رواية رومانسية من روايات وقصص الكاتبة روز أمين
رواية قلوب حائرة
الجزء الثاني

رواية جديدة 

تنشر حصريًا 

على مدونة رواية وحكاية 

قبل أي منصة أخرى

الفصل الخامس والعشرون

ماذا لو كانت الدُنيا خاليةً إلا مِنكَ يا مُتيمي

ويا ضَحِكةْ زماني بعد العبوسِ 

قسماً لكُنت إِسْتَوْطَنتُ ضَمتِكَ 

وجعلت من أحضانِكَ الدافئةُ سكنُنْ 

وبقيت بها دائم الجلوسِ 

خواطر ياسين المغربي

بقلمي روز آمين 

كانت تجلس بردهة المنزل ومازالت بثيابها،في إنتظار تلقي مكالمتهُ بعدما رأت إيهاب يقف بالحديقة ويتحدث بهاتفهُ بعدما أخذ هاتفها وفحصهُ بناءاً علي تعليمات سيدهُ

إستمعت إلي رنين هاتفها فاهتز جسدها وابتلعت لعابها رُعباً بعدما وجدت نقش إسمه علي شاشة الهاتف،ضغطت زر الإجابة وتحدثت بارتياب: 

-أيوة يا ياسين 

بمجرد نُطقها بتلك الكلمات إستمعت إلي سيلًُ جارف من الكلمات اللازعة والتي نطقها بصياحٍ عالي ونبرة شديدة الحِدة قائلاً: 

-هو أنتِ يا ست إنت عاوزة تجلطيني،أنا مش قعدت معاكِ قبل ما تسافري وفهمتك وضعي الأمني وقُلت لك إني متنيل عندي مشاكل،إزاي تخلي واحدة غريبة تقرب منك ومن بنتي وبكل غباء تسلميها الفون في إديها

ممكن تهدي علشان نعرف نتفاهم...جُملة مُرتابة نطقتها بنبرات مُرتبكة فاحتد أكثر قائلاً بصياحٍ: 

-نتفاهم إيه ونيلة إيه،أنا نفسي أعرف إنتِ بتفكري إزاي؟ 

تحدثت بإيضاح في محاولة منها لشرح الوضع إلي ذاك الثائر علهُ يُخفف من ثورته: 

-يا ياسين ماحصلش حاجة لعصبيتك دي كلها،الست شكلها بنت ناس أوي وﻤن عيلة كبيرة،وده واضح جداً من لِبسها هي والستات اللي معاها،دول مجرد ستات مُرفهة عايشين حياتهم بالطول والعرض،وكُل خوفك منهم ملوش أي معني 

واستطردت بنبرة لائمة: 

-والدليل علي كلامي إن إيهاب أخد التليفون وأداه لكامل أول ما وصلنا وما لقاش عليه أي حاجة غير إن الست سيفت إسمها وبس،يعني إنتَ عملت مُشكلة من موضوع تافه وبيحصل مع أي حد هنا في الغُربة

سألها بنبرة حادة:

-وهي علشان ما أستغلتش تليفونك من أول مرة تبقي كدة موثوق فيها؟

واستطرد بحِدة أكثر: 

-والسؤال المهم،هي الهانم إدت رقمها للبرنسيس بنت الناس الواااو أوي دي ليه؟

لتكوني فاكرة نفسك هتتعرفي عليهم وتخرجي معاهم يا ليالي؟ 

وإيه اللي يمنع إني أخرج معاهم يا ياسين؟!سؤال وجهتهُ له فأجابها بنبرة جادة: 

-اللي يمنع وضع جوزك الأمني يا مدام،قُلت لك إني مستهدف الفترة دي ولازم ناخد إحتياطتنا ونكون حذرين جداً في تعاملنا مع الناس الغريبة 

بإعتراض صاحت بعلو صوتها قائلة بلكنة غاضبة:

-وأنا مالي بمشاكل شُغلك يا ياسين،تدخلني فيها ليه؟ثم أنتَ لسة قايل بنفسك،إنتَ اللي مُستهدف مش إحنا،تحبسنا وتكتم حُريتنا معاك ليه؟

جحظت عيناه وكاد عقلهُ أن ينفجر جراء عُقم تفكير تلك الرَعْناء:

-إنتِ يا سِت إنتِ مجنونة ولا بتستعبطي،هو أنتِ عقلك فاضي لدرجة إنك مش مستوعبة إنهم عاوزين يوصلوا لي من خلالكم؟ 

واسترسل بصياحٍ مرتفع: 

-هما قاصدين يأذوني فيكم إفهمي 

وأنا تعبت من العيشة دي وما بقتش قادرة أتحمل أكتر من كدة يا ياسين،تعبت من الأوامر والتحكُمات الفارغة والسجن اللي إنتَ معيشني فيه...كلمات صارخة نطقتها واستطردت باعتراضٍ حاد: 

-مش كفاية متغربة أنا وبنتي لوحدنا من غير أهلنا وأصحابنا،كمان عاوز تحبسنا بين أربع حيطان وتبعدنا عن كُل الناس؟ 

هي الهانم مش واخدة بالها إنها مسافرة علشان تقعد مع بنتها اللي بتتعلم ولا إيه؟هكذا تحدث ساخراً،ثم استطرد بلكنة اكثر حِدة علها تستفيق من غفلتها: 

-فوقي لنفسك يا مدام،إنتِ مش رايحه علشان تتفسحي وتعملي شوبنج،سيادتك رايحة مع بنتك اللي بتبني مستقبلها لو مش واخدة بال معاليكي

هتفت بإعتراض: 

-وده معناه إنك تحبسني في البيت وتحرمني أكون صداقات مع ناس شبهي ومن مستوايا؟! 

كلمة كمان وقسماً بالله يا ليالي هبعت أجيبك إنتِ وبنتك من بكرة وتتحرق كليتها علي أم مستقبلها اللي من الواضح إنه أخر إهتماماتك،ده إذا كان في بالك أصلاً...نطقها بصرامة جعلت تلك الواقفة بجانبة تُحاول أخذ الهاتف منه قائلة: 

-ممكن تهدي وتبطل عصبية،هات التليفون ده

إبعدي يا مليكة وما تتدخليش...نطقها وهو يرمُقها بعيناي تطلقُ شزراً فتحدثت بإصرار متجنبة خشيتها من غضبه: 

-ماينفعش تتكلموا وإنتَ غضبان كدة يا ياسين،إقفل وحاول تهدي وسيبها هي كمان تهدي وبعدها إبقوا إتكلموا بالعقل 

وضعت يدها فوق كفهِ المُمسك بالهاتف ونظرت إليه تترجاه بعيناها بأن يُفلت الهاتف من يده،زفر بقوة وفك وثاق قبضتهِ فامسكت هي الهاتف وتحدثت بنيرة جادة:

-إقفلي يا ليالي ولما تهدوا إبقوا كملوا كلامكم 

تفاجأت من تصرف مليكة المُباغت والتي لم تتوقعهُ فتحدثت بخفوت بعدما شعرت بالخجل جراء أفعالها المعادية لها طيلة الفترة المُنصرمة والغير مُبررة: 

-مُتشكرة يا مليكة

أجابتها بنبرة جادة: 

-ما عملتش حاجة تشكريني عليها،المهم خلي بالك من نفسك ومن أيسل 

واسترسلت لتُنهي المكالمة: 

-تصبحي علي خير 

وإنتِ من أهله...جُملة نطقتها بروح إنهزامية وبعدها نظرت إلي إبنتها التي هبطت مُنذُ القليل من أعلي الدرج مُسرعة بعدما إستمعت لصياح والدتها العالي اثناء مناوشاتها مع أبيها،سألتها بفطانة بعدما إستمعت لأواخر الحديث: 

-دي مليكة؟ 

أومأت لها بصمتٍ فاسترسلت الفتاة مستفسرة: 

-بتكلمك ليه؟ 

أخذت نفساً عميقاً وزفرته بقوة في محاولة منها لإخراج ما أصابها من غليان أثناء معركتها مع ذاك المُحارب القوي ثم تحدثت بعيناي تائهة: 

-أخدت الفون من ياسين لما أتنرفز عليا وخلته يهدي

ثم تنهدت بهدوء وأسترسلت: 

-وقالت له سيبها لما تهدي وبعدين إبقوا إتكلموا 

قطبت الفتاة جبينها باستغراب وباتت تنظر أمامها بتفكُر مُثبتة نظرها في نقطة اللاشئ،هزت رأسها لتُخرج تلك الأفكار التي حاولت إقتحام عقلها المُتمرد ثم أردفت متسائلة: 

-بابا قال لك إيه علي موضوع السِت بتاعة المطعم؟ 

زفرت بقوة وكأنها إستفاقت علي سؤال إبنتها فتوجهت إلي إحدي الأرائك وجلست واضعة ساقاً فوق الأخري وتحدثت بتمرُد: 

-البيه باباكي عاوزني أدفن نفسي في البيت هنا وأعيش بين أربع حيطان بحجة إنه خايف علينا

هتفت الفتاة بإيضاح لوالدتها: 

-حضرتك ليه مش قادرة تستوعبي إن بابي منصبه حساس وطبيعة شُغله خلت عنده أعداء مستنيين أي فرصة ينتقموا فيها منه علي كل الخساير والإنهزامات المتكررة اللي عاشوها بسببه

رمقتها بنظرة ساخرة وتحدثت بتهكُم: 

-شُغل أبوكِ خلاه موهوم وطول الوقت بقي عنده هاجس إن الجماعات الإرهابية اللي بيحاربها قاعدين متربصين له وهينتقموا منه في الوقت المناسب 

طب ما هي دي الحقيقة يا مامي..هكذا نطقت الفتاة فتحدثت والدتها بتقليل من حجم الموضوع: 

-ما تخليش أفكار ياسين تسيطر علي دماغك وتشتتك،لو نجح في إنه ينقل لك الهاجس اللي عنده مش هتعرفي تستمتعي بأي حاجة في حياتك،وهتعيشي تتلفتي حواليكِ طول الوقت وإنتِ شاكة في كل الناس

الحذر مطلوب يا مامي...هكذا نطقت الفتاة بتعقُل فهتفت ليالي بتمرد: 

-الحذر والشك بيقتل أوقاتنا الحلوة وبيخلي العمر يعدي من غير ما نحس بيه ولا نستمتع بجمال الحياة،ياسين إتجنن وهيجننا كُلنا معاه

واسترسلت بعدما هبت واقفة لتُنهي حديثها مع الصغيرة: 

-أنا هطلع أوضتي أخد شاور وأحاول أعمل meditation أخرج بيه كل negative energy اللي سببها لي سيادة العميد وضيع عليا فرحة الخروجة 

تنهدت الفتاة بأسيى وتحركت خلف والدتها وصعدت عبر الدرج في طريقها إلي غُرفتها لتقوم بمتابعة دروسها 

❈-❈-❈

عودة إلي ياسين 

كان يجوب الحُجرة ذهاباً وإياباً وكل ذرة من جسدهِ تنتفضُ غضباً من تصرفات تلك الخرقاء التي تتصرف برُعُونة وكأنها طفلة ذات السادسة عشر لا إمراة بالغة،إقتربت عليه مليكة وقطعت طريقهُ كي تجبرهُ علي التوقُف وتحدثت وهي تنظر لعيناه بتوسُل: 

-ممكن تهدي شوية وتبطل عصبيتك دي

نظر لها ومازال الغضب يُسيطر عليه وتحدث بنبرة شديدة الحِدة: 

-بتطلبي مني أهدي إزاي وانا سايب بنتي عايشة مع واحدة ماشية من غير مُخ،دي عاوزة تجلطني،المصيبة إني منبه عليها قبل ما تسافر وقايل لها تسمع كلام إيهاب وتنفذه وما تحاولش تحتك بحد

نظرت إليه وأمسكت أسفل بطنها وتحدثت في محاولة منها لحثهُ علي التوقف: 

-ياسين،أنا بتعب لما بشوفك متوتر بالشكل ده،أرجوك كفاية

زفر بقوة ولام حالهُ عندما رأي الإمتعاض يُسيطر علي ملامحها،أمسك كفها بإحدي يداه وباليد الاخري أسندها وتحدث وهو يحثها علي التحرُك إلي التخت: 

-أنا أسف يا حبيبي،ما أخدتش بالي إن نرفزتي هتأثر عليكِ وعلي البنت

هزت رأسها بهدوء وتمددت فوق الفراش بمساعدته ثم وضع لها إحدي الوسائد خلف ظهرها عَلها تسترخي،جلس علي طرف الفراش ولف جسدهِ في مواجهتها وتحدث وهو يتحسي موضع جنينهُ كي تشعُر ببعض الراحة:

-أنا أسف

ولا يهمك يا حبيبي...نطقتها بابتسامة خافتة وضلا علي وضعهما ما يُقارب من العشر دقائق قضاها يتلمس موضع جنينهُ حتي شعر بهدوء حبيبته واستكانتها نظر عليها وسألها باهتمام:

-بقيتي أحسن؟ 

الحمدلله...نطقتها بعيناي مُبتسمة ثم تحدثت وهي تتأهب للنزول من فوق التخت حيث كانت الساعة لم تتخطي العاشرة ليلاً بعد،وكانت قد شعرت ببعضاً من النُعاس بعد تناولها وجبة العشاء بصحبة ثُريا وياسين والأطفال وصعد معها زوجها لتنالُ قسطاً من الراحة هي وجنينها وقد حدث ما حدث: 

-تعالي ننزل نقعد شوية مع ماما والأولاد 

إعتدل ووقف ليُسندها وتحدث بنبرة هادئة: 

-حاضر يا حبيبي،أنا أساساً كُنت نازل علشان أتكلم شوية مع عمتي 

واسترسل بإبانة: 

-لينا فترة ما أتكلمناش مع بعض

أومأت له بهدوء ووقفت أمامهُ فضمها إليه وتحدث بنبرة أسفة:

-حقك عليا يا حبيبي،أنا عارف إنك مضغوطة بسبب الحَمل ومحتاجة هدوء وراحة الفترة دي،بس غصب عني،إنتِ شايفة بنفسك اللي أنا فيه

ما تشغلش بالك يا حبيبي،أهم حاجة تاخد بالك من نفسك أكتر من كدة وتبطل عصبيتك الزيادة دي،كدة غلط علي صحتك يا ياسين...نطقتها بصِدقٍ وحنان وصلاه فضمها أكثر لأحضانه وبعدها تحركا بجانب بعضيهما،نزلا إلي رُدهة المنزل وجدا مروان وأنس يجاوران جدتهما الحنون ويتسامرون بحميمية 

وما أن رأهما أنس حتي هرول علي ياسين وأردف بنبرة حماسية: 

-بابي

حملهُ وثبتهُ داخل أحضانه وقام بوضع قُبلة فوق جبينهُ بعدما وضع كفهُ خلف رأس الصغير محتوياً إياه بحِنو ثم تحدث مستفسراً: 

-إيه اللي مصحيك لحد الوقت

هتف الصغير قائلاً بحُبُور: 

-النهاردة الخميس وبكرة الجُمعة يا بابي

رفع ياسين أحد حاجبيه ونظر له مُتعجباً ثم أردف بمشاكسة: 

-لا والله،تصور ما كنتش أعرف إن النهاردة الخميس وبكرة الجمعة يا بابي

ثم استرسل متسائلاً:

-وده معناه إيه بقى يا أنوس باشا

ضحك الصغير وهتف شارحاً بحُبُور: 

-يعني بكرة أجازة يا بابي،وأنا هسهر وألعب براحتي النهاردة 

ضحكت ثُريا علي مُشاكسات ياسين مع صغير غاليها وتحدثت وهي تُشير إليه ليُجاورها الجلوس: 

-تعالي إقعد يا ياسين 

تحرك حاملاً الصغير وانتظر حتي جلست مليكة بجانب مروان الذي وقف وافسح المجال لياسين ليجلس هو بجانب والدته علي الأريكة المُقابلة،نظر إليها وسألها مُستفسراً:

-أُمال عز فين يا عمتي؟

نام من حوالي نص ساعة ومروان دخله في أوضتي جوة...هكذا اجابته ثريا فتحدث مروان وهو ينظر إلى ياسين بإبتسامة واسعة:

-ده كان صعبان عليه يسيب القطر اللي حضرتك جبته لأنس إمبارح ونام وهو بيلعب بيه علي السجادة،لولا نانا كانت متبعاه وشافته وهو بيغمض عيونه كان وقع علي القطر وهو بيتحرك

ضحكت ثُريا وتحدثت بإبانة:

-أنا شيفاه من بدري وكل شوية يدعك في عنيه والنعس باين علي وشه،قُلت له تعالي يا حبيبي نام في حُضني،فضل يقاوح معايا ويقُول لي مش نعسان،وكل ده علشان ما يسيبش القطر لأنس 

قهقه الجميع وهتف أنس وهو يلوحُ بكفهِ معترضاً: 

-ده ما خلانيش لعبت بيه خالص يا بابي ولا حتي لمسته،أداني الدبابة وقال لي خدها إنتَ وانا هاخد القطر ليا 

ضحك ياسين وتحدث ساخراً: 

-وإنتَ سايبة يبلطج عليك وساكت له؟ 

هتف انس بنبرة حنون: 

-ما أنا مش رضيت أزعله علشان هيعيط

ملس علي شعرهِ وتحدث بحنان أبوي: 

-بُكرة هكلم محل اللعب وأخليه يجيب لك واحد وسيب له ده 

تهللت ملامح الصغير وقام بوضع قُبلة فوق وجنتهِ تعبيراً منه علي إمتنانهِ وتحدث مُبتهجاً: 

-ميرسي يا بابي

إبتسم له ثم أمسك كف يده الرقيق وقربهُ من فمه وقام بتقبيلهُ مما أسعد ثُريا ومليكة وأيضاً مروان الذي دائماً يري ياسين وهو يغمر شقيقهُ الصغير بالحنان والإهتمام ولا يُفرق بين معاملتهِ وعز 

وجهت مليكة حديثها إلي أنس وهي تتأهب للوقوف إستعداداً لدخولها إلي المطبخ كي تُعطي الفُرصة إلي ياسين للتحدُث علي إنفراد مع ثُريا كما أخبرها بالأعلي:

-طب يلا يا بطلي تعالي معايا المطبخ إنتَ ومروان علشان نجهز حبة مكسرات ونعمل أحلي سموزي لزوم السهرة

أردفت ثُريا بإبانة:

-عَلية والبنات لسة صاحيين وموجودين في المطبخ يا مليكة،خليهم يجهزوا لك اللي إنتِ عوزاه وما تتعبيش نفسك

تحدثت بإبتسامة حنون:

-مش مستاهلة يا ماما،هما أكيد تعبانين من شغل البيت طول اليوم 

ثم استرسلت وهي تنظر إلي طفلاها بمرح:

-وبعدين أبطالي بيفرحوا لما بيدخلوا معايا المطبخ ونجهز لسهرتنا بنفسنا،كدة ولا إيه؟ 

وافقاها الصغيران بابتسامات مرحة وتحركا بجانبها متوجهين الى المطبخ تحت سعادتهم،نظر ياسين إلي ثُريا ثم نظف حنجرتهُ وتحدث بنبرة حَرجة:

-الباشا رجع ماما تاني لعصمته

صمتت ثُريا بملامح وجه مُبهمة،فاسترسل ياسين بايضاح:

-هو كان مُصمم علي رأيه وكان عاوزها تسيب البيت بعد سفر شيرين،وبصراحة أنا وطارق اللي ضغطنا عليه

وقص لها مختصر ما حدث بتلك الليلة فأردفت تلك الخلوقة بنبرة هادئة:

-إنتَ وطارق عملتوا اللي كان لازم يتعمل يا أبني،مكانش ينفع تسيبوا والدتك تخرج من البيت وهي في السِن ده، 

وإن كان علي سيادة اللوا فشوية وهينسي ويرجعوا زي ما كانوا تاني

يعني حضرتك مش زعلانة مني يا أمي؟سؤال وجههُ لها ياسين فنظرت إليه باستغراب واردفت بنبرة صادقة:

-وأنا أزعل إنك طلعت بار بأمك يا ياسين؟!

واستطردت بايضاح: 

-أنا كُنت هزعل بجد لو اتخليت عن أمك وسبتها تخرج من بيتها وهي في السِن ده،وقتها كُنت هحس إن تربيتي أنا وجدتك مُنيرة الله يرحمها راحت هدر

تنهد براحة وتحدث بعيناى شاكرة: 

-ريحتيني يا أمي،ربنا يطمن قلبك 

ربتت علي كف يده وتحدثت بنبرة هادئة: 

-من الناحية دي طمن بالك يا ياسين 

واسترسلت بنبرة ذات مغزي:

-طول ما كُل واحد مننا قاعد في بيته وكافي غيره شره،مش هيبقي فيه مشاكل أبداً وكلنا هنعيش مرتاحين 

علم أنها تود التأكيد علي عدم رغبتها لدخول منال منزلها مرةً أخري وأيضاً والدهُ منعاً لإثارة المشاكل من جديد،تنهد بأسي وعذر تفكيرها واتخاذها لذاك القرار الصعب والمُميت للجميع وبالاخص أبيه 

وعندها خرجت مليكة بإصطحاب الصغيران وهما يحملان بعض المقرمشات وتَلَتهُم مُني وعَلية التي تحدثت بترحاب وهي تنظر إلي ياسين بتوقير: 

-مساء الخير يا ياسين باشا

بابتسامة خافتة أجابها: 

-مساء النور يا عَليه 

سألته باهتمام: 

-أعمل لجنابك فنجان قهوة؟ 

وقبل أن يُجيب بنعم التي ظهرت حروفها فوق شفتاه وداخل عيناه تحدثت عاشقة زوجها باعتراضٍ قاطع:

-لا يا دادة،سيادة العميد شِرب قهوته فوق ﻤن شوية 

واسترسلت وهي تتناول كأسان من مشروب البرتقال الطازج من فوق الحامل التي تحملهُ مُني بين ساعديها:

-أنا عملت له البرتقال اللي بيحبه هو وماما...نطقتها وهي تناولهُ أحدهما والأخر إلي ثُريا مما جعلهُ يشعر بأهمية وجودهُ بحياة إمرأة أحلامه،تناولهُ من يدها بإبتسامة رضا وتحدث إلي عَلية بمداعبة:

-الحكومة أمرت خلاص يا عَلية

إبتسمت بحبور وتحدثت: 

-ربنا يخليها لك يا باشا

تسلمي يا عَلية...هكذا نطقها واتخذ الجميع أماكنهم وتحركت مني إلي الداخل،وجهت عَلية سؤالها إلي تلك الراقية: 

-الفول إستوي وزبد يا هانم وطفيت النار عليه،أبعت منه للست راقية زي ما طلبت منك الظهر؟

ولا أبعتهولها بكرة؟ 

أومأت بهدوء وتحدثت: 

-إبعتي لها الوقت أكيد لسة صاحية

صفق أنس بابتهاج وتحدث بصياحٍ وحماس:

-بكرة الجمعة وجدو عز وجدو عبدالرحمن هييجوا يفطروا معانا زي من قبل

واسترسل وهو ينظر إلي عَلية:

-إعملي فول بالطحينة لجدو عز يا دادة،نانا قالت لي إنه هييجي الجمعة دي 

واسترسل متسائلاً: 

-صح يا نانا،مش إنتِ قُلتي لي العيلة كُلها هتيجي تاني قريب

نزلت كلماته العفوية علي قلب تلك الراقية وكأنها سوطاً جلدته بقوة فألمته بشدة ظهرت فوق ملامحها مما جعل الجميع يحزن لأجلها لعلمهم أهمية تجمُع عائلتها وما يُعنيه لها 

أمسكت مليكة كأس المشروب البارد من فوق الصَنية الموضوعة علي المنضدة وتحدثت لإلهائه:

-يلا إشرب السموزي اللي عملته بنفسك. 

بالفعل تحدث مهللاً:

-شفت يا بابي،عملت سموذي مانجو لوحدي 

برافوا عليك يا بطل،أقعد بقي أشربه علشان ما يدلقش ويبهدل لك هدومك...هكذا حدثهُ ياسين فجلس الصغير وبدأ الجميع بتناول مشروبهم وتحركت عَلية عائدة إلي المطبخ واكمل الجميع سهرتهم تحت سعادة مليكة بوجود جميع أحبائها حولها     

❈-❈-❈

داخل منزل سراج ونرمين

كان يجلس وحيداً ببهو المنزل بعدما غفت صغيرته ونجل زوجتهِ مُنذ ما يُقرب من الساعة بمساعدة العاملة المسؤلة عنهما،أما نرمين فمُنذ أن عادت معهُ من سهرتهما عند شقيقتها وزوجها وهي تقطن حُجرتها بالأعلي بعدما أصبح هذا حالها مؤخراً

زفر بضيق وهو يضغط فوق الزر المسؤول عن تغيير القنوات عبر جهاز التحكُم التابع إلي شاشة التلفاز الذي ينظر إليها،ضغط زر الإغلاق وهب واقفاً وتحرك نحو الدرج ليصعد إلي تلك المُتمردة علي حياتها

دخل إليها وجدها تقف بشُرفتها تتطلع للأمام ويبدوا علي ملامح وجهها الاستياء،جاورها الوقوف وسألها مستفهماً:

-طب ولما أنتِ لسة صاحية قاعدة هنا وسيباني قاعد لوحدي تحت ليه؟ 

إبتسمت بجانب فمها بطريقة ساخرة وتحدثت دون التطلع إليه: 

-هيفرق معاك قوي وجودي جنبك من عدمه 

إيه الكلام الغريب اللي بتقوليه ده يا نرمين...هكذا تحدث ثم استرسل مفسراً: 

-أكيد طبعاً وجوك بيفرق معايا 

لفت جسدها إليه بمباغتة ثم هتفت صائحة بنبرة غاضبة وعيناي تطلقان شزرا:

-مش حقيقي يا سراج،لا قعادي جنبك ولا أنا كُلي بعني لك أي شئ،الحاجة الوحيدة اللي بتعني لك هي الانتخة وقعدة الكنبة سواء هنا أو عند ماما

إنتِ عاوزة تقولي إيه يا نرمين...هكذا سألها فأجابته بنبرة حادّة:

-عاوز أقول إني تعبت وخلاص زهقت  

سألها مستفسراً: 

-وإيه اللي ناقصك علشان تقولي كده؟ 

دلفت إلي الداخل ووقفت تنظر إليه ثم تحدثت بنبرة ساخطة: 

-ناقصني أحس إني سِت ومرغوبة من جوزي،نفسي أشوف حبك ولهفتك عليا

طب ما أنا بحبك يا نرمين...جُملة نطقها بعيناي صادقة،فهتفت تلك الحانقة بنبرة انفعالية:

-وهو الحب كلمة بتتقال وخلاص يا أستاذ؟ 

روح شوف صاحبك ياسين بيعمل إيه واتعلم منه،شوف إزاي اهتمامة مخلي الكل يبص علي واحدة زي مليكة علي إنها برنسيس وبيعاملوها كملكة

واستطردت باعتراضٍ ساخط: 

-تيجي إيه مليكة جنب أصلي وانوثتي وجمالي علشان راجل في مركز ياسين يعمل المستحيل علشان يرضيها ويشوفها سعيدة

صاح منفعلاً: 

-مية مرة أقول لك أنا مليش دعوة بحد،كل واحد ليه طريقته اللي تناسب تفكيره وممشي بيها حياته،وهي دي حياتي وده طبعي اللي كنتي قبلاه ومتعايشة معاه

وسألها باستغراب:

-إيه بقي اللي حصل وقلبك عليا وفجأة حسيتي إني مش الراجل اللي قادر يسعدك؟! 

هتفت بحِنقٍ شديد: 

-اللي حصل إن كُل يوم بعيشه معاك بحس إني بكبر فيه سنين، لدرجة إني بقيت حاسة إني عجزت وانا لسة في عز شبابي 

كان يستمع إليها بنظرات مذهولة وقلبٍ حزين من هول صدمته مما استمع،وبدون مقدمات تحدث بنبرة جادة:

-وأنا لا يمكن أسمح لنفسي أضيع لك عُمرك علي الفاضي يا نرمين

قطبت جبينها وسألته مستفسرة:

-قصدك إيه يا سراج؟

هتف بإبانة: 

-قصدي واضح يا بنت الناس،إنتِ عُمرك ما حبتيني ولا شُفتيني زوج مناسب ليكِ،رغم إني حبيتك وبقيتي إنتِ وأهلك عيلتي التانية 

وسألها بما جعل داخلها يتخبط ويرتبك:

-شوفي إيه اللي يريحك وأنا هعملهولك،ولو حابة الطلاق يتم من بكرة أنا جاهز 

جحظت عيناها ونظرت إليه باستياء ثم هتفت بنبرة غاضبة:

-طلاااق؟

هو ده اللي ربنا قدرك عليه علشان تقوله بعد كل كلامي ده؟

أُمال إنتِ عاوزة إيه؟هكذا صاح بكل صوته فتحدثت بنبرة حادة وعيناي صارخة:

-عوزاك تحس بيا وبوجعي،من حقي أكون محور الكون بتاعك،نفسي أحس إن جوزي بيحبني بجنون وتظهر ده للعلن وأحس بقيمتي في عيونهم

وتفتكري لو أنا عملت ده هترضي وترتاحي يا نرمين؟سؤال حكيم وجههُ لها ليجعلها تتخبط وهي تُفكر به،فتحدثت بنبرة مُتخبطة:

-أكيد هرضي وحياتنا هتختلف 

مش هيحصل والدليل علي كدة إني حجزت لك في أوتيل زي ما طلبتي وقعدنا فيه ليلتين بحالهم،بس ما شفتش في عنيكِ الفرحة عارفة ليه؟

دققت النظر إليه تنتظر باقي كلماته بتمعُن فاسترسل بنبرة بائسة يملؤها الإنهزام:

-علشان عُمرك ما هتحسي بالاكتمال والسعادة طول ما ناقصك الرضي،وده عُمرك ما هتوصلي له طول ما عينك مركزة مع الناس وعاوزة تعيشي حياتك نسخة من حياتهم

إتسعت عيناها وسألته بحِدة:

-إنتَ عاوز توصل لي إني بغير من مليكة؟ 

أجابها بإبانة: 

-أنا مجبتش سيرة مليكة،بس طالما أنتِ ذكرتي الموضع فحابب أقول لك كلمتين وياريت تحاولي تفهميهم،لا أنتِ مليكة،ولا أنا عمري هكون نُسخة ياسين،كل واحد ليه طبعه وبصمته الخاصة بيه في حياته،واللي مهما حاول يغيرها مش هيقدر وهيعيش تايه فاقد الهوية،لأنه هيكون مجرد مسخ تابع ومهما حاول عُمره ما هيرضي عن نفسه

نزلت دموعها بقهر وتحدث هو بنبرة جادة: 

-أنا هنام في الأوضة اللي جنب أوضة الولاد لحد ما أشوف الوقت المناسب،وأكلم عمك ووالدتك علشان ننهي موضوع الطلاق بكل هدوء 

واسترسل وهو يقترب من خزانته وينتقي إحدي مناماته البيتيه: 

-وما تقلقيش،كل حقوقك هتاخديها وزيادة،ومن ضمنهم البيت ده 

قال كلماته وهو يواليها ظهره ثم تحرك إلي الخارج وصَفق خلفهُ الباب دون النظر إليها مما جعلها تتخبط وترتمي فوق أقرب مقعداً وهي تهز رأسها بارتياب وتيهة،ما الذي حدث للتو،هل هذا حقاً ما كانت تسعي له وتريدهُ؟

أصبحت تائهة فاقدة الهوية لا تعلم ماذا تُريد من الحياة،لقد أصبح داخلها كصحراءٍ خاوية بعدما سلمت حالها لوساوس الشيطان وأنجرفت خلفهُ دون أدني مقاومة