قراءة المجموعة القصصية طغاة التاريخ كاملة

تنشر حصريًا على مدونة رواية وحكاية قبل أي منصة أخرى

هنتكلم المرادي عن صاحبة لقب أشر امرأة في التاريخ وبصراحة هى تستحق اللقب ده وعن جدارة.

"إيزابيلا الأولى ملكة اسبانيا"

ولدت ايزابيلا الأولى في ٢٢ أبريل ١٤٥١م كان والدها هو الملك "خوان الثاني" ملك قشتالة في إسبانيا الحالية كانت وقتها إسبانيا عبارة عن مجموعة ممالك منفصلة جنب بعض زي مثلا مملكة قشتالة ومملكة أراغون ومملكة ليون وفالينسيا وصقلية وغيرهم من الممالك كان لكل مملكة ملك وكانوا كلهم على حدود دولة الأندلس. 

ايزابيلا كانت البنت التانية لأبوها بعد أخوها هنري وهي وهنري كانوا إخوات من الأب ومكانوش بيحبوا بعض وديما على خلاف مع بعض.

أبوها نصبها ولية العهد الثانية بعد أخوها هنري يعني لو أبوها مات هنري هو اللي يتولى الحكم وبعد وفاة هنرى هي التي تخلفه في الحكم، لكن سنة ١٤٥٣م اتولد أخوها "ألفونسو" وبالتالى بقت هي ولية العهد الثالثة بعد هنري والفونسو.

سنة ١٤٥٤م توفى أبوها الملك خوان الثانى وطبعا أخوها هنرى الرابع تولى الحكم كان وقتها ايزابيلا عندها ٣ سنين بس.

تربت ايزابيلا تربية كاثوليكية صارمة كانت متعصبة جدا ومتشبعة بفكرة استرداد أراضي الأندلس من المسلمين اللي كانوا من وجهة نظرها استولوا على أرضهم ولازم هما يرجعوها تاني.

سنة ١٤٦٨م توفي أخوها ألفونسو وبالتالي بقت هي أحق واحدة بولاية العهد لو حصل حاجة لهنرى الرابع وفي سنة ١٤٦٩م تزوجت ايزابيلا من ابن عمها "فردناند" أو فرناند واللي كان حاكم "كاستيا أو صقلية" وولي عهد "أراغون" والجوازة دي حصل عليها خلاف كبير جدا لأن في الوقت ده كان ممنوع جواز ولاد العم كانوا بيعتبروهم من ضمن المحارم وطبعا أخوها هنرى كان من أول المعارضين ممكن علشان يغيظها وممكن علشان كان خايف من اتحادها مع فردناند وتكوينهم حلف ضده. 

ورفض "بول الثاني" إعطاء الوثيقة البابوية المطلوبة لتجعل زواج أبناء الأعمام شرعيًا، بس فرديناند وأبوه مسكتوش وقاموا بتزييف الوثيقة بمساعدة كبير أساقفة برشلونة لكن بعد كدا أصدر البابا "سكتوس الرابع" وثيقة أصلية تسمحلهم بالزواج.

فرديناند وإيزابيلا كان قدامهم تحدي تاني أكبر من الأول لإتمام الزواج وهو فقر العروسة اللي رفض أخوها أن يعترف بالزواج ورفض دفع مليم في تكاليف الزواج كمان العريس كان فقير لأن أبوه كان منهمك في الحروب وكانت كل فلوسه ضايعة في تجهيزات الجيش ومكانش قادر يعمل حفل زفاف ملكي للعروسين وهنا جه الحل على إيد محامي يهودي بأن قدم للعروسين قرض مقداره عشرون ألف سولدس سددتها إيزابيلا بعد كدا لما أصبحت ملكة على قشتالة عام (1474).

تم الزواج أخيرًا وكانت ايزابيلا في الوقت ده عندها ١٨ سنة وفردناند عنده ١٧ سنة.

وكانت إيزابيلا ذات جمال لا يعادله جمال، هكذا قال رجال حاشيتها يعني كانت على قدر عالي جدا من الجمال، كانت متوسطة القوام، ذات عينين زرقاوين وشعر كستنائي يميل إلى الحمرة، ونالت من التعليم حظًا أكبر من فرديناند وكانت ديما بتحب مجالسة الفلاسفة والأدباء لحد ما استقرت في الآخر على مجالسة القساوسة وعلماء الدين خاصة المتشددين والمتعصبين منهم.

سنة ١٤٧٤م مات هنري الرابع وطبعا بما إنه مبيحبش إيزابيلا أوصى بالعرش لبنته "جوانا" اللي كانت متزوجة من "أفرنسو الخامس" ملك البرتغال بس النبلاء في قشتالة رفضوا الوصية دي ليه بقى؟

لأنهم كانوا واثقين إنها مش بنته ولا حاجة لأنه كان معروف عنه إنه مبيخلفش حتى كانوا بيطلقوا عليه لقب هنرى العقيم وكان عندهم يقين إن جوانا مش بنته لكن هو وصى بالحكم ليها علشان بيكره ايزابيلا مش أكتر وبالفعل قدر النبلاء يطيروا جوانا ويعينوا إيزابيلا ملكة على قشتالة سنة ١٤٧٤م.

سنة ١٤٧٩م توفى والد فردناند وبقى هو حاكم أراغون وبكدا بقت صقلية وأراغون وقشتالة متحدين مع بعض وبعدين انضمت ليهم مملكة ليون وفالنسيا علشان يكونوا قوة في مواجهة المسلمين فى الأندلس. 

كانت البلاد قبل تولي فردناند وإيزابيلا الحكم في حالة يرثى لها فقد تعاقبت مجموعه من الحكام الضعفاء وسمحوا للنبلاء بأن يعيثوا في الأرض فسادًا بتنازعهم، لحد ما بقوا هما المتحكمين في كل حاجة في البلاد وزي ما شوفنا وصل نفوذهم لإنهم يقدروا يشيلوا ملك وينصبوا غيره.

كمان كانت الحكومة مهملة فاسدة، ومكانش فيه رادع للثأر الشخصي، وكثرت الحروب الأهلية إلى حد أن الطرق مكانتش آمنة للتجارة، ومعظم الأوقات كانت الجيوش تحتل الحقول، لحد ما اضطر الفلاحون إلى تركها جرداء.

حتى لما خوان الثاني حكم قشتالة في الفترة بين (1406 - 1454 ) ودي كانت فترة حكم طويلة جدا بس هو كان مولع بالموسيقى والشعر ودا اللي خلاه يهمل شؤون البلاد ولما تولى بعده هنري الرابع زاد الطين بلة لأنه مكانش عنده دراية كافية بإدارة شؤون البلاد وقام بالعبث بالعملة وبعتر موارد الدولة وفرقها على قرايبه ونكاية في أخته أوصى بالعرش لبنت غير شرعية ومن بين كل الاحداث المؤسفة دي طلع فردناند وإيزابيلا وصاغوا نظام جديد في الحكم قدروا بيه يخلوا إسبانيا أقوى دولة في أوربا لمدة قرن من الزمان.

قام فردناند وإيزابيلا بإصلاحات كثيرة جدا علشان يستحوذوا على الحكم ويقللوا قوة النبلاء اللي كانوا أصحاب نفوذ كبير في البلد بدليل إنهم قدروا يغيروا وصية الملك ويعينوا إيزابيلا بدل جوانا وطبعا ممكن في أي وقت يقلبوا على إيزابيلا ويشيلوها من الحكم مثلا زي ما عينوها اللي هو كانوا ماشيين بمبدأ لازم نتغدا بيهم قبل ما يتعشوا بينا.

كمان عملت إيزابيلا مستشفيات ومدارس كتير جدا في إسبانيا زي مستشفى الصليب المقدس في مدريد.

سنة 1480م أسست إيزابيلا وفرديناند محاكم التفتيش في إسبانيا وكانت محاكم التفتيش في إسبانيا في الأول هدفها إنها تكشف المسلمين واليهود الذين تحولوا للمسيحية بس بيمارسوا الطقوس بتاعتهم في السر فكانوا بيعاملوهم على إنهم زنادقة رفضوا العقيدة الكاثوليكية.

عينت إيزابيلا السفاح "توماس دي توركيمادا" ودا كان رجل دين منتسب للمسيحية علشان يرأس هيئة التفتيش للبحث عن الهراطقة دول من وجهة نظرهم ، فيقوم بوعظهم وتعذيبهم وقتلهم لو مرجعوش لكنف الكنيسة الكاثوليكية، وكان يسمى بالمفتش العظيم أو جراند إنكويستر، وكان يعدم واحدًا على الأقل من كل عشرة أشخاص يمثلون أمام محكمته. 

سنة 1492م قدر فردناند وإيزابيلا أن يستولوا على "غرناطة" آخر معاقل المسلمين في الأندلس بعد هزيمة بنو الأحمر وملكهم "أبو عبد الله" وبكدا تمت عملية الاسترداد اللي كانوا بيتبنوها وانتهى حكم المسلمين في الأندلس وبقت كل إسبانيا تحت حكم فردناند وإيزابيلا. 

بعد سقوط غرناطة وبالرغم من بنود المعاهدة التي وقعها فرناند وايزابيلا ملوك قشتالة مع عبد الله الثانى ملك غرناطة واللي كان من ضمن بنودها ما يلي:

"إن سمو الأمراء والأميرات وورثتهم، من اليوم وعلى مدى ما يأتي من أيام، يجيزون [لأهل غرناطة] أن يعيشوا على ديانتهم الخاصة، ولن يستحلوا حرمانهم من مساجدهم، وصوامعهم، ولا من مؤذنيهم، ولن يتدخلوا في مؤسساتهم ولا الهبات ذات الصلة بهذه التحملات الدينية، ولن يعملوا على إرباك عاداتهم وتقاليدهم المتبعة... [ويجيزون لهم] إقامة شريعتهم على ما كانت ولا يحكم أحد عليهم إلا بشريعتهم، وأن تبقى المساجد كما كانت والأوقاف كذلك، وأن لا يدخل النصارى دار مسلم ولا يغضبوا أحداً... ولا يدخل النصراني مسجداً من مساجدهم. ويسير المسلم في بلاد النصارى آمنا في نفسه وماله، ولا يجعل علامة كما يجعل اليهود وأهل الدجن، ولا يمنع مؤذن ولا مصل ولا صائم ولا غيره من أمور دينه، ومن ضحك عليه يعاقب ...".

زي ما شوفنا إنهم تعهدوا في المعاهدة باحترام ديانة المسلمين وعدم التعرض للمساجد ودور العبادة وكفالة الحرية الدينية إلا أنهم أول ما دخلوا البلد ضربوا بكل ده عرض الحائط وسنة ١٤٩٩م عملوا محاكم التفتيش في غرناطة علشان يقضوا على المسلمين فيها.

حولوا كل المساجد الموجودة لكنائس وخيروا المسلمين بين ٣ اختيارات يا إما التنصير والخروج من الإسلام يا إما الهجرة من غير ولا مليم ويسيبوا بيوتهم وفلوسهم ويخرجوا مشيا على الأقدام كمان ويسيبوا ولادهم اللي تحت ١٠ سنين ، يا إما يتقبض عليهم ويتعدموا.

حتى الذين تنصروا مسلموش منهم كان أي حد يشكوا فيه إنه مسلم يسحبوه على محكمة التفتيش فورا.

حكموا على الناس ياكلوا لحم خنزير ويشربوا الخمرة واللي يرفض يتحر ق حي وكانوا يعتبرون العرب الذين تنصروا دول مواطنين درجة تانية مش مسيحيين أصليين مالهومش أي حقوق في البلاد.

كانوا بياخدوا الناس بالشبهة أي حد يشتبه فيه إنه مخبي إسلامه يعدموه فورا أي حد يشكوا فيه إنه صايم في رمضان يتعدم أي حد يذبح الذبائح على الطريقة الإسلامية يتـ قـ تل أي حد يرفض يشرب الخمر أو ياكل لحم خنزير يقبضوا عليه أي حد يغتسل أو يتطهر يقبضوا عليه أي حد يتشبه بالمسلمين في اللبس يتحاكم فورا بتهمة الزندقة سادت الفوضى والقـ تل في كل مكان بقى كل واحد يحصل بينه وبين واحد تاني خلافات يبلغ عنه.

واحد عجبته مرات جاره يقوم يبلغ عن جوزها إنه مسلم ويتاخد، واحد عايز ياكل حق عامل عنده يبلغ عنه، طفل صغير متغاظ من طفل زميله يبلغ عنه ويقول دا قالي إنه مسلم محدش سلم ولا كبار ولا أطفال ولا شباب ولا نساء ولا عواجيز لدرجة إنهم حرقوا مرة طفلة عندها ١١ سنة.

حتى اللي كان بيحاول يهرب بدينه كانت العصابات الإسبانية بتستناهم على الحدود وتقتلهم.

المسلمين في الأندلس شافوا كل أنواع التعذيب اللي ممكن تتخيلوه أو متتخيلوهوش، واللي فضل منهم عمدوه في الكنائس غصبًا ومنعوا اللغة العربية وارتداء الملابس العربية كمان هدموا الحمامات العامة ومنعوا الاغتسال وأي حد يبان عليه النضافة يتقبض عليه فورا منعوا الختان واللي يشكوا فيه يكشفوا عليه اللي يلاقوه مختون يتعدم.

في نفس سنة سقوط غرناطة ١٤٩٢م سمحت إيزابيلا ل "كريستوفر كولومبس" إنه يسافر في رحلته لاستكشاف العالم الجديد ودا طبعا بعد ما فضل ٩ سنين يقنع فيها علشان توافق وبعد ما رفضت ٣ مرات خلال ال ٩ سنوات دول وفعلا راح كولومبس واكتشف الأمريكتين وهناك سموا مستوطنة بإسمها "لا إيزابيلا"

أعطت ايزابيلا أوامر علشان يعملوا معجم للغة القشتالية وخلتها اللغة الرسمية في البلد وهي دي اللغة الإسبانية المعروفة دلوقتي.

أنجبت ايزابيلا خمس أولاد أربع بنات وولد وعلى الرغم من بشاعة جرائمها ضد المسلمين إلا انها كانت بتحب أولادها جدا وكانت بتراعيهم وتهتم بشؤونهم بنفسها مش سايباهم للخدم.

علشان تضمن الملكة إيزابيلا الاستقرار السياسي طويل الأجل في إسبانيا قامت بترتيب الزيجات الاستراتيجية لكل من أطفالها الخمسة. 

أولى بناتها إيزابيلا الصغيرة، تزوجت من أمير البرتغال أفونسو، لكنه مات وهو في السادسة عشر من عمره من حادثة ركوب خيل، وبعده تزوجت مانويل الأول ملك البرتغال.

خوانا الأولى أو خوانا المجنونة، ابنة إيزابيلا الثانية، تزوجت من فيليب الوسيم، ملك بوهيميا (النمسا) والمرشح إلى التاج من الإمبراطور الروماني المقدس وكفل التحالف ده مع الإمبراطورية الرومانية المقدسة الإقليم القوي، بعيدة المدى والذي أكد أن لإسبانيا مستقبل الأمن السياسي.

تزوج خوان ابن إيزابيلا الأول والوحيد، من مارغريت دوقة سافوي، والزواج ده أدى الى الحفاظ على علاقات مع عائلة هابسبورغ النمساوية.

تزوجت ماريا الابنة الرابعة لإيزابيلا، من مانويل الأول ملك البرتغال، وعززت الصلة التي أقامها زواج أختها الكبرى.

الطفلة الخامسة، كاثرين، تزوجت عام 1501م من آرثر، الأخ الأكبر للملك هنري الثامن، إلا أنه توفي بعد ستة أشهر فقط من الزواج ، فتم تزويجها من هنري الثامن عام 1509م وأنجبت منه خمسة أطفال، توفوا كلهم أثناء الولادة عدا الطفلة ماري واللي أصبحت الملكة ماري الأولى.

في ١٢ اكتوبر سنة ١٥٠٤م توفيت إيزابيلا وقبل وفاتها بشهرين سابت وصية كتبت فيها:

"أوصي وأنصح وآمر بالطاعة النهائية للكنيسة الكاثوليكية والدفاع عنها دائما وأبدا بكل غال ونفيس من الأموال والأرواح... وآمركم بعدم التردد في التخطيط لتنصير المغرب و إفريقيا ونشر المسيحية فيهما ضمانا حقيقيا لكل استمرار كاثوليكي في جزيرة إيبيريا الصامدة، ومن أجل ذلك فالخير كل الخير لإسبانيا في أن يكون المغرب مشتتا ..جاهلا فقيرا مريضا على الدوام.. والاستمرار"

بعد وفاتها بمدة بسيطة تزوج فردناند من أميرة فرنسية صغيرة في السن اسمها "جيرمين من فو"

من الألقاب التي تم إطلاقها على إيزابيلا لقب "الملكة ذات الرداء العتيق" ليه بقى؟

لأنها طول حياتها لحد ما وفاتها لم تستحم سوى مرة واحدة فقط وهي يوم زفافها هي وفردناند غير كدا محصلش وفضلت ٣ سنين رافضة تغير هدومها اللي لابساها إلا بعد سقوط الأندلس.

الكنيسة بقى أطلقت على إيزابيلا وفردناند لقب "الأزواج الكاثوليك" واعتربوهم من القديسين ودا طبعا نظرا لجهودهم في استرداد الأندلس من إيد المسلمين على حسب كلامهم.

دى كانت قصة ايزابيلا الأولى ملكة اسبانيا والتي ارتكبت الكتير من المجا زر ضد المسلمين وعلى أيديها سقطت الأندلس.