رواية جديدة نجمة أركان الجزء الرابع من سلسلة فرعون مكتملة لريناد يوسف - اقتباس 3 - الأربعاء 2/4/2025
قراءة رواية نجمة أركان الجزء الرابع من رواية فرعون كاملة
تنشر حصريًا على مدونة رواية وحكاية قبل أي منصة أخرى
قراءة رواية نجمة أركان
الجزء الرابع من رواية فرعون
رواية جديدة قيد النشر
من روايات وقصص
الكاتبة ريناد يوسف
تم النشر يوم الأربعاء
2/4/2025
اقتباس 3
نجمه خلصت آخر محاضره وراحت على المعمل، بس لوحدها بطلب من اذكى واشهر دكتور فى الجامعه او بمعنى اصح بين كل دكاترة الجامعات.. دكتور ايان الشهير باينشتاين.
دخلت المعمل وهى بتتلفت حواليها وابتسمت اول مالمحت دكتورها المفضل ومثلها الاعلى ورا انبوبة اختبار ضخمه بيراقب التفاعلات اللى بتحصل فيها بتركيز عالى جدا وكل مايلاحظ حاجه يكتبها فمزكره جمبه على الطربيزه.
نجمه لسه هتتقدم لكنها وقفت لما سمعت صوت دكتور ايان او اينشتاين زى مالطلبه مسميينه بيقولها:
ثوانى خليكى مكانك يانجمه، او ياريت تبعدى اكتر؛ لأن فالمرحله دى هينتج غاز سام بكميه بسيطه من التجربه لو قربتى من غير قناع واقى ممكن يأذيكى.
نجمه فورا بعدت مسافه كبيره بس كانت كافيه انها تقدر تشوف دكتور ايان بيعمل ايه وتشوف التجربه بوضوح وتتابع تفاعلاتها معاه.
شويه وشافت بخار بيتصاعد من الامبوبه بعد مادكتور ايان ضاف آخر ماده، وبعدها ابتدا يهدى شويه بشويه لغاية مااختفى والماده اللى جوا الامبوبه ابتدى شكل تركيبها يتغير وتتحول من ماده سائله لماده لزجه كثيفة القوام وابتدت تتقلص شويه بشويه!
نجمه بانبهار:
واااااو يادكتور، دى نظرية الضغط او التقليص اللى حضرتك اخترعتها وكلمتنا عليها صح؟ امايزنج دكتور ايان.
ايان بأبتسامه خفيفه:
دى تجربه خفيفه اوى يانجمه ونظريه بسيطه متستاهلش حتى كلمة امايزينج اللى لسه قايلاها دى.
نجمه وهى بتتقدم ناحيته:
ازاى دا يادكتور!
هو حضرتك مش عارف قيمة اختراعك دا واللى ممكن يعمله؟
ايان قله نضارته وبص لنجمه واتكلم بجديه اكبر ...نجمه سيبك من اختراعى دا واهميته عشان انا عندى اختراع تانى اهم منه بمراحل وهيفيد البشريه جدا وكنت محتاج حد اشاركك اختراعى دا واللى توصلتله وآخد رأيه فبعض الامور وبصراحه ملقتش حد اشطر ولا اذكى ولا آامن منك للحكايه دى ...
نجمه فتحت بوقها بذهول وهى بتشاور على نفسها بأيدها وتتكلم بعدم تصديق :انا ؟!
ايان :ايوه انتى يانجمه مستغربه ليه ..انتى اشطر تلميزه عندى والاولى على دفعتك وذكائك ملوش حدود وافكارك دايما بره الصندوق ودا شيئ عاجبنى جدا ...والاهم من كده اخلاقك اللى اتأكدت منها فالسنتين اللى قضيتهم فالكليه هنا يعنى انتى الوحيده اللى آامنها على حاجه زى دى وانا مطمن ..وكمان انتى الوحيده اللى تقدر تكمل الاختراع دا لو انا حصلى اى حاجه وانا واثق انك هتكمليه زيى دا ان مكانش افضل.
نجمه كانت بتسمع وهي مذهوله ومبرقه عيونها بعدم استيعاب لكلام دكتور ايان وردت عليه بإستغراب شديد:
حضرتك بتقولى انا الكلام دا يادكتور؟ حضرتك متاكد اني انا المقصوده بكلام حضرتك!!!!
اما في الجامعه بتاعت نجمه، جامعة العلوم والتكنولوجيا..
نجمه دخلت اخيرا بمكنتها بعد ماوصلت واركان طول الطريق وراها وهى شايفاه فالمرايه وكل شويه تعمل حركه خطيره بالموتوسيكل وبعدها تضحك وهى متأكده ان قلبه واقع فرجليه وهو بيشوفها..
دخلت واركان وقف العربيه بعيد وراح وراها ووقف وهي بتركن فى المكنه بتاعتها، ولفت شافته وراها ووقفت بعصبيه وهى بتنفخ وبصت الناحيه التانيه وبعدها حاولت تتخطاه وتمشى، لكن اركان وقفها لما وقف قدامها ومهما حاولت تتفاداه يروح قدامها وهو مبتسم.
نجمه:
-طب لعبنا وانبسطنا نركن على جمب بقا عشان الناس تلحق محاضراتها ولا ايه رأى جنابك ؟!
اركان ابتسم وهو بيتنهد :هتخلصى امتا النهارده ؟
نجمه :ليه ؟
اركان :كده ..سؤال عادى مفهوش حاجه .
نجمه جاوبته عشان تخلص منه وخصوصا وهى عارفه انها لو مجاوبتهوش ممكن يفضل واقف وموقفها كده طول النهار لا هيدخل محاضراته ولا هيخليها هي كمان تدخل محاضرات.. هخلص الساعه اتنين وبعدها هنزل المعمل مع اصحابى ودكتور اينشتاين عشان هنعمل تجربه مهمه. هاه حاجه تانيه ؟
اركان :لا سلامتك ...ووسعلها وهى مشيت وهو اتكلم وراها :
ابقى ركزى كويس مع الدكتور العريان بتاعكم دا هاه.
قالها وابتسم وهو شايف نجمه لفتله وادتله ابتسامه سمجه مش بتطلع غير من شخص مش طايق اللى قدامه، ابتسم وراح عالمدرج بتاعه يحضر محاضراته وهو قلبه وعقله وكل كيانه مع نجمته اللي مسيطره علي كل حواسه ومجنناه ومش عارف يرسى معاها على بر لعلاقتهم خالص.
ليل:
بس مين قالك ان نجمه معتحبش اركان؟ طب دى روحها متعلقه فطرف توبه.
نسيت هما ايه من صغرهم ؟ اركان ونجمه زى التؤام معيفترقوش واصل الا على وكت النوم وبس. نسيت كلامها معاه بالساعات، نسيت وكت ماكانت تفتح عينها تدور عليه وهو يفتح عينه يكون حدانا اهنه قبل مااحنا نصحوا حتي.
غريب: ودي حاجه تتنسي، وكنا بالاماره نصحى علي صوتهم وهما ماسكين فبعض وبنتك مفطراه بالعلقه المتينه.. بس ياحبيبي دول مكانوش بيفترقوا عشان كانوا في الفتره دي زى الاخوات، لكن لما نجمه نضجت وحددت مشاعرها، واتأكدت ان حبها لأركان حب اخوى، ولما شافت انه حبه ليها غير كده بعدت؛ عشان متشجعش وتكبر الحب دا جوا قلبه.
بعدت لما حست ان نظرة اركان ليها اختلفت ومبقتش نظرة اخ لاخته، بقت نظرة حبيب لحبيبته، وهي متقبلتش ده.
ليل :
وكل ديه ياترى عرفته لحالك ..يعنى ديه تحليلك للى عتعمله نجمه مع اركان ولا ايه مصدر معلوماتك
دى، اصل ساعات تحليلنا للامور عيطلع غلط؟
غريب:
لا ياحبيبي دا مش تحليل ومعلوماتى من المصدر نفسه؛ عشان انتى عارفه ان المصدر مبيخبيش عن ابوه حبيبه اى حاجه مهما كانت صغننه اد كده اهو، وشاورلها على عقلة صباعه.
ليل:
ياسيدى ربنا يخليكم لبعض وتعيشوا وتتودودوا سوا ومتخبوش حاجه عن بعض، وانا خلينى اطرش الزفه اكده.
بس والله انتا جلعتها قوى البت دى ياغريب لدرجة الفرعنه،والبنته مليهاش الجلع واصل.
غريب بضحكه:
-بموت فيكى وانتى غيرانه كده حتى من بنتك، بتبقى زى القمر، وبعدين نجمة غريب يحقلها الفرعنه، عشان هى فرعونه بنت فرعون.
سيبك بس انتٍ من نجمه انا عارف انا بعمل معاها ايه و قوليلى.. كلمتى شهاب فى المانيا النهارده واطمنتى عليه زى كل يوم ولا نسيتى ؟
ليل :وانى اقدر برضو انسى حاجه زى دى؟ طب دا اليوم ميبانلوش ملامح لو مابتديتهوش بصوت حبيب روحى الداكتور شهاب.
غريب:
طيب اغير انا يعنى زيك دلوقتى وانتى بتقولى لحد غيرى حبيب روحى؟
ليل :وه دا ولدى !
غريب :وانا كمان وه نجمه بتى !
ليل :ايوه بس شهاب عيحبك كد ماعيحبنى بالظبط ومعيفرقشى،
بس انت نجمه عتحبك اكتر منى، واكتر من الدنيا كلها كمان. وانت كمان عحسك عتحبها اكتر من الدنيا كلها.
يوبقا متقارنشى واصل عشان مفيش وجه مقارنه سامع .
غريب بضحكه:
مفييييش فايده خالص اللى فدماغك فدماغك. عموما ياستى اه انا بحب نجمتى اكتر وحده فالدنيا.
بس اللى غايب عن عقلك اللى بقا صغير اوى دا وكل ماله ويصغر.. ان النجمه والشهاب مرتبطين بالليل، يعنى لولا الليل لا يكون فيه نجوم ولا شهب، الليل هو الاساس، هو الاصل، فهمتى ولا اقول كمان؟
ليل ابتسمت بخجل:
عتعرف تاكل بعقلى حلاوه قوى انتا عاد.
غريب:
انا مش عايز آكل بعقلك حلاوه ..انا عايز آكل عقلك كله، وودنك ودراعك واكلك كلك ..قالها وهو بيميل على دراع ليل عشان يعضها لكنها اتفادته وجريت من قدامه على الفيلا وهى بتضحك، وغريب كمان ضحك وابتدا جرى على قفاه كام خطوه ولف واتعدل بعد مارمى بوسه فالهوا لليل وابتدا روتينه اليومى.
اما عند نجمه ودكتور إيان
نجمه بتوتر :هو حضرتك متأكد يادكتور ان كل الكلام اللى لسه قايله دا كان ليا انا ؟
ايان لبس نضارته مره تانيه واتكلم بجديه:
-نجمه انا لسه كنت بشكر فى ذكائك! ارجوكى ركزى معايا ومتخلينيش اغير فكرتى عنك.
تعالى لو سمحتى اقعدى هنا وبصى فالميكروسكوب داوتابعى على الشاشه اللى قدامك دى كمان.
قرب الكرسي عليها وهي قعدت وبسرعه شد الكرسى للطربيزه اللى عليها الميكروسكوب ونجمه عليه!
نجمه قربت من الميكروسكوب وشافت حاجه، بعدها ايان حقن الحاجه دى بماده ونجمه ابتدت تراقب التغيرات اللى بتحصل لدقايق وبعدها شالت عينها من الميكروسكوب وبصت لدكتور ايان بدهشه!
ورجعت بصت للميكروسكوب تانى وبعدها لاحظت اللى بيحصل عالشاشه اللى قدامها!
نجمه بذهول:
ايه الماده اللى حقنت بيها الخليه دى يادكتور ؟
دكتور ايان :استنى بس للأخر وهشرحلك كل حاجه.
وفعلا استنت نجمه للاخر وفضلت متابعه لغاية مادكتور ايان طفى الشاشه وزاح من قدامها الميكروسكوب وقعد قصادها.
ايان :بصى يانجمه ..انا اكتشافى يتمثل فأنى توصلت لطريقه تخلينى اقدر آخد صفات من انسان او اي كائن حي وادمجها فجينات انسان او مخلوق تانى من غير مالمخلوق دا جيناته الوارثيه الاصليه تتغير، يعنى انا بضيفله صفات اضافيه بس. زى مثلا الذكاء ..والقوه، وغيرهم..انا ممكن آخد بروتون من جسم الانسان شديد الذكاء دا اوالانسان شديد القوه وادمجه مع كروميسوم انسان تانى بطريقه معينه، فالبروتون دا يتحد مع البروتونات بتاعة جسم المضيف ويبتدى الجسم يتقبل البروتون دا ويأثر على المضيف ويحتل هو الجزء الاكبر.
لكن بدون ماياثر على الجينات الوراثيه الاصليه زى الطول او اللون او الشكل مثلا.
يعنى احنا هنعدل الصفات بس ..يعنى اى انسان هيكون فمقدوره انه يحمل كل صفات التميز من قوه وذكاء او سرعه. تخيلى جيل جديد كله بنفس مستوى الذكاء الخارق ....تخيلى دوله من اصغر لاكبر فرد فيها بنفس مستوى الذكاء والقوه!
دى طفره جينيه جديده يانجمه هتغير مجرى التاريخ.
نجمه بتهز دماغها بعدم تصديق وردت عليه وهي لسه في حالة ذهول:
مش معقووول.. انا دايما بقول عليك انك مميز ودكتور فريد من نوعك وعبقرى.
وبعد اللى شفته دا انا بوثق رأيي وهبصم عليه بالعشره مع انك مش محتاج شهادتى دى يادكتور انا متأكده.
ايان بابتسامه :مين قالك بقى يا نجمه انى مش محتاج شهادتك دى؟
طيب تعرفى ان شهادتك انتِ بالذات وكلامك دا اهم عندى من شهادة اى حد، اهم من الاختراع نفسه.
نجمه اتنحنحت بأحرج وردت عليه:
ميرسى يادكتور على كلامك الجميل دا، واوعدك انى هكون عند حسن ظن حضرتك واوعدك كمان انى هبذل كل جهدى عشان اكون اد الثقه اللى حضرتك حطيتها فيا.
ايان :انا واثق من ده ...وهطلب منك طلب بصفه شخصيه مع انى عارف انه صعب شويه لكنه ضرورى ...انا تجربتى دى هبتدى اطبقها عملى من بكره على قرده حامل فأول ايامها، ونفسى تكونى جمبى اثناء التجربه وتتابعى معايا كل مراحل تطوراتها. وكمان هخليكى تطبقيها بايدك عشان تترسخ فدماغك اكتر.
نجمه :طيب وايه الصعوبه فكده يادكتور؟
ايان:
اصل معملى فى الفيلا بتاعتى بعيد عن مركز العلوم والابحاث اللي بشتغل فيه؛ محبتش ان اي حد يعرف اي حاجه عن تجربتي غير بعد ماتكمل، وانا عايش لوحدى واكيد هيكون فيه صعوبه على بنت زيك فمجتمع شرقى زي مجتمعنا انها تروح بيت شاب قاعد لوحده،حتى لو كان الشاب دا دكتورها فى الكليه ومن هنا انا عارف الصعوبه بتكمن فين.
نجمه:
لا متقلقش الموضوع دا مش صعب ولا حاجه، انا هاجي لو فيها ايه، انا لا يمكن افوت حاجه زي دي ابداً.
ايان ابتسم لنجمه وهو بيعدل نضارته وابتسامته وسعت اكتر وخصوصا وهو شايفها بترجع تبص للميكروسكوب بتركيز واعجاب شديد،وهمس بينه وبين نفسه:
مش معقوله كل الرقه والجمال والذكاء والحضور والكاريزما دول يجتمعوا في حد كلهم كده، انا لولا اني متأكد ان اكتشافي ده انا اول واحد اخترعه كنت قلت ان حد قبلي توصله وطبقه عليكي وجمع كل الصفات الحلوه وحطها فيكي!
فاق من شروده على صوت نجمه وهي بتقوله:
دكتور ايان، يادكتور،، دكتور حضرتك معايا؟
ايان رد عليها بسرعه بعد ماانتبه لنفسه: هاه.. ايوه يانجمه معاكي.
نجمه: بسأل حضرتك اجيلك بكره الصبح ولا بعد ميعاد الكليه ولا فانهي وقت بالظبط؟
ايان:
لا هنيجى بكره الكليه عادي انا ادي محاضراتي وانت تحضري محاضراتك ولو مفيش مشكله نروح عالفيلا سوا بعربيتي، هي التجربه مش هتاخد غير بس دقايق وقت الحقن دا في اول مره، هي المشكله في المتابعه المستمره بس.. ودي هيكون اغلبها علي التليفونات بتاعتنا، انا مركب كاميرات في المكان اللي فيه القرده وبراقبها ٢٤ ساعه من خلال تليفوني، وانت كمان هفتحلك كاميرات المراقبه علي تليفونك، مش هتيجي غير لو فيه حاجه مهمه طرأت، أو وقت كشف السونار على الطفل عشان تراقبي معايا التطورات وتدونيها.
نجمه هزت دماغها بتفهم وقامت عشان تمشي وهي في غاية الحماس، وبعد مااستأذنت ومشيت خطوتين افتكرت اركان وانه لا يمن يخليها تركب عربيه مع دكتورها ولا يروحو بيته لوحدهم، فوقفت مكانها ولفت بصت للدكتور، وهو بمجرد ماعملت كده ابتسم ورد عليها من قبل ماتتكلم:
ناخده معانا بس ميعرفش اي تفاصيل.
نجمه بإستغراب:
هو مين؟
ايان: اركان اللي مرافقك زي ضلك ومش بيسيبك ابداً.. العاشق الولهان
نجمه بدهشه:
حضرتك ازاي بتعرف انا عايزه اقول ايه من غير مااقوله؟
ايان وهو بيبص في الميكرسكوب رد عليها:
الموضوع مش صعب صدقيني، هو بس بيتطلب حاجه وحده بس.
خلص جملته الناقصه اللي مفهمتش منها نجمه حاجه والتزم الصمت وفضل يتابع في الميكرسكوب والشاشه اللي بيحصل بتركيز، ونجمه اتحركت وخرجت بره المعمل وهي بتفكر في كلام دكتور ايان ومش مصدقه اللي عيونها شافته وودانها سمعته، ومش مصدقه كمان انه خصها هي بالذات دوناً عن كل الناس بأنه يعرفها سره وسر تجربته!
...يتبع
إلى حين نشر الفصل الجديد للكاتبة ريناد يوسف، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
