رواية جديدة نجمة أركان الجزء الرابع من سلسلة فرعون مكتملة لريناد يوسف - اقتباس 2 - الأربعاء 2/4/2025
قراءة رواية نجمة أركان الجزء الرابع من رواية فرعون كاملة
تنشر حصريًا على مدونة رواية وحكاية قبل أي منصة أخرى
قراءة رواية نجمة أركان
الجزء الرابع من رواية فرعون
رواية جديدة قيد النشر
من روايات وقصص
الكاتبة ريناد يوسف
تم النشر يوم الأربعاء
2/4/2025
اقتباس 2
فى احدى اقسام البوليص بمدينة نصر .
يمان وقف وراح بفرحه على اللي دخل مكتبه حالاً وقاله بترحيب شديد:
اللوا قاسم باشا العو كله منور مكتبى دا ايه الشرف الكبير دا؟!
قاسم بلهفه :فين اركان ابنى يايمان ودتوه فين انت ونسيبك فرعون ؟
يمان :اركان ! هنكون وديناه فين يعنى ؟ انا آخر مره شفته فيها كانت اول امبارح ففيلا فرعون باشا، هو ايه اللى حصل !
قاسم:
فرعون بتاعك بعتله قوه وقبض عليه امبارح من الكليه بتاعه وفوسط زمايله ومن ساعتها محدش شافه. قولولى فين ابنى لأوديكم فستين داهيه انت وغريب. اركان العو يتقبض عليه لييييه.. ايه السبب ؟
وهنا غريب دخل المكتب زى الاعصار وقلع نضارته واخد قاسم كتف وهو داخل وقعد على المكتب قدام قاسم واتكلم بكل برود ...اقولك انا ايه السبب ،عشان يمان لايعرف انا قبضت على اركان ليه ولا هو فين، ولا حد يعرف.
وابتدا يحكى لقاسم ...
وبعد ماخلص قاسم قام منتور ومسك ورقه وقلم من على مكتب غريب وكتب حاجه وبعدها مضى عليها ومد ايده بيها لغريب..
اتفضل ياباشا.
مسكها غريب ولقى مضمونها:
اقر انا قاسم عبد السلام العو بأنى ابتداء من اليوم الموافق ../../.... قررت التخلى عن ابوة المدعو اركان قاسم العو وقطع صلة القرابه اللي تربطنا ببعض، وتجريده من لقب الاب والعائله، الامضاء.. اللواء قاسم العوو.
غريب مسك الورقه من ايد قاسم وابتدا قرايه فيها وقاسم فالاثناء دى قام وابتدا يقفل زرار بدلته ويعدل الكرافات بتاعته وهو بيتكلم:
احمم .طيب انا ماشى حد عايز مني حاجه؟
واتحرك بسرعه وساب غريب فالمكتب شايط من الغضب ويمان قاعد بيترقب اى رد فعل من الفرعون يقدر يفهم منها ايه اللي بيجرا بالظبط؟!
اما قاسم فاروح البيت بعد ماعدى على مكتبه وخلص شوية شغل ومضى على شوية اوراق،
واول مادخل الشقه جواهر جريت عليه وسألته بقلق وخوف:
هاه ياقاسم اركان فين مجبتهوش معاك ليه ؟ هو عمل ايه لغريب للى عمله فيه دا؟
قاسم رد عليها وهو بيقعد عالكنبه بتعب:
لا انسى ابنك اركان دا خالص. وانسى ايامه.
زمانه دلوقتى فطريقه للمنفى فجزيرة مالطه او اى منفى تانى محدش يعرفله فيه طريق جره.
جواهر بخضه:
ياخبر ليه كده حصل ايه لكل دا انطق وفهمنى دا غريب روحه فأركان وهو اللى مربيه بيعمل معاه كدا ليه؟!
قاسم:
ابنك عمل كارثه ياست هانم ..ابنك دخل فمنطقة حقل الغام بالنسبه لغريب وداس على لغم وفجر نفسه.
جواهر:
انا مش فاهمه حاجه؟
قاسم:
تفهمى ايه ونيلة ايه؟
وقبل مايكمل كلامه سمعو هما الاتنين صوت قفل الباب بيتفتح وجواهر صرخت بفرحه وهى بتجرى على الباب وبتنادى بأسم اركان وهي شايفاه داخل منه:
اركان حبيبى نور عينى ...تعالا ياقلبي قولى حصل ايه وعمك غريب قلب عليك كده مره وحده ليه ؟
اركان ببرود :عادى ..
قاسم بغضب :عادى فعينك، برضو عادى انك تضرب زميل نجمه وتحرجها قدام الكليه كلها؟ وعادى لما تهدد عميد الجامعه انه لو مرفدش الولد اللى ضربته انك هتخلى ابوك يحبسه؟
بلااااش كل دا مقدور عليه ويتصلح.. لكن عادى تقول لنجمه ياسوده قدام الكليه كلها وقدام زميلاتها وزملائها ؟
اركان ببرود:
تستاهل عشان يادوبك اروح بعد المحاضره اجيبلنا حاجه نطفحها ارجع الاقيها واقفه فنص الكليه الهانم وعملالى حلقة حاوى وواقفه فالنص والكل ملموم حواليها وشغاله كلام بصوت عالى وتشويح بأديها ناقص تعملهم عجين الفلاحه! والشباب كله ملموم عليها والولد اللى ضربته دا بالذات مكانش بينه وبينها غير كام سم وعنيه كانت هتاكلها اكل.
قاسم ضرب على خدوده بأديه الاتنين وهو بيصرخ بغلب:
يابن الهبله دى رئيسة اتحاد الطلبه والاولى على الدفعه طول ٣ سنين واكيد واقفه وسط الكليه وبتشوح للطلاب بتقولهم حاجه مهمه ياحيوان. قال تشوح والناس تتفرج قال؟
محسسنى انك لقيتها بترقص والشباب بتسقفلها!
طب والله العظيم انتا عيل متخلف وانا مش عارف خلفت واحد زيك ازاي؟
لا بس انا عارف، هي جينات امك الهبله دي طفحت عليك لغاية ماقلب الهبل عندك بتخلف.
اركان:
اهى كلمة متخلف دي هي الكلمه اللى قالتهالى قدام الطلبه ونرفزتنى وخلتنى قولتلها ياسوده وانا عارف الكلمه دى بتعمل فيها ايه، وخلصت تاري وقتي.
قاسم :جدع يلا ...لا برافو يلا ..ابقا اعملها مره تانيه عشان غريب المره الجايه يدفنك مكانك فقلب الجامعه وانتا واقف.
الا قولى هو سابك امتا وازاى وليه ؟
اركان:
مرات عمى ليل كلمته وهدته وهو بيسمع كلامها وسابنى على طول حبيبتى ليل دى اقسم بالله، بتحبني اكتر منكم.. الا قولي يابابا ايه الورقه دي؟
قال كلامه وطلع من جيبه الورقه اللي مضاها قاسم واداها لغريب وهو رافع حاجبه لباباه، فرد عليه قاسم بمنتهي البرود:
اظن انك قريت اللي فيها، وبعدين مستغرب ليه مش المثل بيقول ان جالك الطوفان حط ابنك تحت رجليك، ودا فرعون الداخليه يعني انيل من الطوفان، دانا مش احطك انت بس تحت رجليا، دنا احطك انت وامك وافضل ادوس عليكم لما افطسكم كده وفى الاخر اسيبكم واجري.
اركان مردش على باباه، ودخل اوضته وقفل الباب وراه ومفيش دقايق وخرج مغير هدومه وراح على الباب وهو مستعجل.
جواهر:رايح فين ياحبيبى؟
اركان :مروح ...رايح عند بيت عمى غريب هاخد نجمه ونروح الكليه، خلص كلامه وخرج من البيت جري عشان يلحق نجمته.
قاسم نفخ وهو بيمسح وشه بغلب وبص لجواهر وقالها:
وبعدهاله ابنك ياجواهر؟
جواهر قعدت جمبه واتكلمت بحنيه:
بيحبها ياقاسم يعنى منتاش عارف ! بيحبها ومش هيبعد عنها مهما حاولت، وحتى لو الدنيا كلها حاولت معاه، دا حب من الطفوله بيكبر معاه يوم بعد يوم لما بقى بيجري فدمه.
قاسم :ايوه بس هى مبتحبهوش، وخايف عليه من غريب وجنانه وخصوصا على اى حد يقرب من بنته او مراته ويحاول يزعلهم او يدايقهم، دول عنده خط احمر وانتى عارفه واركان دماغه ناشفه اوى تقوليه الحته دى كخ يروح فيها ويش.....، المشكله انه مش هو لوحده اللى هيتحمل نتيجة طيشه دا ياجواهر يختى،
الا هيجرجرنى معاه وانتى عارفه غريب بقا ايه فالبلد والناس بتقدره وبتتمنى تخدمه برموش عنيها، وممكن فثانيه الاقى نفسى هوب اتنقلت السلوم وانا معدش فيا صحه للشحططه والروح والجي، ارحمونى انتٍ وابنك وعقليه وخليه يبعد عن بنت غريب احسنلنا كلنا.
جواهر:
سيبه يحاول ويعافر لغاية مانجمه تزهق وتعرف انه بيحبها ياقاسم وتحبه هى كمان ملكش دعوه بيه.
قاسم : يعني ياجواهر كوكب الارض كله عرف ان اركان بيحب نجمه من صغرهم وميت عليها فكرك هي معرفتش دا يعني لحد دلوقتي؟ نجمه عارفه مشاعر اركان من ناحيتها كويس أوي، والمشكله ان لا احساسها ولا دماغها معاه اصلا، وهو مستمر وسايق العباطه عليها وعايزها تحبه عافيه، ودا اسمه حب بالاكراه سعادتك، حب بالبلطجه، حب بالتناحه.
جواهر :حب من اى نوع اهم حاجه انه يحصل انشاله حتى حب بالصلصه طالما فيه طريق في الاخر هيوصله لنجمه خليه يمشي كل الطرق لغاية مايوصلها.
رد عليها قاسم بعد مااتنهد تنهيدة غلب:
خلي بالك ياجواهر ابنك هيضيعه حبه لنجمه ومشهيحصد من وراه غير الوجع وابقى افتكري كلامي دا كويس.
❈-❈-❈
اما فالفيلا عند غريب ...
ليل بغضب:
عتقومى ابوكى عالواد الغلبان ليه يامطفوحه؟ بقا اركان يتجرجر والحديد فيديه زى المجرمين والحراميه ياوش المصايب انتِ؟
نجمه ردت عليها بعدم مبالاه:
-اه يتجرجر عادي.
ليل بنرفزه:
-وهو يعنى كان عيميل ايه لدا كله! الواد دمه حامى ومتحملش وقفتك وسط زمايلك الشباب وحاول يفض اللمه اللي حواليكي من غيرته عليكي، تقومى تحرجيه وتقوليله متخلف قصاد الكل اكده بكل عين بجحه!
مش ناويه تكبرى انتِ ياك!
اركان دلوك معادش العيل الصغير اللى كنتى كل هبابه تدبى فيه بأيدك ورجلك ومربياله الرجيف، اركان دلوك بقا راجل ملو هدومه وقريب هيتخرج، وجلعك وفطفطتك دى وعرعرتك قصاده معادتش تنفع واصل انتى سامعه ولا له.
نجمه بهدوء:
لا ياماما مش فاهمه وبصى بقا عشان نكون على نور.. مش نجمه غريب الدمنهورى اللى تتعامل بالاسلوب دا ابدا من اي حد، انا صحيح بحب اركان وبعتبره اخويا زيه زى شهاب بالظبط، بس دا ميديهش اى حق يعمل اللى عمله امبارح دا او يحرجنى كده.
ولعلمك والله اركان الزفت دا مهاسامحه على اللى عمله فالكليه امبارح وهندمه اشد الندم، واذا كان بابا سامحه بأمر منك ومعملهوش حاجه غير انه بيته ليله في الحجز فانا بقا هعرف آخد حقى منه كويس اوى. ومن هنا ورايح سي اركان دا ملوش اي علاقه بيا.
قالتها واخدت مفاتيحها من على الطربيزه ولفت عشان تمشى واتفاجأت باركان واقف وراها ومربع ايديه ومسنود على عمود فالفيلا وسمع كل كلامها.
ونجمه خرجت من قدامه بعد ما بصتله بنظره كلها غل ووعيد، وهو فضل متابعها بعنيه لغاية ماوصلت البوابه بتاعت الفيلا.
ليل اتكلمت بشفقه على اركان من اللى سمعه من بنتها وخصوصا وهى عارفه قد ايه هو بيحبها وروحه متعلقه فيها:
-اركان ..تعالا ياحبيبى، جيت ميته؟ معلهش حقك علي امسحها فيا انى عملة نجمه وابوها دى.
اركان ياولدى اركاااان ...قالتها بصوت اعلى شويه لما لقت اركان مش معاها خالص وعيونه وكل عقله مع نجمه!
اركان رد عليها بشرود:
بتقولى حاجه يامرات عمى؟
ليل ابتسمت:
عقولك تعالا افطور معاى.
اركان :لأ فطار ايه بقا الحق اروح ورا المجنونه دى، وخصوصا انها غضبانه منى وهتروح بالمكنه اكيد النهارده عشان تفرسنى؛ لأنها عارفه ومتأكده اد ايه انا بدايق لما تركبها، وخصوصا ان سواقتها زى الزفت وكل مره تركبها فيها بتكون على وشك انها تعمل حادثه وتتقطم رقبتها لولا ستر ربنا وتدخلى فالوقت المناسب.
ليل بحنيه:
اوعى تزعل حالك انت خابر نجمه قلبها طيب وعمرها معتتحمل فيك حاجه عفشه، بس مش عارفه ايه جرالها النوبادى، هو انى هقولك عليها ماأنت اللى مربيها على يدك وعارفها اكتر من اى حد فالدنيا.
اركان:
قصدك انا اللى متربى على ايدها مش هى اللى متربيه على ايدى صححي المعلومه يامرات عمي.
وعموما متقلقيش انا عارف نجمه ومتعود على طبعها وياستى على قلبي زى العسل.
قالها واتحرك بسرعه على عربيته لكن صوت ليل كان واصله وهى بتقوله:
ربنا يجعل ايامك كلها عسل بشهده ياغالى ياواد الغاليه ....قالتها وفضلت متابعه اركان اللى اتحرك بمجرد مانجمه خرجت الموتوسيكل من جراج الفيلا واتحركت بيه وهو وراها، وابتسمت وهى بتتمنى ان ربنا يألف قلب نجمه على قلبه الطيب، اللى لو لفت الكون عمرها مهتلاقى فأى قلب نص الحب اللى فقلب اركان ليها، اللي محاوطها من صغرهم ومضلل عليها كيف ماتكون بته وعيخاف عليها خوف الاب.
ديه حتى الكليه عمل المستحيل ومرضيش يدخل كلية الشرطه على رغبة ابوه ودخل كلية العلوم لما عرف انها حلم نجمه، وانها هتدخلها وحباها،
فدخلها قبلها بسنه عشان يستناها فيها وياخد باله منها ويبقى جمبها وحواليها زى ماطول عمره عيعمل.
وغير دا كله معزته اللي ليه فقلب ليل، لانه يبقى ابن جواهر ..يعنى ابنها اللى مخلفتهوش وغلاوته من غلاوة عيالها نجمه وشهاب بالظبط ولو هتتمنى لبتها راجل مش هتتمنالها غير اركان .
غريب نازل على السلم وبيرفع كمام الترنج بتاعه وبيستعد عشان ينزل يلف التراك اللى حوالين الفيلا زى كل يوم ويعمل تمريناته المعتاده وشاف ليل واقفه على باب الفيلا وشارده
غريب :حبيبي واقف على الباب كده ليه مستنيه حد ولا كنتى بتودعى حد؟
ليل :كنت عبص على نجمه طلعت بالموتوسيكل واركان راح وراها بالعربيه عشان مرضتش تروح معاه النهارده غضبانه منيه .
غريب اتنهد:
وبعدين مع اركان دا هو مش هيحل عن بنتى يعنى ولا ايه !
ليل:
-يحل عنها كيف وانت عارف انه عيحبها من صغرهم ومستنى يتخرجو عشان يتجوزها ! والله سعات احسك روحك فيه وعتحبه كد عنيك وسعات تانيه احس انك مش طايقه ولا عاوز تتصوره ؟
غريب اتكلم وهو بيحط ايده على كتف ليل وياخدها لبره ويتمشو فالجنينه:
بصى ياليلى ...انا بحب اركان دى حاجه غير قابله للشك او للجدال. ومش بحبه اى حب لأ دنا بحبه حب اب لأبنه لان اركان فعلا يستاهل الحب دا وانتى عارفه.
ولو هتمنى لنجمه راجل تقضى باقى عمرها معاه مش هلاقى فالدنيا دى احسن من اركان يكونلها زوج وسند وضهر.
بس دا امتا بقى، دا لما تكون دى رغبة نجمتي قبل رغبتى، لما تحس نفسها متقبله انه يكون جوزها وابو عيالها، لما يكونله فقلبها مقدار مش قليل من الحب واللهفه، وانا شايف ان دا مش موجود عند نجمه لأركان.
فاكل اللى انا بعمله انى بحاول احط حدود لمشاعر اركان من ناحية نجمه وافهمه بكل طريقه ممكنه ان نجمه متخصهوش، وانه مش من حقه يتحكم فأى تفصيله تخص حياتها، عشان اكبح مشاعره ناحيتها شويه، وبعد كده لو نجمه اختارت حياتها مع غيره ميكونش واخده العشم اوى وينكسر كسره صعب يتعافى منها. فهمتينى ياقلب غريب.
...يتبع
إلى حين نشر الفصل الجديد للكاتبة ريناد يوسف، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
