رواية من روايات وقصص الكاتبة منى محمود
رواية القصة وما فيها

رواية جديدة (سكريبتات)

تنشر حصريًا 

على مدونة رواية وحكاية 

قبل أي منصة أخرى

الفصل الخامس

الجريمة الثالثة ١

عمارة ٩٧

الفصل الاول 

❈-❈-❈

_ في صباح يوم جديد في أحدي الاحياء الهاديه في محافظة القاهرة صحي عمرو وهو كله تفاؤل وفرحة مش قادر ينكرها ..

_صحيح هو كان لازم يفضل يلف من بلد ل بلد عشان يقدر يوصل ل طرف الخيط اللي بيدور عليه ، بس محسش بالراحة ولا الهدوء الا لما جه بيته وحـ ـس بريحة اللي راحو منه لسه موجودة في المكان ، يادوب بيقوم من علي السرير سمع صوت دعاء وشاديه بيتناقرو مع بعض ، هز دماغه بيأس من عادتهم دي وخرج يشوف ايه المشكلة ...

في الخارج 

شاديه:

_انا قلت لا يعني لا متقعديش تصدعيني بقا ريحي نفسك 

دعاء كشرت:

_يا ماما حرام عليكي هو اي اعتراض وخلاص بلا أي سبب كدة يعني 

شاديه كشرت:

_اه هو كدة من غير سبب عجبك ولا مش عجبك 

دعاء:

_عشان خاطر ربنا اسمعيني وحاولي بصي مجرد بس تحاولي تقتنعي ممكن 

خرج عمرو وقعد ما بينهم 

عمرو بنوم:

_صباح الخير .. في ايه علي الصبح 

شاديه ببتسامة:

_صباح الفل يا حبيبي مفيش حاجة متشغلش بالك انت احضرلك الفطار ؟

دعاء:

_هو ايه اللي احضرلك الفطار .. احضرنا يا أبيه لو سمحت دلوقتي انا جيلي فرصه تدريب في مكان كويس ماما ترفض ليه من قبل حتي ما تسمع المكان فين ولا اسم الشركة ولا اي حاجة ينفع كدة بزمتك 

عمرو:

_تدريب ايه دا ؟ 

شاديه :

_انا قلت مش موافقه 

عمرو ضغط علي أيديـ ـها يطمنها وكمل كلام مع دعاء 

  -قوليلي يا دودو تدريب فين ؟ تفاصيله ايه يعني ؟

دعاء بحماس:

_بص يا سيدي دي شركة صغيرة كدة في وسط البلد بتاعت اخو واحدة صحبتي مشارك فيها اتنين كمان هي بتدرب هناك بقالها شهرين وبصراحة فرق معاها جدا في العملي وانا عايزة اكون معاها وأخوها كمان هظبطلي المواعيد بتاعت الحضور والانصراف مع مواعيدها عشان مكنش لوحدي ولا اتاخر اوي وفي مرتب اه هو رمزي كدة بس اهو هقبض مرتب واشتغل ودي حاجة هتفرق معايا اوي يا أبيه انا بقالي تلت سنين من مكان ل مكان مش مستقرة عايزة احس بالحياة الروتينية دي اوي عايزة اشغل يومي واحس اني بعمل حاجة مفيدة أرجوكم توعدوني حتي تفكرو مش ترفضو كدة علي طول

عمرو :

_اكتبيلي اسم الشركة وعنوانها واسم اخو صحبتك كامل ع الواتس ويومين وارد عليكي تمام 

شاديه برفعه حاجب:

_بس انا مش موافقه يا عمرو ولا انا خلاص عشان عماله اطاوعك والف معاك من مكان ل مكان فكرت اني كبرت وخرفت ومبقاش ليا كلمة عليك ولا عليها ؟

عمرو وهو بيـ ـبوس ايديـ ـها:

_لا عاش وكان اللي يقول كدة حبيبتي ابدا والله ما دا قصدي كل الحكاية اني فاهم ومقدر خوفك عليها وعارف سببه وطلبت منها البيانات دي عشان نطمن انا وانتي ولو وافقت ونزلت هوديها وارجعها بنفسي ولو انا في ماموريه هخلي حد تبعي يقوم بالموضوع دا اطمني يا امي انا معنديش أغلي منكم والله 

دعاء بدموع:

_ماما عشان خاطري فكري تاني وحياتي عندك ولو كان رايك النهائي لا انا مش هتكلم والله واللي حضرتك عايزاه هو اللي هعملو 

عمرو:

_ها يا ماما قلتي ايه ابدء ادور واشوف المكان مناسب ولا اصرف نظر خالص ؟

شاديه:

_ماشي يا عمرو شوف يابني وربنا هو الحارس .. انا مش برخم عليكي يا دعاء انا خايفه عليكي حبيبتي 

دعاء:

_عارفه والله يا ماما ربنا يخليكي لينا وميحرمناش منك ابدا ابدا 

عمرو:

_طب انا هفطر بقا قبل ما انزل ولا ايه النظام 

شاديه:

_حالا يا حبيبي اختك وانا محضرين كل حاجة هقوم اجهزلك النسكافيه بتاعك مع الفطار 

_شاديه قامت وعمرو بص ل دعاء وابتسم وهو شايفاها فرحانة اوي أن بقا ليها فرصة تنزل وتشتغل ، شاديه ندهت علي دعاء تحط الاكل علي السفرة وعمرو لسه هيتحرك عشان يبدء يلبس جرس الباب رن ، راح يفتح واول ما فتح تنح ومبقاش عارف يتكلم 

سوما:

_صباح الخير 

عمرو:

سوما بصوت اعلي شويه :

_انت يا استاذ بقولك صباح الخير مش سامعني ولا ايه 

عمرو:

_

سوما 😒:

_دا ماله دا علي الصبح هي ناقصه عبط ولا اية (علت صوتها جامد ) انت يا استااااااااااااااااذ 

عمرو فاق اخيرا من صدمتة واتنحنح عشان صوته يطلع :

_احم ا اسف حضرتك مين وعايزة ايه ؟

سوما :

_انا سوما الساكنة الجديدة للشقة اللي قصادكم وعايزة طنط شاديه لو سمحت 

عمرو ملامح وشه اتقلبت من الصدمة للغـ ـضب في ثانيه واتكلم بحـ ـدة شديدة

عمرو :

_نعم ! ساكنة ايه وشقه ايه انتي مسـ ـطوله يا ست انتي ولا ايه علي الصبح 

سوما بغضب:

_مين دي اللي مسـ ـطوله يا جدع انت ما تحترم نفسك اللي مسـ ـطول دا اللي واقف شويه يفتح بؤة ويبرق وشويه يقفله 

عمرو:

_انا مش هرد عليكي عشان انتي واحدة ست بس 

سوما شهقت:

_ومالها الست يا روح خالتك ؟ ما تتعدل يا جدع انت ايه البلاوي اللي علي الصبح دي يا ربي 

عمرو لسه هيزعق قصادها خرجت شاديه جري من المطبخ 

شاديه:

_بس بس في ايه؟ ايه الزعيق دا مالكم 

عمرو بغـ ـضب مكتوم:

_ماما الست دي بتقول انها الساكنة الجديدة للشقة اللي قصادنا الكلام دا صحيح ولا هي مسـ ـطولة ؟ ولا ايه ؟

سوما:

_شوفي بردو بيغلط تاني ازاي و

قاطعتها شاديه ببتسامة:

_عشان خاطري خلاص يا سوما ميصحش كدة العمارة كلها هتسمع حسنا ( وبصت ل عمرو ) وانت بدل ما تزعق معاها كنت دخلت بهدوء سالتني وهقولك اه دي الساكنة الجديدة هي ووالدها اجرو مني الشقه دي الشهر اللي فات وملحقتش اقولك بسبب العزال والنقل 

عمرو بحدة:

_وحضرتك ازاي تعملي كدة من غير ما ترجعيلي وازاي اصلا تأجيرها تاني انا قلت محدش هيدخل الشقة دي تاني بعد اللي حصل فيها و

قاطعتة سوما بنبرة كلها تساؤل:

_ايه اللي حصل فيها ؟ احب اعرف لو مفيهاش إساءة ادب يعني 

عمرو بغضب:

_وانتي مال اهلك غوري يلا 

زقها ل برة ورزع الباب وسط دهشتها ودهشه شاديه من حاله الغضب الشديدة اللي هو فيها ، عمرو بص ل ماماته وكان بيحاول يهدي بس مش عارف كان حاسس ان دمـ ـة بيغلي فضل يضغط بايـ ـديه جامد علي بعض وبدء يتكلم 

عمرو :

_ماما فهميني اللي حصل دا حصل ازاي ؟ انا مش متفق مع حضرتك أن الشقه دي هتفضل مقفوله طول العمر وان اللي هتتأجر هي شقه ماجد بس ؟ حصل ولا محصلش؟

شاديه بتوتر:

_ح حصل بس بس يعني اصل انا سمعت واحنا في الصعيد يعني أن أصل 

عمرو :

_يا امي ابوس ايديك اتكلمي انا ع أخري 

شاديه اتكلمت بسرعه:

_اصل انا سمعت أن الشقة اللي يتـ ـقتل فيها ناس كتير لو مسكنتش وفضلت مقفوله العفاريت هتخدها ليهم ف خفت بصراحة وخليت البواب يسكنها ومردتش اقولك لانك مش هتوافق بس كدة

عمرو ضرب ايديه في الحيطة بقوة وساب ماماته ودخل علي اوضته ورزع الباب وراه ودعاء كانت وافقه شايفه كل دا بس مش قادرة تتدخل اول ما عمرو دخل اوضته قربت بسرعه من ماماتها

دعاء بحزن:

_قلتلك يا ماما اللي هتعملية دا غلط قلتلك عمرو مش هيسكت خصوصا بعد ما شوفنا اللي سكنة والشبه الفظيع بين سميه الله يرحمها وبين سوما بس انتي قلتلي انا هتصرف .. هنعمل ايه دلوقتي ؟ 

شاديه بدموع بتحاول تمنعها من النزول:

_ملكيش دعوة بيا اوعي كدة من وشي اوعي 

سابتها وخرجت من الشقه خبطت علي شقه سوما ومسحت دموعها بس سوما لمحتها وحبت متحرجهاش ف اتكلمت عادي 

سوما بزعل:

_اهلا يا طنط اتفضلي ادخلي بابا نزل المحل من بدري 

شاديه وهي بتدخل:

_حقك عليا يا سوما متزعليش من عمرو هو بس اتفاجا والله انا نسيت اقولو اننا سكنة الشقه معلش يا حبيبتي

سوما كشرت:

_انا مش عارفه بصراحة ازاي دا ابنك وأخو دعاء يلا المهم انا مش هزعل منه عشان خاطرك انتي بس والله غير كدة أنا كنت عرفتة والله 

شاديه ابتسمت:

_جدعة يا سوما من اول ما شوفتك وانا قلت انك جدعة وبنت بلد ودخلتي قلبي علي طول 

سوما ابتسمت:

_حبيبتي يا طنط انا كمان حبيتك انتي ودعاء اوي والله .. طنط هو احم هو يعني 

شاديه:

_عايزة تعرفي ايه حصل في الشقة مش كدة ؟

سوما بفضول:

_الصراحة اه هموت واعرف 

شاديه بحزن:

_من تلت سنين ونص الشقه دي اتـ ـقتل فيها دكتور عز جوزي وسميه مرات عمرو ابني وماجد صديق عمره وحاليا عمرو بيدور علي مرات ماجد اللي اختفت بعد الحادثه 

سوما يصدمة:

_يالهوي عليا وعلي سنيني السودا يا حظك المهبب يا سوما .. تلت جثـ ـث تلاته .. الناس كلها بيخافو يسكنو في شقه في قتـ ـيل واحد اجي انا وابويا الراجل الغلبان نقعد في شقه فيها تلت جثـ ـث .. 

بدأت تعيط بصوت عالي 

شاديه بحزن:

_بس بس يا سوما في ايه لكل العياط دا يعني انا غلطانة اني حكتلك اللي حصل وبعدين اديكي ساكنة بقالك شهر وشويه اهو بزمتك مش انتي بنفسك رايحة جايه تقولي الشقه ريحها خفيف ؟

سوما بخوف:

_اه اه اتشك في لساني قلت قلت كدة بس بس انا مش هقدر والله يا طنط مش هقدر اقعد هنا يالهوي عليا ابويا هيعمل ايه احنا ما صدقنا جينا في مكان جمب المعرض بتاعه اعمل ايه دلوقتي 

شاديه:

_يا سوما اهدي انا مش ناقصه والله كفايه اللي عمرو هيعملو فيا 

سوما لسه هترد سكتت فجأة وبرقت هي وشاديه بسبب اللي سمعوه

عمرو كان واقف بين. الشقتين وبيزعق ودعاء بتحاول تهديه

دعاء :

_ عمرو مالك بس اهدي كدة وصلي علي النبي البنت جوة لوحدها وباباها في شغله مينفعش اللي انت بتعملو دا 

عمرو بغضب :

_انا قلت اللي عندي هتخرج من الشقه دي دلوقتي يعني هتخرج تتصل بقا ب ابوها تتصل بالجن الازرق مش مشكلتي المهم تغور ف داهيه من هنا

سوما فتحت الباب وردت بغضب :

_جن لما يلهفك وغورة تاخدك انت في ايه مالك طايح كدة ومش همك حد هه اقولك انا كنت لسه بقول ل طنط شاديه اني مش هقعد فيها وماشيه بس ورحمة امي ما همشي وهقعد انا وابويا وورينا بقا هتخرجنا منها ازاي يا حضرة البيه الظاااااابط 

عمرو لسه هيرد عليها اتفاجا ب شادية بتقع علي الارض وفقدت وعيها دعاء وسوما كمان جريو عليها .. 

عمرو بخوف :

_ ماما .. ماما مالك ردي عليا .. ماما 

دعاء ببكاء :

_ماما ردي عليا والنبي ... ماماااا 

سوما بتوتر :

_شلها لو سمحت ع اوضتها واطلب دكتور بسرعه بدل وقعتها علي السلم كدة 

عمرو شال شاديه ودخل حطها فعلا ف اوضتها واتصل ب دكتور عرفه معاهم في نفس العمارة وسوما كانت واخدة دعاء في حضنها وبتحاول تهديها .. دقائق وكان عرفه بيكشف علي شاديه ولما خلص 

عمرو بقلق :

_ خير يادكتور في ايه مالها ؟

عرفه:

_ اهدي يا عمرو هي بس ضغطها عالي شويه واضح انها انفعلت شويه أو زعلت .. انا ادتها حقنة هتظبط الدنيا أن شاء الله بس لازم تاخد ادويتها في معادها وممنوع الانفعال يا عمرو انا ماكد عليك من زمان الموضوع دا 

عمرو :

_يعني هي كويسه دلوقتي اكيد .. مش محتاجة ننقلها مستشفى زيادة اطمئنان؟ 

عرفه:

_لا مش مستهله مستشفى هي هتفوق كمان ساعتين كدة وهتبقي احسن خدو بالكم منها يلا سلام عليكم 

خرج عمرو وصل عرفه لحد الباب ورجع دخل تاني علي شاديه كانت نايمة ودعاء وسوما مش ف الاوضه .. قرب منها ووطي باس دماغها 

عمرو بوجع:

_بتضغطي عليا اوي يا ماما اوي انا تعبان ومش قادر اااه يارب يارب الصبر من عندك 

غطاها عمرو كويس وخرج من الاوضه في نفس الوقت اللي سوما كانت خارجة فيه من اوضه دعاء وبتقفل الباب وراها براحة ..

بصو لبعض بتحدي وسخريه وعدت سوما من قدام عمرو وهي بتبصلة من فوق ل تحت وكملت في طريقها للمطبخ وقفها صوت عمرو 

عمرو :

_ خدي هنا يا شاطرة.. شقة ابوكي هي رايحة جايه فيها براحتك ... في ايه 

سوما :

_انا في بيت طنط شاديه .. (خدت نفس طويل وحاولت ترجع هاديه تاني) .. لو سمحت سبني الحق احضرلهم حاجة ياكلوها الاتنين تعبانين ونايمين من غير اكل عن ازنك 

سابته ودخلت المطبخ وهو فضل واقف مكانة باصص لطيفها باستغراب ازاي قدرت تكون هاديه كدة بعد الكلام اللي قالوهولها وكمان بتخدم أهله فضوله زاد ناحيتها وقرر يعرف عنها كل حاجة  

عمرو دخل قعد في اوضته عشان ميحرجش سوما طلع تلفونه وحاول يخلص شويه شغل بالتلفون ... عدي ساعه ونص باب اوضته خبط ومحدش دخل فهم أنها سوما قام فتح 

سوما بتوتر:

_ا احم اصل طنط شاديه فاقت و عايزة تشوفك بس دعاء لسه نايمة ف انا يعني جيت اخبط عليك عشان كدة 

عمرو ابتسم علي توترها:

_كل دا عشان تقوليلي كلم ماماتك ... مكنتش اعرف انك زي البنات بتتوتري هههههه 

سوما كشرت :

_انا قلتلها والله قلتلها خدي تلفونك ورني عليه يجيلك جزتلي اوي علي سنانها ايه العيلة دي ياربي 

مشيت من قدامه وهو ابتسم وراح علي اوضة ماماته

عمرو وهو بيحضنها:

_كدة يا شوشو تخضيني عليكي ؟ ينفع كدة 

شاديه كشرت :

_كبرت عليا يا عمرو وصوتك بدء يعلي في وجودي كتير اوي 

عمرو قعد قصادها:

_ماما حبيبتي انتي عارفه انه بيكون غصب عني وعارفه بردو انك اتصرفتي في حاجة كنا متفقين عليها ودي مش اي حاجة ( صوته اتخنق ) ماما انا مش هستحمل كل شويه اشوف الشقه بتتفتح وتتقفل مش هقدر حرام عليكي تعذبيني كدة 

شاديه بدموع:

_حبيبي انا مقصدش اعذبك بس خلاص عدت سنين وانت لسه واقف مكانك مينفعش كدة انت اللي واجع قلبي عليك ديما يا عمرو 

عمرو عينيه دمعت :

_انا يا ماما واجع قلبك ! طب ووجع قلبي انا اعمل فيه ايه ؟ النار اللي جوايا ومش بتهدي اعمل فيها ايه ؟

شاديه 😞:

_تنسي انسي ياعمرو عشان تقدر تعيش يا حبيبي عشان خاطري وخاطر اختك تنسي يا عمرو 

عمرو بغضب مكتوم:

_انسي ايه! ماما بقالك مدة بتقوليلي كدة وانا بتوه ومبحبش ازعلك بس بجد مش فاهم انسي ايه ! انسي أن ابويا اتقتل واللي قتلوة كملي عليا لما قتلو مراتي اللي ملحقتش اشبع منها وقتلوا صاحب عمري كله اللي كان اخ واكتر انسي ايه يا ماما انسي ايه حرام عليكي والله اللي بتعمليه فيا دا حرااام 

عمرو خرج من الاوضه بسرعه علي اوضته و سوما جريت استخبت في المطبخ عشان ميعرفش أنها سمعته دموعها كانت نازله صعب عليها جدا الوضع اللي هما فيه خدت نفس ودخلت ل شاديه اللي كانت بتعيط اوي 

سوما :

_استهدي بالله كدة يا طنط وبطلي عياط هتتعبي تاني يا حبيبتي

شاديه:

_ صعبان عليا ابني وخايفه عليه ... السكة اللي ماشي فيها دي اخرتها وحشه 

سوما كشرت :

_سكة اخرتها وحشه ! هو لامؤخذة بيشرب مخدرات ولا ايه ؟

شاديه بصدمة :

_مخدرات ! بقا ابني الظابط المحترم بشرب مخدرات انتي هتتبلي علي الواد 

سوما بسخريه:

_مش انتي اللي قولتي سكة اخرتها وحشه 

شاديه :

_انا اقصد أنه مش هيهدي الا لما يعرف مين عمل كدة واللي يخلي ناس يقتلو كدة بدم بارد لو حسو أنه هيوصلهم اكيد هياذؤه فهمتي بقا 

سوما :

_منطق بردو ... بس هو يعني ايه اللي حصل ازاي التلاته كانو مع بعض في نفس الوقت واتقتلو وليه ؟ بسبب شغل عمرو ولا ايه ؟ 

شاديه :

_فضولية اوي انتي 

سوما :

_انا ! لا ابدا والله دا بس عشان اطمن في الشقه اللي قاعدة فيها انا وبابا نظامها ايه وايه حصل فيها بس مش اكتر 

شاديه :

_لا قلتلك الشقه زي الفل اطمني ومع ذلك عشان ارضي فضولك دا الشقه دي كانت عيادة الدكتور عز ابو عمرو وكانت سميه كمان دكتورة وخلاها معاه في نفس العيادة عشان تكتسب خبرة وماجد كان لي في الشقه بصفتة مريض نفسي عن عز دخلو عليهم ملثمين قتلوهم ومراتة اختفت و 

دخل عمرو مرة واحدة قطع كلامهم ومن نظرة عينيه عرفت شاديه أنها غلطت تاني لما اتكلمت مع سوما واتاكدت أنه اليوم مش هيعدي علي خير ابدا

يتبع ...

إلى حين نشر الفصل الجديد للكاتبة منى محمود من سكريبت القصة وما فيها لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة