قراءة رواية نجمة أركان الجزء الرابع من رواية فرعون كاملة

تنشر حصريًا على مدونة رواية وحكاية قبل أي منصة أخرى

قراءة رواية نجمة أركان

الجزء الرابع من رواية فرعون

 رواية جديدة قيد النشر

من روايات وقصص 

الكاتبة ريناد يوسف

تم النشر يوم الأربعاء

2/4/2025

اقتباس 5

مؤمن :

نواره يبتى قومى عشان تاكليلك لقمه هتموتى اكده وانتى نفسه متتحمليشى ...عيشه ..ياعيشه هاتى الوكل لنواره انى هوكلها بيدى ..

عيشه :اهو الوكل اهه كذا مره احميه احطه قدامها واشيله على حطته لما الفروجه قددت ونشفت من الحمايه والبريد كل هبابه واني تعبت

مؤمن :له هاتى انى هوكلها وهتاكل من يدى عشان انى ابوها حبيبها وهى مهتقوليشى له. 

مسك الاكل وقربه من نواره بته اللى كانت قاعده وحاطه اديها على دماغها ودموعها نازله بقهر واول ماقرب ايده منها زاحت ايده بكل قوتها. 

مؤمن:

-وه يانواره عتنشكى يدى اكده ليه؟ متستهدى بالله يابتى امال !

نواره :وليك عين تجيب سيرة ربنا على لسانك !تعرف ربنا منين انت؟ تعرفه كيف وانتا رضيتلى ورضيت علي انك تبيعى ولدى من قبل حتى مايتولد؟ تعرفه منين وانت اعتبرتنى بقره اخلف واولد وعيلى اللى اولده ياخدوه منى ويحرمونى منه ويرمونى رمية الكلاب. 

اني كل دقيقه عشكيك لربنا اللى عتجيب سيرته ديه على لسانك واوبقي شوف هيعمل فيك ايه على حالى ديه

 عشكيله قهرة قلبي ونارى ...عشكيله وجع صدرى اللى متحشك بلبن ولدى اتحرم منه ولا داق طعم لبن امه ولا شرب حنانها ..عشكيله وجع شهور حبلى وولادتى وقومتى فالاخر بحجري فاضى من غير عيلى، كيف البحه المخربه اللى رقدت على بيض خربان وخلصت رقادها عالفاضى. عشكيك في كل دقيقه يابوى وربنا هياخدلى حقى منك ومن وفقي

مؤمن :والله يابتى مكنت اعرف انه هياخد عيلك بعد ماتولدى وهيحرمك منيه ..والله مكنت اعرفه هيعمل اكده، كنت عامله بعد ماتخلفيله الواد 

هتاكلى عقله ، كنت عامله لما يشوفك حلوه وصغيره ونغشه هيرمي القديمه وهيبقى عليكى انتي بس وكل خيره هيكون فحجرك وتحت رجلك. 

نواره بقهر:

انى معاوزاشى خير فحجرى ..انى عايزه ولدى بس فحجرى ومعاوزاشى اى حاجه تانيه من الدنيا. هاتلى ولدى يابوى ...هاتلى ولدى من وفقى احب على يدك. 

مؤمن بضعف:

اجيلهولك كيف بس يانواره وهو منبه على رجالته لاانى ولا انتى نهوبو ناحية السرايه بتاعته واللى يهوب يطـ. ـخوه طوالى، اجيبهولك كيف بس كيف؟ 

نواره بقهر:

مليش صالح اتصرف وهاتلي ولدي، هاتلي ولدددااااااي. 

❈-❈-❈

ناديه رجعت من الشركه ودخلت الفيلا واترمت على الكنبه بتعب:

داده، ياداده ..

الداده جاتلها جرى :حمداله عالسلامه ياهانم 

ناديه :الله يسلمك البنات فين امال ؟

الداده: خرجو هما وجدتهم يتمشو ويفسحوها عشان قالتلهم زهقانه ...

ناديه :ياحبيبتى ياماما اكيد زهقت من القعده لوحدها مع انى بتحايل عليها من فتره تروح تزور ماما مع البنات او تروح لعمتو جميله اللى بتحبها مش راضيه 

عموما روحى انتى حضريلى الحمام ياداده وانا جايه وراكى. 

وطلعت تليفونها كلمت البنات منار ومى اطمنت عليهم وعلى جدتهم، وطمنوها انهم بيتمشو ومبعدوش كتير عن الفيلا. 

وبعدها اتصلت بيمان اللى رد عليها ومفيش ثوانى وشافته داخل من باب الفيلا وهو بيكلمها عالتليفون:

ناديه بعدت التليفون عن ودنها وردت عليه:

حبيبي انتا هنا ! مش قولت هتقضى النهار فى الفيلا مع بابا وقاسم ؟

يمان :ابوكى طردنى 

ناديه :يبقا عملت مصيبه ونكدت عليه ودايقتوه زى كل مره انت وقاسم. 

يمان قرب منها وقعد على حرف الكرسى وباس دماغها ...ظلمانى اوى انتى ودايما تيجى عليا من غير سبب زى ابوكى بالظبط. فين ماما والبنات؟

ناديه :اخدوها وخرجو يفسحوها بيقولو زهقانه ومدايقه. 

يمان اتنهد بتعب:

هى مش زهقانه حبيبتى هى من يوم موت بابا وهى حاسه بالوحده، وبرغم اننا كلنا حواليها الا ان الاحساس دا ملازمها طول الوقت انا حاسس بيها. 

ناديه:

بصراحه معذوره يايمان صعبه اوى على الوحده لماتخسر شريك حياتها وعشرة عمرها وصاحبها وكل حاجه ليها فى الدنيا ...اكيد من بعده هتشوف الدنيا كلها فاضيه ومفهاش اى حاجه تستاهل. وبالذات لو كانوا بيحبو بعض اوى زى طنط وعمو الله يرحمه. 

عشان كده كل يوم وانا شايفه حالتها قدامى بدعى ربنا يجعل يومى قبل يومك ومعيش الاحساس دا ابداااا.

يمان :انانيه اوى انتى ياناديه. بتدعى لنفسك بالراحه وعايزانى اتعب انا؟ بتدعى لنفسك تموتى عشان متحسيش بالوحده وعايزه تسيبينى انا فيها؟ 

عموما ياروحى دى اعمار ومحدش عارف عمره بينتهى امتا. 

ها قومى بقا غدينى هموت من الجوع مأكلتش ومن الصبح على لحم بطنى، طلعت من عند باباكى عالقسم وخلصت شوية شغل مهمين ولسه جاي قووووومى 

ناديه بسربعه:

حاضر حاضر قومت اهو.. يالهوى عليك لما تكون جعان بتبقا عاوز تاكل بنى آدمين قدامك. 

نادر: ولو اتأخرتي هتكوني اول البني آدمين اللي هيتاكلوا. 

❈-❈-❈

كامل قاعد فى الشقه وبيزاكر لبنته ورحاب دخلت من الباب بعد يوم مرهق من التدريس. 

رحاب :السلام عليكم 

كامل :وعليكم السلام ورحمة من الله وبركاته ...هاقد حل رحاب قلبي ورُحبتهِ وانار الكون بطلتهِ

رحاب ابتسمت ودخلت باست كامل من خده بكل حب، وباست زينب بنتها وهى بتقعد جمبهم على السفره وبتاخد نفس وتطلعه براحه وقالتلهم وهي بتقلع نقابها:

متعرفوش انا بعد الساعات ازاى وانا بره البيت عشان ارجع اقعد وسطكم هنا. بصراحه انا مبرتحش غير فبيتى، وطول منا براه بحس انى سمكه بره ميه ومش بقدر آخد نفسى غير لما ارجع. 

كامل : لقد أخبرتك الاف المرات يارحاب أن تتركي عملك واطلعي معاش مبكر، ويكفي علينا راتبي ومعاشك وما نجنيه من نقود الطبخ. وتجلسي في بيتك معززة مكرمه، يكفيكي يابنت الاصول لقد قدتي معى سفينتنا دون تقصير وها هي بفضلك وصلت بنا جميعاً لبر الامان. 

رحاب:

فكر فعلا اني اعمل معاش مبكر ياكامل، بس مش عشان اقعد، لأ عشان اتفرغ لمشروع الاكل ونفتح مطعم ونوسع شغلنا، ونشتغل فيه انا وانت والعيال فى اوقات فراغهم  واجازتهم. 

كامل :

لا اجلى هذه الفكره  بعد ان يتخرج معاز، كي يتفرغ للمطعم بالكامل ويديره هو ويكون مصدر رزقه ولقمة عيشه.. اتركي كل شيئ ياتي في اوانه المناسب. 

رحاب هزت دماغها بتفهم وبدون نقاش وقامت:

خلاص اللى تشوفه ياكمولتى، هقوم انا اغير واحضر الغدا على مايكون معاز رجع من الكليه بتاعته.

وقامت بالفعل وراحت على الأوضه وكامل مراقب خطواتها زي عادته بعيون ماليها الحب وقلب بينبض بعشقها مع كل نبضه. 

عمرو وسيلين رجعو الفيلا بتاعتهم بعد غداء العمل اللى كانو فيه مع نادر وناديه ولقو سيليا واولادها قاعدين فالفيلا ...

عمرو لسيليا :ايه هو انتى كل يوم عندنا انتى وعيالك ملكمش بيت؟

شريف :ولددد كله الا سيليا ادينى بقولك اهو. تزعلها ممكن اطردك انت ومراتك وعيالك برا الفيلا. دي حبيبة قلبي دى. 

عمرو:

والله انا مش عارف عاملالك ايه سيليا للحب اللى بتحبهولها دا كله؟ 

شريف:

بتفهمنى ..ودمها خفيف وبتضحكنى، واهم من دا كله هى اللى كانت السبب الاكبر انى اتجوز سمسمتى. 

عمرو:

اهو هنا مربط الفرس مش تقول بحبها وبتحبنى وبتضحكنى وكلام فاضي، هى كل حاجه من طرف سمسمه لازم شريف يعشقها. 

سيلين :

لا ياحبيبي مش صحيح، منا اهو من طرفها لكن عمرى مااوصل عند عمو شريف لمكانة سيليا ابدا، هى حظوظ يبنى مش اكتر. 

سيليا :

يالهوووى عالقر حاسدينى حتى على شوية الحب اللى الراجل بيحبهملى يادى النيله! 

وهنا نادر اتكلم وهو داخل يقعد جمبهم:

وياترى مين الراجل اللى بيحب مراتى دا ممكن اعرفه؟

سيليا:

دا عشيق سرى لو قتلتنى مش هقولك اسمه. 

سميه :ايوه جننيلي ابني.. دا عمها شريف ياحبيبى متصدقش

نادر:

اهو انا مبخفش غير من عمها شريف ونحنحته اللى كل ماتيجى هنا وتشوفها تروح تبقا عايزه تولع فيا وفالبيت والعيال  بسببهم. 

قومى ياست انتى وعيالك هنروح ومتجيش هنا تانى بقولك قدامهم كلهم اهو. قال عشيق سرى قال !

شريف:

دنا كنت اقـ. ـتلك لو منعت عنى سيليا ومنعتها تجينى 

سيليا:

والله ولا يقدر ولا الدنيا كلها تقدر تمنعنى عنك ياأغلى واحلى اونكل شريف فالدنيا. بس فعلا دلوقتي لازم نستأذن عشان يادوبك نروح. 

يلا يانادر ياحبيبي وكمان عشان تقولى عملتو ايه فى الاجتماع ووصلتو لفين ..

وفعلا سيليا ونادر اخدو اولادهم وروحو وهما فالطريق ابتدا نادر يحكيلها عن تفاصيل المقابله واسفرت عن ايه زى مااتعود من ايام ماكانت تشتغل معاه فى الشركه فى بداية دخول شريف وخاله عامر معاهم شراكه بكل فلوسهم، وكبروها والكل اشتغل فيها كفريق واحد نادر وسيليا وسيلين وعمرو وناديه، تحت اشراف ماهر وشريف وعامر اهرام البيزنس في الشرق الاوسط، لغاية ماكبروها وخلوها اكبر شركة  مقاولات واعمال بناء وتشطيبات وديزاين فالشرق الاوسط. 

لكن سيليا فى مرحله قررت انها تسيب الشغل وتتفرغ لاولادها ونفسها ونادر، 

وكفايه ان  نادر يشتغل في الشركه، 

وقرارها دا لقى قبول كبير من نادر اللى كان مبسوط جدا لتفرغها الكامل ليه، 

وخصوصا بعد مارجعت عيشته من تانى فى الدلع والدلال اللى كانت مغرقاه فيهم فأول سنين جوازهم، وبعدها اتحرم منهم بسبب الشغل والخلفه والعيال والمسئوليات اللى اتراكمت على سيليا. 

نادر خلص كلامه ...سيليا ..حلو اوى ده يعنى كده الشركه هيتفتح قدامها آفاق جديده فبلد جديده ...طب ايه رأيك لو نعمل فرع للشركه هناك فالبلد دى ؟

نادر :فرع يعنى سفر ، يعنى روح وجى، وطبعا الكل هيشيل ايده من الحكايه دى ومحدش غيرى هيتورط فيها، وانا بصراحه عندى عقده قديمه من السفر ولا يمكن هتنطط وانا فالسن دا. 

بأذن الله الفروع الجديده دى يبقا يفتحها شباب العيله بعد مايتخرجو. 

سيليا :

عندك حق فى دى، وخصوصا انى انا كمان مش هسمحلك انك تضيع باقى عمرك فى السفر والتنطيط، وتبعد عنى وانا مصدقت اننا نسرق من الدنيا شوية وقت نقضيه مع بعض. 

نادر مسك ايدها وباسها واتكلم بهمس:

منا بقولك كده برضو. 

جمال واخوه الصغير صاحب ال١٥ سنه قاعدين ورا فى العربيه وجمال اتنحنح:

احمممم نحن هنا فى حال لو كنتوا نسيتو يعنى .

نادر بصله بطرف عينه: 

لا ياحبيبى مش ناسيين ...ننسى ازاى عفريت العلبه بتاع حياتنا هو واخوه العفريت الصغير ؟

مارو:

اهو لازم سيرة اخوه تتجاب فوسط اى شتيمه او اى حاجه من غير مايعمل حاجه، اهم حاجه ان جمال ميتشتمش لوحده. والله انا مظلوم ظلم محدش اتظلمه قبل كده فى العيله دى !

سيليا :لأ وانت بصراحه ملاك نازل من السما يامارو ياحبيبي، عمرك مابتعمل حاجه تزعل او تستاهل تتشتم عليها ابدااا ..

نادر:اه فعلا بأمارة امبارح ...اتكلم ولا مفيش داعى ؟

ماهر بأحراج من ابوه:

لأ بلاش .

نادر :منا بقول كده برضو. 

جمال ميل على اخوه وحضن دماغه تحت باطه وسأله بهمس:

عملت ايه امبارح من ورايا ياواطى؟ 

ماهر بهمس:

هات ٢٠٠ جنيه واقولك 

جمال سابه:مش عايز اعرف ال٢٠٠ جنيه احسن منك ..

ماهر:

ماشى خليك فاكر كلامك دا عشان بتحتاجلى كتير انت، وخصوصا وانت معاقب من بابا بتيجى تتمحلس وتتمسح وتطلب مني فلوس زي الشحات. 

جمال:

يعنى انتا معاقب دلوقتى ؟

ماهر :من امبارح وحياتك والنهارده متفق مع اصحابى نروح نلعب بلياردو واليوم النهارده على حسابى ومش عارف اعمل ايه؟

جمال:لأ خلاص مادام متفق مع اصحابك هتطلع عيل قدامهم يعني؟ خد ٤٠٠ اهم كل اللى معايا.. وطلعله الفلوس واداهاله من تحت لتحت. 

ماهر :اشطا ...يعيش جيمى احلى اخ فالدنيا. 

جمال: طيب مش هتقولي عملت ايه خلى بابا يعاقبك؟ 

جمال: اخدت العربيه بتاعة ماما وخرجت اتفسحت بيها انا واصحابي من وراهم وبابا قفشني، او حد بلغه او عرف مكاني ازاي معرفش، فجأة لقيته فوق دماغي. 

مارو بضحكه: الجي بي اس ياحماااار. 

سيليا:

اتودوتوا مع بعض يبقا هتعملو مصيبه جديده ..ربنا يستر .

نادر :طب خليهم بس يعملو حاجه وانا اعلقهم من رجليهم هما الاتنين على باب الفيلا عشان زهقت منهم وجبت آخرى. 

الاتنين بصو لبعض وابتسموا، ونادر بصلهم وابتسم ودارى ابتسامته لانه برغم انه بيدايق من مصايبهم اللى مبتنتهيش، الا انه حابب جدا قربهم من بعض، وحبهم وخوفهم على بعض وعلاقة الصداقه اللى بينهم، برغم ان ماهر اصغر من جمال بحوالى ٣ سنين، الا ان فرق السن مابينهم مش مأثر على اندماجهم مع بعض ولا تفاهمهم. 

بيفكروه بحبه هو وغريب لبعض وبالذات ماهر ابنه اللى معجب اوى بعمه غريب ومتأثر بيه لدرجه كبيره، 

وحتى نادر حاسس ان ماهر واخد من غريب كتير، وعشان كده بيعشقه. 

❈-❈-❈

نجمه بغضب:

وانت مالك يابنى آدم انت حد كان طلب رأيك فالموضوع ؟

اركان :

مله اما تكسر سنانك ...يعنى ايه ياهانم عايزه تروحى فيلا شاب غريب لوحدك؟ وكمان ساكن لوحده ومعهوش حد، انتى اتهبلتى يبت انتى ولا ايه ؟

نجمه :

اولا الشاب اللى انت بتتكلم عليه دا دكتور جامعى اد الدنيا ومحترم  ولازم لما تتكلم عليه تتكلم باحترام ...ثانيا بقا هقولهالك للمره المليون انتا مااااالك ؟

اركان: دكتور على نفسه. 

ليل:

على فكره اركان الحق معاه، وصوح انتى مينفعشى تروحى  لراجل بيته وساكن لحاله يانجمه. 

ولا ايه رأيك ياغريب ؟

اركان قام وقف على حيله وخبط أديه الاتنين فبعض...الله دى هتسألى عمى غريب! 

غريب :

اقعد يلا وبطل تنطيط زى القرد كده. 

وبص لنجمه واتكلم بهدوء وهو بيمسكها من ايدها يقعدها جنبه:

هو على فكره اركان ومامتك معاهم حق يانجمتى المرادي، مينفعش فعلا تروحى للدكتور بتاعك بيته لوحدك، يأما تاخدى حد من زمايلك معاكى يأما.. 

وهنا اتكلم اركان قبل ماغريب يكمل:

ولا مع حد من اصحابها ينفع. 

غريب :خلينى اكمل كلامى ياحيوان. 

ووجه كلامه لنجمه مره تانيه:

-يأما اركان يروح معاكى طالما هما كام مره بس اللى محتاجه تروحيهم هناك. 

اركان قعد بارتياح بعد ماسمع الجمله دى بعد ماكان بركان مشتعل همد مره وحده، لكن اللى اخدت مكانه فى الاشتعال هى نجمه اللى وقفت  وابتدت تتنطط وهى بترد على باباها:

ليه ليه اركان ليه ليه؟ 

غريب :عشان هو اكتر حد هآمن عليكى وهو موجود حواليكي، وبعدين عشان مفيش غيره.. تاكدى لو انا فاضى او اخوكى كان موجود كان حد مننا اكيد هيروح معاكى. 

نجمه :ماما تروح معايا. 

غريب:امك تعبانه بقالها كام يوم وبتشتكى من ضهرها قدامك ومش هتستحمل خروج ومشى، اذا كان هنا فالفيلا مبتستحملش تقف كام دقيقه على بعض. 

نجمه ابتدت تخبط برجليها فالارض بغيظ 

اركان :يارب تتلبسى. 

غريب :انشاله انت وابوك بعد الشر عن بنتى. 

وبعدين تعالا هنا صحيح انت ايه اللى جابك هنا تانى انا مش طردتك وقولتلك متجيش البيت عندى مره تانيه؟

اركان:

ايه متجيش البيت عندك تانى دى واروح فين يعني؟

غريب خبط اديه فبعض:

يبنى هو انت مش ليك اهل تروحلهم ! مش عندكو بيت تروح تقعد فيه؟

اركان:

لأ انا بحب هنا ومش ماشى من هنا ..اللى مش مريحه وجودى يمشى هو .

غريب هز دماغه بغلب:

وربنا نفس غتاتة ابوك. صحيح اللى خلف مماتش. شوف نجمه هتروح امتا وظبط مواعيدك معاها. 

اركان :اعتبرها متظبطه 

نجمه اتأفأفت واتحركت من  قدامهم بسرعه على اوضتها فوق وهى بتبرطم بكل شتايم الارض على اركان وتحكمه فيها، ومحاولة فرض سيطرته عليها بدون وجه حق زى ماهى فاهمه. 

وبرغم انه فيما مضى كان اقرب حد ليها فالدنيا ...الا انهم كل مايكبرو وتشوف تحكمه فحياتها تتدايق وتنفر منه لدرجه عدت الاعتراض وقربت على الكره. 

وللحكايه بقيه فى جزء رابع بأذن الله نلقى فيه الضوء على حياة من يستحق القاء الضوء عليه من ابطالنا واولادهم وسنتجاهل البعض الاخر ممن تسير حياتهم بصوره مثاليه ورتم هادئ ...

سنطلق العنان لجيل جديد ليخبرنا ماهو الحب من وجهة نظره ..هل الحب لايزال هو نفسه ام اختلف بأختلاف الزمان وتغير الاجيال. 

...يتبع

إلى حين نشر الفصل الجديد للكاتبة ريناد يوسف، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة