قراءة رواية أبلة فلافل كاملة

تنشر حصريًا على مدونة رواية وحكاية قبل أي منصة أخرى

قراءة رواية ونوفيلا أبلة فلافل

من روايات وقصص 

الكاتبة أسماء عبد الهادي

الفصل الأول

على عربية الفول والطعمية 

وقفت فلة تظبط العربية  

بتجهز كل حاجة علشان تبدأ شغلها في بيع الفول والطعمية، عربيتها مشهورة ومعظم الناس بتشتري منها لأنها واقفة في مكان حيوي في طريق المارة والعربيات 

جالها طفل صغير وقال

_صباح الخير يا أبلة فلافل 

اول ما فلة شافته ابتسمت وقالت

_صباح الهنا على قلبك يازقرد، تعالى خد ساندوتشاتك علشان المدرسة، الواد حودا مجاش معاك ليه، هو مش ناوىي يروح ولا ايه

_ ايوة يا أبلة مش راضي فضلت اتحايل عليه انا وامي ومفيش فايدة فأبويا قاله خليك يالا معايا وانا هبقا أخدك نطلع على العربية سوا.

فلة قالت بغيظ

_انا عارفة ان ابوك هو اللي هيبوظ الواد، ونفسه ومنى عينه ان حودا يسيب المدرسة ويطلع على العربية معاه، بس على مين وربنا ما هسيبه يعمل اللي هو عايزه

زقرد قال بخوف 

_هتعملي ايه يا أبلة فلافل 

_هروح اجيبه من قفاه ... بقولك ايه يا واد يا زقرد استنى هنا خمسة احرس عربية الفول دي لحد ما ارجع واوعى حد يغفلك ويأخد حاجة من غير ما يدفع حقها هقليك قي زيت الفلافل ده لو حد غفلك ياض

_اطمنى يا ابلة ده انا زقرد انتي ناسية اني كنت بقف معاكي اساعدك في الاجازة

_ ماهو المشكلة اني مش ناسية  بس ماشي يا زقرد، هعتمد عليك، انا مجهزة كم ساندويتش فول على كم ساندويتش فلافل علشان تبيعه علطول لحد ما ارجع.

_ماشي يا أبلة روحي اطمني 

انطلقت فلة بأقصى سرعتها عل بيت زقرد اللي جنب بيتها وخبطت ع الشباك وهي بتنادي 

_واد يا حودا انت يا واد... انت يا زفت اصحى علشان المدرسة بدل ما اجي اكسرلك دماغك 

خرجلها ابوه من باب البيت وقال

_ما تهدي علينا يا فلافل هو في حد يخبط كدا ع الصبح قلقتي منامي وانا اللي سهران على العربية طول الليل

_صباح الخير يا عم شعبان، انا عارفة انك لسه منمتش علشان كدا بخبط بقلب جامد، بقولك ايه ابعتلي الواد حودا 

_لا حودا فاكس من المدرسة وهيطلع معايا على العربية بالليل اهو يجيبلوا قرشين يساعدوا على المعيشة

_احنا مش اتكلمنا في الموضوع ده كتير يا عم شعبان وقلتلك سيب حودا يكمل تعليمه وانا هتكفل بيه

_الواد مش حابب التعليم ولا عايز يروح المدرسة من أصله، أغصب عليه عليه يعني، وبعدين هو هيجيب الديب من ديله يعني ما كله محصل بعضه في الاخر، هما يعني اللي اتعلموا اخدوا ايه، 

_اخدوا كتير يا عم شعبان خرج نفسك انت من الموضوع ده وسيب الواد يروح المدرسة متبوظوش زيك 

_انا بايظ يا فلافل ماشي مش هرد عليكي علشان ابوكي راجل غلبان وجدع في حقي دايما 

_يا خويا ماهو نفس العينة زيك بالظبط، يطلع على العربية طول النهار والقرشين اللي يكسبهم يروح يقعد بيهم على القهوة ويرجع قفاه يقمر عيش، وجيبه مرقع وراسه ممسوح زي الطبق الصيني، اسكت اسكت يا عم شعبان سيبني ساكتة احسن 

_ايوة خليكي ساكتة، لكن لما بتفتحي، لسانك بيكون زي السوط بتردحي ومحدش بيقدر يوقفك

_الله مش على الحق يا عم شعبان انت هتفتري عليا ع الصبح 

_لا افتري عليكي ولا تفتري عليا، روحي شوفي يا ختى مصلحتك امشي

_لا انا مش متعتعة من هنا الا لما اخد حودا في ايدي 

قالتها وخبطت تاني على شباب اوضة حودا

ورجعت كملت كلامها

_لأحسن هو لو مقامش بالزوق هدخل اجيبه بالبلغة اللي في رجلي ومن فين ما يوجعك هديه.

شعبان شوح بايده وقال

_اعملي اللي تعمليه انا داخل انام

_روح يا خويا ما ده اللي انت فالح فيه النوم وبس 

_بتقولي حاجة يا فلافل 

_لا يا خويا، بقولك نوم الظالم عبادة 

_ماشي يا يا فلافل مقبولة منك علشان...

_عارفة علشان ابويا بيظبطك ع القهوة عرفنا اتكل على الله يا عم شعبولا اتكل

قالتها وخبطت لثالث مرة على الشباك وقالت

_ورب الكعبة هعد لغاية عشرة ان ما خرجت يا حودا و قفت قدامي لهتشوف هيحصلك ايه

جه حودا جري وهو بيحاول يلبس شنطته وقال بخوف 

_خلاص خلاص جيت اهو يا ابلة فلافل... ابو اللي يزعلك يا ابلة 

مسكته من هدومه وقالت

_انت ياض مش هتتعدل بقا، كل يوم هتغلبني كدا علشان تتنيل تروح المدرسة

_هروح اعمل ايه بس يا ابلة، انا بمون هناك زي طور لاهي في برسيمه معرفش الالف من كوز الدرا 

_ياخويا هتعرف اصبر انت على نفسك وهتتعلم،  لكن لو متعلمتش  هتندم انك مكملتش تعليمك اسألني انا

_اهو طيب انتي مكملتيش تعليمك وانا هعمل زيك بالظبط، انا داخل اكمل نوم ولا اقولك فيه فيلم عجبة بيتعرض الوقتي هموت عليه وعلشان كدا مكنتش عايز اروح النهاردة 

فلة قلعت اللي في رجلها وشوحته بيه في نافوخه فحودا صرخ من الالم 

وبعدها مسكته من قفاه وقالت

_سمعني يلا قولت ايه تاني كدا 

_خلاص يا أبلة هروح هروح ابو اللي يزعلك يا شيخة 

_انجر يا خويا قدامي، الحق زقرد ليكون عك الدنيا ع العربية قدامي

_طيب ماشي بس متزقيش يا ابلة 

ضربته تاني على دماغه 

_امشي ياض يا حودا 

_حاضر حاضر ربنا على المفتري

مسكت حودا من هدومه وراحت على العربية بتاعتها

لقت طوابير من الناس والأطفال اللي عايزة ساندويتشات عماله تقول _يلا يا ابني اتأخرنا فين الساندويتشات، هي فين فلافل مش باينة النهاردة 

وزقرد قاعد ع جنب وماسك الساندويتشات وبياكل وبيقول

_اصبروا بس لما افطر الاول، خليني اعرف ابيع ، قربت اخلص رابع ساندويتش انتوا مستعجلين على ايه الصبر حلو 

قربت منه فلافل ومسكته من هدومه وقالت 

_انت بتعمل ايه يا مصيبة ،ينيلك اكتر ما انت متنيل انطق قول انت بتهبب تعمل ايه ومش بتمشي الزباين ليه 

_يعني كنت امشيهم! انا والله كنت ناوي اطفشهم لحد ما ترجعي وانا اخلص فطاري، بس قلت حرام يمكن لو طفشتهم يشتروا من حد غيرك فسبتهم ملطوعين يا ابلة لحد ما ترجعي شوفي انا شاطر ازاي

_شاطر ده انا اللي هشطرك نصين يا متخلف انت انا بقولك تمشيهم بعني تشوفهم عايزين ايه وتبيعلهم ما انا مجهزالك الساندويتشات يا غبي علشان تبيعهم تقوم تسيبهم وتقعد تأكل انت 

_الله جعان وامي مفطرتنيش وقالتي روح لفلافل تفطرك 

_ايوة كنت خلفتكم ونسيتك، 

_يعني مكنتيش عايزة تفطريني دول مكانوش ساندويتشين يا أبلة 

_اتنيل يا خوا اطف... انا عارفة قلبي الطيب ده اللي هيوديني ورا الشمس 

_بعيد الشر عنك يا ابلة

_اتنيل يالا حصل اللي في ايدك وخد اخوك ومشوفش خلقتك وعلى المدرسة

_ماشي يا ابلة فلافل 

سابته فلة وراحت على العربية واعتذرت من الزباين 

_معلش يا جماعة حقكم عليا ف التأخير ده... اتفضلوا الساندويتشات اهي وعليهم الطرشي هدية 

واحد قال والواحد ده من ارزل زباين فلة ودايما يضايقها

_جيتي في جمل يا فلافل الطرشي ده هدية؟

_ياخي مش عاجبك سيبه وامشي الحق عليا 

_لا خلاص هاتيه، ده انتي استطباحيتك هم

_اسطباحيتك زي وشك يا خويا 

الراجل مشي واول ما فلة شافت الزبون اللي بعده ابتسمت وكانت ست كبيرة في السن 

سابت فلة مكانها وراحت عندها وباست أيدها وقالت

_ازيك يا حجة عاملة ايه 

_ازيك يا بنتي قلقتيني عليكي لما ملقتكيش واقفة على العربية 

_لا اطمنى يا خالتي انا كويسة بس كنت بجيب الواحد حودا من افاه كان عايز يزوغ من المدرسة زي عادته 

_ضحكت الست العجوزة

فقالت فلة بارتياح 

_طالما ضحكتي كدا يبقى الحمد لله مزاجك حلو يا خالتي

_الحمد لله رب العالمين

_طب خير بشريني 

_لا لما تخلصي ابقي عدي عليا وانا هبقا احكيلك 

_لا ده انا مستنياكي على نار وبالمرة اسلم على البت تونا اللي مبتسألش دي 

_اهو الموضوع بقا بخصوص تونا 

_حلو يبقى عريس، هتلاقيني ناطة في البيت اخلص بس الفول هنا واطلع أكمل تشطيب العربية التانية اللي بشتغل عليها بالليل  واشوف أمي واخواتي واذاكر للمقاطيع اخواتي واجيلك يا خالتي ام تونا 

ضحكت الحجة ام تونا وقالت

_ لا مش عريس، لما تيجي هقولك  ربنا يعينك يا بنتي.

خلصت فلة شغل على عربية الفول، وراحت تجهز عربية الكبدة اللي بتشتغل عليها بالليل وبعد ما جهزيت كل حاجه رجعت على بيتها و سمعت  اللي بينادي بصوت عالي

_اما ياما انا جعان طبخت لينا اكل ايه النهارده

ضربته فلة على قفاه وقالت

_الباكابورت بتاعنا عامل ايه النهارده اخبار المدرسه ايه

اخوها بص لأمه وهي بتحط الاكل علا السفره وقال

_ هابقى اقول لك لما اخلص اكل ما باعرفش اركز في حاحة وانا جعان

 قالت

_ لا وربنا حتى وانت شبعان انت التركيز عندك معدوم جاتها هنيله اللي عايزه خلف 

اخوها قال وهو بياكل ومش مهتم بكلامها

_ اللي يقول الكلام ده امك مش انتي

_يا اخويا هو انت حاجه بتحوق فيك سواء كنت انا اللي باقوله ولا امك

 بقية اخواتك فين خلينا اذاكر لهم قبل ما انزل

 امها قالت

_ هتنزلي ثاني يا فلافل

_ ايوه يا ماما

 هاكل لقمه وانزل اكمل تجهيزات العربيه 

_طب حتى يا بنتي ادخلي ريحي شويه ده انتي من صباحية ربنا واقفه على رجلك

_ هاريح لما ارجع بالليل يا ماما 

_يا بنتي انت بتحملي نفسك  فوق طاقتها

_ما انت عارفه يا ماما البير وغطاه ولو ريحت انا.... اخواتي هيموتوا من الجوع.

فجاه شافت فلة اخوها الثاني داخل من الباب وبيتسحب فجريت عنده ومسكته من قفاه وقالت

_ قفشتك كنت فين يا واد انت وياك تكذب علي بحرف واحد

 اخوها اللي ياكل  اسمه حمدي قال _اوبا كابسه بالرز والحمه.. الله انا نفسي فيها وهموت وادوقها ولو مرة واحدة 

فله قالت

 اتله يا ياض وبص في طبقك خلص اكلك  علشانتدخل تتنيل تذاكر

حمدي قال 

_ وربنا ده ظلم مدرسة ومذاكرة مرة واحدة كدا كتير كتير وربنا 

قالها وهو بيحشي بوءه بالأكل 

فلة هزت دماغها بمعنى انه مفيش فايدة 

وبصت لاخوها وقالت

_وانت التاني هتفضل واقف وواكل سد الحنك كدا كتير انطق يالا كنت فين ولما خرجت من المدرسة مرجعتش البيت علطول ليه

أبلة فلافل

فتح بوءه وقال

_عايزة الحقيقة ولا ابن عمها 

_هعوز ابن عمها ليه يا خفيف هصاحبه مثلا .. انت يالا كنت فين 

جه يتكلم فقالت بتحذير

_الحقيقة ها والا لو عرفت انك بتكذب عليا هعلقك وانت عارفني مش بهزر في الحاجات دي 

الولد خاف وقال 

_هقول هقول ااا انا روحت العب كورة بعد المدرسة... والله كنت ناوي ارجع علطول يا أبلة فلافل بس اللعب غواني والوقت سرقنا 

اخته يابته وضحكت وقالت 

_بتحب الكورة اوي كدا يلا 

_اوي اوي يا أبلة فلافل

حس انه فلت من عقابها فلقى اللي بتضربه على دماغه وبتقوله

_متتكررش تاني يا حلاوتهم ها... لعب الكورة ليه وقته بعد ما تخلص كل اللي وراك... ترجع من المدرسة ع البيت تتغدى ونشوف واجبك ومذاكرتش بعد كدا تلعب براحتك، سامع ولا اقول كمان

_اشمعنى انا ما كل العيال بتلعب في الشارع

فلة شمرت ايدها واستعدو علشان تضربه وقالت 

_تعالى اقولك انا اشمعنا 

الولد هرب وقال 

_لا خلاص يا أبلة عرفت ... عااا الحقوني

حمدى قال وهو مستمر في الأكل

_الواد راح في خبر كان، حلو أكل انا نايبه بقا، وان شالله ما حد حوش، يا خسارة كان واد مسلي، بس يلا  راح لقدره 

بعد مدة قدرت فلة انها تجمع اخواتها وتقعدهم علشان يذاكروا، 

_اوف أخيرا يخرب بيتكم، ده انا لو كنت بحرر سينا مكنتش هتعب كدا، هدبتوا حيلي الله يهدكم 

 ولما كانت هتمشي تروح تشوف اللي وراها لقت ان اخواتها متنحين ومش مركزين فقررت تفضل معاهم ساعتين تذاكرلهم 

وهي بتحل معاهم شوية تدريبات وقرأت السؤال مين هو موحد القطرين

_يلا اختاروا الاجابة الصحيحة واعملوا عليها دايرة

اخواتها فضلوا متنحين وبيبصوا للسؤال يمين وشمال 

بعدها حمدي قال

 يعني اعمل دايرة فين يا ابلة فلافل

_على وشي يلا عارف وشي يالا عارف وشي .. انتوا هتشلوني ... قوموا من وشي يخربيت مخكم التخين ده 

حبيب اخوها قال

_من أكل الفول بتاعك اللي كل يوم بتخلينا نحشه هو اللي خلى مخنا يصدي ملناش دعوة انتي السبب 

_الفول كله بروتين يا جاهل، وبعدين يا روح باباك انت عايز تاكل ايه غير الفول ها.. كنت مولود يالا في مديني ولا الشيخ زايد وانا معرفش، عيشوا عيشة اهلكم يخربيتكم هديتوا حيلي واللي يشوفني يعطيني قد عمري خمس مرات 

حمدي قال

_انا جعان مبعرفش اركز وانا جعان بدوخ واحس اني هرجع 

_روح الله يقرفك، ولا ما انت لسه بالع خمس ساندويتشات غير الاكل ، ايه كرشك ده بالوعة 

حبيب قال

_سديها ليه يا أبلة... علشان يبطل حش

_لا ده انا هعمل حاجة تانية غير كدا 

قالت كدا وقلعت الشبشب فأخواتها طاروا وقالوا

_اجري يالا الحرب العالمية التاسعة هتقوم .

_تعالى هنا يا فاشل انت وهواااا 

❈-❈-❈

الاب كان قاعد بيكلم ابنه

_ها يا سيف عملت اللي قلت لك عليه 

_ايوه يا بابا عملته بس انا مش عارف لازمته ايه كل مره

_ هو ايه اللي لازمته ايه كل مره انت عارف انت بتقول ايه

_ يا بابا انا فاهم ومقدر كويس بس للاسف احنا بقى لنا سنين بنعمل الاعلان ده وما فيش اي نتيجه او فائده ما فيش اي معلومه دلتنا عنها خالص ولازمتها ايه المصاريف دي والعشم اللي حضرتك بتتعشمه على  الفاضي انت كنت خلاص بدات تتاقلم مع الامر الواقع وتستسلم لانها خلاص ما بقتش موجوده وما صدقت ان صحتك بدات تتحسن

_ لا ...ان كنت مفكر اني استسلمت .. واتأقلمت على حياتي من غيرها فانت بتتوهم انا عمري ما هانسى اختك ابدا وعلى طول بافكر فيها ليل ونهار دي بنتي عارف يعني ايه بنتي ...حتة من قلبي وروحي كمان ربنا يرجعها لينا بالسلامه و عمري ما هبطل ابدا اني ادور عليها او اعمل اعلانات في الجرايد ومتاكده ان شاء الله ربنا هيردهالي ولو بعد حين 

_يا بابا بس حضرتك كده بتتعب وبتفضل تتعشم كثير وانت عارف الناس ما بتصدق الاعلانات اللي زي دي وبيجروا عليها علشان ياخذوا الجوايز وبس ما يهمهمش اذا كان حقيقه ولا بيخدعونا وفي الاخر احنا اللي بنتعب،فاكر اخر مره لما واحد اتصل بنا وقال انه شاف نفسه مواصفات اختي وادانا العنوان ولما رحنا هناك كان عنوان بيته هو واترجانا  اننا نساعده لانه محتاج وهو فعلا مشافش اختي ولا يعرف عنها حاجه بس عمل كده علىشان نروح عنده نساعده شفت الناس استغلاليه ازاي علشان مصلحته عشمنا  وجابنا  على ملا وشنا عنده.... شفت قد ايه الخيبه اللي كانت على وشك والحسره اللي كانت ماليه عينيك علشان ما لقيتهاش عرفت ليه بقى يا بابا حضرتك انا متضايق من الاعلانات اللي بنعملها دي 

اتنهد احمد وعينه لمعت 

_يا سيف مش هابطل اعلانات لحد اخر يوم في عمري وهافضل متعلق بخيط الامل لحد ما الاقيها ان شاء الله

_ ماشي يا بابا زي ما تحب بس ارجوك خذ بالك من صحتك واهتم بالعلاج زي ما الدكتور قال انا ما ليش غير حضرتك 

_ربنا يبارك لي فيك يا ابني

❈-❈-❈

قعد جنب تسنيم وقال 

_تونا يا بنتي انا كنت عايز اعترف لك بحاجة

_ خير يا بابا انا مع حضرتك

 امها ناديت عليها وقالت

 بنت يا تونا خلصتي المطبخ ولا لسه _اه يا ماما تشطبته وعملت الاكل كمان تحبي حضرتك اغرف الاكل دلوقتي ولا ايه

 _ايوة يا ريت دلوقتي علشان ابوكي يأكل وينزل على شغله.

_ حاضر يا ماما.... بابا حتقول اللي كنت عايز تقوله ولا بعد الغدا لا خلاص خليها بعد الغداء 

قعدوا كلهم يتغدوا وبعد كده تونا قامت وغسلت الاطباق ونضفت المطبخ تاني وبعدين قعدت على الكنبه لقيت ابوها  وقال وهو ماسك في يده جريده 

_تونا يمكن جه الوقت اللي اعترف لك فيه بالحقيقه

_ حقيقه ايه يا بابا مش فاهمه

_ الحقيقة يا بنتي انك مش بنتنا 

_نعم يا بابا حضرتك بتقول ايه

_ للاسف هي دي الحقيقه يا تونا كنت راجع من شغلي بالليل فلقيتك واخذتك عندي البيت لان الوقت كان متأخر وكان الجو برد فصعبتي علي اسيبك في البرد ده لوحدك فاخذتك ودفيتك وجبت لك اكل وفضلت بعدها اسالك على اهلك او اي احد يعرفك لكن ما كانش فيه اي خيط يوصلني لاهلك فقررت انا ومراتي اننا نربيكي  عندنا كانك بنتنا وخاصه اننا ما عندناش اطفال

تونا عيطت وتاثرت قوي انها مش بنتهم وقالت 

_وانا ...كان عندي كم سنه وقتها

_ كان عندك حوالي ثلاث او اربع سنين يا بنتي بس يعلم ربنا اني ربيتك وحبيتك كانك بنتي بالضبط _عارفه يا بابا متاكده من ده وانا بالرغم من  اللي حضرتك قلته انا هافضل اعتبرك بابا واعتبركم عائلتي اللي ما ليش غيرها في الدنيا 

_يمكن جيه الوقت يا تونا انك ترجعي لاهلك

_ اهلي هو حضرتك تعرف اهلي مين

_ لا طبعا مش عارف

_ طيب مش مهم مش هتفرق المهم اني قاعده معاكم ما دمت مش عارفه مين اهلي ولا حضرتك زهقت مني وعايز تخلص مني 

_لا طبعا انت بتقولي ايه لو كنت عايز اخلص منك زي ما انت بتقولي مكنتش هاستنى العمر ده ابدا انتي بنت فعلا يا تونا انتي عارفه انا متعلق بيكي قد ايه 

_حبيبي يا بابا عارفه ومتاكده ربنا يخليكم ليا.... بس.. ممكن اعرف حضرتك ليه ما قلتليش زمان وليه في الوقت ده قلت لي الحقيقه

_ بصراحه انا مكنتش عايز اعشمك بحاجه او انك تفضلي متضايقه ومش عايشه معنا على راحتك ومش عارفه مين اهلك ولا حتى توصلي ليهم ازاي

_ يعني افهم من حضرتك دلوقت انك قدرت توصل لهم مثلا علشان كده جيت تقول لي في الوقت ده بالذات _تونا بصي كده الاعلان ده واقريه كويس دي عيله بتدور على بنتها  تايهة منها من سنين هتلاقي نفس المواصفات كلها تقريبا تشبه لك،

تونا مسكت  الجريده وبدات تقرا الاعلان وهي مش مصدقه هل فعلا دول اهلها الحقيقيين ولا لا وهل معقوله حياتها تتقلب كده  في غمضه عين ...الناس اللي كانت مفكرها اهلها ما يطلعوش اهلك ويطلع في ناس جديده هي اهلها كانت حاسه بالتوتر والاضطراب علشان كذا سكتت ومعرفتش تتكلم فحسن الراجل اللي مربيها قال

_انا قررت اخذك على العنوان اللي مكتوب في الاعلان ده يمكن يطلعوا فعلا هم اهلك 

_وافرض مش اهلي

_ ساعتها يا تونا مش هنكون خسرانين حاجه هترجعي تعيشي معنا هنا ثاني _بابا انا خايفه مش عايزه اروح

_ يا بنتي خائفه من ايه انا معاكي _دول ناس انا مش عارفاهم اول مره اشوفهم ازاي اكون مأمنه ليهم 

_انتي بتقولي ايه يا تينيم هما لو اهلك  هيحطوكي جوه عينيهم متخافيش انا مش هاسيبك الا لما اتاكد انك فعلا بنتهم

_ ايوه بس انتوا  هتوحشوني قوي

_تونا يا بنتي بلاش تستبقي الاحداث، اطمني وسيبيها لله وان شاء الله خير.

جت فلافل وقالت بمرح 

_ خلاص يا بت يا تونا هتفوتينا وتمشي! اخيرا لقيتي أهلك يا مضروبة

_فلافل انتي كنتي تعرفي الحقيقة؟

_اومال يا بت داني فلافل مفيش خافية تفوتني في البلد هنا، فرحتلك اوي يا حبيبتي، ده احنا غلبنا طول السنين اللي فااتت ندور على اهلك بس مش بنوصل لحاجة

_طيب ليه مقلتليش 

_هقولك ايه بس،مش لو كنا نعرف أهلك مين كنت اقولك... لكن اقولك وانغص عليكي حياتك واسيبك عايشة في قلق وحيرة ليه، انتي كنتي عايشة. بالك مرتاح مع ابوكي وامك عايزة ايه تاني 

تسنيم قعدت ونزلت وشها في الارض

_ياريتكم ما قلتوا كنت عايشة ومبسوطة

فلافل خلعت اللي ف رجلها وقالت

_انا شكلي هضربك بالبلغة اللي في رجلي يا بت يا تونا

_بتكلم جد يا فلافل

_يا بت ده اللي عرفته ان أهلك ناس اغنيا وواصلة يا بت اخيرا هتقبي غلى وش الدنيا 

_مش لو كانوا اهلي يا فلة 

_سيبها لله وبكرة تروحي تشوفي الحكاية دي 

_يلا فتكم بعافية أنا رايحة اجهز عربية الكبدة 

_ربنا معاكي يا حبيبتي

يُتبع..