍ صريح يكاد ينهمر من مقلتيه أمام الجميع حينما رأى شقيقه  . 

تراقصت نبضات قلبه  ،  تمناها وتحققت  ،  تمنى رؤيته وها هو أمامه بعد سنوات من الفراق والخصام ولكن  ... 

نظر أحمد أمامه ليصطدم بوجه أخيه لذا تجمد هو الآخر يحدق به بعدم تصديق  ،  اثنا عشر عامًا لم يرَه والآن يجلس أمامه  ؟ 

الحنين له كان قويًا جعله ينسى كل ما حدث وكاد أن يذهب إليه ويعانقه عناقًا يشبع به اشتياقه خاصةً وأنه رأى الاستجابة في عيني ثائر الذي حاول أن يقف ويستقبله ولكن أتت كلمة سها هادمة لكل خططهما حيث قالت بنبرة ذاهلة   : 

- ثائر  ؟ 

كلمتها هذه كانت كفيلة لتشعل داخل قلب أحمد موقد الذكريات فألهبت قلبه مجددًا لذا لف نظره لها وأردف بملامح متجهمة حزينة  : 

- يالا نمشي  . 

سحبها على الفور وغادرا المكان وارتد قلب ثائر عائدًا بخيبته بعدما كاد أن يحلق نحو شقيقه  ،  حدث كل هذا أمام عيني ديما التي استشفت هوية هذا الرجل من خلال ملامح ثائر لذا تساءلت  : 

- ده أحمد اخوك  ؟ 

نظر يشتكي لها ألمه في لحظة ضعفٍ مرت عليه قبل أن يومئ ويلف وجهه عنها يحاول أن يعود لثباته وجموده  ،  ازدرد ريقه وتحمحم ينظر في كل الاتجاهات عدا عينيها ولولا الآتي بعد قليل لكان نهض وغادر يختلي بنفسه في غرفته حتى لا يراه أحدٌ بهذا الضعف حتى لو كانت هي  . 

هي التي لا تمتلك سوى عناقًا ليتها تستطيع مواساته به ولكن يستحيل فعلها لذا شعرت بالضيق من أجله  ،  ضيقًا هاجمها كوحشٍ كاسر فجعلها تتلوى بين نيران قلبه لذا نطقت  : 

- هتتصالحوا  . 

الثقة التي نطقتها بها جعلته يسألها بعينيه عن الموعد كأنه اشتاق لذلك فأومأت له بذات الثقة تتابع  : 

- هتتصالحوا قريب جدًا  ،  نظراته عليك هي اللي قالت مش أنا  . 

أومأ لها بثبات ولكنه لم يرد التحدث الآن لذا رفع يده ينظر في ساعته ليرى الوقت ثم زفر وأمسك هاتفه ينوي إرسال رسالة قطعها دخول شخصٍ آخر من باب المطعم ليشير لها بأنظاره قائلًا  : 

- بصي مين جه  . 

التفتت لترى قبل أن تتوسع حدقتيها بذهول وهي ترى أمامها شقيقها داغر لذا هبت واقفة تصرخ باسمه بعدم تصديق قبل أن تركض نحوه وتعانقه بقوة واشتياق لم تستطع منعهما ليجلس كما هو يحدق بهما ويرى فرحتها التي كانت كفيلة لتنتشل حزنه منه  . 

إنه يحبها بطريقة تجعله يفضل سعادتها على حزنه  .

يتبع...

إلى حين نشر الفصل الجديد للكاتبة آية العربي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة