قراءة رواية أسود الداخلية كاملة

تنشر حصريًا على مدونة رواية وحكاية قبل أي منصة أخرى

قراءة رواية أسود الداخلية

من روايات وقصص 

الكاتبة أسماء عبد الهادي

الفصل الرابع عشر

قربت البنت من دولاب سليم وقررت إنها تاخد أي لبس من بتوعه وتتنكر بيهم وتخرج من البيت على إنها هو وبكدا محدش هيشك فيها خالص 

 لبست الهدوم بسرعة ولبست  الجاكيت وحطت الزعبوط على راسها واتسحبت وميشت من البيت بهدوء 

لكنها مكانتش تعرف إن فيه عيون تبع أيهم مراقبة بيت سليم وأول ماشاف حد خارج من البيت إتصل بيه 

_ ياباشا أنا كنت براقب بيت سليم زي ما طلبت وشايفه خارج حالاً من البيت بس خارج يتسحب وكأنه عامل عمله ياباشا 

أيهم بتوعد

 _ بتخطط لإيه ياسليم ... إسمع عينيك عليه ميغبش عن عينيك لحظة واحدة وشوف بيعمل إيه النيلة دا 

_ ماشي ياباشا اللي تؤمر بيه 

أيهم قعد على الكنبة ومدد رجليه ومد ايده ومسك تفاحة وأكلها بنهم وهو بينادي على الشغالة 

_ كاترينا 

جت بسرعة

_  تحت أمرك أيهم باشا 

_ انزلي تحت بسرعة واطلبي من فتكات تطلعلي البنت إياها اللي موصي عليها في أوضة لوحدها... أنا مزاجي رايق الليلة وعايز أروق أكتر 

 كاترينا

_ تحت أمرك أيهم باشا 

أيهم سرح في البنت اللي تقريباً كدا قلبه أتعلق بيها 

_ وأخيراً ياقمر إنتي... رغم إني شوفت كتير وقليل وملكات جمال إلا إني حاسس إنك هتكوني مختلفة ...متحمس للتجربة الجديدة دي قالها وكمل أكل التفاحة وبعدين رمى الباقي منها على الأرض بإهمال 

❈-❈-❈

في العربية مازن راكب جمب عدي اللي بيسوق 

مازن بغيظ 

_ عاجبك اللي بيعمله قصي فينا دا .. يعني إيه مقدرش أحضر خطوبة أخويا وبنت عمي كان هيجرا إيه لو استنينا نصاية لحد ما شوفوا بيلبس الدبل وأكل حتة جاتوه ها 

ضحك عدى 

_اه قول كدا بقى ياأخينا إن همك على بطنك 

_ طب قولي إنت مش حاجة تغيظ 

_ يابني فككك وركز في المهمة دي أرواح ناس وبعدين دي مجرد خطوبة وكمان أمك هتعينلك نايبك متخافش قالها عدي وضحك 

وبعد شوية وصلوا للمكان المطلوب وقال 

_ وصلنا 

نزلوا واتسحبوا من العربية بشويش وشافوا المهربين وتم تبادل إطلاق النار لحد ما وقعوهم 

قرب عدي ومازن منهم 

مسك عدي شنطة الحشيش

ومازن فضل يدور على أي حاجة تانية معاهم أو أي دليل 

عدي قال 

_ معقولة هي دي المهمة اللي متبلغ عنها؟؟ 

مازن 

_ فيه حاجة غلط ولا بيلعبوا على الرايق إستعداداً لمهمة كبيرة ولا إيه بالضبط 

عدي 

_ فعلاً أنا مش مطمن ولسه عدي مخلصش كلامه  

سمعوا صوت إطلاق نار عليهم 

مازن 

_ ألعب ياعم أهم جم 

وفعلاً لقوا بقية العصابة بتهجم عليهم 

 عدي  وقف بفرحة 

_ أيوة كدا تعالوا خليني أقدر أسلك سناني

 

 بدأ عدي ومازن يضربوا نار على المهربين وقدروا يتغلبوا عليهم ببراعة وبكل سهولة 

ولما خلصوا خذوهم كلهم على العربية علشان يسلموهم نفضوا ايديهم 

 عدي قال

_ بردو حاسس إن في حاجة ناقصة بس إيه هي مش عارف 

مازن

 _ يابني كبر المهمة تمت بنجاح ودا المطلوب 

❈-❈-❈

أدهم لسمر 

_ سيبك من كل دا دلوقتي لأن دا مش وقته وأنا مش فاضيلك .. كل اللي عليكي تعمليه إنك تدخلي تلبسي علشان نلبس الدبل ونخلص يلا 

ردت بغيظ 

_على فكرة أنا مش ظابط عندك علشان تعطيني الأوامر 

أدهم بصلها بنظرة مرعبة 

_ كرري اللي قولتيه دا تاني 

سمر خافت وجريت من قدامه على أوضتها 

فغصب عنه إبتسم رغم ضيقه منها 

وبعد نص ساعة كان أدهم بيلبس سمر الدبل وحنان ونادية بيزغردوا والكل كان فرحان 

❈-❈-❈

جه لأدهم إتصال من عدي وحكاله كل اللي حصل 

أدهم 

_ معاك حق فيه حاجة مش مضبوطه بتحصل وهنعرف إيه هي واللي متأكد منه إنهم كانوا عارفين بإننا هنداهمهم .. عامة ياعدي سلم المجرمين للمركز وارجعوا لحد مايجيلنا تعليمات تانية 

عدي 

_ تمام ياباشا 

أدهم خلص مكالمته مع عدي وبص لمرام بشك وبص لقصي اللي فهم إن أدهم عايز بتكلم معاه 

فدخل قصي على أوضته ووراه أدهم وقفل الباب كويس 

قام قصي وقف 

_ مالك إيه اللي شاغك 

_ نور 

_ مالها 

_ أنا شاكك فيها وكل يوم شكوكي بتزيد يوم ورا التاني 

قصي

 _ وإن قلتلك إن شكوكك دي في محلها مش هيا نور فعلاً 

أدهم فتح بوءه 

_ إنت بتقول إيه 

قصي 

_ جتلي تعليمات إنهم لقوا نور الحقيقية ومهمتك دلوقتي إنت والأسود تروحوا تنقذوها وتحطوها في مكان آمن محدش يعرفه 

❈-❈-❈

فلاش باااك 

إتصل واحد من رجالت قصي بيه 

_ يا وحش في حاجة غريبة بتحصل في بيت اللي إسمه سليم اللي كلفتني النهاردة بمراقبته 

_ خير يا عزت 

_ في حد خرج يتسحب من بيته 

_ مش يمكن سليم نفسه ؟ 

_ لا ياباشا سليم في ڤيلا أيهم 

_ غريبة أومال مين الحد دا ... هو ليه علاقات نسائية ولا إيه !! 

_ مش عارف يا باشا 

_ طب إسمع عينيك عليه وأعرف هو مين وبلغني

_ أمرك ياوحش 

عزت لاحظ إن نور واقفة في الطريق وبتحاول توقف أي عربية 

فجري بسرعة وركب التاكسي اللي هو عامل إنه سواقه وقرب منها وقال 

_ تاكسي يابيه!! 

نور جريت بسرعة على العربية وركبتها من غير ما تتكلم 

كل دا والراجل اللي تبع أيهم ماشي وراهم وأول ما شاف نور راكبت العربية ركب عربيته ومشي وراهم 

مشي عزت شوية بالعربية وبعدين قال 

_ على فين يابيه 

نور فضلت تفكر هتروح فين 

فقالت في نفسها 

_ هروح فين لو رجعت لأهلي هيعرفوا طريقي ومش بعيد يأذوهم أروح فين بس ياربي وأنا مش عارفة مين الناس دي وعايزين مني إيه 

عزت 

_ مردتش عليا يا باشا على فين

نور 

_ ااا أطلع من المنطقة دي وخلاص وبعديها هقولك 

عزت 

_ لامؤاخذة أنا فكرتك راجل من هدومك معلش اللي مايعرفك يجهلك بردو 

ردت بتلعثم من خوفها

_ مع... معلش حصل خير بس من فضلك سوق بسرعة 

_ حاضر 

وبعد شوية 

_ ياآنسة ممكن سؤال معلش 

نور بتردد 

_ سؤال إيه 

_ هو إنتي هربانة من حد.. فيه عربية بتلاحقنا من أول ما طلعنا

نور بصتله بزعر وجت تبص وراها 

لكن عزت قال

_ لا أوعي تبصي وراكي علشان ميعرفش إننا عرفنا إنهم بيلاحقونا 

 فضلت نور تترعش في مكانها وخايفة يمسكوها في أي وقت 

فقال عزت 

_ لو فيه حاجة أنا أقدر أساعدك ياآنسة 

_ بجد ياعمو من فضلك ساعدني دول عصابة كانوا خاطفني وأنا هربت منهم 

هنا عزت طلع الكارنيه بتاعه وأثبت لها إنه تبع البوليس وقال 

_ ماتخافيش إنتي في أمان معايا بس قوليلي إنتي مين 

قالت بفرحة لنجاتها 

_ الحمد لله يارب الحمد لله ... أنا إسمي نور سامي 

_ اطمني ياآنسة إنتي في أمان هنفضل نلف شوية لحد منتوه العربية اللي ورانا وبعدين هخدك لمكان آمن بس الأول أنا لازم أعمل مكالمة مهمة .

إتصل عزت بقصي

_ أيوة يا باشا طلعت بنت وإسمها نور سامي 

هنا قصي قام وقف وهو مش مصدق إن نور الحقيقية لسه عايشة 

_ معقول البنت لسه عايشة فعلاً... إسمع البنت دي لازم تحموها بأي طريقة فاهم 

_ أمرك يا باشا 

_ هبعتلك فرقة الأسود تقوم بالمهمة معاك في حد بيلاحقك 

_ اه يا باشا من أول ما طلعت

_ مم على وضعك ياعزت هبعتلك الدعم أنا لازم أتكلم مع البنت دي وأعرف منها أكتر 

_ ماشي يا باشا 

باااااك 

أدهم مكانش مصدق اللي بيسمعه

_ قصي إنت بتتكلم جد معنى كدا إن نور اللي عندنا دي جاسوسة فعلاً ؟ 

_ ومن إمتا أنا بهزر في الشغل أو بهرز في العموم 

_ شايفك يعني هادي وسايبها كدا 

_ مش لازم تعرف دلوقتي إننا كشفناها في اللحظة المناسبة ولحد ما تيجي اللحظة دي هنتعامل معاها عادي 

أدهم بغضب 

_ بنت الإيه وربنا ما هرحمها  

قصي 

_ دورها جاي وعقابها معايا أنا شخصياً عسير بس لما يجي وقته

ادهم 

_ شخصياً 

قصي بإنزعاج وعيون مشتعلة 

_ لأنها الأفعى اللي بنطاردها بقالنا فترة 

فتح أدهم بوءه 

_ أنا حاسس إني بحلم معقول دي يطلع منها كل دا  

قصي بإنزعاج 

_البنت دي مش سهلة وبالنسبة لهم حاجة كبيرة جداً علشان كدا بعتوها لينا هي بالذات وأهي قدرت تغفلني وتحقق لهم المطلوب... خد بالك لأنك إنت اللي مستهدف بعد كدا 

_ شكلك كنت عارف من زمان إنها جاسوسة ومقولتش

_ مش كل حاجة بتتقال ياأدهم في حاجات لازم تتقال في وقتها علشان تبان طبيعية

_ أنا مبقتش فاهم حاجة كدا كل حاجة بنخطط لها باظت 

_ بالعكس كل حاجة ماشية زي ماتوقعت وخلاص أيهم والراس الكبيرة قربوا يقعوا  وأهم حاجة الراس الكبيرة 

_ إنت عرفت هو مين 

_ للأسف لا بس مرام تعرفه 

_ مرام مين ااا قصدك اللي منتحلة شخصية نور هي إسمها مرام 

_ أيوة 

_ طب أهي فرصة وأخيراً وقعت في إيدينا ياقصي 

سكت قصي شوية وكأنه بيفكر في حاجة وبعدين قال 

_ خد الأسود وروحوا لنور قبل مارجالة أيهم يمسكوها اتحرك

❈-❈-❈

جت الخدامة كاترينا وأول ماأيهم شافاها

_ كاترين يلا حضري عشا معتبر لحد ما يجيبوا البنت 

كاترينا بارتباك

_ اااا  البنت مش موجودة تحت ياأيهم بيه 

قام أيهم من مكانه وبعيون كلها شر 

_ إنتي بتقولي إيه إزاي دا حصل

_ ااا أنا معرفش ياأيهم بيه 

مد إيده ومسكها من رقبتها 

_ إزاي متعرفيش وإزاي محدش قالي 

فضلت كاترين تكح 

_ ياباشا اااأنا مليش .. ددد دخل اسألهم تحت .. ااانا مجرد شغالة هنا في الفيلا 

زقها أيهم على الأرض ونزل جري زي الطور الهايج وكلوا غضب ومش شايف قدامه 

في الوقت دا 

 الحارس المسؤول عن الأوضة اللي كانت محبوسة فيها نور كلم مرام اللي دخلت الحمام وكلمته 

_ أيوة خير متقولش إن أيهم عرف إن نور مش موجودة 

_ أيوة زمانه عرف ياهانم بعت كاترين تجيبهاله وأكيد بلغته إنها مش موجودة هعمل إيه هتصرف إزاي دا ممكن يموتني 

_ اهدى يافوزي وقوله إني أنا اللي خرجتها وإنت فكرت إنها أوامره هو علشان كدا سمحت إنها تخرج وأقفل قبل مايجي ويسمعك بتكلمني 

لسه يادوب فوزي بيحط الموبايل في جيبه هجم عليه أيهم وفي ايده الفرفر 

_ فوزااااي

فوزي الدم فر من عروقه 

_ ياأيهم باشا أنا مليش دعوة... مرام هانم من كام يوم جت و أخذتها واانا وأنا فكرت إن دي أوامرك  علشان كدا سمحت إنها تخرج 

_ إنت بتقول إيه مرام خرجتها !! 

_ اا أيوة يابيه.. صدقني أنا فكرتها أوامرك... كلنا عارفين إن مرام هانم أختك بتنفذ أوامرك  

جن جنون أيهم وكور قبضة ايده بغضب

_ مرام عملتها إمتا وإزاي... وإزاي تتجرأ وتعصى أوامري .. مرااااام موتك على إيدي يامراااام 

وزقه خبطه في الحيط زي مازق كاترين 

وجري بسرعة على فوق يجيب الموبايل بتاعه من على الكنبه فوق علشان يكلمها 

أيهم شاف سليم في وشه 

فستغرب هو رجع بالسرعة دي إزاي ولسه اللي بيراقبه قال إنه خرج من بيته لكنه مهتمش 

ومسكه من هدومه ولزقه في الحيطة وقال 

_ مرام فين 

إستغرب سليم سؤاله لأنه عارف إن مرام في مهمتها اللي هو بنفسه كلفها بيها وقبل ما يرد سليم 

 أيهم قال 

_ كلم مرام تجيني حالاً إنت سامع 

إتكلم سليم بهدوء ويمكن عدم خوفه دا من أيهم هو اللي خلى أيهم يكرهه وميحبوش لكن مرام متمسكه بيه لأقصى حد

_ خير ياأيهم باشا.. إنت عارف إن مرام مينفعش تسيب مهمتها ومينفعش تخرج من هناك في الوقت دا مش هيسمحوا لها 

بصله أيهم بشك 

_ وإنت تعرف منين مرام في مهمة إيه علشان تتكلم بثقة كدا 

سليم بنفس الهدوء

_ مرام مش بتخبي عني حاجة 

لمعت عيون أيهم بشرار 

_ ياويلك مني يا مرام... وكمان المهمة السرية بتحكيها للكلب دا.. غلطاتك كترت معايا أوي 

وبعدها زعق سليم وقال وهو بيضربه في صدره 

_ غور يالا من قدامي مش عايز أشوف وشك 

عدل سليم هدومه وجه يمشي لكن  أيهم قاله 

_ اه صحيح إنت كنت بتعمل إيه في بيتك من شوية وخارج بتتسحب... أوعى تكون يالا بتهرب من ورايا لحسابك ومفكر نفسك هتعرف تستقل وتكون كبير لوحدك... لا فوق إنت من غيري ولاحاجة ها... ولولا مرام متمسكة بيك كنت غورتك من يومها ..خليك فاكر دا 

بصله سليم شوية وسكت ومتكلمش فأيهم زعق 

_ قلت غور من وشي إنت لسه واقف اتحرك

طلع أيهم أوضته وكلم واحد من رجالته 

_ مرام تجيلي بكرة الصبح بأي طريقة وإلا هوديك ورا الشمس 

 رد وقال برعب 

_ ح حاضر ياباشا 

❈-❈-❈

أدهم خرج على عربيته وكلم عدي ومازن 

_ إستعدوا في مهمة جديدة خليكم على تأهب وأنا هعطيكم التعليمات المطلوب دلوقتي تجهزوا بالعربية  وعند الإشارة تتحركوا 

مازن

_ تمام ياباشا 

❈-❈-❈

أدهم رمى دبابيس في طريق التاكسي بتاع عزت  علشان كاوتش التاكسي يفرقع

عزت داس عليها بقصد ولما الكاوتش فرقع خرج من العربية 

_ لا إله إلا الله مين إبن الحرام اللي رمى الحاجات دي في الشارع أهو الكوتشات كلها فرقعت

  وطبعاً الخطة كانت إن عزت هيركب نور مع أدهم على إنه تاكسي تاني فقال بصوت عالي علشان اللي بيراقبهم يسمع 

_ أنا آسف يابيه الكاوتش فرقع هوقفلك تاكسي تاني 

وفعلاً شاور عزت لتاكسي أدهم فركبت نور 

عزت همسلها 

_ دا ظابط بردوا متخافيش معاه هتكوني بأمان