رواية من روايات وقصص الكاتبة منى محمود
رواية القصة وما فيها

رواية جديدة (سكريبتات)

تنشر حصريًا 

على مدونة رواية وحكاية 

قبل أي منصة أخرى

الجريمة الاولي 

المشوار الأخير

مستوحاة من أحداث حقيقية

❈-❈-❈

يقال .. 

ان الاسرار الاكثر عمقا تسكن الاشياء الطبيعيه الاكثر بساطة 

جملة قريتها زمان في كتاب لكنها فضلت ديما في بالي .. في كل قضية مسكتها كانت الجملة دي قدامي وبتلهمني للجاني الحقيقي وسط زحمة المشتبه بيهم الكتير اللي بتكون حواليا ..

في كل مرة احساسي كان بيكون صح الا في أهم قضية في حياتي كلها بقالها اربع سنين ومش عارف احلها مش عارف ارتاح 

قفل عمرو دفتر يومياتة وشاله تاني في الخزنة اللي في اوضتة واول ما قفل الخزنة الباب خبط خبطة واحدة واتفتح 

شادية ...

صباح الخير يا حبيبي

عمرو ببتسامة ...

صباح الفل يا شوشو

شادية ...

ياما نفسي اعرف الخزنه اللي انت حاططها في اوضتك دي فيها ايه ضابط قد الدنيا وعنده خزنه يعني هيكون فيها ايه مت*فجرات يا ولا ؟

عمرو ضحك ...

اسرار يا شوشو مش لازم كل حاجه تبقي عارفاها ايه الفضول اللي انت فيه ده

شاديه بزعل مصطنع ...

بقى كده برده يا عمرو انا فضوليه 

عمرو بضحك ...

لا انا يا شوشو انا اللي فضولي 

دخلت دعاء وهي ماسكة سندوتش في أيديها وبتاكل فيه 

دعاء ...

ما تخلصونا بقا عايزة افطر وانزل اشوف ام الجامعه اللي ورايا دي الله ورايا مستقبل بيضييييييع

عمرو وهو بيضربها علي قافها ...

 عامله دوشه ليه على الصبح هه الناس تدخل تقول صباح الخير مش تزعق وبؤها مليان اكل كدة جتك الارف

دعاء ...

بطل طيب ضرب فيا وصباح الخير وصباح النور وكل حاجة يلا بقا بجد هتاخر وانت رافض اني اروح وارجع لوحدي 

شاديه ...

يا بنتي اخوكي خايف عليكي ومش عايزك تتبهدلي كمان في المواصلات 

عمرو ...

قوليلها .. عموما يلا يا ستي انا اصلا مش هفطر الصول فتحي عزمني علي الفطار انهاردة وهيزعل لو رحت واكل خديلك سندوتشين في ايديك وكوليهم في العربيه وانا بوصلك 

شادية ...

يا حلاوتكم انت هتفطر مع الصول فتحي وهي هتفطر سندوتشين في العربيه وانا اخبط دماغي في الحيطة مش كدة ؟

دعاء كشرت ...

وانا مالي انا هو انا اللي اتاخرت في الصحيان ولا انا اللي معزومة علي الفطار 

عمرو وهو بيبوس راس شادية ...

معلش يا ست الكل حقك عليا امبارح سهرت جامد ف معرفتش اصحي بدري ونسيت خالص اقولكم علي عزومة الفطار دي حقك عليا 

شاديه ببتسامة ...

لا يا حبيبي انا مش زعلانة انا بهزر معاكم يلا عشان متتاخروش ربنا يحفظكم ويرجعكم ليا بألف سلامة يارب 

نزل عمرو ودعاء وصلها جامعتها وطلع علي المديرية... 

مديرية أمن المنصورة قسم ثاني دا مكان التكليف بتاعه بعد ما اتنقل من القاهرة من ثلاث سنين ونص وخد معاه أمة واختة

وصل مكتبه واول ما دخل خبط الصول فتحي ودخل وراه

فتحي ...

صباح الخير يا باشاتنا اوعي تكون فطرت هزعل اوي 

عمرو ببتسامة ...

صباح الخير يا فتحي لا مفطرتش وجاي جعان مش ناوي تعرفني بقا هنفطر ايه ؟ من امبارح وانت تقولي مفاجأة 

فتحي بصوت واطي ...

هنفطر مش من الصعيد إنما ايه حكايه الدود ماشي كدة فيه صابح ممممممم الله الواحد ريقه جري علي الاكل 

عقد عمرو حواجبه ...

نعم ! هنفطر ايه ؟ سمعني تاني عشان شكلي سمعت غلط 

فتحي بخوف ...

ا ا لو يعني حضرتك مبتحبوش حالا ابعت اجيلك صينيه فول معتبره من عند حسن اللي علي الناصيه 

عمرو بحزم ...

هتجيب لنا صينيه ليا وليك وللعسكري ال برة دا وهنفطر سوا والمش دا ابقي طلعه في البيت تمام ؟ 😒

فتحي هز راسة ...

تمام يا باشا حالا عن ازنك 

خرج فتحي بسرعه واول ما قفل الباب وراه ضحك عمرو علي جنانة وانة جايب مش في المديرية طلع سيجارة وولعها وراح وقف جمب الشباك وسرح في الماضي اللي جه وراه مخصوص من القاهرة للمنصورة من ثلاث سنين ولسه موصلش للحقيقه اللي هتريحة ...

قطع سرحانة صوت تلفونة واللي في بلاغ عن جر*يمة قت*ل لم حاجتة وخرج قابل فتحي اللي كان راجع بالفطار خلاه سابه للعساكر اللي موجودة و اتحركو مع قوة صغيرة علي مسرح الجر*يمة 

وصلو كان ظابط القسم موجود 

عمرو وهو بيتفحص المكان ...

اي الاخبار يا محمود ؟

محمود ...

تمام يا باشا جالنا بلاغ من العربيه النص نقل ال هناك دي أنه شاف التاكسي دا واقف علي جمب الصبح ركن ونزل يشوف ل يكون السواق محتاج مساعدة عشان المنطقة هنا مطرفه شويه لاقي ج*ثة البنت دي في الكنبه اللي ورا رجع عربيته وبلغ علي طول والعربيتين اللي واقفين دول كمان وصلو ونزلوا لنفس السبب وشافو البنت جريو بس حسنين قالهم أنه بلغ وفضلو موجودين معاه لحد ما وصلنا

عمرو وهو بيبص جوة التاكسي ...

معهاش اي إثبات .. مممم واضح انها ماتت مخن*وقة فين الطب الشرعي ؟

محمود ...

معهاش اي حاجة يا باشا ودكتور شوقي علي وصول خلاص 

عمرو ...

التاكسي مكنش فيه اي ورق ؟

محمود بنفي ...

لا يا باشا بس النمرة مع المرور بيكشفو عنها ومستني تلفون في اي وقت 

عمرو ...

هاتلي سواق العربيه النص نقل الاول كدة 

محمود ...

حالا 

غاب محمود دقيقه كان عمرو مركز علي الج*ثة وبيكلم نفسه 

عمرو 🤔 ...

مممم واضح انها في العشرينات تقريبا .. من لبسها واضح انها من عيلة ميسورة هنا ... في دبلة في أيديها اليمين ... والتاكسي باين عليه أنه جديد لسه متهلكش علي الطريق جامد 

قطع افكارة رجوع محمود ومعاه السواق 

محمود ...

تمام سعادتك عم حسنين السواق 

عمرو بتفحص وهو بيولع سيجارة ...

قولي بقا اللي حصل بالظبط يا حسنين وبالتفصيل الممل

حسنين ...

يا باشا انا كنت طالع بالعربيه علي باب الله الصبح اشوف اكل عيشي زي كل يوم لاحظت التاكسي دا راكن كدة والمنطقة هنا مفهاش حد خالص والتاكسي شكلة مش من المنصورة وقفت قلت يمكن عطلان ولا قاطع بنزين اساعدة ولما قربت فضلت اندة مفيش حد رد عليا قربت اكتر لاقيت الست دي ورا بشكلها دا جريت علي عربيتي و بلغت القسم وفضلت قاعد زي ما الباشا قالي في التلفون والناس دي جت ونزلوا ولما شافو الج*ثة وجم يتصلوا يبلغو قلتلهم اني بلغت وفضلو واقفين معايا 

عمرو ...

مشفتش أي حد تاني بيحوم حوالين العربيه ؟

حسنين بنفي ....

لا يا باشا مفيش حد خالص قرب منها غير انا والعربيتين دول واي عربيه كانت بتهدي وتسال في اي بنقول حادثة وفي واحدة مق*تولة بيبصو ويمشو لكن محدش نزل وفضل تاني غيرنا 

عمرو ...

تمام يا حسنين سيب بياناتك كلها عشان نعرف نوصلك واتكل علي الله شوف وراك ايه 

اتحرك حسنين ونفذ كلام عمرو وسمع عمرو للناس اللي كانو في العربيات التانيه واللي كلامهم كان نفس كلام حسنين بالظبط لا ازيد ولا أنقص وأثناء ما كان بيحقق معاهم كان دكتور الطب الشرعي وصل وبدء يشوف شغله خلص عمرو مع الناس كان محمود واقف واره وواضح أنه عرف حاجة 

عمرو ...

ها يا محمود في جديد عندك ؟

محمود ...

المرور كلموني ودي بيانات التاكسي يا باشا 

خد عمرو الورقه منه وقري ال فيها ...

التاكسي من اسكندريه ورخصه بقالها عشر شهور بس زي ما توقعت التاكسي جديد .. احمد صالح عبد المجيد ٢٤ سنة تمام ( بص ل محمود ) معاك ساعه واحدة بس ويكون قدامي ملف عن الواد دا يلا 

اتحرك محمود بسرعه ينفذ وقرب دكتور شوقي من عمرو 

عمرو ...

ايه الاخبار يا دكتور 

شوقي ...

الوفاة حصلت بالليل مش الصبح .. في ضربة في مؤ*خرة راس المجني عليها بس مش هي سبب الوفاة دي يا دوب افقدتها وعيها .. في آثار خ*نق علي الرقبة ومفيش اثر ل بصمات ... مفيش اثر لاي اعتداء علي المجني عليها .. التوقيت بالظبط والنتيجة النهائية أن شاء الله اسلمها لسعادتك بعد التشريح 

عمرو ...

تمام يا دكتور ياريت في اسرع وقت ( بص ل محمود اللي كان بيعمل تلفونات ورا بعض ) يلا نكمل في القسم واعرفلنا لو في أي بلاغات باختفاء فيها مواصفات المجني عليها 

في اللحظة دي قطعة فتحي 

فتحي ...

بعد ازنك يا باشا انا هنزل بنفسي البلد واشوف الموضوع دا بنفسي

عمرو ...

تمام يا فتحي الناس دي متمشيش الا اما تخدو بياناتهم كلها يلا نكمل ف المديرية

اتحرك عمرو ومعاه فتحي ومحمود وبدءت التحقيقات

الساعات بتمر ولسه مش معروف جثة مين دي ؟ 

ولا كانت في التاكسي لية ؟

ولا فين صاحب التاكسي ؟

كلها تساؤلات كانت في دماغ عمرو وعلي العصر رنت عليه دعاء اختة تفكرة بمعاد مرواحها 

دعاء ...

سالخير يا حضرة الضابط

عمرو بجدية ...

دعاء الصول فتحي هيجيلك قدام الباب الرئيسي ويوصلك هو للبيت عندي شغل ومش هقدر اسيب المكتب دلوقتي 

دعاء بتفهم ...

تمام يا عمرو الساعه اربعه بالظبط هكون قدام الباب الرئيسي ربنا معاك يا حبيبي مع السلامة

عمرو ...

مع السلامه

قفل عمرو وهو مبتسم بحب لاختة اللي رغم جنونها وشقاوتها إلا أنها وقت الجد بتفصل تماما وبتكون واحدة تانية خالص عقل الدنيا كلة فيها

الباب خبط وسمح عمرو بالدخول وال دخل كان محمود 

محمود ...

تمام سعادتك صاحب التاكسي احمد مختفي من امبارح العصر تقريبا ساكن في العصافرة وحيد أمة وابوة ال من امبارح قالبين الدنيا عليه حتي أبوة انهاردة الفجر نزل بوست علي الفيس بوك وشيره علي اكونت احمد ابنة .. ملوش سوابق وسمعتة كويسة في المنطقة بتاعته 

عمرو ...

كان في اي خلافات بينه وبين أهله أو اي حد 

محمود ...

لا سعادتك المعلومات اللي جتلي أنه شاب في حاله ملوش دعوة بالمشاكل 

عمرو ...

عايز اشوف البوست اللي أبوة نزلة يا محمود 

محمود ...

ثواني ويكون مطبوع قدامك يا باشا 

الباب خبط ودخل الصول فتحي

عمرو ...

وصلت ل حاجة يا فتحي 

فتحي ...

أيوة يا باشا في عروسة اختفت امبارح بالليل بعد حنتها واهلها بيدورو عليها مش لاقينها رحت لأهلها بنفسي وشوفت صورتها وطلعت هي المجني عليها سعادتك 

عمرو 🤔 ...

عروسة وامبارح كانت حنتها ... هو شكلة يوم باين 

محمود ...

البوست اهو من علي الفيس مؤقتا لحد ما اطبعه 

خد عمرو منه التلفون وبدء يقري البوست 

صالح عبد المجيد ...

السلام عليكم ارجوكم يا جماعه اي احد يعرف حاجه عن احمد ابني يتصل بيا ده رقمي كاتبه في اخر البوست انا وامة هنتجنن عليه تليفونه اتقفل من امبارح العصر كان قبلها بساعه مكلمنا وقال لنا ان هو في شغل وكويس وهيتعشى معانا بالليل وبعدها بشويهن امه بتتصل بيه عشان تفكروا بالعلاج بتاعها لقيت التليفون مقفول ومن ساعتها واحنا دايخين عليه اللي يعرف عنه اي حاجه يكلمنا يطمنا عليه انا هاسيب رقمي ورقم امه ورقم احد من الجيران كمان ادعوا لنا ربنا يرده لنا سالم غانم يا رب اي حاجه ثانيه فداه ربنا يرجعك ليا يا احمد بالسلامه يا رب يا ابني ما يوجع قلبي وقلب امك عليك وما يورينا فيك اي حاجه وحشه يا رب

قري عمرو البوست ورجع التليفون لمحمود تاني وبص لفتحي ...

 انا عايزه اعرف تفاصيل اكثر عن البنت دي القضيه دي النهارده لازم تتحل الراجل لازم يعرف ابنه فين واهل البنت لازم يعرفوا مين اللي عمل كده في بنتهم لما رحت لأهلها يا فتحي ايه اللي عرفته بالتفصيل 

فتحي ...

البنت اسمها منار عبد الله عندها 20 سنه مخطوبه لابن عمها منتصر عارف وامبارح بالليل كانت حنتها والنهارده المفروض الفرح البنت بعد الحنه قالت ل لبنى بنت خالتها انها وراءها مشوار مهم ومش هتتاخر وانها مش عايزه اي احد يعرف وبنت خالتها حاولت تعرف منها هي رايحه فين قالت لها لما ارجع هاقول لك وخرجت وما رجعتش بنت خالتها فضلت مستنيه انها ترجع ولما لقيت الفجر اذن وهي ما رجعتش خافت وبلغت الكل من وقتها والدنيا مقلوبه عليها

عمرو ...

كان في مشاكل بينها وبين خطيبها بينها وبين احد تاني .. بين ابوها وبين احد بين عمها وبين احد

فتحي ...

بيقولوا لا يا باشا بس احنا اكيد طبعا لنا طرق ثانيه نعرف بها .. خطيبها كان بقاله يومين في القاهره ولما اتصلوا به الفجر وقالوا له رجع على طول وبدا يدور معاهم 

عمرو😒 ...

بيعمل ايه في القاهره بقاله يومين وهو فرحه مفروض كان يبقي النهارده

فتحي ...

بيقول كان بيقفل شغله هو عنده هناك فرع للشركه بتاعته عنده شركه استيراد وتصدير وله مكتب في القاهره ومكتب في قنا وكان بيقولوا برده ان هو كان هيجيء يوم الفرح الصبح بدري

عمرو كشر ....

ما حدش هيروح من هنا غير لما تبقى التحريات كلها عندي وما اسمعش كلمه بيقولوا دي تاني تستعجل يا محمود تقرير الطب الشرعي عايز اعرف سبب الوفاه بالظبط والساعه اللي تمت فيها وعايز اتواصل مع القسم في اسكندريه عايز معلومات اكثر عن احمد وخرج ازاي من اسكندريه لو كان خرج ازاي التاكسي ده وصل للمنصوره ولا كان مسروق منه وهو لسه هناك انا عايز شويه شغل وانا هروح لاهل منار بنفسي قبل ما يتعرفو ع الج*ثه ويبقي صعب الكلام معاهم يلا بسرعه

الكل خرج من عند عمرو وبداوا ينفذوا كل تعليماته وعمرو دماغه شغاله تفكير خطيبها كان مسافر في توقيت غريب والاغرب خروجها في وقت زي ده بعد ما حنتها تخلص من غير ما تعرف اي احد وفين احمد وهل يا ترى التاكسي فعلا اتسرق منه وهو لسه في اسكندريه ولا هو بنفسه اللي كان في المنصوره اسئله كثير وتفاصيل كثيره عمرو كان محتاج يجاوب عليها وده اللي هنعرفه مع بعض في البارت بتاع بكره

يُتبع...

إلى حين نشر الفصل الجديد للكاتبة منى محمود من سكريبت القصة وما فيها لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة