قراءة رواية ميكاتو كاملة

تنشر حصريًا على مدونة رواية وحكاية قبل أي منصة أخرى

_إيه يا مداام.. مش ملاحظة حاجه

رفعت وئام بصرها عن صحن الطعام امامها ونظرت إلى زوجها

_ألاحظ إيه ياعزت

_بقالنا اد إيه ولا فيه حمل ب أبيض أو اسود ولا حتى سقوط او اشتباه، الله يرحمك ي نجوى

جابتلى البت الاولانيه من اول شهر، يدوب عدى شهر العسل عرفنا انها حامل

ولا زهرة ف اول سنة تعدى علينا كانت جيبالى توأم البنات.. وأنت يعنى لا حس ولا خبر

تعثرت وئام فى بلع ريقها اثناء طعامها وتحدثت له دون النظر إليه

_وأنا ب أيدى ايه أعمله ي عزت

_لا بايدك يا حلوة، تعالى بينا نروح نكشف ونشوف العطلة جايه منين

وبالفعل ذهبت معه إلى الطبيب وقدامها تتقدم واحده وتتأخر الأخرى حتى سمع عزت مالم يكن فى توقعه، اتسعت حدقة عينه غضباً وقام بجذب ذراعها بعنف للخارج يترجلان حتى أنه لم يتماسك وقام بنهرها بالشارع أمام المارة

_وأنا ذنبي ايه بس ياعزت

قالت وئام باكية فقام هو بلكزها ب احد كتفيها يتحدث والغضب يُشعله

_ذنبك إيه! هاهأو.. اكيد عارفه واكيد اهلك الل استكردونى وخدوا على قلبهم اد كدا دول المهر والشبكه

كانو عارفين.. اتاريهم لزقوكى ليا فلمح البصر من غير هات وخد

لم يكن ب استطاعه وئام الرد، دموعها كانت كافيه وحزنها على م تلقت من إهانات وكلمات قاسيه كان أبلغ من الرد حقاً.

_إيه دا، أنت مودينى فين؟! دا طريق بيت بابا

_ايوااا بالصلاة عالنبي انتِ يابت الحلال مش لزمانى، قال وأنا الل كنت مستنى الواد

دا بشكلك دا لا فيها واد ولا بت ولا شايب حتى

صعدت إلى منزل والدها وعندما فتحت شقيقتها ووجدتها هكذا احتضنها مستفهمه ماذا حدث

_فهمى ابوكِ ياسنيورة إنى طلقت اختك المعيوبة ومالكمش عندى غير المؤخر وبس وشوية الهلاهيل الل عندى فالشارع هبعتهم لها ع كااارو

تركهم ورحل وانفجرت وئام بالبكاء تختبئ ب رأسها فى صدر شقيقتها، تختبئ من الخذلان.. من الهزيمه التى تلاحقها دائما، تختبئ من الانكسار والخسران والقادم المجهول!

❈-❈-❈

ملابس تضعهم رانيا بحقيبه سفر بطريقه عشوائيه،مع تحدثها بعصبيه بالغه

_هيكون إيه بينى وبين عماد،دا مجرد زميلى، انا تعبت شك شك شك وتقولى غيرة.. الل بيغير ميشكش يا باسل ويتصنت

ويحط لى تسجيل مكالمات ف الموبايل من غير م اعرف

هرول باسل إليها يحثها على البقاء متوسلاً إليها

_رانيا.. رانيا إسمعينى.. مكانش قصدى والله، انا بحبك ومن غيرتى بس انا عمرى م أشك فيكِ

هبت رانيا ب وجهه وأردفت

_وبرنامج تسجيل المكالمات الل حاططهولى، ومراقبتك وتفتيشك ففونى ٢٤ساعه وأنا بطنش

والس وال ج الل انا فيهم دايماً، فلان كلمك ليه قالك إيه كان قصده ايه

طولتِ فالمكالمة ليه، بينك وبين علان إيه، دا وصلت لماما وبابا واخواتى بتشك بنتكلم ف إيه وبنقول إيه

وأكيد حاجه ليها علاقه بيك وانا بكدب

اغلقت رانيا حقيبتها وهرولت تجرّها إلى الخارج وهو خلفها يتوسل

_أنا عارف إنى غبي ومتخلف وإنى ساعات ببقى همجى فكلامى.. رانيا ارجوكِ إستنى

هرولت رانيا بخطوات سريعه إلى الشارع غير منتبهه لقدوم سيارة مُسرعه حتى اصطدمت بها!!

صرخ باسل غير مُصدق عيناه

_رانيااااااا

❈-❈-❈

قلبي المُحطم لم يعد بوسعه التحمل أكثر من هذا، كثرة التظاهر بالقوة والتماسك جعلت قلبي ممزقًا للغاية، جعلتهُ مكسورًا لا يُداويه أي شيء، أصبحت لا أشعر برغبة تجاه أي شيء، بيوم ما كان قلبي شيئًا جميلًا، و لى وجه مبتسم، و روحٍ مرحه، ولكن يُحزنني قول " كُنت!

عِراك قائم بين زوجه والد وئام ووئام بسبب رغبة وئام فى أخذ المؤخر وتأجيرها لشقه بعيداً عنهم وبحثها عن عمل والاستقلال بحياتها أخيراً.. رفضت حمدية ووالدها غير مبالى لاحول له ولاقوة

_لاء بقا انتِ عاوزة تفجرى وتمشى بدماغك، انتِ عارفه ست ومطلقه وقاعده لوحدها الناس هتقول إيه؟

_تقول الل تقوله، أنا محترمه سواء كنت ست مطلقه متجوزة بنت بنوت.. انا هعيش ب احترامى

ومش هعيش هنا تانى، كفاية ذل وقهر كفايانى كدا

عندى ٢٣سنه عيشتهم كلهم مرار وقرف، حلّى عنى الله لايسيئك

امسكت زوجه ابيها بذراعها تهزها فى مكانها

_اسمعى يابت انتِ مش هيفلت عيارك

_ إيه عاوزة تعملى فيا ايه تانى؟ عندكم طريقه جديده تقدروا تدبحونى بيها اكتر من كدا؟! إتفضلوا!

خرج الأب وتحدث إلى زوجته ب أن تتركها ولكن ظلّت حمديه تنعتها ب اقذر السبات والشتائم،

تركت وئام زوجه أبيها تتحدث وحملت حائقبها تهبط على الدرج، استقلت سيارة اجرة متوجهه ناحية الشقه التى أجرتها ودفعت مقدمها مع ايجار اول شهر، وبباقى المال وفرت جزء تعيش منه حتى تجد عمل

والباقى احضرت سرير ومكتب وموقد قديم مؤقتاً حتى يسير الحال.

بعدما أتى العمال وركبوا الاشياء واعطتهم أجرتهم، كان فى وقت نزولهم صعود باسل ف رآهم ورأى باب شقتها مفتوح ف وقف ل برهه لتخرج هى وتهم بغلقه فتجده أمامها

_مساء الخير

إبتسم باسل

_مساء النور، حضرتك الساكنه الجديدة؟

_أيوة

_اهلآ وسهلاً، انا جارك هنا فالشقه الل جمبك لو عوزتِ أى حاجه خبطى

أسمى باسل

تبسمت وئام له مجامله وهمت بغلق الباب ف انصرف هو إلى شقته، أكلت بعض لقيمات الخبز مع الجبن الابيض وحمدت ربها.. وصنعت كوب من الشاى وجلست بالشرفه حتى تكون شبكه الانترنت قوية لتبحث عن العمل.. ومن هنا لهناك وجدت عمل وبدأت ف إرسال معلوماتها إليهم وبدأت المحادثة حتى إنتهى رصيدها وتعطل الانترنت!

تأففت واردفت تتحدث الى نفسها غاضبه

_يووت وقته يقطع، والوقت متأخر هنزل دلوقت ازاى اشحن رصيد

مطت شفتيها واخذت تتخبط فالسياج الحديدى على سور الشرفه، فسمعت صوت جارها باسل يأتى من الداخل

_انا فالبلكونة يا رانيا

دلف إلى البلكونه فوجد وئام، ابتسم مع القاءه تحيه السلام ف همت وئام بسؤاله

_معلش بس يا استاذ..

_باسل

_ايوة استاذ باسل..، تقريباً عشان هنا منطقه جديده اى محل موبايلات او سوبر ماركت بعيد مش كدا؟

إهتم باسل وأردف لها

_ليه فيه حاجه عاوزاها من تحت؟

شعرت وئام بالاحراج ومن ثم قالت له على استحياء

_أصل رصيدى خلص فجأة وكنت فاتحه نت بتواصل لشغل يعنى، فكنت عاوزة رصيد وكدا

إبتسم باسل مع هزة رأس وأردف إليها

_مفيش مشكلة، أنا ممكن ادخل لك باسوورد الواى فاى عندى وتكملى عادى

رفضت وئام وقالت

_لاء لاء حضرتك انا هشحن و

_ياستى الوقت إتأخر هتنزلى ازاى، والجيران لبعضيها

_مفيش مضايقه يعنى لحضرتك؟

ابتسم باسل ومد يده لها تعطيه هاتفها، ف اعطته ليدخل كلمه المرور ويعطيها إياه ثانية حتى أكملت هى محادثتها..

تحددت موعد الاختبار للعمل، ولم يتم القبول فعادت حزينه جدا.. ليلتقِ بها باسل اثناء صعودها الدرج

_ازى حضرتك

_الحمدلله

_إتقبلتِ فالشغل؟

هزت رأسها نفياً، ف تذكر باسل شيئاً واخبرها به

_طيب بصى، تقريبا لو فيه شوغلانه استقبال فعياده يوافق معاكِ؟

_اى حاجه مفيش مشكلة

قام باسل ب اعطائها عنوانه كان قد شاهد الاعلان فى أحد المرات وهو بطريقه للمنزل فهو على مقربه منه. وبالفعل تم قبولها فعادت سعيدة للغاية وأرادت أن تصنع شيئآ من الحلويات ك قالب كيك او ما شابه وإرسال صحن إلى الجيران الذين ساعدوها برغم عدم معرفتهم لها.

وقفت بمطبخها تحضر وتستمع إلى الحان الكمانجا الاتيه من ناحية شقه باسل، حتى أنتهت من تحضيرها

وارتدت وشاحها وذهبت تطرق الباب ففتح باسل

_مساء الخير يا استاذ باسل

_مساء النور

_أنا.. انا يعنى عملت بسبوسة فحبيت اجيب طبق ليكم بمناسبة الشغل وكدا وحضرتك السبب

اتفضل بالهنا والشفا ليك انت ومدام رانيا

تعجب باسل فقال لها

_رانيا!

شعرت وئام بالاحراج فقالت له

_انا اسفه، بسمع حضرتك ع طول بتناديها وتكلمها يعنى.. ف اقرب وقت نبقى نتعرف ان شاء الله

تركته واقفا واستاذنته لتهم بغلق الباب.

❈-❈-❈

                           " مُصعب"

_ربما أنني لست مثالياً، ... لدي عيوب كثيرة و لكني أيضاً بي ما يميزني، لا أخبركِ أنني سأتخلي عن عيوبي، لكني سأحاول إصلاحها، و لكني واثق أنني سأتقبل عيوبكِ كما هي، فهلا كنتي مترفقة بشخص غير كامل، و قبلتي ذلك المعتكف علي باب محرابك، ينتظر فقط إشارة منكِ ليصلح من ذاته... فقط لأجلك.

                        "روز"

_حتي وان كان اكتمالي بك سأكابر وأكابر فهذا طبع البشر لا يعترفون بالحقائق.

الفصل(٥)

_تعالا يا واد يا حرامى هنا.. أنا بقالى شهر بدور عليك!

إلتفت مصعب ناحية صوت المقترب منه ف اتسعت حدقه عيناه ذهولاً، مصعب الأحمدى من قرى صعيد مصر25عام.يتسم بسُمرة بشرته، شفتيه المكتنزة عيناه المتسعه وشعره المجعد الغزير،شاربه الاسود الكثيف إنتقل للعيش بالقاهرة لإيجاد عمل مناسب.. فبعدما تخرج من كلية الزراعه، لم يرغب بالعمل فى بلده بالصعيد فبدء بالبحث عن عمل بالقاهرة، بادئ ذى بدء قام بالعمل كسائق سيارة اجرة..ولم يلق حظاً بهذا العمل

_حمدلله عالسلامه يابشوات

قالها مصعب حينما توقفت سيارة الاجرة لديه امام المكان المقصود لمستقلى السيارة، فهبط جميعهم ليتوجه له احدهم

_كام يا اسطى

_٥٥چنيه ياباشا

_٥٥جنيه!ليه هو انا قولتلك انى رايح تانى بلد دا خطوتين يا اسطى

_ياباشا هو مشوارك بكديتى هنزود عليك ليه

_لاء مش هدفع غير ٣٠

إتسعت حدقه عين مصعب واردف له

_٣٠!! ليه واخدك لفه ومرجعك مكانك تانى.. هما٥٥يابيه ومتطلعش روحى

_بقولك ايه هما ٣٠يا نروح القسم

هنا خرج مصعب من السيارة وأمسك رأس الرجل بكلتا يديه قائلاً

_لا مدام هنروحو الجسم يبجى نروحوا على حج!!

وقام بدفع الرجل برأسه حتى سقط مغشى عليه! وكانت هذه أول مراحل حياته العملية التى فشل بها، ف عمل بعدها بمطعم للمأكولات السريعه ك عامل لتوصيل الطلبات للمنازل..

_ايوااا، ميين

_دليفرى يابيه

فُتح الباب ف استقبله رجل قوى البنيه يتناول منه الطلب ف أردف مصعب

_الحساب ياباشا 180چنيه

_ايييه ساعه يا اغبيا عشان ييجى الأكل، خلاص غور من هنا نفسي اتسدت مش هاخد الأكل دا

_ياباشا انت طلبت أكل وأنا چيت طوالى يدوب الطريج، ادينى حسابي خلّينى أمشى

_وأنا قلت مش عاوز الأكل دا، وامشى غور من هنا.. أنا مش هتعامل مع المطعم بتاعكم دا تانى

اغلق الرجل باب المنزل بقوة فى وجه مصعب، فتمتم مصعب إلى نفسه ممسك بعلب الطعام المغلقه

_يعنى يابن الكلب لولا مدرس الانجليزى عقدنى فتالته اعدادى مش كان زمانى داكتور وأچرب زيك مكلمنيش كديتى!

هم مصعب بالاتصال بصاحب المطعم ليخبره بما حدث ف أخبره ب أن لم يأخذ العميل طلبيته سيتم خصمها من مرتبه هو الخاص!

وهنا قد غلى الدماء بعروقه، فطرق الباب بقبضه يده ليصنع طرقه مدويه ذات صوت عالِ ليفتح نفس الرجل له

_ياباشا هتاخد الاوردر ولا لاء، فيها قطع عيشي دى

_بقولك لاء ايه السئاله دى

_يعنى نفس ميتين أهلك اتسدت دلوك؟ بجولك اييه هتاخد الوكل ولا لاه!

 استشاظ الرجل غضباً ف أمسك بتلابيب مصعب ليمسك به الآخر ويمتزجا بمشاده وعراك إنتهى بفصل الجيران لكليهما بعيداً عن بعضهم البعض لينتهى الأمر برفده من المطعم..

لم يقف مصعب عند هذا فقط، ف التحق ب عمل آخر بصيدلية يقف لبيع العقاقير والأدوية..

_والنبي يابنى عاوزة حاجه للكحه للولا دا بس متكونش حقن

إلتفت مصعب ليأتى ب أقراص ويعطيها إياها فعبست السيدة وأردفت

_برشام! لاء الواد مبيعرفش يبلعه

نظر مصعب ناحية الطفل البالغ تسع سنوات على حد أكثر، ف أردف إلى السيده

_مبيعرفش يبلع ايه دا كد چدى!

_يا خويا بقولك شوفلى حاجه غير كدا

ذهب مصعب ليبحث لها عن دواء آخر ف أتى بدواء شراب واعطاها إياه

_8جنيه بس يا مدام

رفعت السيدة حاجبها إعتراضاً وقالت له بنبرة معترضه

_ايه دا دوا شرب! لاء لاء بيجيله مغص لما ياخده

هنا غضب مُصعب منها وأردف

_يعنى ياست إنتِ الله يرضى عليكِ اخترعله انا دوا، جولتِ عايزاش حجن جولنا ماشى

عيزاش برشام عيزاش دوا شراب، نعالجوه من الكحه كيف بالتنويم المغناطيسي

_والنبي ياخويا دورله عندك على حاجه تنفع

_ياحچه شايفانى حاوى! يابوى الله يرضي عليكِ شوفى فالصيدلية الل چمبنا إحتمال يكونوا أخترعوا حاچه چديده

تركته السيدة ورحلت، حتى دلف شاب فى مقتبل العشرينات وأردف إليه

_عاوز منوم لو سمحت

_معاك روشته؟

إرتبك الشاب وأردف

_لاء.. بس يعنى أنا عاوزه الروشته ضاعت منى

_هات الروشته وتعالا اصرفهالك يا ولدى

قضم الشاب شفتيه وامسك هاتفه ليقوم بفعل الإتصال بعيداً ومن ثم أتى مرة أخرى

_بص، أنا عاوز المنوم دا عشان بقالى تلت ايام مطبق وبذاكر وكدا فعاوز أنام ومش جايلى نوم

ركز مصعب معه وأردف إليه

_اطلع سلم بيتكم وإنزل 8مرات حتتهد هتنام طوالى

تلعثم الفتى وتصنع حجه أخرى ليقدمها له

_لاء اصلك مش فاهم، تيته برضو بقالها كام يوم منامتش وو

_هو الدوا دا ليك ولا لچدتك حيرتنى؟

_لتيته

_بردك هات الروشته

لم يلق الفتى مفر، فهرب للخارج وترك مصعب وحده فطرق مصعب كفاً ب كف ليتحدث إلى نفسه

_الواد عاوز المخدر عشان يعمل مصيبه وفاكرنى حمار وفاهمهوش، جبر يلم الأچرب

ظلّ بعمله بالصيدلية برغم راتبها البسيط وذات لحظةِ ما!

_تعالا يا باشا.. قرب ياباشا.. الساعه الل بتنقل من على الموبايل كل حاجه قرب شوف يابيه

إقترب مصعب من الرجل وأردف له

_ساعة هتنجل الل عالتلافون صوح؟

_شوف ياباشا، هيبقى كأن معاك تليفونين وعليهم ساعه يد كمان

ضحك الرجل ضحكه واسعه افصحت عن صف اسنانه العريض، ف أمسك مصعب الساعه التى ناوله إياها الرجل وجرب وجد أنه بالفعل تنقل كل معلومات الهاتف ويمكن استخدامها كهاتف، سأل عن سعرها

واشتراها.. وحينما عاد إلى الغرفة المؤجرة التى يقطن بها، حاول بها يميناً ويساراً

هنا وهناك ولم تفعل شيئاً!

حاول عدة مرات، حتى علم انه تم وقع الاحتيال عليه.. ف حلف انه سينتقم من ذاك الغشاش اينما وجده وسيوسعه ضرباً بالشارع أمام المارة..

وباليوم التالى بحث عنه بنفس المكان الذى كان يقف به ولم يجده، يوم.. اثنين.. ثلاثه، اسبوع اسبوعان حتى وجده!

اوسعه ضرب حتى تم تخليصهم بواسطه المارين بالشارع ومصعب على كلماته يريد إعاده ماله فهو لم يكن بالمبلغ البسيط.. وبعدما تم فض الاشتباك

_فلوسي يا راچل يا حرامى بدل م تبات الليلة فالجصر العينى، بجى بتستغفلنى أنى.. معاك الساعه الشغاله صوح وتبيع المجفولة اللى زى عدمها ب 350چنيه!

حاول الرجل تهدئته بعدما اصيب بفمه ووجهه إثر الضربات المُبرحه من مصعب وقال له

_بقولك ايه أنا انهاردة مستفتحتش.. بكرة هتلاقينى مجهزلك فلوسك

صمت مصعب يفكر فقام بخطف الساعه منه على حين غِرة وأردف

_اسمع يا راجل ياللى كد اللُجمه أنت، أنا هاخد الساعه الحجيجيه مكان فلوسي، وأنت ابجى شوفلك حد يعطيك ساعه غيرها وكديتى حجى وصلنى

ذهب من دون ان يعترى مايقوله الرجل من سُباب وشتائم، فكّر مالياً.. لمَ لا يعمل بطريقه هذا الرجل.. ومايسمونه_فهلوة_الضحك على العقول النصب والاحتيال.. فقد اعتراه التعب من العمل من هنا لهناك ولم يجد المناسب حتى الآن.

بالفعل ذهب واشترى بضع ساعات نفس شكل الساعه وقام بنفس الفعله التى فعلها الرجل ولكن بذكاء فقد قام بشراء بعض الأغراض لتغيير شكله وملامحه خوفاً من التعرض لأى مفاجأة كالذى قام بها هو مع الرجل من قبل ، اول مرة تم بيع جميع الساعات التى معه وحظى بمبلغ كبير.

فرح قلب مصعب والطمع بفرحه نجاحه فى ايقاع الناس فى شرك نصبه جعله يصنع هذه الخطو مرة واثنين وثلاثه، وتوسعت احلامه ففى ذات يوم كان بمقهى يقرأ عن عرض شقه للبيع بعقار متميز وذات طله بحرية

ومواصفاتها الداخليه ممتازة وصاحبتها سيدة تاركة رقم هاتفها للتواصل، طلب فنجان القهوة للتخطيط الدقيق

حتى فوجئ بصوت أحدهم..

_تعالا يا واد يا حرامى هنا.. أنا بقالى شهر بدور عليك!

التفت مصعب إليه جاحظة عيناه والرجل قادم نحوه ليتخطاه الرجل ويذهب لشاب يجلس بالمقعد الذى بجانبه ويصافحه الرجل مع ضحكه واسعه ويجلس معه فيهدأ قلب مصعب وتهدأ دقات الخوف.. وقام بطلب ورقه وقلم للتخطيط الدقيق.

`~`~`~`

اريد حياة اكون بها أميرة ، تشرق الشمس مضحكة متمنية لى يوما افضل ، تُغني الطيور مزقزقة سعيدة ببداية يوم جديد ، حياة يتطاير فيها الاشياء من حولي واطير معها الي عالم لا انتمي له ولكنه يروق لي ، أقوم بالأمر والنهى.. ارتكن إلى الكثير من الاموال والمجوهرات.. إصنع ذاتاً رفضها الجميع، واخيرا اعود الي سريري بعدما انتهي من تدوين كُل م أحلم به على شكل رواية التي طالما تمنيتُ انا اكون من بطلتها.

يديان ناعمتان يظهر بها الاوردة خضراء اللون أثر بياضهما الشديد.. ممسكتان بصحيفه الجرائد وفم وردى صغير يقوم يقراء المكتوب بصوت خافت..

روز... 22عاماً،فتاة على قدر من الجمال.. بشرة ناصعه البياض، عينان خضراوتان، أنف صغير

شعر أصفر اللون.. روز الفتاة التى كان حظها جمالها ولا يوجد لها حظ آخر فى هذه الحياة.

فهى تربت وترعرت بملجأ أيتام، وجدوها مُلقاه على قارعه الطريق ملفوفه بغطاء سميك وترتدى ملابس رثه .. ومن شدة جمالها تم تسميتها روز من قبل الملجأ نسبة الى شخصية روز بفيلم الاجنبي الشهير_تايتانك_ ظلّت روز هناك حتى تمت الخامسه عشر، درست حتى دلفت مدرسة التمريض وحصلت على شهادة المدرسةالثانوية الفنية للتمريض، ومن ثم تم توفير عملاً لها بمشفى عملت لسنوات حتى وصلت لسن ال21 حتى ذات يوم حدث لها حادثة تحرش من قبل أحد الاطباء ف قامت بعمل محضر له وتركت العمل نهائياً لتستقل بذاتها.

روز فتاة جامحه.. تحب الحياه، تحب أن التمرد.. تحلم بالثراء والراحه الأبدية.. جاده وغير رومانسي طبعها بالمرة.. فكرت فى كيفيه توفير عمل لها، بالبداية كانت تبيع أى شيء وتشترى أى شيء تجده أمامها.. هاتف اشترته اليوم.. تبيعه غد اضعاف ثمنه، اعلان عن بيع قفص للعصافير الملونه تذهب لشراءه وتبيعه هى بمكان آخر بسعر أعلى، آلة موسيقيه معروضه للبيع.. محل.. منزل.. ملابس مستعمله. احذيه

حتى صنعت لنفسها كيان لا بأس به، واليوم قرأت بالجرائد التى تجلب منها عملها الحُر عن شقه للبيع بعقار متميز وذات طله بحرية

ومواصفاتها الداخليه ممتازة وصاحبتها سيدة تاركة رقم هاتفها للتواصل.. على الفور اتصلت روز بالسيدة وذهبت إلى هناك وقامت بمعاينه الشقه كلياً وسمعت السعر التى تريده السيده واتفقت معها أن وجدت شارى سيكون لها نسبه وقد كان.

❈-❈-❈

_ميين؟

فتحت السيدة صاحبه الشقه ليكون مصعب أمامها مرتدياً ملابس عمال الكشف عن فواتير الغاز

_انا من شركةالغاز يا مدام، چاى اكشف لو فيه تسريب أو أى حاچه.. دا كشف من أچل الحماية مش أكتر

_ايوة اتفضل

دلف مصعب وتصنع قراءه العداد ومن ثم قال لها

_معلش يا مدام ممكن تجيبي آخر فاتورة جاتلك بتاعت الشهر الل فات

دلفت السيدة، ف نظر مصعب نظرة دائريه متفحصه المكان ب أكمله حتى عثر على مُبتغاه، هاتفها.. ليهرول ناحيته ويحمله ويضعه بجيب سترته ومن ثم تأتى السيده فينظر بالفاتورة ويتصنع الاهتمام بالأمر فى وقت عاجل قريبآ ويرحل.

❈-❈-❈

_الو

تعجبت روز من صوت المتحدث فهى تعلم انها سيدة، ف أردفت

_مش مدام إيفيت معايا؟

تنحنح مصعب وحاول التحدث باللهجه العادية ل أبناء القاهرة

_لاء أنا إبنها، أى خدمه؟!

_اه اهلاً وسهلاً، أنا روز وكان فيه اتفاق بينى وبين مدام ايفيت أن هجبلها مشترى للشقه

بالسعر الل هى عاوزاه.. نقدر نيجى بكرة عالساعه 7؟

إتسعت حدقه عين مصعب وحك ب رأسه وأردف

_ايوة طبعاً اهلاً وسهلاً، هبقى ف انتظاركم لأن والدتى تعبانه شوية

_لا ألف سلامه يافندم

اغلقت روز الهاتف، واغلق مصعب وأخذ يفكر وإثر تفكيره قام برفع صوته بالمناداه على نادل المقهى

_واحد شاى كمانى يا فاروج

ترجل النادل نحوه ووضع الصنيه على صدره محتقناً من مصعب قائلاً

_مش كفاية طلبات يا استاذ مصعب، الفاتورة عليت وكله عالنوتة

إلتفت مصعب ناحيته ممتعضاً وأردف له

_چرى إيه يا أجرب إنتَ! حد جالك انى مش هدفع.. ايا جلة ذوج حرج ابوك دى

_ياعم لو مش معاك انا احاسبلك ويبقى بينى وبينك بعد كدا، بس عشان صاحب المكان يعنى بقى يتكلم

_وأنتَ حيلتك إيه أنتَ يا مجشف؟ دا أنتَ بتعطس جميصك المعفن يجولك يرحمكم الله! غور هات الشاى بدل م نكسر التربيزة دى ع دماغك

ذهب النادل متأفف، بينما ركز مصعب بتفكيره ماذا سيفعل غداً..

❈-❈-❈

طرق الباب.. فتحت السيده.. قام برش المخدر ب وجهها لتقع مغشيه عليها، فيقوم بحملها للداخل وتغطية جسدها على الفراش وكأنها نائمه، واذ هو يقوم بتبديل ملابسه ووضع نظارة طبية على وجهه ويقوم بتغيير تصفيفه شعره لتطرق روز الباب فيفتح لها مُبتسماً

يدخلا روز والعميل الآتى من أجل الشقه، يدعوهم مصعب لكى يروا ارجاء المكان ب أكمله ويطلعوا عليه حتى نال إعجاب المشترى، رأو السيدة نائمه بفراشها فخرجوا خارج غرفتها سريعا حتى لايوقظوها، جلس المشترى مع مصعب وروز وقاما بالاتفاق معاً على المبلغ الذى سيتم دفعه نصفه الآن حينما يكتبان العقد ببطاقه السيدة ايفيت والنصف الآخر بعد تسجيل العقد بالشهر العقارى، والمبلغ كان 4ملايين!

تم دفع 2مليون إلى مصعب وقام بفعل الامضاء محل امضاء ايفيت واتفقا على يوم ليذهبا فيه إلى الشهر العقارى ودفع باقِ المبلغ..

ذهب المشترى ف وقفت روز أمامه

_نصيبي ي استاذ محمد

نظر مصعب إليها مطولاً، فتاة جميله جداً ترتدى جونلة قصيرة وحذاء ذا رقبه وسُترة قصيرة ايضاً بالكاد تغطى بعد خصرها، ابتسم مصعب ابتسامه واسعه مُردفاً لها

_نعم يا آنسة روز

_نصيبي يا استاذ محمد زى م اتفقت مع والدتك

_طيب مش تاخديه لما نكتب العقد فالشهر العقارى

وضعت روز كلتا يديها أمام صدرها معقودتان وقالت له

_لاء معلش انا اتفاقى ان هجيب مشترى وهيشترى، اتفاقكم ميخصنيش

ضحك مصعب قد لفت نظره ذكاءها مع جمالها وعملها الغريب ذاك الخليط والامتزاج الغريب، ابتسم لها ابتسامه اعجاب وأردف لها

_واتفقت معاكِ على كام والدتى؟

_على 200الف جنيه

رفع مصعب حاجبه واتسعت عيناه وكظم غيظه حتى اعطاها المبلغ وانصرفت هى سعيده، بينما هو اغلق سريعاً باب المنزل وبدل ثيابه ووضع الهاتف بجانب السيدة النائمه وقبل ان يرحل تحدث إلى نفسه

_نمسح رقم لهطه المهلبيه دى حرام تصحى من النوم وتفوج الجوجه دى وتبلغ عنها وهى تچيبنى

قام بحذف ارقام روز من على الهاتف ووضعه وحمل حقيبه المال ورحل..

يتبع...

إلى حين نشر الفصل الجديد للكاتبة نور إسماعيل، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة